|
|
 "بابو نمر" يحكي عن صديقه زعيم الدينكا نقوك "دينق ماجوك"
|
اهداء:
اهدي هذا البوست الى :
رودا , دينق والعضو الجديد وول اكوك.
________________________________________________________________________
يسرني ان اعرض للقراء فصلا من فصول الحوار الثقافي
بين الثقافات السودانية , كما ورد في كتاب الدكتور فرنسيس دينق "ذكريات بابو نمر".
وقبل ان نتحدث عن ذلك الفصل ,
سنروي بعضا من سيرة فرنسيس دينق :
ولد الدكتور في ابيي بجنوب كردفان عام 1938 , وتلقى تعليمه في جنوب وشمال السودان , حيث اكمل تعليمه الثانوي في خورطقت , ونال ليسانس القانون بمرتبة الشرف في جامعة الخرطوم عام 1962.ثم واصل دراساته العليا بانجلترا والولايات المتحدة, حيث نال الدكتوراة في القوانين في جامعة ييل في العام 1967.
وعمل لمدة خمس سنوات بقسم حقوق الانسان التابع للاممم المتحدة بنيويورك, وعنل ايضا خلال هذه الفترة كاستاذ للانثربولوجي والقانون في جامعة نيويورك, والقانون الافريقي في جامعة كولومبيا. كما اكمل بحثا فوق درجة الدكتوراة في نطاق برنامج جامعة ييل عن القانون والتحديث.بعدها التحق بالخدمة الخارجية وذلك في عام 1972.وقد عمل منذ ذلك الحين سفيرا لبلاده في الدول الاسكندنافية والولايات المتحدة الامريكية. ثم عين وزير دولة بوزارة الخارجية. وعمل ايضا سفيرا في كندا.
للدكتور فرنسيس مؤلفات اخرى منها:
"التقليد والتحديث", "الدينكا في السودان", "ديناميكية التعريف الذاتي ", اغاني الدينكا", "حكايات الدينكا","افارقة عالمين", "كوزومولوجية الدينكا"
-نقلا عن مقدمة كتابه " ذكريات بابو نمر".
عن الكتاب:
الكتاب هو عبارة عن تسجيلات اجراها فرانسيس دينق مع بابو نمر الشخصية المعروفة وزعيم قبيلة الحمر. وكان المقصود اولا من الحوار ان يعرف شيئا عن ابيه دينق ماجوك زعيم قبيلة الدينكا نقوك في ابيي, فما كان من بابو نمر الا ان رمى اليه بسؤال "انت هسع داير تكتب قصة حياة ابوك, منو بكتب عن حياتي انا"؟ فاجابه فرانسيس على الفور"حاكتب الاثنين".
والهدف كما يرى فرانسيس من هذا الكتاب التوثيقي وجوب التجلة والاحترام لخبرة كبار القوم والذين تشهد لهم الثقافات جميعها تقليدية كانت ام عصرية ,دينية كانت ام علمانية من ابنائهم.
ولذلك يعتبر فرانسيس ان "ان هذا الكتاب ما هو الا محاولة لجهد شخص للاستماع الى كباره,بحثا عن المعرفة والتعلم من تجاربهموبامل ان يدفع بالتلاحم والتفاعل بين ماضينا وحاضرنا ومستقبلنا الى الامام."
ومن هؤلاء الكبار يذكر فرانسيس اباه دينق ماجوك والذي قرر الكتابة عنه "ليس فقط لانه شخصية فذة (غير عادية) كزعيم قبلي وراع لعائلة كبيرة تضم حوالي مائتي زوجة وعدة مئات من الابناء,بل يضاف الى ذلك حساسية المنطقة التي كان يديرها بنجاح,والتي تجاور اربع محافظات,هي جنوب كردفان وجنوب دارفور وبحر الغزال وأعالي النيل."
ويعتبر فرانسيس ان غرض هذا الكتاب"ليس في تشريف بابو نمر فقط, بل وفي طرق ما اعتقد انه ما زال مخزونا من ثروات الخبرة والمعرفة التي يمتلكها كبارنا التقليديون والذين بذلو الكثير لنا ولبلادنا".
ويرى فرانسيس ان بابو نمر "رجل ذو صفات متميزة".
ويرى ايضا انه –أي بابو نمر-"يتميز بطريقة اسطورية تجمع في وعاء واحد ماضينا وحضرنا ومستقبلنا.. فهو شخص قد حاز على تقدير رجالات الادارة الاكفاء في عهد الادارة البريطانية في السودان,فضلا عن انه, والى اليوم ينظر اليه القادة الرسميون والشعبيون على السواء , على انه انموذج حي للحكمة التقليدية ومسايرتها لروح العصر في السودان, وان كلماته لا تعكس المعرفة التقليدية فقط, ولكنها تجمع معها العبقرية اللغوية. وفي اخر المقدمة يتحدث فرانسيس عن صفة مميزة لبابو نمر وهي لهجته الموروثة و"روحه الخفيفة المرحة, وقدرته الفائقة على التعبير المحلي بنكهة لهجة المسيرية".
وقد صدق فرانسيس في كل ما كتب وكلي ثقة انكم ستستمعون بالحوار وبعبقرية تلك الاجيال التي جعلت السلام والتعايش بين الثقافات ممكنا .
وبعد الحوار-الذي سنعرضه في حلقات- ساتحدث عن اراء فرانسيس دينق حول دور القيادات في منطقة ابيي .
فالي مضابط الحوار:
|
|
 
|
|
|
|
|
|
|
|
كيف التقى بابو نمر بدينق ماجوك: (Re: osama elkhawad)
|
1- كيف التقى بابو نمر بدينق ماجوك:
فرانسيس دينق:
طيب يا عمي الناظر انت عارف الهدف من التسجيل ده,
وما في لزوم انا ادخل تاني في كل التفاصيل.
