|
Re: حبيب نورة .. يا ود يا طاقة حروف .. أديني مترين من غنا (Re: حبيب نورة)
|
رحم الله أخانا عبد العزيز "الجندي"
كان يملا أزيار المسيد بيده الواحدة، ويضحك ضحكته المعروفة التي تشابه ضحكة الزين ويسأل الفكي المبارك شيخ الخلوة رحمه الله ويقول: سيدنا المبارك الجنة فيها ملاح خدره؟ تخيل أخي الحبيب حبيب رجل غاية أمنيته أكل "كسره بملاح خدره" في الجنة.ألا تعتقد أنه سيدخلها؟ إن أرحم الراحمين وأكرم الأكرمين سيدخل حبيبنا عبد العزيز جنة عرضها السموات والأرض، فقد عاش مسكينا ومات مسكينا وسيحشر بإذن الله في زمرة المساكين
| |
|
|
|
|
|
|
Re: حبيب نورة .. يا ود يا طاقة حروف .. أديني مترين من غنا (Re: Mahassin Ibrahim)
|
Quote: يا مبدعينا : نهله وحبيب نورا : لا نملك غير ان نحييكم ....ابداع لا يجاريه اى قلم مهما تجاوز حد المعقول.
عندى اقتراح طريف تجميع هذه المجادعات الادبيه صوت وصوره ....ونحن في انتظار اقتراحاتكم.
دمتم. |
تسلمي يا ست محاسن .. وإن شاء الله نطبق الفكرة دي في أقرب فرصة ممكنة ..
لكي ولحبيب نورة التحية وخالص الود والتقدير
| |
|
|
|
|
|
|
Re: حبيب نورة .. يا ود يا طاقة حروف .. أديني مترين من غنا (Re: حبيب نورة)
|
الحرفين ديل أوحت لي بيهم زولة !
واحشاني و بسأل عليها شديد
زولة صندلية
ساعة مرق صندل نداك أبنوسة نامت في الخدار تضحك تطِل في الكون شمس غرقانة في الليل و النهار لونك تفاصيل المطر مين حنّن الغيم بالسمار ؟
صوتك ضجيج الضحكة في ندرة فرح ضحكة قصايد نايمة في خاطراً سرح زمناً سمِح أتغطي بي أقواس قزح
دانت قطوف غيمك بكي ناحت عليك مقلة سحاب قشّت دموع سنبل حزين الريح تكتحوا بالتراب جيتي ومعاك صرّة عشم قمراً رحل من ليلنا غاب
قنّن حليب شمك عصُر مرتاح علي طيب صندلك أتقريف عليك نجم السما بالقمرة يوم ما بدلك صندل يدوخ من طيب نداك يعدل مزاجو .. قرنفلك !
| |
|
|
|
|
|
|
Re: حبيب نورة .. يا ود يا طاقة حروف .. أديني مترين من غنا (Re: حبيب نورة)
|
كم من حروف رسلتها حملتها الشوق والحنين وصيتها في بابك تقيف
أقف في مفترق طرق .. يتجاذبني الحنين كل إتجاه .. ماضٍ يشد على طرفي لأعود وحاضرٌ .. ينظرني بعتاب ومستقبلٌ يرنو بكل ما فيه من أمل
فيا أيها الماضي .. ما عاد يجدي النظر إلى الوراء .. فما قد مضى .. قد مضى .. ولن تكون سوى ذكرى أستصحبها معي .. وتجارب أهتدي بها .. وأمضي قدماً على ضوئها
ويا أيها الحاضر .. إنني فيك ومعك .. نسعى جاهدين لنعيش هذه اللحظات حلوها ومرها .. بكل إستمتاع وإستغراق وغداً ... ستصبح أيضاً ذكرى أخرى
ويا أيها المستقبل .. إفتح ذراعيك على سعتهما وإنتظرني بكل اللهفة والحنين .. وإن كنتا لا نعرف ماذا سيصيبنا .. لكن يحدونا الأمل على أننا سنعيشك ونتعمق في لحظاتك .. حلوها ومرها .. نهتدي بما مضى من تجارب .. ونستزيد بما معنا من ذكرى إلى أن نصبح في لحظة ما .. مجرد .. ذكرى
| |
|
|
|
|
|
|
Re: حبيب نورة .. يا ود يا طاقة حروف .. أديني مترين من غنا (Re: نهلة محكر)
|
الشوق بطّال لي زولاً طبعوا شحيح وضنين ..... الوجع الكان جواي مستور ما تكشفي حالو مرارة وخوف ... ما درتك الا تسكني الجوف... يا الصورتك سرقت حد الشوف ... أخترتك لمّن شفت الطل يا زهرة ..يغسل وشّك بالبسمات .....ناديتك تملي دريبي ...تشيلي عليك كل الخطوات... وما كضّبتي كمان يا السمحة !!! شحدتي الخطوة الجاتك تزحف بي جنحات مدّيت رجليني لقيتك هاوية !!!! بتكتم حس الفرحة الجات..... وعاد يا أنتي بعد ما فتّي كيفن يصحا الشوق المات؟؟ تعالوا نغني ...الفات الفات...في قلبوا أكبر طعنات في قلبوا....
