ولمن فاتهم الاستماع .....

Quote: ود المهدي ، جورج الدين صباحكم زين أنا الطفشني من الدوبيت واحد يقولولو حسين ، من جماعة شرق النيل ، مما تكون في ليلة ثقافية او شي من النوع دا ، الا انبرى لها ، و مد قدومو ، و بصوتو المجوجو : الولد البخاف من القبيلة تلومو خلف ساقو فوق تيسا سنين قدومو أعادني بقوة للدوبيت ( الامين البنا ) ، صوتو ملين شجن و مترع بالعذوبة ، ورضعو ني من اماتو : يا فتنة غرامك في العزيزة تلفنا سيف حبك يكبر فينا ما جلفنا في رمضان القبل الفات ، كان في برنامج بتاع دوبيت ، بجيبو فيهو واحد اسمو زهير ، الساعة اليعوج رقبتو و يغطي اضانو ، تعال شوف العجب ، يجدع الدوبيت دا زي الشي الكعب. جنب الجامع الكبير في الخرتوم لقيت ديوان ( ود ضحوية ) ، الكلام صعب جدا ، احترت في الخيط الرفيع الذي يربط العشق مع الفروسية ( انا كنت متخيل الحب يخلي الزول شوية كدا فيهو عود عشر ) يعني زي حالات ناس قيس و الجماعة ديل ، افندية و كدا . في سوق كسلا لاقتني (كارا ) مكتوب في ضهرا ( غناي كان سويتو في عود كان خدر ملا الواطة ) الكلام عجبني عجب شديد ، و شميت فيهو ريحة الشايقية ، سالت واحد من جماعتم عليم ، افتاني ، قال لي دا واحد كتب سلسلة من القصايد كلها تحمل اسم (عابرة ) و طبعا ست الاسم واحدة ، القصيدة اياها ايتدرها ب.. لا آسف و لا محزون علي العمر القضيتو معاك و جاء في سياقها ( الحتة بتاعتي ) غناي كان سويتو في عود كان خدر ملا الواطة و ما كان الزمن طاطا و اتحدر وقع واقود حاجة زي كدا ( ود المهدي خصمتك ) كان تقص لي اتر الزول بتاع عابرة دا ، و تجيب لي خبرو ، و تجيب لي القصيدة دي كلها ن انا عارف ما بغلبك . الشي التاني محيرني يا جورج وود المهدي ، انت الشايقية ديل يبكو الضحي الاعلم ، و عديل كدا يصرحو ، و يقولو اسم الزول كفاحا ، و موش كدا و بس ، كمان يغنوهو و يرقصو عليهو ، و يوم واحد ما سمعنا في زول كتلو ، القصة شنو . قفلة قال الشاعر ( ما عارف اسمو منو ) سالت (سعيدا بن المسيب ) هل في حب لمياء من وزر فقال كلا ، انما تلام على ما تستطيع من الامر قال سعيد بن المسيب ( وهو العالم و الفقيه المعروف بالمدينة المنورة ) و الله ما سالني ، و لا افتيته.