الشعبية نجمة تزين سماء مدينة الخرطوم بحري

Quote: الاكرم حجوج تحايا وود الاخ عادل محمد عثمان اولاً لك شكرى الجزيل على المرور ماكنت قايلك بتعرفني ولكن انا بعرفك كويس جداً ولا اخفي عليك انت كنت لفترة طويلة قدوة ومثل اعلى بالنسبة لنا وبالتحديد كدا من يوم ما اعلن المذيع عمر عثمان( بتاع ساعة سمر) اسمك بانك البرنجي على كل اولاد دفعتك والموقف دا انا متذكرو ليوم الليلة كويس جداً ولا انساه دا طبعاً كان ايام الزمن الجميل والشعبية ساكننها ناسها قبل حملات النزوح الشديدة نحو العاصمة والله هسه لو ركبت الحافلة من اخر محطة لحدي ماتصل الخرطوم ما بتعرف اي زول تدفع ليهو او يدفع ليك ولا والله ورجع ليهو قروشو ودا واجب علينا الحاجات دي كلها اختفت . وبعداك ما لاقيتك الا في يوم الانتفاضة في احدي المظاهرات عقب بيان سوار الدهب ولازال الهتاف الذي كنت تردده يرن في اذني (جبهة عريضة شمال وجنوب ) ومن ديك مالاقيتك الا في بوست الشعبية والتحية للاخ الحاج حمد . ولكن ياعادل الغريبة من خلال صورتك المعروضة في البوست هنا ما عرفتك والله الا بعدما دققت شديد واستخدمت نظاراتي الاثنين وجردتك من اللحية ولكن الصلعة دي شنو ؟ وين الملامح العذبة الزمان ديك ياراجل بقينا خلاص ماشين على الخمسين يلا حسن الختام . اما حكاية اني كنت تلميذا عبقرياً دي حيرتني شوية التلاميذ اولاد دفعتنا كانوا ينقسمون الي ثلاث فئات الفئة الاولى (المبرزين اكاديمياً) وهم على سبيل المثال لا الحصر :الحاج حمد الحاج عراب هذا البوست وحسين عبدالحليم والخضر عثمان احمد البدري والاخ عوض السر والاخ حامد دفع الله وامين عبدالغني السيد سلام ولكن كان اميزهم الاخ حسين عبدالحليم ( من زعل يا حجوج ) ما في زول قدر يخرّم منو كلو كلو وهو من يستحق وصف العبقري فحينما كان يتحدث عن الشعور والرومانسية كانت احلام بعض منا ان يكبر ويبقى طويل عشان يمسك ماسورة البص . والفئة الثانية هم الوسطيون وهم كثر ما بقدر اذكر اسماء لان واقعهم تغير واحرزوا تقدماً كبيرا في حياتهم الاكاديمية بعد ذلك يمكن احسن من بعض افراد الفئة الاولى . اما الفئة الثالثة هم ( المتبرزون اكاديمياً ) وهذه هي الفئة التي اكتشفت انني انتمي اليها بعد كم سنة في الجامعة وسنوات طويلة من التربيت والترقيع وخلافهدخلت كلية الهندسة وتخرجت احمل ليسانس الحقوق كيف دي حصلت ما عارف . اما علاقتي بالرياضة كانت لا تتعدى التشجيع فانا لم اشاهد قط العب الكرة بشكل جاد ولم اكن ادارياً لاحد الفرق لكن كنت من كبار المشجعين لفريق الجهاد او الالمان ايام ناس عزالدين الصبابي وحسن مظلات وموني سيف الدين حسن الخ.......... . اخونا حسن عثمان رزق بثلاثة توائم دفعة واحدة وفجأة اصبح محمول واثبت فعلاً انه كديس ربنا يحفظهم ويجعلهم من المبرزين اكاديمياً. وفي الختام اخي عادل لك التحية وشكراً لحسن ظنك بي (فحسن الظن من تمام الايمان ) وارجو ان اكون قد اوضحت بعض ما التبس عليك .