|
|
 تجربتى الجراحيه فى مستشفى الخرطوم ,.,.,. تراراااااااااااا
|
اول شى حابه اعرفكم على دكتورى
امير الهادى الزين النحاس
استشارى امراض النسا والولاده
اختصاصى الخصوبه والموجات الصوتيه وجراحة المناظير رجل وانسان ودكتور نادر
وياليت من امثاله كتير
وياريت الطلبه يتخذوا قدوه وحتى الدكاتره
لانه بيستحق يكون قدوه ومثل اعلى كانسان وكطبيب
وحتعرفوا فعليا ليه هو يستحق الوصف دا مع مجريات تجربتى فى كل مراحلها
,,.,,,
ونصيحه لاى امراه لو عندها اىىىىىىىىىى مشكله تمشى له وتثق بانها بين ايدى امينه بتخاف الله
عيادته فى مركز ابن الهيثم التشخيصى الخرطوم شارع الحوادث مقابل مجلس التخصصات الطبيه
,.,.,.,.,.
لان دى اول خطوه مهمه فى الرحله المرضيه ودرب العلاج
الدكتووووووووووووووووور
من اول لحظه اكتشفت فيها مرضى
وانا بقى ممكن يمر عليه يوم بكون الصباح قابلت دكتور ومسى قابلته دكتور تانى غيره
لكن من يوم ما قابلته دكتور امير ورحلة بحثى توقفت عنده
ما عارفه مصدر يقينى وثقتى بيه كانت شنو فى لحظتها
هل ثقته فى نفسه
قدرته على التحاور بطريقه سلسله ومقنعه
الاريحيه البتنبعث منو وبتحسسك بانسانيته الراقيه
غايتو لبكره وبعد بكره والسنه الجايه والقرن الجاى
ممكن اقعد اكتب فيه وما اوفى حقه
وبدون مجامله ولا لغرض شخصى
لكن بالجد لانه انسان يستحق الشكر والتقدير
عنده مركز مرموق فى لندن لكن حبه للوطن خلاه بعد عشر سنين عاشها بره يرجع له عشان يفيد اهله وناسه وبلده
يديه الف عافيه ويخليه لابنائه ولمرضاه ولمحتاجين
ويكثر من امثاله لان وطنا محتاج لناس زيه
(عدل بواسطة رانيه محمد الشيخ on 12-08-2012, 01:25 PM)
(عدل بواسطة رانيه محمد الشيخ on 12-09-2012, 02:35 PM)
|
|
 
|
|
|
|
|
|
|
 Re: تجربتى الجراحيه فى مستشفى الخرطوم ,.,.,. تراراااااااااااا (Re: رانيه محمد الشيخ)
|
فعلا إن لبدنا حق علينا
صحتنا وعافيتنا ماشى ساهل ولا هين
دى نعمه مفروض نحافظ عليها
لاننا اكيد حنتحاسب على اهمالها
دى امانه فى رقبتنا مفروض نراعيها
فى اكلها وشربها
ونديها حقها بالرياضه والمحافظه
ما لازم نطنش ونتجاوز ونأجل اى اعراض
حتى لو كانت بسيطه
لان البسيط بينبأ عن خلل يجب علينا الانصات له
بدل يكبر ويضخم ويصل مرحله يبقى صعب علينا استيعابه
ما عيب كل فتره والتانيه نعمل فحوصات ونراجع دكتور ثابت
مافى زول بيتمنى يكون مريض
ولا هو دور محبب بنتمنى نتقمصه
وعشان نكون اصحاء لازم نحرص على الوقايه
الام لازم تحرص على صحة ابنائها وزوجها ونفسها
والمسئولين لازم يشجعوا على التوعيه ونشر الفكره وتسهيلها
البدن السليم بيمنحنا العقول السليمه البدورها حتعكس مجتمع معافى ووواعى
.,.,.,.,.,.
لمن بديت احس باعراض معينه وكان ليها شهور
ومشيت لدكتور وعملت فحوصات عامه
وبرغم انه نبهنى امشى لدكتور نسا لان لفته شى ما طبيعى فى بطنى وهو بيكشف
لكن تجاهلت نصيحته لصراحه
لان كالعاده السيئه الفينا
بنعتقد ان الدكتور ما بيفهم ونحنا افهم منو
ودا ما بيعرف ونحنا بنعرف كل شى
بجانب الحوالينى البيصروا تجاهل الفكره وان دا وهم ساى وماشى مهم
ونصايح ,,, اشرب عسل واشفط حبة البركه واتمسح بالزيت وكله حيبقى فى السليم
يا امشى اتبخر وامشى لشيخ الفلان يا الفكى الكارب دى اكيد عين
حاجات كتيره حوالينا بتغطس حجرنا ونحنا ما واعيين ليها
اينعم مهنة الطب كوارثها كتيره
والدكاتره اغلبهم مصايبهم مميته
لكن دا ما مفروض يفقدنا الامل فى الكل وفى سلامة صحتنا
,.,.,
يتبع
| |
|
|
|
|
|
|
|
|
|
Re: تجربتى الجراحيه فى مستشفى الخرطوم ,.,.,. تراراااااااااااا (Re: رانيه محمد الشيخ)
|
رانيا
الف حمدلله علي السلامه
وبصراحه ود الوز عوام
انه ابن النطاسي البارع والاب دكتور الهادي الزين النحاس
فعم الهادي كان بينتبه لكل شي من نظافه المستشفي الي نظافه العاملين ولس الاطباء
كل من لديه او لديها مشكله نحكي لعم الهادي كما يحلو لنا مناداته
وبالرغم من محبته الا انه لا يتهاون ابدا في الردع --ايام نميري استباح الامن مستشفي بحري فاتصل بمدير الامن وتحدث معه بصوره حازمه
التحيه للدكتور الابن ورحم الله دكتور الهادي الزين
| |
|
|
|
|
|
|
|
|
|
Re: تجربتى الجراحيه فى مستشفى الخرطوم ,.,.,. تراراااااااااااا (Re: رانيه محمد الشيخ)
|
لمن كنت بلعب رياضه بديت احس من تمارين معينه ان فى اعراض غريبه بشعر بيها لا اراديه
بجانب احساسى ان فى زول راصى لى طوب فى بطنى
حاجه قووووووووويه حتى فى الملمس
ولمن سئلت المدربه اتحيرت
قالت لى عضلاتك قويه والبروز دا غريب
احتمال عشان اختفيت اغلب الدهون فى جسمى فبدا يظهر بالوضوح دا الخلل
مرات كتير السمنه بتخفى الامراض وهى اصلا بتكون فى حد ذاتها مرض
دا حتى لون البشره ,.,. كنت بلاحظ كتير ان لونى اتكندك وحالتى ما بحوم فى الشمس
ملامحى زاتها حسيتها غريبه عليه
عديت عليه فتره كنت شخصيا بعاين فى المرايه ما بعرف روحى
من يومين قعدت اتفرج على صور لى شخصيه
والله اتخلعت وبقيت بعاين ليها بعين مفتحه وتانيه مغمضه
فعلا المرض ممكن يغطس حجر الزول ويبشتنه
,.,.,.,
المهم نحاول نختصر ليكم الحوارات عشان ما تدقونى
يوم 5 سبتمبر بليل كنت معديه جنب عيادة جدتى ( تبقى لامى خالتها)
وقومت حنست امى تنتظرنى فى العربيه دقايق عشان ادخل اسئلها من حاجه وارجع
ودخلت و حكيت ليها الاعراض قامت عملت لى موجات وهى بتعمل فى موجات كانت مستغربه
تقول لى ياخى التجويف نظيف لكن فى حاجات فوق كده ما ياها
لمن استعصى عليها الامر قالت لى تعالى لى بكره 10 صباحا
قولت ليها استبينا
وجيتها الصباح وتانى عملت لى موجات مرتين وما قادره تصرح
وفجعتا رفعت سماعة التليفون وحجزت لى عند اخصائى موجات فى الشارع الجنبها وقالت لى امشى حسى
وفعلا مشيت وكان ليسه ما جيه
الشعور فى لحظه دى محير
اى قلقانه لكن ما خايفه
ما عارفه فى شنو لكن مهما كان الكان ما مشكله
الموت علينا حق
احتمال لانى اصلا حاسه ان الدنيا ما محفزانى ليها
ولا فيها شى مشجعنى لبكره فيها
كلها احباط وناس موجوعه وبلدان منهاره واجيال محتاره
فى لحظات اتمنيت ربنا ياخدنى برغم انهم قالوا ما مفروض نتمنى الموت
نحنا بنتمنى الراحه لان الحياه بقيت بالجد مؤلمه ومافى زول بيتمنى يتألم
المهم
جيه الاخصائى وجيه دورى
وكعادة ناسنا الظريفه
اتونس معاى وهو بيبدا الفحص
وكان فى البداية مبتهج وبعد دقايق بديت ملامحه تتبعج
وقال لى ديل ربيتيهم متين
شكلك متعزز فى العرسان مش
ما اظن ما بيجوكى
قولت له الفكره ما عرسان الفكره زوج واب
راجل نعتمد عليه مش يعتمد علينا
قال لى نصيحتى استعجلى العرس بالشايفو دا
وما فهمت فكرة العرس بمرضى شنو
وشلت التقرير ورجعت لجدتى وقالت لى نفس الكلام
فى اورام حوالى اربعه واحجامها كبيره وقايمه فى جدار الرحم من الخارج
محاولة ازالتهم ممكن تؤدى لازالة الرحم كله
وبما انى ما متزوجه وليسه عندى الفرصه انى ارزق باطفال فما بيحبوا يغامروا بالعمليه
ونصحتنى بنفس النصيحه اشوف عريس سريع
رجعت الشغل ومنها مشيت رياضتى ومنها البيت
وانا بحاول اجمع
عندى اورام ومفروض اشوف عريس
طيب هو العريس وانا سليمه طلع زيتى
لمن ابقى فى وضعى دا حيطالب بشيك ضمان عديل
طيب افتش زول كده اخلاقه عاليه يعرسنى انسانيا سنه ويفرتك
يكون يا الموضوع فلح وبقيت ام يا فشلت وشتت وانتهينا
لو كنت فى دوله اجنبيه اظن الخواجات افكارهم مرنه وممكن يتفهموا الشى دا
لكن هنا ما اظن
,,,,
قولت حسى لو نزلت اعلان وقولت عايزين عريس لمهمه مستعجله
حبقى مضحكه
واحتمال يجونى المرضانيين وعندهم كك فى راسهم وحيعملوا لى فيها جدعان وداقيين صدورهم
يا الحابيين يعرسوا فى السر
حسبتها كده قولت اخير اغامر بأمومتى وما بكرامتى
وربنا رحيم
يتبع,.,.
