|
|
 التغيير ح يكون مختلف المرّة دي.. كيف؟
|
السؤال للجميع
كل - أو أغلب - من يكتب أو يتحدث عن الثورة و التغيير المرتقب يجزم أن الأمر مختلف المرة دي
ولن تعود ما بعد ابريل و أكتوبر مرة أخرى
و الثورة ليست ضد الإنقاذ و المؤتمر الوطني فقط بل ضد المركز و السودان القديم .... إلخ
اها الكلام دا كلام عام, عايزين نقعّدو و نفرّزو كويس عشان المسائل تكون واضحة من أسّي وعلى مَيّة بيضا
عشان ما نكتفي بترديد ببغائي لشعارات ما واقعة لينا تماما
ماذا نعني بالتغيير المختلف وما هي الآليات التي تضمن تحقيق الإختلاف دا
هل يتضمن إقصاء لأي جماعة/ حزب/ عرق/ جهة/ طائفة/أفراد ؟
ولو حدث هذا الإقصاء ما هي آلياته دستور/ وثيقة/ اتفاق .. إلخ
وما ذا تعني عبارة (التمييز الإيجابي للهامش ) التي وردت في بيان منبر الهامش تعليقا على وثيقة البديل ؟
نسمع ...
|
|
 
|
|
|
|
|
|
|
 Re: التغيير ح يكون مختلف المرّة دي.. كيف؟ (Re: محمد البشرى الخضر)
|
Quote: قول ياخي .. قول
مش فرمالتك دي قولها :) |
ياحليل طلحة ..
Quote:
ماذا نعني بالتغيير المختلف وما هي الآليات التي تضمن تحقيق الإختلاف دا
هل يتضمن إقصاء لأي جماعة/ حزب/ عرق/ جهة/ طائفة/أفراد ؟
ولو حدث هذا الإقصاء ما هي آلياته دستور/ وثيقة/ اتفاق .. إلخ
وما ذا تعني عبارة (التمييز الإيجابي للهامش ) التي وردت في بيان منبر الهامش تعليقا على وثيقة البديل ؟ |
نعم التغيير سيكون مختلف هذه المره يامحمد
زمان التغيير كان يجي من المركز وللمركز..
والهامش دوره كان تأيدي للبديل الذي تأتي به ثورات المركز .
فحتى الثورات كان حكرية كما السلطة للمركز ..
الآن الوضع تغير واصبح هناك لاعبون كثر في الملعب السياسي ولهم الياتهم في فرض الحضور الحقيقي حتى ولو بالقوة
الناس خلاص وعت وبقت تعرف حقها وبقت ماينطلي عليها قصة القومية والوطنية وبطيخ حكومات الزمن البائد بما فيها هذه الحكومة ..
يعني اى سلطة جديدة تتجاوز اى مكون حقيقي سواء جهة جغرافية او ثقافات سودانية لن تجد القبول ولن يكتب لها النجاح ..
حايكون في تغيير جذري لمفاهيم السلطة ولن تستأثر عرقيات وثقافات بعينها بل سيصبح الكل في السلطة سواء وبعدل ومساواة
واعتقد ده المخرج الذى يجب ان يسعي اليه الجميع ...ولا اظن بعض هذا النضال ان يكون هناك اقصاء مضاد او انتقامي لبعض العرقيات ولا نتمنى ذلك ..
لكن البقنع ناس الحكومة وعرقيات السوبر انه السودان ده ماحقهم براهم منو ؟!!!
تحياتي ،،
| |
|
|
|
|
|
|
|
|
|
التغيير حيكون مختلف (Re: محمد البشرى الخضر)
|
الواقع يا ودالبشري انه التغيير بدري عليه ، واذا تم حاليا بالطريقة الحالية دي لانه كل شئ في السودان ممكن فهو تغيير من المركز للمركز
وحا تكون نفس القيادات السابقة وبدلل علي كلامي بواقع خروج المسيرات والتظاهرات من مسجدي ودنوباوب ( الانصار ) والسيد علي ( الختمية )
يعني الشعب لحدي اليوم هو شعب هذه الاحزاب ، وللامانة رغم ان صوت اليسار والهامش ( لو صحت التسمية ) وجودهم في الاسافير اكتر من وجودهم في ارض الواقع
وحتي الذين يتحركوا من هذه القوي فانهم يتحركون من هذه المساجد ،،،
التغيرةالذي يتحدث عنه ودالقاضي ده سيكون لاحقا سلميا ( وارد ) او تغييرا تقوم به العناصر الحاملة للسلاح في لحظة ضعف الخرطوم من التظاهرات وتوقع انشقاقات داخلها
وتغير بقوة السلاح سيكون فيه تغيير كبير للمركز واقرب لتبدل هامش بهامش ،،،،
________
غايتو مداخلتي اتحملوها مني
| |
|
|
|
|
|
|
|
|
|
Re: التغيير حيكون مختلف (Re: العوض المسلمي)
|
Quote: وبدلل علي كلامي بواقع خروج المسيرات والتظاهرات من مسجدي ودنوباوب ( الانصار ) والسيد علي ( الختمية )
يعني الشعب لحدي اليوم هو شعب هذه الاحزاب ، وللامانة رغم ان صوت اليسار والهامش ( لو صحت التسمية ) وجودهم في الاسافير اكتر من وجودهم في ارض الواقع |
دي يا حاج العوض واحدة من التساؤلات البتناولها البوست
واضح انو حدوث تغيير في الوضع الحالي لا يمكن ان يتم بتجاوز جماهير الأحزاب و قياداتها
وكان على الحركات المسلحة لا يمكن التعويل عليها في احداث التغيير المنشود
نتابع يا عمنا بقية الآراء
| |
|
|
|
|
|
|
|
|
|
Re: التغيير ح يكون مختلف المرّة دي.. كيف؟ (Re: محمد البشرى الخضر)
|
Quote: نعم التغيير سيكون مختلف هذه المره يامحمد
زمان التغيير كان يجي من المركز وللمركز..
والهامش دوره كان تأيدي للبديل الذي تأتي به ثورات المركز .
فحتى الثورات كان حكرية كما السلطة للمركز ..
الآن الوضع تغير واصبح هناك لاعبون كثر في الملعب السياسي ولهم الياتهم في فرض الحضور الحقيقي حتى ولو بالقوة
الناس خلاص وعت وبقت تعرف حقها وبقت ماينطلي عليها قصة القومية والوطنية وبطيخ حكومات الزمن البائد بما فيها هذه الحكومة ..
يعني اى سلطة جديدة تتجاوز اى مكون حقيقي سواء جهة جغرافية او ثقافات سودانية لن تجد القبول ولن يكتب لها النجاح ..
