Quote: وكل ما العتمة تنزل سابله انسى عناي واتاوق لقناديلك وأشد حيلي وأدوبي لك وإذا مغنّاي يبرد في الحشا صدرك ويرجع لي تهاليلي بدّوبي لك ولو الشوق عرف بكاك اطري غناي عليك العزة آ المريوده أدوبيلي
العتمة ( غروب الشمس وتعتم الدنيا لا صي فيها ) ونزول العتمة إذان بان يوم شاق من عمل قد إنقضى ولما تعتم الدنيا بنسى كل عناي وكل تعبي وأتاوق أشوف محياك يا الرتينة وأغني لك حباً وشوقا ومودة حضنتها حناي قلبي المغرم وإذا غناي يبرد ما بداخلك من شوق وحب وبرجع لي الأيام الحلوة في عشقك بفضل أغني ليوم الساعة
ولو الشوق عرف بكاك أطر انه هناك زول بحبك ويعزك وانت كبيرة في جوا عليك العزة آ المريودة غني لي
10-07-2012, 06:51 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
طوَّل مفارق حيو الحي هنا المكان المعهود الذي كنا نلتقي فيه
طوّل مفارق حيو يا اخوانا كيف ؟ وأزيّو من يوم فراقو ديارنا ماشوفنا زي زي زيو
زولاً حنين زي زولنا حبيب حنين زي زولنا والله ما بتخلّى والحي مصيرو يلاقي طال الزمان أو قلَّ كانت قلوبنا تغني لو جانا يوم أو طلَّ ياحليلو شال أفراحنا مسّخ علينا الحلة
الشاعر علي شبيكة الذي شكل ثنائية بكل معنى الثنائية مع ثنائي العاصمة السني الضوي وعلي أبودية عليه رحمة الله
يمتاز شعر الفنان الشاعر علي شبيكة أنه ينتقي الكلمة السهلة المتناولة بين الناس ويسكب عليها من مشاعره الجميلة بصدقه في المشاعر جمال فحدى بكلماته لا أقول الشعب السوداني لكن أغلبه لاتجد في السودانمن لايحب ثنائي العاصمة وحب الثنائي حب لكلمات الشاعر الشفيف علي شبيكة بعمق مفردته التي تلامس قلب كل من عشق وضاه هواه بين ليلة وضحاها
تغني الشاعر ربنا يحفظه ويطيل في عمر ينشد لنا بالكثير المثير والجميل غير أغاني ثنائي العاصمة .. هو في رأي من الشعراء اللذين تحس صدق مفرداته في جوهه مشاعر متدفقة وحنية
10-07-2012, 07:56 PM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
لي متين يا أغلى من النظر أنا بي وراك أبرى القمر ( وابرى بالعامية تعني اتبع اي أتابع ) لِي متين يكون دربي الودر ( والودر هو الضياع في فيافي ضباب عمر بعد ) ودربك معاي سكة سفر ( وسكة السفر مافتها بعيد والشفر قطعة من جمر )
لِي متين أهيم أنا في شقاي ولي مين وراكا أقول غناي يا الليَّ شوفتك يامناي لي متين تجي وتبرد حشاي ( برد الحشى ان تطفي نار ملتهبة في داخلي بحبك وحنينك وعطفك )
ياسيدي بعدك والله حــــار فيهو الشقّى وفيهو الودار اقضي العُمر في الإنتظار بالليل سهر وهم بالنهار
راجيك وصابر بالسنين كل يوم تزيد ريدة وحنين ياربي سيد العارفين عَجّل وجيبم سالمين ( اي جيبهم وعود بهم ... والعود دائماً حميد مستطاب )
10-07-2012, 07:59 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
هههههههههههههههه تل ضرعاتك وارفع حجباتك لي فوق النشوف مايرنو ولا حامد ابــ عصا وجنياتو وسلمان ودالعوضية في جوير ودضبعة وودحسونة الحار وبسبار ابوالعونية وتاني ههههههههههههههه
10-07-2012, 08:19 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
إن التجرد لحبيب هويت هو مقام الحب الصادق وحتى لو قدر اللهالفراق وهذا شئ بيد الله ولا يد لنا فيه ونرضى بقدر الله وهو العالم وعلام الغيوب وهذه مشئته وقدره علينا نفقد أجمل حب واحمل حبيب والجمال ليس جمال خلقة الجمال هو جمال الروح .. ادب وخُلق .. وحسن طلعة تدخل على القلوب السرور الهناء من وقع عليه هين لين جميل روح وقلبا خُلق وسترة والقلب يحب والمشاعر تحن وتواد من تحسه وتشعر به أحساس تتذوق طعمه محنة وعطف ومودة
مابسألوا وما بزعلو الزول الحلو الزول الحلو
10-07-2012, 08:36 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
لك التشكرات بركات تنزل عليك يا وضاحة تحياتي ومودتي
ودشيقوق الحديث لك يا من دخلت في ساحة غبش وتراب وربت شعر ماعندك لي رقبة وكيف الشورة لما تغني وتنم أم وضيب حز وأنا بحر الأدبراوي الساقي الرجال بالنز ( بتعرف النز يا جنى الدندر الماقرع مويتو ) العشمامة بتجي وقفت حد ( يا دائماً ) والعشمان الداير غرض يقضو لي ومتعشم غرضي إن ماإنقضى خلي دار جعل تنهد وهيييييييييع الغرض بقضوا وكيف الحال لو كان غرض عزيزة وغالية أخت حبيبة ام عمة خالة وبنقول ليها يا الخدرا المفرهدا وفوق جروفا ندية علي الواقع وراك أنا كيف أشيل إيديا حتى أن كتلني عافي ليهو الديا دمي مالي هينك وأقبليهو هدية
وكان كمان دارت كتلو دفننا ليهو لي المخروقة وهييييييييييع يا جنى الدندر أنا الـــ كــ كـــ و ...