(عدل بواسطة رانيه محمد الشيخ on 12-09-2012, 02:52 PM)
| |
|
|
|
|
|
|
|
|
|
Re: تجربتى الجراحيه فى مستشفى الخرطوم ,.,.,. تراراااااااااااا (Re: ismeil abbas)
|
حمــد الله على السلامة
وربنا يمتعك بالصحة والعافية
ويحلي لينا قلمك السنين ده ,,,
كدي قول تجربتك في زولة جنبي بتخاف من الدكاترة يمكن الله يهديها وتشجع
تشوف الحاصل شنو ,,,,,,,,,,,,,,,,,,,,,
| |
|
|
|
|
|
|
|
|
|
Re: تجربتى الجراحيه فى مستشفى الخرطوم ,.,.,. تراراااااااااااا (Re: عمار عبدالله عبدالرحمن)
|
اخى عمار
يسلمك ويعافيك يا ذوق
الجنبك قول ليها ما تقلق
تحسن الاختيار وتطمئن
انا لقيت دكاتره بطريقه جنونيه
دكتورى عرفته من اول طله
ربنا هدانى باحساسى له
اى زول كان معترض انى اعملها اصلا
لكن احساسى كان اقوى من اى اعتراض
استخرت ربنا فى كل صلاه ان لو فيها خير ييسرها لى
واتيسرت لى بطريقه سحريه الحمدلله
اهم شى تدعى ربنا وتتخير الدكتووووووووووووووووووووووووووووور
| |
|
|
|
|
|
|
|
|
|
Re: تجربتى الجراحيه فى مستشفى الخرطوم ,.,.,. تراراااااااااااا (Re: امينة عيسى)
|
اختى امينه
تسلمى حبيبه
ووالناس بالناس
والحياه ما بتبقى بدون اغلى الناس
واغلى الناس بتعرفيها مع اصعب وقت
تجربة ساعدتنى اغير تفكيرى فى حاجات كتيره وفى ناس كتيره
الكنت فكراهم ابعد ناس منى طلعوا اقرب من رمش العين لى
والافتكرتهم عزيزين عليه وياما فضلتهم على نفسى طلعوا ابعد ما يكونوا منى
فعلا المحن بتعلم كتير
| |
|
|
|
|
|
|
|
|
|
Re: تجربتى الجراحيه فى مستشفى الخرطوم ,.,.,. تراراااااااااااا (Re: Dr.Elsadig Abdalla)
|
دكتور الصادق
شرفتنا بالطله
دكتور امير برجوعه للوطن اثبت ان الطب فعلا مهنه انسانيه
كتير غيرو كان بيتمنوا الموقع الهو فيه فى لندن
وتخلى عن كل دا كرمان مصلحة ناس بلده
وانه يعلم الكوادر الطبيه
انا لقيت دكاتره ماخدين برضو الملكيه البريطانيه لكن كانت نصايحهم لى مخذله
عديل كده قالوا لى اخير تفتشى على عرسان بدل تفكرى فى عمليه
لمن قولت لدكتور امير الكلام دا قال لى ديل ما واثقين فى مهاراتهم الجراحيه
اخويه اول ما دخلنا اول مره له طوالى سئله بعنف من شدة ما كان مفروس من الدكاتره الفاتوا
قال ليهم انتو كلكم دارسين تخصص واحد ليه دكتور يقول نعملها وتانى يقول ما نعملها
حتى فى الطريقه المتبعه فى دكاتره بيتمسكوا باقدم طرق فى العمليات وما بيحاولوا يحدثوا مهارتهم وعلمهم والضحيه بيكون المريض
بلدنا محتاج لدكتور امير والزيه
عشان ترجع له ادميته ونرفع من شأنه
كفانا هجر واغتراب
لو حتى يجوا يدوا كورسات
ما يتخلوا عن كل حلمهم
بس اقلها يعاونوا غيرهم الما قادر يصلهم
| |
|
|
|
|
|
|
|
|
|
Re: تجربتى الجراحيه فى مستشفى الخرطوم ,.,.,. تراراااااااااااا (Re: معاوية المدير)
|
الف سلامة يا رانية وما تشوفى شر
والتحية موصولة عبرك لى دكتورامير الهادى
يا زولة انتى محظوظة وعندك يمكن دخل كويس
الناس في السودان الواحد بعانى وما بمشى الطبيب الا فى الشديد لانهم ماعندهم امكانية الكشف الدورى
ربنا يكون فى عونهم
فى الدول الراقية الفيها الانسان محترم كل اسرة عندها طبيب الاسرة بعمل كشف دورى للاسرة على حساب الدولة
لكن الكلام دا فى السودان بكون فى الاحلام بث
حتى فى الخليج المواطن عندوا حق الكشف الدورى فري والعلاج متوفر فى المستشفيات فرى
السودان وين من الكلام دا
يا زولة ربنا انقذك والف حمد لله على سلامتك
| |
|
|
|
|
|
|
|
|
|
Re: تجربتى الجراحيه فى مستشفى الخرطوم ,.,.,. تراراااااااااااا (Re: وضاحة)
|
عارفه يا وضاحه
لو شوفتى الناس الفى المستشفيات وفى العيادات والصيدليات بتقولى مافى زول صحته تمام
واى شى بقى غالى
ربنا يعين الناس الما قادره
لان فعلا الوضع بقى ما ماشى سليم
ياداب صدقت فى ناس بتقيف على جنيه وعلى اتنين كرمان تكمل دوا لزول فى المستشفى
لان مستشفى الخرطوم بتخلي الزول يجيب حتى اللصاق
يعنى الما عندو ما بيقدر حتى يرقد فيها
ودى حالتها مستشفى حكومه
الخاص حدث ولا حرج
لكن دا لازم يخلينا ندافر ونستغيث بتغير الوضع
ونطالب بابسط حقوقنا الانسانيه فى الحياه
كان علاج كان دراسه
الدوله مجبووووووووره توفرهم وبطريقه ادميه وحديثه مش شيل من وشك
تسلمى يا عسل على ردك
| |
|
|
|
|
|
|
|
|
|
Re: تجربتى الجراحيه فى مستشفى الخرطوم ,.,.,. تراراااااااااااا (Re: معاوية المدير)
|
Quote: اكيد بنتعلم حاجات كتيره من كل شى بيمر علينا
وبنتعلم من البيوجع اكتر من البيسعد
ومافى احلى من السعاده بعد الوجع
بنحسها من جوانا بطريقه قيمه وبمعنى اقوى
وبنكتشف ان الحياه فيها اهم بكتير من الكنا بنفتكروا مهم
ازعل من كلمة اتقالت
ولا من فهم غلط
ولا من تصرف
دا كله ما بيسوى فى لحظات معينه
الفكره ما عمليه ووجع وجرح
|
درس عن منهجية الحياة...ومن هذه التجارب نتعلم...تقديرى
| |
|
|
|
|
|
|
|
|
|
Re: تجربتى الجراحيه فى مستشفى الخرطوم ,.,.,. تراراااااااااااا (Re: قاسم المهداوى)
|
الجميل فى مستشفى الخرطوم مبناها اثرى
بتحس انك ماشى فى العصر الحجرى
زى جامعه الخرطوم
اى شى واسع وكبير والسقف هناااااااااااااااااااك
لمن طلعنا فوق وفتشنا على الدكتوره انا واخويه
لقينا بعد مسافه وحده وقالت الجماعه ديل بيلفوا ما حسى
قريب الساعه 12 انتظروهم فى اى عنبر
شوفى اى سرير فاضى واقعدى فيه انتظريها
مشينا نتفرج على العنابر انا واخويه
لصراحه شى لا يوصف لدرجه نفسى عفيت عليه انى حتى اقعد فى طرف السرير من بشاعة الجو
بقيت واقفه جنب الباب زى التلميذه المعاقبها الاستاذ
اخويه لمن لقى وشى بيجيب الوان
قالى تعالى ننزل تحت لانه شاف دكتورى وصل
اخير نستناه قدام باب الجناح المتفقين عليه
