|
|
 يا مدينة كل سنة و إنت طيبة
|
مدينة يا طفلتي و يحك من هذا العالم..
ستأتيك العزلة و الخوف و الشر و الخيارات سيسجنك الوقت مثلي و يأخذك في عربته الحصينة ستتألمين يا صغيرتي
سيخذلك صديق و يهجرك حبيب و ستبكين يا حبيبتي فأغفري لي
يوما ما يا مدينة سأتركك وحيدة و أموت فاغفري لي
يوما ما سأعجز عن طلب تطلبينه فاغفري لي
و سأرغمك على الدرس
سأراقب الساعة إذا تأخرت بصحبة أصدقائك و سنتناقش فيما لا تحبين فاغفري لي
مدينة يا حبيبتي عيناك فيهما سديم و أنجم حين تضحكين و وجهك أجمل من أجمل حبيباتي و صوتك حليب الأقمار و ماء الأعصاب حين تخضر
أصابعك الصغيرة حين أحملك و تخربشين ظهري
أصابعك يا مدينة تلمسني بعيدا جدا أبعد بكثير مما يمكنني وصفه
و بطنك الصغيرة تلك
سرتك أعلى الحفاضة
و أنفك الأفطس الذي يشبه أنفي
قدميك البضتين
اللااااااااااه يا بت الكلب!
آه لو تعرفين كيف أحبك قد لا أتمكن أبدا من الوصول لطريقة أتحايل فيها على الكلام ليحتمل و يخبرك
فاغفري لي
مدينة يا طفلتي
الآن عمرك سنة
فويحك من العالم
أنا من أحب والدتك فأنجبتك فاغفري لي
أنا الذي في بلدي يقتل الناس الناس فاغفري لي
أنا الذي لا أملك عصا سحرية أضرب بها النيل
فيحب الناس بعضهم البعض
و ينصلح الحال و تنمو مدارس و مصانع و أزهار
فاغفري لي
إغفري لي
ولا تهتمي يا مدينة
فالعالم جميل
و الحب إن صدقته جميل
و الناس إن وثقت بهم فهو إحساس جميل
صدقيني يا طفلتي
تعرفي?
مرة عرفت سيدة طاعنة في السن و مريضة جدا
كانت تتعاطى الدواء على طعمه الفظيع, هذا الدواء هو ما أطال حياتها إلى الآن لهذا لا تتأخر أبدا عن مواعيده..
عندما قالت لي ناصحة: هي الدنيا دي شنو ?والله مافيها شي!
صدقتها للحظة قصيرة
و لكنني عندما نظرت لصندوق الدواء على الطاولة الصغيرة
و لاحظت حرصها على تعاطيه
عرفت أنها تحب الدنيا
الدنيا سر يا مدينة
متعتها سر لا يباح به
و جمالها سر عليك أن تتعلميه و لن أستطيع تعليمك أياه
فاغفري لي
كل سنة و إنت طيبة
و عقبال ما أشوف أولادك و أحضر عيد ميلادهم
|
|
 
|
|
|
|
|
|
|
|
Re: يا مدينة كل سنة و إنت طيبة (Re: fadlabi)
|
فاضلابي
ربنا يخلي ليك مدينة و يخليك ليها ... و تشوفها تكبر قدامك يوم ورا يوم ... و يلحقوها أخوانها و أخواتها ... و يتمتعوا في عزك ... و تتمتع انت بنجاحهم واحد ورا التاني ... و تعرس ليهم و أول واحدة مدينة ... ومن هسع أنا حاجزة لي أنا زاتو يا ابو النسب .... أها قلت كيف؟ 
| |
|
|
|
|
|
|
|
|
|
Re: يا مدينة كل سنة و إنت طيبة (Re: fadlabi)
|
يا مدينة يا مدينة،،
يا حبيييييييييييبة،،
سنة جرية،،
و مااااااشة
و ضاااااااااااااحكة،،
و عندك ستة سنون،،
و شعر حلو
عشان ما تطلع منك سرخة شافعة
بسرحوها،،
