لباسات النسوان ضمن غنائم كتائب الكيزان في الدمازين " فيديو " !!

Quote: ما يعرضه هذا الشريط يندي له جبين اي انسان سوي. والكيزان والسلطة القائمة يستحقوا الضرب بالجزمة القديمة لانهم فى النهاية مسئولين عن فتح الباب لهؤلاء الاوباش ليقوموا بهذا العمل المخجل. ولكن خلط الامور واللعب علي الحبال لا يفيد. الناس الفي الشريط ده سودانيين من غمار الناس. الناس البسرقوا وبكوركوا فى الشريط ده لا جيش ولا مليشيات كيزان مسلحة ولا حاجة. ديل مواطنين واضح من سحنتهم ولونهم انهم من مواطني المنطقة. مواطنين عاديين جدا وشكلهم مهمشين تهميش جد. القسوة والفظاعة والدناءة وغياب الاحساس ده فى النهاية هو نتيجة من نتائج حالة الحرب. إظهار الجزع والاستنكار وشتيمة الكيزان ما بتحل ولا بتربط اذا كنا فعلا قلقين علي السودان وشعبه ومواطنيه البقي الواحد فيهم يفتح باب يلقي الجثث مردومة يقوم يشيل الممتلكات المجدوعة جنبها ويجري بيها بيتو. الناس البجو هنا فى سودانيزاونلاين يبشروا بالحرب ويهددوا بأن المهمشين علي ابواب كوستي وفى طريقهم للخرطوم يتحملوا المسئولية عن هذه الفظائع زيهم وزي الكيزان واحد. لانو الحاصل ده في النهاية نتيجة من نتائج الحرب الاهلية عندهما تقوم ويتسع نطاقها وتصبح حقيقة وحياة يومية يعتاد عليها الناس، وسيكون هناك ما هو افظع من هذا لو استمرت الحرب. النجيضة فى الموضوع ان الشريط ده واقع طبيعي لحالة الحرب والبنادي بالحرب ويهدد ويرغي ويزبد ويتحدث عن اقتحام المهمشين لسنار وكوستي والخرطوم عليه ان يعوّد نفسه علي مثل هذه المناظر وما يتجرس ويتحوقل ويبلبط. انتو من الاول الحرب دي قايلنها شنو؟ الواحد قاعد فى سيدني او تورنتو او لوس انجلوس يلهط فى الهامبيرجر والبطاطس المحمرة ويضرب قزايز البيرة الهولندية ويجي يمسك ليك الكيبورد ينجضو نجاض: المهمشون قادمون .. المهمشون قادمون. حسّع عليكم الله في مهمشين فى الدنيا قدر السودانيين الظهروا فى الشريط ده يسرقوا وينهبوا ويكوركوا زي المجانين؟!!