|
|
|
 Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
شكراً كتير لك كثير يا الرتينة وشمس المشارق
وقد قال الشاعر محمد طه القدال في الرتينة
بنية لي سالم وليد عتمان
وصلاة الزين سموها الرتينة
امها بت علي الخمجان
خريف الرازا عزينة
كُبار الحلّة أباتا
بُكار الحلّة أماتا
تمرق زينة
تبرق زينة
تمشي تهاتي وزينة
بلا الربعة التحجل
شاكية لي الوديان كِتافا
كلامها حنين
ملامها رصين
بِسيمها الودعة
إلا تزيد لطافة
كلامها يطمأن الهمباتي
والمجلوبة متعارض كتافا
وقارية وكاتبة تحمد سِيدها
ماخدا علي البنيات الشرافة
مقدم ذوكها قُبال الحصافة
| |
 
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: تيمّ في التقُر وانصارو زاربنّو
بي عهدو القبيل بعيسى تاهمنّو
إتلمّو العمد ليهم نقر سنّو
الهوي والشرق طار المنام منّو |
زرابنو اي محيطين به
عيسى كما ذكر القرشي هو شقيقه
عادة تكون نقرة السن دليل على الحيرة
لكن حاشا ان يتحير ودحبوبة الجسور
قد تكون تعني بها غير ذلك .. واتوقع ان ان نابه غارز في عدوه ( والله اعلم )
الهوي الشرق
والهوي هو اتجاه الغرب ومنها جاءت اسم رفاعة الهوي
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: الأسد النتر من جيهة الابقار
لمولوا الأورط شايلين سلاح النار
ودحبوبة قام ورتب الانصار
في الكتفية ديك كم شبعن صقّار |
الأورط : جمع أورطة
ليس لدي المعلومات الكافية عن تركيبة الجيش
لكن سوف اجتهد حسب ما كنت اسمع
وارجو ان كان من له خبرة في ذلك ( التصحيح )
الجيش يتكون من لواءات
والواء يرأسه لواء ( من التسمية )
اللواء يتكون من فصائل
والفصيل يتكون من كتائب
وافتكر الكتبة كانت تعرف بأسم الأورطة
والله أعلم
كتفية كما ذكر الاخ احمد القرشي اسم منطقة دارت فيها معركة طاحنة
بين ودحبوبة وجنود البريطان
الصقار : اي صقور الجو (الحدي )
نتر الاسد : اي زئر استعدادا للقتال
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: الإعلان صدر وإتلمت المخلوق
بي عيني بشوف ابـ رسوة طالع فوق
لوكان بي المراد واليمين مطلوق
ماكان بتشنق ودابـ كريق في السوق |
هنا تصف رقية يوم صدور الحكم
الشنق لودحبوبة
إتلمت المخلوق تقصد بها اتلمو الناس اي خلق الله
ابـ رسوة : هو النمر
ومافي شئ بجي حسب مانحب ونرغب
وما كل ما يتمنى المرء يدركه
تأتي الرياح بما لا تشتهي السَفنُ
وتستنكر ان يشنق اخوها ود العزاز وكرام في سوق الله
وتشاهد موته الخلوق متلمة
له الرحمة ودحبوبة
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: بتكلم بقول بوريك مين حسبو
نايبو السنين منّو الرُجال حسبو |
تعرض نسب اخوها الشريف
والشرف ليس مال وجاه قبلية وجهوية
بل خصال طيبة من كرم وشهامة ونخوة وحكمة وحسن خُلق وشجاعة وقد ورثها اب عن جد
وهذا الحسب والنسب في تقديري
نايبو السنين : تعني بها بطشه بكل متجبر ومغتصب لحقوق البلد
وانه لا يخاف في الحق والدفاع عنه لومة لائم ...
وكل هذا جعله في مقام
وكانت تحسب له الرجال الف حساب
وهنا بلاغة الطباق من قول مرأة امية .. يا سلام
جنس الحرف والعدد واختلاف المعنى
حسبو الاولى تعني نسبه
حسبو الثانية تعني عملو له الف حساب .. يهابهو
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: هند محمد)
|
Quote: الإعلان صدر وإتلمت الحلـلال
نصبولّو السلاح وانكرنف الخيال |
الإعلان صدر وصدور الاإعلان كان الحكم البريطاني بشنق ودحبوبة وشنقة
في مكان عام حتى يكون عظة لغير أن يتمرد على المستعمر هل هناك بجاحة
اكثر من ذلك ان تغتصب ارض الشخص وتعتبر متمرد عندما يتصدى لحقوقه
حكم القوي علي الضعيف .. والضعف هنا ليس ضعف ارادة لكن قلة عتاد
كل بطل سوداني جابه الظلم ولو بكلمة انا اعتبره بطل قومي لبلادنا
واتلمت الناس من صوب ونحو ليشهدوا شنق ودحبوبة
وحضورهم ليس تشفي بل اكرام لموقفه الذي وقف ضد المستعمر واكرام لوداعه الاخير
رجل في قامة ودحبوبة
وكان يوم حافل اعده الانجليز
نصب فيه السلام وكانت الخيول عليها جنودها كأنها في عرض عسكري ( كرنفال )
قالت
انكرنف الخيال
Quote: قدر الله الحصل والزمان ميّال
منسوب من أبوك ماك ودحرام دجال |
وتقول له حسبك اخي لاتحزن على ميتك بتلك الطريقة
نحن مؤمنين ودا قدر الله المكتوب
والمكتوب في الجبين لابد تشوفو العين من يوم مولدك مسطور في اللوح
المحفوظ ان تموت بتلك الطريقة ودا حال الزمن ومسلمين لامر الله
وانت معروف بين الخلق اباً عن جد اصيل ومأصل
وماك ودحرام اباتك تلوب في الاصل بينين
ولاك دجال قصدت من ذلك شهرة
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
هند الشاعرة الجميلة الشفافة منورة
وزنتي إنجامتنا بضي سناك
نعشق حرفك الجميل يا مرهفة الاحساس والمشاعر
كفارة وسلامتك يا هند كلنا علم لو كنتي في الجوار
ما أضنيتي في الزيارة التي عودتيناعليها
زيارتك تفرحنا والله وإنجمامتك معنا تسعدنا ونسعد معك
وبسماع صوت حروفك الجميلة
مقطع من رثاء هند محمد
للاستاذ وردي عليه الرحمة
شيلي الوجعة ياخرطوم
همومك جنّ مطر ساساق
وزيدي قساوة يا أيام
بعد فاتك أعز الناس
ختي الدمعة في الاتنين
أريت السيل يطفئ النار
أبكي الكان حنين وعديل
وكان بلدي .. جنوب وشمال
كان أعظم من التاريخ
وأصالة تمجد الانسان
أنعي الكان شذى الياسمين
وكان ورد الغنا الفواح
الرثاء اصدق الشعر
لوردي الرحمة والمغفرة من رب كريم رحيم
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
هذا ما كتب الدكتور أحمد القرشي عن كتفية
وفي الكتفية ديك كم شبعن صقار
لك الشكر دكتور احمد القرشي على هذا الكم من التوثيق الدقيق
رسلت الحكومة الاورطة 13 من مدني بقيادة مكوين بك واحمد إبراهيم زاده ولقد عسكروا في كتفيه عند حلول الظلام ، ولقد رأى أنصار ودحبوبه مهاجمة هذه الاورطة ليلا وذبح أفرادها، فبدأوا بذبح الهجانه الذين كانوا ينامون يمين الأورطة فقتلوا عددا كبيرا منهم ولكن عيسى محمد إمام حبوب أخو عبد القادر تحمس وهو يصيح في قمة النشوة قائلاً ( الدين منصور) فاستيقظ مكوين وأطلق رجاله مدفعهم الرشاش على أنصار ود حبوبه فحصدوا منهم الكثير، ولقد بات ود حبوبه في تلك اللية بقرية ود البصير وفى الصباح توجه إلى الكاملين وعند قرية الدبيبات الواقعة في مجلس ريفي المعيلق انقض عليه مجموعة من الدباسين ولقد برر الأستاذ صديق البادي قبضهم على ود حبوبه قائلا (والأمانة التاريخية تقتضى أن أقول أن الدباسين لم يفعلوا ذلك عداءً للحلاوين وإنما أرادوا بذلك حقن الدماء بالمنطقة).. معركة كتفيه صورتها لنا رقية أيضا قائلة ...