أنا ما مسؤول ....لو كسح الريح رايات الهدنة .. وجيتك شايل الشوق مسلول انا ما مسؤول ... صـامن عيني ما ندهن ليك .... ما فطرن دسـّن فرحن بيك ....ماهجعت صحوة تفتش ليك ...بس قبل دخول وقت الاذاّن ..... مرقت دمعاتن لوعة شوق وانا ما مسؤول.
| |
|
|
|
|
|
|
Re: حبيب نورة .. يا ود يا طاقة حروف .. أديني مترين من غنا (Re: حبيب نورة)
|
انا برحل ليك... ياسفراً ما أتعرفت ليه دروب... قسوة حنيتك... مزاق الالفـة الجفوة الهم... تركيبة غريبة....زي ما حضن النيل الازرق أبيض مـويـة! وقال للناس ديك الخرطوم ... بترجــف من قبلات النيل .. ولقيتك نيل! وجيتك مركــب ... اتوكلت علي مجدافي.... شخبطت الجــزر الكانت رملة .. وبتمسح خد الموجة جفاف ... ورسمت خرايط الطين في الصحـرة وصفق النخلة .... تاكيت النيل عبيت شرياني سماحة شوفتك في أحلامي ... و أنا جيتك رويان حلقي سموم و مغايس..
ولقيتك نيل يا فجر ألهامي ... لكن في الليل الناشف نام ... أتفرّع مات في البحر المالح.. دمياط ..و رشــيد.... ما ترجعي نيل...
يتوحــّم شوقي علي جياتك .... يا حبل الفـرح السـرّي !! وكتين تغشي جنيـن وجـداني ... أسقيهُ الروعـة الرحـم الفال .... ما تشيل منو براءاة الاطـفال ... بس أفطـم فيه شقاوة الحال ..زمن الترحال
| |
|
|
|
|
|
|
Re: حبيب نورة .. يا ود يا طاقة حروف .. أديني مترين من غنا (Re: نهلة محكر)
|
نهول .. مشاوير كتيرة باغتتني محطاتها في بداية سفري غِشاني الموج بدون إنتظار لي بشاير نزيفوا وهطولوا في عروق جدول عطشان
نفسي في مشوار لي نيل حفيان لسة بمارس حوامتوا في زقاقات الخرائط من تصبح لحدّوة أوبة العصافير لي وطن طيّب !
ما تجي نمشيه سوا يمكن ما تتعزّز المطرة ولا يحرد مشيهو النيل!
ياااااه يا نحلة
الزمن السمح لسة بتوحّم علي جياتك
| |
|
|
|
|
|
|
Re: حبيب نورة .. يا ود يا طاقة حروف .. أديني مترين من غنا (Re: نهلة محكر)
|
Quote: موجة بالأشواق تعدي ..
وموجة بالأشواق تجيب
وموجة تغشاكا وتسالمك ..
وتذكرك زولن حبيب
وموجة تحضن لي ضفافك ..
وموجة بتجيبك قريب
وياتو موجة عليها نسمع ..
صوتك التريان رطيب |
نحلة
نسمة بي صوتك بتطرب و نغمة من حسّك تغنّي
ورقصة تغشاكي وتقالدك و صفقة تملاك بالتمنّي
نجمة تقدِل في سماكِ وغيمة تهطل مارقة منّي
ياتو عالم ليك نشيدوا بي قصيداً فيهُ فنّي
| |
|
|
|
|
|
|
Re: حبيب نورة .. يا ود يا طاقة حروف .. أديني مترين من غنا (Re: حبيب نورة)
|
ياحبيب
Quote: يا وليد إنشاء الله تحلا ليك الدنيا لكن ياخوي الصورة دي وين!
|
في جانبيا مطبوع اسمو === وفي عينيّ صورة رسمو
ياحبيب اجمل شيء في الدنيا ان الناس تاخد عنك انطباع جميل يعني مابتخيل في يوم انك بتكون بتشاكل ليك في زول بعد ماتكشفت لنا دواخلك والاحساس المرهف الذي يلازمك .. وفقك الله ياغالي ويعليك مايدليك
| |
|
|
|
|
|
|
Re: حبيب نورة .. يا ود يا طاقة حروف .. أديني مترين من غنا (Re: حبيب نورة)
|
نحلة ..