ما صدقت انه قال كده وسبقته على السلالم
الغريبه ان فى نساوين عايشين فى العنابر بمنظرها دا
ولا البرفيووووووووووووووم رهههههههههههههههههههههههههيب
غايتو الزول ما بيحتاج مخدر ممكن يغمر من تلقاء نفسه بسببه
لمن نزلنا لقيت زميلى الحيتبرع لى بالدم وصل
كانت الساعه ياداب بقيت تمانيه وشويه
اكتشفنا ان دكتورى دخل اجتماعهم الصباحى الثابت يوميا
ما لحقنا نشوفوا
لقينا كراسى بالجنبه كده قعدنا فيها انا وبنت خالتى
واخويه وزميلى مشوا يتحاوموا فى المستشفى
انا وبنت خالتى نشيل ونتفرج فى برامج التليمطش الشغاله قدامنا
لان شكل مستشفى الخرطوم مخصصه فقط لافقر الناااااااااااااااااااس
تلقى الاتواب مغسوله ونشرينها فى الاسوار
وتلقى النايميين تحت العواميد
وما بتفرز العيان من المرافق لصراحه
الاتنين حالاتهم مهلهله
ربنا يلطف بعباده ويشفى جميع مرضاه
لكن شى مؤسف لصراحه
بتلقى طلاب الامتياز بتتجاره ولا الطلبه الليسه بيتعلموا
مولد وصاحبه غايب
حمدته ربنا امى ما معاى لانها كانت لغيت لى العمليه من المناظر
وبعد لطعه ما عارفه زمنها ظهر دكتور امير
وزى الغريق اللى لقى مركب النجاه
جرينا عليه يغيتنا
وقام باندهاش قال لى انتو قاعدين بره ليه
قولت له منعونا ندخل الجناح
ومنها هاج فى القاعدين فى البوابه
برغم الزول المنعنا اصلا ما كان فى لحظتها
قال ليهم دى بيشنت وعندها عمليه بكره كيف ما تدخلوها
دخلنا وراه وياداب بديت اشم نفسى بعديها
مشينا لعنبر القبل الولاده عشان نبدا الاجراءات
وقال لى بمشى وبجيكى يكونوا فتحوا الملف
هو شكله عنبر بيختوا فى الحوامل الحتولد قبال تولد
:)
قعدنا انا وبنت اهلى فى السرير وهوا المكيف الروعه
واخويه المسكين تلقفوا الممرضات بالروشيتات
ودى كانت اكتر معاناه
ما لى انا
للمعاى
انهم يمشوا يجيبوا الادويه والمتطلبات اللى كل دقيقه بتتكتب
يعنى ما بتكون المشيه مره وحده
لا كل ما يجوا بيرجعوا تانى
وللاسف الصيدليه الجوا المستشفى مافيها اى شى
بيضطروا يطلعوا لحد شارع الدكاتره لصيدليات مستشفى فضيل يا الجنبها
الدكتوره الجات تفتح لى الملف وتاخد منى المعلومات وتكتب لى الفحوصات وخلافه كانت بالجد سكره
لابسه ليها فستان اطول منها
وما عارفه تلملم الفستان ولا تمسك الملف ولا الشنطه
بنت اهلى قالت ليها بالغتى فى الماكس دا
قامت قالت ليها اقوليكى الحصل وما تكلمى زول
صحيت متاخره وما لقيت ملابس جاهزه البسها لبست الكنت امبارح مساهره بيه وجيت
;))))))))))))))))
وبدينا فى السين وجيم وعندك وما عندك والحصل والحتوته
استجواب عديل
وانا قاعده فى السرير متربعه
وتمشى شويه وتجينى تانى
تكون كتبت روشته لاخويه
يجيب حاجات العمليه
ويجيب الادويه والدربات البعد العمليه
ويكتبوا الورقه لزول الحيتبرع
والمشكله الوقفنا فيها ان المتبرعين مفروض اربعه ما واحد
اخويه عندو سكرى صعب يتبرع
واخويه التانى برضو
وبنت خالتى نفسى الشى ما بتقدر
وبدينا نتصل بالتليفونات
اكتشفنا اغلب الجماعه ضاربهم السلك
جيه ود خالتى معاه صاحبه ومنها صاحبه اطوع يتبرع
اتصلت بقريبى دكتور ادانا زول وصلنا لزوله وعشان نلقى الزوله دى دمنا نشف
وبقيت العمليه مرهونه بالمتبرعين
ما حيقدروا يكتبوا اسمى فى الكشف لعمليات بكره لو ما تم توفير اكياس الدم الاربعه
ويمشى ويجى الدكتور الماسك الكشف
قرب يتبرع لينا عشان يحل المشكله
واخويه يقول لى اتصلى بناسك
قولت له حسى حلم فى منو زاتو والناس فى الشغل وقدامنا ساعه فقط
اخيرا لمن قربنا نيأس الزوله الكنا ساكينها اتبرعت لينا بكيسين من عندها
وكان عندنا اتنين اتبرعوا
بكده يكون العدد تم وروحنا مرقت وولدته
:))))))))))))))))))))
يتبع
(عدل بواسطة رانيه محمد الشيخ on 12-08-2012, 04:41 PM)
(عدل بواسطة رانيه محمد الشيخ on 12-08-2012, 04:44 PM)
| |
|
|
|
|
|
|
|
|
|
Re: تجربتى الجراحيه فى مستشفى الخرطوم ,.,.,. تراراااااااااااا (Re: رانيه محمد الشيخ)
|
Quote: دكتورى قال لو ما حابه ممكن فضيل او رويال
وبالنسبه لى شخصيا مكسب المستشفيات الخاصه من حيث الاجر
لكن انا بقول ليكى مستشفى الخرطوم لمصلحتك الطبيه فى المقام الاول
ولان غرفة العمليات مجهزه بكل شى غير لو لا قدر الله احتجنا انعاش او دم
دا كله اسرع فى مستشفى الخرطوم بخلاف ان الكادر الطبى التابع له حيكون متابع حالتى ال3 يوم البعد العمليه ويشرفوا عليه
ما زى امشى مستشفى خاص ودكتورى يجى يعمل العمليه ويشتت
ما حيكون عارف باقى الامور حتمشى كيف
وفعلا كان عندو حق وكل حرف قاله حصل
والرعايه اللى لقيتها فى مستشفى الخرطوم بتشجعنى امشى تانى واعمل فيها عمليه لا قدر الله
ودا الشى اللى الاغلبيه ما توقعته
واى انسان كان مخلوع انى اعمل عمليه زى دى فى السودان وفى مستشفى الخرطوم |
ليت قومى يدركون هذه الحقيقة: ان جل المستشفيات الخاصة ليست اكثر من فنادق خمسة نجوم و بعضها مجرد لكوندات سوق عربى
و انها غير مجهزة لمقابلة الطوارئ التى يمكن ان تحدث فى لحظة
و ان وصيتنا لاهلنا حال كنا فى سفر ان اصاب اى منهم مكروه: اذهبوا للتو و اللحظة لاى حوادث مستشفى حكومى و اياكم و المستشفيات الخاصة
| |
|
|
|
|
|
|
|
|
|
Re: تجربتى الجراحيه فى مستشفى الخرطوم ,.,.,. تراراااااااااااا (Re: عمار محمد ادريس)
|
تحياتي مره أخرى
حتى في أوروبا هنا بيجونا ناس محولين من المستشفيات الخاصه للمستشفيات العامه ...مع تقديري لكلامك ولكلام دكتور أمير في أي حته في العالم فيها نظام صحي محترم ..مفروض تكون مستشفيات الدوله لها اليد العليا في كل شئ..بعد كده العاوز يمشي الخاص على كيفو..لكن للاسف الشديد رغم القصور في كثير من مستشفيات القطاع الخاص في السودان ،،،يبقى الفرق كبيرا جدا بينها وبين مستشفيات الدوله...