وندخل في الاسئلة عن دينق ماجوكزوزي ما عارفين معرفتكم بترج لايام ما كنتم صغار.
لذلك الواحد بتوقع منك الكلام الكثير وكل ما كانت في تفاصيل كل ما كان احسن.
واذا بتذكر اشياء معينة كاحداث لتدعم حديثك برضه يكون كويس...
افتكر ممكن نخلي ده طالما قبل كده سجلنا لبعض وقلت لي الكلام ده كله.
ممكن تورينا المناسبة اللي قابلت فيها دينق ماجوك لأول مرة, والظروف ذاتها كانت كيف؟
بابو نمر:
والله دينق ماجوك ده كان صبي...
وكان في الدقادق بره ومعاه دينق ابوت,واخوانه بيونق واروب ابوفلجووهم اخوان اشقاء.انا واروب قدر بعض مولودين في سنة واحدة.اروب ابوفلج اصغر من بيونق.واخواته ناس اين وابول وأوار ديل انا بعرفهم.دينق ماجوك كان في الدقدق.
ملاقاتنا كانت ضعيفة,ما دايما,لأننا لما نحن العرب نجي في البحر هنا ,هم بيقطعوا الجرف بمشوا جهة بارليل بيغادي.والمقابلات دي ما بتم الا اذا هو جاء ابيي لناس أبوه,لكن كان صبي تمام.هو لابس لباس الدينكا .....يعني العاج بتاع السن والسلوك البعملوها في اليد دي يعني طبعا منكسي لابس.لكن يعني المعرفة سنة 1923 هو جاء عندنا في فريقنا في اللو. دي اول مرة انا شفته فيها.اتاري كان بين ابونا الناظر كوال ووالدي نمر تفاهم.
ودينق ماجوك كان عاوز بتزوج.وبعدين ابوي قال ليه يا الناظر كوال,دينق دا ولدي.لما يجي اتزوج انت اديني خبرعشان انا ادفع بقر في الزواج ده عشان بعدين زوجته لما تجيب الاولاد والبنات ويتزوجوا اولادي يكونوا شركاء فوق المال بتاع الزواج بتاعهم.
الكلام دا بيناتم انا سمعته في الاخر.لكن دينق ماجوك لما جاء ساق البقر سنة 1923 نحن كنا مصيفين في اللو.جاء راكب جواده ,ومعاه اربعة خمسة صبيان شايلين حرابهم.الناس قالوا ده دينق,ده دينق ماجوك ود كوال,ده دينق ماجوك ود كوال, ودي اول مرة انا شفته فيها.
وبعدين الناس الكبار قاموا مسكوا الجواد ونزلوهم وجابوا العنقريب..
.ختوه جنب والدنا,وقعدوا يتونسوا.دينق ماجوك من زمان بيعرف عربي,لكن عربيه ما كثير.
كان بيسمع اكتر مما يتكلم كلام العرب.بعدين في العصر,هو ومعاه والدنا والجماعة المعاه دول مشوا نزلو في الرهد تحت في الرقبة في اللو.مشوا محل البقر هناك.بعدين والدنا عزل ليهم بقر زي خمسة ستة ما عارف عددهم بالضبط.ساقوهن وراحوا.ساقوا البقر لزواج المره.دي اول مرة انا شفت فيها دينق ماجوك.شفته كده ساكت بدون ما يعرف انا وين.
| |
|
|
|
|
|
|
|
|
|
"ونسات بابو نمر مع صديقه دينق ماجوك" (Re: osama elkhawad)
|
-ونسات بابو نمر ودينق ماجوك:
فرانسيس دينق:
ممكن توصف لينا الظروف اللي كنت بتقابل دينق مجوك فيها؟او اللي سمعت عنه فيها؟يعني اي ظروف كانت تجمعكم او البتخليك تسمع عنه...انت الحقيقة بديت قبيل تتكلم لما تمشوا البحر كان بيجيك بعد ما بقيب ناظر.
بابو نمر:
بقينا اصدقاء, وانا في الحقيقة بيني وبينه معاهدة خوة, قسم.
فرانسيس دينق:
فكرة القسم دي جات كيف؟
بابو نمر:
عشان و راجل اخوي.وكمان عشان بعرف الاشاعة هناك, ان ابونا كوال بفضل دينق ابوت للنظاره, وان الاشاعة بتقول دينق ابوت,دينق ابوت, وعشان هو عايز يكسبني اكون بجانبه. عشان كدا عملنا المعاهدة ......الخوة.
فرانسيس دينق:
المبادرة منكم ولا في زول كبير جاء ونصحكم؟
بابو نمر:
لا ما في زول كبير جاء.انا وهو لما نقعد , بجيني نتونس كده وبعدين الناس لما يتعشوا, والناس يفروا, انا وهو مرات نقعد لغاية الساعة اطناشر بالليل بنتونس. يقعد معاي تلاتة اربعة يوم وبعدين يمشي. انا لنا نمشي ابيي هناك برضه نفس الشئ. هو كمان بيجيني في القدقد بره. بيجيني نقعد خمسة يوم , ستة يوم مع بعض بنتونس.
فرانسيس دينق:
تتونسوا عن شنو؟
بابو نمر:
اغلب ونستنا بتدور عن الرئاسة . الناظر كوال بقى راجل كبير وعجوز, وتقريبا الاوامر بتاعت الحكومة يعني ما بنفذها ماية بالماية ونحن يعني عاوزين دينق ماجوك. وقلنا يعني زي ناس الخرطوم بيقولوا فلان بلمعوه...بلمعوه عشان يبقي كده كده. ونحن بنلمع فيه لليوم اللي نحن دايرنه فيه..حتى ان مجاك بيجيني هو مع الناظر بيقول لي يا فلان دينق مجوك ده, الشغل ده ما حقو يا ولدي, الكلام ده خليه. الشغل ده ما حقو , ده حق دينق ابوت. لغاية ما انا اقول برضه يا الناظر ده ولدك انت . واذا كان عند دينق ابوت او دينق ماجوك انت ما خران حاجه. واسه ما حصل شي . ولغاية ما بعدين كوال كان مرض, وخلاص زحينا . وعندما يذكر اسم دينق ماجوك كان الناظر كوال بيقول ده ما تذكروا اسمه, بتاع العرب , ناظر الاكل. لما العرب يجوا بيضبح ليهم وبيكرمهم , ودينق ابوت ما بدور العرب كلو كلو.
