|
|
|
 Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
المرثية أو الرثاء هي أصدق الاشعار ... سوأل أبن الروم اي أشعار اصدق قال : الرثاء
نقوله وقلوبنا موجعة مفجعة
مرثية عمدة كلي قيل نظمها رجل راعي في منطقة كلي .. يقال أنه كان محب مريد للعمدة وخيره يغطيه وقيل استأجرته بنته شما حتى يرثي اباها .. في سوداننا تسمى المرثية مناحة وجاء الاسم من النواح وكان عادة الناس في تلك المناطق إذا مات عظيم والعظمة لله وحده نظمت له مناحة وتقال في أول مأتم في الحلّة بعد وفاته وتنوح بها النساء.
لم يكن لعمدة كلي من الأبناء الذكور نصيبا كان له بنتان ( شما الكبيرة وزينب ) تغمى بالمرثية الجميلة الفنان الجميل علي ابراهيم ولقب بمطلعها
اب عاجات اللحو والمقصود به النمر
رحمة واسعة تنزل على عمدة كلي وأمد الله في عمر الفنان علي ابراهيم ومتعه بالصحة والعافية
| |
 
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
نص الرثاء ( مناحة عمدة كلي )
اب عاجات اللحو وكتين إزم وانتّر
إن جات الإلوف لا بضل ولا بفتّر
حوّد يا الخصم بغادي دربّو بضر
اب رسوة اب هرش الضارب الوكرة
تمساح دار كلي بمرق مع الهجعة
أبو شما اللزوم كم درج العاطلة
هو الاسد المربعن دونو الرجال قاصرة
يا حليل اب جديري الفارس المنبور
يحرن في المحاصة وكت الحرابه تدور
في اليوم المشوّم تبقى الحجازة صقور
وبيهو بِيجبر الصف ان بقّت مكسور
بجيب قولّن صحيح في ابويا ماهو شكر
مثبوتات فضايلو ومافي من ينكر
اب زيد الهلالي زايد عليهو قدر
عباس تور قريش منو مابقصّر
زناد ان حركّو بقوم وما بفكّر
دايماً فاك ضراعّو وبيهو مابفشّر
رحل يا شما أبوك وقفّا خلا الدور
وأنحلَّ النظام الكان زمان معمور
بوجود ناس ابوي قبل العبوس ماتدوور
أنهدَّ الجبل واشتت المطمور
يا ابو زينب وراك اتكشّف المستور
دابي القاش حليلو الفي المحاصة بِكُر
من شوفتو بتضل ناساً دقونن قُر
ان شاف الحديث زايد بقالّو كُتر
بشلح في الصفوف امات طبول وزمر
زي حمزة الجسور في يوم أحد وبدر
سم الصاقعة ابوي ياللخصم بدمّر
اب قدحاً سبيل مسا وصباح مجرور
ولي الضيفان يباشر ووشّو مامصرور
منو البمسك مكانك وإفهم المضرور
بِتراجع في المواشي وفي خِدمت البور
غرارة العبوس مابتلتفت لي زول
حُكم السيد نفد ما بنحجب مقدور
تمساح القيوف اللى العزول بتكيد
اب مسكاً يفوح يعم القريب وبعيد
يوم جاني الخبر اسفاً عليا شديد
ياعمدة كلي فرقك علينا صعيب
يا العمدة اب جديري فرقك علينا صعيب
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
الرمية التي سبقت المناحة ( المرثية ) هي من تأليف الفنان علي ابراهيم
سوف اقوم هنا بأزالة الغبار عن كلمات قد تبدو لجيل مابعد الثمانيات صعبة أو لغة اجنبية
* لا عند جوير ود ضبعة
الجوير هي قرية ايضاً غرب شندي وعمدتها ايضا راجل مو ساهل ولا يقل مكانة من اب الجديري
واسمو ( ود ضبعة )
* اب عاجات : هو النمر
حوّد : اي عرج واترك هذا الطريق
* اب رسوة اب هرش : هو الأسد
* الاسد المربعّن : عندما تلد اللبوة بعد الولادة مباشرة بتخرج وتترك صغارها يحرسهم الاسد في العرين ويظل على هذه الحالة 40 يوما لذا اشتهر بين الناس ان الأسد عندما يخرج بعد الاربعين يوما يكون في أوج شراسته وبها جرت العادة تشبيه الرجل الشجاع بالاسد المربعن.