حايكون في تغيير جذري لمفاهيم السلطة ولن تستأثر عرقيات وثقافات بعينها بل سيصبح الكل في السلطة سواء وبعدل ومساواة
واعتقد ده المخرج الذى يجب ان يسعي اليه الجميع ...ولا اظن بعض هذا النضال ان يكون هناك اقصاء مضاد او انتقامي لبعض العرقيات ولا نتمنى ذلك ..
لكن البقنع ناس الحكومة وعرقيات السوبر انه السودان ده ماحقهم براهم منو ؟!!!
|
واحدة واحدة يا ود القاضي عشان نتابع معاك
واحد/ فهمت من حديثك و تحديدا جزئية أن التغيير كان بجي من المركز انك بالمركز تعني الخرطوم العاصمة
يعني المركز عندك مفهوم جغرافي - تمام ؟
اتنين/ استئثار عرقيات وثقافات بعينها و تجاوز المكونات التانية سيتسبب في فشل اي حكومة
السؤال من الأصل كيف العرقيات و الثقافات العنيتها ح تتولى الحكم اساسا, هل ترى وسيلة أخرى غير الصندوق عشان تتولى بيها هذه العرقيات و الثقافات الحكم
رغم انك نقلتنا خطوة للامام بعد موضوع البوست وهو كيفية التغيير في رقبتو لكن أوكي المواضيع متعلقة ببعض
اها تصورك شنو لشكل الحل المافيه تجاوز لأي| Quote: مكون حقيقي سواء جهة جغرافية او ثقافات سودانية |
| |
|
|
|
|
|
|
|
|
|
Re: التغيير ح يكون مختلف المرّة دي.. كيف؟ (Re: محمد البشرى الخضر)
|
Quote: وللامانة رغم ان صوت اليسار والهامش ( لو صحت التسمية ) وجودهم في الاسافير اكتر من وجودهم في ارض الواقع
وحتي الذين يتحركوا من هذه القوي فانهم يتحركون من هذه المساجد ،،، |
ود البشرى جاية اخرف معاك فى البوست دا شوية .....
لكن قبل دا وداك خلينى اقول للعزيز العوض
ياحليلنا النايمين على حيلنا ....
الحركات والجيوش والمناطق المحررة و
معسكرات اللجوء والنازحين التى ترزح بالملايين من البشر وووووو
ماعندهم وجود على ارض الواقع ؟؟؟ والوجود على ارض الواقع بقا ياهو
ال شوية البتخرج من ود نوباوى ؟؟؟؟
ما ياها دى عاد جنس طريقة المعاينة البشاكلوكم فيها ...
الوجود الحقيقى على ارض الواقع الفرض نفسه على الحكومة ذاتها
طوال السنوات الماضية هو وجود
ناس الهامش ديل .. بكل مراراته...... واتساعه وتناميه
وجود لايمكن تخطيه بعد اليوم ....
قوى اليسار امكن ... انا ذاتى زيك ما قادرة اشوف ...
لكن قوى الهامش ؟ ... اتية لا ريب فيها ....
| |
|
|
|
|
|
|
|
|
|
Re: التغيير ح يكون مختلف المرّة دي.. كيف؟ (Re: محمد البشرى الخضر)
|
Quote: أوكي يا دينا مرحب بيها قوى الهامش
السؤال جاية كيف ؟ الآلية شنو البتجيبها
|
دة اهم سؤال يا حبيب
اذا كان الهامش دة جايي يهمش المركز
طيب حا نكون عملنا شنو؟؟؟؟
ودة بيقود لي هامش جديد
بعدين سؤالك الفوق دة مهم جدا جدا:
المركز دة بيعني شنو
الخرطوم ولا الأعراق
لأنه لو طلع المركز دة أعراق يانا القيامتنا القامت
| |
|
|
|
|
|
|
|
|
|
Re: التغيير ح يكون مختلف المرّة دي.. كيف؟ (Re: دينا خالد)
|
| Quote: وكان على الحركات المسلحة لا يمكن التعويل عليها في احداث التغيير المنشود |
ذكرتنى يا ود البشرى بالقصة الشهيرة
قالوا واحد ( قريب تراجى) من ناس الهامش ديل بحاول يقبض الزيتونة بالشوكة
يعفصها تطير .. طاخ طاخ عذبتو تدردق مع كل ضربة من اول الصحن لى اخرو
وهو يحاحى فيها لما خلااااااص فتر ختا يدو فى جبهتو بالشوكة ورجع فى الكرسى بى وراء
تعباااااان نفسو قايم ... قامت جات حنكوشة (قريبتنا )
كانت بتراقب مرتاااحه فى الموقف..
ككك ....... شالتها ببساطه من الصحن
داك قال ليها بى حرقه .... بعد ما دوختها ليك ؟؟؟؟ لوووووووب
هذا هو حالنا مع هؤلاء الثوار
دايما لا نعترف بانهم من دوخوا هدا النظام واضعفوه ....
الدخلتا كارثة دار فور فى هذا النظام ما مرقت منو لى هسه
وكانت الاسفين الاول
انفصال الجنوب ....
قضايا الشرق .....
والان الحروب المشتعلة فى جنوب النيل الازرق وجنوب كرفان ...
دى الموبقات او اكبر الكباير فى خلخلة هدا النظام .... انتو قايلين شنو؟؟؟
ــــــــــــــــــــــــــــ
بطل زر الرماد فى العيون لحد ما اجيك لى قصة
الصناديق والانتخابات الداير تهدد بيها ناس الهامش دى ...
دا طبعا لو ما سبقونى بشاشا وتراجى وعدمونى ال بقشر بى معاك .....
| |
|
|
|
|
|
|
|
|
|
التغير حيكون (Re: دينا خالد)
|
يا دينا الهامش عنده وجود في اي مكان ولا تنسي انه في ناس في الشمال بل والخرطوم كرش الفيل دي ومولودين في الشمالية برضو هامش !
وكان علي هامش دارفور والمعسكرات فهؤلاء القوم تم التحدث باسمهم من فطاحلة مناطقهم بل واصبح الكثيرين ولاء ومستشارين ووزراء بسببهم
وما عائز اقول ليك الجماعة اصبحوا ما مهمشين ،، ولكن المهمشين الحقيقين في المعسكرات زول جائب ليهم خبر زاتووو مافي !!
وشوية ودنوباوي ديل ممكن يغيروا الحكومة لانهم في محل الريس بنوم ...
وكان حضر السلاح وحملته فعينك ما تشوف الا النور طالما المرارات موجودة ولا تنسي ان الحديث وسط المعسكرات يكرهوا الجلابة بغض النظر عن حكومة او معارضة
ومن المنبر ده شوفي بشاشا ومحمد سليمان بكتبوا في شنو ؟ وشوفي تراجي وامنة مختار بحاربوا في نجلاء وكانها مستشارة البشير
سيناريو صعب التنبؤ به ...
