صبحكم الله بالخير كنت أنوي أن أواصل مسلسل الاجازة في السودان... و أن أرويها لكم ساعة بساعة و دقيقة بدقيقة... و لكن ما يحدث هنا معي بفعل سرعة الانترنت خرب المزاج... فخشيت أن تمضي الأيام دون أشكر الزقازيقاب الذين جعلوا من أيامي هناك أياما تعد و تحصى... جعلوا منها أياما لا تنسي و لا تنمحي من الذاكرة التي بدأت تصدأ... أشكر و بدون ترتيب و لنبدأ بالسيدات أولا... نهلة نجم الدين التي استقطعت من وقتها الثمين الكثير و خصتنا به... فتحت لنا قلبها و مكتبها و بيتها بمحبة و كرم.. لها و لأسرتها الشكر الكثير... ماجدة عبد الرحمن...لقد زادها الزمن بريقا و براءة و ثقة... عواطف دفع اللله...كنا نناديها بيا ماما أيام الزقازيق فوجدناها كما هي... صفاء عباس...زرتها و أنا خجلان منها لانقطاعي عنها لفترة طويلة.. لامتني لوم الأخوان ثم غفرت لي كل تقصيري...و ودعتني بمطار الخرطوم.. الكوتش محمد صديق..رجل من طراز اسماعيل الأزهري و المحجوب... له همة الأزهري و رومانسية و شاعرية المحجوب... رغم مشاغله الكثيرة استقبلني و جمع الناس من حولي... نظم و نسق و شارك... جلا...رجل تحبه للحسن فيه...لو اكتفى بالابتسام في وجهي فقط لكفاني... فما بالك بكوبان من العبير و خيط ماء... محمد المرتضى...الصديق الصدوق (الشين)... معاوية يحي..الذهب لا يصدأ...لقد ازداد معاوية طولة بال على باله الطويل.. مجدي عبد الله...لا تقدر الا أن تحبه لما فيه من أصالة و جمال... عبدو مضوي...صديق من زمن جميل لم يغيره الزمن... أحمد عوض...صدح و أطرب و حلق بنا فوق السحاب...وحدنا... محمد سيد...لن أجد كلمات توصفه..لقد أعادني 27 سنة الى الوراء... محمد العوض الطيب..و الله روحي كانت متشحتفه ألاقي ود العوض... لم أصدق نفسي عندما التقيته..ربما تكون ملاقاته من أجمل ما حدث لي في الاجازة... عمر بسكو...الصورة التي رسمتها له في خيالي أنه ظريف و لطيف... و جدتني قد ظلمت الرجل كثيرا فلقد فاق كل توقعاتي... تبلدينا و ما أدراك ما تبلدينا...صالح الصالح المتصالح مع نفسه و مع الحياة... التقيته أولا في أمواج..ثم التقينا عند نهلة و عند الريس معتصم جعفر... و قام بتوصيلي بعربيته الفارهة حتى بيتنا في أركويت... فائز حسن التوم أو فايز الراجل...وعدني و أخلف الميعاد و هو عارف شوقي كم... و لأنه ختامه مسك نختم بالريس معتصم جعفر ...كنت أتمنى أن ألتقي بالريس في هذه الاجازة... فلبى طلبي منذ البداية فكان من أوائل الذين التقيتهم و سعدت كثيرا بذلك... ثم كانت دعوته الكريمة هو و زوجته لنا في منزله العامر... فأكرمونا و أحسنوا استقبالنا و أشعرونا بأننا أهل الدار و هم الضيوف... لهم مني جميعا خالص الشكر و التقدير و أسأل الله أن التقيهم مرة أخرى... و أرجو أن لا أكون قد أسقطت سهوا أي واحد و ان فعلت فليعذرني...
03-03-2011, 09:11 AM
منصور عبد الرازق منصور عبد الرازق
تاريخ التسجيل: 05-03-2009
مجموع المشاركات: 2360
اريتنى لو حضرتها معاك يا ود يا حاتم حالتك حاضرها بايتة ؟؟!!! انا متضامن معاك اشد اغلتضامنات زاااتو بس ما عشان سواد عيون انشيلوتى وجماعته انا كنت رامى بعيد من يوم الأحد , لمن ناس بيرمنجهام سيتى العواليق ديل لحسو مننا الكاس بالطريقة الدراماتيك ديك قلت بينى وبين نفسى لن يشفى غليلى الا فوز تشيلسى على على المان يو انا بقى حضرتها لايف جنبى احمد ولدى , زول مسيخ خلاس يا حاتم , مجننى بى قون رونى الجابو فى المان سيتى قبل اسبوعين تلاثة ويشيلو ويرسلو لى فى الميل بوكس بتاعى كل يومين هو عاد لكن قون نصاح اها لمن الزول ده جاب قونو الأول المن سقط لقط داك فى بيتر شيك وبى مظهر البلوز الما بيسر القلب اديت ليك احمد نهرة ورسلتو ليك ابعد مشوار ممكن ما بين الشوطين عليك امان الله الزول انجز المشوار المفروض ينجزو فى تلاتة ارباع الساعة فى عشرة دقائق بس وجانى ليك طائر لكن ولدكم ابو شعر الجاى من بنفيكا ده (برازيلى مش كده ) ما بوظ اعصابى وقرب يودينى التوج فى الأول بخشونته الغير مبررة المع الود المكسيكى هرنانديز وبعدين لمن جاب قون الدرون بينى وبينك انا الدرون زااااتو كان كويس معاى لكن لمن دخل الود دروغبا , طمعت النصيحة , وطمعى كان فى محله جضمهم ليك جضيم السنين ورجع للقانرز ارسنال الأمل فى الدورى مرة تانية
يا جماعة الدنيا هارش ومهروش , ما فيها شى لمن رسلت احمدحدر لى حدرة وقرب يقول لى حا اكلم ليك امى !!!!