* المحاصة : هي ساحة والوغى
* عباس تور قريش : هو العباس بن عبد المطلب عم الرسول عليه الصلاة والسلام
* العبوس : هي الدنيا
* المطمور : هو المخبأ في المطامير من مؤنة عيش وزرة وقمح
* دابي القاش : اي تمساح نهر القاش
* كُتر : اي غير مألوف ومعتاد عليه
* بشلح : اي يتضرع وبتبختر في مشيته
* حمزة الجسور : هو حمزة عم الرسول صلى الله عليه وسلم
* بدمّر : اي يدمر
* اب قدحاً سبيل : كناية عن أن بيته لا يخلو من طعام للضيوف
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: حسن الطيب يس)
|
Quote: صابنا ابو الحسين كان غاطس وين يارب إنشاءالله في
العسل
ذيدوا من الجرعة شوية
لكم كل الود |
الدرب الجابك يا جميل فرشناه ورود
عبق في سمانا مزج عطر أختلط وصعب على الأنوف ادراك مداه وتميزه
سلام بالحبيب الجميل حسن الطيب يس
ابو الحسين كان ماخاف الكضب شفتو فوق سهرة في تلزيون السودان اللت مديح
وجنبو وحيدة ابقى لي دي عروسه
دا كان ما عيني كضبتني
يسبقنا الشوق له وممكونين خلاس بندور نعرف اخبارو علا الزول تب ماقلع
حجر ورمو في بير
وان شاء غاتس في العسل لجضومو
تحياتي اخي حسن
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
النفائس
بالنار أصل النفائس يختبر
للقاك أرسلنا القدر
فخبرناك كريم الأصل حر
كالشمس ترسل ضوءها
حين الظلام إلى القمر
كالندى عمّ الوجود عند ساعات السَّحَر
كالسحائب ظللت ماتحتها في وقت حر
كالغيث يمطرنا بفيض منه ثر
ذكرك تضوّع كالزهر
فاعذر يراعي إذا أنكسر
وأعذر مدادي إذا أنحسر
أمام وصفك يابحــــــر
سمية الحسن محمد طلحة
خالد لك التحية علي ماتمدنا به من نفائس ولكل نفيس ونفيسة من زوارك الكرام .
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: سمية الحسن طلحة)
|
| Quote: بالنار أصل النفائس يختبر |
اي والله بالنار أصل النفائس يختبر ... لكن مأساتنا أن من يتقفّوا اثرهم قلائل في زمنا هذا
كانوا رجال لزموا الجار قابضين النار .. مسحوا علي رأس فاقد الأب حُنو وكفالة ... صانوا العرض ، عرض الغريب قبل القريب ... جل حياتهم لغيرهم وهم يتبسمون من فرحة تغطي قلوبهم ، بالدين إسوّ الزين
والفات ما برجع يا ريحانة البطانة ...
لك التحية والمودة سمية الريحانة
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
زعموا أن يمامة كانت آمنة مطمئنة في عُشها بأعلى شجرة مورقة جميلة، فجاء في مكانها صياد، وجعل يبحث عن طير يصيده، فلم يجد شيئاً، ولما همَّ بالرجوع ، برزت اليمامة من عُشها، وترنمت بجميل صوتها. فتوجه إليها الصياد وصادها، فلما وقعت في يده قالت لنفسها:
(( سلامتي كانت في صمتي ولو ملكت منطقي، لملكت نفسي ))
وقيل :
يموت الفتى من عثرة بلسانه
وليس يموت المرء من عثرة الرِجلِ
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
امتدح الشاعر أبو تمام الخليفة العباسي أحمد بن المعتصم بقصيدة،فلما بلغ إلى قوله:
إقدام عمرو في سماحة حاتم
في حُلم أحنف في ذكاء إياس
قال له الكندي بجرأة وثبات : الأمير فوق من وصفت.
فأطرق أبوتمام ملياً ثم قال :
لا تنكروا ضربي له من دونه
مَثلاً شروداً في الندى والبأس
فالله قد ضرب الأقل لنوره
مثلاً من المشكاة والنبراس
فسكت الكندي، وأعجبت الفئة الحاضرة لفطنة ابي تمام وأصالة رأيه، وجودة فكره، وسرعة خاطره.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
أرسل احد التجار ولده في تجارة، فرأى في طريقه ثعلباً طريحاً يلتوي من الجوع فقال: من أين يتغذى هذا المسكين ؟؟ وإذا أسد أقبل يحمل فريسته. فأنزوى الولد وهو يرتعد. ثم راقب الأسد حتى أكل فريسته.وترك منها بقية لا خير فيها ومضى، فقام الثعلب وآكل من فضلة الأسد، فأراد الولد أن يغتدي بالثعلب. ورجع إلى ابيه وأخبره بما رأى .. فقال له والده : أنك مخطئ يا بني . وأني أرجوك أن تكون أسداً تأكل الثعالب ما أبقيت، ويسوؤني أن تكون ثعلباً تأكل من بقايا الأسود وتشرب من سؤرها.