الأسد النتر بى جيهة الأبقار
لمولو الاورط شايلين سلاح النار
ود حبوبه قام ورتب الأنصار
في كتفيه ديك كم شبعن صقار
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
الواعي ما بوصو
من أمس الضحى
تورى أب زنود ساقو
يا مقنع ولياتو
تور بقر الجواميس العليك الرك
يا عقد الحديد للحلبي ما بتنفك
تورك يا أم رشوم في الحلق عشرق
دقيت الجسر وحاجر مشارع الحق
غنيت وجبت مسدار
المكنه بتكاكى وجنن مدافع النار
لفوك يا رحل الكحل دلوك ما بتندار
أمانة يا صقر ما تفرشت ليك برجال
غنيت وجبت نمك
بجر القول عليك يا مقنع الكاشفات
أسد الخلا الحجر اليويات
ساقوك لي الشنق
يا أبو أمنه حوبتك جات
غنى وشكري يا خضرة الجٌم
طلع لي عشارى الليله مسكو يفوح
ما خطف البدينقه وما جفل مجروح
سيفو بياخد الخوده ومعاها الروح
أمك ولدتك ما ولدتم أتنين
تسلم لي يا تلبى البكيل العين
حالف يمين ما بكون بين البين
دقيت الجسر لي متعة الحيين
غنيلو يا بنيه
من قومة الجهل ما قاملو بى نيه
وكت الشوف أشوف وقفولو سلطيه
تعدى وركز قال اخوكى يا رقيه
نص قصيدو الواعي مابوصو
وشاعرتها بت مسيمس
اورد لها نصوص اخر الدكتور احمد القرشي نصوص اخرى
بعد ان نغوص في النص الذي يتغنى به بادي محمد الطيب سوف نتعرض ايضاً
على ما اختلف في النصوص الاخرى نقلاً مما كتب الدكتور احمد القرشي وله
الشكر
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: الواعي ما بوصو
من أمس الضحى
تورى أب زنود ساقو
يا مقنع ولياتو |
وهذه القصيدة شاعرتها هي بت مسيمس ( واسمها رُقية )
كما ذكر الدكتور احمد القرشي
ونظمتها في ودحبوبة
الواعي ما بوصو
الواعي هو الحكيم المدرك لأموره وطكل الأمور التي حوله
ماهو الشليق البتسدر الموضوع اي يمسك الموضوع من نصو ويقوم بي
الواعي دوماً حكيم بعاين لي قدام ويقيس الامور ويقوم بسد الزرائع
يقدم الأهم علي المهم
توري ابـ زنود
التور معروف
الزند هو الكتيف اي القدم الامامي في الحيوان يسمى زند
لذا يقال لحم زند
اي لحم الكتف
المقنع هو غطاء الرأس
وكان كشف الرأس عار
وعندما تكشف الرمأة رأسها أمام الرجال تعني شئ واحد
ان لها أمر تريد أن يقضى لها ويكون عادةً هذا الامر صعب
فينبري أخو البنات في الرجال ويغطي لها رأسها ويسعي بعدها
ان يقضي لها امرها ولو كلفه روحه لابد ان يقضيه لها ..
ولياتو : والولية هي العرض كل مرأة عرض الرجال يفديها بنفسه
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
| Quote: تور بقر الجواميس العليك الرك |
البقر الجاموس والجاموس معروف اكير حجماً وقوة من البقر العادي
فتقول ان ان ودحبوبة في قوته زي تور الجاموس
عليك الرك : عليك التكلان والاعتماد بعد الله سبحانه وتعالى
هو البحمي ويعين
| Quote: يا عقد الحديد للحلبي ما بتنفك |
عقد الحديد : الحلقة في الجنزير
الحلب هم من الغجر او كما يسمو في دول العرب بالنور وفي مصر الغازيين ومنها اسم الفلم الغربي
( وداد الغازية ) وعند المجريين يسمو ( السقان )
وعادة يسكنون اطراف المدن ومساكنهم ليست من المباني التي تبنى للاستقرار عادة تكون من الاخشاب او الصاج او
ما شابهه من قش وغيره ..
وفي السودان عمل الغالبية منهم في عمل السمكرة والحدادة ولا شئ في هذه الاعمال يصعب عليهم
لذا رقية بت مسيمس شبهت ودحبوبة بحلقة الحديد في قوته وحتى الحلبي صعب عليه فكها .. الحلبي الذي لاتأخذ
معه عملية فتح عقدة الحديد هذه ثواني
| Quote: تورك يا أم رشوم في الحلق عشرق |
أم رشوم هي الغادة الحسناء
تقول لها هذا هو تورك رجل بمعنى الكلمة
وفيالحلق ما بتدلى لي عدوه زي العشراقة لا بتنزل لا بتطلع
والعشرقا تحصل عندما يدخل شئ بالغلط في القصبة الهوائية مجرى التنفس
الزول تقرب تطع روحو
فودحبوبة حاله للأعداء زي العشراقة دي بمرق الروح ولا يقرب يمرق الروح
| Quote: دقيت الجسر وحاجر مشارع الحق |
دقيت الجسر
البتجاسر هو الذي يتطاول فوق مقدراته
فودحبوبة قادر ان يوهطو ويختو في علبو ويواسي
زي قول دا
هوي ياعرب احسن تراعو ادابكم
وواسوهو الكلام قُبال اواسي رقابكم
يحجر الشئ اي يمنع الوصول إليه
فودحبوبة مانع الناس من التعدي على الحق والحقوق
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: غنيت وجبت مسدار
المكنه بتكاكى وجنن مدافع النار
لفوك يا رحل الكحل دلوك ما بتندار
أمانة يا صقر ما تفرشت ليك برجال |
تقول انا قلت في الشعر وشعر مسدار لان الحديث عنك لا ينتهي والمسدار فيه يكون كل الوصف
وهو في مقام المعلقة تعدد فيه المواضيع الشعرية
المكنة بتاكي : صوت الطائرة في الجو
وهو الحير حاملي السلاح الناري من الجند البريطاني
الكحل ثقيل وزنو
لفوك لكن ماقدرو علي حملك يا رحل الكحل
الرحل هو وعاء لحمل الأغراض ويوع على الدابة يتدلى على حنبي الدابة
وعادة يكون من الجلد او شوال .. به فتحتين وتوضع الاغراض بداخله
صُح يا صقر والصقر جارح ماقدرتا تفرش الرجال ارضاً وعافية منك يا جبل الحديد
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: غنيت وجبت نمك
بجر القول عليك يا مقنع الكاشفات
أسد الخلا الحجر اليويات
ساقوك لي الشنق
يا أبو أمنه حوبتك جات |
انا قلت قولي وشعري فيك
النم هو الشعر والقول هو الشعر
اجر القول اي انظم فيك طيب حديثي وكلامي
مقنع الكاشفات
قلنا من قبل ان المرأة كانت لا تكشف رأسها
لكن هناك حالة واحدة عندما تضام وتظلم في نفسها او في عزيز لديها
فتذهب لكبار اهل البلد وتكشف رأسها امامهم وما بسترها إلا اخو الاخوان
المحدثو قلبو فيرد من ظلمها
وعندما يرفع لها التوب فوق راسها هذا يعني انه سوف يرد لها حقها
حجر اي منع
اليويات هي الدروب والطرق ابو امنه اظنها كُنية ودحبوبة
وعادة يكنى الرجل بأبنه او بنته
حبوتك اي يوم يتطلب فيه ثباتك يوم فيه الشينة منكورة
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: غنى وشكري يا خضرة الجٌم
طلع لي عشارى الليله مسكو يفوح
ما خطف البدينقه وما جفل مجروح
سيفو بياخد الخوده ومعاها الروح |
تطلب من البنية الخضرتها باردة ان تغني وتتنبر به
تشبه ود حبوبة بالتمساح العشاري ( مسكو يفوح )
تمساح عشاري جاسر وغلب الصياد ( مافي صياد قدر علي )
واشارت لذلك انو تمساح ما ختف البدينقا ( وكما تعرف في مناطق شندي بالبديقا )
وفرا مجروح
جفل اي فرا وهرب مخلوع
الجفلة حركية وعادة تجفل الحيوانات عندما ترى ما يخيفها وهي حركة سريعة مع هروب
الخودة هي الخوذة وطاقية يغطى بها الراس في الحروب
وسيف ودحبوبة ماضي بشيل الرأس بي خوذتو
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
| Quote: أمك ولدتك ما ولدتم أتنين |
هنا تريد ان تورينا ان ودحبوبة مافي زيو اتنين وذهبت لاضيق
حتى امه لم تنجب له اخ يماثله
امك ولدت وما حملت واتوجعت فوق فارغة لك الرحمة ودحبوبة
| Quote: تسلم لي يا تلبى البكيل العين |
التلب هو الجمل العاتي
