ده شنو يا جماعة عينى (شديدة البرودة ) عليكم يا احباب اشمعنى يعنى انتفاضات الرؤساء بس , القاعد تنجح عارفين , شكلكم كده , (قمركم ) , لف ورجع مكانه دورتكم الشمسية , رجعت لى مركزها تانى سلامات لى امانى اسماعيل وما تشوف شر ان شاء الله بكور مشتاقين ليهو , لمن متلومين والبادى النور , نصرف ليهو من نفس مكنة بكور عذارى ,عقبال تطفى الشمعة المية محسنة ميسرة , استمتعت بالكلام معاك , يا اميرة انتى ضحى وميار ,الأمنيات ليكم , ان تجضموا الأمتحانات , زى ما (ابواتكم ) مجضمين الدفاتر والحسابات وما سكينها (لمن ما قادرة تتنفس ) (بس للأسف فى حاجات كتيييييرة تانية ما قادرين يمسكوها ) الرشيد بابكر , غير التردد بتاعك فى السلع , وامشى على الهوتبيرد , 11717 , 27500 معدل تصحيح الخطا , سبعتاشر على تمنتاشر , وما تنسى تغير الباسويرد بتاعتك القديمة دى , حاتلقى التحميل عندك , بقى اسرع من جون بولت يا محمدعيد , بالله انت ومجدى كنتو بتمشى العادى , قدر ما حنستو ابى لى , اوعى تقول لى كان معاكم عبده مضوى , زول بايت فى المعادى , البيوديهو يهابش فى اتوبسات الدراسة والف مسكن شنو ؟؟!!برالمة دايشين جنس دوش !!! ياسر نجيلة وحاتم جبارة , يتم تعيينهم , فى مجلس قيادة الثورة الجديدة , فى منصب مستشارين للريس , لشئون الأسرة جابو لى مواضيع مبالغة ياخ , جاييكم يا حلوين عشان الحق اقلع منصب فى (الحكومة الجديدة دى )
* معتصم سلمان جعفر ,هسى يعنى شنقراى البرلمنى ده , انت سنير عليهو ؟؟؟؟ معنى كده انت ما فى زول سنير عليك , الا طلبة عويضة !!! مشتاقين يا راجل يا امير
03-19-2011, 10:53 AM
محمد عيد محمد عيد
تاريخ التسجيل: 05-03-2009
مجموع المشاركات: 2005
Quote: سلامات لى امانى اسماعيل وما تشوف شر ان شاء الله
يا منص جضيم ابهاتن ده خلو ... حمدو في بطنو ... مافي زول شايفه ... اهو الناس سامعين بيهو من زي كلامك ده ... لكن شوف زي البشتنة دي ... عليك الله يا رشيد ومحمد عيد الزول ده ودودهو الضل .... حالة صعبة ... يمين دي فايتة موضوع الجكة بهناك ... اني آمني بهرشة دوت كوم
03-19-2011, 03:00 PM
ميسرة سيد أحمد ميسرة سيد أحمد
تاريخ التسجيل: 09-13-2008
مجموع المشاركات: 3175
من وعينا أنا واخواتي.. يوم 15 مارس دا يوم احتفال وتقدير للحاجه.. كانت بتفرح بي اهتمامنا بي عيدميلادها شده الفرح.. وتعاتبنا لو واحد فينا نسي يقول ليها كل سنه وانتي طيبه.. "يا وله انت عندك كم أم.." "معليش يا ماما.. كل سنه وانتي طيبه.. الله يخليكي لينا.." "أيوه كدا اتعدل.." "أديني راسك أبوسها.." "يا وله بطل شغل الخمس ورقات.."
الحاجه كانت من ما تصحي في عيدالأم.. تدور أغنيه ست الحبايب بي صوت فائزه أحمد.. تتذكر أمها وهاك يا بكاء.. عيد الام بقي كل سنه بيجيني بدري.. يوم 15 تحديدا.. تشاء الظروف.. اني أواصل في خطاها..
التحيه ليك يا ست الحبايب في أعيادك..
ست الحبايب ياحبيبة يا اغلى من روحي ودمي يــــاحنينة وكلك طيبة يــارب يخليكي يا أمي يا ست الحبايب ياحبيبة *** زمان سهرتي وتعبتي وشلتي من عمري ليالي ولـــسه برضه دلوقتي بتحملي الهم بــدالي انام وتسهري وتباتي تفكري وتصحي من الآدان وتيجي تشقري يارب يخليكي يا أمي يا ست الحبايب ياحبيبة *** تعيشي لي ياحبيبتي يا أمي ويدوم لي رضاكي أنا روحي من روحك انت وعايشة من سر دعاكي بتحسي بفرحتي قبل الهنا بسنة وتحسي بشكوتي من قبل ماأحس أنا يارب يخليك ياأمي يا ست الحبايب ياحبيبة *** لو عشت طول عمري أوفي جمايلك الغاليه علي أجيب منين عمر يكفي وألاقي فين أغلى هدية نور عيني ومهجتي وحياتي ودنيتي لو ترضي تقبليهم دول هم هديتي يارب يخليكي ياأمي يا ست الحبايب ياحبيبة
03-20-2011, 06:30 AM
ياسر نجيلة ياسر نجيلة
تاريخ التسجيل: 08-30-2006
مجموع المشاركات: 1798
صادق الدعوات والامنيات بالشفاء للاخت العزيزة سامية اسماعيل اللهم رب الناس اذهب الباس ، اشف انت الشافى لا شفاء الا شفاؤك شفاء لا يغادر سقما
مليون شمعة لبتنا ... عزاري وتمنياتنا لها بعمر مديد لها ولأختها وأمها وأبيها ....
Quote: إذن حان وقت العرس.. نمشي السودان نشوف ليك عريس.. Come on daddy.. don't be silly.. why go all the way to Sudan? Plenty of grooms available here... يا بت ال ك#####.. مسيخه زي أهل أمك..
ود جبارة ... والله انت عايش افلام .... رهيبة بهناك ... ضحكتنا من الصباح ... بالله عليك الله ماتكون حقار مع اولادك ... كما اتمني ان لا تكون طرورة امام بت الشيخ .... اهنيك ... تسنامي جايك ... وحتبقي جد ... قريبا جدا ...
========================================
كنت منتظر ان يلعب فريق الأحمر الوهاج بثوبة الجديد مباراة دولية بعد ان شاهدته يلعب داخليا ... وقد تم له بالأمس ذلك ... انتر كلوب الانغولي .... وفاز ... ولم يخيب ظني ...
وأقولها الآن صراحة ... من يريد أن يقابل فريق المريخ عليه آن يستعد لملاقاة فريقين في آن واحد ... فريق المريخ .... وعصام الحضري ... هدفنا الكاسات السنة دي ... وبذكركم ... ان ربنا مد في عمرنا الدوري ... والسودان ... والأبطال ان شاء الله ....
انا شخصيا لو الوصيف فاز اليوم .... بكرة من الصباح ... ح ابارك ليكم ...
03-20-2011, 07:25 AM
ميسرة سيد أحمد ميسرة سيد أحمد
تاريخ التسجيل: 09-13-2008
مجموع المشاركات: 3175
اللهم رب الناس اذهب الباس اشف انت الشافى لا شفاء الا شفاؤك شفاء لا يغادر سقما
تستعد الأخت / سامية إسماعيل للدخول إلى غرفة العمليات في تمام الساعة الثانية ظهر اليوم ،،،، ندعوا لها جميعنا بالشفاء العاجل والعودة إلى أبنائها سالمة غانمة بإذنه تعالى
03-20-2011, 07:42 AM
عبد الدائم سيد أحمد عبد الدائم سيد أحمد
تاريخ التسجيل: 10-28-2006
مجموع المشاركات: 4220
اللهم رب الناس أذهب البأس عن زميلتنا و أختنا / سامية أسماعيل و أشفها يا الله شفاءاً تاماً ..
اللهم خذ بيدها إلى كمال الصحة و العافية ..
و ألف .. الف سلامة يا سامية و عادل و أسرتكم الكريمة و ربنا يحفظكم جميعاً بحفظه ..
ــ
و ألف مليون مبروك عيد ميلاد عذارى و ربنا يحفظها و أختها و والدينهم و إن شاء الله عقبال ألف شمعة .. و شكراً يا محسنة يا رائعة على هذه الصور الحلوووووة و ربي يحفظكم كوووولكم بحفظه ..
ـ و يا عبدالدائم تاني أوعة تعمل حركة يوم الخميس كويس !!
03-20-2011, 06:50 PM
محمد عيد محمد عيد
تاريخ التسجيل: 05-03-2009
مجموع المشاركات: 2005
كنا في زيارة للغرفة رقم 120 الدور الخامس حيث ترقد سامية إسماعيل بمستشفى الجامعة بجدة ونحمد الله بأنها تجاوزت المرحلة الحرجة وننماثل للشفاء وتشكر الجميع على إهتمامهم وسؤالهم الدائم عنها
سلام يا ناس وردية الليل .
03-21-2011, 07:16 AM
عبد الدائم سيد أحمد عبد الدائم سيد أحمد
تاريخ التسجيل: 10-28-2006
مجموع المشاركات: 4220
Quote: و يا عبدالدائم تاني أوعة تعمل حركة يوم الخميس كويس !!
عصام دهب بقيت حـرامى عربيات على اخر عمرك كمان
يوم الخميس وقفت عربيتى ( مــدورة ) قدام احد المحلات ببنى مالك لما طلعت من المحل بعد 5 دقايق لقيت العربية مافى سألت راجل كبير قاعد امام المحل وين العربية الكانت هنا قال لى انت ما عارف المكان ده كلو حرامية ، ركب فيها واحد وكسح بيها
الناس اتلمت يا زول بلغ الشرطة ، وانت كيف تخليها ( مدورة ) وانت وما انت ...الخ
فى لحظة طلعت الجوال وعملتــ 99 لسه ما تميت الـ 9 التالتة جاء اخونا عصام يضحك وشايل المفتاح ، لما شاف الناس خاف واتهجم .. قال لى قبضا ليك الحرامى ...
رغم زعلنى الا انو اشترى لى كيلو باسطة ولحمة سواكنى وعيش سودانى بـ 3 ريال
03-21-2011, 07:32 AM
ياسر نجيلة ياسر نجيلة
تاريخ التسجيل: 08-30-2006
مجموع المشاركات: 1798
دعاء الصباح :- اللهم إنا نسألك زيادة في الأيمان. وبركة في العمر .. وصحة في الجسد .. وسعة في الرزق .. وتوبة قبل الموت .. وشهادة عند الموت .. ومغفرة بعد الموت .. وعفواً عند الحساب ...