فرانسيس دينق:
جميل, برضه حنرجع للنقطة دي بعد شوية. هل سمعت شي عن طفولة دينق ماجوك لما كان صغير ولحدي ما كبر؟كنت بتسع شي عنه يعني كولد كانت اخلاقه كيف؟
بابو نمر:
حسب السمع...هو اصله يقولوا ليه دينق ماجو, بقت دينق ماجوك. وماجوك دي تسميتنا, لكن بيسموه دينق ماجو. وماجو ده كان عنده كلب صغير مربيه لما يشرب اللبن بيدي اللبن ده للكلب, بقى الكلب زي اخوه, سموه دينق ماجو.من صغير كده عنده ميزات بتاعت زعامة. من قام يهني بيحترم وبيكرم الناس وكده.
وفي هامش في نفس الصفحة اي "38 " علق فرانسيس دينق على كلام بابو نمر موضحا الاتي:"بينما ماجو لقب عند الدينكا ماريق, الا ان العرب والدينكا في الجنوب حولوا هذا الاسم الى ماجوك , وهو اسم مدح مبني على لون ثور الابن الاكبر من الزوجة الاولى . وهذا اللون كان يستحقه دينق ابوتو لكن مجرد التسمية اعطت دينق ماجوك صفة الابن الاكبر." ثم يواصل فرانسيس اسئلته وتعقيباته
.
فرانسيس دينق:
كنت بتسمع شي طبعا, ولو انك تكلمت عن الموضوع ده, لكن هل في تفاصيل ممكن تقولها عن العلاقات بين دينق ماجوك وابوه كوال اروب ودنيق ابوت, مما هم صغار.الحقيقة انت تكلمت في الموضوع ده, عن مسالة النظارة وكده.لكن هل في اي تفاصيل زيادة تقدر تقولها عن علاقة دينق ماجوك مع ابوه مما هو كان شاب لحدي ما عملوا منافسات في النظارة وكده, وعلاقتهم مع دينق ابوت ذاتها كعلاقة شخصية بتاعت اخوان او بتاعت ناس متنافسين؟
بابو نمر:
والله علاقته مع اخوه دينق ابوت ما ظهر حاجة عدائية شخصية بالمرة لاخر لحظة. وبرضه ما سمعنا ابوه تكلم معه كلام غير لائق في الموضوع ده بالمره. يعني عايشين كويس وكل زول ماشي بفهمه.
فرانسيس دينق:
يعني المنافسة ظهرت في الاخر بعد ماكبروا؟؟
بابو نمر:
بعد ما كبروا . دينق ابوت وابوه الناظر كوال شافوا انه دينق ماجوك اصبح معانا نحن حاله واحده. والمفتشين لما بجوا دايما يجلسوا معنا نحن وهو.وشافوا دينق ابوت واقف بعيد شوية. فهم خشوا الزول دا اذا كان كوال بقى ما في, الزول ده يستلم الكرسي والرئاسة. وما ظهر نهم كلام شين .لكن مجاك والناظر ذاته ابونا الكبير كوال بيجوني وبيقولوا يا فلان الكلام دا شنو؟يا فلان الشغل دا ما حق دينق ابوت.وانت تسوي كلام زي ده؟الكلام ده كلام العرب.لكن كلامنا نحن الشغل ده حسب العوائد بتاعتنا...واذا كان انت خليت العوائد بتاعتنا والله ده بيجيب خراب للبلد.واذا كان تمسك دينق ماجوك غير العوائد, والله ده بيخرب البلد.ده كان كلامهم.
فرانسيس دينق:
لكن اللي كان حصل .ز يعني في الوقت داك.. بس علاقة بينك وبين دينق ماجوك وخوة وصداقة,فعندما كانوا بيجوا بيقولوا الكلام ده,هل قصدهم يعني انت تلمع في دينق ماجوك واللا قصدهم توفق الصداقة البينك وبين دينق ماجوك ,بالضبط الحصل شنو اللي خلاهم يقولوا خلي ده لانه ساكت كنت صديق لدينق ماجوك؟
بابو نمر:
ايوه انا صديق لدينق ماجوك.ودائما يعني الناس كلهم بيفتكروا يعني فلان صديقه دينق ماجوك.والمفتشين الانجليز دائما يقدروا كلام فلان.. وما دام دينق ماجوك انطبق معاه هو حيشيل النظارة.