يكيل العين اي يملئ العين ويدفق وما بشوي الشينة البتخلي الزول
يضارا خجلاً فهو بملى العين ويجعل الناس تفتخر به
| Quote: حالف يمين ما بكون بين البين |
بتقول ان موقف ودحبوبه كان واحد من يوم مشى في الدرب دا
درب شيوخه ( المهديين )
وما وقف موقف بين بين وكان ذلك سبب ادى لشنقه وفي السوق
| Quote: دقيت الجسر لي متعة الحيين |
الجسر هو البريطاني
ووضعت الطريق الصاح لمن بعدك
اي ود حبوبة كان كبش الفداء لمتعة الحيين من اهل السودان
عندما اشعل ثورته كان يعلم انه مغلوب لا محال لكن الكحة ولا صمت الخشم
لابد كان له ان يقول كلمة الحق ويوري الناس كيف الطريق لاخذ الحق وان كان
في ذلك موته
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
تشهد السمحة في البنوت على جسارة وشجاعة ودحبوبة
وتطلب منها ان تتنبر به في نمها وغناها
| Quote: من قومة الجهل ما قاملو بى نيه |
وتقول انه من ماقام صغير ما بسوي الشئ الني
والني لي النار
شيتو كلو تظهر فيه الرجولة والشجاعة
| Quote: وكت الشوف أشوف وقفولو سلطيه |
وهنا تظهر يوم شنقه كما شافوا كل الناس
وكيف وقف الجنود صفوف وكيف اتعبأ المكان بالمدافع والسلاح
وهذا يبرز قوته وكم حسبو له حساب
| Quote: تعدى وركز قال اخوكى يا رقيه |
كان الانجليز يخالون ان شنقه في السوق ربما يجبن ويتوب من فعلته
ويكون عظة للباقين لكن خاب ظنهم عندما ركز اي ثيت على موقفه
وتقدم لي موتو وقال اخوك يا رقية وما بسوي الشين يرقد لي
وقال انا مابجيب الشين
انا لو سقوني الدم
ولي موتو اقدم
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
ود المكوك الواعي سلام جاك
أنـا فــي التمـنـي ديـمـه هديـلـي سـاجـع
مـا لقيـت لـي مغيـث ولا لقيـت لـي مـراجـع
******
داير أشوف حبيبي اليوم داك .. شفته رايق ودمعه ناقع
أسـود شعـرو حالـك .. أمــا صـفـاره فـاقـع
تتلاصـف خــدودو .. لا حـجـاب ولا بـراقـع
أشوف لعسـو ونواعسـو .. جـل البـاري صانـع
أشوف في خدو شخصي .. وفي صـدري المضـارع
******
يفـر خيـت بسمـه يشبـه .. برقـا ً ليلـو هاجـع
يرفـع لـي رشاشـو .. يسـبـل نـظـره واقــع
دايـر أشوفـو غافـل .. ودايـر أشوفـو جــاذع
يتغطـى بـي سواعـدو .. ويحنـو كأنـه واجــع
ويلتجـى بـى مرافقـو .. وأطــراف المضـاجـع
وتتلـب فــوق شفاهـهـو .. لـؤلـؤة المـدامـع
يـردد لـي نغيمـا ً .. تشـتـاق لــه المسـامـع
******
أعاين فيهو وأضحـك .. وأجـري وأجيهـو راجـع
أقيـس بالليـل شعـرو .. ألقـى الفـرق شـاسـع
أقيـس الفـم بودعـة .. الـقـى الــودع واســع
ده مـا بيلقـاهـو زول .. زي الصـيـده نـاجـع
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: وضاحة)
|
اخدتا عرضتي وصوقرتا
نحن الدلوكا دي جارية مننا مجرى الدم
وكت نسمعها بتجينا الهوشا ومابقدر اقعد بقيف علي حيلي
وكان لقينها حية بنكب وسط الدارة زي صقراً نزل من فوق
الضهر برجف بدور البطان وهيييييييع
وتسلمي إت يا الرتينة وشمس المشارق
لك كل التقدير والود والمودة كمان
يسلم لي عوض الليلة
يسلم لي عوض الليلة
وعند الله العوض الليلة
يسلم الجنّى يا ليلة
المِرق مو قنا يا ليلة
زاح مني الضنّى يا ليلة
حالتي المحزنة يا ليلة
يسلم العشا يا ليلة
العمرو مارتشّا يا ليلة
لي الرحمن خِشا ياليلة
ولي الأرحام غِشا ياليلة
يسلم المفتاح يا ليلة
الما ولدّت قماح يا ليلة
وجه النصر لآح ياليلة
زي نور الصباح يا ليلة
خلاني ياناس مبسوطة
سبتَّ الهيجة سبتَّ الجوطا
تعليماتو جات مزبوطا
بس جرّت قلم في نوتا
هيلو الشكرة هيلو الفوتا
من زمناً بعيد مختوتا
ويسلم الجنى يا ديلا
قال يا بنية هوي أوعاك
تاني مااشوفك بي هناك
شن بدوري بي الجوباك
حقك عند المولى هداك
ويومي الزرتو جوا مكانو
شفتا هيبتو وسلطانو
شف حراسو وقافا أمامو
زي شيخاً وسط حيرانو
حق اجدادو يوم ماخانو
يسلم.. كل مالو عشانو
ومطراً العينة شايلا سحابة
تخدر لي اليباس ويبابا
اسمو الدخري لي أصحابا
دا في العِرفة ما بتغابا
يا عُزالو شن بتقولوا
دا كل المكارم هولو
بِحل الشبكا واقف طولو
مابفرز القريب الهولو
يومي الجينو شايلا ملامة
قال إن شاء الله عافية سلامة
قتلو فِتر من الخشامة
دنيا عابسة مي بسامّة
ساءت حالتي سُو ألآما
دا رب الغيوب علامّة
ناساً لي تمط في كلاما
تايه فكري في دوامة
ما لفيت لي إشارة علامة
نويت كربتَّ لي الحُزامة
لي الولد العالي القامة
قال إن شاء الله مافي ندامة
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
| Quote: يفـر خيـت بسمـه يشبـه .. برقـا ً ليلـو هاجـع |
يا سلااااام يا وضاحة دا الكلام البخلي الزول يعضي إيدي
( يفر خيت بسمة ) بس تخلي الزول يبقى زي فاقداً مزوزو ويودر حجابو
اللابسو في ضراعو ويقعد يشخت في الواطا
يا جمال التشبيه والبلاغة
وقد مهد للتسبيه ان جعل البسمة في خيط ( حيت )
حتى يشبه البسمة بالبرق والبرق عادة ينشحط في السماء زي الخيط مع كبر الحجم
وحتى يثبت ان بسمها يلفت النظر قال زي البرق في الليل البهيم
| Quote: يرفـع لـي رشاشـو .. يسـبـل نـظـره واقــع |
رشاشو هي عيونه التي سهامها نيران تنطلق من رشاش
الرشاش نوع من السلاح سريق الطلقات
يسبل اي يدلي طرف العين بعد الرشة ( خجل وحياء )
Quote: دايـر أشوفـو غافـل .. ودايـر أشوفـو جــاذع
يتغطـى بـي سواعـدو .. ويحنـو كأنـه واجــع
ويلتجـى بـى مرافقـو .. وأطــراف المضـاجـع |
سوف يتجنبني الحياء هنا حتى لا يفقد جمال الكلمة معناه
يعني سوف اقول البيت كما افهمه
( داير اشوفو غافل )
عادة الفتاة في بيتها تكون لابسا خفيف وقد يكون كمان قصير
والغفلة هنا
ان تكون سارحة وينكشف شئ من محاسنها ومايعجب الرجل
جزع اي خاف وجفل بسرعة وعادة دا يحصل إذا دخل رجل على مرأة
وكانت في حالة غفلة فترى الجزوع والحركة السريعة تلم ما يمكن لمه
فماذا فعلت تلك المرأة التي يصف فيها الشاعر
تغطت بسواعدها وانحنت على مكان ما انكشف من محاسن كأنها تعصر مكان ألم
في البطن ( وجعة )
انا عندما اسمع هذه الاغنية بتخيل لي ان هذه المرأة كانت بتحنن ( الحنة )
فمنى النفس ان يجدها في هذا الموقف عادة وقت الحنة تغفل المرأة من كتر فر الرجل ( الكراع )
وفردها فينكشف منها بعض من كل المحاسن والبعض هذا برمي رب
يعني الاتنين الغافل والمغفل الجا داخل بدون إستئذان بقعو رب
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: يسلم لي عوض الليلة
وعند الله العوض الليلة
يسلم الجنّى يا ليلة
المِرق مو قنا يا ليلة
زاح مني الضنّى يا ليلة
حالتي المحزنة يا ليلة |
اسم عوض
عادة تقوم الاسر في السودان بتسمية المولود الذكر بأسم عوض
عندما يولد بعد مولود مات فيعنو عوضهم الله بهذا لذا تيمنن البركو الهبة التي اعطاهم لها
الله يكون الشكر ضمني ( العوض ) او( عوض الله )
قالشاعرة تقول يسلم من كل اذى العوض وسندي
العوض عند الله ... والله سخره لنا لكي يكون السند والمعين