03-21-2011, 08:15 AM
عصام دهب عصام دهب
تاريخ التسجيل: 06-18-2004
مجموع المشاركات: 10401
صبحكم الله بالخير اذا هبت رياحك فأغتنمها فبعد كل عاصفة سكون... أغتنم فرصة التحسن النوعي في سرعة النت للتواصل معكم...
سعدت مساء البارحة بالتحدث الى ود الجعلي و سامية اسماعيل... أعجبتني الروح العالية لكليهما و التوكل و التعامل بشجاعة مع المرض... تحدثت مطولا الى سامية وربما تكون هذه المرة الأولى التي أتحدث اليها... صوت سامية و طريقتها في الكلام ذكرتني بالأخت و الصديقة هويدا أحمد عوض الكريم.. سامية اسماعيل دي شيخه عديل كده..لم أقابل أحد بهذه الروح في مثل هكذا ظروف... ثم تحدثت بعد ذلك الى ود الجعلي الذي اجتهد في أن يتعرف علي من صوتي... فلم تسعفة الذاكرة و لا الظروف و الأحداث الكثيرة في اليوم... حتى أخبرته من أنا فقال لي كيف نجاة ليؤكد لي انه عرفني جيدا... سعدت لسماع ضحكات ود الجعلي و سامية الأمر الذي طمأنني كثيرا عليهما... نسأل الله لها تمام العافية و دوام العافية...
سعدت كثيرا لفوز أبو الهل مساء البارحة فنمت بعدها نوم قرير العين هانيها... في بداية المباراة خفت أن يفسد الهلال ليلتي... أو بالأحرى خفت أن يفسد ميشو ليلتي و لكن الله ستر... بالرغم من النهاية السعيدة الا أن الهلال يحتاج الى اعادة ترتيب....
03-21-2011, 08:14 AM
زهير الزناتي زهير الزناتي
تاريخ التسجيل: 03-28-2008
مجموع المشاركات: 12241
و ألف حمداً و شكراً لله على سلامة أختنا الفاضلة / سامية إسماعيل .. و أجر و عافية إن شاء الله و التهانئ بالسلامة موصولة لحبيبنا / عادل الجعلي و الأسرة الكريمة .. و إن شاء الله الكرامة في رابغ عشان نتلم كلنا هناك ..
Quote: عصام دهب بقيت حـرامى عربيات على اخر عمرك كمان
معليش يا نضيف أنا عارف الخُلعة الدخلتك ما بتمرق بي هين .. و أصل الحكاية يا جماعة يوم السبت الفات أنا كنت في إجازة جاتنا ملح كقطاع خاص بعد مكرمة خادم الحرمين ( يديهو العافية ) للقطاع الحكومي .. طلعت من البيت عشان أمشي أدخل عربيتي الشركة بعيد عنكم تلاجة المكيف راحت في الباي باي بسبب الطين و الوحل في سيول جدة الأخيرة .. مشيت فرع تويوتا في حلتنا ( النسيم ) قالوا لي أمشي فرع تاني عشان جهاز الفحص عندنا برضو راح في المشمش .. الدنيا نصة نهار و السخانة ألف جاءني أمر من القيادة و السيطرة بالذهاب لإحضار مخزون الكسرة من بني مالك .. حاضر .. كويس .. طيب .. دي عشان باقي الأوامر .. في عز السخانة و السموم و الوش المكندك بالرطوبة و العرق أشوف ليك الكامري .. كامري السرور و الخاتر المجبور .. الما خمج ( ما شاء الله تبارك الله ) و أشوف ليك زول جوة طازج و مندي و جددددديد و نضييف تقول فاكنو من الورقة هسة دي ( ماشاء الله عيني باردة ) .. أعاين فيهو و أتأمل ألاقيهو ليك نضيفنا ذاتوو .. الزول جايي من الشغل اليشوفو يقول يا دوب ماشي ( الله بجيب كسافتك لكن برضو ما شاء الله ) .. و عشان أخونا مستعجل ثم ما عايز يقفل العربية عشان ما يوقف المكيف لحظة .. قوووم يا ولد أنزل من العربية و خليها شغالة .. و قوووم يا أنا لما شفتو نزل .. تنقش .. تنقش .. تنقش .. مشيت بررراحة و ركبت ليك العربية لقيتها صااااقطة ( الشيء فريزر !! و اللا تلاجة موز ) لما فكرت أنووم ذاتووو .. أتحركت بالعربية دقيت ريووس و كتلت ليك أقرب ملف في بني مالك و أقرب زنقة زنقة و دغمست العربية زي الما حصل شيء .. أهة مشيت وقفت بعيييد جمب الفرن بتاع العيش السوداني و قعدت أعاين لي الزول دة .. جاء مارق .. أتلفت يمين .. يسار .. أبتسم على شنو ما عارف .. دخل يدينو في جيوبو .. نطط عيونو .. حك راسو .. شال ليهو منديل ورق بدأ يمسح في وشو .. طلع الجوال .. رجعو .. عيونو رقرقت .. أتكلم مع ست الكسرة .. سالت منو دمعة .. الأمة مجتمعة .. أنا في نفسي قلت أرحم سيب حركاتك حبيب روحي يا أبو بلمعة يا نضيف .. بعد شوية أشوف ليك الزول أتفن في سيراميك الله القدام المحل و جاب ليهو علبة مناديل كاملة ختاها قدامو و زي السمعتو قاعد يعزي .. الليلة يا الجابوكي من الوكالة .. الليلة يا الماعرفتي درب الدلالة .. يا الجنوطك ماغنوم الليلة يوم الشوم .. الليلة يا البيجية الليلة كر علي .. و شوية كدة أشوف ليك ست الكسرة نطت من كرسيها و سـ كـ لبت .. حي ووب .. حي ووب .. الليلة يا عشاي .. و الليلة يا الكنت هسة واقف بي جاي .. و جا بتاع الباسطة و بتاع السمك و المغسلة و ناس المطعم و كهربائي السيارات و بتاع التسالي و ناس القهوة .. و الرجال كسروا ليك في البيت ( ياتو بيت ) .. و بعد شويتين كدة أسمع ليك .. وا .. ويي .. وا .. وا .. وا وييي .. وا وييي .. و المايكرفون ( طريق يا راعي الكورسيدا ) (طريق يا شباب ) جابت ليها هلال أحمر كمان ؟؟.. الكلام دخل الحوش .. و أنا صراحة لاوذت .. قلت الزول دة أغمن عليهو عدييل إحتمال الحكاية تتطور !! طلعت ليك من مخبئي اللعين حيث كنت أراقبه و جيت وسط الزحمة فجيت الخلوق .. و وقفت جد .. ياخي أخونا شم ليك ريحة المفتاح .. يا جماعة مفتاح عربية النضيف كيفن بس ما يكون معطر بس .. الزول فتح ليك عيونو بتثاقل كدة و قرب يغني لي فرمالتو بتاعت ( قلبي دق ) .. لكن هو قلبو بيكون فرنب عديييل كدة ما دق و بس .. أهة حق الله .. بق الله .. سلامات أزي الحال .. أجدع ناس .. يتاع .. ثم كمية من النصائح عن عدم ترك السيارة في وضع التشغيل و كدا .. و أخونا شدة ما كان ما مخلوع مع السلامة ما قال لي .. الخلعة الياها .. هو أشترى لي باسطة و أشترى لي نفسو و لي ست الكسرة كمان .. هسة مفتكر أنا أشتريت ليهو .. يا جماعة الزول دة رحمنوووه .. و وحدووووووه ..
03-21-2011, 09:39 AM
محمد عيد محمد عيد
تاريخ التسجيل: 05-03-2009
مجموع المشاركات: 2005
يوم الاربعاء الماضي ... ذهبت الصيدلية لشراء دواء لابتهاج بعد اصابتها بنزلة برد ... وجدت ميزان الضغط خالي ... في كل زياراتي السابقة للصيدلية كنت اتجاهله لاني علي ثقة بانه سيحمل لي اخبار غير سارة ... وانا من الذين لا يحبون سماع الاخبار غير السارة ... كان ذلك سيجعلها غير موجودة ... هنالك شئ ما دفعني لان اجلس علي الكرسي خاصة واني قد وزنت الضغط قبل شهرين وكان مرتفع لحد ما ... عادة لا اشعر باي اعراض لارتفاع الضغط مثل الصداع ... الفتور ... ضربات القلب ... النعاس ... العيون الحمراء او غيرها من الاعراض المختلفة ... استجبت للدافع الخفي ..... وجلست علي الطاولة وادخلت يدي ... وبدات عملية الوزن لاجد ان الضغط 220/120 .... لم اصدق عيني ... وقلت في سري قطع شك ان هذا الميزان به خطا ما ... الم يقل الاطباء ان الميزان الزنبركي لا ياتيه الخطا الا في كسر من الواحد في المائة ... عكس هذا الميزان الرقمي .... الذي لا يعرف كيف يقوم بوزن ضغط شاب مثلي .... كانما سمع الميزان الحوار الداخلي ... قام بتكرار العملية من نفسه ثلاث مرات متتالية دون ان اطلب منه ذلك ... وكانت النتيجة كما هي .... 220/118 وما جاورها من عشرينات ... لم اخبر احد توجهت الي البيت اعشم نفسي بان الامر فيه خطا ما اذ لا يمكن ان يكون الضغط عند هذا المستوي ولا اشعر بشئ انتظمت علي غير العادة في تناول الحبوب ... ثم الاكل مع التركيز علي الشاي الاخضر والكركدي ... ثم جئت يوم السبت مساء علي امل ان يكون هناك جديد ... لدهشتي وجدت ان القياس هو هو ... كل هذه الجهود باءت بالفشل ... قررت زيارة الطيب علي وجه السرعة ... وفي خلال ساعة كنت عنده ... كان في غاية العجب من هذا الرقم الكبير ... مثل تعجبي من حقنة العضل التي كنت اخالها حتي تلك اللحظة حصرا علي الاطفال الصغار ... تجاوزت عن ثقالة الممرضة المصرية ... لان اخلاق المهنة واحدة في كل العالم ... مثل السواقين الباكستان الذين لا يفرقهم عن اخوتهم في السودان سوي اللون ... او المحامين الذين نشاهدهم في الافلام الامريكية ... نفس سلوك محامينا الا ان اولئك يحملون الجنسية الامريكية ... وهكذا الحال بالنسبة لباقي المهن ... حذرني الاختصاصي (كما يحلو لاهل اللغة) رغم يقيني بان اخصائي اسلم واجمل ... من اني ساتبول كثيراً هذه الليلة .... مع تحذير شديد بان احضر له صباح الغد ... (مش 2012 زي ما حضرتك متعود) ... لم اتخيل يوماً ما اني سادلق هذه الكمية من السوائل ... استمر مسلسلها حتي الثانية ... وعند الثامنة والنصف كنت امام غرفته ومعي حراسة مشددة ... وبالفعل وجد ان الضغط قد وصل منطقة التسعينات .,.. وهي قد تكون آمنة او في طريق الامان ... ثم صرف لي حبوب اخري اضافة لتلك التي استعملها ... للحظة غضبت حينما تذكرت باني قد اصبحت مع منصور عبد الرازق في نفس الخانة والعقارين للضغط رغم الفارق في العمر الذي يتجاوز الخمسة عشر عاماً ... الا ان عدلت عن ثورة الغضب ... تلك حفاظا علي الضغط ... وقررت معها ان اتجاوز عن كل التحرشات خاصة تلك التي تتم من الاخ مجد والذي اني علي ثقة تامة بانه لديه نصيب حوالي 20% من هذا الارتفاع ... و15% رهاب الميزان ... لاني هم وزن الضغط هم لا يدانيه الا هم فشل مظاهرة اعد لها الناس كثيراً ... ثم 20% بوستات سودانيز اونلاين التي لا تحمل الا الاخبار السيئة ... والتخاشن اللفظي ... والشجارات التي لا طائل منها .... ثم 20% اكل ابتهاج المحمر والدسم والمملح حيث لا تراعي ان هنالك مريض بضفط الدم في البيت (رغم اني احاول دائماً ان انقل لها احساس اني غير مريض حتي صدقت هذه الفرية) ... حتي كدت اصدق بانها تشارك في مؤامرة ضدي او لا تخاف الترمل حسب جيناتها الجعلية ... ثم 20% لمباريات الهلال التي تم حرماني من مشاهدة من جزء كبير من مباراة البارحة الا بعد ان ايقنت ان الهلال غالب 3 صفر ... الا ان بعض لاعبي الهلال يرفعون الضغط حتي لو كان الهلال فائز 20 صفر (في ذمتك يا منصور كورة سادمبا الطار فيها جوز ديك براها ما تودي الضغط زيادة من 100 بمقياس ريختر) ....
