خستكات جنوبيين في الشمال...

خستكات جنوبيين في الشمال...
خستكات جنوبيين في الشمال سلام تاكم يا ناس تا سودانيزاولاين... دا اول بوست لى معاكم هنا ... أها عاوز احكى ليكم بعض المحن و الشقاوى التى تواجه الاخوة الجنوبين (على غرار الاشقاء المصرين ,كما جرت العادة على لسان الفريق القومى السودان) فى شمال السودان...وهى من جنس المحن و الطرائف المضحكة والمحزنة فى الوقت نفسه . لكن ما يا هو واقعنا بقى فيهو شنو غير الضحك فى صيوان بيت البكاء السياسى و الاجتماعى والرياضى الذى تاسس عام1956 فى مقرن النيلين—الابيض والازرق—شفتو القرن بين الابيض والازرق دا كيف...تقولي شنو ومنو ...؟ والمويه مخلوطه ابيض بالازرق-زى العنب والتين-غايتو الله غالب. هو صحى ليه مافى زول فكر يفصل النيلين ديل ولا ما قابلة للتفاوض دي...؟؟ شايفين الفياقه ممكن تودى لى وين من التفكير-فى زمن التكفير والهجره...؟.آآآآآه انسى يامان. هاكم الونسة دى -و شر البلاوى مايضحك كان ضحكتم-. يازول كنا مرة مجموعه من اولاد مونج فى حفله(زاايكو)فى اركويت —وكت الجالدونق شيخ الترابى داقى النقاره حقت المشروع القال حضارى داك- وفى عز الهجيج والطرب,جى بوكس مليان جماعه لابسين ملكى وشالين كلاشنكوفات فى كتوفهم ونزلو ليك قالو عاوزين يطرشقو الحفله.وكان فى سكرتير جامد اسمو جالشم-وجالشم عندنا فى للغه الشلك اسم يطلق على الرجل الاكول,انتو بتسمو اشعب مش...؟،المهم جالشم قال ليهم عاوزين شنو يا ناس انتو...؟ قالوا ليهو انت ماعارف انحنا ناس منو...؟ قال ليهم ماتشرفت بيكم لسه... قام واحد -شكلو الضابط- مدى ليه البطاقه -الكارنيه-. صاحبك عاين للكارنيه كويييييس ورجعوا للضابط وقال ليهو والله اتشرفنا يامعلم...لكن نكون واضحين ياجك الدخول هنا بى كرت مابى بطاقة اوكى ...وفى ناس جوا هنا عقيد وعميد وللواء كمان؛اي واحد لما دخل دخل بى كرت مابى كارنيه كويس معاك....؟احسن تشتت قبل ما اطلع ليك كارنيه بتاى واوريك حركات جيش هنا للصباح ياملكيه انتو ومافارق معاي اللقوويا – الجكسوية للماعارفين- بتاى المعفنه ظاتو ماجا الحفله.والله نونسكم ونسه لمن تعرفو حاجه. مره تانيه برضو كنا ضاربين شم النسيم فى القرين فلج ونفس نوع الناس المتخصصين فى طرشيق الحفلات جونا هناك يا عمك..........قالوا عاوزين تصريح الحفله والجماعه عارفين ممكن تحصل خستكه من النوع دا فكانوا جاهزين يا عبد وطلعوا ليهم التصريح وكدا... يقوم واحد فيهم يقول خلاص طيب طلعوا لينا بناتنا الجوه الحفله معاكم هنا. يقوم جون دى—اظرف زول الله خلقوا فى الحفله-ويسالهم ياناس ياتو بنات بتاكم هنا معانا...؟ قام الظابط قال ليه اى بت احمر فى الحفله هنا تتطلع بره ..!! قام جون دي قال للبنات الشكل منقة اطلعوا بره الحفله امشوا معاهم ... ياعبد البنات دقو ا ليهم جنس جرس لمن دورها معاهم بلنجات وهوكات زى السم والعبيد الكبار واقفين يكشفوا ساى - زمان لو كان ختيتو الرحمن فى قلبكم واشتغلتوا صاح مع العبيد ديل كان زمان انتهينا من وهمت المشاريع الحضارويه-المرقتنا فى سقط لقط. وفى يوم كان الجالدونق لام اكول شغال ندوه فى قاعه الشارقه بمزااااااج عن التعدد - السخافى والاسكافى — وجنس الكلام بتاع الناس العاوزين يقعدوا فى الخرتوم الانتو عارفنه داك- اها بدت فرص النخاش- عفواً النقاش- لمن توجد لديهم مواصلات بعد العرض ومن ذو الوزن الثقيل حملت - الديك توراة- الغير مطعون فى نسسبها العلمى ومافيها عرق ولو دساس - حسب دكتور يوسف فضل قال مابدى اى فرصه نقاش لزول قاعد يكسر فى الكتب تحت النيم والحصحاص جمب الآفرويشن ---هو ياجماعه الناس الافروو.