______
المداخلة قومة نفسي :)
| |
|
|
|
|
|
|
|
|
|
Re: التغير حيكون (Re: العوض المسلمي)
|
للتغيير أكثر من معني، وسبب تنوع المعاني هو تغير الخلفية الفكرية او الجهوية أو الحزبية
أو القبلية لمن يتحدث عن التغيير، لإختلاط الحابل بالنابل بحيث أختفت المهنية، والشفافية،
فمثلا التغيير الذي كان ينشده جون قرنق، إختلف تماما عن التغيير الذي توصل له سلفاكير، و
التغيير في مفهوم السيد/ الصادق المهدي والسيد/ محمد عثمان المرغني كان ولم يزل يختلف تماما
عن التغيير الذي كان يعمل د. خليل من أجله، وسبب هذه التناقضات هو الإستقطاب الحاد الذي ساد
في عهد حكومة الإنقاذ، وحركات المتمردين كيفما تنوعت جهويتها فهي تسعي لتغيير آخر قد يطال
الكثير ممن تضرروا إبان فترة الحكم الحالي، عليه أري بأن هذا الشتات من الأفكار والأعمال لن
يحقق التغيير المطلوب لتحقيق مصلحة الشعب بتجرد، والبديل هو واحد من خيارين، إما أن تتوحد
أراء أهل المدن المؤثرة وخاصة العاصمة والمدن الكبيرة بممارسة قوة ضغط عالية مثلا عصيان مدني
لتتنازل الحكومة وتتفاهم مع الشعب بندية، أو أن تستمر المظاهرات ثم تتحول مستقبلا إلى عمل مسلح
كالنموذج السورى أو الليبي، فيتصومل السودان ويتمزق دولا صغيرة ( لا سمح الله)، وأنا شخصيا أفضل خيار
العصيان المدني للتغيير.
| |
|
|
|
|
|
|
|
|
|
Re: التغير حيكون (Re: حماد الطاهر عبدالله)
|
هلا ود جبريل
لا ما تشيل هم مافي قيامة بتقوم - أو للدقة ما بتقوم قيامتنا برانا على وزن ما بنطير برانا
من المهم نفهم الإصطلاحات المطلوقة في السهلة دي تحديدا تقصد شنو ووراها شنو
و التهديد و الإبتزاز بالسلاح و العرقية نار تحرق الجميع ولن يكون هناك من هو في مأمن منها
يا دينا
الحركة الشعبية مدوره حرب كم سنة و النظام قاعد
وهسي حركات دارفور ممكن تحارب تاني كم سنة و النظام قاعد - دايخ اي نعم - لكنه قاعد
وكان ما جو الحناكيش شالوهو ما في فايدة ياهو قاعد
اها الغلبو يشيل الزيتونة دا ما يبتزانا بتدويخو ليها ولا الحنكوشة من حقها تقشر عليه بشيلتها
الاتسبب في عذابات الهامش و قاد لثورتو معروف منو, يتحاكم و يتحاسب زي محاسبتو على سائر ما ارتكب من مظالم في حق الجميع
ما يجي واحد رافع مظلمتو فوق الجميع يبتزاهم بيها
و الصندوق يا دينا ما ذر رماد لكن الوسيلة الوحيدة البعرفها لتداول و تولي السلطة الممكن يرتضيها الجميع بدون غبائن - او مفروض كدا
لكن برضو نسمع منك لو شايفة في وسائل تانية تؤدي لنتائج أفضل
شكرا حماد على المشاركة
وأشاركك الراي في تفضيل اي سناريو عدا النماذج السوري و الليبي
| |
|
|
|
|
|
|
|
|
|
Re: التغير حيكون (Re: محمد البشرى الخضر)
|
سلام لصاحب الخيط ومحاوريه
الضمان الوحيد لكون التغيير القادم لن يكون كالسابق اي كانت وسيلته (حتى ولو كان انقلاب داخلي ) هو وعي الهامش بكل مستوياته ونوعياته ( جغرافي' عرقي ' مهني'ثقافي'ديني ...الخ ) هو الوعي بالحقوق وتطور الوسائل في انتزاع تلك الحقوق لذا يجب على القادمين ان يستصحبوا معهم كل هذه المتغيرات.
القلق الذي يساور البعض خوفا من التغيير وان البديل هو الفوضى او اعادة تدوير الماضي اراه غير مبرر فما هو الا نتاج الزخم الاعلامي الموجه لغرس هذا الخوف في نفوس المركزيين تجاه الهامش الدليل على سبيل المثال الحركات الحاملة للسلاح ظلت تعامل الاسرى الذين حملو السلاح في وجهها معاملة انسانية كريمه وليست حاقدة ومنتقمه كا يشاع والعكس تماما هو ما يقوم به الطرف المقابل
الا اذا كان هذا الخوف هو في ضياع الامتيازات والافضلية للبعض على حساب الاخرين فهو هنا محض انانية
اتفق معك ان الديمغراطية حل مرضي للجميع ولكن ليس بشكلها السابق فقد كانت شكل اخر من اشكال المركزية متنكرة في لباس ديمغراطي ففي رايي ان لها شروط يجب ان تتحقق اولا وليست مجرد صندوق اقتراع ورد المظالم الى اهلها وان كانو اقلية لا يسعفهم الصندوق الانتخابي في رد حقوقهم هو احد هذه الشروط وكذلك اعادة هيكلة مؤسسات الدولة بحيث لا تتطغى فئه على اخري وتساوي الفرص بحيث يكون المعيار هو الكفاءه ' باختتصار انهاء اي شكل من اشكال الاحتكارية والاقصاء واجد ان قوى الهامش المسلحه منها والمدنية تتفق على هذه الاساسيات وبقي ان تعى قوى المركز ذلك
| |
|
|
|
|
|
|
|
|
|
Re: التغير حيكون (Re: محمد طاهر تكنه)
|
ود البشرى ازيك والحضور
اظنك تحتاج لراي الضفة الاخرى ايضا
واتفق معك ابتداءاً ان التغيير هذه المرة سيكون "مختلف"
لا احد ينكر ان للهامش، بتعريفه الجغرافي ظلامات ومرارات
لم تبدأ بالانقاذ، ولكن ستنتهي بها او معها
والكل يعيش الحسرات على انفصال تلت الوطن، بسبب هذه المرارات
والانقاذ جزء من مكونات الوطن
والتفتت حتماً لهذا
اذاً، لم لا يكون التغيير من داخلها
لم لا يكون التغيير قد بدأ فعلاً، وان الضيق الذي يعيشه المركز الان ومظاهراته هي جز من هذا التغيير؟
كان للحكومة خيارين:
ان توقف المشاريع التي تستهدف الهامش وتغطي بريعها فروقات الدعم "مثل الحكومات السابقة" او
تبيع المركز للهامش