في صباح فيروزي مُرهق و ممعن في تفاصيلهِ المتآمرة أدركت بأن الشمس تحتفلُ معي بصوتك المنساب في دمي رويداً رويداً كشلالٍ من الضياء بعنادِ فوضي الأغاني الفيروزية في مقاهي بيروت ذات صباح بكتب باسمك حبيبي تجتاحني برفقٍ ولذاذة وتجعلني أردّد حي علي الصباح حي علي الحياة !
أريتك كنتِ قاعدة في المقعد المجاور لدهشتي
وفيروزة بتسوّي في سُواتها
أريتك ...
بجيك راجع
| |
|
|
|
|
|
|
Re: حبيب نورة .. يا ود يا طاقة حروف .. أديني مترين من غنا (Re: شمس الدين ساتى)
|
الاستاذ البانكر ( شمس الدين ساتي )
Quote: أحلى ثنائى فى المنبر ربنا يخليكم ويبعد ود خالى حامد من طريقكم |
ياخي ديل لو لمينا فيهم زمان مع شلة الحجر كان بكون في كلام تاني مع اصحابك الاستاذ محمد موسي ومحمد عثمان وعزالدين عبد اللطيف قدر ماتلف وتتاوق في البوست دا تلاقي ليك حلاوة تذكر زمان لمن كنا اطفال طيارات الهيلكوبتر البترمي هدايا من فوق في الشعبية اها عيني باردة على حبيب نورة ونهلة محكر متل الهيلوكبتر
----------------------- شمس الشعبية التي لاتغيب كيفك
| |
|
|
|
|
|
|
Re: حبيب نورة .. يا ود يا طاقة حروف .. أديني مترين من غنا (Re: لطفي علي لطفي)
|
Quote: سلام يا نهلة محكر
حبيب نورة زول جميل و بوستاتو اجمل و من اجملها اهو دي حكيرة فاجتمع المحكر مع المتحكر في حكيرتو فحكرتونا معكم فطبتم و طابت حكرتكم |
لطفي يا حبيب ياخ خليك محكّر بيجاي لحدي ما يتبيّن الخيط الأبيض من الخيط الأسود من العشق ! من أجمل المداخلات وحاتك فرحت بيها وضلوعي طمبرت نشوانة
تسلم لي إنت
| |
|
|
|
|
|
|
Re: حبيب نورة .. يا ود يا طاقة حروف .. أديني مترين من غنا (Re: حبيب نورة)
|
Quote: لطفي يا حبيب ياخ خليك محكّر بيجاي لحدي ما يتبيّن الخيط الأبيض من الخيط الأسود من العشق ! من أجمل المداخلات وحاتك فرحت بيها وضلوعي طمبرت نشوانة
تسلم لي إنت |
بس قرط علي بدون انفصال اقرا المداخلة اعلاه
العشق انه سر الوجود
الماعندو محبة ما عندو الحبة و العندو حبة محبة ما خلي الحبة
| |
|
|
|
|
|
|
Re: حبيب نورة .. يا ود يا طاقة حروف .. أديني مترين من غنا (Re: نهلة محكر)
|
Quote: أيها الود البتهبش حروفه مكامن الروح كثيرون سألوني عنك .. ولم أخصك بكل هذا لم أجبهم .. ولن أفعل .. فمثل هذا الذي نحمله .. أكبر من أن يترجم بحروف أو كلمات إنها أشياء تحسها الروح الشفيفة ويعرفها القلب النقي |
البت التساسِق في دروب الحلم الندِي " حقّو تمشي في الدرب البطابق فيه خطوك صوت حوافرك "
أنا ممنون لي طاقة الحروف البتمرُق بيها شمسك
و أنا أيضاً أنفجرت في وجهي ذات الأسئلة فأكتفيت بنصفِ إبتسامة و مضيت لا ألوِي علي شئ
| |
|
|
|
|
|
|
Re: حبيب نورة .. يا ود يا طاقة حروف .. أديني مترين من غنا (Re: حبيب نورة)
|
كت في رجاك .. والغيمة بتضلل سماي .. والمطرة بت نقط حروف .. تريانة بالريد والفرح تنزل تقالد الواطة والطين والتراب .. ويفوح عبير .. مليان محنة وشوق كبييييييييييييييييير يمد يدينو علي السحاب .. يمسح من الشمس الضباب .. وتدندن النجمات غناوي الفرحة والريد السكن جوة العيون .. وتسيل دميعات الغياب .. تنزل تفارق الوجنة والشوق الحبيس .. كم من سنين مرت هناك .. والدنيا ... "صبحت كرنفال ... تتهادى في موكب عروس"
| |
|
|
|
|
|
|
Re: حبيب نورة .. يا ود يا طاقة حروف .. أديني مترين من غنا (Re: نهلة محكر)
|
نهله وحبيب نوره ....
