|
|
 Re: يصل الى يد الاخ/سفيان نابرى. يجده بخير (Re: حمور زيادة)
|
صاحبي سفيان ..
قريت جوابك الاسفيري حته حته .. و ضحكت من الاستغراب .. تعرف ليه ؟ لأنو فيو الشي الدايما بقولو انو السودان كان بيطلع اجيال متشابهه فجأة حصل شي ما معروف في لحظة ما معروفة فحصل تنوع غريب .. تنوع تضاد عديل يا صاحبي.
نفس الذكريات و عشق قلم الحبر المضغوط و تحديد الحرف و تسويدو .. وريحة البك لازم تمرق و تعبي الجواب .. و الام المهتمه بالكتابة لكن بتعتبرا خطيئة او تقصير في حق امومتا و واجباتا فبتتنازل عنها طوعا الا في لحظة اشبه بالغيبوبة فتمارسا.
امي كانت بتكتب شعر و قصة و بدت النشر عن طريق الاذاعة .. فجأة قررت تقيف .. لكن لما تفيق من حاضرا بغيبوبة الابداع (اتخيل زول يفوق بالغيبوبة) بتكتب شعر غنائي جميل و تسجلو بصوتا في شريط ابيض و تدسو في الدولاب.
لكن انا كنت بحب اتلقى الجوابات اكتر من اني اكتبا .. اتخيل انا طفل في الابتدائي كنت برسم مجلة قصص مصورة كاملة اسبوعيا و اعمل ليها سناريو و قصة لكن كنت بعجز عن كتابة جواب .. كانت حاجه صعبة شديد بالنسبة لي .. عدد الجوابات الكتبتها في حياتي ما اكتر من عشرين جواب ضروريات .. في اخر فترة كتابة الجوابات اكتشفت مشكلتي مع الكتابة دي .. كنت زي بطل ماركيز في الحب في زمن الكوليرا البيكتب الخطابات الرسمية بلغة رسائل العشاق (الكتاب اتعمل فيلم كلو جنس و عري حضرتو ؟ تشويه غريب رغم انو رسم الجو لكن ما رسم الشخصيات) اها انا كنت بكتب الجوابات بلغة الروايات .. في مره رسلت لامي جواب من الشمالية بحكي فيو عن اخباري .. لقيتو اتحول لرواية من سبعة و عشرين صفحة وصفت فيو وفاة واحدة قريبتي و الجنازة و حزن الناس و حال اولادا .. ما كنت بقدر افصل .. تفتكر اكون اخوك موهوب و ما كان مدي الموهبة حقها فكانت بتطلع باي خرم قلم على ورقة تلقاو ؟
زمان قريت للعقاد كلمة بيعيب بيها الفلاسفة .. انا طبعا بحب العقاد ده شديد .. قال انهم بيجعلوا اوجاعم الخاصة مشاكل عامة للبشرية .. عاين زي نبتشه و فلسفتو .. شوف حياتو و شوف شخصيتو حتلقى انو عادي يحاول يصل لنظرية الانسان السوبر مان .. عاين شوبنهور المتشائم و شخصيتو و بلاويهو ..
افتكر دي هي نرجسية المثقف او المبدع عموما .. انو يعتبر العالم امتداد ليو .. و البينفع معاو هو ما ينفع مع كل العالم .. العقاد زاتو ما نجا من الحتة دي .. قال انو الفي عقلو هو ما في عقل الله لانو ده المنطق السليم .. انيس منصور لمن وصف الناس الكتبو عن النبي صلى الله عليه و سلم قال انو واحد مشى خلف الرسول يسجل خطواتو و واحد مشى جمبو يحلل خطواتو بينما العقاد مشى قدامو يوصف ليو. اتخيل.
امبارح كنت مع طارق الامين(ألزول ده جميل شديد) و كنا بتكلم عن الابداع و المبدعين .. قال انو بيتخيل الابداع دا بيجي من وادي عبقر و ليو اكتر من باب .. كل زول بيخش بالباب البيقدر عليو و بيناسبو .. تفتكر ممكن المثقف يكون كده برضو ؟ الثقافة ليها اكتر من باب و كل واحد بيخشها بالباب البيناسبو وبيقدر عليو ؟
لو امنا بكده ما حنقول من ضروريات المثقف انو يكون و يكون. ما حيكون في ضروريات .. حيكون في اشكال للمثقف بعدد المثقفين.
دين العجايز اجمل ما فيو اليقين يا ود نابري
اليقين يا سوفي
في رحلة الحياة قد يكون العذاب جميل و بيطلع من جواك حاجات حلوه .. و كمان جاذب للنساء ما تنسى .. المثقف المعذب الحائر ده جميل شديد .. مافي انثى بتقاومو .. لكن لحظة نهاية الرحلة .. لمن تشخص .. اتخيل لي اليقين مهم .. لو ما شايل معاك تأشيرة اليقين العبور بيكون صعب.
اليقين يا سفيان اليقين.
حمور زيادة
24 فبراير 2009
الحلفايا
|
|
 
|
|
|
|
|
| |
حمور زيادة
فيس بوك
تويتر
انستقرام
يوتيوب
بنتيريست