واظنها وبجرأة اختارت الثاني، مع ان الاول كان ساهل وبيكسبها زمن
ده على الجانب التنموي
على التمثيل السياسي شفنا وزارات واسماء لامعة من الهامش، واهو رشحنا د.حاج ادم للجمهورية ونحن جادين
| |
|
|
|
|
|
|
|
|
|
Re: التغير حيكون (Re: الشفيع وراق عبد الرحمن)
|
انت جاد يا شفيع ؟
اللهم إلا لو كنت تعني بالمشاريع التي تستهدف الهامش الأنتينوف و مزيد من قذائفها و دانات الدبابات
في الحالة نعم يستقيم حديثك
وإلاّ اديني نماذج للمشاريع البتتكلم عنها و بسببها رفعتم الدعم
| |
|
|
|
|
|
|
|
|
|
Re: التغير حيكون (Re: محمد البشرى الخضر)
|
جادي جدا يا ود البشرى
نعم منها ما ذكرت
الصرف الامني بياخد جزء كبير من الميزانية، لا يمكن الاستقرار او التنمية وسط انفلات امني
وبالله ما تتعبني ساي امشي اجيب ليك 200 مشروع وتقول ده كده وده كده
عندك مشاريع اعمار دارفور، ومطلوب ليها اظن اكتر من 15 مليار دولار
وحصاد المياه
وتعلية الروصيرص
وكهربة المشلريع الزراعية
وتهيئة المدارس والجامعات
| |
|
|
|
|
|
|
|
|
|
Re: التغير حيكون (Re: الشفيع وراق عبد الرحمن)
|
مقتطف من العوض المسلمي :
وبدلل علي كلامي بواقع خروج المسيرات والتظاهرات من مسجدي ودنوباوب ( الانصار ) والسيد علي ( الختمية )
يعني الشعب لحدي اليوم هو شعب هذه الاحزاب ، وللامانة رغم ان صوت اليسار والهامش ( لو صحت التسمية )
وجودهم في الاسافير اكتر من وجودهم في ارض الواقع
---------------------------------------------------------------------------------------
يا شيخ العوض ، ثمة ملاحظات على كلامك :
1- حدث فصل موضوعي بين جماهير الأمة و الإتحادي وقيادتها ، وعمليآ إقترب موقف تلك الجماهير
من مواقف اليسار ، وجميعهم يرفضون أي تقارب مع النظام ويرغبون في إزالته ، ولذلك لو أرخيت
السمع جيدآ ستجد صوت اليسار ، على أرض الواقع ،، وفي المعتقلات ، نساء ورجال
2- لابد من بوتقة تجمع الناس فيها وحولها ، تلك البوتقة كانت النقابة ، والآن هي المسجد
ويجب ان تنتبه ، ليس أي مسجد ، ليست المساجد على الإطلاق ،، مسجدين مثابات للجماهير
كما ذكرت انت ، و أوضحت انا في النقطة1 عندما التقت جماهير الأمة والإتحادي مع قوى اليسار
على صعيد واحد موزع على مسجدين
المسجد تعويضآ عن النقابة يعبر عن ابداع شعبنا
| |
|
|
|
|
|
|
|
|
|
Re: التغير حيكون (Re: أبو ساندرا)
|
محمد البشرى..حبابك يا صديقي..
كتر خيرك على الأسئلة..
نبدأ من اخر سؤال..فكرة التمييز الإيجابي وردت في وثيقة تحالف كاودا بصورة اكثر تفصيلا..و ذلك باعمار الأقاليم التي طالتها الحروب و بناء مشاريع فيها و تأسيس البنيات التحتية حتى يتم ازالة بعض المظالم التي استمرت لأزمان طويلة في السودان..اضافة لبند تعويض المتضررين من الحروب ..و هو نفس المطلب الذي ورد في وثيقة الدوحة (المضحك النظام الحالي قبلان بيهو و بيحاول ينفذو)..و بالطبع التمييز الإيجابي شامل و ممكن يكون اقتصادي و تنموي و سياسي..بالنسبة لتقديري الشخصي للأمور (كلام يمكن ما يعجب ناس كتيرين) المشاركة السياسية موجودة حاليا في الدستور الإنتقالي و كل ناس جابت ناسها على مستوى البرلمان الفيدرالي ثم الولاية ثم المستوى المحلي ده بداية التغيير المختلف..و دي الناس ما بتحس بيها الإ لمن تبدأ المقارنة بالأنظمة السابقة..الإستمرار في هذا النهج هو تغيير مختلف..و فقط نحتاج بان تزال سيطرة المؤتمر الوطني على الأمور(يعني مؤتمر وطني في البرلمان القومي ، البرلمان الولائي..المستوي المحلي..دي مسألة ما بتجي تب).. اقتصاديا انا من اقليم غني للغاية و منتج و فيهو ثروات كتيرة..بترول..زراعة..ثروة حيوانية.. معادن.. طاقة شمسية ..فالتمييز الإيجابي سوف يراعي هذه النقطة.. يعني بدل الحكومة المركزية تجي تقول لي نديك اتنين في المية من انتاج البترول ليه ما تديني اربعين في المية (و هي كافية تماما لناس جنوب كردفان..و ناس الشمالية هناك نديهم اربعين في المية من الكهربا المنتجة عندهم..و كل اقليم ياخد نسبتو من الحاجة المتخصص في انتاجها)..و الإبتزاز حاصل في نقطة البترول لأن الحكومة المركزية في الخرطوم قاعدة تبتزانا بانها وضعت البنيات التحتية لصناعة البترول في السودان..و كان يمكن ان يحدث تمييز ايجابي من البداية والدولة السودانية تسمح لينا نخلق علاقاتنا الإقتصادية مع شركات البترول مباشرة و استغلال الشمس الفاقعة في مشاريع طاقة شمسية و خلق بدائل اخرى كمان..و ممكن نجيب شركات بتكلفة اقل..و نسوي بنيات تحتية بتكلفة اقل..و ندعم الخزينة العامة بصورة اكبر مما يحدث الآن و نفيد و نستفيد..فكرة الإستقلال النسبي للولايات في اطار نظام فيدرالي مضبوط هي باب من التمييز الإيجابي..فكرة المصالحة و الحقيقة..و اعتذار صريح من النخبة السياسية السودانية (حكومة ، معارضة ، حركات مسلحة) عن اختيار مسارح بعينها لتكون مسارح دائمة لجرائم الحرب و الجرائم ضد الإنسانية..فهذا تمييز ايجابي..كل هذه اجزاء من التمييز الأيجابي لبعض الأقاليم المتضررة..