03-21-2011, 09:50 AM
ميسرة سيد أحمد ميسرة سيد أحمد
تاريخ التسجيل: 09-13-2008
مجموع المشاركات: 3175
Quote: الخلعة الياها .. هو أشترى لي باسطة و أشترى لي نفسو و لي ست الكسرة كمان .. هسة مفتكر أنا أشتريت ليهو .. يا جماعة الزول دة رحمنوووه .. و وحدووووووه ..
عفيت منك يا ود دهب لعب على اصولُ أخدت حق الناس كلها دايماً هو ممقلب الناس وضاحك على البرالمة أسأل الكاشف أخوي (جلال عثمان زمان)
مقلب من أبو ديك ،،، يا عيني أنا صعب تكراره يا حريف، يا عيني أنا معليش يا النضيف ،،، يا عيني أنا ود دهب لعبة عنيف،،، يا عيني أنا بالله زغرودة يا ظريف،،،
03-21-2011, 11:54 AM
عبد الدائم سيد أحمد عبد الدائم سيد أحمد
تاريخ التسجيل: 10-28-2006
مجموع المشاركات: 4220
قبل كم سنة كان عندو عربية لونها اخضر تقريبا وقف فى بنى مالك يشترى كسرة برضو جات وقفت قدام عربيتو عربية بنفس الموديل ، زولنا خلص مشترياتو وجاء طوالى فتح باب العربية وركب زوجة الراجل جوة العربية بقت تكورك وهو من الخلعة يقول ليها مالك .. مالك فى شنو
خليهو يجى يتم باقى الحاية براهو
فى خلعة اكتر من كده
03-21-2011, 12:06 PM
طارق جبريل طارق جبريل
تاريخ التسجيل: 10-11-2005
مجموع المشاركات: 22555
اكتر حاجة بترفع الضغط , محاولات شيل حاجات تقيلة مافى داعى ليها تشيل الغاز وانت مجبور , لانو لو مافى غاز , معناتها مافى اكل , لا دسم ولا خالى الدسم تشيل الموية , برضو مافى خيار تانى , لأنو شراب الموية , فى الحر ده , من الواجبات المقدسة لكن البيجبرك تشيل شنب قدر ده شنو ؟؟؟ جرب خففه , ضغطك حا يبقى زى ضغط كفرات العربات البتتلحس فى بنى مالك دى بالغت والله يا عصام دهب مع الزول ده ؟؟؟ قلت لى لغاية هسى ما عارف الأشترى الباسطة منو ؟؟؟ وانتو مالكم بتشتروا باسطة فى الحر ده , ما تحترموا مشاعر ابو الجل ده ياخ الراجل بقى يخاف من الكسرة , تجيبوا ليهو باسطة !!! حمد الله على سلامة سامية اسماعيل يا زقازيقاب وميلاد سعيد لعذارى الحى وكلما اجى اكتب عن سارة the little woman يا يجينى الكفيل , يا يسرقوا عربية النضيف , يا كمان ضغط الزول ده يبقى الف فعلا يا ياسر نجيلة الحضرى اضافة لى اى فريق يلعب ليهو بس يا حات جبارة قولوا لى زولكم ده , يا خسارة قروشكم الضيعتوها فى توريس دى ماكان عليك الله بتجيب ليهو تلاتة زى (راميريز اللعاب ده ) ؟؟؟ راجع ليكم , يا بعد ما اتحلى من المدير العكليتة ده يا كمان لما الزول ده يعرف الدفع حق الباسطة منو ؟؟؟
03-21-2011, 01:28 PM
جلال عثمان جلال عثمان
تاريخ التسجيل: 09-13-2008
مجموع المشاركات: 1735
يديكم العافية ... وكل الامهات بخير وعلى خير وفي خير ونترحم على امهاتنا الراحلات ونسأل الله لهن الرحمة والمغفرة والدرجات العلى من الجنان ...
ونسأل الله ان يتمم على اختنا سامية شفاؤها وان يرجعها سالمة معافية لى وليداتها وبعلها عادل الجعلى ...
غايتو يا النضيف عجبتني ليك جنس عجب ... ياخ برافو عليك والله ياعصام ... ياخ الزول دا لكن ما جهجهت باكاتو ياخ واي انا ... بالله الكامري ... ياخ كانت هنا اسى دي ياناس ياخ دقيقة بس وما لقيتا ... اها وعندك نفس تاكل باسطة كمان اوعك تاني تسيب العربية شغالة وتنزل منها خليك حريص يا اخوي
ابو الزوز .... شوف يا خوي موضوع ارتفاع ضغط الدم دا ما فيهو ااااااااي لعب وما تقول لي ما قاعد اشعر باعراض وكلام فاضي ... انت قايل سموهو القاتل الصامت ليه؟ المهم بجانب المراجعة الدورية مع الاختصاصي (الاخصائي) لابد من ممارسة الرياضة - وخصوصا شايفك يا اخوي "اتبرمت" كدة وعملت ليك "كضيمات" بين الاقواس كان غلبك خلي جبريلا يترجم ليك ممارسة الرياضة (على الاقل المشي) تساعد في الحفاظ على مستوي ضغط الدم ودا ما كلامي انا قبال كدة منصور و الرشيد تطرقوا لهذا الموضوع ... المهم يا اخوي انا خلتى دي والله عزيزة على وما برضى ليها البشتنة وكل يوم سايقة الراجل دا مودياهو الدكتور دحين يا اخوي هوي ما تلعب بي رقبتك وان شاء الله الهلال طاير في السماء وسودانيز في كرعينو ...
03-21-2011, 02:12 PM
ميسرة سيد أحمد ميسرة سيد أحمد
تاريخ التسجيل: 09-13-2008
مجموع المشاركات: 3175
غايتو يا ود دهب ... كيفتنا جنس كيف ... بلغتك ديييك يعني .... كيفتنا في حنانا زاتوووو .... النضيف ده ... زمان مقالبو ابدا مابتقيف ... عجبني ليهو ... واكيد هو الاشتري الباسطة ... حتي دقنو نسي يحلقو ... برغم عيد الميلاد سنة يا أنا ...
=========================== ود الزناتي ... يا اخوي اعمل حسابك ... بعد ده خلي شغل النطيط ... انت قايل نفسك صغير ... يعني حتي لو خمستاشر سنة اصغر من منص ... يعني دخلت الخمسين براحة ... عليك بنصيحة المجريب ... اقصد جلال عثمان ... او اقلب مريخابي ... انا اضمن ليك ضغطتك حينزل 40% الموسم ده ...
03-22-2011, 07:22 AM
ميسرة سيد أحمد ميسرة سيد أحمد
تاريخ التسجيل: 09-13-2008
مجموع المشاركات: 3175
لم يحدث أن فتحت هذه النافذة لعمل مداخلة و عصلج معاي الموضوع كما يحدث معي اليوم... وقفت محتار أطالع أو أناظر شاشة كمبيوتري فلم توحي الي بأي شيء... ثم أخذت أنظر بعيدا عبر زجاج النافذة الأخرى التي أمامي فسرحت في ملكوت الله... عجبتني بشتنة عصام دهب لي ديدو لكن عصام ما أدانا فرقة نقول حاجه... خوفة زهير الزناتي كيفتني على الأخر لأنه كل ما أقول ليهو يا زهير أعمل حسابك.. يقول لي...لا و الله أنا ماشاعر بي أي زيادة في الوزن... لكن برضو زهير ما خلى لينا فرقة نقول حاجة... حتى انتبهت على تلفون من محمد المرتضى فقلت بعد التلفون ده أكيد حتفرج... و برضوا ما فرجت... و لما تفرج النت ما يفتح... المهم انتو ان شاء الله طيبين... و ما عندكم عوجه...