10-08-2012, 06:09 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
صحي البيناتنا أصبح كـــان وكل الريد عليكم هان وكل العُشرة والأشواق صحي نسيتوها يا الحِبان صحيح قدارة يا دنيا وأمانك مافي ليهو أمان أمانك مافي ليهو أمان
قضينا ربيعنا كلو دموع وماعاد لينا غيرا وليف نشوف مادارت الأوهام وباكر زي خيال الطيف نمر بي دمعة واحدة نفوت ونحضن دمعة تانية نقيف وليه .. بالله مــأ تورونا ننسى الريد ونهجر كيف ونحن الزادّنا في دنيانا كلمة حُب وقلب رهيف
غرام عشنا السنين ليهو حرام يادنيا تطويهو حرام نتلاقى زي أغراب وزي أغراب نحيهو وين يا الليل .. وين حِبي ... ؟ وين يا ليل .. ألاقيهو ؟؟؟ وأغني غرام وأحلّى كلام وأفرّو جناح وأطير بيهو ... وأغني وأقول ولي كُل الناس أنا المكتول وحي بيهو أنا المكتول وحي بيهو
10-09-2012, 08:37 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
منى خوجلي ما بتقصري وربنا يديك الصحة والعافية كل دعوانا أن يتعافى الاستاذ والمربي والفنان محمد ميرغني
ويا سلام يا منى تسمعي القامة محمد ميرغني يكسب احاسيه ومشاعره كلها في أغنية لا بتسالمي وهذه هي هديتي لك بمناسبة عيد الأضحى أنت استمعي لها وأنا بأكل ليك لحم الضحية ثمح ( زي مابتقول الرائعة اسيا ربيع )
10-12-2012, 03:18 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
وكيف أنساك ...؟ وكيف الزول ينسى روحو وكيف أسلاك .. مغيب الشمس في المشرق لو السلوى لمهواك يا غالية تهاجر الطينة من جروفها لو يوم قلبي نساك ما انت سكنتي في أحشائه وكيف ننزع الأنزرع بين الحنايا
10-13-2012, 07:58 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
الحب يحيل دنيانا سلام ومحبة ومودة وحنين قد تسطيع أن تعيش في نعيم بحبك الصادق ولكن قد يكون حبك الصادق سبب لتعاستك الحب جحيم يطاق يطاق ونعيم الدنيا يضحو جحيم من غير حب من أحببت وجحيم الحب هذا يعني أنك أحببت بصدق وأمانة
أللهم أنعمنا بحب صادق وقلب صادق يصدقنا كما نصدقه
أللهم أمين
10-14-2012, 08:26 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
أهدت زوجة الأديب العقاد له بلوفرآ من الصوف كانت صنعتة بيدها وأخذ منها وقت طويل ، فلاقى الأهداء تقديرا لديه شعور جميل وقع على نفسه فكتب أبياتآ يقول فيها
الم أنل منك فكرة في كل شكة إبرة وكل عقدة خيط وكل جفرة بكرة نسجته بيديك علي هدي ناظريك إذا ما إحتواني فأني مازلت في أصبعيك.
تهادوا تحابوا هكذا قال رسولنا الكريم صلى الله عليه وسلم
10-15-2012, 06:31 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
الحُلم الأول البحر المالح سيلاً ضرّع و موجاً فرّع من الشام من ناك للسهلة النجدية ( تنطق مناك ) الأم البكر الزنجية يا وادي الزنج لو آخر خيمة إنقجت كانت ركزت فوق سنار لي ريحة القهوة العربية كانت فابريكة بُن كانت مشتل أبنوس كانت فى الشّعَر القُرّقد قايم شتله تجامل الشتله التفل الروس كانت فى الطبع الحار الريد الحار الحزن الحار الحزن الجن الأحمر كان مهووس
والحلم التانى من الفسطاط الخيل فى الخيل لي فاطمة أم حجل العرجون الخيل مرحات النوق مرحات الخيل الدفرت دفرت وادي صعيد أسوان دون لاجاي للبت الخصبة الزنجية النوبة تصيح لي حلفا نبيح للنهد السابح فوق الريح للعشق الساخن رجاى الخيل الدفرت فاتت دنقلا دون لا جاى
والمدّ التالت غاشي الدامر بالعطرون النار ما حرقت دار شنقيط النار ما بتحرق وادي الزنج النار النار آبنيه يابنية العرب الزنجية و بنية الزنج العربيه النار فى النار نيران ألوان شِيتنّ قرآن و شِيّتن يا حليوه الحزن الجاكى يكون غبيان و شيتن فى الفرح التايه فيكى كذا الضهبان وشيتن فى قليب الجدى الرخص الهشة النيه النار النار آبنيه يابنية العرب الزنجية و بنية الزنج العربيه الريد الليك متحمد سركى مسوكر جاك آبنيه بلا عنوان
التربة الأولى الموس الشفرة الصغرى التربة الأولى الموس الشفره الصغرى التربة الكبرى الموس الشفره الكبرى التربة الكبرى الموس الشفره الكبرى الوجعه الكبرى الستر العار العار
العار الشهوة انبهلت إن المؤوده انسألت يا ووب القطنة الطلعت يا ووب القطنة الرجعت يا ووب الوجع النّوح ورّوح روحا مرقت تردح يا فرعون يا ووب الأم الجاضى حشاها اللّيد السما والعين فى جناها الرحم أنّشقا يا ووب الضاقت فى الميلاد سِتراً مكشوف غطيها البت يا دوب بكريها ألحق يا الطايل باعك نادهاك فى الضيق الفا الدرّكان بسراعك سهّل فى الحوبة قساى برّد في الحارة حشاى و مرقت دخلت مرقت دخلت صلّتْ ندهتْ كتمتْ سكلتْ
إن المؤوده انسألت واللهب إنبهلت المهلة آ ناس المهلة تطير
المهلة متين ألقاها و السهلة متين ألقاها المهلة حليلا السهلة حليلا البلد الشجر البحر الطير ووباى الريق نشفان من القوقاى
وكان فى الحِلّة الناس بتجِضْ اللوز فى القُطنه هناك بيجٍضْ و النسمة التائهة وغاشية الحلة سموم بتجض و البسمة انبهتت ونزلت دمعه وفوق للدمعة عيون بتجض وداك اليوم مسيخه حليوه يا فرعون لهيب بيبق وقالوا قبيل كُمّسيب الغبِينه يشُق ألاّف الألوف رايح و أكّال الكتوف رايح البمشى فوق زبد البحر الببلع السيخ و الحجر ويا الدمع النزل فى الحارّة دُميّع الرجال غلّاب و يا الغبن الوقف فى الحلة شوكت حوت يكون حزناً فدر فى رجالنا مو كضاب يكون حزناً فدر فى رجالنا مو كضاب