03-03-2011, 09:39 AM
عبد الدائم سيد أحمد عبد الدائم سيد أحمد
تاريخ التسجيل: 10-28-2006
مجموع المشاركات: 4220
ومن الصديقة والزميلة العزيزة حنان الخطيب وصلنى الأيميل الخفيف الظريف ده بيشبهكم والله وتستاهلوهو
عوض دكام يوم جاتو واحدة من بنات اهله زعلانة وبتحكي ليه: قالت ليه كنت راكبة عربيه مع واحد شغال فى الحكومة نظام فضل ظهر وكدا اسموا يونس النباح الذى اشتهر بتقديم التعليق السياسى بعد نشرة ثلاثة فى الاذاعة المهم الراجل دا سالنى رايك شنو فى حكومتنا قلتو ليها سجم ورماد نبزنى وقال لي يا خادم ونزلنى من عربيتو،
فرد عليها عوض دكام ليطيب خاطرها هو نبز خادم الحرمين الشريفين خلي انتي يا خادم العباسية قالو ابو داؤود مشى بيت فرح على اساس احياء حفل ، لاكنه وجد الفنان القدير المرحوم / خضر بشير واقف على المسرح ويغنى ومعروف المطرب خضر بشير انه ينفعل مع الغناء عندما وصل ابو داؤود ووجد هذا المنظر سحب ليهو كرسى وقعد يتفرج وهو زعلان جدا ، وكان امامه طفل واقف يشاهد فى المطرب خضر بشير قام ابو داؤود قاليهو ابعد كدة ولا كدة يا ولد ، اوعى تطير فيك شلوفة ولا اصبع يفلقك ! قالوا يوم ابو داؤود كان شغال حفلة وانتهت متأخرة ناس العرس اصروا عليهم يبيتوا في بيت العرس وفي الصباح ابو داؤود بتسوك في الماسورة جات ماشة بي جنبه مرة كبيرة في السن قالت ليهو إمبارح العب ساهر بيكم يا ولدى.. قال ليها والله ياحاجة العتب على النظر !! ابوداؤد كان بغنى فى حفلة والصف الاول كان كلو جكس حجم عائلي كلو واحدة اسمن من التانية وبعد الاغنية الاولى قام الجماعة كوركو ليهو بالله يا استاذ فريع البان ...قام عاين ليهم وعاين للصف الاول...وقال ليهم فريع البان كيف مع شجر التبلدى بتاعكم دة ! قال ليك عوض دكام كان فى فراش بكا وكان يوم رفع الفراش وعوض دكام مشى عشان يدفع فى الكشف واحد من اصحابو قال ليهو انت يا عوض مفروض تدفع بالدولار عوض دكام قال ليهو لية فارشين فى السوق الحر!! قالوا أبو داود كان مشارك في حفل رسمي أيام النميري ، ومعاه عدد من الفنانين ، قام أبو داود قال لأحمد المصطفى كنقيب للفنانين ، يا أخي ما تكلم لينا الرئيس ده يطلّع لينا وردي من السجن . قام أحمد المصطفى قاليهو : أمشي انت اقعد جنبو وشوية شوية كلمو .. قام أبوداود جا قريب من النميري ، والنميري طلب منه أن يجلس علي الكرسي الجنبو وطلب منه أن يحكي له نكتة ، فحكا أبوداود وضحك النميري ، وحكى له أكثر من نكتة وأضحكه . فقال أبو داوود للنميري : ياريس ما تشوف لينا موضوع وردي ده . قام النميري رد بانفعال : وردي مالو؟ فقال أبوداوود : ما تعدموه تريحونا منّو يا ريس . فضحك النميري ، وأمر بإطلاق سراح وردي أبوداؤود مسافر قطر - قابله صاحبه في المطار- قال ليه والله صدفة عجيبة- الحاجة ماشا تولد بتها ولا يهمك ساعدها لداخل الطائرةوأبو النسب بيستقبلك في المطار- دخل معاها والشنط ثقيلة هدت حيله وفي التفتيش طلعت مليئة حطب شي"شاف" وشي ما "شاف" وطلح وصندل وغيرها...وزهج من الحاجة والتعتيل ... وصل المطار خرج المصيبة أبو النسب تأخر عليه ... أصحاب أبو داؤود جو يأخذوه ... سلموا عليه ... وواحد عاين كده لقى الحاجة بجواره ...قال ليه: ده شنو يا أبو داؤود ... رد عليه ... دي .. دي ... دي ما حمالة الحطب !
*****
ابو داؤؤد شغال عن واحد مديح تقيل والزول متلحهو زلابية وشاي سادة الليل كلو . المهم في الاخر قام طلب منو مدحة اسد الله البضرع ..وطبعا هو زعلان شديد منو . قام رد عليهو يا زول انت ماك نصيح ولا شنو كمان الليلة اسد الله يضرع ليهو فوق زلابية ّ! .... مرة أبوداؤد عامل حفلة في بيت عزابة في السعودية وطبعا المطوعين مانعين الحفلات والعزابة خائفين ويكوركو لي بعض سكرو الباب, سكرو الشباك, قام أبوداؤد قال ليهم كدي سكرو الفنان في الأول
03-03-2011, 11:23 AM
عبد الدائم سيد أحمد عبد الدائم سيد أحمد
تاريخ التسجيل: 10-28-2006
مجموع المشاركات: 4220
البلابل جو داخلين بعربيتم ( السهان بيرد ) دار الاذاعة الغفير فتح ليهم الباب جاء ابو داؤد راكب كركعوبتو قام الغفير قفل الباب طلع وشو قال للغفير ليه دى بتبعر
03-03-2011, 11:17 AM
طارق جبريل طارق جبريل
تاريخ التسجيل: 10-11-2005
مجموع المشاركات: 22555
يا سلام ياخي لمن تبدأ يومك بي ونسة جميلة مع زولة ما شفتها من عشرين سنة د. سلمى احمد البشرى زمن يا سلمى ياخي طبعا يا احباب سلمى دي كانت فردة السكاشن انا وهي بنعديها نقة في السكاشن لامن الله يغفر لينا لك التحية يا سلمى ولزوجك واطفالك وشكرا لزينب التجاني التي جعلت هذا التواصل ممكنا شكرا يا زوبة ياخي ودة تليفون سلمى احمد البشرى: 00249121009208
03-03-2011, 05:05 PM
Hatim Gubara Hatim Gubara
تاريخ التسجيل: 11-14-2006
مجموع المشاركات: 704
جلا يا حربي.. إنجليزي شنو.. أنا وبت الشيخ أسباني ساااي..
هوي يا نضيف هرشه دوت كم.. كان بت الشيخ تقول كلام زي دا.. الا طوالي أصرف ليها ورقتها.. أفو.. قلت لي حماد كتلوهو في العجاجه.. جنس تسلطك دا ما شفت في حياتي...
ود عيد.. عرفتك أول واحد في الصهاينه بتجي خاشي.. أقول ليك.. أنا ضد برشلونه ذاتها..
نجيله وجلال.. خلواالصيد في المويه العكره..
منص ياحبيب.. مشتاقين والله.. قون روني لكن ما متعه.. كان راجي الأرسنال يشيل الدوري واطاتك ما أصبحت.. رغم حلاوه اللعب الا تنقصه سمات الأبطال.. زي الهلال كدا.. يا محمد عيد..
رش.. الشباب ما قصروا معاك تب.. علا قصه الآزهري والمحجوب دي ما اتوفقت فوقها..
03-03-2011, 07:27 PM
الرشيد بابكر الرشيد بابكر
تاريخ التسجيل: 01-24-2009
مجموع المشاركات: 5002
أسأل الله العلي القدير أن يرحمكم و يغفر لكم و يتولاكم و يييسر لكم أموركم و أن يوسع لكم في رزقكم...
Quote: Relatively speaking يعني يا رش? والا بالنسبه لي جورج وكدا? تحياتي للبت حوفي والعيال.. وإن شاءالله الواحد مره يمر على الإمارات ويلقاكم..
يا حبيب حبابك عشرة بلا كشرة... سنسعد كثيرا بزيارتك انت و العيال... بس كلمنا قبلها بي فترة عشان ندخل لينا كورس أسباني... لحدي حسه بعرف أميقو...سنيور...سنيوريتا...قراسياس...أولا.. عليك الله مش باقي لي شوية و أجضم الأسبانية؟؟؟
03-04-2011, 12:52 PM
Hatim Gubara Hatim Gubara
تاريخ التسجيل: 11-14-2006
مجموع المشاركات: 704
يا سلام علي الونسة الطاعمة ... بس يا حاتم والله حكاية الازهري والمحجوب دي عجبتني لصاحبي الكوتش ... صراحة الراجل يستاهلها ...
اها يا ناس ارسنال قبل الدوري الله يحلكم من برشلونة في مباراة الرد وبعدين الباقي كله هين ...والله يستر عليكم من رش السنة الفاتت ... بعدين يا حاتم جبارة قالوا تشيلسي ده فريق الناس المرتاحين والمروقين ... والحناكيش ....
حنان مجمر حمد الله علي السلامة .,... وما تبقي طلة وجرية بس ....