بالنسبة للإقصاء..لا اعتقد و لكن الضرورة تحتم الإتفاق على عدم استغلال الدين في مؤسسات الدولة.. يعني فكرة احزاب تقعد تبتز الناس من سنة 1968 بفكرة دستور اسلامي و جعل الشريعة الإسلامية عصاة مرفوعة للقمع و القهر فهذه مسألة لا تجدي .. أنا شخصيا اعتقد ان لا يكون لكل احزاب الجبهة الإسلامية اي دور في مستقبل السودان القريب ، أو على الأقل ان تأخذ هذه الطائفة من الناس اجازة مؤقتة و تفسح المجال..منها تعمل مراجعة لأخطائها بصورة حقيقية و تصيغ تصوراتها بصورة تعتبر الأخرين دون وصاية أو استهبال..اما اقصاء الأفراد فهذا لا يحدث ولا ينبغي أن يحدث..و كذا العرقيات.. لأننا لو فعلنا ذلك نكون اساسا اعدنا انتاج الأزمة..ولا اظن اننا نحتاج لكل هذا..نفتح الباب للشباب نساءا و رجالا..و متأكد ح يعرفوا يوصلوا بوطنهم الى بر الأمان..
الأليات..الناس كلها بتطالب بدستور يؤسس لدولة المواطنة..و الدستور وحده لا يفعل شئ..و انما نحن البشر محتاجين نقعد مع نفوسنا..و نعالج التشوهات التي في دواخلنا بصورة فعالة و نكون ايجابيين لحد ما..صحيح السودان ده ما ممكن تزيل فيهو طريقة التفكير العنصري و التعالي على اساس ديني أو عرقي أو ثقافي..و لكن بالتدريج و التعليم المستمر ممكن نكسر الحدة..نظام اتحاد فيدرالي حقيقي..و دولة برامج و مشروعات واضحة..و الأهم ان نجعل كل سودانية و سوداني انهم جزء من صناعة مستقبل البلد..و هذه مطالب معقولة للغاية..الدستور الموجود حاليا يصلح كنقطة بداية و الناس تطور فيهو شوية و يجاز ..اهو حتى الناس الثائرة في الخرطوم الليلة.. لمن تقعد تعمل ليها بيان سياسي او حاجة بتقول ليك القمع مخالف للدشتور..و التعبير السلمي حق دستوري و بتستشهد بنصوص الدستور.. و ناس الحركات المسلحة تتحدث عن نظام فيدرالي..و النظام الموجود حاليا نظام فيدرالي.. فكل الناس متفقة..بس مشكلتنا ما بنعاين للإتفاق ده..و دي بترجع لحكاية انو النخبة لسع متأثرة بحكاية منو يحكم السودان (اخونا الشفيع وراق مقترح واحد من ناس دارفورو اخونا العوض المسلمي بيقول ليك جبناهم مستشارين وولاة..و ناس البديل الديموقراطي مقترحين زول من كل اقليم..الخ)..و الواقع اليوم يمشى بخطى حثيثة نحو فكرة كيف يحكم السودان..دي كلها بتشكل بداية للتغيير المختلف..
و دمتم..
كبر
| |
|
|
|
|
|
|
|
|
|
Re: التغير حيكون (Re: Kabar)
|
الأخوان محمد طاهر , عيدروس و كبر
مشكورين للحديث العميق محتاج اعيد قرايتو برواقة
شفيع يا خوي المسألة ما مماحكة اركان نقاش او مناظرة
يوجد ازمة وازمة حقيقية قد تودي بالبلد إلى الهاوية, اول خطوات الحل هي الاعتراف بيها
انتو كمؤتمر وطني اذا صادقين في البحث عن حل ما ممكن تبدأ بالغلاط الما حيودينا لحتة
راجع الارقام المذكورة هنا المأزق الإقتصادي الحالي في السودان : محمد إبراهيم كبج
وشوف عمق الأزمة و الفرص الضاعت على البلد
| |
|
|
|
|
|
|
|
|
|
Re: التغير حيكون (Re: محمد البشرى الخضر)
|
الزميل محمد :
اعتقد ان التغيير سيكون مختلفا فعلا لأن الاحزاب الكبيرة قد فقدت غالبية مناصريها ، ربما تتسلم مقاليد البلاد بعد التغيير من واقع شرعية تاريخية " ان صح القول" وليست جماهيرية لكن عندما يصل المواطنين لصناديق الاقتراع سنكتشف فعلا كيف اصبحت هذه الاحزاب مجرد براميل فارغة ، لكن ستبرز مشكلة السلاح الموجود لدى الحركات المسلحة الذين يمكن ان يحاولوا لعب دور سياسي بحجم لا يرضى طموح اطراف اخرى مثل الاحزاب وغيرها، كما ان مسألة الادماج السلس للثوريين سواء في المجتمع او الجيش ستكون غاية في الدقة والحساسية على المستوى الامني بمعنى انه يجب الفراغ من الاتفاق على كل ترتيباتها اولا بالتزامن مع الحل الشامل لمشكلة دارفور والنيل الازرق والشرق ..
اتفق مع الزميل كبر فيما اورده بخصوص نشاط المؤتمر الوطني وتفريعاته في الحياة السياسية مستقبلا وعمل محاكم على غرار ال Denazification Courts التي انتظمت كل دول اوروبا بعد الحرب العالمية الثانية وحاكمت عشرات الالاف ممن ثبت تورطهم مع الحزب الهتلري والحال لدينا لا يختلف على الاطلاق ..
تحياتي
| |
|
|
|
|
|
|
|
|
|
Re: التغير حيكون (Re: Abdullah Idrees)
|
يا سلام يا كبر
كلامك ده ممكن يكون برنامج لحزب، وانا ممكن انتمي ليهو دون تردد
اقتراحي لدكتور حاج ادم جزء من التمييز السياسي الايجابي الانت ذكرته
--------------------
لو عدلت:
| Quote: فقط نحتاج بان تقلص سيطرة المؤتمر الوطني على الأمور |
بكون 100%
| |
|
|
|
|
|
|
|
|
|
Re: التغير حيكون (Re: طارق جبريل)
|
الأخ طارق جبريل
لك التحية و الإحترام
Quote:
يا محمد سليمان كيفنك
فضل شنو غير النشيد والعلم ومقعد في الامم المتحدة
|
كيف فضّل شنو؟؟
إنتو ناسين خيار الجنوب و لّ أيييه؟؟!!
الحقيقة ... أي زول شال سلاح ضد حكومة المركز ... عرف بالضبط معني الحرية و الإستقلال و الحياة بكرامة دون تسلط أي أحد عليه....
المرّة دي ... مافي كلام معسول يمكن ينخدع به الناس المكتوية بحمم الانتونوف في الأطراف ....
أخونا فايز ود القاضي ختّاها ليكم بتهذيب .... معني التغيير القادم من موقع قوة المبادئ ... يحرسه سلاح ....
يعني غنوة الوطنية و القومية و بطيخ المركز ده ... باتت بضاعة كاسدة .....
إنتو لسّه ما سمعتو آراء الناس الذين صودرت أصواتهم هناك و بالملايين في كردفان و دارفور و الشرق و أقصي الشمال ...