الشاعر محمد طه القدال قامة ومن الشعراء اللذين أجادوا نظم القصيد باللهجة العامية وكما ذكرت سابقاً فهو شاعر أمتاز على غير من شعراء العامية بتعمقه لاختيار المفردة العامية التي تناسب القصيد الذي نظم تناول في اشعاره الكثير والمثير من القضايا منذ أن بدأ في كتابة الشعر نذكر على سبيل المثال أمونة .. ايام الجفاف الذي ضرب جل أنحاء السودان بالذات غرب سوداننا الحبيب مسدار أبو السرة لليانكي .. وفيها جاءنا بفكرة جديدة بعد فقد الخير في كل العرب والمسلمين هبة ونصرة لفلسطين والقدس الشريف فقاد فيها ( القصيدة ) مظاهرة من الخلق حيوان وجماد تحركت من كل البقاع والفيافي لتصل توصل رسالتها لليانكي ( هو الأمريكي ) عند تمثال الحرية كلام الرتينة بت سالم وليد عِتمان حليوة وسمحة وجع المخاض وغيرها من قصائده الجميلة وهنا سوف نتناول ( أحلام الحُزن الفرعوني ) بشئ من الشرح وطبعاً أنا بتناول القصيد حسب فهمي لها قد أصيب وقد أُخطي ومافي زول معصوم من الخطأ وفي كل كتنابتي كنت أتمنى من يدخل يعارض ماكتبت والله كلي أذن صاغية وأميل للصواب والحق حيث كان وأتمنى لو أخطئت في شئ ان أجد الصواب والكمال لله
10-15-2012, 07:03 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
قصيدة الحُزن الفرعوني نظمها الشاعر القدال في حدث حقيقي عندما توفيت خالته كما ذكر ( ست الجيل بت أحمد وليد عبدالرحمن ) عندما توفت وهي تضع مولودها الطهارة الفرعونية ( كما تسمى ) كانت أذى للبنت نرجع لاصل الاسم لماذا سميت بالطهارة الفرعونية قيل والله أعلم عندما قال السحرة لفرعون مصر أن موتك وزوال ملكك سوف يكون على يد شخص سوف يولد في السنين القادمة ( وهو من بني اسرائيل ) فأشاروا له مساعديه أن يقتل اي طفل يولد بعد قول السحرة هذا وفعلاً كانت وبعدها بمدة عدل في المرسوم أن يقتل سنة الاولاد وسنة ويعفو وحتى يكونوا على علم بكل مولود يولد ماذا يفعلوا ؟ اشاروا عليه أن تختن البنات بتكل الطريقة قطع الشفرات ( الصغرى والكبر في عضو الأنثى ) قطع البظر من حده ( جزره ) خياطة عضو المرأة وتترك فتحة للبول الحيض وهذا كله لماذا ؟ حتى لا تلد المرأة دون مساعدة داية ( قابلة تساعدها في فتح العضو بمعرفة ) وحند فرعون القابلات ( كشرطة ) أن تأتي اي واحدة لتعلن عن أي مولود ولكن كانت قدرة الله فوق فرعون وجنده ومستشاريه وسحرته وولد موسى ( والقصة معروفة من القرآن ) يولد في سنة الحرمان وينجو تعجب به القابلة وتقرر إن لا تخبر بمولده يرمى في التنور عند دخلول العسكر يتفقدون من تلد يرمى في البحر ويجده جند فرعون وتكون أسيا بنت مزاح ( رضوان الله عليه ) سبب في نجاته من بطش فرعون وجنده يربى في قصر فرعون كل هذا كان بمشيئة الله القادر على كل شئ
10-15-2012, 07:17 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
إنتشرت هذه العادة السيئة في كل البقاع ( الطهارة .. طهارة البنت ) والسؤال الخالق هو الأعلم بشئون خلقه علمه أحاط كل شئ .. أن الرجل يجب أن يختن والعلم أثبت ذلك ( انه في ختان الذكر فؤائد كثيرة وتفادي لنقل الكثير من الأمراض في حالة الجِماع ) وكدا كفينا شر كثرة الأمراض التي تنتقل من ذكر الرجل لو كان غير مختون لذا ذكر وجوب ختان الذكر في السنن ولم يذكر ختان البنت لقد كان هذا الشر سبب في موت الكثير من البنات ناهيك من الأثار الأخرى فقد جزء كبير من الاستمتاع في حالة الجٍماع ببسب قتل الكثير من أعضائها في هذا الجزء الحساس شفرات ( صغرى وكبرى وبظر وخياطة ) لذا كثرت العملية القصيرية في بلادنا أكثر من غيرها بسبب هذا الشر الجانا والموت في الولادة اي نعلم أم لكل شخص أجله لكن كانت هذه العادة سبب
10-15-2012, 07:38 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: الحُلم الأول البحر المالح سيلاً ضرّع و موجاً فرّع من الشام من ناك للسهلة النجدية ( تنطق مناك ) الأم البكر الزنجية يا وادي الزنج
وكما قلت الشاعر القدال عرف بالعمق في كل فكرة وكل مفردة يختار مفرداته واسلوبه في غرض الشعر لاتجد له مثيل ( العمق ) واقولها صراحة أن الشاعر القدال يولد الحركة في الجامد مثال تكون المفردة جامدة ومعناها يصف شئ لا حركة فيه لكن عندما يصبغ عليها جمال اسلوبه تجدها صار لها معنى متحرك وهذا فن في حد ذاته وفن رئع وجميل مثال كلمة مد قد تعني أمداد وقد تعني مد بحر مضاد الجزر وقد تعني وقد تعني معاني أخرى في خضم بحر اللغة العربية لكن هنا طوعها القدال لتعني لنا مد بمعنى ( شئ دخل من خلال ناس حملوه وهنا عنى به الطكهارة الفرعونية وكيف دخلت لأرض السودان ) فكان المد الأول كما تخيله الشاعر قادم لنا عن طريق البحر الأحمر وقد اشار له ( البحر المالح ) اي دخلت هذه العادة من ناحية الشرق ( البحر الأحمر )
وموجاً فرع من الشام ومعروف أن أراضي الشام تطل على البحر المتوسط لكن بنى الشعر فكرته على أعتبار ما كان حدسسثاً عندما وصلت مياه المتوسط والبحر الأحمر عن طريق قناة السويس ( وهذا ايضاً يميز القدال الفكرة العميقة التي يبنيها في خياله وعمر لم أجد له فكرة غير واقعية في أشعاره وحديثه حتى رجل لا تمل الحديث معه وأنت تصغى لدرر مفرداته حتى في حدجيثه العادي وقصد الشاعر ان يقول لنا أن هذه العادة ( الطهارة الفرعونية ) دخلت السودان من دول كثيرة منها مصر عن طريق البحر الأحمر ومنها الشام عن طريق المتوسط والبحر الأحمر وكما جاءنا عن طريق البحر الأحمر أيضاً من الجزيرة العربية واشار لها بنجد وجاء وين جاءت هذه العادة واصبحت عادة إنكوت بها بنات وصفها انها عربية زِنجية ( وهذا اللون الذي يصف أهل السودان زنوج بعضهم أختلط بعرب وكان الناتج سوداني
10-15-2012, 08:01 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
وطريقه سرد المشكله في قصيده وتقريب المعاني واصل العادة السيئه ( اي انها دخيله ) وشرح كل صغيره وكبيره بها وبصوره بسيطه توصل الفهم وتجد قبول وتعالج المشكله من جزوها ( فللشاعر القدال ) كل التقدير والاحترام..
