الشعبية نجمة تزين سماء مدينة الخرطوم بحري

Quote: كتب الاخ عبدون السؤال .. من يتذكر - الكلام للعجائز ناس ديك - اول لعيبة للفلاح من الشعبية ؟ الجائزة يالحاج عربية ابو حصانين .. اذا تقصد (شمس المعارف ) ياخي صاحبك ده موسوعة صحيح كان بنوم من الساعة ستة الا كان بعرف منو الدخل الشعبية ومنو خرج منها نهاية الليل كما يحفظ جميع اهل كوستي موطنه الاول .بس ياشمس ما تزعل كتير على كوستي الخرطوم زاتها فيها شنو والان عايزين ناس السعودية يعملوا مستشفى خاص لعلاج والتشخيص الخاطي للسودانين يعني اذا عملت عمليه يعيدوها ليك من جديد .وانسى الموضوع . اخي عبدون اول نشكر تحاياك ومعليش اذا ما اتصلت عليك عند حضوري لكن هاك الشمار ده في ملحمة كروية قدام بيتكم تمت دعوتي من شباب حلة الصديق لمصارعة فنانين بحري بل السودان بقيادة (هيثم السعودي )الذي لا يوجد مثل في افريقيا وليس السودان (وفريني )خليفة عماد خوجلي وحلة الصديق بقيادة بكري وعدلي حسن جبارة وشخصي الضعيف . وقفت في نص الملعب للتعرف على الزملاء من هذا (هذا ابن كورتكيلا ) ومن هذا (هذا ابن سلامة الساحر ) ومن هذا (هذا ابن ناس جحر ) وكم من الصغار زي ما قال اخونا منير مفتلين الشنبات . صراحة اندهشت ومره شريط ذكريات رهيب رهيب جدا لم تتخيله فضربت كف على كف وقلت والله زمن فعاينت البيوت لم تتغير وعاينت الجمهور فوجدت منهم من لابس عراقي واطفاله في احضانة وبيشاهد المباراة فجمعت الشباب وقلت لهم ما اظن في يوم من الايام تكونوا شاهدتم ابائكم واخوانكم الكبار وهم يلعبون كرة القدم عشان كده انا اليوم عايز اشوف مهارتكم هل انتم مثلهم ام النار تلد الرماد وهذا كان بمثابة تشجيع لهم .وما تشيل هم ياعبدون اديناهم درس للفريق الخصم ولكن امكن الشعبية كلها اجتمعت حول هذا الملعب الصغير .وامكن للان الناس بتصفق وتشجع الفريق الخصم وتضحك للسحر الكروي من قبل هيثم السعودي وفريني وباقي العِقد .وفي الختام تحاضنا بالتحايا وسلامات لشباب لم نشاهدم في فترة قصيرة . وخليني اذكر ليك جبابرة حلة الصديق في العصر الذهبي (سلامة ،ميمي ،كيسو ،صلاح عمر, التاج خليفة , التاج بنقز,عادل مامون, عوض مامون ,كرتكيلا , العجب , الضب ،ابو اللول ,عمر عزالدين ,عثمان تيو , تورو ،النقر، يوسف ، الفاتح سليمان ، اسماعيل سليمان ،طارق برسي ، محمد خضر ، فايز خضر ، قاسم علي , ياسر سليم ، ازهري سليم ) فرقة الفلاح في ذلك الزمن شمس الدين استعان بي كصديق منهم اللاعب احمد هارون , الجنكل , كابوس ،محمود وبعد كده تمهم ياشمس المعارف ود ساتي . ياود قناوي في حوار مع صديقي حاج حمد وانا ما عارف بعد الشهره دي بيعاملنا كيف سبق وقال انك كاتب من الدرجة الاولى وانا بقول انت مايكل جاكسون الشعبية وخليني استمتع بكتاباتك وبعدين برد ليك لان كلامك عايز مذاكرة . ملحوظة ياشباب الشعبية بالله ياشباب وياعبدون وكل من له باسوورد في الشعبية الرجاء انزال بعض اغاني (مايكل جاكسون )وياريت تكون اغنيته مع برنتي سبيرز وتجدوها في اليوتيوب لان الواحد صراحة عايز يكتب عنها لانها فترة ومرحله مهمه جدا في الشعبية ومنهم من حصد جوائز في الدسكوهات خارج الشعبية وهؤلا نجومها (الصادق تبيدي + عصام ود الفوس ) ونكتب عن بيوت الدسكوهات في الشعبية في تلك الفترة . والان بس عرفت بس ان الباسوورد مهم جدا جدا في سودانيز اون لاين لامتاعكم وليس للشهره ودمتم ........... الوليد عبد اللطيف