ورده في خطئه وقال :
ما المرء ألا حيث يجعل نفسه
فكن طالباً في الناس أعلى المراتب
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
التويمـــــــات
يا عيوني أنا ولا تهرجّن
ولي مشاعري أنا لا تزعجّن
ولي خيوط السعد أنسجّن
امكن التويمات اخرجّن
خطوة خطوة بدرجّن
وفي عذابكّن بتفرجّن
أنا مابخاف الموت والسجن
والله جسيمي الصبي بتعجن
وهن مالّن آبن ما يجيبّن
ويا الله مالي أنا ماشي أجن
ما بِصح ياالحاج اب شنب
ولسه ديل مابقو للأدب
في المعاملة لا تكون صعب
وإت ما تقسى علي العنب
وما تعكر موية الدهب
شمعتين أوعا من اللهب
ونحن يا الزينين لينا رب
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
نواصل مع التويمـــــات
متلي كم زول مات بي الشجن
وقبلي ودالزومة إنسجن
من ضفاير بتمواجّن
ومن خِدود بتوهجّن
ومن تويمات إتخرجّن
ومن عيون أترابّن نجّن
فوق عروش الحيا إتوجّن
لِي مريضّن ما عالجّن
قلبي نيرانّو إتأججّن
مالي قِبلاتي إتعوجّن
أمشي وين يا نور الدُجّن
ما كفاي يا التويمات أذىَ
هو طيف يلاوز لي ملاوزّه
ما التويمات أنا حاجزه
وحاجه غيرّن ما عايزّه
يا الجمالكّن بقى معجزه
ألسن النقاد عاجزه
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
| Quote: لسان العاقل من وراء قلبه، فإذا أراد الكلام تفكّر، فإن كان له قال، وإن كان عليه سكت، وقلب الأحمق من وراء لسانه، فإذا أراد أن يقول قال: فإن كان له سكت وإن كان عليه قال. |
جراحات السنان لها إلتئام
ولايلتئم ماجرح اللسان
شكرا خالد على ماتتحفنا به في واحتك هذى حيث نستريح
جزاك الله عنا خيرا... آمين
أرجو تغيير اللون الأصفر حتي نتمكن من قراءة الفقرة أعلاه
نسأل الله أن ينور أبصارنا وبصائرنا.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
بقية قصيد .. التويمــــات
للشاعر عبدالله محمد خير
انتَ جيب أوصاف موجزه
يا قلبي انا بحبزه
تبقى حالتنا مجهزّه
ليه يضايقونّا الناس كده
والغرام سنة مؤكده
أنا قلبي من اول مابدا
بي غرام التومات شدا
والعيون مويتا جامده
والبعاد الطال سهّده
ليه سته شهور شارده
من زمان فارقتا الندى
ومابتشوف ناس مغيبه
لا زيارات لا معايده
لا صدف عند ساعة الندى
انا قتا بالصبر أزوده
علي البعاد أمكن أعوّده
تاني ترجع متمرده
تعيد اسواقه تجدده
روحي دِركت .. منو البنجده
بلا التويمات رايده
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
مع قبائل العيــــــد
حلاقة مجانـــــــــية
قال الرجل للحلاق مشيراً إلى ولد صغير كان معه:
أرجو أن تقص شعر هذا الولد بسرعة فأنا مرتبط بعمل.
الحلاق : خمس دقائق فقط وسيكون الصغير جاهز.
الرجل إذن سوف أعود بعد خمس دقائق تماماً.
أنتهى الحلاق من مهمته في الموعد المحدد، وقال للطفل : الآن أجلس على الكرسي حتى يعود والدك.
الطفل : لكنه ليس والدي.
الحلاق : كيف ؟ إذن هو خالك أو عمك .
الطفل : أبداً، لقد قابلني في الطريق، وأشمأز من طول شعري وقال لي : يا بني فإني سوف أقص لك شعرك الطويل هذا .. مجاناً.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
الكنينــــة
للشاعر ود النزيها
الكنينة
الكنينة يا رطب الجنينة
الله لينا...
الكنينة الدارّه أخمجيها
الكنينة والروبّه تلّيها
الكنينة خلق الله أنجضيها
الكنينة دي الدنيا شن فيها
بنريدا وبنموت نخليها
كُرْ علينا....
الكنينة يا شتلّه يا دُقاقه
الكنينة يا نارّك حراقّه
الكنينة خلق الله مشتاقه
الكنينة والدنيا فراقّه
بريده ومتين بنتلاقه
العوده لينا ....
الكنينة الكنينة بت بله
الكنينة وأدي العشوق طلّه
الكنينة ومسختي خلق الله
الكنينة وفي نارها بتقلّه
بنريدك وأدي العريس طلّه
والريشة لينا....
الكنينة وقلبي داب حتّه
الكنينة وفارقتّه لي الجتّه
دا الناجضنا في شندي المحطة
عومي لينا ....
الكنينة يا شبه الأرايل
الكنينة يا المحلب الشايل
الكنينة غصينك المايل
الكنينة وماهماني في القايل
بنريدا وفيها الثمار شايل
نحنا اتقلينا .....
الكنينة يا بت مالك
الكنينة أديني شبالك
الكنينة ناجضه الخلق مالك
الكنينة ختيني في بالك
بنريدك دي الدنيا دايمه لك
نحن أنتهينا ....
يرحم الله الشاعر الجميل ود النزيها من مواليد ساردية شمال شندي وهو ايضا شاعر لكثير من الأغاني المحلية في مدينة شندي وضواحيها ... وكذلك تغنى له علي ابراهيم بأغنية آخرى وهي اغنية
غزلية وين الرايقة يا فنية
ناري الليلة
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: سمية الحسن طلحة)
|
الزول لمن يكتر الشكية بقولوا ليه دخلك الما بتداوى والمقصود الكبر
الله يكبر العقول ياخالد مانا صغار في الدنيا دي
الله يكبر العقول
معروف عقلك كبير ويوزن بلد ...