| |
|
|
|
|
|
|
|
|
|
Re: تجربتى الجراحيه فى مستشفى الخرطوم ,.,.,. تراراااااااااااا (Re: Dr.Elsadig Abdalla)
|
 دى السيره الذاتيه للسستر اسماء اللى الجناح اتسمى باسمها تقدير ليها
فى بلدنا فى كتير بيستحقوا التقدير
ولاسف ما بيتم الاعلان عنهم عشان يكونوا قدوه لغيرهم فى تفانيهم واخلاصهم فى الشغل
سستر اسماء الله يرحمها برغم انها طلعت معاش 2004
لكن اصريت تواصل عملها بلا اجر لحد ما توفيت 2007
واذا دل فانه يدل على انسانه عاشقه لوظيفتها وحبها لمساعدة الغير
,.,.
يتبع
| |
|
|
|
|
|
|
|
|
|
Re: تجربتى الجراحيه فى مستشفى الخرطوم ,.,.,. تراراااااااااااا (Re: رانيه محمد الشيخ)
|
جانا الزول الحيغير اللمبه
وكان سقف الحمام يعنى ما بعيد وما قريب
جاب طاوله ونط فيها وبدى يشابى على الحيطه عشان يطلع فوق السقف ويركب اللمبه
لاحظته اخويه قاعد مبتسم وكاتم له ضحكه بالعافيه
لمن الراجل اكتشف ان الموضوع عايز ترانزيستور نزل يجيبوا
اها اخويه قال لينا ما لاحظتوا
قولت له شنو
قال الرفرفه
قولت له ياتو رفرفه
قال الزول لمن يده وصلت السقف وبدى يحاول يتشابا عشان يشد جسمه لفوق
السفنجه مع رجله وكحركه تلقائيه كانت بترفرف زى البيطير
طبعا ما استوعبنا الحصل الا لمن جيه طلع تانى ورفرف تانى
وانا فكيت الضحكه ومحاسن تلكز فينى وبنت اهلى هى بتصلى ما قدرت تتماسك
بالجد المنظر كان تحفه بالرفرفه حقت السفنجه
غايتو بعد مجهداتهم برضو اصرينا نغير الغرفه
اتفرجنا على باقى الغرف
ولقينا رقم 2 اظرف وكان فيها ناس
لا حوووووووووووووووووووووله
مبشتنينا بشتنه
ما ظريف الزول ماشى ومخلى مكان يسيب الوساخه ويبهدل الحته بطريقه مؤلمه كده
نادوا لينا بتاع النظافه ادينا له حافز عشان ينضفها لينا كويس
وفعلا ما قصر
لثلاجه مرقها بره فى الممر وغسلها بمزاج من الكان فيها
,.,.,.
صورتها ليكم يوم كنت مارقه خلاص دا اتجاه باب الحمام  بالجد كانت حلوه
مشكلتها الوحيده
الصرصووووووووووور الصغير
نقتل ونقتل ونقتل وما كملوا نهائيا
لمن استسلمنا للامر الواقع وخليناهم فى سلام يتحاوموا
نهشهم ساى من فوق الحاجات
:))))))
,.,
يتبع
| |
|
|
|
|
|
|
|
|
|
Re: تجربتى الجراحيه فى مستشفى الخرطوم ,.,.,. تراراااااااااااا (Re: رانيه محمد الشيخ)
|
دا الممر الفى الجناح
انا غرفتى فى نهايته باللفه يمين فى شمال
,.,.,.
دق تليفونى على 11 اظن وكان اخويه أمير قال لى قششششششششششه ما حشيلها تعالوا اتصرفوا انتو
قولت له انتو بره
قال لى اى
مشينا انا ومحاسن لقيت العربيه مليانه لفمها عده
لدرجه ما شيفاهم جوا
:)))
ولقيت اخويه زعلان من التلتله دى وحالف ما يشيل عود منهم
وينقنق هى رحله ولا عمليه
حصيره ومخدات ومساند وكولمن وهيتر وعيش
غايتو ماما ما قصرت
جابت البيت كله معاها
;))
بدينا نشيل ونعتل انا ومحاسن
ونمشى ونجى
بتاع البوابه الفى جناح
كل مره عيونه بتتسع من الاندهاش والضحك
بعد خلصنا بقى لينا كم كيس وحيلنا مات
حنسنا امير يشيلهم بالعافيه
ورجعنا الغرفه وبدينا نرتب فى الحاجات
وعملنا الشاى وسندوتشات المربى
وكان ماما خاته جبنه وزيتون مع كواريك اخويه نسيتهم
غايتو هى حسيت بينا اننا محتاجين فعلا العضه
ولصراحه اى شى جابته كان مهم واستعملناه لاخر يوم
خصوصا يوم العمليه والعيله كلهااااااااااااااااااااااااااا واصطاف الشغل قاعدين
احتاجوا لاى شى امى جابته
دايما الراجل ما بيحب الشيل والعده
لكن وقت ما يلقوها يلوموا ما جبتوا الحاجه دى ليه
:))))
الساعه لمن جات 12
كان مفروض خلاص اقفل خشمى من اللهطى واصوم
ورقدت فى سرير مع امى
وبنت خالتى ومحاسن فى الكنبه البتتفتح سرير رقدوا
توقعت روحى ما انوم
لكن من ختيت راسى فى المخده كنت غطست فى النوم
وكنت ضابطه المنبه على 5 صباحا عشان الدكتور قال لى ابلع حبة الغده فى توقيت دا بحبه مويه بسيطه
حبه الغده
:)))))))
بركه الاتذكرتها بالحكى دا
امشى ابلعها واجيكم
,.,
يتبع
| |
|
|
|
|
|
|
|
|
|
Re: تجربتى الجراحيه فى مستشفى الخرطوم ,.,.,. تراراااااااااااا (Re: رانيه محمد الشيخ)
|
صحيت خمسه على المنبه وبلعت الحبايه ورقدت تانى
كان عندى حاله من الاستكانه والراحه عجيبه
اظن القلق والخوف كله اختفى بلا مقدمات
على سته الا قولت اخير اقوم استعد
واتروشت واتوضيت وصليت الفجر حاضر
وقعد اقرا فى يس وادعيه اديتهم لى بنت خالتى
ومنها باقى الجماعه قاموا وبدوا يرتبوا فى الغرفه
على سته ونص القى فى باب الغرفه بنات خالاتى اتنين
شكل عيلتى كلها اليوم دا ما نامت
قولت ليهم صحيتوا متين وجيتوا من بحرى لهنا
بالجد اتخلعت لانى ما توقعتهم
وبعديهم بربع ساعه القى خالى ومرته
قولت الحكايه شكلها فعلا جماعيه
مافى زول نام
خالى قال لى جيت اسلم عليكى قبال امشى الشغل عندى فيه شغله بسيطه وارجع
خالى دا اعسل خال فى الدنيا
بريده شديد
من اكتر الناس الشال همى واتصدم لمن سمع بمرضى
لمن جيه يودعنى
احتوانى بححححححححححضن كنت فعلا محتاجه له
وقال لى اشوفك بعدين ان شاء الله
لمن جابوا لى المريله حقت العمليه البسها
كنت متماسكه
ولبستها وقعدت اعمل ليهم عرض ازياء بيها
لان بالجد كانت مريحه وجميله
واكمامها دااااااااااااافيه
جات الممرضه على سبعه وشويه ولا تمانيه الا قالت لى ارح نمشى
شالوا الحاجات بتاعت العمليه محاسن وبنت خالتى
وقفوا الباقيين يسلموا عليه كانى ماشيه الدكان وجايه
ابيت اعاين فى عيونى امى
كانت قاعده فى السرير
حضنتها على السريع وقولت ليها اعفى لى
ما حبيت اطول عشان ما انهار
ومسكتنى محاسن بقوه ومشينا سوا
غايتو لحسى ما عارفه مشينا بياتو درب
كنت ماشيه وما فاهما ولا شايفه وما شايفه
الغريبه انى متماسكه