03-05-2011, 08:43 AM
ميسرة سيد أحمد ميسرة سيد أحمد
تاريخ التسجيل: 09-13-2008
مجموع المشاركات: 3175
في كل ما جرى لكم يا أيها العربْ سلبتُكم أنهارَكم والتينَ والزيتونَ والعنبْ أنا الذي اغتصبتُ أرضَكم وعِرضَكم ، وكلَّ غالٍ عندكم أنا الذي طردتُكم من هضْبة الجولان والجليلِ والنقبْ
والقدسُ ، في ضياعها ، كنتُ أنا السببْ
نعم أنا .. أنا السببْ
أنا الذي لمَّا أتيتُ : المسجدُ الأقصى ذهبْ
أنا الذي أمرتُ جيشي ، في الحروب كلها بالانسحاب فانسحبْ
أنا الذي هزمتُكم أنا الذي شردتُكم وبعتكم في السوق مثل عيدان القصبْ
أنا الذي كنتُ أقول للذي يفتح منكم فمَهُ
Shut up
*** نعم أنا .. أنا السببْ . في كل ما جرى لكم يا أيها العربْ . وكلُّ من قال لكم ، غير الذي أقولهُ
فقد كَذبْ
فمن لأرضكم سلبْ ..؟
ومن لمالكم نَهبْ .؟
ومن سوايَ مثلما اغتصبتكم قد اغتَصبْ .؟
أقولها صريحةً بكل ما أوتيتُ من وقاحةٍ وجرأةٍ وقلةٍ في الذوق والأدبْ أنا الذي أخذتُ منكم كل ما هبَّ ودبْ ولا أخاف أحداً ألستُ رغم أنفكم أنا الزعيمُ المنتخَبْ .!؟ لم ينتخبني أحدٌ لكنني إذا طلبتُ منكم في ذات يوم ، طلباً هل يستطيعٌ واحدٌ منكم أن يرفض لي الطلبْ .؟
أشنقهُ أقتلهُ
أجعلهُ يغوص في دمائه حتى الرُّكبْ
فلتقبلوني ، هكذا كما أنا
أو فاشربوا
"من بحر العرب"
ما دام لم يعجبْكم العجبْ ولا الصيامُ في رجبْ
فلتغضبوا إذا استطعتم بعدما قتلتُ في نفوسكم روحَ التحدي والغضبْ
وبعدما شجَّعتكم على الفسوق والمجون والطربْ
وبعدما أقنعتكم أن المظاهراتِ فوضى ليس إلا وشَغَبْ
وبعدما علَّمتكم أن السكوتَ من ذهبْ وبعدما حوَّلتُكم إلى جليدٍ وحديدٍ وخشبْ
وبعدما أرهقتُكم وبعدما أتعبتُكم حتى قضى عليكمُ الإرهاقُ والتعبْ
*** يا من غدوتم في يديَّ كالدُّمى وكاللعبْ
نعم أنا .. أنا السببْ
في كل ما جرى لكم فلتشتموني في الفضائياتِ إن أردتم والخطبْ
وادعوا عليَّ في صلاتكم وردِّدوا
' تبت يداهُ مثلما تبت يدا أبي لهبْ '
قولوا بأني خائنٌ لكم و######ٌ وابن ######ْ
ماذا يضيرني أنا ؟! ما دام كل واحدٍ في بيتهِ
يريد أن يسقطني بصوتهِ
وبالضجيج والصَخب أنا هنا ، ما زلتُ أحمل الألقاب كلها وأحملُ الرتبْ . أُطِلُّ ، كالثعبان ، من جحري عليكم فإذا ما غاب رأسي لحظةً ، ظلَّ الذَنَبْ .!
هل عرفتم من أنا ؟؟؟؟
أنا رئيس دولة من دول العرب
03-05-2011, 11:41 AM
الرشيد بابكر الرشيد بابكر
تاريخ التسجيل: 01-24-2009
مجموع المشاركات: 5002
اتصلت يوم الخميس على الأخ عادل عبد العظيم في طرابلس ليبيا للاطمئنان عليه... طمئنني عليه و شككني في كل ما يبث على القنوات الفضائية... و قال لي أنا حسه جاي داخل من الشغل... يا ربي نصدق منو؟؟؟
اكتشفت ان رفع المعنويات مثله مثل رفع أي أثقال... فهو يحتاج الى تدريب و تمارين متصاعده من خفيف الى ثقيل... حتى تصل الى المستوى الذي تسعى اليه... ثم قبل أي رفع يجب عليك الاحماء جيدا... فليس من السهل أن تقوم برفع معنوياتك و أنت بلياقة ضعيفة... لياقة نفسية طبعا...
ما زال مجهودي في انقاص وزني مستمر... لغيت الخبز أو العيش و لا أثر لذلك على الوزن... وقفت اللحوم الحمراء فكان لها أثر طيب على الجيب.. أما على الوزن...فلا... أكثرت من الخضروات و الفواكه و لم يجدي ذلك نفعا.. واحد صاحبي قال لي ياخي أكل ساكت حتلقى نفسك نزلت... أسمع كلامو؟؟؟
03-05-2011, 11:49 AM
منصور عبد الرازق منصور عبد الرازق
تاريخ التسجيل: 05-03-2009
مجموع المشاركات: 2360
صباحاتكم زى اللبن الحليب لكن هوى اعملوا شخيط واقيفوا بعيد البيرش ارسنال بالبتاع الفوق ده بنرشو بالبتاع داك عارفين ولا ازيدكم ما دام بيمتعنا , يا معلم باجيو شن فائدة الصفيح والقزاز ؟؟؟ ارسنال مع ارسين فينجر قاعدين يحققوا فى المعادلة الصعبة بتاعت الموهبة والأمتاعون اما سياسة تلقيط النجوم , واحسن لاعب فى كل خانة وتجميعهم فى فريق واحد فدى سياسة لا فيها لا ابداع ولا امتاع وبعد ده كلو يجى ارسنال واولاده ,يكونوا مع اصحاب السياسة ############ة دى الكتف بالكتف , والراس قصاد الراس وبعد ده لمن يفرق انو الكاس يمشى لى منو ولا منو كان بى غلطة حارس , ولا دقسة مدافع , ولا تطفيشة مهاجم , ولا صهينة حكم فهو فرق (لامعنوى ) ولا يسوى عندى شيئا (لأن مثل هذه الأخطاء يتساوى فيها ومعها , اللاعب ابو مية مليون يورو وابو مليون واحد ببساطة كده , ما تراه فى ارسنال اليوم , لن تراه عند غيره الا بعد حين وهذا يكفى عندى يا حلوين
03-05-2011, 11:58 AM
منصور عبد الرازق منصور عبد الرازق
تاريخ التسجيل: 05-03-2009
مجموع المشاركات: 2360
منقصو مالك وزنك يا معلم ؟؟؟ انحنا غايتو ختينا الدرب ده زمااااان تمارينا زاتا بقت حقت تنشيط دورة دموية سااااكت الليلة الصباح واحد زميل سألنى السؤال ده كيفك يا منص سلامات يا معلم باين عليك خليت التمارين (مع ملاحظة انو زى كان مركز على كرشتى وكده ) والله ما خليتا , لكن بقينا بتاعين دورة دموية سااااكت قرب يسالنى تانى الزميل البايخ ده ويقول لى الدورة الدموية دى السودان مشترك فيها بس انا ما اديتو اى فرصة تانية لمن لقيتو لسه بيعاين على الكرشة لأنو زى ده , السؤال البعده حا يكون مقاس بنطلونك كم ؟؟ لو سألنى السؤال ده , كنت حا اقول ليهو , انت فتحت ليك دكان ترزى ولا شنو ؟؟!!! منقصو ما لك يالرشيد ؟؟ الكلام دورتك الدموية كيف ؟؟؟؟
03-05-2011, 12:15 PM
عبد الدائم سيد أحمد عبد الدائم سيد أحمد
تاريخ التسجيل: 10-28-2006
مجموع المشاركات: 4220
نقصوا ... نقصوا وتمرنوا يرحمكم الله ... وتحكموا في مستوي السكر في الدم تزداد اعماركم
Quote: التحكم في السكري يطيل العمر.. الأكاديمية الوطنية للعناية بالعجزة وكبار السن الأميركية أوضحت أنه كما أن مرض السكري قد يؤثر سلبياً على طول العمر بحوالي 5 سنوات أو أكثر وخاصة لمن تجاوزت أعمارهم الستين فإن التحكم بسكر الدم قد يطيل العمر لسنوات قد تزيد عن الثمانية سنوات. إلى ذلك ربطت جامعة برنستون هذا الأمر بتأثير السكري على القلب.