لك التحية فاقدناك في الأيام السابقة لك خلقنا لك العذر وقلنا أمكن مضيوفة في رمضان سواقة عصيدي وشي خش روب وسويح سمنة لملاح نعمية تقيلة يقدل فيها السوسيو بي عبايتو
ما تغيبي علينا يا ريحانة تعودنا على الشهد الذي يسيل من فوك قطرا
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
مرَّ عمر بن الخطاب رضي الله عنه ليلة في بعض سكك المدينة المنورة يتفقد أحوال الرعية فسمع امرأة تقول:
ألا طال هذا الليل وازورَّ جانبه
وليس إلى جنبي خليل ألاعبه
فوالله لولا الله ونخشى عواقبه
لحُرّك من هذا السرير جوانبه
مخافة ربي والحياء يعفني
وإكرام بعلي أن تنال مراتبه
فسأل عمر بن الخطاب رضي الله عنه من هي ؟ فقيل له : أنها فلانة زوجة فلان، وله في الغزاة ثمانية أشهر، فأمر عمر رضي الله عنه ألا يغيب الرجل عن امرأته أكثر من أربعة أشهر.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
الداير ينوم ويرتاح يكثر من النوم ليلاً
الفرق كبير بين النوم ليلاً والنوم نهاراً، فالنوم ليلاً له فوائد عظيمة حيث تنال أعضاء الجسم من الراحة أضعاف ما تناله خلال النوم نهارا بسبب مافيه من ضوضاء وصخب وضوء قوي وكلها مؤثرات شديدة على الجهاز العصبي.
وقد أكتشف العلماء أخيراً أن الغدة الصنوبرية في الدِماغ تقوم بإفراز مادة تسمى الميلاتونين والتي تؤثر تأثيراً مباشر في عملية النوم. وأن الظلام يزيد إفراز هذه المادة بعكس الضوء الذي يثبطه.
(( وجعلنا الليل لباسَ والنهار معاشَ ))
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
أيـــــام زمـــــان
يا حليلا راحت وانتهت
الحب كان عذري والزمن زين والناس زينين ... البنية ما بتجيب اسم المحبوب خوفاً تجيب أسمو الهوى يقسمو ... الوليد مقطع حبو في حشاهو وتاوق ويتحين الفرص السانحة لنظرة وبس من الكحيلة والمدعجة.
وكان المشغل وبيت الخياطة وهي الفسحة التي تجد فيها البنية راحتها بين اترابها تشغل وتخيط ماطاب لها هدية للمحبوب .. عمة وتبرم اطرافها مع الحياكة ... طقية في مشغل يحدرها الجنى مع الحجاب المقرون .. منديل يغي به نفسه حر الشهور القاسية من القهنوبة.
كلها مجتمعة كانت لها قيم معنوية كبيرة في نفس المحبوب يحافظ عليها ويداريها من عيون الحاسدين حافظه على روحه وفيها روحه اي والله يجد فيها مسك ريحها والبسيم فج البروق زصزت البلبل الغريد وصورة ماترسم اجمل منها في خياله.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
تراثنا الشعري خلد لنا من الشعر مايروي لنا قصص حقيقة
عندما فقد الحبيب خاتمه اب ياقوت هدية السمحة في البنوت
قال :
خاتمي الليلة يا اب ياقوت
وخاتمي العاجب البنوت
خاتمي الليلة قالوا ودر
بشارتو تور وكرامتو عجل
ويا خاتمي التلف ودران
وراح في نجيلة الحيضان
وآخر ضاعت منه هدية المحبوبة تلك الطاقية التي كان يزهو بها مشغولة بي انامل من حرير
قال:
وكت المطره شاعت يوم الاربعا
أريت ارواحنا راحت المشبوكه ضاعت
ابكنك بنات الحلفايا
وتجرجرن حفايّا
الليلة المشبوكة ضاعت
غلاة الهدية المعنوية أكبر لذا تكون الفجعة أعظم عند ضياعها ..
المنديل وقصته مشهورة
قال فيها الشاعر
منديلي راح مني
والشالّو مايتني
ومايشيل خلافّو
ودعيسى في المسيد
أبوي لحّاق بعيد
منديلي ماتقليد
والشالّو إشل الآيد
يابرير وياالنقر
دا الشالّو لي ماقر
الشالّو يضوق سم الدقر
كمان أبوهو يكون عقر
يا الحبر الدافعه
اب ضيفتن نابعه
إشيل روحو التابعه
وإشيلوهو الأربعه
يارجال ام مرحيّ
قولوا للرخا أمرحي
ماتسهيّ وتسرحي
والشالّو أتمحي
ياحمد اب عصايتن سيف
هيّا للمنديل أقيف
الشالو إصبح ضيف
في الشبر المو نضيف
ياودحسونه الحار
يا صاحب الدردار
منديلي في البدار
أخلوهو من الدار
يا الصالحين همّوا
في مكة إتلمّوا
القشا بي فموّ
تحرق حشا أمّو
| |
|
|
|
|
|
|
|
|
 Re: هونوو شوية.... وصلو علي النبي .... إستراحة أيها المحاربون (Re: سمية الحسن طلحة)
|
بسم الله الرحمن الرحيم
سلام ...
قال عكير الدامر ...