03-22-2011, 10:03 AM
زهير الزناتي زهير الزناتي
تاريخ التسجيل: 03-28-2008
مجموع المشاركات: 12241
صحوت علي غير العادة في الصباح الباكر ... قبل النباه ... لم اجد شئ افعله سوي التفكير وهي الحاسة التي عطلتها منذ فترة طويلة ... رافة بنفسي ... وجدت انني افتقد اصدقائي نادر فاروق ، محمد صديق ، محمد حسن ، نهلة نجم الدين ، زينب التجاني ، خالدة ، رجاء ، عشي ، فارح ، سامي ، نزار ، صديق الصادق ، بودي ، شاويش ، منتصر ، معاوية يحيي وآخرين لم انساهم بل هؤلاء علي سبيل المثال ... كنت ابنهم المدلل ... اذا ما المت بي مثل هذه الوعكة ... تجد وفودهم تغدو وتروح ... تخفف عنك المرض ... الا اني جئت في مدينة لا اعرف حتي شوارعها الرئيسية ولا اميز ناسها سوي بلهجاتهم وبعض ازيائهم .... حتي اصدقائي خارج السودان افتقدت هواتفهم في مثل هذه الحالات ... مكفرين وعارضين كل مساعدة ممكنة .... الرشيد ، منصور ، عبد الدائم ، نجيلة ، موسي والريس ميسرة وغيرهم ... اعتبروني ترساً مثلهم في هذه الماكينة العملاقة التي تنتج اناس لا يعرفون سوي الدوام والكفيل ... والانتباه لشوارع مدن مسرعة تذكرك دائماً بان الحياة قصيرة ويجب اقتناص كل ثانية ممكنة ..... افتقدت حتي هؤلاء الذين كنت اظن باني قد جئت بالقرب منهم ... وكان ظني جغرافي فقط ... لا يطيب خاطري سوي المداخلات هنا وفي الفيس بوك شدت من ازري ... في صراعي المرير مع ارتفاع الضغط والذي لم ينزل للمستويات المطمئنة حتي الآن ... وان كنت اعزي نفسي بان الكلام عبر الهاتف لن يزيد الضغط الا ارتفاعاً .... الا ان هنالك اناس ما ان تري رقم هواتفهم علي الشاشة حتي تشعر بان حالتك الصحية في افضل وضع ممكن ... لم اتعود ان الوم اصدقائي وليس هذا بلوم ... وانما هي خاطرة حب لكل الناس الذين احبهم ... واريد ان اطمئنهم بان الامور تسير علي ما يرام ... واعتقد ان بعض الاشياء التي تزيد التوتر في سبيلها للانقضاء مثل امتحانات ميار قد انتهت اليوم علي ما يرام ... وان الهادي الزناتي قد اقتنع اخيراً بان يغادر ليبيا تحت اصرارنا والحاحنا الدائميين ... وقد يحدث هذا اليوم او غداً كما ان نجاح عملية الاخت سامية اسماعيل قد حسن كثيرا من المعنويات ... وكثير من الاشياء في طريقها لان تسير كما نريد ... وهي اخبار بكل تاكيد تساعد علي تحسن الصحة ... فقط يتبقي هاتف انتظرته كثيراً ... اتمني ان ياتي اليوم او غداً حتي اذهب لمقابلة الطبيب يوم الخميس في كامل المعنويات ... فهل يا تري اكون محظوظاً واتلقي هذا الهاتف ... اليوم او غداً ...
03-22-2011, 10:04 AM
محمد عيد محمد عيد
تاريخ التسجيل: 05-03-2009
مجموع المشاركات: 2005
الاسبوع دا زي الزفت معاك.... حيتسرق موبيالك ... القلب: البتحبو بفكر يديك شاكوش.... لكن كضاب ما بيقدر ... داخل في ضفورو من كبايات الشربات السقيتن ليهو...
الوالد والوالدة اصلو ما بــدورو السعودية والقعاد فيها
امى اى واحدة بتجى تسلم عليها بعد اسبوع اسبوعين تسألها وينك .. تقول ليها والله انا واولادى كنا راقدين بالنزلـــة بعيد عنك .. والكلام ده بيتكرر مع كل واحدة ( حقيقة النزلات وامراض الحساسية كتيرة هنا بفعل الرطوبة العالية )
اها امى بتعوج لينا خشما وتقول لينا هو جــــده فيها شنو بلا النزلـــــة ... برى برى مصطبة الشارع حقتنا ديك براها بالدنيا ...
اما الوالــد لاول مرة يجيهو ( الدغت ) الشهر الفات مشينا راجعنا الدكتور بعد نزلة برد برضو لقينا الضغت مرتفع ... وهكذا كم مرة ... يعنى زى حالتك ومن ضمن الاسباب الدكتور قال ليهو عدم الحركة . جينا راجعين من الدكتور مشى طوالى على الدولاب لملم هدومو وتالت يوم كان فى الخرطوم .. هسه بقى تمام التمام .. حبة اسبرين .. كركدية بارد .. شراب موية كتير
،،،،،،،،
شايف موضوع العربية ده مفرحكم .. انا عربيتى ( مأمنــة ) حتى التغطية شاملة السيول والامطار خلى ناس قريعتى راحت وتلاجة المكيف باظت ديل ينفعوكم ...
رشا كنت فاكرك معايا ..
03-22-2011, 12:59 PM
منصور عبد الرازق منصور عبد الرازق
تاريخ التسجيل: 05-03-2009
مجموع المشاركات: 2360
والله انا زول بليد جنس بلادة فى قصة التلفونات دى !!! من يوم جا الأختراع السمو جوال ده , وانا علاقتى بصنف التلفونات عموما يشوبها توتر ظاااهر المكان الوحيد البتعامل فيهو مع التلفونات بى جدية , لمن اكون فى المكتب لمن ارجع البيت , ما برد الا على جوالى تلفون البيت ده لو قعديرن اليوم كلو , ما بشتغل بيهو بت الشيخ اعتبرت السلوك ده , حقارة عديييل حتى تلفونى الجوال , لمن اصل البيت , فغالبا ما يكون فى ابعد مكان , عن العين واليد دون ان اقصد طبعا يا جوة جيب البنطلون , ويا جوة جيب الجلابية , والزاد الطين بلة , ان مكان الشحن الوحيد المتاح لنوعية جوالى موجود فى ابعد غرفة , عن مكان ما تعودنا ان نجلس والأسرة يعنى لمن يكون التلفون تحت الشحن , فانا زاتى بتكون بطاريتى نزلت من زمااااااان انا ممن تعودوا ان يكتبوا الأشياء المفترض انجازها , فى ورقة ما , او على صفحات التقويم الموجوده امامى على مكتبى عشان كده يا جماعة اى زول احس بيهو هبشنى فى حتة ما اتصلت على ليه , طوالى دموعى بتجرى , وكمان الزول ده يبقى ابو الزوز ؟؟!!! تبرأ انت من الألم , يا ابو الزوز قلت لى قصرت الشنب , طيب ده ماياهو زااااتو الرافع ليك ضغطك ابو الزوز ادانا احساس بانو دخل فى روتين الغربة بسرعة , ودون خسائر تذكر وشابكنا ابتهاج قالت وابتهاج فعلت وابتهاج قالت الغربة طلعت ماسورة اتارى صاحبتا شايل وساكت , اين نحن من حميمية محمد صديق , ومن الهوسبتلتى بتاعت ناس محمد حسن البرلوم وصديق الصادق اها الزول الأخير ده , من كتر الهوسبتلتى بتاعتو , لمن يا دوبو اتذكر العرس اما نحن يا ابو الزوز , دخلنا فى زمرة (المتخشبين ) ودى زمرة المغتربين الواقعين تحت ضغط الكفلاء , لعشرة سنوات او اكثر الى ان تتخشب مثلنا , توقع مننا , كل يوم تلفون والواح مننا لمن يلقى ليهو زول ما (اتخشب لسه ) طوالى يلقى نفسه بيغنى , (الخشبونى منك ) , انا يا حبيب قلبى , سائل دوام عنك
* انتو مالكم كل يوم فاتحين لى موضوع جديد , ما قلنا ليكم دايرين نتكلم عن ال little woman يا خ حاتم جبارة هاك الباسطة دى
03-22-2011, 03:26 PM
Hatim Gubara Hatim Gubara
تاريخ التسجيل: 11-14-2006
مجموع المشاركات: 704
والله بشتنت عصام دهب لزولنا ود النضيف عجبت كل الناس بدون إستثناء يعني 99.99% نافست إنتخابات السودان زاتو،،،،، معليش يا حلو ،،، إتسداها في ولده لمن يكبر
03-22-2011, 08:29 PM
Hatim Gubara Hatim Gubara
تاريخ التسجيل: 11-14-2006
مجموع المشاركات: 704
كالعاده.. ورديه الليل خلاء.. والله ياريس قراراتك طلعت فشنك.. ومافي غيري أنا المخلص.. ملتزم ليك بيها..
نرجع لي "نساءصغيرات".. حقت منص ديك.. قبل أسبوعين تقريبا.. جايب البنات من المدرسه.. فكيت ليك فيهم المقرر اليومي.. كلام.. كيف يومكم الليله كان? عندكم واجب? أدوكم شنو الليله? حتذاكروا شنو? تكرار كدا.. أنا ذاتي زهجان منو.. عموما الكلام دايما بيتطور لمواضيع تانيه.. أو البنات بيقوموا ينوموا من عدم الموضوع.. اليوم داك بالذات جات سيره العرس.. قالوا في بت خطبوها.. علي شلاقتي قلت فرصه أديهم ليكتشر أبوكديس.. عن طريقه الزواج الصحيحه في الإسلام والشرع وكدا.. يا سلاااام زميلتكم دي حتعرس علي الطريقه الصحيحه.. Excuse me daddy, what do you mean? والله يا بنات العرس طبعا بيتم عن طريق الأهل.. أهل العريس بيتقدموا ويطلبو يد العروس.. و..و.. This is so traditional..how would one know if the person is good.. يعني أنا وأمكم ما حنقصر.. حنسأل عن الأهل وعن أخلاق الزول.. والمهم الزول بيراعي ربه وأهله ويكون.. ويكون.. But don't you think that people should get to know each other.. How would they know if they are compatible? صاح.. عشان كدا بتكون في فتره خطوبه عشان يتعرفوا علي بعض.. You mean dating? لا.. لا.. يعني الزياره مثلا بحضور واحد من الأهل وكدا.. I don't think this is what's going on in the muslim world? طبعا حاصل.. C'mmon daddy, we saw people dating in Sudan and Egypt.. حالات نادره جدا.. معظم الشفتوهم ديل متزوجين.. Rare, then how did you and mommy get married? Did you ask her hand in marriage from her parents? في اللحظه ديك أنا بافتح في باب الشارع.. أمشوا ياللا أعملوا الواجب وبطلوا الكلام الكتير.. أنا ذاتي ما عندي بنات بيعرسوا إلا يخلصوا الجامعه.. You started it!