وتجنبوا البتاع دا
Quote: الكوليسترول... يحصل الجسم على نحو 40% من احتياجاته اليومية من الكوليسترول من الغذاء (500-800 ملغم) و60% يتم تصنيعها داخل الجسم في الكبد . وتؤدي زيادة مستوى الكوليسترول في الدم إلى الإصابة بأمراض القلب , وهذا لايعني أن خطر الإصابة بأمراض القلب تحدث بتناول كميات كبيرة من الكوليسترول بل هناك عوامل نمط حياة أخرى تساهم في حدوث ارتفاع مستوى الكوليسترول وهي : زيادة الوزن وقلة النشاط والتوترالنفسي والتدخين .
شفانا الله وإياكم ومتعكم بالصحة والعافية
03-05-2011, 02:03 PM
محمد آدم النور محمد آدم النور
تاريخ التسجيل: 05-03-2009
مجموع المشاركات: 1993
Quote: مقاس بنطلونك كم ؟؟ لو سألنى السؤال ده , كنت حا اقول ليهو , انت فتحت ليك دكان ترزى ولا شنو ؟؟!!!
أنا لو محلك و سألوني السؤال دا كنت رجعت السودان طوالي و أديت فرصة لغيري عالم مكنكشة في الإغتراب ....زي القذافي بس!!!!!! إرشادات الطاعم تنبئ أن العودة قريبة جداَ و لا بد لو أخونا شاويش عايز يزيد وزنو ما هي النصائح؟؟؟ أحبكم و كفى
03-05-2011, 02:20 PM
ميسرة سيد أحمد ميسرة سيد أحمد
تاريخ التسجيل: 09-13-2008
مجموع المشاركات: 3175
الرجل الذي عض زوجته هذي واقعة حقيقية وليست قصة شر البلية مايضحك- - !!
التفريق بين حرف الضاد وحرف الظاء في السعودية والخليج يكاد يكون معدوماً
الرجل الذي عض زوجته شر البلية مايضحك- - !! امرأة اشتكت في ألمحكمه بأن زوجها قام بإيذائها و (عضها ) بشده وعنف مما سبب لها الأذى النفسى و الجسدي الكبير خصوصاً وأنه عند كل خلاف (ينتهي الزوج بعض الزوجة بوحشية) حتى تتأدب على حد قوله .. ولما عرض ذلك على الزوج اعترف بفعله, وبسؤاله عن سبب هذا الفعل الغريب قال: هذا جائز شرعا ,
واستند إلى قوله تعالى(واللاتي تخافون نشوزهن فعظوهن ... ) النساء (آية:34) وقد فهم خطا أن الآية تجيز العض, ولم يفهم ان المعنى هوالوعظ والنصح والإرشاد
03-05-2011, 02:40 PM
جلال عثمان جلال عثمان
تاريخ التسجيل: 09-13-2008
مجموع المشاركات: 1735
Quote: عل طاقية اليهود دي شنو اللبستني ليها دي يا أخوي...
إتخيلتك عامل إستايل جديد بت مجمر حددي وجهتك إنتي من ناس وردية الليل و لا وردية النهار؟؟؟ وزاتو إنتو الليل عندكم يبدأ متين و النهار ينتهي متين؟؟؟؟ في زولة إسمحا كوثر داؤود حداكم؟؟؟
03-06-2011, 08:06 AM
ميسرة سيد أحمد ميسرة سيد أحمد
تاريخ التسجيل: 09-13-2008
مجموع المشاركات: 3175
ياشباب ... ممكن مدنا بتلفون دكتور خليل درس طب الزقازبق دفعة الناس العجائز الرشيد ومنص وعيد ... طلب اسري ملح شديد ... ومستعجل او اي معلومة تقودنا الى عنوانه ...
فى يوم دافنة المرحوم دكتور هاشم البنا قبل مدة يا ياسر التقينا مجموعة , وجات سيرة الزول الرائع دكتور خليل الله يطراهو بالخير شخصيا لم التقيه منذ تخرجه من الزقازيق على ما اذكر هو من خريجى 83 او 84 لكن علمت من ذلك اللقاء ان دكتور خليل موجود فى امريكا على ما اظن يعنى مثلا دكتور عمر عبد الله فى كندا ممكن يفيد او كمان حسين شنقراى اظن تلفونه موجود فى قائمة سامى عبد الوهاب وهو كان من اللصيقين بى دكتور خليل , علاوة على انه يتردد على كندا مع اسرته كمان عرفنا من دكتور عبد الله , زميله الموجود فى مستشفى الأمل فى السعودية (احتمال تلفونه يكون اما مع موسى عيسى او كمال الشادى ) ان دكتور ازهرى حمدتو (برضو دفعة دكتور خليل ودكتور عبد الله والمرحوم هاشم البنا ) موجود فى السودان على رأس احد المءسسات الصحية المختصة بالعلاج النفسى (مستشفى الدكتور طه بعشر على ما اظن ) اها يا ياسر , دى الخيوط العندى عن عنوان دكتور خليل ان شاء الله تكون مفيدة
03-06-2011, 11:15 AM
طارق جبريل طارق جبريل
تاريخ التسجيل: 10-11-2005
مجموع المشاركات: 22555
Quote: البربور عند الجعلية هو الفاصوليا المسلوقة ثم تهرس و( تتلايق ) بالويكة ثم تضاف ليها بصرة محمرة وصلصة من غير لحم
اها الحناكيش ظهروا ... قال شنو ... بصلة محمرة وصلصة ... والله ديل ما بنسمع بيهم الا في "الرحمتات" ودي كان ما جاك ود جبرين لي السنة الجاية لا انت ولا جلا ولا عزيزي القارئ اتحداكم كان تعرفوها ...
تليشة يا قول جبريلا: وصلك الايميل؟؟؟
03-06-2011, 01:00 PM
منصور عبد الرازق منصور عبد الرازق
تاريخ التسجيل: 05-03-2009
مجموع المشاركات: 2360
جابت ليها بربور كمان !!!! حمته باااالغة YOU CAN'T WIN WITH WOMEN
WIFE VS. HUSBAND
A couple drove down a country road for several miles, not saying a word. An earlier discussion had led to an argument andneither of them wanted to concede their position. As they passed a barnyard of mules, goats, and pigs, the husband asked sarcastically, "Relatives of yours?" "Yep," the wife replied, "in-laws."