( حرب العلمين )
ظروف الانجليز الليله هب نسيمه
في الالمان مدافعهم اشتعل مكسيمه
من(تونس)نفوهم بي خساره جسيمه
عقدوا وعرسوها وسلموها قسيمه
قول لي وين نجع (رومل)وخت رحاله
كيف همل جيوشه وفز يسترحاله
محل ما بروح شبابيك الهلاك فاتحاله
اصبح قبله عصفور والهبوب لافحاله
الفي ناسنا بينه وما بيفيد تهديدنا
عارفين البهضرب قوله ما بفيدنا
خطبكم اصبحت تملي تزيدنا
وين نفخة قبيل مفتاح (مصر) في ايدنا
ما حملتوا اللقيتوها وعملتوا حرابه
بالجزم المساجد حمتوا في محرابه
كم شنعتوا كم مثلتوا كل غرابه
ساعة الانتقام حلت ونادى غرابه
البتبد للشر ولي نجمه وغاب
بقتل بي عجل يفني الاهل وعقابه
الداير يشابك (الانجليز)في رقابه
ذي الدار صراع كاس الاسود في الغابه
لاح برقا افل بق كل قلبا امن
استبشر بخير نصر الحليقه ضامن
جيشها الاول اتقدم وتبع التامن
العدو خلى سلحاتوا وكسر قدامن .
................................................................
تحياتي ...
حاتم هاشم .
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
Quote: ياحليل هزيز الروب ياخالد فارقناه
كان الحي مختر والظروف بتساعد
ما كان قلبي رادن والسكن متباعد |
ريحانة البطانة سلام
حلقة ومعلقة فوق اضنينّا
وزي ماقال ودبادي العكودابي
مرحاتنا شرابهن يوت ماغبّن
شبعانات ...
في الشقل اب شوك ماشبّن
الحُمّل ولدّن وربّن
حلماتّن تقلّن
جرّن فوق سيقانن كبّن
اللبن الفي ضرعاتّن جبّن
المغصة ان كان ضرعاتّن خِربّن
القرعة آ وليد
السعن آ بنية
القربة كمان
كبوها الميّه
المغصة ان كان ضرعاتّن خِربّن
شوفّو النعمة السالّت
فوق قيزان الرمله
ناس البندر
لبن الشاي بي العملة
سمح الخمج الفوق اسيادّو
سمح العز المن أجدادّو
تحياتي يا ريحانة وما طولي الغيبة علينا
البلاك خربانة
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: حاتم هاشم)
|
حاتم هاشم سلمك الله من كل سوء منور حوش خالد بمقدمك
جمعة مباركة ياخالد ود شوراني قال :
ضُهر الجمعة صليتو وقلب فوق تيسي
كان مربوط ينسِف فتريت مو حميسي
تقديري ومناي ومظنتي وقييسي
أهجمبو المِجمِل صوتو رب النيس
كان مربوط ينسف فيترت مو حميسي
تعرف ياخالد الفتريتة دي ليها طعم ألذ من كل أنواع الذرة ( ودعكر ، الحميسي ،الدبر والمايو)
إضافة لقيمتها الغذائية العالية والله لو ملحتها بموية تأكل ماتدي الجنبك والعجب لوبقت بي روب!
ودشوراني ماهو خاتي لو أفتخر بأن جمله يأكل فتريت ، وشد فوقو بعد ماصلى الجمعة وفي حساباته أن يهجم به ديار محبوبته صاحبة الصوت الجميل المجمله رب الناس.
صلوا علي النبي
وكل جمعة وأنتم بخير .
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: سمية الحسن طلحة)
|
[B]كان مربوط ينسف فيترت مو حميسي
تعرف ياخالد الفتريتة دي ليها طعم ألذ من كل أنواع الذرة ( ودعكر ، الحميسي ،الدبر والمايو)
إضافة لقيمتها الغذائية العالية والله لو ملحتها بموية تأكل ماتدي الجنبك والعجب لوبقت بي روب!
ودشوراني ماهو خاتي لو أفتخر بأن جمله يأكل فتريت ، وشد فوقو بعد ماصلى الجمعة وفي حساباته أن يهجم به ديار محبوبته صاحبة الصوت الجميل المجمله رب الناس.
صلوا علي النبي
وكل جمعة وأنتم بخير .
الفيتريتة هي الآصل في العيوش ... والباقي محسنة
لك جزيل الشكر على مرورك الذي دماً يزيدنا فائدة
قال ودبادي العكودابي
تلب حامد
فوق مخلوف ابزور وإتربّع
طلق الرسن اب زمّه
وسوّا خبيباً بدّع
هوّد فوق رُقاب الضي
لاقّوهو تلاته زبيدية
خالفين سِيقاننُ فوق السنكيت
ورقاب ألبل
بيناتن مرخية
محجوبات بي الخرز الفصلّو السوميت
وكل واحد درقه وسيف وطبنجية
وباقي جرابُن مليان دنميت
الجنيات إتقبلو
وضاقو الحارة
وكان حجازن صقر الجو
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
يقال إن قنبرة كانت تعلم فرخها الطيران.
فنصحت له ألا يعتمد على حناحيه .. حتى يأنس من نفسه
القوة والشدة، وجعلت تطير أمامه من غصن لغصن يقاربه.
ومن عود إلى عود يجاوره، وهي تستريح في كل نقلة كي يستريح فرخها.