03-23-2011, 04:30 AM
ياسر نجيلة ياسر نجيلة
تاريخ التسجيل: 08-30-2006
مجموع المشاركات: 1798
Quote: Rare, then how did you and mommy get married? Did you ask her hand in marriage from her parents?
كنت زعلان عشان ماعندي بنات .... وزعلان اكتر عشان اغتربت في الخليج ... كنت عاوز بلاد المهجر عشان الإقامة الدايمة والجواز ... لكن انا طلعت محظوظ بشكل .....
================================== زهير يا حبيب ... بكل صدق ... امس استلمت كم مكالمة ... لاني اجزم اكتر من مائة شخص لم يجد فرصة للتحدث معك ... الخط مشغوووووووول لحدي مانمت في الكرسي ....
03-23-2011, 06:37 AM
زهير الزناتي زهير الزناتي
تاريخ التسجيل: 03-28-2008
مجموع المشاركات: 12241
يا سلام امبارح الضفط زاد زيادة من كترة التلفونات يانجيلة .... زي ما قلت لم يسكت الهاتف عن الرنين ... بس تقول استعلامات المطار ... ومكالمات طويلة من النوع القلبك يحبها ... وتذكرك ايام الوداد .... وشئ ايميلات وماسنجرات وديل الانا كمان بحبهم ... يعني الواحد من الصباح ... يفتح المنبر يقول ليك زهير الزناتي لديك اثنين ماسنجر ... اكيد فيهم اخبار حلوة ... لغاية الآن تجربتي مع الماسنجر ايجابية بس امبارح كانت اكثر ايجابية ... فيهم كلام جميل ... وكمان نكات جديدة ... يعني الزول طول ما سمع نكتة جديدة حتي اسالوا الرشيد بابكر حكيت لي اثنين منهم ... متاكد لغاية هسه يضحك .... شكراً لمن اتصل ... وخاصة من كنت انتظر هاتفه فقد اتصل بهاتف طويييييييييييييييييييل .... كان له بالغ الاثر في رفع المعنويات ... وصلتني رسالة لذيذة من الكوتش (وين يا فليكس سلامتك قالوا كهرمانة رفعت ليك ضغطك) طبعا الرسالة ريحتني ليك في حناني لانها بتدعم المجهود الحربي بتاعي .... اها يا ياسر نجيلة تشكر يا حبيب علي المحاولات ... وده برضو ما بيعفيك ... فاضلات زي خمسة نقاط ويعود الضغط الي ما كان عليه ... راجي تلفونك انت وواحد صاحبي متاكد الليلة حا يتصل ... اها نسيت اقول ليكم سيد التلفون الراجيهو منو .؟ ولا اقول ليكم خلوه للحلقة القادمة ... برضو لازم شكرا كتير للريس ميسرة .... فعلا يا جماعة المريسة (من ريس وليس مريسة السكر) دي ما حاجة هينة ... عايزه زول يكون قدرها ... والزول الناس لمن يقدموه قدامهم ما بيكون الكلام ده من فراغ ... عبد الدائم النضيف ... يعني موضوع شكرك ذاته بقي مشكلة ... يشكروه علي شنو ولا علي شنو ولا علي شنو ... يمين عبد الدائم ده ما يمر يومين الا والتالت يتصل يسال ... مش هو الكفيل برضك ... ما طيب ... ياخي الراجل ما بيشبه الناس في كل شئ مختلف ... بس حركة عصام دهب جبـانة ... وانا مع النضيف قلباً وقالباً ... خاصة انه عصام دهب مؤتمر وطني ... ده بيخلي موقفي كمان ايدولوجي عديل كده .... لكن ناس الفيس بوك الهي منهم ...
وبمناسبة المقلب ده بالله واحد يهدينا اغنية حركة جبـانة ... وتكون باوكسترا كاملة
حاتم جبارة ... يمين قاعد استمتع بحوارك مع جكسيك ده عديل كده ... ما شاء الله عليهم ... ياخي نحن ما لقينا فرصة نتحاور مع اي زول ... لا علي مستوي الاسرة ... المدرسة او المجتمع ... دائما كانت الحاجات مفروضة علينا عشان كده لمن نلقي زول بعد العمر ده يتحاوز معانا بنكون متكيفين .... الجيل الحالي جيل رهيب وابن كــلب ومقرم ... ووعي مبالغة ... شوف رغم النشاة في دول مختلفة وثقافات مختلفة ... الا انك بتلقي في شئ كتير مشترك بيناتهم .... يعني ممكن طفل في امبدة يلعب ببلاي استشين زيه وزي واحد موجود في شيكاغو ... زمان الناس طلعت القمر ونحن ما جايبين خبر نلعب في شدّة ... ونستني القمر كل شهر عشان نتونس بالليل علي نورها ... يمكن التقنيات الحديثة دي ما شفناها الا قريب ....وديل اتربوا معاها الحجل بالرجل .... بالله واصل يا حبيب في الحوارات دي واضح انه البنات ديل حا ينقلوك نقلة نوعية وثقافية ... ويحضروك شوية ... صراحة كدي رغم انكم ابوهم لكن ما قاعدين يقولوا ليك يا بابا انت لسه زول بدوي و Uncivilized
03-23-2011, 07:59 AM
زهير الزناتي زهير الزناتي
تاريخ التسجيل: 03-28-2008
مجموع المشاركات: 12241
تقيم الجمعية السودانية لخريجي جامعة الزقازيق .... رحلة اسرية ترفيهية يوم 15 ابريل القادم بمزارع الجامعة بشمبات ... الريس معتصم واركان حربه ... اكملوا كل الترتيبات ... لنجاح هذه الرحلة ... وهي دعوة لكل ناس الزقازيق واولادهم واحفادهم .... بتبرع سخي من الريس معتصم ونهلة نجم الدين ... اختيار التوقيت بعد انتهاء امتحانات الشهادة السودانية .... لنعمل جميعاً حتي تنجح هذه الرحلة واللمة الزقازيقية والا تقل عن تلك التي كانت قبل اربعة اعوام في معرض الخرطوم الدولي ...
يا جماعة في زول شاف موسي عيسي ... يا ابو اجل فتش الراجل ده والمسالة فيها جائزة مليونية ...
03-23-2011, 08:36 AM
ميسرة سيد أحمد ميسرة سيد أحمد
تاريخ التسجيل: 09-13-2008
مجموع المشاركات: 3175
يا من إذا دعي أجاب .. يا سريع الحساب .. يا رب الأرباب .. يا عظيم الجناب ..
============================
Quote: كالعاده.. ورديه الليل خلاء.. والله ياريس قراراتك طلعت فشنك.. ومافي غيري أنا المخلص.. ملتزم ليك بيها.. يا كريم يا وهّاب ..
يا حاتم نحن دعونا لإحياء وردية الليل وأنت أكبر الداعمين لها ولكن ظروف ناس جدة تعني - سامية إسماعيل- لازم بعد العمل مباشرة نضع الملابس الرسمية ونصلي المغرب ونذهب إلى المستشفى ونسهر هناك ، يوم أمس ذهبنا إليها في المستشفى وقالت لي الحرف الواحد (الحمد لله إنكم جيتي) كانت زهجانه وعايش تدردش على الطبيعة مع أي حد لأن الظروف منعت عادل من الحضور من رابغ وجلسنا وساهرنا وإنضمنا إلينا مبارك الكنزي من طلاب القاهرة وكان حضور فاعل في الزقازيق ويعرف كل ناس الزقازيق فرد فرد وزنقة زنقة،،،
أها تشيل ورديت الليل دي لحدي ما يتم تسليح الثوار وتنضم إليك جميع الكتائب.
03-23-2011, 08:54 AM
زهير الزناتي زهير الزناتي
تاريخ التسجيل: 03-28-2008
مجموع المشاركات: 12241
رحم الله الحاجة بت ابو دية.... والوالدة احسان وكل الامهات .... والتحية لكل الامهات الجميلات ... دون فرز ... ما اعظم الامهات ... وما اكبر دورهن في هذه الحياة .... من يعتقد ان الحياة شراكة مناصفة بين الرجل والمراءة واهم .. فالنساء لهن ما يزيد عن ذلك كثيراً ... الا اننا استولينا في غفلة من الزمان علي كل شئ دون وجه حق ....
هدية لكل الامهات
وهذه هدية لامي زينب الانصارية ...