W O R D S
A husband read an article to his wife about how many words women use a day... 30,000 to a man's 15,000. The wife replied, "The reason has to be because we have to repeat everything to men... The husband then turned to his wife and asked, "What?"
CREATION
A man said to his wife one day, "I don't know how you can be so stupid and so beautiful all at the same time." The wife responded, "Allow me to explain . God made me beautiful so you would be attracted to me; God made me stupid so I would be attracted to you!"
WHO DOES WHAT
A man and his wife were having an argument about who should brew the coffee each morning. The wife said, "You should do it, because you get up first, and then we don't have to wait as long to get our coffee." The husband said, " You are in charge of cooking around here and you should do it, because that is your job, and I can just wait for my coffee." Wife replies, "No, you should do it, and besides, it is in the Bible that the man should do the coffee." Husband replies, "I can't believe that, show me." So she fetched the Bible, and opened the New Testament and showed him at the top of several pages, that it indeed says.........."HEBREWS"
The Silent Treatment
A man and his wife were having some problems at home and were giving each other the silent treatment. Suddenly, the man realized that the next day, he would need his wife to wake him at 5:00 AM for an early morning business flight. Not wanting to be the first to break the silence (and LOSE) , he wrote on a piece of paper, "Please wake me at 5:00 AM ." He left it where he knew she would find it. The next morning, the man woke up, only to discover it was 9:00 AM and he had missed his flight. Furious, he was about to go and see why his wife hadn't wakened him, when he noticed a piece of paper by the bed. The paper said, "It is 5:00 AM . Wake up." Men are not equipped for these kinds of contests.
God may have created man before woman, but there is always a rough draft before the masterpiece.
SEND THIS TO SMART WOMEN WHO NEED A LAUGH AND TO MEN YOU THINK CAN HANDLE IT !
المتأكل ليها شنو يا جبريلا يعنى هسى انت العمايل العاملة دى كلها , حالتا بدون تأمل ولد ده !!!!! حنان الخطيب , زميلتنا وصديقتنا الزقازيقية الزراعية تبلغكم تحاياها وتهدى اعضاء هرشة دوت كم النكات الأنجليزية التالية البربور ما معانا فى النكت دى
03-06-2011, 04:36 PM
Hatim Gubara Hatim Gubara
تاريخ التسجيل: 11-14-2006
مجموع المشاركات: 704
Quote: ان دكتور خليل موجود فى امريكا على ما اظن يعنى مثلا دكتور عمر عبد الله فى كندا ممكن يفيد او كمان حسين شنقراى اظن تلفونه موجود فى قائمة سامى عبد الوهاب وهو كان من اللصيقين بى دكتور خليل , علاوة على انه يتردد على كندا مع اسرته
مشكووور ولدنا منص ... معلوماتك جابت عنوان الدكتور خليل في اقل من خمسة دقائق دخلنا على الداتا بتاعة سامي عبدالوهاب واتصلنا على دكتور حسين شنقراي ... وقام بالواجب وزيادة وتقبلوا سلام وتحايا دكتور شنقراي من كندا ...
وشكر خاص لولدنا الجميل سامي عبدالوهاب ... لولا بوست الداتا العملي الرائع لما تم التواصل بين خريجي الزقازيق وخدماته امتدت للاسر خارج البوست ... حيث اتصلت بي هذه الأسرة المقيمة بالإمارات بعد الإطلاع على بوست ناس الزقازيق ... والدخول على بوست الداتا بتاع ولدنا سامي ... واختارو تلفوني عشوائيا من القائمة بحكم إقامتي بالإمارات وتم سؤالي عن دكتور خليل ... حيث تم عرض الامر كما تعلمون بالبوست العام ... ومنصور ربط الخيوط بالحكام وأعطانا طرف الخيط بحرفته شديدة ... وقمنا بالاتصال والتوصل إلى المطلوب بفضل هذا البوست والتواصل الرائع .....
مشكورين ياشباب ... والشكر من اسرة فقدت التواصل بصديقها دكتور خليل منذ اكثر من عشرين سنة ...
03-07-2011, 07:03 AM
زهير الزناتي زهير الزناتي
تاريخ التسجيل: 03-28-2008
مجموع المشاركات: 12241
Quote: زمن الرَّكْشَه! آه يا زمن الرَّكْشَه... زمن الفوضى العَمْيَا و طَرْشَا و زمن الوَهَم العَسْكَرْ فى البلد الغَشَّه بلاد الناس الغَبْشَا.. الناس الجاريه الدَّاقشه شن لاحقين؟ الشُّغُل العاطل وَلَّا الأمل الطَّشَّ؟َ و لَّا سراب المليونات و رهاب العربيات الرَّقشه؟
الموهومين الما شايفين هم وين فى الهَرَم الكَشَّ الكوم الفوق اتركَّزْ و حَشَّ و هُمْ أكوام أُمْ فِتْفِتْ وعَفْشَه ماكلين ألغام و كلام يِنْدَشَّ مغشوشين فى العيش والفول و التِبْشَه و مغشوشين بترول إنْقشَّ و مغشوشين فى حِلْماً راح و انْكَشَّ و مغشوشين فى المويه الزرقا و غَبْشَا و حتى كروت الكهربا غَشَّه
بيوت السكن "الشعبى" العامر غَشَّه بيوت السكن "الوطنى" الفاخر غَشَّه و مكشوشين فى الدِّين البَيِّن كَشَّه و مغشوشين فى حروب و سلام.. و مغشوشين خِدْمَات إلزام.. و جِهَادُم أكبر غَشَّه و مغشوشين جامْعَات أوهام.. قارِيْن الطب فى خلوة شيخ لا معمل لا تشريح لا مرجع لا تدريب لا دَوْشه
و بكره الواحد دكتور و عياده و نَفْشَه و أمسك أقطع كبده و كرشه و فى زمن الركشه لا شايلين هَمْ لى بلد إتفرتق لا شايفين بترول بتدفق لا حاسِّين بالنار بِتْبُق لا هم ضايقين التَّشه مشغولين "رَكْشَات" و "التِيشَيْرْتات" و "الدِيجِيْتالات" و مَلْهِيين "برصيد" و "شرايح" و "موبايلات" و "المِسْكولات" و "بالتشكسات" و "الكافيتيريات" و "المُنْتجَعَات"
و "النِسْكَافَيْه" و "النَتْ كَافَيْه" و "مسلسلات" و "باشا" و "بيه" و مكتولات و مكتولين و هم ساكتين تمكين و شريعه و هَرْشَه و الناس الفوق بانين أدوار.. عاملين أسوار.. طالعين أحرار..نازلين أحرار.. لامعين أنوار خَاتِيْن الخَرْشَه خَالِّين الشارع للفايرين ذى نمل السُّكَّر.. للحايمين ذى ###### الحَر..