وشايفه المعاى بس حوالينى
وصلنا لغرفه الافاقه البنقعد فيها لاستعداد منتظره دكتورى
وكان فى مريضه تانيه برضو تبع دكتور تانى
بيجوا الكادر الطبى يسلموا علينا وبيتظارفوا معانا
جانى دكتور التخدير وقعد يتونس معاى برضو
لمن قاس الضغط الزول المسئول لقاه طبيعى لمن استغرب
فعليا انا كنت حاسه بروحى كويسه
ودا كان غريب
فى حاجه جوايه كده مستكينه بطريقه سحريه
لمن جيه دكتورى وبيراجع مع باقى الاخصائيين الحاجات
طلب حبوب تتجاب فورا وابلعها حسى
وعشان الحبوب دى تتصرف صحوا من النوم المدير الطبى عشان يمضى على الموافقه عليها
وشالوا الفايل حقى مع دكتور ومشوا الصيدليه البره المستشفى
جابوها
كانت اربع حبايات كبار
ولحسى ما قادره اعرف هم اصلا كانوا لشنو وليه قررهم فى لحظه دى بالذات دكتورى
قالوا لى حاولى ابلعيهم من غير مويه
قولت ليهم كويس وفعلا
ما كان عندى مشكله
زلطتهم وحده وراى التانيه
وقاموا جابوا لى شحاتت مويه قالوا لى شيلى شفطه منها صغيره
قولت ليهم هى اصلا شفطه
قصدكم اشيل شمومه
المهم لحست حبة مويه وانتهينا
وفجئه بديت بطنى تتكعبل
وما فهمت دا نفسيا ولا بسبب الحبوب
وقولت ليهم عايزه الحمام
ومشيت فى الممرات حقت قسم العمليات
الصالات فيها دائريه
والدائره فيها غرف مكتوب فيها على حسب اللى لمحتهم غرفة انعاش 1
غرفة انعاش 2
وكان فيهم فعلا ناس
زى البشوفهم فى تلفزيون
متوصليين بالاسلاك
رجعت تانى لمكانى وقعدت
كان خلاص طلعوا محاسن وبنت خالتى وخلونى براى
جيه عمو كبير لبسنى فى راسى الطاقيه
لملم لى شعراتى جواها لان كان البانده اخدوها منى وقال لى عشان ما يسحروكى
غايتو هى الشعرات سبع صوفات كانوا ما بيتسحروا
:)))))
وبعد مسافه ما بقدر احددها لانى كنت فاقده الزمن شديد
جات بنتين وقالوا لى ارح يالا نمشى
مشينا اظن صالتين ووصلت غرف العمليات
دخلنا فى وحده وانا لحظتها كنت مستغربه ان ماياها زى ما متوقعه
الشمس فى كل مكان فى الغرفه
وما شايفه غير سرير العمليات فى النص
ما عرفت انا الما لمحت باقى الحاجات ولا هى فعلا كانت فاضيه
وبدوا الناس تكون كتيره
قالوا لى اطلعى فى السرير
السرير شحاته
يعنى الزول لو رقد فيه على مقاسه بالضبط
فكوا لى المريله من ورا ومع محاوله لا اراديه منى انهم ما يفكوها
قالوا لى عادى بس حنفكها من ورا ما حنشيلها
ورقدته
فجعتا شالوا لى يدينى الاتنين وختوها فى حمالات ملصقه فى السرير
فى لحظه دى بديت احس بضيق
لانى بقيت زى المصلوبه
وما شايفه دكتورى امير ولا دكتور طارق ولا الناس البعرفهم
وكل نفرين مسكوا يد
يفتشوا فى الاورده الغطست
ومافى زول بيتكلم معاى
بيتكلموا مع بعض
وشويه جو اتنين يتناوشوا
زق السرير تحت الدائره دى
لا خلى السرير فى الحته دى
يقول له المفروض السرير تحت الدائره الفى السقف دى
يقول له ما فااااااااااااااااارقه
وشويه كان حيغيروا الغرفه وكنت حقوم
تانى اتراجعوا وقالوا لا لا خليكى خلاص ما مشكله
حسيت راسى متشوش
,.,
يتبع
(عدل بواسطة رانيه محمد الشيخ on 12-08-2012, 10:53 PM)
(عدل بواسطة رانيه محمد الشيخ on 12-08-2012, 10:55 PM)
| |
|
|
|
|
|
|
|
|
|
Re: تجربتى الجراحيه فى مستشفى الخرطوم ,.,.,. تراراااااااااااا (Re: رانيه محمد الشيخ)
|
ختاما,.,.,
بشكر ربى ولو حمدته كل باقى عمرى ما حقدر اوفى فضله ورحمته عليه
بشكر امى واخوانى واختى لانهم كانوا عون لى فى كل ثانيه مريت عليه واجتهدوا يهونوا عليه كل لحظه فيها
بشكر عائلتى اللى تكاتفت حولى وحسستنى قدر شنو الانسان ما بيسوى بدون عائله
بشكر دكتورى وملاكى اللى ربنا هدانى له وجعل الشفاء على يده
بشكر طاقمه الطبى من اكبر لاصغر شخص فيه على اهتمامهم ورعايتهم
بشكر اخواتى واخوانى الجمعتنى بيهم الشبكه العنكبوتيه ووقفوا معى بكل حب وود فعليا
وبشكر اخوانى واخواتى الما جمعتنى بيهم الحياه فعليا وما نسونى من الدعوات الخالصه لوجه الكريم
وبشكركم على ردودكم وعلى الاتصالات والرسايل الوصلتنى ودعواتكم لى بالشفاء
واسفه لو اطلت عليكم الحوار والنقنقه
| |
|
|
|
|
|
|
|
|
|
Re: تجربتى الجراحيه فى مستشفى الخرطوم ,.,.,. تراراااااااااااا (Re: طارق جبريل)
|
Dear Rania
Life is too short to wake up in the morning with regrets. So love the people who treat you right, forget about the ones who don't and believe that everything happens for a reason. If you get a chance, take it. If it changes your life, let it. Nobody said that it'd be easy, they just promised it would be worth it
Thank you
| |
|
|
|
|
|
|
|
|
|
Re: تجربتى الجراحيه فى مستشفى الخرطوم ,.,.,. تراراااااااااااا (Re: Mohieldein Siddig)
|
اخى محى الدين
من يومين كنت بحضر فيلم اجنبى او بالاصح صادفت لقطه معينه من فيلم ما تابعته لنهايه
الام بتقول لابنها
نحنا بنندم على الحاجات الما عملناها مش على الحاجات العملناها
ومقتنعا شديد بالحكمه البتقول رب خيرا لم تنله كان شرا لو أتاك
واكيد الحياه ما ساهله وبرضو ما مفروض نعافرها
محتاجين نفهم الحياه صح ومجرياتها
ويبطلوا الناس يقيموا حياة بعض ويجرحوا بعض بقسوه
لو كل انسان فكر وتمعن وانتقد حياته ما حيكون عندو وقت ينتقد حياة غيره ويحلل فيها
تسلم على ردك الطيب
| |
|
|
|
|
|
|
|
|
|
Re: تجربتى الجراحيه فى مستشفى الخرطوم ,.,.,. تراراااااااااااا (Re: رانيه محمد الشيخ)
|
الأخت رانية
ألف حمد لله علي سلامتك وربنا يتمم ليك الشفاء ويديك الصحة والعافية....
والحمد لله ربنا فعلا سخر ليك طبيب إنسان وهو زميل مهنة وتخصص وأمثاله كثيرون في السودان وخارجه ......
لا أريد أن اطيل الحديث عن أخي أمير ...