أخييير ليكم تسمعوا كلام ود القاضي ده:
Quote:
نعم التغيير سيكون مختلف هذه المره يامحمد
زمان التغيير كان يجي من المركز وللمركز..
والهامش دوره كان تأيدي للبديل الذي تأتي به ثورات المركز .
فحتى الثورات كان حكرية كما السلطة للمركز ..
الآن الوضع تغير واصبح هناك لاعبون كثر في الملعب السياسي ولهم الياتهم في فرض الحضور الحقيقي حتى ولو بالقوة
الناس خلاص وعت وبقت تعرف حقها وبقت ماينطلي عليها قصة القومية والوطنية وبطيخ حكومات الزمن البائد بما فيها هذه الحكومة ..
يعني اى سلطة جديدة تتجاوز اى مكون حقيقي سواء جهة جغرافية او ثقافات سودانية لن تجد القبول ولن يكتب لها النجاح ..
حايكون في تغيير جذري لمفاهيم السلطة ولن تستأثر عرقيات وثقافات بعينها بل سيصبح الكل في السلطة سواء وبعدل ومساواة
واعتقد ده المخرج الذى يجب ان يسعي اليه الجميع ...ولا اظن بعض هذا النضال ان يكون هناك اقصاء مضاد او انتقامي لبعض العرقيات ولا نتمنى ذلك ..
لكن البقنع ناس الحكومة وعرقيات السوبر انه السودان ده ماحقهم براهم منو ؟!!!
|
| |
|
|
|
|
|
|
|
|
|
Re: التغير حيكون (Re: Mohamed Suleiman)
|
محمد سليمان سلامات..
| Quote: إما نظام فيدرالي بمعني الكلمة (مش إستهبال) ... حيث تسيطر أي ولاية أو إقليم علي مواردها الطبيعية ... مثلا أقليم كردفان الكبير .. لأهل كردفان الحق في إختيار الطريقة الديموقراطية التي يحكمون بها أنفسهم ... و بالتالي لأهل كردفان الحق في التصرف إقتصاديا في الموارد الطبيعية و المنتوجات في إقليمهم و تسويقها عالميا و محليا (يعني حكاية الغرف التجارية لتماسيح المركز يتصرفون في ثروات الهامش من زراعية و حيوانية و معادن و بترول ... نا في .. ما معقولة الغرف التجارية في الخرطوم لتسويق الماشية و الصمغ العربي و الحبوب الزيتية وو .. من ناس ليسوا هم من مناطق الإنتاج). |
دا كلام تفصيلي اتفق معاك فيهو..
لإنو بتعلق بشكل الدولة المرتقبة من أهل الهامش وطريقة الحكم..
واضيق أن يكون لكل إقليم الحق في اختيار القوانين التي تحكم مواطنية وتنظم شؤونه الداخلية ..
ويطول التطوير حتى الفعاليات السياسية ..
بحيث تكون هنالك احزاب اقليمية وأخرى اتحادية ..
ليكون الدستور الاتحادي في القمة مختصا بتنظيم العلاقات بين الاقاليم ..
ويطرح المبادي العامة والمواثيق الدولية التي يجب أن ترعاها القوانين الاقليمية..
ويحدد النسب التي يسهم بها كل أقليم للخزانة الاتحادية..
فضلا عن شكل الحكومة الاتحادية واختصاصاتها واجهزتها الاتحادية و وعدد الكيانات الاقليمية المكونة لجسم الدولة ..
فقط لاارى ضرورة لعبارتك | Quote: من ناس ليسوا من مناطق الانتاج |
لأنك تناقض بها ما قررته من حق مشاع للسودانيين في الانتقال والعيش والعمل اينما شاؤا ..
وبطبيعة الحال الاقليم الذي يوفر فرص الاستثمار سوف يجذب رؤوس الأموال سواء كانت داخلية أم خارجية. .
.
.
تحياتي سابقة لود البشرى وزواره.
| |
|
|
|
|
|
|
|
|
|
Re: التغيير ح يكون مختلف المرّة دي.. كيف؟ (Re: محمد البشرى الخضر)
|
ودالبشرى سلامات
| Quote: الآن الوضع تغير واصبح هناك لاعبون كثر في الملعب السياسي ولهم الياتهم في فرض الحضور الحقيقي حتى ولو بالقوة |
هاهنا القضية
بعد انتفاضة ابريل رفضت الحركة الشعبية وضع السلاح وشككت فى مصداقية التغيير وفجأة بدأ جون قرنق يتحدث عن الا فرق بين حكم النميرى وحكم الصادق المهدى (كلهم جلابة)
وبوقوفها خارج اطار الديموقراطية بل ومحاربتها للمركز حتى بعد سقوط نميرى كانت سبباً مباشر فى تهالك النظام الديموقراطى وانهياره
وهيأت الاجواء للحركة الاسلامية للانغضاض على الحكومة الديموقراطية وبعدها ماحدث معروف للجميع
وأكاد أرى نفس السيناريو يتحقق من قبل الحركات المسلحة مجتمعة
فهى مازالت تشكك فى طبيعة الوضع بعد زوال الانقاذ وتضع مطالب مسبقة من شأنها ان تعرقل اى وضع ديموقراطى قادم
وهذا يسوغ مسببات لتأخير الثورة ويصب فى وعاء التوجسات والهواجس لدى البعض من الشعب السودانى الذى يرى فى التغيير قفزة نحو المجهول
ويصب ايضاً فى مصلحة الدعاية التى يطلقها المؤتمر الوطنى بأن البديل ربما يكون وبالأ على الشعب السودانى وكارثى اكثر مما هو عليه الوضع الآن
ياودالقاضى اى حديث عن فرض واقع عن طريق السلاح مرفوض وهذا حديث يحمل بين طياته نزعة دكتاتورية وخوف من اللجوء للشعب ليفصل فى وضع الحركات المسلحة
والتى لا ارى ضرورة لحملها للسلاح حال زوال الانقاذ
واذا لم تتم تسوية هذا الأمر قبل زوال الانقاذ تبقى الخيارات مفتوحة بما فيها استمرار الحرب تحت حجة المركز والهامش والعربة والزنوج وكل هذه الاكليشهات المملة والتى يرددها الكثيرون هنا فى هذا البورد
المسافة مازالت بعيدة بيننا وبين النضوج وبيننا وبين التغيير ، مازال البعض يفكر بنفس عقلية المؤتمر الوطنى ويحاولون فرض وصاية على الآخرين
هؤلاء المقاتلين لن يرضوا بأى وضع لا يحفظ لهم امتيازاتهم التى اكتسبوها بقوة السلاح مثلهم مثل نافع وقوش وعلى عثمان
هؤلاء لا يقاتلون من اجل نظام ديموقراطى عادل بقدر ما يحاربون من أجل تركيز وفرض سلطتهم على الجميع وجميعهم ترهبهم فكرة اللجوء لصناديق الاقتراع
والمؤتمر الوطنى لابد ان يصفق لمثل هذه المقولة (ان الحركات المسلحة سوف تفرض واقعاً جديداً بعد زوال الانقاذ عن طريق السلاح)
تحياتى
| |
|
|
|
|
|
|
|
|
|
Re: التغيير ح يكون مختلف المرّة دي.. كيف؟ (Re: حسن حماد محمد)
|
سلام تاني ياود البشري والمشاركين
الكلام القلتو انا فوق دا توصيف للمشكلة بين المركز والهامش،وطبعا" في مشاكل
كتيرة تانية داخل الدولة،لكن انا ركزت علي المشكلة دي لأنها السبب في الحلقة
الشريرة (ديمقراطية/إنقلاب) المانعا إستقرار البلد وموديانا نحو الإنهيار.