03-23-2011, 09:06 AM
عبد الدائم سيد أحمد عبد الدائم سيد أحمد
تاريخ التسجيل: 10-28-2006
مجموع المشاركات: 4220
يو استارتد ات يا حاتم جبارة فلا تلومن الا نفسك حقيقة الأمر ان موضوع النساء الصغيرات معقد وشائك , فى كل مكان يا حاتم على ان ظروف التربية فى بلدان الصقيع , للبنات تحديدا تكون اكثر تعقيدا كما تفضلت ولكن كون ان بنت الشيخ من جنسية غير (عربية ) غير عربية شنو , ممكن نقول غير سودانية كمان هو واقع , يعقد بعض التفاصيل ولكنه كمان , يسهل تفاصيل اخرى كثيرة يعنى شنو ؟؟؟ مثلا , انحنا عايشين فى بلد اسمها السعودية فى حتة منها اسمها الرياض نحن مشاكلنا فى التربية عموما , يمكن بحس بيها تجى فى الناصية المختلفة , والبعيييدة جدا , من ناصيىة رؤيتكم لتعقيدات التربية للأولاد عموما وللبنات بشكل خاص , وطالما ان الحديث عن واقع نساءنا الصغيرات , خلونا نركز عليهم هنا مجتمعات امريكا وكندا واوربا والغرب عموما , انتم تعانون فيها , على ما اظن , من انفتاحها (الأكثر من اللازم ) بينما واقع مشاكلنا , فى الرياض خصوصا , تنبعث من العكس تماما , اى ( الأنغلاق الفايت حده ) كتير ما يتخيل لى , انو محاصرة مشاكل الأنفتاح الزائد , تبدو اسهل عندى , من محاصرة ومعالجة مشاكل الأنغلاق ومركبات العقد ده مع الوضع فى الاعتبار , ان الواقع القياسى عندى , هو الواقع السودانوى , فى التربية وهو واقع منفتح من وجهة نظرى , مع احتفاظه بجينات المحظورات والممنوعات , بشكل تقليدى , مكون من خليط (مؤسس وقائم على عناصر كتيرة ) اغلبها تقاليدى عاداتى موروث وبعضها دينى صرف البيتبنى على الأول بنقول ليهو العيب والقائم على التانى , بيسموهو حرام وفى النص بيناتهم ,هناك الكثير من المسكوت عنه , من فصيلة ما لوحظ عنه انه قائم على الأثنين معا ودى معظمها منحصر فى حتة علاقات الأسر والأقارب ببعضها البعض (من شاكلة عدم التفريق بين الأخ وود العم وود الخال وود الخالة ) طيب عشان الفقرة دى ما تبقى طويلة , خلينا نقول , برغراف , سطر جديد ,نافذة جديدة وده مراعاة لمن يستخدمون نظارات القراءة , وعشان ما تختلط عليهم السطور , واهو الواحد بالمرة , يشرب النسكافى البارد الليهو ساعة قاعد فى المكتب ده
03-23-2011, 11:49 AM
منصور عبد الرازق منصور عبد الرازق
تاريخ التسجيل: 05-03-2009
مجموع المشاركات: 2360
اولا خلونا كده , نحاول نطرح كم سؤال كده , يخلقوا لينا اساس لنقاش وتبادل وجهات نظر الأولاد عموما , وانا بقصد بيها الأبناء عموما , الذكور منهم والأناث هم اكثر قربا للأمهات , بحكم الفطرة وبالتالى , فان تأثير الأباء عليهم , يتوقف على مقدرة الأب على التقرب منهم بمجهوده الذاتى فهم بالفطرة اقرب لأمهم كما ذكرت , ونجاحك او فشلك كأب فى التقرب اليهم , هو سلوك مكتسب يتوقف على مكونات شخصية , وصفات خاصة , قد تتوفر فيك , وقد لا تتوفر وامهات ابنائنا , اللى هم بنات شيوخنا , هم اناث تمت تربيتهم بوقائع تربية قياسية خاضعة لقوانين الموروث السودانوى القائمة على لست وقوائم طوييييلة , من العيب والحرام وهذه القوائم -من طولها - فانك تتساءل عن قوائم المسموح شنو , من غير العيب , وغير الخاضع لقوانين الحرام وهى للأسف , لا يتم استنباطها استنباطا , وانما قاعدتها قائمة على الأملاء تحت بند واحد اسمه (اخنق فطس ) هذا من ناحية ولكن من ناحية تانية , فان عناصر المجتمع السودانوى التى تضطلع بالعملية التربوية , للأبناء والبنات فيها مساحات واسعة لأشخاص آخرين عدا الأبوين واعنى بذلك , اقارب الدرجة الأولى , وفى بعض الأحيان حتى الدرجة الثانية , فى ظل منظومات اسرية تتسع وتضيق وفقا لقواعد الأسر الممتدة وهذا من حسن الطالع غالبا , غير انها لا تخلو من (مثالب ) يمكن تلخيصها فى تشتت (الرسالة التربوية الواصلة ) وهذا التشتت , يمكن ان يتسع ليصل الى درجة (عدم الأتساق ) ولكن ومع ذلك , فانا من انصار ان اتساع هذه الدائرة له من المحاسن اكثر بكثير مما له من المثالب كما ان للشارع المكون من الجيران انفسهم , دور ملحوظ فى العملية التربوية قد يزيد فى تشتت الرسالة احيانا , غير انه يبقى كذلك وعاءا اضافيا , (لمشارب ) تربوية تثرى العملية التربوية برمتها وبمجرد خروجك من هذه الدوائر السودانية للتربية بفعل خضوعك واسرتك لواقع (الغربة والأغتراب ) فانت تنتقل الى واقع تربوى جديد ومختلف اهم اختلافاته الظاهرة , ان دوائر العملية التربوية , تضيق من حيث واقع الأسر الممتدة , ومن واقع الشارع كذلك الا ان لاعبا جديدا وخطيرا , ينضم للمنظومة , الا وهو (المدرسة ) المدارس فى السودان تلعب دورا تربويا يمكن اعتباره صغيرا , فقط لأن دورها لا يختلف كثيرا عن دور البيت والشارع فافراد المدرسة , غالبا هم اولاد الجيران نفسهم , وهم العناصر المكونة للشارع عموما ولكن ابناءنا خارج السودان , يذهبون لمدارس , السودانيون فيها (قلة ) , كما ان التنوع فيها (اكبر بكثير ) لذا فان دور الأبوين والأسرة فى التربية , واضطلاعه بالعملية التربوية من خلال رصيد معرفى قائم على (العيب والحرام ) يجد نفسه امام تحد جديد ومختلف , ليس له علم باى من ادواتها الا بمقدار احتكاكه بمكونات هذا الواقع الجديد والواقع الجديد ده , مختلف بالضرورة , فى امريكا عند حاتم , وفى مراكش عند طارق جبريل , وفى رابغ عند سامية وود الجعلى وفى جده البحر عند النضيف والريس ومحمد عيد , وفى الشرقية الخليج عند ابو الزوز وسامى عبد الوهاب , وفى بريدة القصيم عند ناس دكتور خالد محى الدين وعاطف القوز , وفى الرياض عند حاج الركز وعفاف , وفى اوتاوا وفانكوفر عند ناس دكتور عمر عبد الله وحسين شنقراى , فليكتب كل منكم تجربته حسب واقعه وظروفه , واضعين فى الأعتبار , ان عنصر الأبناء وطبائعهم نفسه عنصر متغير , مش متغير بس , ده كمان شديد التغير ,حتى انه يصعب على الكثيرين منا ,محاصرته وتلخيصه ووضع خارطة طريق مفترضة له , لذا فان الحكى فى هذا الموضوع , سيشبه (الأسكيما ) , التى كنا ندخل بها امتحانات العملى فى مواد الكيمياء العضوية والمولارية , او جداول (اللوغريثمات ) التى كنا نستعين بها فى حل اختبارات الرياضيات وحساب المثلثات
03-23-2011, 07:32 PM
Hatim Gubara Hatim Gubara
تاريخ التسجيل: 11-14-2006
مجموع المشاركات: 704
Quote: كنت زعلان عشان ماعندي بنات .... وزعلان اكتر عشان اغتربت في الخليج ... كنت عاوز بلاد المهجر عشان الإقامة الدايمة والجواز ... لكن انا طلعت محظوظ بشكل .....
ماك عارف حاجه ساي.. والله البنات مافي زيهم.. حنينات و رقيقات..
Quote: هم عارفينك بقيت الزنداني بعد ما ظهرت الصلعة...
الزنداني منو ما عرفتو.. لكن أقول ليك كلام.. الصلعه من جات كومي قاعد يكبر.. إذن أنا شليق..
Quote: صراحة كدي رغم انكم ابوهم لكن ما قاعدين يقولوا ليك يا بابا انت لسه زول بدوي و Uncivilized
أبوالزوز.. قايلني جاي من أمبده.. بجيكم راجع إنت ومنص لي موضوع التربيه.. أبلع لي حبوب ضغط وقرحه وأجيكم..
03-24-2011, 08:10 AM
زهير الزناتي زهير الزناتي
تاريخ التسجيل: 03-28-2008
مجموع المشاركات: 12241
في موضوع النساء الصغيرات تحليل ممتاز يامنصور لكن أس المشكلة يامنصور ( الحرام والعيب) مع الغزو الثقافي الغربي (حكاية البوي فريند) الواضحة في الأفلام والمسلسلات والتي أصبحت لبناتنا لا مفر منها وخاصة في بلاد(الإنغلاق الفايت حدو دهـ) يعني بقينا شاطر ومشطور وبيتهما طازج كبسولة المسكن للإخوة الذين وضعهم زي حلاتنا إذا البنت وصلت في دراستها ثامن أساس خلوها تمتحن شهادة الأساس أولا تتعامل مع بنات جلدتها وتفهم منهن الكثير ثانيا بتأخذ كمية من المعلومات عن السودان على الأقل تاريخ وجغرافية السودان وممكن تواصل تعليمها الثانوي أيضا لأن الآن بالرياض توجد مجموع من المدارس للمرحلتين والذي يؤكد ذلك ،هذا العام في السفارة بالرياض (إمتحن 120 طالب و إمتحنت 80 طالبة لمرحلة الأساس) اما مرحلة الثانوي يجلس للإمتحان بعد بكرة 256 طالبة و218 طالب وهناك ما يقارب هذا العدد بجدة لانها أيضا مركز إمتحان ، كدي نشوف موسى عيسى ، ممكن يكون محمود الحوري كبير مراقبين أحد المركزين
03-24-2011, 10:14 AM
أحمد إسماعيل أحمد إسماعيل
تاريخ التسجيل: 09-10-2009
مجموع المشاركات: 1375
تعازينا لكل اهل مدنى فى وفاه المغفور لها باذن الله والف سلامه للاخت ساميه اسماعيل
طبعا انا واحد من الطاشين لكن عرفت الدرب خلاص وتحياتى للاخ محمد آدم النور سبحان الله سامع ونستكم لكن ما عارف اصل ليكم كيف وجزى الله خيرا اخونا احمد اسماعيل وكان ماهو والله لهسه بطاقش فى الدروب الشاته
03-24-2011, 10:52 AM
عبد الدائم سيد أحمد عبد الدائم سيد أحمد
تاريخ التسجيل: 10-28-2006
مجموع المشاركات: 4220
الأخ موسى الراجل حمد الله على السلامة انت طاشي من البوست لكن درب القون ماناسيه أمس ما شاء الله قينانك تتلتل بعد ما عادلت لينا جماعتك ما جبنا تايمهم بالثلاثة.