ولكنني أود ان أؤكد علي كل ما قلتيه عنه لمعرفتي اللصيقة به في خارج وداخل السودان والمستمرة الي الآن ويجمعنا هدف مشترك وهو تطوير الخدمات الصحية للمرأة السودانية
وهاجسنا الرئيسي الارتفاع القياسي لنسبة وفيات الأمهات والأعلي عالميا وعملنا الدائم علي تخفيضه والارتقاء بنوعية وكيفية التعامل وتقديم رعاية أفضل للمرأة السودانية.....
وإضافة لما ذكرتيه من خصال لهذا الطبيب الفاضل وما نعلمه نحن زملائه عنه في جمعية اختصاصي أمراض النساء والتوليد بالسودان وفرع الجمعية للعاملين بالمملكة المتحدة وإيرلندا ......
رشحنا د. أمير الهادي لمنصب السكرتير والأمين العام لاتحاد جمعيات إختصاصي أمراض النساء والتوليد (الفيجو) بإفريقيا والشرق الأوسط ومركزه الدائم الخرطوم ...
وكان ذلك أثناء انعقاد مؤتمر الفيجو في روما في أكتوبر الماضي .
وبحمد الله كان تتويجه لهذا المنصب مشرفا....
ألف مبروك لأمير وللجمعية وللسودان ...
يظهر معنا في الصورة زميلنا د. مروان إبراهيم مدير مستشفي الدايات امدرمان، وهو لا يقل إنسانية وخبرة عن د. أمير وقد قام ومعه وأربعة من زملائنا بأنجاز تاريخي وتغير جذري في نوعية ومستوي الخدمات الصحية للمرأة السودانية بامدرمان، ...
( روما-مؤتمر الفيجو أكتوبر 2012)
المؤتمر العشرين للاتحاد الدولي لجمعيات اختصاص النساء والتوليد للمنظمة
| |
|
|
|
|
|
|
|
|
|
Re: تجربتى الجراحيه فى مستشفى الخرطوم ,.,.,. تراراااااااااااا (Re: Dr.Elsadig Abdalla)
|
دكتور الصادق
حاليا المستشفيات الخاصه كوارثها بقيت افظع
وما ننكر لا قدر الله عشان تسعف مريض محتاج لاجهزه مافى الا فى المستشفيات الحكومه بتبقى تلتله
ولا حتى نقل دم
دا كله اسرع فى المستشفى الحكومى
مبنى الجراحه الجديد فى مستشفى الخرطوم قائم بذاته
عالم براه وفيه معدات حديثه
بالجد لمن مشيت فيه ما صدقت دا مكان فى مستشفى الخرطوم
اخوانى برضو اتعجبوا واندهشوا فيه
الوضع بيتغير لو حاولنا نغير ونبنى المكسور ونصلح الواقع
ونرجع لضمائرنا وانسانيتنا
بيرجع لينا الخير وبترجع لينا بلدنا
| |
|
|
|
|
|
|
|
|
|
Re: تجربتى الجراحيه فى مستشفى الخرطوم ,.,.,. تراراااااااااااا (Re: عوض محمد احمد)
|
اخى عوض
اخويه امير من شدة ما إتكيف من فهم دكتورى امير قال لى الزول دا لو قال نعملها فى الكوشه نحنا وراه
لانه خت مصلحتنا فوق مصلحته
انا شوفت قرايب لى فى مستشفيات خاصه
وحتى جو زارونى فى مستشفى الخرطوم
قالوا لى هنا الرعايه فعلا متواصله
من الصباح دكتورى بعديه الاخصائيين بعديه ناس قياس الضغط والحراره
وفى اى وقت لو احتجت لزول فيهم بلقاه
فى مستشفى خاص كانت خالتى رحمة الله عليها راقده عشان الدكتور يمر عليها بعد تحنييييييييييييييييييييس ودفع مبلغ لا يستهان بيه بيجى ثوانى وبيجرى ما بنكون فهمنا ولا شى
المستشفيات الحكوميه ممكن تكون افضل من الخاص لو اعطوها حقها
ما اظن فى زول حيصدق عمليتى بالفين ونص جنيه
برغم اى الادويه والتحاليل وخلافه كلفت اكثر من كده
لكن بكل المقاااااااااااايس ما حتصل قيمة العمليه فى المستشفيات الخاصه وما حتكون برعايه دى
التعامل مهم
يعنى المريض والناس الحواليينه مفروض يكونوا برضو ادميين مع اصطاف المستشفى
ما يجوا هاجمين ومعنفين وقاسيين
المسئله ما قروش قدر ما هى تعامل
والخطىء ممكن يحصل منو ما بيخطىء
لكن ما مفروض نضخم الاخطاء اذا كانت لا تستحق وممكن نتساعد فى تصويبها وتحسينها
| |
|
|
|
|
|
|
|
|
|
Re: تجربتى الجراحيه فى مستشفى الخرطوم ,.,.,. تراراااااااااااا (Re: معاوية المدير)
|
اخى معاويه
انا ما حزينه
ولا حاسه ان ربنا سبحانه وتعالى ما بيستجيب لى
حياتى على الوجه الشخصى فيها نعم كتيره احمده عليها
القصد من كلامى النظره العامه فى حياتنا
وكيف مجتمعنا بقى مختل
واى دوله بقى الفيها مكفيها
واى انسان بقى شايف بكره عذاب وضيق
دا كله بسببنا نحنا البشر
ولمن احس اننا عاجزين حتى اننا نصلح الدفه ونعدل وننصف يبقى فايدة حياتنا شنو
الامانه الربنا ادانا ليها ما اتصانت
لاننا ما كنا جديرين بيها
يبقى عايشين لشنو عشان نزيد الوضع سوء وانهيار
| |
|
|
|
|
|
|
|
|
|
Re: تجربتى الجراحيه فى مستشفى الخرطوم ,.,.,. تراراااااااااااا (Re: Safa Fagiri)
|
رانيا
حمد الله على السلامة
وجدعة انك اتذكرتي كل التفاصيل عن العملية وعن ما بعد العملية
انا دايما بكون قوية لغاية ما ادخل غرفة العمليات واشوف العدة والمقصات بعد كدا
بتكون اعصابي باظت تماما
واسوأ لحظة لي هي لحظة الإفاقة لانو طبيب التخدير لازم يصحي المريض عشان يتاكد من سلامة شغله
اها اللحظة دي هي الاقسى في العملية كلها
سردك جميل
وحمد الله على السلامة مرة تانية
| |
|
|
|
|
|
|
|
|
 Re: تجربتى الجراحيه فى مستشفى الخرطوم ,.,.,. تراراااااااااااا (Re: SHIBKA)
|
رانيه .. ألف حمداً لله على سلامتك ... والحمدلله أن من عليك بتمام الشفاء .. وأكيد طيبتك ودعوات كل البيحبوك .. وأكيد الناس الساعدتيهم ما راحت هباء ... فكان أن يسر الله لك مثل هذا الدكتور .. أمير الذي نسأل الله له مزيد من التقدم والنجاح وأن يكثر الله من أمثاله لمنفعة أبناء وطني المحتاجين جداً لمثل هؤلاء الملائكة ....
رانيه بصراحه قرأت كل حرف في هذا البوست ... رغم إني أهرب من البوستات الطويله .. وبخش النت مسارقه .... قرأته وكأني أسمعك تحكي لنا عن رحلة المعاناه هذه .... لست في حاجة للإشادة بأسلوبك الفريد الذي يشدك رغما عنك للمتابعه ..... ولكني بصراحة بكيت بحرقة شديدة هنا .....