10-15-2012, 08:04 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: يا وادي الزنج لو آخر خيمة إنقجت كانت ركزت فوق سنار لي ريحة القهوة العربية كانت فابريكة بُن كانت مشتل أبنوس كانت فى الشّعَر القُرّقد قايم شتله تجامل الشتله التفل الروس كانت فى الطبع الحار الريد الحار الحزن الحار الحزن الجن الأحمر كان مهووس
يا وادي الزنج لو آخر خيمة إنقجت كانت ركزت فوق سنار
وهنا يقصد البلاء جاك يا وادي الزنج والزنج يقصد بها شعب السودان الذي أصوله زنجية وهم سكان المنظقة قبل دخول العرب والأتراك والمجرين والشناقيط والمصريون وهي الشعوب التي تصاهرت مع أهل المنطقة ومن الشعوب التي دخلت في بلاد السودان ولم تتخالط مع السكان الهنود .. اليونانين .. السوريون .. الهوسا .. وبعض من اثيوبيين وغيرهم لكن المصارة كانت أقل درجة شديد الوداي هو وادي الزنج والمد اي السيل ( الطهارة الفرعونية تعمقت وعمّت ارجاء السودان وصلت لحدود سنار
كانت ركزت فوق سنار لي ريحة القهوة العربية كانت فابريكة بُن كانت مشتل أبنوس كانت فى الشّعَر القُرّقد قايم شتله تجامل الشتله التفل الروس كانت فى الطبع الحار الريد الحار الحزن الحار الحزن الجن الأحمر
وكانت المصاهرة وكانت أنتقال عادات دخلت لارض السودان وهنا صورها كيف كان التمازج بين السكان وعادتهم وبين الداخلين ( الوافدين وعادتهم وانصهرت العادات ) وكان الناتج عادة سودانية وهذا هو ديدن كل شعوب تتخالط مع بعض تنصهر عادتهم ( الاثنين ) وتجد كل شعب تلون بعادات الأخر ( مايعجبه ) وكانت في الطبع الحار كانت مشتل أبنوس كانت فابريكة بن كانت ريحة قهوة عربية كانت مهويب وكانت جن أحمر والجن الأحمر ( هناك حديث يقوله أهل السودان انه أصعب انواع الجن .. مارد هو الجن الأحمر والراكبو جن أجمر عينو بتكون زي الشرار وزول شر .. جنو كلكي )
وكل ذلك كان مقدمة ليربطنا الشاعر كيف دخلت تلك العادة وهناك مد ثاني وثالث تحدث عنه في نفس القصيدة وسوف نمر علية وكيف وكيف دخلت تلك العادة الزميمة السيئة لأهلنا في السودان
10-16-2012, 07:18 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
في زحمة الأشواق رغم الأرهاق الذي يثقل كهالك من شوق فالشوق للحبيب حق والحق ان تشتاق للحبيب وتتزاحم اشواق الروح .. والقلب .. والعقل وتصب في الشاعر سيل عرم
وخدك دا كاسيهو الخجل ولا مندّي لا بتوالفي لأا بتحالفي لا بتحني خلقوك زينة شان تشقينا.. يلا إتهنّي
فلك الهناء ولنا الجحيم
وتشيلي الخطوة فوق خطوة وأشيل أنفاسي وماهماكي نحن وراكي كيف بنقاسي تمشي الهوينة يا الماك هينة قدرك عالي بس تكفينا نظرة جنينة مـــا تتعالي
ونحن ما نساك ونحن ماعمرك
ولا يتسالمي لا بتكالمي بس بتهادي لاكي معانا ولا سامعانا تيهي إتمادي أرح وأردح وراك أرتاح ولو بي كلمة إما أعيش وإما أموت وإما وإما
ارح .. اي اسير واظل سائر وراك يقال فلان يرح بالدرب ساساقة اي لا يفتر من المشي ( يسكت يرح ) أردح .. الرديح هو البكاء بصوت وما برتاح من الرحيح والردحي إلا يكون ردك رد يقتل او رداً يرد الروح في جسدي وإما وإما دي بيني وبينك
10-16-2012, 07:31 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
وكان المـــد الثاني أو الحُلم الثاني قام فسطاط في جزيرة العرب وعبر البحر الأحمر الخيل في الخيل غائرة تحمل معها ذاك الحُلم الشقي ويشقي بنوت متل فاطنة السمحة
والافسطاط خيمة العرب البدو
10-16-2012, 07:48 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
وجاء المد الثاني من جزيرة العرب من فسطاط جاء عن طريق الخيل قاصد فاطمة أم حجل والحجل موضة زينة قديمة كان تزين به الرجل فوق أسفل الساق ( فوق القدم ) وكان معدنه حسب مقدرة الناس ويبدأ من الحديد ثم النحاس ( السبيكة ) ثم الفضة والذهب والحجل في السمحة بكون مزنت وهذا كناية .. انها ممتلئة الساق والساق الممتلئ بعجب في المرأة والعرجون اي اللينة البضة ناعمة الجسم ( صغيرة )
Quote: الخيل مرحات النوق مرحات الخيل الدفرت دفرت وادي صعيد أسوان دون لاجاي
وهنا يوضح لنا الشاعر أنه حتى عرب الجزيزة ( اهل الفسطاط ) أدخلوه من مصر لنا .. وفعلاً قد كان العرب في مصر أولاً ثم دخلوا السودان من مصر ( وكانت العادة متأصلة في مصر بالذات في صعيدها ومازالت للأسف وجاء تحدوا به الركاب خيل في خيل ونوق مراحا دفرن ومن صعيد مصر داخلات عن طريق اسوان
Quote: للبت الخصبة الزنجية النوبة تصيح لي حلفا نبيح للنهد السابح فوق الريح للعشق الساخن رجاى
وكانت الضحية الأولى في حلفا وهي المنطقة المتاخمة لاسواق معبر الطهارة لارض بلادنا للبت الخصبة الزنجيــــة والنوبة تصيح وهي أولى القبائل التي إنكوت به وكاتن صراخ البنية الخصبة العرجون أم حجل ( ألم وصراخ ووجع وتغير لخلق الله )
Quote: الخيل الدفرت فاتت دنقلا دون لا جاى
ولم يقف المد هناك بل تعمق للداخل وفات دنقلا دون لا جاي اي فاتها بشوية ( مسافة ) وبعدها تعمق لداخل السودان وكانت الفجعة وأهلنا يظنوه خير لكنه الشر وكل الشر