| |
|
|
|
|
|
|
|
|
|
دينق مادينق وزيجاته الكثيرة (Re: osama elkhawad)
|
-دينق مادينق وزيجاته الكثيرة-
فرانسيس دينق:
الشي اللي الناس كانوا بينتقدوا دينق ماجوك فيه ويكادوا يكونوا اجمعوا في نقدهم لدينق كان موضوع الزواج.فماذا كان موقف العرب وموقفك انت بالذات كصديق ليه في مسالة الزواج؟
بابو نمر:
والله مسالة الزواج دي ,طبعا حسب العوائد بتاعتهم, مافيش تعداد للنسوان الواحد يتزوج حسب استطاعته المادية وصحته.لكن نحن بنشوف انه هو تعدى الحد المعقول.يعني انا ما حسبتهن لكن بيقولوا اكتر من مائتين مرأة.فكل الناس بيقولوا,والله دينق ماجوك ده شنو مسالة النسوان الكتار ديل؟وديل بيعيشن كيف؟وكانت الجزية بتاعت الدينكا ما بتجي كلها وبيقولوا الجزية دي لازم دينق محصلها ومعيش بيها النسوان ديل لانهن كتار بيأكلن شنو وماهيته كانت قليلة؟فلازم يعني,الطلبة دي ما بتجي كلها.ويكون هو تصرف فيها لصالحه.والكلام ده لا انا جاهرت بيه ولا الحكام الموجودين جاهروا بيه.لكن كلام تهم بره
فرانسيس دينق:
لكن ابدا ما تكلمتم عن قصة الزواج ده عندما شعرت انه تجاوز الحد المعقول؟ما تكلمتم في المسالة دي ابدا ونت ودينق ماجوك؟
والله ابدا ما حبيت اتدخل في المسائل اللي زي دي.حتى هو ذاته,انا وهو بنتونس,قال لي يا فلان انت شيخ كبير وتتزوج اربع نسوان بس عشان شنو؟ليه ما تتزوج زيادة؟قلت ليه والله زي ما انتم تتزوجوا بدون تعداد,نحن برضه عدنه عدد محدد باربعة. الواحد ما بقدر بزيد علينه,ممكن يتزوج اقل لكن مض اكتر بعدين قال لي ما تعمل استئناف للسيد عبدالرحمن عشان يزيدك؟قلت ليه السيد عبدالرحمن رقبته ذاتها ما بيقدر يزيدها لانه دا قانون قديم بتاع الدين بتاعنا.
فرانسيس دينق:
في الحقيقة انت تكلمت في مسالة الزواج ده,وقلت كان بيخلي الناس يتهموه انه عنده شبه فسادووربما كان بيستغل اموال الدولة لعيشة العائلة وكده.يعني هل كان في ناس بيحسوا بنفس الشئ؟
صحيح انت قلت ما ذكرتم حاجة في الموضوع دا.
بابو نمر:
لا ما قلنا حاجة... وانت تتذكر انا وانت لمن جينا من هناك والعربية خسرت في بابنوسة..وانا وانت كنا بنتونس.. انت صغير لكن راسك كبير مما كنت صغير...لوما جبنا سيرة الزواج والأولاد وكده..انت ذاتك قلت لي ياعم فلان نحن ذاتنا بنشوف ابوي في المستقبل حيضعنا في حرج لانه راح يخلي ذرية كبيرة,والذرية الكبيرة دي محل ما نمشي تلقى اولاد ونتات من دينق ماجوك ونحن ما ممكن نقدر نمسك ونعيش العدد ده كله العيشة اللي نحنا بنرضاها لعايلتنا...فنكون زي محرجين...يعني في المستقبل هو حيعمل لينا حرج
.
فرانسيس دينق:
دا الحاصل لينا دلوقتي بالضيط. في حواري مع الدينكا وحتى مع العرب طرحت السؤال الخاص بموضوع النساء وكلهم قالوا دينق ماجوك ما كان بيسئ لاموال الدولةووربما كان ده عباره عن مجاملة لي انا كابن لدينق ماجوك..عشان كده كنت بسالهم سؤال اخر..يعني مصدر ماله كان شنو؟وهل كان لديه مصادر بخلاف دخله المعروف الواحد يقدر يشير ليها ويقول انها ممكن تجيب ليه دخل معقول يعيش العايلة؟يعني مصادر شرعية كان ممكن تجيب دخل معقول يعيش العايلة؟الدينكا كانوا دايما بردوا على مسالة الزواج باعتباره كاستثمار,يعني عندما تتزوج والمرأة تنجب بناتوالبنات ديل لمن يتزوجن بدخلن بقر من الزواج,وانت كمان تكون عدك صلات واسعة مع الناس نابعة من ا لزواج..واي بت قريبة لزوجتك لمن تتزوج برضك بتشترك في يقر الزواج,يكون عندك نصيب من بقر الزواج...قالوا العلاقات الكثيرة دي ساعدت دينق ماجوك في توسيع دخلهووبالذات لانه ناظر فأي حق ليه ومن اي قرابة الناس كانوا يستعجلوا يجيتوه ليه.تفتكر ده كان يعني دخل محترم بالنسبة لاحتياجاته؟
بابونمر:
والله ,الحقيقة يعني الدينكا بفتكروا ان الزواج بمال كتير يجيب البنات.... والبنات يجيبن المال...انا بذكر أخت الناظر دينق ماجوك.. اللي كان اخدها واحد من البنقو...ابول... انا قلت ليها يا ابول .. وكان عمي رحمه الفريع,قلت ليها الزول المن بنقوده قال بدفع ستين بقرةوانا بدفع سبعين واتزوجكزضحكت وقالت لي انت ماك اخوي, كان انت تزوجتني دينق ما بشيل منك مال.يبقر انت ودينق ما ليقيتو مال. احسن انا اتزوج الزول دا عشان انت ودينق تجيبوا نسوان اخرات.لكن لمن تتزوجني دينق ما بشيل منك مال.
| |
|
|
|
|
|
|
|
|
 Re: "بابو نمر" يحكي عن صديقه زعيم الدينكا نقوك "دينق ماجوك& (Re: osama elkhawad)
|
شكرا يا أسامة
أنا من المعجبين بالدكتور فرانسيس دينق.. وأظن أن الأستاذ مايكل الذي درسني اللغة الإنجليزية في مدرسة الأبيض الثانوية أواخر الستينات هو أحد إخوته.. كما أنني أعرف أخاه الدكتور زكريا بول دينق الذي كان في فترة من الفترات وزيرا إقليميا للصحة في حكومة الإقليم الجنوبي.. وقد عملت هناك بين عامي 1979 و 1982، ومنها ازدادت علاقتي ومعرفتي بالجنوب وبأهله..