و للطايرين ودَّ ابْرق و عَشَّه لو ماشين كدارى تقول ما راكب زول كل الدنيا كُرَاعَيْن مَاشَّه و لو راكبين بتشوف الشارع وَرْشه "الأمجاد" تتراجف ذى القشّه و "الحافلات" فى حُفر المويه قِرِنتى و قِرْشَه و تلقى "جياد" تِتَّنَّّى و ناسْيَه قروض البنك الغَشَّه و الطيبين راكبين خازوق لا هم لاحقين الناس الفوق لا هم بالدخل الشهرى الممحوق
تامِّين أقساط البنك الدُّقْشَه و منهوكين بي "ربا إسلامى حلال" و بنوك الناس الفوق راسمال بفتاوى شيوخ السوق يتوَشَّى مُضاربه مَرَّه و مَرَّه مُشاركه والشيكات تتطاير طاشَّه و مافيا السوق تِتْمَكَّن سرقه و لَطْشَه آه يا زمن الركشه و ما أدراكْ ما الركشه الركشه كُدُنْدَاره و عَمْشَا
تطير و ترِك محل ما تدور فى راس البيت.. فى أقرب خور.. أو فى راس الزول كان قال يِتْمَشَّى سايطه الشارع ذى الكَمْشه بتطلع داقشه و تنزل داقشه و السَّوَّاق بس كابتن طياره.. مَهَنْدَم و آخر حَشَّه و الطبلون مرصوص بالنَّدْ و فتايل ريحه و فُرشه و مَكَوَّم "سِيْدِيهات" بالدُّقشه
الغُنا مصرى و سورى و "زَفَّه" و "دَبْشه" "نانسى العجرم" و "سَيِّد طُلْبه القفْشه" "حماده البت!" يا حليل "الكاشف" و "عَشَّه" و ال"رَيْقِى" و ال"راب" ضاربين الدَّوْشه و العجلات تتراقش رقشه و كرسى الركاب بس أودة نوم فى أحسن فَرْشه و تنزل "فاطنه" و تركب "عشّه" و ماشين وين..اللهُ عليم و قروش من وين..اللهُ كريم لا زول سائل..لا زول مسئول.. لا دَهْشَه
و رِكيشة الهنا - يا كافى البلا- لا نور قِدَّام لا وَرا خَطَرَات..لا فيها مَنَشَّه بالليل وطواط سرحان عميان فى المطره قَعُوْنْجَه تنَطِِّط رَوْشَا ترُش بالطين و باللعنات.. و بالبُنْيات بتْتِم الرَّشَّه و الشارع مُوْلِد و غايب سِيْدُو لا قانون لمرور لا عمود نور لا عبد الظنبور الفالح ياخد حقو و حق الناس الهَشَّه و المسكين العُر خليهو تجيهو الكِشَّه
الراكب يلعن أم الماشِّى و يوم الماشَّه و الماشِّين قادْلِين و أضان الحامل طَرْشا و البوليس بس دَايْر يِتْعَشَّى بى عَصْرَه يخلى الترخيص فى رَمْشَه و بى ربع المبلغ يخَلِّى الدَّقشه "الإيصالات" حركات فَنِّيَّه و الشِّفِت الفاهم يِنْقُشَا نَقْشَه و الناس العَرْضِ و طول كان كتلو الزول مارقين بى بطاقه و خُمْشه
و لو ضابط عَنْقَد ياها الطَّفشَه و لو واحد خَرْخَرْ آخرو الطَّشه و لو أهل الميت طلبوا الدم ما بيلقوا النّتْشَه لا تار لا دِيَّه..لا الواحد قِدِر يتفَشَّى آه يا زمن الركشه.. و زمن "البيت السورى" و "مصرى" مَالا "بيوت السودان" اتمسخت قِبْلى و بحرى..عَمَاره و عُشَّه؟ خلينا "الكِسره" بناكل "بيتزا" و "كُشرى" و "طَقْشَه" وين "الشرموط" و "الوَيْكَه" .. وين "الكَرْشه"؟ آه يا زمن الركشه
و زمن "الدُّكَّان" الأصبح "سنتر" و بقى "للعنوان" إسماً أشتر و اليافطات بالصِّينى و باللاتينى فى بلداً ما فكَّ حروف العربى الطَّرْشَا "عَوْلَمَه" دى؟ أم عالَم خلوهو قُعاد على هَبْشه؟ لا معصوم من "الديجيتال" لا هُوْ حصين من "سوداتل" لا عندو وجيع لا حارس باب لا معروف المارق من الخشَّ آه يا زمن الركشه..
و زمن "السوق الليبى" و "سوق الناقه" و زمن الفاقه..زمان الفاقه و "حمَّام السوق" الدَّهْشه ياللعار! فيك الإبريق بإيجار و جُمَار الناس أسعار و حكومتك تجبى ضريبة الظرطه و تجبى ضريبة اللقمه و رَىَّ العَطْشه و تفتح دفتر للبِتْجَشَّا آه يا زمن الركشه..
و زمن ال"موبيتل" و ال"سوداتل" و "أريبا" خاتياك الرِّّيبه.. و تخْتاك الهَبْشَه شركاتك كِتْرَتْ و "موبايلاتك" مَلَتْ الشارع دَخَلَتْ جوَّه المدرسه..جوَّه الجامع ناس تتكلم فى المليان و الفارغ و ناساً تملا جيوبا و بالمسكين تتعشَّى و الموبايل يكُورِكْ شوفونى محجَّبه شاقه الحِسْ و منقَّبه ما بتدِسْ و مكَهْرَبه لابسه الجينز
و الموبايل آخر لقطه و رقشه آه يا زمن الركشه.. و زمن العِرِس "العُرفى" و عِرْس "المتعه" و "راجل المَرَه دَه" و "بِتْ القلعه" و زمن الشِّقَق الفَرْشَه و ألف لقيط فى الشهر الواحد و ألف فضيحه و كَشَّه آه يا زمن الركشه و زمن "المُوْل" الأجنبى و "الأوزون"
زمن "الأفيون" أولادك فى "عفراء" حايمين و بناتك لا فى المدرسه لا فى البيت قاعدين يا ترى هم وين.. بل وين اليَد الحِمْشَه ؟ آه يا زمن الركشه و زمن البلد الصَّبْحتْ سِتَّه جيوشا "القومى" ده واحد و "دفاعنا الشعبى" اتنين و تلاته "القوات الخاصه" و الرابعه "الشرطه"
و خمسه "الحركه" و من دارفور السَّاتَّه و لِسَّه "القوات الدوليه" ده غير الميليشيات المِيَّه حكوميه و شعبيه و "شعوب" مَنسِيَّه "مَهَمَّشَه" نارا تولِّع و ألفين قنبله موقوته وجاهزه تفرقع و مليون بُعْبُع و مليون غشَّه و آآآه يا زمن الركشه
الفيك الشَّعْبِ انغشَّ..انكشَّ..انقشَّ و ساكت هَرْشَه!!!!!
03-07-2011, 07:34 AM
ميسرة سيد أحمد ميسرة سيد أحمد
تاريخ التسجيل: 09-13-2008
مجموع المشاركات: 3175
التحايا والتجله لكل الزقازيقاب .. نود ان نفيدكم فيما يتعلق بشركة ( اجدع ناس ) للاستثمار فقد تقرر فى مشاورة من المساهمين بالداخل والخارج بتكوين مجلس إدارة مؤقت لتنظيم وتسير العمل فى المرحلة القادمة حتى اشعار اخر .. ويتكون المجلس من (5) اعضاء .. اربعة من الداخل وواحد من الخارج بالاضافة الى مستشار قانونى وتم الموافقة المبدئية على الأتية اسمائهم (مبدئيا):
1- محمد صديق 2- عبدالسلام مكى 3- نهلة نجم الدين 4- صالح عبدالرحمن 5- عبدالدائم سيداحمد ( من الخارج ) 6- عبدالحفيظ عباس ( مستشار قانونى ) هذا المجلس سيجتمع للاتفاق على فتح الحساب والاتصال لتحويل قيمة الاسهم بالاضافة للتنسيق والمتابعة فى المشاريع الإستثمارية المقترحة..