وكمان ايشان ديل ناس منو فى السودان... ؟ سؤال لله دي على وزن اطلبوا العلم ولو فى الشين... المهم قامو ادو الفرص لعمك ابو عمه- تقول لترباس اقيف طرف- ,وقال لي لام اكول انا والله نفسى اعرف موت ليه انتو الجنوبيين ديل بتتكلموا بالانجليزى فى اى حته نلقاكم فيها...؟ وكان لام بتكلم بالعربى لكن وكت تروح عليهو كلمه بالعربى بقولها بالانجليزى-زى الفادريشن والكونفادريشن والراندوك الفيهو ايشن بتاع الجماعة الفاهمين داك يا جن... المهم لام اكول قاليهو ياخ فى الكلام السمح القلناهو دا كلوا مالقيت ليك فيهو اييييي حاجه كويس ولا انت ما فهمته اننيينا قولنا شنو....؟ طيب اوكى نجاوب ليك—اصلا نحنا مارقين للغلاط بتاع انفصالى ولاما انفصالى وانت ضد العرب ولا لا؟ ... لكن شوف ياخونا انا دخلت المدرسة الاوسطى- يا اوسطى- فى ملكال والثانوى فى الخرتوم وجامعه الخرتوم- كليه هندسه- والله العظيم مافى خواجه درسنى ،الناس العلمونى الانجليزى كلهم دا شماليين عرب - ولا شنو يادكتور يوسف فضل كان فى خواجات بدرسونا...؟ ودكتور يوسف دا ظااتتو عندو كتاب كبير اسمو(العرب في السودانthe arab in sudan ) و مكتوب بالانجليزى حصل يوم قلتوا ليه يكتب بالانجليزى ما بالعربى...؟ والله جنس مشاكل...، طيب فرصه تانيه تكون فى الموضوع حق الندوه... وخش واحد قال ليهو ... يأخ يادكتور لام الناس بقولوا الجنوبيين عاوزين يفتحو البارات فى الخرتوم تانى من جديد ،وانحنا ابدا لايمكن ان نسمح بى كلام زى دا تانى فى الخرتوم انشاء الله. اها د.لام قال ليهم...اوكى مافى مشكله لكن انتظر لحدى ما ننتهى وبعدين ارح معاى البيت -وناس التلفزيون كان دايرين- علشان اوريكم الشريط حق مفاوضات بتاع كوكادام وعلشان تشفوا لما جا وكت الاستراحه ناس منو شربو ببسسى وناس منو شربو ويسكى... ؟ وبعد الندوه اتكلم معاى الدكتور لام وقال لى شفت يا جااال - معناها ياراجل بالشلك- شفته الناس ديل ماجادين كيف... ؟ وقلت ليه شفته ياجالدونق- لكن يا دكتور الناس ديل ما عندهم مثل بقول ( السكران فى زمه الواعى) انت ما عارفوا و لاشنو...؟ علشان كدا كل المفاواضات مطرشقه- وتكون فى زمتكم كمان يا اهل الزمه. وفى زمتكم السودان ما بلد يخلى اى واحد عندو زمه يقوم جارى منو سيجا وكدارى كان لقى ليه طريقه...؟ وقلت لي لام يا دكتور تانى احسن حاجه تعملوها لما يكون عندكم كلام علمى حقو تكتبوا يافطه بره الباب(عندنا كلام علمى جوه وبعدين يكون فى علمكم مافى فرصه ولارووب ظاتوو) والعاوز يرطب تلاته ساعات فى المكيف اهلا وسهلا واما عاوز يركب ظلط شارع الجامعه الاتجاه واحد ويستمتع بالحردلو-الشمش- زى ما الله عايز. ولى قدام لو الكلام نفع معاكم ولذيذ ممكن نواصل بعد الإعلانات ... اها يا دينق شيبببببباك ... انا جايك فى بوست ضرورات الانفصال لانو انت قلت كلام مهم فيه لكن المثقفين دسوا الكلام المهم وعملوا ياااع منو علشان الوحده الجذابه البقولو فيه الناس العاوزين يركلسو فى الخرتوم - طبعا كان زمان فى ناس بيجو لمحل قدره الفول ويطلبوا عشره عيش ومويه جبنه ومويه فول وصلح الزيت والبصل والجرجير .