كما أنني من المعجبين بشخصية الناظر بابو نمر، وبأمثاله من الرجال الأفذاذ، وأشكرك على هذا البوست الذي أرجو أن يكون مصدرا كبيرا للمعلومات..
أشد على يدك وأشجعك يا أخي أسامة على الإكثار من مثل هذه البوستات.. تأكد أن هذا فصل دراسي يجلس فيه كثير من الشباب التواقين للمعرفة وهم سيكونون من أسس مستقبل السودان..
ياسر
| |
|
|
|
|
|
|
|
|
|
Re: "بابو نمر" يحكي عن صديقه زعيم الدينكا نقوك "دينق ماجوك& (Re: osama elkhawad)
|
العزيز أسامة،
أو "أسامة الأوروبي المركزي"،
تحياتي
ذكرني هذا البوست بالمتعة الكبيرة التي وجدتها قبل زمنٍ طويل في قراءة "ذكريات بابو نمر" لفرنسيس دينق، كما حثني أيضاً على متابعة قراءة كتاب فرانسيس دينق "رجلٌ يُدعى دينق مجوك، سيرة زعيم ومجدد"، ترجمة بكري جابر، صدر عن دار الدراسات السودانية في عام 2000. حيث لم يتوفر لي الوقت لمواصلة قراءته.
أتمنى أن يهتم الباحثون والمؤرخون السودانيون بتدوين شهادات الشيوخ الملمين بتاريخ ثقافاتهم قبل أن يفوت الآوان. فكما قال المؤرخ العلامة آمادو آمباتي با: "إذا مات في أفريقيا شيخٌ أو شيخةٌ، فكأن مكتبةً كاملة قد انحرقت". ولنا في السودان "مكتبات" حيّة لا بد من الإسراع في جمع دررها، خاصةً في المناطق التي لم تحظ بالاهتمام الكافي في أمر التعريف بثقافاتها.
نجاة
| |
|
|
|
|
|
|
|
|
|
بابو نمر :دينق ماجوك انسان عادي,كريم, شجاع وعادل (Re: osama elkhawad)
|
كيف كان دينق ماجوك محترما ومحبوبا من العرب:
فرانسيس دينق:
طيب في سؤال تكلمنا فيه تقريبا...كانوا بيقولوا ان دينق ماجوك كان قريب للعرب كتير.وبيقولوا العرب,وبالذات انت ساهمت في قصة انه يبقى ناظر.ممكن توضح لينا بصورة اعمق,انت وضحت لينا كيف ان صداقتكم كانت تلميع لدينق ماجوك عشان يبقى ناظر,لكن ممكن تورينا تفاصيل زيادة عن دور العرب,وبالذات دورك في ان دينق ماجوك بقى ناظر في الاخر؟؟؟
بابو نمر:
أيوه,كنت انا وكل العرب الموالين للدينكا هناك-اولاد كامل ومزاغنه-بنشعر على ان دينق ماجوك انسان كريم.يعني لما يجوا هناك كان انسان بيحترمهم وبيكرمهم وبتفاهم معاهم في اي موضوع.حتى انا بتذكر يوم داك في واحدين من ابيور والكلابنة ادوسوا عصر على جبهة فضل الله هنالك. انا كنت ما في و جاء دينق للمكان.ولما جاء قال ليهم يا كلابنه النظاره بي هنا والرجاله بي هنا تمسكوهم الاثنين؟لا شيلوا واحدة وواحدة خلوها ,.يا امسكوا النظارة وخلوا الرجاله,ويا امسكوا الرجاله والنظاره خلوها.لكن تبقى النظارة عندكم والرجالة عندكم دا ما صاح.انبسطوا جدا من كلامه ده وقالوا نخلي الرجالة.بس كفانا النظارة. فهو الحقيقة لما بقى ناظر,ظننا فيه لقيناه. والله ,نحن هناك اي زول يجي في المحكمة قدام دينق ماجوك , ما يكون عندنا اي شك انه بيطلع مظلوم من قدامه..يعني بديه الحق تمام .ده شيئ يعني نحن كتأكدين ما بلقوه من دينق ابوت. ولا حيلقوه من ناس دينق اكنون واللا حكاية من النوع ده. لكن دينق ماجوك نحن مطمئنين لاهلنا البيجوا قدامه
فرانسيس دينق:
ايه الصفات اللي كانت بارزة في دينق ماجوك سواء كرجل أو كانسان أو كناظر؟ايه الشيئ اللي كان بارز في شخصيته؟
بابو نمر:
والله دينق عنده صفات الزعيم.
أولا عادي وكريم وما بخاف الحق.
اذا كان زول ما مثلا ما كويس يكلمه.
وانا في البحرهنا لمن يكون في اي حاجة واللا كده بين الناس,انا برسل ليه وهو ذاته بيجيني. وانا وهو نمشي سوا للمشكلة بتاع العرب دي عشان نحلها.
والعرب بيقبلوا كلامه.يعني محترم جدا عند العرب.
انا باخده معي للمشاكل بتاعت العرب عشان نحلها.كان جاء في المجلد هناك,برضه في اي مشكله,ولا عندي غرض,انا وهو بنركب سوا فوق الخيل وبنمر ناخد سبعة يوم,تمانية يوم في القبيلة بره بخيمتنا مع الناس.اي مشكلة وا اي حاجه يعني بحلها معنا بكل امانة
.
| |
|
|
|
|
|
|
|
|
|
Re: "بابو نمر" يحكي عن صديقه زعيم الدينكا نقوك "دينق ماجوك& (Re: osama elkhawad)
|
الاستاذ المخضرم/ اسامة الخواض/ تحية طيبة مباركة:-
منذ ان تركتنا في بيروت نكابد شظف العيش/ والكتابة/ كنت ابحث عن عنوانك/ واصداراتك/ ومقالاتك/ وللاسف لم اعثر عليها الا من خلال سودانيز اون لاين- ما زلت اذكر ذكرياتنا عندما كنت تاتي الي في الناطورية بحي السلم بضاحية بيروت الجنوبية. كلمات سرت على لساني وذكريات انسابت بتلقائية..