الجنى معروفة تطلق على الصبي واحيانا على الصغير
المرق : هو العود الكبير القوي وعادة يكون من الشدر القوي من السنط ونحوه
به يكون عماد بيت الجالوص فيكون من المتانة ما يحمله من رصاص ( خشب صغار ) وجريد
نخل وبروش وتراب ومن ثم الزبالة لحماية السقف من الامطار
والقنا نوع من العيدان لكنه اقل متانة من العود ويمكن كسره بسهولة
الضنى هو الألم الذي يلازم ويؤلم واعاد الشرور لقلبي الحزين
Quote: يسلم العشا يا ليلة
العمرو مارتشّا يا ليلة
لي الرحمن خِشا ياليلة
ولي الأرحام غِشا ياليلة |
قولة العشا جرت العادة وخاصة على لسان النساء الكبار ان تنادي من
تحب من جناها ( تعال يا عشاي ) وهي صفة
وتطلق كلمة عشاي دون الفطور والغداء
لان العشا بعده النوم ولا يستطيع البشر النوم وبطنو حافة
عشان كدي الواحد بشكي لو نام من غير عشا
ويقول ليك امبارح بايت القوا اي ما تعشيت
ما ارتشا اي بخدم من غير مقابل ( رشوة ) وحليل زمنا دا مافي عوض
وسموها خدمات وشركة الهدف هههههههههههه
وهنا توضح انه كان لي حق الله مو ناسي
بغشى الارجام من دمه ويواسيهم ويساعدهم
ويخشى المولى سيدو وقايم بحقو
Quote: يسلم المفتاح يا ليلة
الما ولدّت قماح يا ليلة
وجه النصر لآح ياليلة
زي نور الصباح يا ليلة |
والمفتاح : تعني بها بحل وحتى المقفل من الامور والما عندو حل تلقى الحل عنده
مفتاح الطبلة العاصية
القماح تحمل معاني قمح الشئ الشئ اي افناه
وولدت قماح اي ولدة وجع بطن ساكت مافيهو فايدة وليت اباه نام يومها
مافيهو نفع لنقسه ولا اهله وغيره
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
كلمات المنــــــأحة ( الرثاء )
ليه يا دنيا فيكي زول بعيش أيامو
لا عارف الوراهو.. لا داري بي القدامّو
لا عارف الزمن كيفن تكون أحكامّو
والداير الوصول لي المرسى قبل العامّّو
مــــا عارف البحر قدار بشيل عوامّو
الليل الليل
الليل الليل
الليل والليل
الليل والليل
وليدنا الضيف غرقتنو كيف
جيبو لي هدومو الراقد فوق القبف
خلوني النمنح بي القرع والسيف
وا سواد أمو الأهلو في الجريف
حليلك يا زمن هناي
حليلك يا زمن غُناي
وكت بقول انتَّ لي براي
وقع القدر خلا لي بكاي
حليلك يا هدية
حليلك يا الرضية
أبكن يا بنات
قولن ووب وأحيَّ
وا سواد أمو
الحنتو العشية
جَن بنات خالاتك
من صغار وكُبار
حزنانات عليك
ملينات غُبار
طول الليل ينوحاً
لآمن جا النهار
ناس الحلّة جو
والديوان ملو
مشوا لي البحر
وقالوا ما لقّو
وا سواد امو
الليلة وين ودّو
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: ليه يا دنيا فيكي زول بعيش أيامو
لا عارف الوراهو.. لا داري بي القدامّو
لا عارف الزمن كيفن تكون أحكامّو
والداير الوصول لي المرسى قبل العامّّو
مــــا عارف البحر قدار بشيل عوامّو |
لا أعتراض على قدر الله والمكتوب لابد يبين
لكن الحزن والفقد حار بالحيل
الداير الوصول لي المرسى والمرسى هو بر البحر
الشاطئ ... والبحر يطلق في السودان على النيل
ويا النازلة ماشّى علي البحر
ساعة الحلب ساعة الشمس يادوب
بتطلع من بينات الغصون
والبحر بشيل عوامّو
السواقي تركت في البحر ( النيل ) حفر عميقة وعادة التيارات في اللُجة
وكما تسمى الكوالي تكون عاتبة وتكون حركتها دائرية قي شكل مخروط
قاعدته على سطح الماء ورأس المخروط في القاع
والتيار يكون قوي يجذب كل من يقع قي الشيمة
من الصعوبة المحال الهروج منها بسهولة مهما كان عوام
بقال احسن شئ عندما تقع فيها ( الشيمة ) ان تترك العوم وتستسلم وتغطس معها للقاع وتقلع مائل يعيداً منها حتى تخرج منها
لذا كتير ان يشيل البحر عوامّو عندما يقع في الشيمة
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: الليل الليل
الليل الليل
الليل والليل
الليل والليل
وليدنا الضيف غرقتنو كيف
جيبو لي هدومو الراقد فوق القبف
خلوني النمنح بي القرع والسيف
وا سواد أمو الأهلو في الجريف |
الليل تعني هنا : وا السواد الليل علي على الفقد
وفيها الحسرة والألم وقد اجاد الفنان مصطفى تطريب صوته الملئ بالحزن
ايقاع اللحن في نفوس المستمعين لهذه المناحة
الوليد الغرق كان ضيف ( وقد سمعت روايات كثر عن هذه المناحة ) لكن المهم
كلماتها المؤثرة
يقال والله يعلم انه كان في زيارة عند جدته وهي التي نظمت القصيدة او نظمت على لسانها
والجريف وهناك ثلاثة جريفات
الجريف غرب شندي بالضبط غرب البسابير
والجريف غرب في الخرطوم
والجريف شرق في بحري
وقد
يكون هناك جريف اخر والله اعلم
القيف هو طرف البحر اي الشاطئ
امنح بالقرع والسيف
وهذه عادة النواح في المناحة
تكفى القرع في طست ( طشت ) به ماء وتضرب بالعصي
وتنوح حول النقارة والقرع النساء بكاءً على الميت
سواد امو اي وا سواد لياليها بعد فراقه .. وفراق الضنى حار بالحيل
وفراق الام حار
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
مرثية موسى ودجلي
فارس ومغوار بني جرار
بكته اخته بالكثير من المراثي
وخاصة بعد الذي ألت له قبيلته بعد موته من هوان بين سكان
تلك المنطقة
كان حامي حمى القبيلة حين كان في ذلك الزمان الحياة للقوي
قالت في مرة الحزن يملئ قلبها ان بني جرار بعد موشى صارت تسقى بهائمها ليلاً
بعد ورود كل الوراد
وهل ضيم اكثر من ذلك ؟
سوف نتطرق للمناحة التي نظمتها بعد موته
وموسى فاقت شهرته في الشجاعة واظن الكل سمع به
موسى ودجلي
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
كلمات المناحــــــــة
حليل موسى يا حليل موسى
حليل موسى اللي الرُجال خوسة
حليل موسى يا بنات بربر
وما بشرب الخمر يسكر
شدوّلو الأغر وأشقر
عجب عيني يوم ركب دفّر
يوم جاتنا الحربة تتقلّى
شايلالنا الخبير مللا
كان مُتنا في سبيل الله
وكان عشنا لي الرُجال مَلة
أنا الليلة مابشوف فاقا
الحربة فينا ساساقا
كان عشنا لي الرُجال عاقا
وكان مُتنا الدنيا فراقّا
يوم جانا الحُصان مجلوب
فوق ضهرو السرج مقلوب
ابكنّو يا البنات حي ووب
حليل موسى الوسدوهو الطوب
الليلة مابشوف راحة
والحربة فوقنا لفاحّة
عجب عيني صدد ألافا
على ذمة الحضر شافا
الليلة مابشوف زينة
والحربة فوقنا عرزينا
كان مُتنا فوق اسامينا
وكان عِشنا مين بكازينا
حليل موسى حليل موسى
حليل موسى السيفو لاحُسا
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
كلمات الأغنية العجبت وضاحة
الله هــــوي
بلاص والمجموعة
حليلي أنا وا حليلي
يا الله هوي
حليلي أنا
واللبيب ولّف جاب فنون
جاب كلامّن يمشي موزون
لي ام ضميرّن ليني عرجون
هي الدباس والفوق الغصون
وهي الضهب في البنكي مخزون
وهي الملك بي جلالتو في الكون
سمحة هبّلت ابان دقون
الجسيم ماطلعو صابون
بي الذباد والمسكي مدهون
زي الحرير الأصلي في اللون
تشبه الجدي وداللبون
حليلي انا ....يا الرايقا هوي
يابا شيخ زمراوي البنية
شيخ منور ولدك علي
خلو بالكم يا سيادي
ولي البنية الشايلا بالي
يا الله هوي
حليلي أنا ....