Quote: صحيت خمسه على المنبه وبلعت الحبايه ورقدت تانى
كان عندى حاله من الاستكانه والراحه عجيبه
اظن القلق والخوف كله اختفى بلا مقدمات
على سته الا قولت اخير اقوم استعد
واتروشت واتوضيت وصليت الفجر حاضر
وقعد اقرا فى يس وادعيه اديتهم لى بنت خالتى
ومنها باقى الجماعه قاموا وبدوا يرتبوا فى الغرفه
على سته ونص القى فى باب الغرفه بنات خالاتى اتنين
شكل عيلتى كلها اليوم دا ما نامت
قولت ليهم صحيتوا متين وجيتوا من بحرى لهنا
بالجد اتخلعت لانى ما توقعتهم
وبعديهم بربع ساعه القى خالى ومرته
قولت الحكايه شكلها فعلا جماعيه
مافى زول نام
خالى قال لى جيت اسلم عليكى قبال امشى الشغل عندى فيه شغله بسيطه وارجع
خالى دا اعسل خال فى الدنيا
بريده شديد
من اكتر الناس الشال همى واتصدم لمن سمع بمرضى
لمن جيه يودعنى
احتوانى بححححححححححضن كنت فعلا محتاجه له
وقال لى اشوفك بعدين ان شاء الله
لمن جابوا لى المريله حقت العمليه البسها
كنت متماسكه
ولبستها وقعدت اعمل ليهم عرض ازياء بيها
لان بالجد كانت مريحه وجميله
واكمامها دااااااااااااافيه
جات الممرضه على سبعه وشويه ولا تمانيه الا قالت لى ارح نمشى
شالوا الحاجات بتاعت العمليه محاسن وبنت خالتى
وقفوا الباقيين يسلموا عليه كانى ماشيه الدكان وجايه
ابيت اعاين فى عيونى امى
كانت قاعده فى السرير
حضنتها على السريع وقولت ليها اعفى لى
ما حبيت اطول عشان ما انهار
ومسكتنى محاسن بقوه ومشينا سوا
غايتو لحسى ما عارفه مشينا بياتو درب
كنت ماشيه وما فاهما ولا شايفه وما شايفه
الغريبه انى متماسكه
وشايفه المعاى بس حوالينى
وصلنا لغرفه الافاقه البنقعد فيها لاستعداد منتظره دكتورى
وكان فى مريضه تانيه برضو تبع دكتور تانى
بيجوا الكادر الطبى يسلموا علينا وبيتظارفوا معانا
جانى دكتور التخدير وقعد يتونس معاى برضو
لمن قاس الضغط الزول المسئول لقاه طبيعى لمن استغرب
فعليا انا كنت حاسه بروحى كويسه
ودا كان غريب
فى حاجه جوايه كده مستكينه بطريقه سحريه
لمن جيه دكتورى وبيراجع مع باقى الاخصائيين الحاجات
طلب حبوب تتجاب فورا وابلعها حسى
وعشان الحبوب دى تتصرف صحوا من النوم المدير الطبى عشان يمضى على الموافقه عليها
وشالوا الفايل حقى مع دكتور ومشوا الصيدليه البره المستشفى
جابوها
كانت اربع حبايات كبار
ولحسى ما قادره اعرف هم اصلا كانوا لشنو وليه قررهم فى لحظه دى بالذات دكتورى
قالوا لى حاولى ابلعيهم من غير مويه
قولت ليهم كويس وفعلا
ما كان عندى مشكله
زلطتهم وحده وراى التانيه
وقاموا جابوا لى شحاتت مويه قالوا لى شيلى شفطه منها صغيره
قولت ليهم هى اصلا شفطه
قصدكم اشيل شمومه
المهم لحست حبة مويه وانتهينا
وفجئه بديت بطنى تتكعبل
وما فهمت دا نفسيا ولا بسبب الحبوب
وقولت ليهم عايزه الحمام
ومشيت فى الممرات حقت قسم العمليات
الصالات فيها دائريه
والدائره فيها غرف مكتوب فيها على حسب اللى لمحتهم غرفة انعاش 1
غرفة انعاش 2
وكان فيهم فعلا ناس
زى البشوفهم فى تلفزيون
متوصليين بالاسلاك
رجعت تانى لمكانى وقعدت
كان خلاص طلعوا محاسن وبنت خالتى وخلونى براى
جيه عمو كبير لبسنى فى راسى الطاقيه
لملم لى شعراتى جواها لان كان البانده اخدوها منى وقال لى عشان ما يسحروكى
غايتو هى الشعرات سبع صوفات كانوا ما بيتسحروا
:)))))
وبعد مسافه ما بقدر احددها لانى كنت فاقده الزمن شديد
جات بنتين وقالوا لى ارح يالا نمشى
مشينا اظن صالتين ووصلت غرف العمليات
دخلنا فى وحده وانا لحظتها كنت مستغربه ان ماياها زى ما متوقعه
الشمس فى كل مكان فى الغرفه
وما شايفه غير سرير العمليات فى النص
ما عرفت انا الما لمحت باقى الحاجات ولا هى فعلا كانت فاضيه
وبدوا الناس تكون كتيره
قالوا لى اطلعى فى السرير
السرير شحاته
يعنى الزول لو رقد فيه على مقاسه بالضبط
فكوا لى المريله من ورا ومع محاوله لا اراديه منى انهم ما يفكوها
قالوا لى عادى بس حنفكها من ورا ما حنشيلها
ورقدته
فجعتا شالوا لى يدينى الاتنين وختوها فى حمالات ملصقه فى السرير
فى لحظه دى بديت احس بضيق
لانى بقيت زى المصلوبه
وما شايفه دكتورى امير ولا دكتور طارق ولا الناس البعرفهم
وكل نفرين مسكوا يد
يفتشوا فى الاورده الغطست
ومافى زول بيتكلم معاى
بيتكلموا مع بعض
وشويه جو اتنين يتناوشوا
زق السرير تحت الدائره دى
لا خلى السرير فى الحته دى
يقول له المفروض السرير تحت الدائره الفى السقف دى
يقول له ما فااااااااااااااااارقه
وشويه كان حيغيروا الغرفه وكنت حقوم
تانى اتراجعوا وقالوا لا لا خليكى خلاص ما مشكله
حسيت راسى متشوش
,.,
|
لامن بقيت ما أشوف ... وخلعت عني النظارة .. وحاولت المواصلة خلال دموعي التي أبت أن تتوقف ... تخيلي مثلاً إنت سايقه عربيتك وصبت مطره ..وفجأة تعطلت المنشات عنك .... حاجه تشبه ذلك تماماً ....
ولكن أكتشفت فعلاً إنكم عائلة رائعة جداً أجمل ما يجمعكم الحب الصادق التلقائي الذي يملأ جوانحكم .... قرأت ذلك وأنت تقوليت بحميمية صادقة (أخويه) ... وأخوك الآخر الذي ربما أتي من الغربة من أجلك .. وأنت لا تستطعين أن تنظري لأمك ... وبت خالتك ... وقلدة خالك الدافئة قبل ذهابه للعمل .... ياه يا رانيه .... وتحاملك على آلامك لتعزية أولاد خالتك ... وابن خالتك الذي أتي للعربة ليعزيك ... ما تبكيني أكتر ياخ !!!! ... مثل هذا الحب والحميمية عندما يحيط بالأسره ... ينتج لنا أشخاصاً ناجحين .. محبين للحياة وللدنيا ولعمل الخير ومساعدة الغير ... الله يخليكم لي بعض .. ويديم المحبه .... ويديكم سعادة الدارين يارب ....
ألف حمداً على السلامة مرة أخرى يا رانيه ... وإن شاء الله ما تشوفي شر ... وتسلمي يارب .....
مع خالص ودي وتقديري ؛؛؛
| |
|
|
|
|
|
|
|
|
|
Re: تجربتى الجراحيه فى مستشفى الخرطوم ,.,.,. تراراااااااااااا (Re: إدريس محمد إبراهيم)
|
اخى ادريس
انت البكيتينى بردك
واعفى لى دموعك الغاليه
هى الحياه بدون الحب دا فايدتها شنو
الاسره والعائله ما شى ساهل الاستغناء عنو
برغم كل المشاكل الممكن تحصل والخلافات والمناوشات
نحنا فى الاول والاخر بشر
وكتير بنحس اننا مخنوقين من بعض
لكن الجميل ان وقت العوزه ننسى دا كله
ونقيف جنب بعض
التسامح والعفو والحب صفات بيمتاز بيها شعبنا بجداره
انا عشت فى الخليج وعشت فى مصر وابويه الله يرحمه اتوفى ونحنا بهناك سنه 1993
ما قدرت حتى ابكى وما كنت عارفه السبب لحد ما جينا السودان واستقرينا سنه 1995
كان صادف بعد شهر من جيتنا وفاة زوج خالتى
واندهشت من روحى لمن انفجرت فى البكى بطريقه هيستيريه وبنادى فى ابويه
لدرجه خالاتى وبنات خالاتى حتى الابوهم متوفى بدوا يعزوا فينى
لحظتها ياداب حسيت انى بكيته وعزيته
فعلا لمن الناس تقول السودان بناسه ما كضبوا
لان ناسنا احن نااااااااااااااااااااااااس وادفى ناااااااااااااااس
ربنا ينصر شعبنا على الجبارين
ويعود بينا زمن الخير ونشوف وطنا متماسك وشعبه بحبه ناسك
| |
|
|
|
|
|
|
|
|
|
Re: تجربتى الجراحيه فى مستشفى الخرطوم ,.,.,. تراراااااااااااا (Re: رانيه محمد الشيخ)
|
الف حمدالله على السلامه,
سرد طويل تفصيلي جميل.