احييك عن البوست وكالعادة كان اكثر من رائع... لانه يهمني بصفة شخصية... كوني انتمي الى تلك الاصقاع.. لم يترك لنا النظام اي صيغ تعايش... الا وحاول ضربها.. ونسفها ولكن بالرغم من ذلك كانت العلائق... والوشائج.. بين المسيرية "اهل بابو نمر" وبين دينكا انقوك اهل "دينق مجوك وفرانسيس دينق" مستمرة.. وستستمر.
اتابع البقية... واكون ممتنا لك... اذا ارشدتني الي كيفية الحصول على مؤلفات البرفسور فرانسيس دينق..
| |
|
|
|
|
|
|
|
|
|
Re: "بابو نمر" يحكي عن صديقه زعيم الدينكا نقوك "دينق ماجوك& (Re: osama elkhawad)
|
اخي محمود "الناطور"
طبعا كلنا كنا "نواطير"
وكلمة ناطور تعني "الغفير" في العامية العربية السودانية
واجمل كلام عن كلمة نطر سمعتو من سيدتنا الرائعة والاهتنا الحديثة في الغناء:
فيروز :
نطرتك بالصيف
نطرتك بالشتي
وانا اشتغلت ناطور في اكتر من حتة
ولي محاولة لان اكتب عن تجربتي تلك
لقد نشرت كتابين عن مركز الدراسات السودانية:
انقلابات عاطفية -ديوان شعر-
خطاب المشاء-نصوص النسيان-
معليش لو كان عندي نسخ كان ممكن ارسلها ليك
المركز اتحول من القاهرة للخرطوم
اذا اردت ان تحصل على كتب فرانسيس بالعربية
هنالك مركز الدراسات السودانية
وترجم له "صراع الرؤى"
وهي ترجمة غير موفقة كما اري لكتابه بالانجليزية:
War of Visions
اما اذا اردت كتبه بالانجليزية فيمكنك ان تطلبها من امازون دوت كوم
ارجو ان تحكي لنا -بعد انتهاء كلامنا- عن تجربتك كجيل شاب مع الدينكا
محبتي بغير مدى
المشاء
| |
|
|
|
|
|
|
|
|
|
الجزء الاخير من الحوار (Re: osama elkhawad)
|
يعلق فرانسيس دينق في هامش عما ذكره دينق ماجوك للكلابنه فيقول" لتكون زعيما قبليا يجب ان تكون رجل سلام واقناع, ولييس برحل حرب وعنف.وبما ان زعيم المسيرية من الكلابنة,فقد كان رأي دينق ماجوك انهم يجب ان يبدوا ما يتماشى مع صفة الزعامة.
ثم يواصل فرانسيس حواره مع بابو نمر:
فرانسيس دينق:
بيقولوا الناس ان وجود الدينكا نقوك النهار ده في الشمال اساسا سببه دينق ماجوك.يعني لعلاقته مع العرب.هل عندك اي معلومات عن نظرة دينق ماجوك للجنوب واحتمال انضمامه للجنوب؟
بابو نمر:
والله طبعا,الحالة بتاعت الدينكا نقوك اللي هم ماريق,والمسيرية الحمر بالذات علاقة قبلي انا وقباله هو,وقبل ابوي وقبل جده.ابهاتنا جو لقوا العلاقة دي موجودة.
وبتذكر انا في مؤتمر كادوقلي لمن انا بتكلم مع اولادنا,بقول ليهم تعالوا,انتم اسه –وليك انت-نحن ابهاتنا خلوا لينا بيت ظليل ودخلنا فيه.لكن كان في ضي متل ده,وانتم تعلمتم تسدوه واللا تشتتوا البيت تشلعوه فوقنا؟انتم اولادنا اللي اتعلمتم,نحن دايرين كان في خلل تسدوه لينا.لأن البيت ظليل.بنوه جدودنا وبنوه ابتهاتنا ,ونحن لقيناه وقعدنا فوقه. فالعلاقة قديمة.بعدين حالتي انا مع دينق ماجوك,يعني معاي والله حالتنا واحدة.وبعدين دي خلت العرب والدينكا ارتبطوا زيادة.
بعدين في الاخر الجماعة المفتشين الانجليز عايزين يمهدوا لفصل الجنوب.فقالوا لدينق يعني أحسن تمشي الجنوب,والناس ديل اهلكم وناسكم وحالكم..و...و.... ولغتكم واحدة وجنسكم واحد وكلام زي ده.وهو ما كان رضيان الكلام ده,قالوا ليه تقوم مع العمد بتاعك وتمشي واو.تمشي تشوف المسألة دي.وتشوف الناس هناك عايشين كيف.مستر اوين كان المدير هناك ...مشوا من هنا بعربية.ادوهم لفة هناك في ققريال,واظنهم مشوا اويل و واو.جوا مقتنعين على ان حالتهم اللي هم فيها دي ما موجودة هناك.هم هنا يعني في حالة احسن.مما جوا والله شافوا على هناك قالوا يا علي مبروك مبروك مبروك...يعني نحن خلاص اقتنعنا ان مصلحتنا في معيشتنا هنا.البلد ديك نحن ما بندورها كلو كلو.فدينق كان معنا ماية الماية ما عنده اي شيئ.لكن اللي بيقى اخيرا...الاولاد يعني دخلوا في التمرد...فالمسألة دي طبعا بقت حي ظهري وحي بطني.لا بقدر بقول الاولاد مرقوا من يدي,ولا بقدر بقبضهم ولا كده.غايتو المسألة بقت ليه صعبة جدا جدا.فنحن متأكديم ان الرباط ده من دينق ماجوك.الرباط ده والمحبة الشديدة دي بين العرب والدينكا نقوك سببها الخوة بيني وبين دينق ماجوك.