10-17-2012, 04:59 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
والمـــد التالت جا غاشي الدامر وجلبه تجار العطرون والعطرون معروف وهنا يوضح لنا مناطق أخرى قد دخلها البلاء وللأسف كان الكتير وما زال يعتبرون أن ختان البنت فيه ( عفتها ) أين العفة هنا ؟؟ بل العكس قد يكون صحيح البنت الغير مختونة هي العفة بخلقة ربها غشاء بكارة إن لم يفض فهي العفة كلها وهي العفاف لكن من قطعت وشوهت ثم كانت الخياطة كيف تعرف عفتها ؟؟ وقد ينزل الدم يوم دُخلتها من الخياطة التي تكوت قد تمَّ أعادتها وليس المقصد أن أصف البنت المختونة أنها غير عفيفة ويمكن أن تخدع زوجها لا حاشا وكلا لكن المقصد أن ارد عل من يعتبرون الختان للبنت عفة العفة هي خُلق البنت الذي تربت عليه وتؤمن به
Quote: النار ما حرقت دار شنقيط النار ما بتحرق وادي الزنج النار النار آبنيه يابنية العرب الزنجية و بنية الزنج العربيه النار فى النار نيران ألوان شِيتنّ قرآن
والختان كان نار أشعلت عند دخولها وحرقت الأخضر واليابس حرقت دار شنقيط ( يعني الشعب المورتاني ) حرقت وادي الزنج ( السودان ) حرقت شط القرن الأفريقي ( اريتريا والصومال ) جنوب الجزيرة العربية السعودية جنوب مصر الصعيد وقد تكون أمتدت لدول هنا وهناك وهي نار ونار ونار نار في ساعة الختان ونار في كل وضوع ( ولادة ) ونار لو كانت سبب في موت فالختان ( نار ... نار ... نار )
10-17-2012, 06:27 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: و شِيّتن يا حليوه الحزن الجاكى يكون غبيان و شيتن فى الفرح التايه فيكى كذا الضهبان وشيتن فى قليب الجدى الرخص الهشة النيه النار النار آبنيه يابنية العرب الزنجية و بنية الزنج العربيه الريد الليك متحمد سركى مسوكر جاك آبنيه بلا عنوان
وهنا كان الأعتذار والتخفيف من الشاعر القدال لكل بنت جنو عليها أهلها ( وكان ختانها ) قد يكون الحزن الذي أنزلوه بك يا فاطمة ام حجل العرجون غباء وجهل من أهلك اللذين ظنوا أنه خير لك وكان لك الحزن الألم الوجع مرات عددا حزن وهم وغم قد بلوك به يا مسكينة وللأسف هذه الجريمة يشارك فيها كل الشعب بدء من الأب رغم أنه تأذى منها الأم .. الجدة الخالة .. العمة .. وكل الناس وكان حزنك يا فاطنة ام حجل حزن جاكي بريد مسوكر .. سركي مسوكر اي مغلق بإحكام سركي : السيرك هو الخطاب الرسمي ( مختوم لا يفتحه إلا المسئول الموجه له ) وجاك هذا الحزن مسوكر سركي وبلا عنوان دخل مع الوافدين لهذه البلد الطيب فلك العذر مني والرجاء ان تترك هذه العادة السيئة
10-17-2012, 06:43 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
التربة الأولى الموس الشفرة الصغرى التربة الأولى الموس الشفره الصغرى التربة الكبرى الموس الشفره الكبرى التربة الكبرى الموس الشفره الكبرى الوجعه الكبرى الستر العار العار
وحقيقة كان كلام القدال كانت التربة الأولى لفاطنة السمحة كانت تربتها الاولى التي دفنت فيها وهي حية يوم أن قطعو شفرات عضوها الذي خلقة المولى الكريم ولما ... ؟ قالوا : من العار أن لا يكون ختانها ونسوا كيف سألأ المولى الله من سمائه الموؤدة وكيف تؤد البنات كانت كان دفن وهي حية حتى لا تجلب العار وهنا كان الختان الذي هو أقسى وابشع من أن تؤود فهم قتلوها يوم قطعوا ( عضوها ) قتلوها يوم أن قتلوا فيها بعض الأحساس الذي فطرها به الكريم الخالق قتلوها يوم زواجها ودخول زوجها عليها قتلوها يوم ولادتها وقتلوها بذلك الأحساس السئ الذي تحسه كلما تذكرت أنها قطعت وشوه خلق الله فيها والكل يسأل الأهل الموس القطنة الدخلت القطنة المرقت كلهم شاركوا في قتل المسكين مرات عددا
10-17-2012, 07:29 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: العار الشهوة انبهلت إن المؤوده انسألت يا ووب القطنة الطلعت يا ووب القطنة الرجعت يا ووب الوجع النّوح ورّوح روحا مرقت تردح يا فرعون
وكان ظنهم ظن السوء بختانها سوف يحدو من شهوتها فلكم الويل يوم تسأل المؤودة يوم يسال الطقن في لوزته ويم يسأل الوجع الذي معه خرجت روحها وهنا يصور لنا القدال حالتها في الولادة وكيف كان الوجع الناتج من قتل الأعصاب في تلك المنطقة التي تساعد بتقلصاتها في الولادة ماعرف العالم ولادة قيصرية إلا في حالات يكون فيها الجنين في وضع غير صحيح في رحم أمه لكن عندنا في السودان تكون حالات الولادة مستعصية في كثير من الأوقات والجنين في وضعه الطبيعي لك درحة التشويه هناك تكون من بشاعتها ما قتل الأعصاب وتردح وفرح يا فرعون بما سنيته من سنة سيئة وانتقلت عبر البحار والصحراي والفيافي وقبعت في بلاد لم ترى حكمك ولا ارض حكمك التي تجبرت فيها
10-17-2012, 08:12 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: يا ووب الأم الجاضى حشاها اللّيد السما والعين فى جناها الرحم أنّشقا يا ووب الضاقت فى الميلاد سِتراً مكشوف غطيها البت يا دوب بكريها ألحق يا الطايل باعك نادهاك فى الضيق الفا الدرّكان بسراعك سهّل فى الحوبة قساى برّد في الحارة حشاى و مرقت دخلت مرقت دخلت صلّتْ ندهتْ كتمتْ سكلتْ