يا مدينة انا عمتك الما شفتك،،
و ما معروف كان اشوفك يوم،،
لكن يا بتي بحبك حب الله واحد،،
العبي و شخبتي و ارسمي و جلبطي،،
إتوسخي و دفقي الموية و العصير،،
و ابوك ده يغني ليك تبتباتنا،،
و ترقصي،، و نضميني يطول معاك،،
كبييييرة بتي تمت سنة،،
عيد ميلادك سعيد علي امك و ابوك،،
واعمامك و عماتك،، و صحبانهم و صحباتم،،
و كل البعرفوك منهم،،
فاضلابي،،بتكم بقت عروسة،،
| |
|
|
|
|
|
|
|
|
|
Re: يا مدينة كل سنة و إنت طيبة (Re: Soumeta)
|
عارفة يا سوميتة أنا مخلوع السنة دي مشت سريع خلاص
بعدين صحبتك طلعت أي كلام
لا إيميل لا ماسنجر
غايتو تغشوا الناس و تحندكوهم بالصحبة ويلا
بعدين عمتك دي شنو
أنا كنت ناوي أقول ليها دي قربت تكون أمك لو ما الجغرافيا 
| |
|
|
|
|
|
|
|
|
|
Re: يا مدينة كل سنة و إنت طيبة (Re: fadlabi)
|
مدينة المحبة،،
دي رسمة بت حلوة سغيرووونة إسمها صفية،،
الرسمة دي يا مدينة انا بحبها شديد،،
برضو ما بعرفها وين ولا قدر شنو،،
و بعرف إني بحبها قدر شنو،،
رسمتها حلوة و بتشبه البنات،،
و إنتي معاها في الحلاوة و البراءة،،
مدينة لو تعرفي نحن بنحبك قدر شنو،،
بس عمرك كلو تتبسمي و تضحكي للحياة،،
و عندك عمك هنا ده معاي،،
قال ليك ما تقيفي جمب الهنود بسحروك علينا،،
| |
|
|
|
|
|
|
|
|
|
Re: يا مدينة كل سنة و إنت طيبة (Re: fadlabi)
|
الفاضلابى ..
تنقش الشمس أولها على رؤوس المآذن أيها البهي ...
جئت هنا عابراً ..
فوجدتني متخلفا عن ضوء حضورك ...ومدينة
فلك الامتنان أولا ..
والاعتذار دائما أيها الشجي ..
دمت ودامت لك.. مدينة ، اعواماً سعيدة ورحلة عمر مديدة
| |
|
|
|
|
|
|
|
|
|
Re: يا مدينة كل سنة و إنت طيبة (Re: fadlabi)
|
بريد مدينة وابوها وحبوبتها وجدها الفريق وعمتها وراجل عمتها الدكتور واخوه بتاع الآى تى واى زول شاف مدينة العسل :
البت دى رسل جيب بخور من السودان بخرها يا فاضلابى . .
| |
|
|
|
|
|
|
|
|
|
Re: يا مدينة كل سنة و إنت طيبة (Re: fadlabi)
|
عمي الفاضلابي
| Quote: أولاد هندسة ديل ما قعد نضمنهم لكن ينظر و يفاد |
اولاد هندسة ديل بيعشقوا الجمال ... عشان كدة ...خصوصا زي مدينة دي سوقها بيكون لامي ... عشان كدة انا ختيت طوبتي و قعدت ...(ممكن اضرب ليها تلفون... لحدي ما النتيجة تطلع) 
ما شاء الله لا قوة إلا بالله ...ربنا يحفظها ليك ...
| |
|
|
|
|
|
|
|
|
|
Re: يا مدينة كل سنة و إنت طيبة (Re: غباشي)
|
كل سنة ومدينة مدينة آمنة لماما وبابا
ربي يخليها ويحفظها وتعيش مية سنة
في سعادة وآمان
فاضلابي لو البنية ما مخطوبة بندور نخطبها لولدنا...
جدها الفاضلابي الكبير صديق لجدنا الكبير
وزيتنا في بيتنا...
اجمل ما يكتب هنا يكتب
عن الامهات والاطفال..