03-24-2011, 11:28 AM
موسي الراجل موسي الراجل
تاريخ التسجيل: 04-30-2010
مجموع المشاركات: 382
البركه فيك يا كوتش رايك يا ابوعمر قون امبارح دا ما بودينا لناس ميسى اصلا قالوا عاين فوق واصلا الواحد مابذكر الرافعين ضغط اخونا زهير عشان ما عندهم كوره و لا احمر و لا ازرق و الاربعه الوان ديك و الله غالب
03-24-2011, 12:33 PM
جلال عثمان جلال عثمان
تاريخ التسجيل: 09-13-2008
مجموع المشاركات: 1735
يا عبد الدائم مبروك التخريج.... صراحة كدي الواحد لقي ناس كتار مخزنهم في الذاكرة وقاعدين ... وفي ناس كتار اتمسحوا ... بس يا عبد الدائم هدي قاسم الزبير دي جابها شنو من المنيا للزقازيق ... بالمناسبة بت جيرانا وناس اهلنا عديل كده .. والي اليوم علاقتهم بيهم ممتدة رغم انهم تركوا كسلا ورجعوا الحلفايا اهلهم ...
03-24-2011, 01:32 PM
محمد صديق محمد صديق
تاريخ التسجيل: 05-03-2009
مجموع المشاركات: 3990
و التحية لموسى الراجل ... الذي اهتدى الى البوست العام أخيرا... مرحبا بك يا موسى...
Quote: التحيه لكل أمهاتنا في أعيادهن.. خاصه الحاجه علويه.. الداسينها في مربع كاي.. يديهم الصحه والعافيه وطوله العمر..
شكرا يا حاتم و لقد قمت بابلاغها تحياتك... ولقد قمت بتهنئتها في مربع كاي لأنها من المتابعات للمربع... بعد أن كتبت عنها عدة مرات هناك... و من قبل ذلك عندما كتبت عن جدتي حاجة أمونة والدة أمي... فرحت أمي كثيرا بذلك و أصبحت تمدني بالمواد و تحكي لي ما لا أعرفه...
03-26-2011, 06:46 AM
زهير الزناتي زهير الزناتي
تاريخ التسجيل: 03-28-2008
مجموع المشاركات: 12241
اتصلت بي صديقة ... لدهشتي وجدتها متابعة لبوست ناس الزقازيق .... وكان مرتكز نقاشها في الاتصال ... هو الحوار بينك وبناتك العسل ... مبسوطة جداً من شكل الحوار ... وحملتني امانة ان ابلغك بهذه الاشادة ... رغم عدم قناعتي بهذا الا اني لا املك سوي ان اوصل لك التحية والاشادة ...
03-26-2011, 07:02 AM
أحمد إسماعيل أحمد إسماعيل
تاريخ التسجيل: 09-10-2009
مجموع المشاركات: 1375
واحد زي حاتم جبارة هاجر إلى أمريكا بس يختلف من حاتم بأن والديه ثقافتهم ثقافة إنقاذية بأن أمريكا أرض الكفر ، كل ما يتصل هذا الإبن بوالديه يقولا له أرجع ما يخربوك الكفار وهكذا ، مرة إتصل على والديه مخبرهم بأنه إتزوج أمريكية الوالد قال : لا حول ولا قوة إلا بالله ، إتزوجت كافرة ثم قال : ياولدي والله مشتاقين لك كثير تعال نشوفك بس ماتجيب معاك الكافرة ، الإبن قال: لو أجي لازم أجيب معاى زوجتي عشان تعرفوها وتتعرف عليكم في الآخر وقت طال حنين وشوق الوالدين لإبنهم قالا: أمرنا لله جيب معاك الكافرة الإبن وصل مع زوجته وكان معاهـ أمانات داخل السودان في أماكن مختلفة ترك زوجته مع والديه وذهب ، الأمريكية وجدت أبو زوجها تعبان خالص فتولته بعناية خاصة كباية عصير صباحية وداك يا الطعام الصحي وشوية تمارين تمشية، الإبن رجع بعد اسبوعين وجد أبوه حالته إتغيّرت قام سأل والده : ها كيف لقيت الكافرة الوالد قال: دي أبدا ما كافرة ، الكافرة أمك !!!!
03-26-2011, 07:21 AM
موسي الراجل موسي الراجل
تاريخ التسجيل: 04-30-2010
مجموع المشاركات: 382
موسي الراجل انت اصلك دائما ضهبان ... ... نصيحتي ليك يا جلال ما تباري الراجل ده بيضيعك انت زول عندك سكري ... موسي عيسي وين يا جماعة ... اتصلت عليهو تلفوناته كلها مقفلة ... يا جماعة ما قلنا ليكم افقدوا لينا الراجل ده .... يعني نعمل زيارة لجلا يجي يفتش صاحبه يا ابو عمر ....
03-26-2011, 07:35 AM
أحمد إسماعيل أحمد إسماعيل
تاريخ التسجيل: 09-10-2009
مجموع المشاركات: 1375
Quote: ربنا ينجح كل الممتحنين.. أها يابوحميد بناتي ديل.. أوديهم يمتحنوا أساس وين؟
الأخ حاتم وناس الدول الغربية زي ما قال منصور الله يعينكم لكن برضو ممكن تفكروا في حكاية المدارس السودانية لأن السودان ممكن يوصل الإمتحانات لسفاراته المختلفة وخاصة أنكم في بلاد الحرية مسموح لكم بفتح المدارس بالطريقة التي تريحكم ، أما نحن برغم كثرة الطلاب إلا انه غير مسموح بفتح مدرسة لاي جالية عربية لأن الجامعة العربية تلزم كل عضويتها أن توفر التعليم دون الجامعي لكل الجاليات العربية ، إلا إننا بالتحايل قدرنا عملنا مدارس يدرس فيها أبنائنا المنهج السوداني ، أخونا دكتور حسن إسماعيل جاب إبنه من خارج الرياض مسافة تزيد عن 400 كلم إمتحن أساس قبل سنتين وهذه السنة أحضر بنته جلست لنفس الإمتحان.
03-26-2011, 09:14 AM
ميسرة سيد أحمد ميسرة سيد أحمد
تاريخ التسجيل: 09-13-2008
مجموع المشاركات: 3175
من متين ليكم لما تسمعوا بحفلة بتعملو فيها الاولاد تقااال غير زهير وحاتم وجلال زول بارك لينا عيد تخرجنا الـ... مافى يمكن عشان ناس تمت ربع قرن ما عاوزة تجيب السيرة
يا جبارة حكمة حسن برى دى من بعد ما صرفو لينا كتيب التخريج ونحن بنتناقش فيها ..
يا زهير هدى قاسم الزبير هى ابنة عم عبدالله الزبير ولدنا ....
،،،،،
رحم الله السكرتير الاكاديمى للاسرة الزميل نجم الدين على ابراهيم / قسم بيولوجى
كما لا يفوتى من ذكر بعض الزملاء ( دفعة ) تأخرو عنا لاسباب اكاديمية ولكن شاركونا الفرحة يوم تخرجنا : سارة سايمون طابو كاجى عاطف خليفة عجيب راشد احمد راشد احمد انجليزى طارق بابكر صالحة بيولوجى راخية الحسن محمد عثمان على عبدالمعروف عباس جبر الله سميرة عبدالرحمن عبدالصادق هاشم تيسير حسن خليفة محمود حسين سعاد عبدالرحمن الصادق صلاح الدين السنى بورسودان فضل المامون
03-26-2011, 09:30 AM
موسي عيسي موسي عيسي
تاريخ التسجيل: 05-03-2009
مجموع المشاركات: 1905
الأجازة المدرسية البتجى فجأة دى , لذيذة جنس لذاذة !!! ردود افعال الأولاد والبنات , لمن تقول ليهم بكرة مافى مدارس ردود تستغرب ليها فى الأول , لكنك لما تتأمل فيها تلقى نفسك كنت بتعمل ازيد منها بى كتيييير امبارح بالليل , اجتاحت الرياض عاصفة ترابية فظيعة يعنى ببساطة كده وانت سايق فى الشارع , بتشوف الأنوار العالية بس تانى لو شفت اى حاجة فى الدنيا , فانت وزرقاء اليمامة , اخوان لزم رجعت ليكم البيت الساعة حداشر باالليل , ناس البيت ولا جايبين خبر الكتاحة البرة وطبعا يوم الجمعة ده اصعب يوم فى انصياع الشباب لمواعيد النوم والتقيد بها بت الشيخ بتكون ماسكة عصايتا وساكاهم , ولو انا اتاخرت , بعاين للتلفون لو رن لو بت الشيخ , بعمل اقنور طوااالى , عشان انا ذاتى يمكن اسمع كلام ما ياهو من نواتج انفعالها من مساككة الجماعة امبارح وصلت قبل ما تلفونى يرن حجازى وايثار ومجتبى , عاملين فيها نايمين , لكن صوت الضحك المكتوم واصل لغاية خشم الباب , وده حالته مكتوم طبعا احمد عامل فيها كبير وخارج المنظومة , مازالت سماعاته فى اضنينو , ويبحلق فى اللاب توب يا امى خالتو هاجر (اخت بت الشيخ الفى امريكا ) , معاى فى الفيس بوك بتسألنى لو انت لسه صاحية , قلت ليها أيوة وفعلا بمجرد ما خلص كلامه جرس التلفون الثابت رن وصوت الضحك المكتوم , ما يزال يصلنى مع انه مجرد ضحك مكتوم لمن دخلت عليهم وقلت ليهم انتو لسه صاحين يا اولاد ؟؟؟ارتفع صوت الضحك فصار (قهقهة تشبه الحشرجات من محاولات كتمها الفاشلة والمستمرة ) مدرار طبعا صااااحية , وهى خارج منظومة اطاعة الأوامر , لأنو ببساطة لا فى زول بيقدر عليها ولا شيتين الله قال بى قولك لو حاولت فى لحظة (عنفوان ) تعمل فيها فيها راجل و(ابوها ) وتنهرها وتقول ليها ات از تايم تو بيد بتديك فى حنانك طوالى , عشان كده طريقة السيطرة عليها العملية الوحيدة , هى اعتبارها غير موجودة اصلا , واطفاء الأنوار والأستغناء القصرى عن متابعة (حصاد اليوم الأخبارى ) والحسرة مالياك الساعة القلت ليهم ممكن تصحو ليكم ساعة تانى لأنو بكرة اجازة ملأ الصراخ الغرفة , وتشتت البطاطين , حتى كادت هاجر ان تطلع لينا من التلفون الكانت بتتكلمه مع اختها من امريكا يا ربى الناس ديل بيحبو الأجازة ؟؟ ولا بيكرهوا المدرسة ؟؟؟؟ علما بأن هذا هو السبت التانى على التوالى , الذى يستمتعون فيه باحساس الأجازة المفاجئة , ويوم السبت كمان الصباح كنت بتكلم مع صديقى وقريبى فيصل عبد الغفار وحكيت ليهو الحكاية استلقيت على ظهرى من شدة الضحك عندما حكى لى ردة فعل ابنه الصغير (نبيل ) على نفس هذه الأجازة قال لى امبارح نمنا بدرى دون ان نعرف خبر الأجازة صحى الجميع صباحا فى موعد المدرسة المعتاد اعتادوا ان يكون نبيل آخر المستيقظين بعد ان يفضى الحمام من زحمة الصباح المعتادة لغاية ما اخوان نبيل جهزوا تقريبا , جاهم تلفون من اخو فيصل وراهم خبر الأجازة تعال شوف الكواريك , قام نبيل صحى على الصوت العالى , فى شنو يا جماعة الليلة اجازة فيصل قال لى لمن نبيل ده (تسعة سنوات ) قعد فى نص السرير زى القرد , رافعا سبابته الى اعلى فى وضع التشهد وهاتفا بصوت عااااالى , الله اكبر الله اكبر انا لمن خفت انو نفسى ينقطع من كومة الضحك الدخلت فيها بالله نبيل ما بالغ ؟؟؟!!!