وكان هنا صورة من المشهد الأخير قبل موت فاطنة السمحة وهي بين أوجاع ولاتها وقد إنهد جسدها الضئيل من شدة ألم في كل جسدها وهي الولادة أصلاً ( اقصد الولادة الطبعية ) موت لذا اعتبر من ماتت في الولادة شهيدة ولها جنان الله العُلى كما ورد في الأحاديث الشريفة فما بالك كيف كان موت من قطعت وشوه خلق الله فيها صور القدال هذا المشهد بصدق وكأنه حضر ( يوم الولادة ) وهذا خيال الشاعر الحقيقي الشاعر جاء اسمه لانه يشعر ويحس بمواجع الاخرين ولا مشاعره مرهفة وحساسة شديد ننظر كيف كان مشهد والفتاة تتعذب والروح بقت في الحلقوم وحشرجت أنفاسها لستتل الروح وتصعد لباريها وتفارق عذاب كان المجتمع قد شارك فيه
كيف كانت امها وهي من ضمن الجناة كانت وللأسف لا يتعظنَّ الأمهات عندما ترى ذلك في بنت في الحي وهنَّ حضور دوماً وقت الولادة لا أعقل هذا الموضوع ولا أكذبكم قد تكون أم حضرت موت جارتهم في الولادة بهذا السبب ( الختان ) وبكرة تحمل بنتها للداية لكي تقوم بختانها وهل هو شئ مضر عشان تقطعوا ؟؟ كانت الأم تقوم بحركة وهي لا تدري ماذا تفعل وماذا فعلت عندما نهض وهبَّ قلب الأم الذي مات يوم أن شاركت في الجريمة ( طنن منها أنها أحسنت في بنتها )
جاضي حشاها : اي تصرخ بنتها في ألم الولادة الليد في السماء : متضرعة لله بالدعاء ان يخلص بنتها من موت تراها شاخص أمامها والعين في جناها : وهي تدعوا الخالق ان يرفعها من شدتها ولكن كل عقلها إنتباه مع حالة بنتها بين يدي الداية تحاول ان تفعل شئ يخلص المسكينة وهي التي شاركت بموسها تقطيع وبتر وخياطة في يوم ما والرحم إنشقا .. والمسكينة تصرخ وقالوا ستر مكشوف غطوها ( يوم أن أجرو الموس في خلق الله .. وكانت النكبة والمأساة ) غطوها هي بكرية وهذا بكرها في الولادة وكانت صيحات من نسوة حضور والكل ينده في الشيوخ ( أولياء الله في الأرض ) ومع انه الشكية لغير الله مزلة لكن جرت عادة الناس الخاطئة ان تستعين وقت ضيقها بالشيوخ وينسون الله حينها المالك للكون وخالق الأولياء الصالحين ولما نترك الكبير ونلجأ للصغار ؟ على كل الحضور ينده جلة الصالحين ألحق يا الطايم باعك والباع هو القدرة ويقال ( باعه طويل ان قدرته كبيرة ألفا أو ألفى اي ألحق وعونك وأدرك وأعين الدركان الذي قارب شفاة الحفرة ( من الموت ) سهل في الحوبة والحوبة هو يوم الحارة والمحنة وبرد في الحارة حشاي
وكانت حركتها جيئة وذهاب ( مرقا ودخلا ولاتعي ماذا تفعل ) ندهت : كل شيوخ الأرض ( أولياء الله ) صلت لله ودعت وندهت شيوخها سكلت اي ناحت وبكت بصوت عالي تسكل بنتها التي تراها تضيع من بين يديها
10-17-2012, 08:52 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
إنَّ المؤودة إنسألت من قلتك ومن شارك في قتلك اللهبة التي جات غاشية البلد إنبهلت إنبهل الشئ : اي إنكشح وسال وانفرط من مكان حفظه اي كان سائل مادة ويقال إنبهل في الكلام اي تحدث كثير وبشدة كشئ إندلق المهلة آناس دائماً تكثر الأراء والحديث وقت المصائب ووقوعها إنمهلوا اي تريثوا والبنية بتموت .. المهلة تطير عيشتها والناس تفقد فاطنة السمحة من بين يديها وهم اللذين قتلوها بمعتقدهم الباطل طهارة فرعونية .. عفاف .. نظافة .. وكلوا باطل ومعاكس للحقيقة وماكانت عفاف البتة بل عذاب وألم وقتل
المهلة متين ألقاها و السهلة متين ألقاها المهلة حليلا السهلة حليلا البلد الشجر البحر الطير ووباى الريق نشفان من القوقاى
وفاطنة تخرج الروح وكيف المهلة ؟ وكل يبكي فاطنة .. البلد الشدر الطير .. ( ووباي ) اي يسوي حي ووب والريق جفّا من النحيب والبكاء والردحي نشف اشئ : اي جفّا
10-18-2012, 04:51 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: وكان فى الحِلّة الناس بتجِضْ اللوز فى القُطنه هناك بيجٍضْ و النسمة التائهة وغاشية الحلة سموم بتجض و البسمة انبهتت ونزلت دمعه وفوق للدمعة عيون بتجض وداك اليوم مسيخه حليوه يا فرعون لهيب بيبق
وكان يوم فراقك يا فاطنة السمحة مافي الحلة من البكاء إلا النحيب كل الناس في الحلة تجض اي تبكي وتنوح وحتى اللوز ومنه كانت قطنة جففت دماء ختان فاطنة ( كان ينوح ويجض ) وحتى النسمة الغاشية الحلة في ذاك اليوم يوم رحيل فاطنة كانت غير النسمة الرطبة وكانت تنوح وتبكي على فراق فاطنة وبهتت البسمات بيت الشفاه الكل حزين ومغموم بموت فاطنة السمحة بنية العرب الزنجية وبنية الزنج العربية
الدموع نزلت دمعة فوق الدمعة والعيون باكية وكان لهيب يبق نارا في حشا الكل لفراق فاطنة
10-18-2012, 04:58 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: وقالوا قبيل كُمّسيب الغبِينه يشُق ألاّف الألوف رايح و أكّال الكتوف رايح البمشى فوق زبد البحر الببلع السيخ و الحجر