نرجو من الاخوة المساهمين ابدا الرائ والاقتراحات لمجلس الادارة هنا او فى منبر الزقازيق بالاضافة لقروب الفيس بوك ..
--------
وتقبلوا معزتنا وامتنانا
ع /المجلس المقترح - صالح تبلدينا
03-07-2011, 10:11 AM
منصور عبد الرازق منصور عبد الرازق
تاريخ التسجيل: 05-03-2009
مجموع المشاركات: 2360
يا حاتم جبارة هووووى البطولات عبارة عن مجموع نتائج والنتائج , فى بعض المباريات لا مربوطة لا بى اجتهاد , ولا بى لعب واداء انا عارف انو دى مش قاعدة دائمة اها براك جبتا سيرة كورة ارسنال والبلاك كاتس (سندرلاند ) ارسنال , كان افضل من سندرلاند فى مجموع المباراة ولا شك ضاعت منه العديد من الفرص لا لشىء , الا لعدم التوفيق مع توفيق وتألق حارس السندرلاند ولما القون جا , الحكم ابى يعده اها , ممكن النقطتين الفقدهم ارسنال فى الكورة دى يكونوا السبب فى انو ما ياخد البطولة انا معاك انو ارسن فينجر , ما قاعد يدى عامل الخبرة , اهميته اللازمة علما بأن حتى هذا العامل عند ارسنال , مفهومه مختلف خبرة ارسنال دائما لا يتعدى عمرها خمسة وعشرين سنة فابريجاس هو ممثل الخبرة عند ارسنال علما بان الكثير من اندية اوروبا , تلهث وراء خدماته , باعتباره عنصر شاب وفعال التوفيق فقط هو ما ينقص ارسنال طوال هذا الموسم , فقد ارسنال مباريتين فقط بسبب ان الفريق المقابل تفوق عليه فى الملعب واحدة مع تشيلسى فى الدور الأول 2-صفر والتانية تعادل 4-4 مع نيوكاسل فى الدور الثانى كل المباريات التى فقد فيها الأرسنال نقاطا عدا تلك المباريتين , كانت بسبب عدم التوفيق والعكس تماما عند عند المان يو , فقد كسب العديد من النقاط هذا الموسم , لأن التوفيق حالفه عموما الدورى الأنجليزى يا حاتم , دورى المنافسة والمتعة والأثارة وزيك انا اتمنى ان لم يذهب الدورى لأرسنال ان يفوز به اى فريق آخر غير المحظوظين بتاعين مانشستر ديل علما بان فوز ليفربول امس , فتح باب المنافسة للعديدين مرة اخرى
** ان شاء الله احمد ولدى ما يقرأ المداخلة دى , غايتو امبارح بعد قون كويت التالت , عمل فيها ماشى يجيب جلابيتو الجديدة من الترزى !!!!
03-07-2011, 11:13 AM
عبد الدائم سيد أحمد عبد الدائم سيد أحمد
تاريخ التسجيل: 10-28-2006
مجموع المشاركات: 4220
اها يا جماعة عندي خبر بلميون دولار ... افتو ولا شوية كده .... كدي نشوف اول حاجة موضوع الشركة وموضوع الارسنال ... وبعدين نجي للخبارات ... اكيد في حاجة كده فطيتها لسببين ...
وين يا حاتم جبارة ... سلامات
03-07-2011, 07:14 PM
Hatim Gubara Hatim Gubara
تاريخ التسجيل: 11-14-2006
مجموع المشاركات: 704
يا ريس مطعم شنو .؟ عبد الدائم ده راجل ضلالي ومضلل ... صديق الصادق خطب وعايز يتزوج في الفترة الجاية ... كواحد من عمالقة العزاب ... وبذا انهد ركن ركين من قلعة العزوبية ... عقبال اللي بالي بالك ..
03-08-2011, 08:39 AM
ياسر نجيلة ياسر نجيلة
تاريخ التسجيل: 08-30-2006
مجموع المشاركات: 1798
يا زهير لو أخو بت الشيخ داير يعرس و إنت مغترب وحضورك بي ذات نفسك مهم و تقوم تعتزر و تقول بعد ما ينتهي العرس رسلو لي الأولاد!!!! طيب حيكون موقفك شنو تجاهه الأمم المتحدة؟؟؟؟
03-08-2011, 09:05 AM
عفاف علي ميرغني عفاف علي ميرغني
تاريخ التسجيل: 09-10-2009
مجموع المشاركات: 769
شوفى كورال الاحفاد ده كيف جميل ومعبر وبتناول قضية مهمة جدا" نفسى اعرف مين كاتب الكلمات ، البنات السمحات ديل اتقطعوا فى الاداء ذكرونى ايامنا الجميلة وجمعية الثـريا ، كل واحدة فيهن ادت الكوبليه بتاعها بتعبير يختلف من التانية واعمق فى تأثيرو
وين زينب التجانى يمكن تكون عندها فكرة
03-08-2011, 11:18 AM
ياسر نجيلة ياسر نجيلة
تاريخ التسجيل: 08-30-2006
مجموع المشاركات: 1798
عم صوت اجراس الخطر ... كل اركان البلاد ودنت ساعة النصر ... سينضم صوت محمد احمد عاليا زي مهيرة ... لا لنطالب بعيد للرجل مثل 8 مارس ... ولكن لوطن حبيب يسع الجميع ... بدون قيود او تكبيل حديد ولا للتقسيم ورسم الحدود .... وعيد سعيد لصحيبات مهيرة ....
=========================================
Quote: يا زول السودان ده تاني ما بجيهو لو بت الشيخ ذاتها عرست ....
غايتو دي قلبت فيها هبوبا عديل كده ... انتو ابتهاج وين ....
03-08-2011, 11:24 AM
الرشيد بابكر الرشيد بابكر
تاريخ التسجيل: 01-24-2009
مجموع المشاركات: 5002
صبحكم الله بالخير مشتاقين.. غياب قسري...و قيصري كمان... يلاقيك واحد يقطع قلبك يقول ليك لا حوله مالك يا زول كبرت فجأة كده... بعد ساعتين تلاقي واحد يقول ليك ما شاء الله عليك... انت يا زول كنت مقرش (من قراش) ولا شنو... واحد يقول ليك انت مالك سودت كده الظاهر عليك شقيان.. بعد شوية تلاقي تاني يقول ليك الظاهر عليك مرتاااااح لمن لونك بقى أبيض... قدر ما حاولت القى لي تفسير للتناقضات دي غلبني... وأصبحت اتعامل معها بمبدأ أن لا أحبط و لا أفرح... ولكن لم تتزعزع ثقتي فيمن حولي من المقربين... و ما زلت أؤمن بأن المرء مرآة أخيه... و المرأة مرآة زوجها مثلما الرجل مرآة زوجتة... شريطة أن تقرأ التحذير المكتوب على المرآة... مثل التحذير الذي يكتب على المرآة الجانبية للسيارة... (أحذر... الصورة أقرب من الواقع) او عكس ذلك... فالمرأة تعكس لزوجها صورة جميلة طوال الوقت حتى تكتشف خطأها... و يكون نتيجة ذلك أن يغتر بنفسه و يبدأ يلعب بديله ... و عندما تكتشف ذلك تعكس له صورة مغايرة... مثل يا راجل اختشي علي شيبك ...أو انت ما شايف نفسك و لا شنو... بدل أن كانت انت مافي زول بيشبهك و مافي زول بلحقك في الأناقة... و مهما اختلفت المرايا ...و اختلفت أنواعها و صورها المعكوسة... حقيقية كانت أم انطباعية...مقعرة أو محدبة أو غيرها... فليس خير من... امرء عرف قدر نفسه... رحمكم الله...