03-26-2011, 09:38 AM
ميسرة سيد أحمد ميسرة سيد أحمد
تاريخ التسجيل: 09-13-2008
مجموع المشاركات: 3175
ازيك يا ابو عمر احمد اسماعيل كده اديتنى خيط جديد استمر بيهو فى الكلام عن النساء الصغيرات الشغلة شغلة تربية زى ما قلنا ولمن تكون بيئة المدارس سودانية الطابع , فاكيد انت بتوفر بيئة طبيعية لى بتك ولا ولدك بس انتبهوا لوصف طبيعية ده , لأنو معناهو توفير بيئة متسقة مع بيئة التربية لأبناء السودانيين الباقين دون ان اتجرأ وازعم ان هذه البيئة هى المثال الأفضل لبئية التربية المطلوبة بس فى الحالة دى , بنتك او ولدك , لو قدر ليهو يرجع يحيا حياته فى السودان تانى حايكون متسق ومتصالح مع المحيط العام , ليس بالضرورة ان يكون ناظرا اليه من (فوق ) باعتبار انه نتاج بيئة افضل ولا من تحت , باعتباره نتاج بيئة اقل حاتم جبارة فى اسرته عنده ادفانتتج باعتبار ان محصلة التربية عنده , نانجة من بيئات (هجينة ) ودى فى وجهة نظرى , اذا تمكنا من السيطرة على الأسس (المتفق عليها ) ودى مسألة السيطرة عليها ساهلة باعتبارها تدخل ضمن شروط الأختيار للزوجة (من الأساس ) فانه وبعد ذلك , وبوجود الحوار المستمر العلى شاكلة الحوار الجاب ليهو معجبين (بتاع حاتم ده ) وخاصة فى حالة البنات , باعتبار ان الأبناء جميعا اقرب لأمهاتهم تربويا , خاصة البنات فانه فى وجهة نظرى , ان الجرعات التربوية التى تصل للبنات من ابواتهم -فى حالة حاتم تكون فى حاجة لتفكير مسبق منه , كما انها تحتاج الى تفهم اكبر فبعض ما تربى عليه حاتم نفسه انه من الممنوعات والمحظورات حتى فى الحديث والأشارة يتحتم على (حاتم ) ان يوزنها بمقياس وزن جديد , لا مانع ان يخضع هذا الميزان , لبعض (وحدات القياس القديمة المخزنة عنده ) ولكن ليس بالضرورة ان يخضع لها كلها وهذه مهمة كبيرة يا حاتم , وشائكة كمان , وذات ابعاد مختلفة جدا , وبعض مرات عاوزة استشارات عديل تعرف انا بعد مرات , بتفاجأ بى (اشو ) معين مطروح للنقاش بين بت الشيخ وبنتها (مشروع الللتل ومن ذات الأربعة عشرة ربيعا ) انا بيكون رايى فى الموضوع المطروح , ماشى فى اتجاه معين , قد يكون فى بعض الحالات مختلف تماما عن اتجاهه عند بت الشيخ لمن اتلمس اتجاه نفس الموضوع (عند سيدتنا الصغيرة المشروع ) , احس مبدئيا , انها تتجه باتجاه اقرب لأتجاهى ولكن ادواتى فى نقاش ذلك ( الأشو ) , بلقاها قاصرة جدا يا حاتم , وما مكتملة بجوانب (خبرة حياتية ) فاقول كلاما اقرب للتنظير ولكنى لمن القى سيدتنا الصغيرة مشت فى اتجاه رأى امها -بعد مضى بعض الوقت - بسلاح الصمت احيانا , وبى سلاح الأقتناع الكامل احيانا اخرى لمن احتار زاتو , والمواقف الزى دى علمتنى ان اقول رأيى , دون ان اتمسك به وبينى وبينك , بعض مرات بقيت انوم بى رأيى عديييل اها الحتة دى , عند حاتم جبارة , محتاجة تفهم اكتر من حقى ده , بى مليون مرة كده جوانب كتيرة من جوانب التربية , اتمنى ان نتحول فيها الى ( خواجات ) وجوانب تانية , اتمنى صادقا فيها , ان نرجع الى احضان الريف المافيهو لا تلفزيون ولا كمبيوتر عشان اولادنا وبناتنا يتشربوا بيها انا شخصيا محتاج لتبادل اراء كثيف وفعال فى الحتة دى فقناعتى , ان رجال الشرق , لا يعرفون مكنونات صدور النساء , الصغار منهم والكبار الا القليل اليسير , ولا شنو يا جماعة ؟؟؟!!!
03-26-2011, 10:34 AM
زهير الزناتي زهير الزناتي
تاريخ التسجيل: 03-28-2008
مجموع المشاركات: 12241
ما شاء الله ... ما شاء الله تقراء بلحن حاجة كولن كولن . .. عيني باردة وسبت اخدر ... لانو اجازة زي ما قال منصور وما ادراك ما اجازة وما ادراك ما منصور زاتو ... انا من الله ما خلقي ما لاقني زول قاعد "يجلع" الكلام زي منصور دا اي والله جلع عديل كدا ... وحيا الله اخونا كشاح فهو صاحب التعبير حتى اسألوا عبدالدائم ... ولا ازيع لكم سرا بأننى صرت افتح باب الحوش بتاعنا دا الساعة واحدة ظهرا بتوقيت الرياض .... ليه ... ليه لانو والله منصور بكون اتداخل ووضع ليك خارطة طريقة لن تجد صعوبة من التداخل بعدها.... لانو منص بكلامه السلس "الجزيل" بكون وصل ليك كم فكرة كدة كانت غائبة عنك او قل لم تكن في الخاطر ... لذلك لن تدبرس ابدا بعدها وتقوم طوالى تضغط على ايقونة رد وتقوم تنداح وحيث ان ابو احمد عودنا على انو "يجلع" ليك مداخلتين وراء بعض اها بكون وصلك قمة الاندياح ولن تجد للدبرسة سبيلا بعد ذلك او قل لن تجد لك الدبرسة مدخلا بعد ذلك ... حياك الغمام ابا احمد
موسى الراجل ... الاربعاء معاكم طوالى ... وكدة ايا ابو رداء موسى عبسى: شرفت والله والرياض نورت يعنى ما كلمتني بوصول العيال . .. .. بجي راجع تاني الليلة ما اجازة وكدة
03-26-2011, 11:35 AM
زهير الزناتي زهير الزناتي
تاريخ التسجيل: 03-28-2008
مجموع المشاركات: 12241
طيب الونسة لذيذة ومتشعبة ... يا عبد الدائم مداخلتك بتاعت الناس الرصيتهم ديل ما موفقة خالص .... يعني ده شيل حال عديل ....
اها بالنسبة للاجازة ... طبعا قبل الاجازة العجاجة دي مفاجاة لينا عديل كده ... زمان انا قايل الغبار ده في السودان محصور علي مثل عطبر الخرطوم كسلا ورياح الهبباي ... الا امبارح آمنت عديل بالغبار ... ده ياخي اصلي بلاده يعني السعودية دي ممكن الزول يقول انها ماسورة عديل كده ... حاجاتها كلها زي السودان ... المهم كالعادة الصباح الجماهير صحت ولقت ليك الدنيا بره خلا ... جوني يا والدنا اتصل بناس الترحيل ورينا الحاصل شنو ... عرفنا الاجازة بعد سبعة الا عشرة ... اها الجماعة اتكيفوا شديد .... بس نحن عندنا ميار حالة استثنائية ... الاجازة دي بتزعل منها ... ما شفت لي زول يحب المدرسة زيها .... طبعاً هي المسئولة عن الصحيان بدري وظبط المنبه ... وما اليه ... يوم نامت وصحت متاخرة جداً .... جات صحتني قالت لي يا بابا الترحيل فاتنا قوم وصلنا المدرسة ... قلت ليها يا ميار العربية مع معز خالك في الجرافة ... قالت لي اتصلت بيهو قبيل وهو جاي في السكة ... طبعا انا كرهتي في الدنيا اصحي بدري ... قلت ليها والله عقوبة ليك حقو الواحد ما يوصلكم الليلة المدرسة تنومي كيف وما تصحي ولا تصحي اخوانك ... قالت لي ما مشكلة بمشي بكرعيني وانشاء الله احضر الحصة السابعة ... لاحظوا انه المدرسة كانت في الحارة الاولي بشارع الشنقيطي ونحن قصاد الحارة 21 و 19 بالوادي ... لكن باقي الشباب يتكيفوا جدا للاجازة .... بعدين نجي راجعين لقصة النساء الصغيرات او الليتل ليدي كما قال منصور ... ياخي ده موضوع جميل وشيق ... والناس محتاجه تتناقش فيهو باستفاضة ... وتتبادل فيهو الخبرات ...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
منصور عبد الرازق
محمد عيد
عبد الدائم سيد أحمد
زهير الزناتي
ميسرة سيد أحمد
Hatim Gubara
ياسر نجيلة
الرشيد بابكر
عصام دهب
مني يونس
طارق جبريل
جلال عثمان
سامي عبد الوهاب إدريس
أحمد إسماعيل
محمد صديق
مشاعر بدوي
موسي عيسي
فيس بوك
تويتر
انستقرام
يوتيوب
بنتيريست