البكاء يفش الغم والغبينة وكتم الحزن والغم مؤذي على الميت بكى الرسول الكريم لكن دون نواح وصراخ وقال عليه الصلاة والتسليم القلب يحزن والعين تدمع وإنَّا على فراقك لمحزنون يا إبراهيم نعم كل من عليها فان ولا يبقى إلا الكريم الحي الدائم ألآف الألوف رايح رايح اي ماضي إلى ربه قد كانت عادة أهل السودان أن يقولوا فلان راح في حق الله : اي مات وحتى الخيّر الشر من العباد رايح الذي يأكل حق الناس بالباطل آكال الكتوف رايح الولي الشيخ الذي من كرامته أن يمشي فوق زبد ابحر ولا يغرق برضو رايح ومصيرو الموت والساحر الذي يبلع السيخ والحجر ليبهر الناس برضو رايح
10-18-2012, 06:41 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: ويا الدمع النزل فى الحارّة دُميّع الرجال غلّاب و يا الغبن الوقف فى الحلة شوكت حوت يكون حزناً فدر فى رجالنا مو كضاب يكون حزناً فدر فى رجالنا مو كضاب
الدموع تغسل العيون وتغسل الحزن والهم والغم والأحزان لا تغسلها إلا الدموع ودميع الرجال غللاب اي الرجال دموعهم مابتنزل إلا لما يغلبهم الصبر عكس النساء المرأة التي خُلقت مرفهة المشاعر ودموعها في طرف العين وهذه فطرة فرها عليها المولى دموع المرأة صادقة وسريعة نتيجة ردة فعل حدث أو سوف يحدث لكن الرجل يصبر وعندما يبكي تعرف انه غلبه الصبر فإنفجر بكاء الغبن قلنا هو الهم والحزن وقففي الحلة شوكة حوت وهو مثل يضرب للشئ الذي تحتار معه فعل كان وديتو كدي مشكلة وكان كدي مشكلة زي شوكة الحوت ( السمك ) عندما تتعارض في حلقك وأنت ـاكل السمك لا تستطع بلعها ولا تنزل من الحلق وتريحك .. ( إلا تلحقها بخبزة جافة ) الحزن لا يدخل قلوب الرجال فهو حزن صعب وكان الحزن كل الحزن علي كل بنت جنو عليها أهلها والمجتمع بختان وتشويه جعل حياتها جحيم ومماته جحيم أما آن ان تترك الأسر هذه العادة السيئة وللأسف مازال بعض الناس وإلى يومنا هذا يقومون بعملية الختان للبنات ( وكمان جابوا حجة جديدة ) طهارة السنة سنة لم يسنها الحبيب صلى الله عليه وسلم قد سمعت حديث ولكن بالبحث وجدت هذا الحديث غير صحيح والله أعلم لكن لم نسمع واحدة من الصحبيات ختنت وقد ذكر في الأثر أن ابناء رسول الله إبراهيم عليه الصلاة والسلام ختن بالقدوم وقد ذهب بعض المفسرين أنَّ القدوم هو اسم لمنطقة ختن فيها وقال البعض أنَّ القدوم هو تلك الأة التي ينجر بها الخشب والله أعلم لما ورد في الأثر هذا لما لم يرد ختان بنت في عهد الرسول وذكر الرسول سنن الفطرة لم يذكر فيها ختان البنات هل سهى حاشا وكلا أن يسهو وهو الذي لا ينطق عن الهوى .. إنما هو وحي يوحى فلما نلصق بالرسول ما لم يقله ونعذب بناتنا البنت العفيفة الكريمة لم ندخل ونزرع ونزعزع الثقة في دواخلها الثقة وزرعها في النشئ هي الأهم بدلاً من الأفكار الباطلة عليك الرحمة يا ست الجيل بت أحمد خالة شاعر القصيدة محمد طه القدال وقد جعلك الشاعر مثال لمحاربة عادة سيئة ويجب ان تنتهي وليت الناس تأخذ العبرة
10-19-2012, 09:56 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
سأظل أحبك و إن طال إنتظاري وألمي وحزني فإن لم تكن قدري فقد كنت إختياري
رضيت بحكمك القاسي وهجرك رضيت السم في كاسي وتجرعته مراً علقم رسالة لك حبرها إحساسي الجميل بك وقلبيالذي حواك وترفق بك أحبك وأنت قاسي حبك صار مشاعري وكيف تتبدل لحب شخص أخر ( وأنت مشاعري )
10-21-2012, 05:04 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
وضاحة وكل سنة وأنت طيبة ويعاد عليك بالخير واليمن والبركات يا اصيلة والتشكرات للسؤال والدعاء لنا أنا وأحمد وآمين وربنا يمد في عمرنا الذي أنه دنا ونشوف أحمد عريس ولك الشكر والمودة يا وضاحة
10-21-2012, 07:00 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
وعُدت يا عيدي بدون زهور وفي حكى الشاعر ودالقرشي كيف كان عيده وهو طريح الفراش الأبيض وكانت تهتم به سستر اسمها بدور .. وكانت تصابحه كل يوم بي بوكيت من ورد ( زهور ) وقد حن القلب يوم العيد لذاك الوجه الصبوح الذي كان يطل عليه كل يوم وكانت تجلس معه الساعات تخفف عليه ألم المرض ( وكانت زهور عطلة معيدة مع أهلها ) فأجتمع الاثنين مرض وزهور غير موجودة تحفف مابه من ألأم
10-21-2012, 07:49 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
وكما أسلفنا سوف تنير إنجمامتنا في كل صفحة هذا الجمال تعبير عن تباريح الهوى ولكل عاشق متيم بحبيب قد جفا واختار البعاد .. لعل في طيب الحديث بعض من دواء يشفي ومع انه الجرح لا يبرئ لكن في حديث الشجن لذة للعشاق
ربنا يجمع ببركة هذه الأيام المباركة كل قلبين حبو بعض حبًّ صادق وشريف
في إبتسامتك السهير ألوان فوق خُدودك الوريد نديان وأنــــــــا ياظالمة في خيال طيفك هيمان يا حالمة وعدك يروي الصب
11-28-2012, 08:26 PM
فيصل محمد خليل فيصل محمد خليل
تاريخ التسجيل: 12-15-2005
مجموع المشاركات: 26041
أختي وضاحة يا شم مشارقنا والشم تفخيم للشمس ومع انه في اللغة تصغير