ولا يمل ثقل الهواء، فخالفها وطار وأرتفع مظهراً النشاط والمهارة .
فخانه جناحاه وانكسرت ركبتاه ولم ينل مناه. ولو تأنى لنال مايرضيه
وعاش سعيداً.
لكل شئ في الحياة وقته
وغاية المستعجلين فوتُّه
| |
|
|
|
|
|
|
|
|
 Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
بسم الله الرحمن الرحيم
سلام يا هلنا ...
الأهيف
................
للشاعر ... عمر البناء ...
.......................................
الأهيف ابا ما يلين من بعده
صار قلبي ضريم بى نار الفرقه
لمتين يا كريم الحظ يخدمنى وحبيبى يلين
اراه الناعس در فاطرو كريم
يألفنى ويترك لطباع الريم
هو جسمو سليم وانا جسمى معذب وقليبى كليم
نور محيو الفجر والليل هضليم
له راحة الدنيا وليا التأليم
لو مره نسيم يتمايل غصنك منه مقيسيم
قبل الحاظك ما رأيت يا وسيم
الأعين تفعل فعل المكسيم
براق الغيم زى بسمك وليك الشادى نغيم
كيف عاشقك يثبت فى وطنه يقيم
انت نافر وعارفه بهواك سقيم
ماليا نديم غير نجم الليل ومنامى عديم
لو كان يا مدلل لى هجرى تديم
اتعذب وتمنع حظى التقديم
لى جود بالليم انا من بعدك صار قلبي أليم
متى تعطف وتبقى حليم
يا صفى القلب وروح التعليم
بقى شغلى نميم وفراشى قتاد وغطاى حميم
لو كان لى وصلك اوجد تتميم
لى سرك بحفظ فى قلبى صميم .
...................................................
تحياتي ...
حاتم هاشم .
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
بسم الله الرحمن الرحيم
سلام ياهلنا ...
عكير الدامر ...
إنه علي إبراهيم عكير ينحدر أصله من قبيلة الهدندوه بشرق السودان
ونزحت اسرة عكير ( العيكراب) إلي مدينة الدامر في القرن التاسع عشرومنها الي شتي مدن السودان ولكن ظلت الدامر هي الموطن الروحي للاسرة وقد إرتبط بها عكير إرتباطاً وثيقاً وإرتبطت بأسمه
وكان عكير رجلاً مثقفاً جداً وكيف لا وهو من أوائل المتخرجين من كلية غردون ويجيد اللغة ألانجليزيه بالإضافة للهجة الهدندوه وكان يجد نفسه في حياة البادية التي كان يهاجر إليها في رحلات صيده المشهورة وعاشق البادية الشاعر / عمر البنا وكان يمتلك عدداً
من كلاب الصيد الفائقة السرعة هذا بالاضافة لاجادته إستخدام البندقية في صيد الطيوروالغزلان وكذلك التماسيح .
إن كتابة الشعر جزء من حياة عكير الدامر وهناك جوانب أخرى فهو أول سوداني يمتلك متحفا أثري زود هذا المتحف بنوادر التحف وكان يعتز بهذا المتحف إعتزازاً كبيراً ويعتبره جزء من حياته وقد سجل ألاستاذ/ الطيب محمد الطيب في برنامجه صور شعبيه عدد من الحلقات معه ويضم المتحف أيضا أعداداً من ألإلبومات الضخمة الحجم
بها صور كل آل عكير عبر حقب الزمان المختلفة.
وجانب آخر من شخصية عكير الدامروهو الشجاعة وقد سجل ذلك عبر قصيدته المشهورة ( الدود قرقر حبس الدرب ) والتي يعني بها نفسه
هذاوقد إشتهر عكير بخفة الظل والفكاهه والطرب والحياة البسيطةفعندما
يدعوا أحداً مقرباً لنفسه ينصب له خيمة مصنوعة من الصوف ويفرش أرضيتها بالسجاد ويعلق القربة المليئة بالماء أمام الخيمة بالاضافة لعدة الجبنة وقطع من متحفه وبذلك يحس أنه أكرمك في المكان المحبب إليه
وهو البادية هذه لمحات من حياة الشاعر عكير الدامر .
منقول .
تحياتي ...
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
فرحيــــــن برحمتك يا رب
للصائم فرحتين، فرحة عند فطره وفرحة عند لقاء ربه.
أما فرحة عند فطره فيفرح بما أنعم الله عليه من القيام
بعبادة الصيام الذي هو من أفضل الأعمال الصالحة.
وكم أناسْ حرموا من ذلك الفضل ، لم يصوموا ويفرحوا بما اباح
الله للصائم من الطعام والشراب والنكاح الذي كان محرم عليه
حال الصوم.
وأما فرحته عند لقاء ربه فيفرح بصومه حين يجد جزائه عند الله
تعالى موفراُ كاملاً في وقت هو أحوج ما يكون إليه حين ينادى
في الخلق في المحشر ...
أين الصائمون ؟؟ ليدخلوا الجنة من باب الريان الذي لا يدخله
أحد غيرهم.
