|
|
 الهضربة والكنكشة في عاميتنا الجميلة !
|
معاني مفردات عاميتنا الجميلة :
برطع :البرطعة هى الجرى فى الفضاء بلا قيود أو موانع .. يقولون ان فلاناً بعد أن أمسك بزمام المسئولية فى المصلحة أصبح يبرطع فيها ساااى أى اخذ يفعل ما بدا له بصورة (حرة) دون قيود أو موانع (مفيش حد بيسألو)
فنجط: الفنجطة هى حالة تصيب (الحمير) وهو نوع الجرى بصورة غير منتظمة وغير متناسقة وغير مدروسة (إذا أردت أن تشاهده فتفرج على أحدى مباريات القمة)!
صنقع: صنقع الرجل أى رفع رأسه فوق (زى العاوزين يكبو ليهو قطرة فى عيونو)..
دنقر: عكس (صنقع) ودنقر الشخص رأسه أى خفضه (زى القاعدين يحلقو ليهو) ودنقير الرأس نحو الأرض دليل على الخجل والإنكسار لكن (حرامية) اليومين ديل حكمت الله زول بيدنقر راسو مافى!
فرتق: فرتق الشئ أى جزأه وقسمه بعد إجتماع كقولك تفرتقت الأحزاب المعارضة إلى أجنحة .. (هى بدون أجنحة ما عاملا حاجه) أو كقولهم (فلان) فرتق الحفلة أى إفتعل شجاراً فقام الفنان شال عدتو ومشى!
كنكش : كنكش فى الشئ اى قبض فيهو قبضة (الجن ما يفكها منو) ككنكشة بعض المسئولين فى مناصبهم.
سردب: السردبة يقال انها فى العامية هى أعلى الظهر وسردب الشخص اى وقف منحنياً دون حراك علامة عدم تفاعله وإكتراثه للأمر .. كقولهم (والله الحياة بقت صعبه لكن مسردبين ليها)..
هضرب: الهضربة هى الهذيان والكلام (الخارم بارم) الذى يتفوه به الشخص عندما تتملكه الحمى ويمكن للشخص أن يهضرب (بدون حمى) إذا ما واجه موقفاً صعباً كتلك الزوجه التى سمعت أن زوجها قد قام بتطليقها فقالت : عادى ما مشكلة بس خلوهو يطهر ليا البيت ويضرب ليا الأولاد جير!
مزمز: المزمزة هى تناول الطعام فى لذة وتأنى خاصة (المشويات) والمحمرات والمتبلات والمقمرات وكده ! (معقولة الزول يمزمز بى بوش؟)..
زرقن: الزرقينة هى أداة تستخدم فى ورش الحدادة والنجارة لكبس القطع وضغطها ويقولون ان فلاناً قد زرقنوهو فى التحقيق زرقنة شديدة (أكيد ما عندو ضهر)..
طربق: الطربقة هى الكلام الكتير دون فائدة يقولون فلان طرباق أى (رادى وإتفتح) والطربقة من الممكن أن تصاحبها (هضربة) كما شهدنا فى لقاءات المرشحين فى الموسم الإنتخابى الأخير.. مافيش تانى حاجة إسمها (بايركس).. أنا ح أقفل ملف العنوسة فى السودان نهائي .. ما بعرف شنو داك ( أها هسى فزتا يلا ورينا)..
سلفق: السلفقة هى الحصول على المبتغى دون إستحقاق .. كقولهم والله الزول ده وصل نايب مدير سلفقة ساااكت (ما سلفقة كيف إذا هو كان شغال فى البوفيه)..
عصلج: يقولون (الصامولة) عصلجت بمعنى أنها أبت أن تنفك من (المسمار) ووقفت فى حتة واااحدة .. وفلان راسو (معصلج) أى لا يقبل التفاهم.. والموضوع معصلج أى واقف فى محلو وعاوز ليهو (ضحاكات) تحركو شوية!
خرخر: الشخص (الخرخار) هو ذلك الشخص الذى لا يتقبل الهزيمة أثناء اللعب ويغالط فى مجريات اللعب والنتيجة ولا يمتثل لقانون اللعبة وربما قام ببعض المخالفات حتى يكون الفوز من نصيبو (وكده)!
حندك: يقولون ان فلاناً قد حندك فلاناً إذ أخذ الأول فى التلذذ بشئ أمام مرأى ومشهد الأخير دون أن يكون للأخير مقدرة التلذذ بذلك الشئ .. وشعب (محندك) إذ كان معظمه يرى القلة تتلذذ (وهو قاعد يعاين)!
طمبج: طمبج الشئ أى (زادو مويه) أكتر مما يجب ، وشوارع وساحات (مطمبجة) بالمياه يعنى (مليانة موية) .. ما الخريف (زى ما بنقول طوااالى ) جا شنو؟ .... فجأتن!!
بشتن : بشتن الشئ أى زاده قبحاً والشخص المبشتن هو ذلك الشخص الذى يرتدى ثياباً قبيحة بالية غير متسقة والشوارع المبشتنة (زى شوارعنا دى)!
حمبك: أنظر خرخر..
عنقد: العنقدة هى أن يحول شخص أو شئ دون إكمال موضوع ما كقول أحدهم: والله كنت جاييك لكن بس ناس المرور عنقدو ليا (عربيتو ما مرخصة)!
جهجهة: جهجة الشئ اى (أفقده البوصلة) وخلاهو ما عارف الإتجاهات مما جعله يفقد السيطرة على الأشياء..
كقول أحدهم: يا ناس وزارة الصحة بالله ما تجهجهونا.. الإسهالات الحايمه دى جايباها المويه وإلا دى (إبتلاءآت ساااكت )!
كسرة:
ناس المواسير و(الكسر) خلو لينا حاجة نكسر بيها؟
|
|
  
|
|
|
|
|
| |
ابوعبيدة حسن محمد
فيس بوك
تويتر
انستقرام
يوتيوب
بنتيريست