وقصتك فيها الكثير , ومعلومات مفيدة للاخرين ..
التخدير عموما في السودان افضل الان , لكن لا تزال كلمة عملية بمثابة وحش وعزرائيل واكثر ..
هناك حالة من فقدان الثقة , والهواجس , والشك المزمن , حالة لايستفيد منها الطرفين ..
وكلمة عملية معاناة كبيرة للاسر والجيوب والاصدقاء .. وهذا واقع متناقض مع العالم ..
المرض امتحان , لكن في السودان امتحان جماعي و هلع وصعوبات للاسف ..
كلماتك عن معوقات اكتشاف الامراض ودور الاسر والتنظير واهمال الراي العلمي هام جدا ..
نعم نحن شعب جاهل او متجاهل . ونصنف انفسنا مثقف عنوة .. ممكن اي قريب او جار يفتي لا تعملي هذة العملية و يعطيك علاج
اخر او بلدي بكل ثقة .. وغيره وغيره ..
هذا لا يمنع ان الطب السوداني يعاني , لكن ليس بالحجم الذي نسمعة ضدة ..
تحية كبيرة للرائع د امير الزين .. فهو مثال للادب الجموحسن التعامل ..
تحياتي ..
______________________________________________________
ليتهم يعلمون ان عمر اللحظـه في بعـدك يا خـرطـوم سنين طـوال
د شهـاب الفاتح ـ كوالالمبـور
| |
|
|
|
|
|
|
|
|
Re: تجربتى الجراحيه فى مستشفى الخرطوم ,.,.,. تراراااااااااااا (Re: شهاب الفاتح عثمان)
|
دكتور شهاب
فعليا مافى زول أيدينى للعمليه بتاتا غير دكتور امير
والكل كان بيحاول يخلينى اتراجع وافكر
فعلا مفهوم العمليه هنا وكانى داخله حرب وحستشهد
وما انكر شخصيا كنت مرعووووووووبه من التخدير
بسبب القصص البسمعها
ولمن قابلت دكتور طارق حسيت بشى من الاطمئنان لانه بيوحى فعلا بالاطمئنان
نحنا بناخد الثقه من بعد ثقتنا فى ربنا سبحانه وتعالى من الدكاتره البيساعدونا نتماسك ونقوى ونمشى بلا اراده وراهم ونخت حياتنا بين ايدينهم بلا خوف
عشان كده اول ما بديت سردى نبهت ان الدكتور اول خطوه لطريق العلاج
والدكتور لازم يكون مرن وباله طويل لان المريض من كتر الاسئله ممكن يرفع له ضغطه وكثافته
دكتور امير الله يدى العافيه حتى احساس انه زهج منى ما ادانى له لمن بقيت احس بخجل من نفسى لانى نقنقاقه
وبقيت اسئله من اى شىىىىىىىىىىىىىىىىىىىىىىىىىىىىىىىى وكل مره بيرحب انى اسئل زياده
انا كان لقيت دكتور قباله من كتر ماهو كككككككككككشر ابا حتى يفهمنى حالتى
قال لى عمليه وخلاص
وكانى مفروض اقطع وشى وخلاص
اى هو فاهم وشاطر واى شى لكن من حقى يعاملنى بطريقه احسن من كده
خسارة قروش الكشف الدفعتها له
:)
دكتور امير مشيت له عن طريق ود اهله معاى فى منتدى سودانت
ويشهد ربنا ما دفعنى حتى حق الكشف لوقتنا الحااااااااااااااااااااااااالى
وحالتى مشيت له فى العياده بكم لا يحصى ولا يعد
وشمار منى فى اخر زياره سئلت الولد البره هو الكشف بكم
فالحكايه محتاجه من جممممممممممممممممممممممممميع الاطراف موازنه
عشان يحصل تغير للافضل فى الطب ومفهومنا له
ونبطل على قولك نتفلسف وخصوصا موضوع ان الصيدلى يتعامل انه دكتور ويمشوا يوصفوا له المرض وهو يصرف ليهم الدوا
ممكن فعلا يكون مافى عندهم مقدره لكشف الدكتور
لكن دا صحيا وطبيا ما صح لان الصيدلى ممكن يدى دوا غلط فى تفسير اعراض المرض
فى مره كتب لى دكتورى بتاع الجلديه مرهم ومشيت صرفته
ولمن استعملته كانى كبيت موية نار فى وشى
وغلبنى استحمل الحاصل رجعت له تانى يوم
لمن بورى الدوا قعد يضحك
قال لى انا فى روشته كاتب 5 الزول دا اداكى الجرعه 10 ودا ما بيدوا لزول ببشرتك دى لانها ما بتستحمل
لمن رجعت لبتاع الصيدليه وقربت اقتله قال لى ما كان عندنا 5
طيب ياخى قولى ما عندك مش تدينى من راسك
قريب شهر انا بتعالج بقيت من اثار الدوا الغلط
فشنووووووو مفروض اصلا يبقى فى رقابه وعقاب عشان يكن فى حرص ازيد وقليل من الفلهمه
سورى لو اطلت عليك
شرفتنى بحضورك
يديك العافيه
| |
|
|
|
|
|
|
|
|
|
Re: تجربتى الجراحيه فى مستشفى الخرطوم ,.,.,. تراراااااااااااا (Re: SHIBKA)
|
shibka
دايما دى حسستنى انك دخلتى خشروميت مره غرفة العمليات يا عسل
غايتو انا مره وحده واتأدبته
وانا فى الافاقه من كتر ما غلبنى الاعمله
بقيت اشحت ربنا ما ارقد الرقده دى تانى ولا ادخل عمليات تانى بتااااااااااااااااااااااتا
دا شى قاسىىىىىىىىىىىىى
بستغرب فى النساوين البتفضل العمليات القيصريه على الطبيعيه
برغم ان الطبيعى وجعه بيخلص فى الولاده
بعد 3 يوم ممكن تنطط زى ما عايزه
لكن فتح بطن وجراحه انا لحسى حركتى بحساب وشابكينى اياااااااااااكى تشيلى واياااااااااااااااااااااااكى تندقرى وليسه قدامى 3 شهور بحسبة الدكتور و6 شهور بحسبة المعارف وسنه بحسبة العيله انى ما حقدر اكون زى زمان واعتل الانابيب والكراتين والعب الرياضه تانى
اهاااااااااااااا دى سهولتها فى شنو بنظرتهم وخصوصا امور الفتاااااااااااء دا موال تانى عددددددددددددددددددديل
غايتو اى سسسسسسسسسسسست يكون عندها خيار طبيعى وتتجنن بقيصرى بجى اعضيها فى نخرتها
:))))
اسعدتينى بردك يا سكره
| |
|
|
|
|
|
|
|
|
|
Re: تجربتى الجراحيه فى مستشفى الخرطوم ,.,.,. تراراااااااااااا (Re: SHIBKA)
|
shibka
ان شاء الله يا غاليه
غايتو بالجد العمليات الجراحيه ارهاق نفسى وبدنى لفترات الزول بيبقى ممحن
اكتر شى حسى مضايقنى ما قادره اتحرك طبيعى دا لو شى وقع من يدى ما قادره انزل اجيبه
كإن الزول متسمر بس فى اتجاه واحد
وبيقولوا لى حكون قريب سنه حريصه فى حركتى كان ما باقى عمرى بسبب وحش الفتااااااااااااء
دا برنامجه برنامج
فعلا الزول بكامل عافيته مافى زيه
| |
|
|
|
|
|
|
| |
ياسر السر
ismeil abbas
Hadeer Alzain
عمار عبدالله عبدالرحمن
امينة عيسى
Dr.Elsadig Abdalla
معاوية المدير
وضاحة
نيازي مصطفى
قاسم المهداوى
Rawia
محمد عثمان محمد طه
jini
عمار محمد ادريس
الرفاعي عبدالعاطي حجر
طارق جبريل
elhilayla
سناء الصباغ
رشا سالم
يوسف السماني يوسف
أحمد التجانى حمودى
عادل الباهي عبدالرازق
Safa Fagiri
SHIBKA
إدريس محمد إبراهيم
فيصل نوبي
اسماء الجنيد
شهاب الفاتح عثمان
Nazik Eltayeb
محجوب البيلي
فيس بوك
تويتر
انستقرام
يوتيوب
بنتيريست