اللهم أجعلنا من اللذين يفرحون بصيامهم في ذاك اليوم وان ندخل جنانك العلى من
باب الريان يا رب.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
محبــــة الله تعالى
تكون في محبة كلامه الذي تكلم به. والشوق لتلاوته وتدبره
والأنس به، وتحكيمه في كل أمور حياتنا واقعاً ملموساً
محبة رسوله الكريم صلى الله عليه وسلم اتباعه في كل
أمر به والانتهاء عن ما نهى عنه .. والإكثار من الصلاة عليه
صلى الله عليه وسلم .. وأعتقاد عصمته واتخاذه أسوة وحسنة،والعمل
بسنته بدون تحرج ولا تهيب ولا تذبذب.
الغيرة على محارم الله، والذّب عن حدود الله أن تنتهك.
الغضب عند إهانة شئ من شعائر الإسلام
التحرق على هذا الدين الحنيف
التألم لواقعه
الاحتماع بالصالحين والاخيار والانس بمجالستهم
وسماع حديثهم
التقرب لله بالنوافل والتواصل لمرضاته بالأعمال الصالحة
من صلاة وصيام وصدقة وحجا وعمرة وتلاوة وذكر وإلى ماغيرها من الأعمال الصالحة
نسأل الله أن يثبتنا على دينه الذي ارتضى لنا ويحينا مسلمين ومؤمنين ويميتنا على
ذلك أنه ولي ذلك والقادر عليه.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: حاتم هاشم)
|
| Quote: لمتين يا كريم الحظ يخدمنى وحبيبى يلين |
حاتم هاشم
لك عاطر التحايا
علي جميل الكلم
لمتين ياكريم الحظ يخدمني وحبيبي يريم
ولعلك تذكر أغنية أحرووني ولا تحرموني سنة الإسلام السلام
قال ودالرضي :
قال لي طبع الريل أصلو نافر
قتلو عله تريم النوافر
وعل راء الريم يبقي لام
وأهلنا في البادية يقولوا ليك البهيمة رامت أي أرضعت صغيرهاوهي عكس نفرت أو نافرة .
خالد كيف الحال
كنت جايبة ليك حاجة تناسب ليلة القدر لكن كلام حاتم دا غير وجهة بوصلتي التي لاتقاوم الحقيبة
سأعود بحول الله
والسلام عليكم.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: سمية الحسن طلحة)
|
بسم الله الرحمن الرحيم
سلام ...
ريحانه البطانه .. بت الشيوخ و الاديبه سميه بت الحسن ودطلحه .. حياك الله .
| Quote: ولعلك تذكر أغنية أحرووني ولا تحرموني سنة الإسلام السلام |
ود الرضي :
احرموني ولا تحرموني
سنة الاسلام السلام
عطفكم يا من الموني
كالاشعة الاسهم رموني
الشجون بالليل نادموني
الانين والنوح علموني
لو معنعن قول كلموني
حبي طاهر لم تظلموني
برضي قابل الظلم احترام
يا النفوني كفى اعرفوني
ساهي ساهر ساحات جفوني
في هواكم يا من جفوني
لا الوم ان لم تنصفوني
انعكاس الاحوال كفوني
ايضا الايام عرفوني
يوم سموما ويوما غمام
كلما النسمات عطروني
فاجأوني دموع مطروني
رب اغفر للعكروني
في وداعة الباري العروني
رب وقت يتذكروني
او يقول القايل دروني
او يحدث عني المنام
الدهاة بالسلو ما دهوني
عن تجاهكم ما وجهوني
بي تحكو وشمتو النهوني
وبرضي هايم وخاضع لهوني
لا اقول مستنكف دهوني
عن كثير عن قيس نبهوني
عن حقيقة الحب غين ولام
ما تنفس صبح او ضحى لي
الا غاب هدهد فكري ورحالي
قال قربك عين المحال
قلبي غير زكراك ما صحى لي
يكفي ان السهد اكتحالي
يكفي شاهد لي انتحالي
شاكي شاكر شاخص دوام
طاف خيالك والليل كافر
شفت بدرو المتجلي سافر
صك غاضب لقى دمعي دافر
قاللي جملة وعقد الاظافر
قاللي طبع الريم اصلو نافر
قتلو عل تريم النوافر
وعل راء الريم تبقى لام
في التفكر اصبح وامسي
ايضا التزكار نجوى همسي
وحياتي اشبه برمسي
اشكو يومي واسترحم امسي
ما عهدتك يا ليل تمسي
طلت وامتى اشراق شمسي
وانت وين يا بدر التمام
قتلو ليت الايام يندن
تبقى لانت وسحابا دندن
بلماك النيران يخمدن
ليك روحي واجزيك حمدا
قال لي كيف تستوجب لي حمدا
من تعاطى المكروه عمدا
غير شك يتعاطى الحرام .
...............................................................
تحياتي ...
حاتم هاشم .
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: مجدي عبدالرحيم فضل)
|
Quote: وأستراحتك ملئ بمحاربين لا نقوي علي مقارعتهم بس جئنا نتاوق ونمشي
بدون جراحات وخسائر في العتاد والأرواح سلام علي روحك الحلوة .