أها بخصوص الحلول حا أرتب ليك تحت رؤوس مواضيع في رأيي فيها الحل،وهي رؤوس
مواضيع بدون تفاصيل حولها حتي تتاح للقوي السياسية والناشطين التفاوض حولها
وتحديد تفاصيلها:
1- قسمة الثروة والسلطة : تقاسم موارد الأقاليم المختلفة بين الأقاليم والمركز
بنسب يرضي عنها أهل الأقاليم. وتقاسم السلطة تعني حكم فدرالي حقيقي *
2- دولة ذات دستور علماني ديمقراطي يستوعب كل مكونات السودان ولا يقصي
سوداني/ة غض النظر عن الدين،العرق،النوع. وقوانين مستمدة من الدستور ولا تتعارض معه.
3- إيجاد صيغة لإشراك القبائل الفاعلة(لها أرض وناس وسلطة) في الفعل السياسي
بطريقة ديمقراطية.
4- التمييز الإيجابي لمناطق الهامش ولإنسان الهامش.
5- الإعلاء من قيمة الثقافات المختلفة في السودان في التعليم وفي الإعلام:
أنا بقول تعليم كل زول بي لغتو مع تعليمو باقي اللغات.
6- إستعادة دور الدولة في الضمان الإجتماعي والصحي والتعليم.
7- إستعادة دور الدولة كضامن للتوازن الإقتصادي ومخطط للتنمية.
أكيد في نقاط كتيرة ومشاكل كتيرة لكن في رأيي دي الاهم
_______________________________________________________________
* بتفق هنا مع كبر ومحمد سليمان، وبتفق مع الشفيع في إنو نظام الإنقاذ
جاب الفدرالية ولكن واضح إنو أفرغوها من معانيهاوالسبب غياب الديمقراطية
وسياسة التمكين التي تاتي بتابعين للمركز لا يجيدون سوي إتباع إشارات المركز
والبي ياخد موقف مختلف فمثال كرم الله والي القضارف راقد بالكوم،ولذا فهو
هيكل إتحادي في المظهر وفي الحقيقة هو حكم مركزي قابض ودكتاتوري ومن في الاقاليم
هم مجرد وكلاء ينفذون سياسات المركز.
| |
|
|
|
|
|
|
|
|
|
Re: التغيير ح يكون مختلف المرّة دي.. كيف؟ (Re: aydaroos)
|
ود البشرى .....ماشاء الله كما يقولون (صحي اتغيرت انتا )...
موضوعية تامة ...وكمان ايه سياسة
وردود بانتظام ونمطية تامة وماشاء الله عليك ...
بس انا حبيت كمان ادلو بدلوي في حكاية التغيير دي ...وكلام من زول عادي مواطنة غلبانة وزرت السودان (لتوي )...
لم اشاهد اي خروج للحس كوع او بوع ...الا قليل القليل من الاحتجاجات التي لم تفضي لما نريد ولكن اوعدك جاية وجاية قريب وحتكون من غير سيناريو مكرر ..قول لي ليه ؟اقول ليك الناس تعبانه تعبانة لمن غلط ...غلاء غلاء وجوع وانشغال تام في رزق اليوم وقد قمت باستطلاع بعض الناس امثال سائقي الامجاد والركشات وباعة الشوارع تعرف كان ردهم شنو ؟انشاء الله ما تقوم مظاهرات لانو شغلنا ممكن يقيف كم يوم ونحن ما نقدر نوفر اكل اليوم وواجباتنا تجاه اسرنا وقد حكى لي احدهم بانه الان مريض ولكن لا يستطيع ان يؤجز !!!
ولكن بالتاكيد لمن ما يلقوا الباكلوه حيرج الجميع الشارع وحتتغير الامور كيف ومتين ومنو البديل الله اعلم سيكون من وحي اللحظات ....
وراي الشخصي البديل المطروع الان غير مرغوب فيه والسيناريوهات القديمة لاتناسبنا ...
رؤية جديدة وسيناريو جديد مفصل لينا .....
ولك محبتي
| |
|
|
|
|
|
|
|
|
 Re: التغيير ح يكون مختلف المرّة دي.. كيف؟ (Re: aydaroos)
|
التغيير الايجابي صعب في الوقت الراهن, وان حدث اي تغيير فمصيره كسابقاتها, انسان الهامش في المركز ليس متمكن وليس لو ارضية ثابتة ومازال منبوذ من اهل المركز المستاثرين بكل مؤسسات الدولة, راجع حكاية الجنوبيين ووجودهم في الخرطوم لعقود.
انسان الهامش مازال ينسب لحيثما اتي ويعيش في الاطراف معزولا وحتي في الجامعات تجدهم منكفئين علي ذواتهم, والمركز واهله يتمتعون بكل شئ من بني تحتية وتنمية والخ...
لايمكن للمركز القبول بان يتنازل عن حقوقه التاريخية في الحكم كما ان انسان الهامش اذا استوز استمركز.
بدون ايقاف الحروب وتنمية الهامش وانسان الهامش بمواردهم وفي مناطقهم لن يكون هناك حل, تشكيل حكومة اتحادية فدرالية وتقسيم الثروات والموارد مع المركز بصورة منصة وهذا في حد ذاته اشكالية اخري.
بس الحل الناجع وبدون ضياع وقت, كل اقليم يدوه حق تقرير المصير ونفضها سيرة.
وهنا مربط الفرس, لان المركز مجرد دراكولا لايكمنه العيش بغير دماء اهل الهامش.
ما اضيق العيش لولا فسحه الامل.
| |
|
|
|
|
|
|
|
|
|
Re: التغيير ح يكون مختلف المرّة دي.. كيف؟ (Re: Abdullah Idrees)
|
الزميل محمد سليمان :
لكن ... لاحظ ... مطالب ثورة الهامش كانت تدور كلها و منذ البداية حول نقطتين أساسيتين: الشراكة الفعلية في السلطة و الثروة ...
و من لا يملك ثروة .. لا يملك سلطة
و المركز حقيقة لا يملك ثروة .....
لذلك فارض نفسه علي الهامش بهذه الحروب ....