03-08-2011, 12:16 PM
محمد عيد محمد عيد
تاريخ التسجيل: 05-03-2009
مجموع المشاركات: 2005
بعد ساعات من التنقل بين القنوات الإخبارية ومواقع الانترنت العربية والمراقبة الحثيثة لأسباب التغيير الذي جرى في تونس ومصر وما يجري الآن في ليبيا والجزائر واليمن والبحرين الخخخخخخ..
فقد أطفأت التلفزيون وأغلقت "اللاب توب" وقررت اجراء بعض الخطوات الضرورية مع الأولاد قبل فوات الأوان:
أولاً :
قررت الجلوس مع العائلة لمدة ساعتين يومياً لبحث مشاكلهم و الأستماع الى مطالبهم ورفع منسوب "الحريات" لاسيما السماح لهم بإبداء الرأي حول "فسحة آخر الاسبوع
" وحضور مسلسل "حسب اختيارهم" والتجمع السلمي باي ممر او ميدان داخل المنزل دون أخذ اذن مسبق من أمهم / "الحاكم الاداري".
ثانياً:
زيادة مصروف الاولاد ما قيمته"عشرة" ريال على المصروف ألأساسي بدءاً من الفصل الدراسي الثاني.
ثالثا:
زيادة ساعات استخدام النت من 8 ساعات الى 12 ساعة يومياً وزيادة سرعة النت اتحملها من جيبي الخاص.
رابعاً:
تقديم المتسبب في أكل "2 كيلو موز صومالي" من فوق الثلاجة للعدالة ومحاسبة كل المتواطئين في القضية المذكورة ، و إحالة ملف كرتون "شوكلاتة جلاكسي" لمكافحة الفساد.
خامساً:
التعهّد بضبط النفقات الشخصية كشراء بطاقات الموبايل والجلوس في المقاهي،واجراء إصلاحات اقتصادية حقيقية تخفف من المديونية العامة وعجز الموازنة.
سادساً:
تجديد "أغلفة القماش" في: غرفة الجلوس – الصالون- والستائر ،واستبدالها بأخرى جديدة في مدة زمنية أقصاها ابريل المقبل.
سابعاً:
التعهّد بعدم الترشح لمنصب "رب أسرة" مرة أخرى وإفساح المجال لقيادات جديدة داخل الأسرة وفق قانون انتخابي عصري.
ثامناً:
الحصول على ضمانات شعبية من الأولاد وامهم بعدم تغيير "قفل" الباب فور قيامي بأي جولة مكوكية بين البيت والسوبرماركت. ***
أولادي...الآن فهمتكم.
مواطن عربي
03-08-2011, 12:58 PM
محمد آدم النور محمد آدم النور
تاريخ التسجيل: 05-03-2009
مجموع المشاركات: 1993
بالعكس لم تفهم بعد مراجعة المادة 13 و إلغاء الفقرة (ب) من الدستور إلغاء المادة 37 من الدستور محاسبتك في التعسفات السابقة إرجاع كل الأموال التي إستخدمتها في غير موضعها الأسرة تريد تغيير الدوام بتاعك
03-08-2011, 01:14 PM
محمد عيد محمد عيد
تاريخ التسجيل: 05-03-2009
مجموع المشاركات: 2005
احر التعازى للزميلة عزة عباس واسرتها فى وفاة والدتها
انا لله وانا اليه راجعون
================================== يانضيف ... كورال بنات الأحفاد ... رهيب والله سمعتو بمزاج في البيت ... وكمان فيديو العريس معاهو كمية نكت مبالغة ... غايتو امس ساهرت بي لحدي ما جات مواعيد مباراة ارسنال وبرشلونة الساعة اتناشر بالليل وبعدين نمت قبل ما اخلص الشوط الأول
03-09-2011, 11:24 AM
سامي عبد الوهاب إدريس سامي عبد الوهاب إدريس
تاريخ التسجيل: 11-15-2005
مجموع المشاركات: 1509
سلام لكل الرائعين تهنيئة خاصة لكل نساء الارض واروع نساء الكون الزقازيقيات بمناسبة يوم المراة العالمى . التعازى الحارة لكل من فقد عزيز خاصة عزة عباس ربنا يرحم والدتها ويلهمهم الصبر. صراحة ما عارفة ابدا من وين؟؟ غيابى غير المقصود طال اشكر زقازيقاب الداخل بضيافتهم وترحيبهم لينا وشكر خاص لمحمد صديق لاستقباله لينا من المطار والمديرة شوش من الصالة مرورا بالجمارك ووصلتنا بعربيتها الما خمج( عافيه ليك سا شوش العملها فينى حزام العربية), نهلة نجم الدين والريس معتصم جعفر وبعتزر لعدم تلبية الدعوات اصلا انا نزلت من الطيارة على الحفلات طوالى يعنى ممكن تقولوا على ساوند سيستم .. و اهلى لو وقعت حيطة بعملوا حفلة ما بالكم عرس مخططنى ليه من 6 شهور وتوقيته يناسب كل الاحباب..بالمناسبة دى اهنى فيصل الاقرع ود عمتى وعروسه سماح الصادق وربنا يهنيهم.. تحية خاصة لعزة التجانى والمديرةشوش على الفطور الفاخر والله اول مرة اعرف انه البنات ديل نسوان طباخات كدة ( حياتهم كلها كانت بيض ولانشون) ( ما تزعلوا قصدى زمان) . وكنت عايزة انزل الصور فى الفيس بوك ( لشى فى نفس يعقوب) ونفسى وسناء الصباغ كمان. التحية لزوبة وعارفنك زعلانة ( زوبة قلبها طيب وبتحبنى شديد حسه بضرب ليها تلفون ومتاكدةانها حا تسامحنها) بعد ما كملنا كل الحفلات تتخيلوا حتى جيراناالقدامنا والورانا والفى شارع الستين كل يوم عرس وحفلة يعنى لفيت ليكم الخرطوم دى شارع شارع بيت بيت زنقة زنقة مبارية الحفلات .. بردنا ليكم جوفنا بالايسكريم الابنوسى بالفانيلا نحن واهلنا واصحابنا وليوم مسافرين الجردل ملان شكرا منصور على الايسكريم وتحياتى لامانى والاولاد.. بعد سنين طويلة ما زال صالح هو صالح سعدت بلقائة فى امواج ( بس ما خالط). ماعارفة ايقاعاتى مضطربة امكن لطول الغياب ولا عشان الواحد الونسة كثيرة اعتبروا دى تحية والتمس العزر على الغياب.. راجعة ليكم تانى خليكم قريبين وما تهربوا عارفنى لما برايتى تكون سنينة. ودمتم جميعا سالمين
03-12-2011, 00:12 AM
محمد عيد محمد عيد
تاريخ التسجيل: 05-03-2009
مجموع المشاركات: 2005
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
الرشيد بابكر
منصور عبد الرازق
عبد الدائم سيد أحمد
طارق جبريل
Hatim Gubara
محمد عيد
حنان مجمر
محمد آدم النور
زهير الزناتي
ميسرة سيد أحمد
جلال عثمان
ياسر نجيلة
عفاف علي ميرغني
سامي عبد الوهاب إدريس
نجاة حوفي
فيس بوك
تويتر
انستقرام
يوتيوب
بنتيريست