انا داير انط الحوش دردرب
أنا داير اشوف اللابسا الدهب
ورايقة هوي
أنا داير اضوق التين والعنب
يا رايقا هوي
أنا العكاكيز فوقي رب رب
يا رايقا هوي
أنا سيفاً يأخدني تب
وداير أضوق سجنا يا سنب
حليلي انا
أنا داير اكاسر الهُبر العصير
يا رايقا هوي
فوق محال تيل الصقير
يا رايقا هوي
وكان قبل وكان لاحلك الدير
يا الرايقا هوي
وسوا فر القمير في الطير
يا الله هوي
وخدرتا المزروع في القرقر
يا الله هوي
ومانجض لي الليلة خُدير
ياالله هوي
ومانقر بي السوس تمرو خير
ياالله هوي
يا ألاهي القول مو كتير
سوا دارة الحلقة ام فقير
ياالله هوي
حليلي انا ..
ويا مهيرة فارس اللعوب
يا الله هوي
بلي إيدك ورفرفي التوب
يا الله هوي
خلي شلاخّك لي الهبوب
وإن لقيتك ماني مغلوب
يا الله هوي
حليلي أنا ...
ياقميرية برسلّك يا رايقا هوي
طيري فوتي الجو والسلك
يا رايقا هوي
لي عجب روحي بدردرك
يا رايقا هوي
يا ابوك رباك بي الضحك
وعمرو ما نهرك وزعلك
يا رايقا هوي
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: حليل موسى يا حليل موسى
حليل موسى اللي الرُجال خوسة |
ترثي اخاها ممنحنة تنوح
والنوح هو البكاء بحزن كبير
حزن نابع من القلب حزن صادق
لذا كانت اجمل الاشعار هي الرثاء
تقول حليل موسى : اي حليل ايامه وحليل كل جميل كان يتصف به
وكان يفعله موسى فارس القبيلة وحامي حماها والذي يزود عنها
ويرد كيد الكائدين وكان كل القبائل تعمل له ألف حساب
يا حليلــــــو وحليل ايامو رقد اتوسد التقيلة
حليل موسى الكان لي الرجال خوسة
الخوسة هي السكين التي تلبس في الضراع
قد تكون تعني انه يهابه الرجال كما يهابون الخسوة لم تطلع
من جفيرها ( والله اعلم )
لكن الذي استشفه من القول انها تقصد
ان اخاها موسى كان زي الخوسة للرجل
اي عندما يلبس الرجل سكينه في ضراعه .. تكون له عون وقت الشدة ولا يهاب
وقوع المصايب عندما يشق الفيافي برا وحيدو ( مادام خوستو فوق ضراعو )
كان جاهو الجن مو سائل في
تعني ان اللذي يرافق موسى بكون مطمئن انه له وجا وحامي لا محال ان وقع في شر
ومابهم مادام رفيقو موسى ودجلي
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: انت جنيت حتك؟ بقول ليك عافيني معاها تقوم تلخبط في الحكي
الحكي ال ............... |
انا ما بلخبط لكن قاصد اوجعك يا مسنوح
خلاص كان كدي ابشر بس يوم اتنين في المولد
يعني بعد زفة المولد والقفلة بيوم
اصبر ولا ألحس كوعك
عشان تنال مرادك
وهي يا ودنو جمال كتلو
يا جمال افي افي إذ كان تأمومي في موية البلاعة افي افي
ههههههههههههههههههههه
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: حليل موسى يا بنات بربر
وما بشرب الخمر يسكر
شدوّلو الأغر وأشقر
عجب عيني يوم ركب دفّر |
تشهد بنات بربر على فراقه المر الحزين
وتصفه بتلك الصفة الجميل انه زول كان يخاف الله سيدو
وماشرب الخمور بل كان راجل الحارة يوم تجي حوبتو بكون برا
في كامل وعيه
ودوماً المهر الاصيل شئ مهم وتابع للفارس
فتقول حليلو موسى يوم ماكان يشدو له فرسه الاشقر الاغر
الاغر : اي له غرة في جينه
ودفر به اي جرى به
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: وضاحة)
|
Quote: يوم جاتنا الحربة تتقلّى
شايلالنا الخبير مللا
كان مُتنا في سبيل الله
وكان عشنا لي الرُجال مَلة |
خبر موت عزيز وقعه مر على نفس البشر
تحس الدنيا دارت بك وقت الخبر
لذا اهلنا يقولوا خبر البكى شين وما بوصلوا إلا المجبور
تقول اخت موسى ودجلي
يوم جاتنا الحربة تتقلّى
والحربة تعني بها خبر الموت ووجه الشبه الألم في كل من الاثنين
وقع الحربة في الجسم أليم ووقع خبر الموت مؤلم في النفس ( يطعن في القلب )
وتحس الطعنة بالذات لو كان الفقد عزيز على النفس
مللا اي يمل النفس ويخليها لا هي فوق لا تحت ويكون الانسان متحير في امره
ولا يعي مايفعل
ةترجع تصف كيف حياتهم وكيف مماتهم
اي كيف كانت حياة اخيها وكيف حاله عندما يموت ويفارق الحياة
موته هو في سبيل الله شهيد لانه هو حامي الحمى وحامي الديار والذي يزود عنها
ودوماً يقاتل المتعدي فقط
وحياته كانت كية نار في صدور من يعادوا اهله باطلاً
بمناسبة خبر البكى الشين تحصرني قصة الشايقي
كان في الجيش .. حينها كانت اخبار البكى بتجي بالتلغراف .. وطبعاً التلغلااف بجي ويستلمو الضابط
فحصل ان كانت كل التلغرفات موت كل مرة يموت عزيز لعسكري يكلف الضابط الشايقي ان يخبره ..