فرانسيس دينق:
قبل سؤالنا الاخير,في سؤال بقول لو قارنت دينق ماجوك مع الزعماء بتاعين الجنوب والزعماء بتاعين الشمال,يعني من ناحية الشخصية ودوره كزعيم,مقارنتك بهم بتكون كيف؟
بابو نمر:
دينق ماجوك من زعماء الدينكا,بين زعماء الجنوب اللي من قصادنا هناك,من جهة النوير ومن جهة الروينق ومن جهة التوج ومن جهة حجير...يعني بالمقارنة الفرق كبير جدا جدا. يعني دينق ماجوك زعيم تمام.يعني مش زي الجماعة دول.نحن والله بنعتبر دينق ماجوك في زعماء العرب هنا من الممتازين مش كعامة النظار بتاع القبايل بتاع العرب.
فرانسيس دينق:
أين بالضبط سمعت اخبار وفاة دينق ماجوك,ووفاته في تقييمك عملت شنو بالنسبة للدينكا وبالنسبة لعلاقات الدينكا مع العرب؟
بابو نمر:
والله انا كنت في الدلنج ونازلين في الاستراحة.وانا عارف طبعا هو عيان وروح للعلاج.بعدين جانا محمد الباشا-واحد كان في الجيش وبالمعاش من اهلنا الحوازمة, جانا كده بعد الفطور في الاستراحة وقال لينا الطيارة القبيل شفتوها دي يعني انا ما سمعت في الاذاعة ان الناظر دينق ماجوك توفى و شالوه بالطيارة مودنو بلده هناك...
يا سلام...قلنا والله دي خسارة كبيرة.ودي يعني حلقة رابطة المسيرية والدينكا وانقطعت..والحلقة دي دلوقت انقطعت الباب ده بتاع المحنة دي, لمن دينق ماجوك بقى ما في الشباب دول اللي راحوا قروا هنامك في الكنائس في الجنوب الروح دي عندهم ما في.ما في زي روح دينق ماجوك...ودلوقتي هم حيلقوا الحرية وينطلقوا والبلد حتكون ما كويسة يعني نحن تصورنا الحكاية دي يوم جانا الخبر.لأنه كان واقف في طريقهم.
فرانسيس دينق:
أثناء ما انت بتتكلم زي خطر في ذهني سؤال,ايه اللي خلى دينق ماجوك يكون فريد في وسط الدينكا,سواء الماريق او بالمقارنة بالدينكا بتاعين الجنوب؟
بابو نمر:
والله هو مما قام شاب في الدقدق بيختلف عن بقية الدينكا وتقديره للناس...من في الدقدق...وبعدين جاء في المقابلات مع والده,بنتقابل في ابيي هنا وكان شخصية ظاهرة.ولغاية ما بعدين شخصيته دي خلتنا نحن بقينا في جانبه وربنا اداه الرئاسة دي.
فرانسيس دينق:
كان عندي سؤال بالنسبة الى الدينكا في عهد دينق ماجوك,لكن باين ما هنا.في السؤال ده,وهو مقارنة بين دينق ماجوك وكوال اروب,يعني انت عرفتهم الاثنين.اذا قارنتهم ايه الصفات الممكن تتكلم عنها بالنسبة ايهم الاثنين؟
بابو نمر:
والله الاثنين بالنسبة لقبيلة الحمروالاثنين يعني ما عندهم حاجة الانسان يزمهم بيها.كوال اروب ذاته بحب العرب,وبيقول انا حمراي وانا في الحمر كاملي.من اولاد كامل.لما يجي المعرض,في المعرض البوارق معروفة.
اولاد كامل اللي فيهم النظارة البيرق بتاع الناظر وعنده عمدة اولاد كامل.وبعدهم الفيارين,وبعدهم المزاغنة,وبعدهم بيرق المنمامة,وبيرق العدال,وبعدين بيق الفلايتة.فكان لما الناظر كوال يجي هو وجماعته الكبار ناس دينق الحكومة دول, وناس اكنون,والجماعة ناس كور الور,الجماعة ديل بيجوا راكبين خيل والبقية الشباب دول ماشين تحت.كان بمشي بين الفيارين واولاد كامل.يعني معناه اقرب لينا نحن اولاد كامل من الفيارين.كمان لأن في الطابور ده كان الفيارين بعد اولاد كامل طوالي.لكن لمن كوال يجي بكون هو منرة اتنين لاولاد كامل,ويخلي الفيارين وراه.
فرانسيس دينق:
لكن برضه لما تجي تقارنهم,كوال ودينق,بالنسبة لقيادة الدينكا وكزعماء للدينكا كيف تكون مقارنتك لهم؟
بابو نمر:
والله كوال كزعيم للدينكا,ودينق ماجوك كزعيم للدينكا,حسب نظريتي انا,دينق ماجوك في حاجة تخص الدينكا والعرب يعني ما بميل على الدينكا اكتر من العرب,كلهم قد تلقاه في الناظر كوال,ما بتلقاه في دينق ماجوك.ولذلك نحن مطئنين لأي حاجة تجي قدام دينق ماجوك ونحن ما في, ما بيحصل ظلم لعربي.
| |
|
|
|
|
|
|
|
|
|
Re: "بابو نمر" يحكي عن صديقه زعيم الدينكا نقوك "دينق ماجوك& (Re: osama elkhawad)
|
الاخ احمد البشير
تمت الاشارة الى بابو نمر,وبعدين حنوري الاسم جا من وين,
في كتاب فرنسيس دينق تارة بناظر عموم المسيرية واحيانا الاشارة الى الحمر
وارى ان هنالك فرقا بين المسيرية الحمر والحمر والله اعلم
وسيتضح ذلك في الكلام التالي عن الدية بين قبائل المنطقة على لسان بابو:
نحن بينا وبين حمر كان 60 جنيه.واحن والدينكا ماريق كان 40 بقرة.وبينا والنوير 30 بقرة.بعدين حصل بينا والرزيقات برضه دية سنة كم وعشرين عملناها 71 بقرة.