وقال الحاردلو شاعر البطانة
الشم خوّخت وبردن ليالي الحرا والبراق برق من منه جاب القرة شوف عيني الصقير بجناحو كفت الفرّه تلقاها أم خدود الليلة مرقت برا
وصلت اليوم الساعة السادسة مساء من السودان الطيب بأهله لك مني كل الدعوات الصالحات يا ملكة
اخي فيسل هليل لك مني الشكر على رفع البوست ايها العجمي الجميل دام الله مودتنا التي اعتبرها مد لسنين عددا
أخي عاطف سعدت شديد بتلك السانحة التي تجاذبنا فيها اطراف حديث حفته مودة وتقدير واحترام وأأسف في مرات كُثر كنت اجد منك رسالة في الفيس ( شاتنق ) لكن ظروف لمة الاهل في السودان كثير ما افتح النت واكون بعيد عنه لك مودتي الصادقة اخي عاطف
12-14-2012, 02:39 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
أمنتّك عواطفي وخنتَّ الأمانة حطمتَّ في دقيقة أحلامنـــا ومنانا يا ناسي المحنّة يا ناكر هوانا رجع لي أمانتي وشوف لو تلقى تاني عواطف أو محنة زي عطفي وحناني
( ليه ليه حطمتَّ في دقيقة كل الذي بنيناه سوياً من عطف ومحبة وحنان وود !!!!! )
لو تعرف يا أسمر معنى الشوق ونارو كنتَّ تنوح وتسهر أسير ... ألمو وحسارو
( نار الحب والشوق تلظي من كان في حبه صادق امين )
تضوق ظُلم الليالي وتقول الحب جناية ودنياك تبقى حسرة وعذاب من غير نهاية
( ولا نمني النفس ان تشقى يا الحبيب .. كل منانا لك السعادة وخلي الشقى لنا وكيف من اشقاه ربه انت تسعده )
أيه يضرك تسأل يوم علي ياغالي إنتَّ وحدك عارف همي عارف حالي كيف أواصل صبري في الطريق الخالي وكيف بدونك تصبح الليالي ليالي
أنا كنتَّ دايماً بصبر مهما اليعاد أضناني في قلبي أنتَّ بتكبر وتكبر معاكا معاني أرجى الأيام وأستنّى ألآمي بين نيراني والهجر مهما يألم ( يا ريت ) يرجع حنانك تاني
لو كان جفيتني ورحتَّ وخليتني وحدي برايا مع ليالي الوحدة والشوق حنينو معايا أنا مابسيبو غرامك رضيان معاك بشقايا لي متين طريقك يقصر تعرف نهايتو خُطايا
12-16-2012, 08:19 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
نستل من زحكة الأشواق للحبايب ونعيش ولو لبرهة من نغم الجعلين من منطقة شندي والشاعر الشفيف ود النزيه واغنية الكنينة الفنان علي ابراهيم اللحو ونخلي القمر يقول القوق قوق وتجننا نغمات القمر ويخلينا فاقد فاقدين صبرنا
12-16-2012, 08:43 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
طال علينا فراقكم والله يا غايبين قدر ما ننسى العلينا والله مشتــــاقين
الخدود الشاربة من لون الشفق عند المغارب ديل خدودك سيدي... سيد الناس يا سيد الحبايب العيون طرتني زول... من أهلو غايب والشعر في كتيفو يتهادل سبايب ...
والله مشتاقيـــــــــــن
في عينيك تظهر لي دنيا.. دنيا شوقك فيها ظاهر الأماني الحلوة هايمة... زي بحور ماليها آخر الكليمة طيبة منك زادي... وحياتك لباكر والامل فارد جناحو.. ديمة زي عينيك مسافر
والله مشتاقيـــــــــــــن
الغروب يسألني منك.. امسياتنا في شوقي اليك الرمال الناعمة مشتاقة لمشيك ... الطيور الراحلة في ضل المسا تسأل عليك كيف تفارق الضفة والنيل هان عليك والله مشتاقيـــــــــــــن
طال علينا فراقكم والله يا غايبين قدر ما ننسى العلينا برضو مشتاقين والله مشتاقين والله مشتاقين
والله مشتـــأقين
12-17-2012, 07:07 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: الغروب يسألني منك.. امسياتنا في شوقي اليك الرمال الناعمة مشتاقة لمشيك ... الطيور الراحلة في ضل المسا تسأل عليك كيف تفارق الضفة والنيل هان عليك والله مشتاقيـــــــــــــن
طال علينا فراقكم والله يا غايبين قدر ما ننسى العلينا برضو مشتاقين والله مشتاقين
الشوق حادي العشاق العشق والحب هو جمال الروح وترى بهما الدنيا كلها شوق وحنان وعاطفة تصدح من حولك وتسمع لحن غناها طرباً وسلسبيل من نهر كريم يتدفق الشوق عود الحب الصلب وهل يكون هناك حب خالي من الأشوق والساعة قرب الحبيب تبدو اقصر من الدقيقة والدقيقة في غيابه مرة وكيف نقدر نطيقا نصبح ونمسى بها الأشوق وتملئ فؤادنا مابين الصباح والمساء وتزاحم أحلامنا طيفاً حينا وضغاث أحلام من طرف الحبيب حينا ويكف يهدء لنا بال والأشواق زي شوك الكتر تجرح وتشجي الروح والقلب والشوق والله مشتاقين
Quote: الغروب يسألني منك.. امسياتنا في شوقي اليك
وحتى الغروب يسألأني منك يا الحبيب وقت لقانا مشاءً .. نتجاذب اطراف حديث حلو مذاقه يطعم قلوبنا حنان وعطف وحنية وكان هو زادنا وزخر نطبطب عليه بين ضلوعنا من أعين الحاسدين وها أنا أجتر ذكرة ذاك الحديث الحلو في غمرة أشواقي إليك وطال علينا فراقكم والله ساغايبين وبرضو مشتاقين كلما نطرى العلينا من شجن وحنين لعودتكم وهل تفارف الضفة نهرها وهي التي تحضنه دوما ترقد فرحة تحتويه بزاعيها
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
خالد علي محجوب المنسي
الطيب شيقوق
وضاحة
Muna Khugali
فيصل محمد خليل
فيس بوك
تويتر
انستقرام
يوتيوب
بنتيريست