والشايقي كان يرمي لصاحب الفقد الخبر رب .. فكان من يغمى عليه ومن يصرخ بعد الخبر .ز بهدل الناس بهدله .. دعاه الضابط وققال له تاني لما توصل خبر موت حاول مهد له قبل ان تقوله لصاحبه وفهمه كيف التمهيد .. بعد ايام مات ابو عسكري فكلفه الضابط ان يوصل له الخبر .. ذهب وجمع العسكر .. ونادى على ابن المتوفي وقال له :
اجمع هنا
فجاء العسكري
فسأله : كم لك مدة ما رأيت والدك ؟
فرد العسكري : سنة كاملة
فقال له الشايقي : لومني كان شفتو تاني
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: أنا الليلة مابشوف فاقا
الحربة فينا ساساقا
كان عشنا لي الرُجال عاقا
وكان مُتنا الدنيا فراقّا |
الفاقة : هي الوفرة في الوقت
والحربة كما قلنا هي قدر الموت بجي لاوي زي الحربة وبركب كب
وكلو قدر الله لكنو حار على النفس
وتصف حياته كانت للعدو عاقة اي يعوق طريقهم للوصول لما يرمون
ومماته اصل هذا طبع الدنيا تجمع لتفرق والفراق حتم وهذا قدر كل حي
اليوم لا بزيد لا بنقص
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: الليلة مابشوف زينة
والحربة فوقنا عرزينا
كان مُتنا فوق اسامينا
وكان عِشنا مين بكازينا
حليل موسى حليل موسى
حليل موسى السيفو لاحُسا |
تعني بــ ما بشوف زينة اي حزينة واعلنت الحداد عي اخوي
وفي الحداد تترك كل انواع الزينة للمرأة
حزنا وحداداً
هنا تفتخر بنسبها وحسبها انهم معروفين للكل
وتقول كان مُتنا فوق اسماينا اي اسمنا علم ومعروف
وكان عشنا
مين بكازينا
اي لا يفعل ما نريده نحن
وتعني انهم كان لهم كلمتهم الحكيمة المعروفة النافذة في الناس
وكلامهم ما بقع واطا
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: الطيب شيقوق)
|
Quote: اصلك غشيم وسجم رماد
انا راكي هنا رضيت ام ابيت ومحل رهيفة تنقد
وكمان ما حاري منك رد |
نحن الما إنجمع لي فارغة كوم لمتنا
في كــــــل البلاد تعلو دوام همتنا
نحن للحق والشدايد مابنخون زمتنا
تيجان الملوك تعمل حساب عمتنا
مرحب حبابك وفي كل وقت وبي البتقولو
ولو ماشالك الرأس تشيلك العين
وفي العيون نوسدك ونلوليك
مابنحسب للضيف حساب من هو؟ وكيف هو؟ وعمرنا مابنعرف نعادي
الصيف عندنا ضيف كان حصيف وحكيم كان سجمان
والعمر لي حدو والسير لي مردّو
أنا الكاككو الفجخ الطين
أنا الضب الوقع في العجين
أنا المرض البخلي العين تسيّل
مودتي واحترامي
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: الطيب شيقوق)
|
Quote: سمحة الهيبة فوق ود المنسي
العنتيل جاء يتقند ومن شوفتوا الرجال جنت |
الرتينة عليك بجر النم القول وفيك الحرف يشح ويجف مدادي
لا اقول إلا ما قلت من قبل
يسلم طبعك يا الخاتية من القول
يا الدهب المجمر في جبال شنقول
يا السمح والفال ولهجك المعدول
صافية دهب خزانة ما طالتو يد زول
لك مني كل الود والاحترام والتقدير
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: Quote: العنتيل جاء يتقند ومن شوفتوا الرجال جنت
ووووووووووووووب انا منك يا مسنوحة وسجمانة |
الخيانة في دمك
ليه حزفت قول الرتينة
هي قالت ودالمنسي
بعدين من شيقوق مافي ولا حرف
إلا الشين
في ( من شوفتو )
قول نظرة يا ابوعلي
عاش ابوهاشم
سمح القعاد والنوح
اتفرجخ فوق الواطة وامسح دميعاتك
دا بقى عشم ابليس في الجنة
انا الكاككو الفجخ الطين
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
غنيت للستات
كلمات / عباس عبد الملك
والشاعر ابن الشاعرة أم برعه ولقد تغنى بالأغنية الفنان عبدالله الماحي وبادي محمد الطيب وصلاح بن البادية
غنيت للستات ... انا قصدي الانبساط
دائما
يا خلى مع البنات
********
حلمت حلم الخير .....في الجمعه آخر الليل غافيا
شفت الجيل وشكلو خير .. زى الجوهر وخير
قولي إن شاء الله خير في خير دائما
*********
غنائهن ما أتكبر ... طمبارن زام وكر
طربانن ما فتر ...... يكر زى رعد المطر
زغريدن حس قطر
**********
رقصن تقيل وخفيف .... قلبن ليهم التصنيف
اعضائى غلبنى اقيف ....... قالن لي يا اخوي كيف
اصبر وكون عفيف
********
قلت ليهن صبري قل ... وغرامكن بالمقل
حاش قلبي بمنجل .... لو كان حصل الأجل
سببي الجفل ووقل
******
امرنى ادخل أهز ... شايل السقايتو تجز
راكزا
والأرض تحتي ترز .... جات بت ملوك العز
شبالها عطرو ينز فائحا
*********
قلت ليهن ما بى شئ .. شاويانى ناركن شئ
من فضلكن لي شئ .... جلسه بعد العشى
بسنة ابن قصي دائما
******
قالن لي كان داير الجلوس .... اخد ليك منا عروس
عاجلا
أسرع جيب الفلوس .... دى العملة دى البتكوس
تبرى خروز في خروز
*******
سافرت أجيب المال .... من دار برتا القصار
طافشا
ما لم يجينى خبر .... سبب البنات ياخال
سبب لي عقلي ضرر خلل دائما
*******
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
كلمات مرثية بنونة بت نمر
فوق اخوها عمارة ود نمر
اداء أمنة مختار بت السرف
علي إبراهيم اللحو
وهي امنة مختار هي بنت شندي رضعت سمح القول
في شندي فوق موطنها مكان كل الاحداث
عملت بمستشفى شندي ( قابلة قانونية ) داية
جرت كرعين أغلب اولاد وبنات شندي هي والتتوري كانت برضو داية
والتتوري عليها رحمة الله هي من بيت النجومي
اهل الفارس عبدالرحمن النجومي
كلمات الرثاء
لواي سلسلن قاهرن بلا تحنيس
دراج عاطلن ليلة بجنّو دريس
حي عليهو.........
من قلبو باعد ابليس
الخيل روقّن فيهن عمارة عريس
فراتك حافلّن فارس جنى ام ادريس
حي عليهو
من بالو باعد ابليس
يبكنك بنات حاسات غزيرات ديس
حزننات عليك بي الوجدة والتجريس
حي عليهو
من بالو باعد ادريس
الخيل روقّن مابقول عداداً كم
فراتك حافلّن ملاي سروجن دم
احي عليهو
من بالو باعد ابليس
فراتك حافلّن ملاي سروجن دم
يبكنك بنات جعل العزاز من جم
حي عليهو
من بالو باعد ابليس
مابتلقى القبيل زي مايريد كوعك
عقب يا صقر رقد البزيل جوعك
حي عليهو
من بالو باعد ابليس
عقب يا صقر رقد البزيل جوعك
إنكسر المرق واتفرقّو جموعك
حي عليهو
من بالو باعد ابليس
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
| Quote: لواي سلسلن قاهرن بلا تحنيس |
السلسل المقصود به ( لجام الفرس )
قاهر اي غاصب .. يقهر الفرس اي يجعله يطيع حراكته يمين يمين شمال شمال
والتوجيه للفرس يكون باللجام امر سير .. امر قف .. امر اخذ مسار يمين .. امر اخذ مسار يسار
زد في السرعة امر ..اخفض السرعة أمر وكل تلك الاوامر تكون عن طريق حركات في لجام الفرس
اساسا تدرب الخيل وغيرها من الدواب ( الطاعة ) على تلك الاشياء
يس : قف
رخي اللجام ثم شده مع ركلة بالارجل في بطن الفرس امر للسير قدما
جر اللجام بشدة حتى يصل رأس الفرس قرب السرج امر قف
وغيرها من الحركات باللجام
عمارة كان يقهر الخيل عنوة وتهابه الخيل
غارة تعني كر وفر ولا يستطيع الفارس الكر والفر في الوقت المناسب
إلا بمهر اصيل يفهمها طايرة
والحرب تحتاج لسرعة في الحركة
فكان عمارة قاهر للخيل في الحروب
يدرجها ويرحم عاطلها ( النعبان ) في وقت السلم
| Quote: دراج عاطلن ليلة بجنّو دريس |
دريس : اي جماعات
Quote: حي عليهو.........
من قلبو باعد ابليس |
احي عليهو : هي زفرة حزن قوي تخرجها المرأة دليل على حزنها
واكثر ما عجبني في هذا التعبير : تحس في الكلمتين الحزن الشديد والوجع على فراقه
هناك كلمات تعطيك الاحساس بالحركة
من قلبو باعد ابليس
اي انسان زول دين ويفعل ما امر به الله وينتهي عنما تهى عنه اللع تعالى
لايعرف ابليس لقلبه وسواس
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: الخيل روقّن فيهن عمارة عريس
فراتك حافلّن فارس جنى ام ادريس
حي عليهو
من بالو باعد ابليس |
الخيل روقن ( هدأت ) من صولاتها وكرها وفرها
اي بعد الحرب ورجوع الفرسان....