هسي جانى خبرهم قالوا بقوا يمشوا الخرتوم اتنين جمب المطار.....ويطلبو عشره جداد وواحد عيش يامونج ... ؟ ارفع البست دا بجيك فيه واخوك جاى لابس لاووا وكمان شايل الدرقه و التونق - الكوكاب بالعربى للماعندهم دكشنري الثقافات القاعدين يتكلموا عنها دي والشكلنا كدا لو اهلنا لو مقلبونا وصوتوا للوحده الجذابة دي حنستمر نترجم ونشرح ونوضح لمن نفوت ليك ابن كثير ظاتو- وندق ليهم نقاره زى العجب ونشوف منو الماعاوز يرقص ويقعد فراجه وكمان يقول ورونى العدو,و لا الجماعه البقولو لابد ولابد ولابد وبعداك يمشو لابدين خاصه زولك بتاع واشنطن العامل فيها متخصص حركه شعبيه كمان.قول ليه يا جك الاتكال مضر بالصحه اسآل اى طبيب نفسى، اسمع الايميل الاديتني ليهو فشانك ولا شنو ... كل مرة ارسل ليك يعمل لي تكس راجع...؟ ) و نواصل فى النكت...واحد وزير جنوبى ايامات شيخ الترابى كتب الدستور حقو الفيه كلمه(التوالى السياسى) يا عبيد طبعاً كلمه التوالى السياسى جننت ناس الحنك القانونى والدستورى وكل يوم ندوه ورا ندوه وهاك يا شرح وتفاسير، وخلت ليك الجماعه ينكوتو فى الكتب المن سنه دوو—اللحدي هسي فى ناس بقروها علشان بلدنا تكون سمن وعسل- لمن امنوا وكان فى ندوه فى الجامعه عن كلمه التوالى بس ، والعربى دور دور- والجو كيف سخن- قام الوزير الجنوبى شال المكرفون وقال ياناس انتو ما شايفين السخانه دا كيف ... ؟كلمه واحد بس يسخن بطايوقكم ذى دا ... ؟ ياخ اسمعوا الكلمه دا لما انا كنت مع شيخ حسن فى البيت بتاعوا انا سالتو فيس تو فيس, وهو ماكضب لى وقال ياشخينا لو اى زول سالك عن التوالى قوليهو(معناتو تعال طوالى).جماعه الحنك طوالى قبلوا على الميتات الفى التربيزة – البلح والفول المدمس والبيبسي الساااااااااااااقط - وكفى الله المؤمنين شر القتال . جدعة كدا قبل مع السلامة ، عندي صاحبي كادر خطابي في الجبهة الافريقية بالجامعة الأهلية كان عايز يعرس ليهو بت وزير جنوبي – هو طبععا كان ياهو قاعد زينا كدا شغال واعظ بتاع تعددية ثقافية – اها يوم كدا قال لي يا مونج ياخ البت دا سمعتا في واحد كدا من امريكا قال دايروا وعندو جورج جامد ، اها اخوك يعمل شنو هسي يا مونج ...؟ المهم قلت ليهم يا بنج حاول جازف واتخارج امشي احي حتة علي الاقل شكلك يكون سياحي قدام ابو البت وانتا براك شايف الجالدونق دا كل يوم بجيبوهو في التلفزيون ، المهم قال ليه امشي يا اخوي ياخ تلفزيون بتاع شنو وكلام فارغ بتاع شنو ، ياااااااااااااخي تلفزيون دا زول رايح ساكت بجيبو فيهو تجي تقول لي تلفزيون.... كان دا السبب خلي بت دا يشيلوا ذاتو ، وكلاص ... اها يا جماعة – الشباب الجنوبيين الموجودين هنا واخوانهم في الوطن – اي زول عندو اي خستكات حقة حنوبيين في الخرطوم يورينا ليها بالله لأنو فاضل سنتين تلاتة كدا للإستفتاء وتقرير المصير والحاجات شكلها كدا انو قطر السودان دا حيتفرتق حتة حتة لكن المشكلة منو الحيفضل عشان يقول تسلم ليا انت...؟ المهم دي دعوة للجميع وعلي حسب تعريف التوالي تعالوا طوالي . دي بس المناظر والألذا جاي ورا ... والماعندو حاجة يساعدنا بالدفرة وليكم الأجر عند المقدرة و – العاقبة عندكم في المسرات- وكدا ونواصل نوريكم كيف الجنوبين كانوا بى بيبيضوا ليك بالمشاريع الحضارويه... (عدل بواسطة محسن طه on 04-08-2008, 06:16 PM)

[رد على الموضوع] صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]