شكرا للامتاع
| |
|
|
|
|
|
|
|
|
|
Re: يا مدينة كل سنة و إنت طيبة (Re: fadlabi)
|
| Quote: دي بتعرفيها الغنية دي? |
مش دي البتقول جات تتصور طلعت شنو ما عارفة
بيان الولد دة صغير
خلي شوية ما تستعجلي تخطبي ليهو
( وش واحدة منشنة على الولد لي بتها اللسة ما جات )
| |
|
|
|
|
|
|
|
|
|
Re: يا مدينة كل سنة و إنت طيبة (Re: Raja)
|
فعلاً جميلة و فعلاً مدينة
ربنا يخليها ليك
ويخليك ليها وتكتب ليها كل سنه
كلام جميل يخفف عنها أعباء السنيين الجاية
نتمني ليها مستقبل مليان ندي
ووارف بالمحبة و السلام
| |
|
|
|
|
|
|
|
|
|
Re: يا مدينة كل سنة و إنت طيبة (Re: fadlabi)
|
| Quote: جدها الفاضلابي الكبير صديق لجدنا الكبير وزيتنا في بيتنا |
يا دكتورة اول حاجة سلامات
شنو إحنا ما واقفين في الصف من الصباح وللا الحكاية جابت ليها واسطات ؟
غايتو انا قريب من عمي الفاضلابي ولو دعت الضرورة بركب امشي أبكي ليهو في خشم بابو
لكي التحايا
| |
|
|
|
|
|
|
|
|
|
Re: يا مدينة كل سنة و إنت طيبة (Re: غباشي)
|
Quote: بيان عاد ما بالغت
ولدك دا خطبتي ليه كم لحدي هسي
غايتو بتي وبت الفاضلابي ديل اتنين
ناقصنكم 2 تانين
لووووووووووول |
انتى وابوها تقلتو خشمكم وما قلتو "خيرا"
انتظرناكم سنتين ..
لما زعلنا...
اسع لقينا قلبو مكسور كنا بتنا دي ابوها ما يابانا..
بالفعل رد وقتي شوفتي كيف..
لكن خلاص كمل اتنين فضل اتنين..(وش محروج لانه زروه)
| |
|
|
|
|
|
|
|
|
|
Re: يا مدينة كل سنة و إنت طيبة (Re: bayan)
|
| Quote: غايتو انا قريب من عمي الفاضلابي ولو دعت الضرورة بركب امشي أبكي ليهو في خشم بابو |
عمنا الفضلابي ابو مدينة؟
شوفتا يا عمك من تلد بت تبقى عمك طوالي...
يا غباشي بس كتر الفكة دي البتغلبنا بيها...البكا دا نحنا اسيادو..
| |
|
|
|
|
|
|
|
|
|
Re: يا مدينة كل سنة و إنت طيبة (Re: bayan)
|
واحلالنا البت لبسوها التوب ومحشمة( حالة العريس اهلو ظلاميين)
خلاص يا فاضلابي الولد بيجيكم يشرب شاي المغرب
معاكم...
لما شوفتا صورتك اطمنت ولدنا اخدددددددددر
مدينة ما بتاباه...
وتاكد انه ما بجننها ولد ظريف وحنين ..
وكان درتو كمان تربو على يدكم
من دربنا دا نشيلو البلي ستيشن حقتو
ونرسلو ليكم..
| |
|
|
|
|
|
|
|
|
|
Re: يا مدينة كل سنة و إنت طيبة (Re: bayan)
|
غايتو حالة صعبة يا بيان
زمان في الحلة بكون دايما في بت أبوها كان في البحرية و عرس من يوغسلافيا
أها دي الدكان الجمب بيتهم بكون أكتر واحد شغال
و بكون إسمها في الحلة بت الروسية
أها نحن مع بت الإنجليزية دي إلا نشتري طبنجة
أيييييه
مسؤليات غايتو
| |
|
|
|
|
|
|
|
|
|
Re: يا مدينة كل سنة و إنت طيبة (Re: خدر)
|
كل سنه وإنتي طيبه يا مدينة ،
إن شاء الله يجي يوم تعرفي تقري
فيهو العربي ويكون مازال لغة
حية ..