كان عمارة فارس الدارة وفارس الخيالة
وهو البفرتك جمع ( حفل ) الخيول وفرسانها
وكما ذكرنا سابقاً عمارة كان مات بمرض ولم يمت في ساحات الوغى
وكانت بنونة تتمنى له الموت وكت الطعن والصدام في أم لبوس ( الحرب )
مات عليه رحمة من الله بمرض عضال علاجه الرماد يكمد في القروح ( مرض الجرب )
وقد نقلت لنا بنونة هذا بقولها في قصيدة اخى
مادايرلّك الميتا أم رماداً شـــــــــــــــــــــــــــح
كُت دايراك يوم لُقى
بي دميك تتوشح
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: يبكنك بنات حاسات غزيرات ديس
حزننات عليك بي الوجدة والتجريس
حي عليهو
من بالو باعد ادريس |
من مجرى القول والنم في الرثاء هنا في مرثية عمارة
انها نظمتها بنونة تصف فيها موت اخيها الذي كانت تتمناه
ان يموت في الحرب ليس كموت الجمال
ويا محاسن الصدف كم من الفرسان قدر الله لهم الموت في الفراش
رغم انهم خاضوا الكثير والمثير من حروب وكانوا فرسانها وتشهد لهم الساحات
قبل من رأوا وشافوا ... وعلى رأسهم الصحابي الجليل ( خالد بن الوليد )
قال في هذا قولته المشهورة وهو في فراش الموت وقت سكرات الموت
( شهد ماشهدت من المعارك
ولم يبقى في جسدي موضع
إلا وفيه طعنة رمح وسيف وسهم
وها أنا اموت كموت البعير
فلا أعين الجبناء )
وهكذا كانت بنونة ترثي اخاه كما تمنت ( الموت له في الحرب )
تقول تبكيك يا عمارة بنات يكنك لك التقدير لفراستك وشجاعتك
بنات شعرهن غزيز
الديس هو الشعر
وحزنهن عليك بالدمع الصادق ووجد وحزن دفين
الوجد هو الحزن الدفين
وقالت وجدا
الجرسة هي عدم تحمل الموقف
فيقال : ما تتجرس بالعامية اي اثبت وتجلد ومابنفع الجقلبة ( الجلقيب )
وقال الشاعر
الصقر كان وقع كتر البتابت عيب
البتابت هي الجرسة ( جرسة الصقر فرفرة وبتبتة )
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
الخيل روقّن مابقول عداداً كم
فراتك حافلّن ملاي سروجن دم
احي عليهو
من بالو باعد ابليس
Quote: فراتك حافلّن ملاي سروجن دم
يبكنك بنات جعل العزاز من جم
حي عليهو
من بالو باعد ابليس |
احي يا عمارة اخوي .. ( لسان حال حزنها على فراقه )
ياعمارة يا ما كنت بتفرتك جماعات الخيل يا من كنت تجندل فرسانها
وتملئ سروج خيولهم بالدم
يبكن ياعمارة بنات جعل العزيزات كلهن
من جم اي كلهنَّ
Quote: مابتلقى القبيل زي مايريد كوعك
عقب يا صقر رقد البزيل جوعك
حي عليهو
من بالو باعد ابليس |
تقول ما كل مراد باليد وكما كل ما يتمنى المرء يدركه
وا حزني عليك
يا من كنت تشبع صقور الجو بجثامين من تقتل في الحرب
فقولوا للصقور مات من كان يطعمك ويزيل جوعك
Quote: عقب يا صقر رقد البزيل جوعك
إنكسر المرق واتفرقّو جموعك
حي عليهو
من بالو باعد ابليس |
انكسر المرق : المرق هو دعامة البيت
عود كبير يحمل شقف البيت
بعد موتك يا عمارة تفرقت الناس وكنت لهم بمثابة المرق للسقف
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: أبوبكر أبوالقاسم)
|
Quote: سلامات للجميع
استمتعنا - بعد غيبة اختيارية- فى تخوم السودان بالإبداعات
كالعادة الإبدع والون تو متواصل فى دهاليز التراث ... ونحن مجرّد شهود. |
ابوالقاسم
مشتاقين يا رجل
توكرنا وتزوغ ماكان محرية فيك
رجع الانجمامة رجع الانجمامة وفد زوغة اتلومتو ياناس رافعة الحصاحيصا
شاهد بس ما بترضينا
نريدك ممثل دفاع او اتهام
الشكر موصول لك يا جميل الروح
منتظرنك
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: سيد الأبيض النهار
سيد المُهرة والقرقار
الليل مو فشار
إيدك مابتخون الجار
إيدك ترجم الحقار
الليل مو فشار
وخايلا الملكة فوق مختار |
كات سعية وامتلاك الخيل ولقت قريب تشير للمكانة الاجتماعية
البيوت الكبير ولانعني الكبر هنا مال وجاه لا حاشى وكلا بل كبر البيوت
وعمل لها ألف حساب بشرف أهلها والشرف ليست بجهوية بل كانت العوائل تكتسبه
بفعل الخير والفضل ( كرم .. شجاعة .. حكمة .. قيادة بحق .. خُلق كريم.. وقفة مع الحق أين ما مال ..
عون الضعيف والفقير .. الدفاع عن المظلوم )
نالت الكثير من الاسر هذا الفضل والجميل متوارث والنار ما بتخرا الرماد دوما النار بنقول بتخرا الجمر
الجمر احمر مشتعل والبقرب بتحرق
كانت تلك الاسر تهتم بتربية الخيل كمال للوضع الاجتماعي المهر يدرب البطان ( الصغار ) على ركوبه ويدربوا على الفروسية به
لذا نجد كلمة المهر والحصان الخيل كثرت في اشعارهم ولاتخلو قصيدة من كلمة مهر
تقول الشاعرة
سيد الابيض النهار
الابيض هو الحصان
نهار : اي سريع ان جرى
يقال والله الحصان بننهر نهر اي بجري جري سريع
سيد المهرو والقرقار
والقرقار : هو السلاح من بندقية ونحوها
إيدك مابتخون الجار
يا من للجار صاين حقه فلا تخونه في ماله وأهله
بل تدافع عنه وتموت دونه
لكن إيدك بتردع وتقهر الحقار الذي يظلم الناس والذي يأكل حقوقهم ويأذي الناس
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: عرش دود مرق دثار ليهو.. الموفشار
خايلا الملكة فوق مختار |
كلمة عرش
هنا استخدمتها الشاعرة ضمنياً
العرش للبيت هو السقف وهو الذي يحمي اللذين يعيشون في البيت
ويقيهم البرد والحر والمطر والرياح
فعندما قالت عرش تعني كان حامي لأهله كفعل السقف ( العرش )
وعرش في الماضي اي كان حامي لاهله من كل شر وأذى
الدود هو الأسد بالعامية السودانية
يدثر يغطي
وارادت ان تقول ان اخاها كان غطاء اهله
فشار يقال فلان بتفشر دوما يتحدث ويفتخر بأفعاله
وهناك كلمة اخرى بوبار ( البوبار هو/ هي التي تتحدث بما لا يعفل / تفعل ... ويتحدث بما لا يملك / تملك )
خايلا : تشبهه وتماثله تماما
الملكة اي القيادة وتكون الامور كلها في يده
مختار هو اخوها وهو ناظر العبيدية
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: عرش متل ابوك يادود
وأحسب لي تمانية جدود
زايد في الرجال بي عود
وضربك جلة مو بارود
مو فشار |
تقول له كون كما كان ابوك حامي لحمى أهله لي حدهم
يا دود اي يا اسد
واحسب لي تمانية جدود
اي لو حسبت لجدك الثامن كلهم كانوا حايمين حمى اهلهم وكانوا رجال لهم من الشأن
معالي
زايد في الرجال بي عود
هذا تعبير دقيق يا سلام وما اجمله تعبير
حق الرجل في الورثة عود وهو مقاس متعارف عليه في توزيع الأرض زراعة او عقار
في الميراث للرجل مثل حظ الأنثيين
فلو نال الرجل عودين المرأة عود
تقول الشاعرة ان اخاها مختار حتى بين الرجال زايد حقه عود
وتقول له وعندما تبطش فبطشك جبار زي ضرب الجلة اي المدفع
ما زي ضرب البندقية ( البارود )
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: قالت امو جِيد ليا
وبي ناظر العبيدية
الليل مو فشار
دابي وراسي في ليّة
وخالف لي الرُجال كيّة
ليهو مو فشار
وخايلا الملكة فوق مختار |
جِيد ليّا : وهي جملة شائعة عند الامهات والخالات والعمات والحبوبات
تقول لي جناها تعالي ليّا وجيد ليا
وهي جيّد لي اي ان تكون انت ولدي / بنتي
وتقولها فخراً
ناظر المنطقة اي عمدتها ورأسها
الدابي هنا تقصد بها التِمساح
راسي اي راكن
واللية هي المكان العميق في النهر
الكي علاج لكثير من ألآم الفكك والردخ والرومتزم وامراض الصفراء والكثير من الامراض
والكي يكون بــ ( المرواد ) والمرواد في شكل البرة لكنه كبير وله ماسك من خشب
يحمى في النار لدرجة الاحمرار ويكوى به مكان الألم والكي يكون اثنين ( كية )
لذا يقال خلف له الكي اي كرره له ويعني هنا في القصيد ان كيه ( ضربه ) للعدو دوام خلف اي مرتين
اخلف لي الكي صارت كمثل يقال حين يريدحين يراد ...