لكما أندى الصباحات البهية وأريج العنبر والاقحوان ....
كالقوس والكمان ... تعزفان في قلب الابداع حرفاً من الألق .. ودندنة سكرى لا تشبه أطرب الدندنات ... لكما الله على هذا التجلي الذي وهبنا كل هذا الجمال ... أتابع هذا البوست منذ زمن ولا أكاد أفيق من هذه الدهشة والبهرة التي تخلقانها في هذا الملكوت الجميل ....
أحبائي .. صدقوني ... مهما كتبت فلن أوفيكما جزء يسيراً من حقكما .... أقول لكما .. سلمت الأيادي .. وسيبقى شذى هذا العطر ساكناً في الروح ... رغم كل الأحزان ... ورغم المآلات الحزينة التي تنتظر الوطن في هذه الظروف ...
لكما أصدق ما في القلب من حب وتباهي ...
مع خالص ودي وتقديري ؛؛؛؛
| |
|
|
|
|
|
|
Re: حبيب نورة .. يا ود يا طاقة حروف .. أديني مترين من غنا (Re: إدريس محمد إبراهيم)
|
Quote: كالقوس والكمان ... تعزفان في قلب الابداع حرفاً من الألق .. ودندنة سكرى لا تشبه أطرب الدندنات ... لكما الله على هذا التجلي الذي وهبنا كل هذا الجمال ... أتابع هذا البوست منذ زمن ولا أكاد أفيق من هذه الدهشة والبهرة التي تخلقانها في هذا الملكوت الجميل ....
|
إدريس للهِ درّك وأنت تنسج حولنا غلالة فرحك الهميم والوطن يفرط في إحتساءِ حزنهِ المرير وفي صحةِ هذه الأحرف وجدتني أكثر حوجة منك لمنحنيً آخر لا يمر ببوابةِ وجعي لا أجد معني لهذا الصمت وبالكاد أتبيّن معالم نفسي التي تركضُ جزعةً نحو ليلٍ حالك السواد
ورفقاً بحبك لن أستسلم لسلطةِ هذا الحزن سأغني لك ما أستاطعت حنجرتي التصفيق !
شكرن كتيرن !
| |
|
|
|
|
|
|
Re: حبيب نورة .. يا ود يا طاقة حروف .. أديني مترين من غنا (Re: حبيب نورة)
|
الاستاذة نهلة .. سلامات
Quote: ...........
وزعني لي كل البيوت منديل عشم .. لكل خالة وكل أم لفلفني في الراس زي عمم هامات فخار .. جود وكرم ما انسد بابهم في الوشي
..........
|
صدق الفرح والابتهال والمناجاة توزيعات انيقة للبشارات والتمني واهازيج نغما كتير .. وحكاوي بالشوق تحتمي .. في القرمصيص...
كم هي اليفة هذه الابتهالات الحسية وقريبة حد التأوّه ..
حبيب نورة ...
Quote: يا ود يا طاقة حروف .. أديني مترين من غنا
قسمني للجُهَّال أمان .. وللبنيات بالعديل فستان حرير .. مشغول مطرز بالفرح أطرافو بالبهجة بتزغرد وتنتشي
|
اشتهيت شِعر البنية وهمسها.. يا ريت يكون درب الحروف طاقة غنا .. مترين قليل ما بكفوا شريان الكلام ولا عمايماً.. تبنى في عش الغرام طاقة غنا.. بستانا والمطر انتشن يا عشقها .. الممدود مراكب في الطمي والليل يطقطق في الاصابع فاردو ريدك زي مواجع وحسها .. المرسال إديّة..
============================= تحياتي لكليكما ...
| |
|
|
|
|
|
|
|