| Quote: ياخ مما جيتي حياتنا دي ، وانا نفسي أبوسك ... |
وأرجوك ما تاخدي بكلام عمك إبراهيم ده ،
بيقول كده لأي بت يلقاها
| |
|
|
|
|
|
|
|
|
|
Re: يا مدينة كل سنة و إنت طيبة (Re: طلال عفيفي)
|
طلال
والله ده هم كبير خلاص
بتكلم معاها عربي طوالي
لكن أمها نضامة نضمي تتكلم اليوم كلو بالنرويجي
و هسي مدينة أول كلمات بتقولها بالنرويجي
غايتو ربك يهون
بعدين عمو قرمبوز ده هي عارفاها عشان كده يسرها إنها تكون أول واحدة تقول أيوة
| |
|
|
|
|
|
|
|
|
|
Re: يا مدينة كل سنة و إنت طيبة (Re: fadlabi)
|
من زمان دايرة لى معاك درب بركة يا فاضلابى الشفت جناك يا ود امى ، وحات ابوى البت سوميتا دى سباقة دايما للحاجات السمحة ، اول ما دخلت لقيتا مصنقرة ، ومشت خلتنى يا فاضلابى ، تعرف اول عيد ميلاد لعزة كان عميرى جاب ليها فستان وجزمة وما كانت بتعرفو ، لمن كبرت بقى كل سنه بجيب ليها فستان وجزمة وكان دايما بقول لى البت سلحيها علم، احسن سلاح ،ولمن كبرت بقت تقول فستان عميرى وجزمة عميرى،احى يا فاضلابى كان كنت قريبة وحات ابوى اجيك ، لكين العتب على الجغرافيا، كل سنه ومدينة بالف خير كل سنه انت طيب تعيش وتشوف وليدات مدينة، العافية غتاك والسمح معناك ، والدنيا مستورة معاك ودعتك لامين الوداعة يخليك ويديك الفى مرادك يا ابو مدينة العديل سلام
| |
|
|
|
|
|
|
|
|
|
Re: يا مدينة كل سنة و إنت طيبة (Re: سلمى الشيخ سلامة)
|
أستاذتنا الصحفية الكبيرة
سلمى
جوعتينا جوع بصينية الغدا
المفروض تراعو مشاعر الناس النسوانهم خواجيات
يا سلمى ياخي ولا تؤذه بقتار قدرك إلا أن تغرف له منها
بعدين عزة جابتو من بعيد?
ما منكم إنتو ديل
هسي زولة أمها صحبة عميري دي أنا أعملها لي مدينة كيف?
غايتو تدخلونا في حتات ضيقة ضيق
شكرا جزيلا على الأمنيات الحلوة دي
مدينة مبسوطة و مرسلة ليك بوسة كبيرة بي خشم شروم
| |
|
|
|
|
|
|
|
|
|
Re: يا مدينة كل سنة و إنت طيبة (Re: fadlabi)
|
مدينة ..كل سنة وإنتي مع الزول الحيغلبك ده ..ومن أسي بطلب الغفران ..
كل سنة وإنتي حلوة
وحبيبة وجميلة كده..
كل سنة ..وقلبك نضيف ونقي
كل سنة ..وإنتي بتكبري وتكبر أحلامك ..وتحققيها ..
فاضلابي ..كل سنة وإنتو حلوين..
| |
|
|
|
|
|
|
|
|
|
Re: يا مدينة كل سنة و إنت طيبة (Re: fadlabi)
|
| Quote: هسي دي ما حركات الظلاميين ذاااااتها |
قرقرقر يا فاضلابي غايتو..
نرضى بكلامك دا لو استعفيت عن الشرتيت واديتنا مدينتك الفاضلة ساكت..
خاصة انه سلمى ما قدرت تجيب الاوفر حق البدل دا..
التحية لمدينة الحلوة
لازم تعمل ليها كمون ما يطقوها عين علينا..
| |
|
|
|
|
|
|
|
|
 Re: يا مدينة كل سنة و إنت طيبة (Re: bayan)
|
فاضلابي ياصديقي ..كم جميلة هي ..ولكي تذداد جمالا علمها هذا النفس الحي
إسمَعوا أيُّها البَنونَ مَشورَةَ الأبِ،
وأصغوا لِتَكتَسِبوا الفِطنةَ.
2تعليمًا صالحًا أُعطيهِ لكُم،
فلا تُهمِلوا نصيحتي.
3كُنتُ اَبنًا صغيرًا لأبي
ووَلَدًا واحدًا لأُمِّي،
4كانَ يُرشِدُني فيقولُ:
«لِيَتَمسَّكْ قلبُكَ بِكلامي،
واَحفظْ وصايايَ فتَحيا.
5إقتَنِ الحِكمةَ واَقتنِ الفِطنةَ.
ولا تَنسَ ولا تَحِدْ عَنْ كلامي.
6لا تَترُكِ الحِكْمةَ فتحرُسَكَ.
أحِبَّها فهي التي تَنصُرُكَ.
7الحِكمةُ رأسُ الأشياءِ فاَقتَنِها،
واَقْتَنِ الفِطنَةَ بما ملَكَت يَداكَ.
