|
|
 سلسلة حلقات مطوفش
|
الأولى : مطوفش وفسلفة أوصلته لعربة الاسعاف
مطوفش : يا بتاع البقالة بالله أدينا جبنة بـ 200 جنيه
بتاع البقالة: ياخي جبنة بـ 200 جنيه دي يوزنوها ليك كيف ،، ياخي دي شمة بس
مطوفش : شمة بس ؟؟؟ دي جبنة ولا صعوط؟؟ ،، بالله أدينا خلينا نمشي ياخي ،، الواحد بطلّع القروش دي من حشا فشفاشو عديل كده، إنت عارف يا اخي كل الموجودات الحسية ومعها تكالب القوة العظمي في دهس أفكار الشباب النيرة ،، دي دي في الواقع وفي الحقيقة واحدة من أسباب التدهور في محاور التجربة الناجحة ،، إذن فعليه يجب أن ......
بتاع الدكان:: أسمع شيل جبنتك دي وفارقنا بي الله واحد ياخي.
بتاع الدكان ادى مطوفش الجبنة وقال بي وراه بالله عليكم الله دي أمة يعملوا ليها استاد،، دنيا غريبة ،، 200 جنيه وجع بيها راسنا ،،، والاسبرين حق وجع الراس بـ 300 جنيه ،، عجايب
مطوفش: يا بتاع الخضار بالله ادينا سلطة مشكّلة بي 300 جنيه
بتاع الخضار : بـ 300 جنيه؟؟؟ ياخي دي سلطة شنو البـ 300 جنيه ، إنت يا زول مطرطش.
مطوفش : يا عمنا السبب كلو معدلات التضخم المرتفعة بصورة مضطردة ،، فإذا نظرنا للمستوى الفكري مع التعامل في متناقضات الحياة بشكلها المعهود في بؤرة التفكير المنطقي ،، نجد أن التلاحم في أداء المهام الغير قانونية يفتقد للمصداقية فلذلك يجب أن يكون هنالك تعددية في برامج القوى الغير عاملة وتمرير كل المضطربات الناتجة عن التعامل اللا مسئول، فعليه يجب أن ....أن أن و و و....،،،!!!!!! .......... ،،،،
مطوفش برى ليك بتاع الخضار، وبتاع الخضار ما فاهم حاجه المهم في النهاية إقتنع وأداه سلطة بـ 200 جنيه أقل من المطلوب..
بتاع الخضار : والله الخرابة دا كلامو كبار كبار..
مطوفش :: يا بتاع اللحمة بالله أدينا نص ربع كيلو لحمة ولو مافي حاول جمع لينا كم عضمة كده نعمل لينا شوربة
الجزار : نص ربع دي عمرنا ما سمعنا بيها ،، أسمع يا ابو الشباب عندنا اقل حاجه ربع كيلوا عاوز عاوز ،،، ما عاوز بالله أدينا عرض إكتافك ،، وبعدين العضام دي بنديها للكلاب بس، وللأسف كملت، شطبت يعني ولو كنا عارفنك ح تجي تمرضنا بي هنا كان خلينا ليك منها.
مطوفش : شنو يا جزازيرو ياخي نفسك حار كده مالو ما تخليك حليم الحلم سيد الأخلاق والأخلاق سيدة المجتمع.
الظاهر الجزار مكتوي بنار مطوفش قبل كده وعارف حنكو
مطوفش : يا أخي اسمعني جيدا وتمعن في حديثي ،، لأنه في حديث قديم لقدماء العرب يقولون ان للحمة فائدة واحدة وأضرارها كثيرا ،، فلذلك دأبت الدولة في محاولات للتقليل من توريدها والعمل على تبديلها بالفول والذي يحتوي على أعلى تركيز في البقوليات من البروتينات والتوكسينات وبه مواد فعالة تقوم بتحسين البشرة وجعلها ناعمة الملمس كالحرير ،،، فلذك بالله أدينا نص ربع وذلك اسوة بمساعي الحكومة والعمل على تجنب المخاطر....
ولكن الجزار كان اخلاقه ضيقة فما كان له إلا وضرب مطوفش في نص راسو طير ليه الباقي ليه في عقلو ،، وتم استدعاء الاسعاف ومطوفش ما زال يبرطم وهو داخل عربة الاسعاف في طريقه إلى المستشفى ويقول ،، إن التعاون في درء المخاطر الناتجة عن انفعالات البشر والمسببة للعاهات المستديمة وهي واحدة من سمات الشعب السوداني والذي يتعامل مع الحياة بقسوة دون الرجوع للفطنة وكظم الغيظ،، فأضفى إليه تصنيفا ألتصق به قالبا فعليه يجب أن .......،، فما كان للممرض المصاحب للأسعاف إلا ويقوم بتخديره ...
|
|
 
|
|
|
|
|
| |
ياسر محمد سعد
فيس بوك
تويتر
انستقرام
يوتيوب
بنتيريست