( ان تنزل البطش الشديد بالعدو) اخلف لي الكي اي اضربه بقوة كأنها ضربتين في مقدارها
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: انشر بى قلمك نغم
أديهو من وقعك حياة
وادينى من وهج الغنا
القلناهو فى زمن الشتات
وادينى من عشقك وطن
يمتد فى كل الجهات
وادينى من شوقك نجوم
تهدينا ضو الامسيات |
شمس المشارق
لك التحية والأشواق
لا املك من الحرف إلا ان اقول
ماقال عباس النقرابي
شتيلة برتكانة تريانة وبين بحرين
كل الشافك جنَّ وفقد وقال يا أمين
حراسك ناس ام علي قاسين بالحيل
الطير في السماء يقولولو جيت من وين
مودتي وبرضو مشتاقين
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: العنتيل جا إتقنت
من شوفتو الرُجال جنت
الليل مو فشار
عرش فوقم وإتعنّت
ولا تخيب رجا الظنت
ليهو مو فشار
وخايلا الملكة فوق مختار |
العنيل هو الأسد وعنتيل اصلاً تعني في العامية
السودانية الملئ الجسم
ليس السمين بل الملئ الجسم مع ظهور القوة في جسمه ( اي جسمه مربط )
وزي مابقولوا اهلنا ليهو ( ذند )
إتقنت يخرج صوت وقنتت الاسد طبعاً قوية ومخيفة وترهب
وان الرجال تهابه وتخشاه
عرش فوقهم وهنا كلمة عرش تعني اي انزل فيهم وابرحهم ووريهم ضرب الرجال
ما تخيب ظني فيك وانا ظني فيك كبير يا اخوي مختار
وقد تكون تعني لا تخيب رجاء البنية القافلة الخاتا عينها عليك
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: يا جِنيات روقي ليا بلالي
فوق الزين دُخري ليا |
الخفيف
يقال الجنى
للشاب الصبي
وتقال للصغير
ياجنيات روقوا ليّا
اي أصبروا خلوني أقول نمي واجيب شكر البدور اصوفو
وهي تفتخر
باخ او قريب دم اكيد
دا بلالي البدور اوصفو
والبلال . هو خليط من ماء شاي وزيت او دهن ويستخدم للمشاط
فائدته انه يجعل الشعر طري ويسهل مشاطه.. حيل المشاط .. له برنامج وتحضيرات
خاصة .. المشاطة .. والبلال .. والجورسي .. والسلة .. والمخرز لشق الشعر
والشقة ما كل مشاطة شاطرة فيها .. بنهنَّ ما تجيب الشقة عديلة ودي زبائنها بكونوا قليلين
وفيهن البتكرب الرأس اي حينما تضفر بتكرب الشعر قوي ودا بسوي للمرأة صداع .ودي برضوا بتكون مجلية
فنون المشاط دي بعرفوها براهم ( النساء )
تقول ليك فلانة دي مشاطها حار ( اي بتكرب كرب عندما ضفر الشعر )
والنساء بعضهنَّ شعرهن طويل وزي ديل ما بوصلوا
الوصل ( مع انه منهي عنه في شرعنا )
لكن كان يفعل في السودان ولوقت قريب
يوصلن شعرهن بالجورسي قديما .. ثم السلة .. ثم حديثا بقت باروكة
تركيب ومصبوغ شعر ويصبغ
شعر اشقر وبني واحمر والله مرة قابلت سودانية صابغة احمر بي اخضر
خلا شكلها زي الببغاء
في رأي هذا لا يناسب السودانية الصبع باللون غير الاسود
ليلين شعرك والدجى
وما اجمله اللون الاسود في الشعر
لكن كل زول ما راضي بي خلقو
الضعيفة دايرا تبقى سمينة والسمينة بتعمل في رجيم
السوداء تقوم وتقع مع الكريمات التي قد تؤدي بحياتها ( فشل كلوي )
الملطا تكبر في عجزها والعجزاء تشكي من كبر عجزها .. يا ناس كلو زول يرضى بالهيئة التي ارادها
له المولى .. إلا لو كان ماعليه يسبب مرض هنا بكون دا رأي الطيب والطبيب بنصحك بما هو غير ضار
وله ( سايد إفكت )
وحتى الخواجيات الواحدة فيهن لما تصبغ بتختار ما يناسب لون بشرتهاوعيونها
مستحيل تجد ذات العيون الزرقاء والبنية وخاتف اللونين ان تصبغ باللون الاصفر ( الاشقر )
الشقراء هذه ( اقصد .. الشقراء خلقة )
بتكون عيونها خضراء
لكن مــــأ رأيكم في واحدة سوداء وصابغة اشقر ؟؟؟؟؟
هنتيكة حــأ تكون
نعود لللشاعرة .....
فتنادي الممدوح انه بلالها
لا اعرف وأعلم من قال هذه القصيدة كان رجل او مرأة ( اقصد شاعرها )
لكن من مجرى القول يتضح جلياً شعر مرأة.. الرجل لا يستخدم كلمة بلالي ....
وتريد ان تصف ان الممحدوح انه
الصعبة بخليها هينة وطرية كما فعل البلال مع الشعر
والزين قد يكون اسمه
وقد يكون تعني به سمح الخصال
بنادوا في السودان تعال يا الزين .. اخوي الزين .. فلان الزين
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: الزين سموك الأصم
ماسك الرأي والفهم
يوم سمعو ونقرو الشتم
ديل ساقم قدامو كم
بلالي الزين دُخري ليا |
الأصم : اي كانت فيه كل الخصال السمحة متوفرة يقال له أصم
وبعض الناس تقول اصم اي قوي في بنيته زي الحديد لا توجد فيه
مسامات مصمت ( اصم )
وانا ارجح القول الثاني
ماسك الرأي والفهم
تعني انه كان رجل حكيم في قوله وفعله ماهو اهوج عرور يتصدر الفارغات
يوم سمعو ونقرو الشتم
ديل ساقم قدامو كم
البتجاسروا يوم ضرب النحاس والشتم بتلقاهم جارين قداموا
ودا الزين بلالي والدخري
ليوم الحاجة له والمدخور دائماً بكون غالي ونفيس
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: الزين يا مقنع وليتو
يا خصام الزين شقيتو
الزين دا دابي وسمو ريقو
والزين كان هبش الزول بعيقو
ويلالي فوق الزين دُخري ليا |
مقنع الولية .. تعني بها ساتر بنات أهلوا الستر هنا حافظ لهنَّ كرامتهن لا يتجاسر
كان من كان بالتعدي عليهنَّ
المقنع هو التوب أو الطرحة أو ما يوضع في الرأس لتغطيته
والتشبيه هنا ضمني ويعني ما أسلفنا
تنادي أعدائه وتقول لهم ( يا خصام الزين )
انتو اشقياء ( وشقي الحال بقع في القيد)
ومعنى هذا المثل او القول ان ( المجانين كُتار لكن الشقي هو البقع ويقيدوا بي السلاسل )
شغل من يطبو الجن
الزين زي الدابي ( الثعبان ) سمه في رقيه ( ابعدوا عنو )
يعيقو : اي سبب له عاهة دائمة
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: يا جنون استرو حالي
سمح الريد لي مجالي
البجيبو الدهن بي المجاري
البشيلو الروس في المخلالي
بلالي فوق الزين دُخري ليا |
هنا تنادي كل صبيان اهلها وتعمم الشكر والمدح ولم تخص به الزين فقط
بل الصبيان من اهلها ورهطها
انت اهل الكرم وكرمكم خمج واسراف وهذه محمدة في اكرام الضيوف الاسراف والخمج
حميد ماسمعنا قالوا
والله الزول دا ما كويس لانو بسرف في كرم الضيفان
تقول للجنيات ( وقد اطلقت عليهم الجنون ) جمع حنى بالعامية
انتو واهلكم كرمكم بتبدعوا فيه
بتضبحوا الكثير لما يكون ما ينتج مما تذبحوا
دهنو بجي بالجداول ( مجرى الماء )
ورؤوس ذبائحكم بشيلوها في المخالي الكبيرة
واللحم خلي ساكت .......
| |
|
|
|
|
|
|
| |
وضاحة
خالد علي محجوب المنسي
هند محمد
Ahmed al Qurashi
الطيب شيقوق
أبوبكر أبوالقاسم
فيس بوك
تويتر
انستقرام
يوتيوب
بنتيريست