8إنتَزِعْها فترفَعَكَ إلى العَلاءِ،
واَعتَنِقْها فهيَ التي تُمَجدُكَ.
9هيَ إكليلُ برَكَةٍ لِرَأسِكَ
وتاج مَجدٍ وُهِبَ لكَ».
10إسمعْ يا اَبني وتعَلَّمْ أقوالي،
فتطُولَ سِنُوّ حياتِكَ.
11أرَيتُكَ طريقَ الحِكمةِ
وهَديتُكَ سَواءَ السَّبيلِ،
12فتَمشي ولا تَضيقُ خطَواتُكَ،
وإذا أسرعتَ فلا تَعثُرُ.
13تمَسَّكْ بالمَشورَةِ ولا تُرْخها،
وحافظْ علَيها فإنَّها حياتُكَ ..............
..........
عندها ستكون جميله كجمال هذه العروس
من نشيد الانشاد ..
جميلةٌ أنتِ يا رفيقتي،
جميلةٌ أنتِ!
عيناكِ حمامتانِ
مِنْ وراءِ حِجابِكِ.
شَعرُكِ قطيعُ معَزٍ
نازل مِنْ جبَل جلعادَ.
2أسنانُكِ قطيعٌ مَجزوزٌ
طالِعٌ مِنَ الاغتِسالِ.
كُلُّ واحدٍ وتَوأمُهُ،
وما مِنْ واحدٍ مَفقودٍ.
3شَفَتاكِ سِلْكٌ مِنَ القِرمِزِ،
وكَلامُ فَمِكِ جميلٌ.
خدَّاكِ فَلْقَتا رُمَّانةٍ
مِنْ وراءِ حِجابِكِ.
وربنا يحفظكم ..
محب
| |
|
|
|
|
|
|
|
|
|
Re: يا مدينة كل سنة و إنت طيبة (Re: طلال عفيفي)
|
يا طلال إنت من زمن الشعر
ما خلانا زمانك
هو عليك الله زول لا بمشي الفرنسي لا جوتة لا بقرا قصيدته لنجلاء و تعمل ليها سنسور و تقول ليهو كل عشرة
قصايد دي كويسة
الكاتب ليها شنو
غايتو مدينة إلا يعلمها جدها إبسن النرويجي
لكن نحن الفينا إتعرفت
| |
|
|
|
|
|
|
|
|
|
Re: يا مدينة كل سنة و إنت طيبة (Re: fadlabi)
|
ونخره
عبد المجيد عفيفي
كولاج شنو يا طلال
دي بت (شيرنق) ساهت
مدينة والله كل سنة وانتي طيبة
انا بحبك حب لما كل يوم الصباح
بعاين ليك (حتت) ابدأ شغلي
ازيك يا ابوها
وسلامي لامها
| |
|
|
|
|
|
|
|
|
|
Re: يا مدينة كل سنة و إنت طيبة (Re: fadlabi)
|
ليلى -ست الطرحة- بتقول لـي مدينة -أم توب- كل سنة وإنتي طيبة.
___________________________
شايفة يا دكتورة بيان الطرحة والتوب ديل؟ الصورة دي عشان خاطرك واسمها لن تسقط الراية!
| |
|
|
|
|
|
|
|
|
|
Re: يا مدينة كل سنة و إنت طيبة (Re: bayan)
|
كل سنة ومدينة طيبة يا فاضلابي وعقبال مائة شمعة وتتربى فى عزك وعقبال ما تشوف أحفادها وأحفاد أحفادها وربنا يحفظها ويغطيها ويجعلها من بنات الوطن البارات كأبيها.
تقبل محبي وكل ودادي لك أيها الرجل النبيل
| |
|
|
|
|
|
|
| |
fadlabi
saadeldin abdelrahman
غباشي
Soumeta
bushra suleiman
عزان سعيد
bayan
الجندرية
Ibrahim Algrefwi
Raja
Abdulbagi Mohammed
حبيب نورة
خدر
طلال عفيفي
سلمى الشيخ سلامة
Yassir Tayfour
Rihab Khalifa
salma subhi
Muhib
وليد محمد المبارك
سفيان بشير نابرى
الملك
النذير حجازي
Hussein Mallasi
فيس بوك
تويتر
انستقرام
يوتيوب
بنتيريست