كأس العالم صار مناسبة لظلم الدول، والفيفا مازال يصر بغباء بعدم أستعمال نظام الاعادة

Quote: بلاتر عندو بعد نظر ،، يعني لو قالو يحتكمو للشاشات والتكنولوجيا والإعادة ،، منو الحيتحكم في إنو دي يعيدوها ودي لا منو الحيقول دي محتاجة لي مراجعة من الحكم التكنولوجي ولا دي بس نرجع لي رجل الخط ،، كل فريق أو اي لاعب ينضرب حيطالب بإنو الكورة تتوقف ويقول تعملوا إعادة ولو اللاعب ده ما ضربني انا انطرد ،، ولو قلنا ده كلو ممنوع بأمر الفيفا مثلاً ،، نجي لي حتة كل كورة فيها حتة شكك الاتنين وعشرين لاعب والحكام والجماهير كلهم يقبلو على الشاشة وتبدا النقاشات ،، لا عيدها لينا من الزاوية التانية ،، لا عيدها لينا من فوق ،، لا مشيها شوية ،، لا خليها سريعة . طيب لو قلنا ما كده ،، نقنن الحكاية ويكون في حكم خامس ومعاهو كمبيوتر ومخرج وبتاع مونتاج ،، الحكم بعد ده حيكون ما منتبه مية بالمية ،، كل كورة سريعة تجاه المرمى يدي صفارة نص نص ،، ويأشر للناس انها تنتظر دقيقة ،، ويخت يدو فوق السماعة ويقول للحكم الكمبيوتري حول اها دي شنو ،، واللاعبين والجماهير خاتين يدهم في قلبهم ،، لغاية ما يجي القرار ،، وبعد ده تجي الصفارة الطووووويلة انها قوووون. لكن كونو في مشكلة حقيقة في التحكيم ،، نعم في مشكلة ومتفاقمة وعايزة حل ،،