كيف سمي البابو نمر؟؟؟
يقول بابو نمر:
Quote: "انا اسمي بابو نمر علي الجلة...اسمي الحقيقي عثمان...بابو دي زي لقب...
أنا مسمى على عمي عثمان على الجلة...
انا صغير جدي رباني وكنت زي الساكن معاه, جدي بينادي يا عثمان...عمي عثمان هناك بيقول نعم,جدي بيقوله لا مش انت عثمان البابو.في عاداتنا السودانية الوليد الصغير بيقولوا ليه الباي...
فكان بيناديني عثمان البابو...خلاص بابو دي مشت لحد ما غطت على عثمان.
|
نرجو ان نسمع بعض التوضيحات حول سؤال الاخ احمد البشير
وارقدوا عافية
المشاء
| |
|
|
|
|
|
|
|
|
 Re: "بابو نمر" يحكي عن صديقه زعيم الدينكا نقوك "دينق ماجوك& (Re: osama elkhawad)
|
الاستاذ المخضرم:- المشاء تحية طيبة/
خارج السياق:في بيروت كنت عمدة المشاءين ولكن في امريكا ايضا ما زلت مشاءا؟؟ وهل الناس هناك ايضا يمشون مثلنا؟؟
مرة اخرى احييك على الموضوع المهم الجاد واسمح لي ان ادلو بهذا الطرح:-
تعود العلاقة الحميمة بين المسيرية والدينكا الى اواخر القرن التاسع عشر عندما وقع الناظر على جلة النمر ناظر المسيرية اتفاقية مع جد الدكتور فرانسيس دينق iam forget his name this moment اتفاقية اخوة واحترام متبادل عام ١٩٠٤ وتطورت العلائق بين المسيرية والدينكا وبلغت ذروتها في عمليات الزيجات الكثيفة بين الطرفين لنتج جيلا ثالثا وهو ثمرة نساء الدينكا من رجال المسيرية والعكس تماما.
نتج ايضا من هذا التاخي والتحابب تبادل في صيغ التنوع الثقافي بين الطرفين فكان شباب المسيرية كما حكى لي جدي يذهبون الكنيسة مع الدينكا ولا يعرفون شيئا عن صلاة المسيحين/ وكان الدينكا يصلون ويصمون مع المسيرية شهر رمضان كله مجاملة للمسيرية/ واخذت الالاف القطعان من الابقار بين المجموعتين ترعيان جنبا لجنب/ وعندما هجم دنيكا اويل وارادو طرد المسيرية من ابيي وتخوم ابيي عام ١٩٤٨ نجد ان دينكا انقوك حلفاء المسيرة وقف في خندق واحد مع المسيرية ضد اهاليهم دنيكا اويل مما ذاد اللحمة والرحمة بينهما وكان سلاطين الدينكا عندما ياتون الى منطقة المجلد وبابنوسة تذبح لهم الذبائح وتنقر النقارة وتلعب نسوة المسيرية النقارة احتفاء بقدوم الضيوف وعندما يذهب نظار المسيرية الى مناطق الدينكا كان يحصل الامر نفسه.
اخذ التنوع الثقافي بين الطرفين ياخذ طابع الاندماج في انماط الرقص والايقاع ونتج عن ذلك جيل ثالث من الموسيقى الايقاعية الطبول والنقارة والاكسسورات ولبس الازياء المزركشة بين المجموعتين وكثرت الغراميات بينهما وحتى تسريحة الشعر بالنسبة المسمى "سودان قفل- وسودان فتح" انتقلت من نساء المسيرية الى نساء الدينكا وانتشرت مجالس البراكمة والحرفاء وهي مجالس اهلية لحلحلة المشاكل العائلية والثارية.
عام ١٩٧٢ جاء نميري واطلق رصاصة الرحمة على هذا التعايش عندما القى نظام البرامكة وادخل المنطقة في فتن رهيبة.
هذه مشاركة بسيطة من طرفنا مهداة الى المشاء او الاستاذ اسامة الخواض ومن خلاله الى جميع المطالعين لهذا العمل الثر الرائع ولنا عودة.
| |
|
|
|
|
|
|
|
|
|
Re: "بابو نمر" يحكي عن صديقه زعيم الدينكا نقوك "دينق ماجوك& (Re: osama elkhawad)
|
شكرا اخي وصديقي محمود الدقم على هذه الاضاءة العميقة واللماحة
وهي تثبت ان التنوع والتعدد الثقافي يمكن ان يكون مصدر ثراء
وقد وضح ذلك من كلامك حول ظهور اشكال جديدة من الرقص والغناء والازياء
والتبادل الثقافي الثر
وكذلك روح التسامح الديني العميق
اما عن احوالي فما زلت مشاء بمعنى انني حتى الان لا اسوق
ساعود لعرض تحليل فرانسيس دينق لاسباب انهيار تلك العلاقة الرائعة
وفي انتظار المزيد
وشكرا مرة ثانية اخي محمود وارجو ان نسمع منك قريبا
المشاء
| |
|
|
|
|
|
|
| |
osama elkhawad
Hussein Mallasi
Yasir Elsharif
Nagat Mohamed Ali
Deng
محمود الدقم
Ahmed Al Bashir
فيس بوك
تويتر
انستقرام
يوتيوب
بنتيريست