الإجابة علي سؤالك: التغيير كيف؟؟
أولا: إما نظام فيدرالي بمعني الكلمة (مش إستهبال) ... حيث تسيطر أي ولاية أو إقليم علي مواردها الطبيعية ... مثلا أقليم كردفان الكبير .. لأهل كردفان الحق في إختيار الطريقة الديموقراطية التي يحكمون بها أنفسهم ... و بالتالي لأهل كردفان الحق في التصرف إقتصاديا في الموارد الطبيعية و المنتوجات في إقليمهم و تسويقها عالميا و محليا (يعني حكاية الغرف التجارية لتماسيح المركز يتصرفون في ثروات الهامش من زراعية و حيوانية و معادن و بترول ... نا في .. ما معقولة الغرف التجارية في الخرطوم لتسويق الماشية و الصمغ العربي و الحبوب الزيتية وو .. من ناس ليسوا هم من مناطق الإنتاج
|
الموضوع هو علاقة بين شركة ومنتج صغير ، المنتج الصغير في كردفان لا يمكنه تصدير منتجاته بالطبع مثله مثل المنتج في الشمالية ، كلاهما يبيع منتجه للتجار او المصدرين ، اعتقد ان الاصع هو ان تقويم العلاقة بين المنتج والمسوق/التاجر/الشركة/المصدر في بعض النواحي مثل تحديد اسعار عادلة للمنتج حتى يكون لديه الحافز ، لكن مسألة ان تكون الشركة في الخرطوم او كردفان فهذا غير مجدي بالنسبة للمنتج ولا يعني له شيئا لأنها شركة تسعى للربح هذا بخصوص الموارد غير البترولية .. بخصوص البترول فإن الحل يكمن في اعطاء الاقليم المنتج نسبة مئوية محددة تتصرف فيها حكومته بالاضافة الى مشاريع المسئولية الاجتماعية والبنى التحتية ، والا فمن اين يتم الصرف على الحكومة المركزية والاجهزة الاتحادية مثل الجيش والامن والشرطة وغيرها اذا استاثر كل اقليم بموارده ؟
. | ثانيا: لا يوجد الآن جيش قومي .... الآن هناك مليشيات مسلحة .. و ما يسمي الجيش السوداني هو مليشيات المركز المسلحة لتحمي أهل المركز و مصالحهم. لذلك .. يجب أن يكون لأي إقليم الحق في تكوين جيش ولائي يمكن أن يسمي قوات حرس الولاية أو شئ من هذا القبيل من أهل الولاية أو الإقليم . علاقة هذا الجيش بالمركز هو يجب أن يخضع للتفاوض بين الهامش و المركز (و ده من صلب التغيير ... هو لو كان التغيير ده شئ متوقع ... ما كان سموهو تغيير) . قوات هذه الولايات الآن جاهزة و هي التي تقاتل المركز الآن في الهامش . الفلم بتاع إدماج و إندماج قوات الحركة الفلانية في الجيش القومي .. الكلّو ضباطو جلابة ... ده أنسوهو .. يفتح الله ... ). |
ثانيا : لا افهم كيف يحمي الجيش مواطني المركز ولا ادري ممن ومتى ، اعرف انك تعني بالمركز الخرطوم والشمال النيلي ، لكني لا اعرف متى قام الجيش بحماية المركز ، الجيش واجهزته الاخرى مصصمة ومفصلة لحماية النظام فقط .. اتفق معك في ان الجيش غير قومي فيما يخص اختيار الضباط ويجب ان تكون معايير اختيارهم محددة وواضحة بدون محسوبية .
ثالثا: الدخل الولائي يظل في الولاية لتعمير و تنمية الولاية أو الإقليم .. و الفضّل يرسلوهو للمركز ..... أصلو المركز عالة علي السودان و بلطجي السودان .... و بقية الولايات التي تدعي أنها هامش أيضا .. أوكي فلتنتج إنتاجها و تصدره ... كل ولاية معلقة من عرقوبتها ... للمركز الخيار في مساعدة الولايات الفقيرة من المساهمات (لا ضرائب) التي تتلقاها من الولايات الغنيّة..
رابعا: حرية التنقل و الحركة و العمل يجب أن يكون مكفولا للسودانيين في كل الولايات .. علي شرط عدم نقل ثروات ولاية الي ولاية أخري ... أو إقليم الي إقليم آخر.
يعني إزدهرت ولاية نهر النيل مثلا و جذبت كردفانيين و دارفوريين .. ده كلام كويس .. لكن الدارفوريين و الكردفانيين ممنوعون من نقل ثروات مهر النيل الي كردفان أو دارفور .... بيع و شراء نعم .. لكن تحت مراقبة سلطات أهل نهر النيل.
(نهب و إستغلال مافي) . |
يا محمد سليمان انتاج المناطق النيلية يصل جوبا دعك من الابيض والفاشر ، يبدو انك بعيد كل البعد من السودان ، والولايات الشمالية مليئة بالتجار من مناطق دارفور وكردفان ، من الذي منع ؟ ما هي ثروات نهر النيل الممنوع نقلها الى كردفان ؟ نهر النيل يقوم اقتصادها على زراعة البقوليات والفواكه والمحاصيل الزراعية المباشرة وانتاجها يذهب للولايات الاخرى عبر الخرطوم ولا يستهلك منه ربما اكثر من 5% محليا ولو صح ما تقوله لاصبح جوال الفول المصري او البطاطس في نهر النيل بالمجان ولعلمك اذا قمنا بعمل ميزان تجاري "بيني) Interstate Balance of Trade فإن الميزان التجاري لنهر النيل والشمالية سيكون في صالحها لانها تنتج تقريبا كل غذائها عدا بعض السلع الكمالية المستوردة مثل السكر والشاي والملابس وغيرها ..
عندما تستقل الولايات و الأقاليم إقتصاديا و سياسيا .... سيفقد المركز أهميته المزيفة .... (كما في أمريكا ... أفقر المدن هي عواصم الولايات ... و العاصمة القومية في المقدمة ).
التغيير يجب أن يكون غير مألوف ..... إن لم يكن صادما ..... لنخرج من هذه الدوامة .
|
محمد البشرى الخضر
فايزودالقاضي
Frankly
محمد عبد الماجد الصايم
العوض المسلمي
دينا خالد
طارق جبريل
حماد الطاهر عبدالله
محمد طاهر تكنه
الشفيع وراق عبد الرحمن
أبو ساندرا
aydaroos
Kabar
Abdullah Idrees
Elbagir Osman
Mohamed Suleiman
محمد على طه الملك
محمد كابيلا
حسن حماد محمد
نعمات حمود
Albino Akoon Ibrahim Akoon
lana mahdi
عمران حسن صالح
Siham Elmugammar
فيس بوك
تويتر
انستقرام
يوتيوب
بنتيريست