،،،،أبوقصي،،،، |
العزيز / أبــوقصي
تحية طيبة
كل سنة وانت طيب .. تقبل الله منّا ومنكم
انت مقارع لا يقهر ويكفي جمال كلمك الذي نرى
أسعدتنا الزيارة الجميلة يا جميل
طيب الله ثراك ومتعك بالصحة والعافية في هذا الشهر
الكريم.
ولك التحية والاحترام
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
المجرابي فيسل هليل
هوج فوج .. مي إوشاق
هيجت الفؤاد بقصيدك هذا .. وعرفت تضرب في محور تمركز الروح
أنا اخو البت اللكّعت
قرن الخُمرة النازّه
علي وردان الصبوة الراكزّه
الجنيات الهازّه
صدورهن لازّه
ورق النص
زي خيت الشلّه
بالحيل آ جني اي والله
الجنيات الحزموا الجِبه
عرق الشتوي عليهم
ناي ونصبّا
قول مادلا
رجالاً حصدوا الحبه
عيشن هادو إنكال وإتعبّا
وباقي مصبور واقف قُبّا
الحمد ألآف الشُكر ألآف
العيش الرقد اصناف اصناف
الولد الكال
عزام حلاف ضياف
الرزق الجانا مدّلا
الحلق الجاف إتبلا
بالحيل آ جني آي والله
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
كل عام وأنتم بخير وربنا يحقق الأماني
( أنا بكون حزينة يوم العيد لأني بتذكر أهلي )
برقيـّـة
هاهي من هـنا برقيتي أوحيها
إلى الذي قاطن فِي فـَي أعاليها
اللاســلكي هل يحمـل لنا خبـرا ً
أو من هنالك أخبـار عزّة يؤتيها
أو يدرء الوحي يفهم كيف واجبه
وواجب الرّســل حقا ً أن يؤديها
ماكان للمرء أن يضمن ســعادته
ولا لنفسـه أن يـدرك أمانـيـهـا
لله لله نـفـس قـد عـلمـت لهــا
حسـن التوكل في مسـراها يوليها
العيـن تـعــشــق لحظات يميل لها
قـلب الفتـى ويـريــح النفس يلهيها
تعلق الظن في الآمال تـرضـى بــه
وعن الحـقـيـقة ليـس الظن يغنيها
الشيخ عبد العزير
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
بسم الله الرحمن الرحيم
سلام ...
قال عمر البناء :
شيخ بحسبك من فخر ... بك البدور طائعات تخر
ازكر ليالي العاصمه
المٍن سور إلهك عاصمه
بك النشرت العاصمه
ويمسك بنان بمعاصمها
كانت ليالي مواسمها
انوار تلالي الي السماء
في قلبي دائما راسمها
ولكن حروف مجسمه
بالله يوم المهرجان
الجو صافي من الدجن
من مارائت تلك الوجن
انا عقلي فر ركبله جان
ايام انس ما اقصرها
وراحت كان لم نبصرها
ياربي خدر عنصرها
والنفوس جيوش بُخ تنصرها
ايام سرور في سراع تمر
والزول يقنب فوق جمر
لو تاني عادت ولي امر
اليوم ما ببدله بعمر
ماشفتهن حين قالوا جن
زي الكهارب بهرجن
اوعي السلوك فوق الوجن
بالنظره لك بتلجن
افني الشموس عين قنب
وجن شلوخن وعلبن
صيد الخلا الما طنبن
في قلبي نزلن وصلبن
لو شفتهن تحت القصر
حاملات نياشين النصر
خلسه البدور طلعن عصر
او درت ناس خم وصر
يا صاحب ازكر جلستهن
والطاف مناظر خلستهن
مولاي حواك من حبستهن
اجي يظبطني وسطهن
صيح سرور وتلاه الامين
ربط قلوب العالمين
عاشق ما يلزمني اليمين
ما عرف شماله من اليمين
بادر بقي وشغل القلوب
بلبه للانظار جلوب
كم بلحاظه هزم تلوب
وقتل اسود عاتي التلوب
الله قد بعث الكف
فضح الشمس وقتين سفر
تلك الشلوخ واقفات قفر
لي فاه اغاليد النفر
النقرابي من بينهن طفر
قال لينا في عينكم ضفر
جار بوظيفه الانضفر
ليل كنا لكن كفر
ظبياً احول في زاز
عينيها والجيد كم قزاز
بعوده يا ست العزاز
تلكم ليالينا اللذاذ
النق عقد والقامه زان
واللُّون تقول الخيرزان
ان وقعوا له النقره زان
جلي الغني لصورته زان
عمل القلوب كوره قدم
يا العاصفه وهي في العدم
كهربنا والكتف انهدم
تلقانا غُسلي ومافي دم
لله درك يا عمر....
سوق الاذي بك انعمر
ضرغام وابهي من القمر
والطف وارق من الثمر
بعوده يا مولاي تعود
ايام هنا وطالع سعود
نتلاقي في اقرب وعود
يبقي الحسود في عينه عود .
...............................................
تحياتي ...
حاتم هاشم .
| |
|
|
|
|
|
|
| |
خالد علي محجوب المنسي
ماجدة عوض خوجلى
فيصل محمد خليل
Muna Khugali
حاتم هاشم
مجدي عبدالرحيم فضل
فيس بوك
تويتر
انستقرام
يوتيوب
بنتيريست