أضبط .... من كتاباتهم تعرفوهم ( شكراً للحزب الشيوعي وهو يقلق منامهم )

Quote: أولاً بالتبادي نقول بسم الله و سلام .. تانياً بالتبادي أنا ما شيوعي .. تالتا خضر إزيك . العفار الشاقي السما ده هو حال المنبر من فترة .. الكندكة متحمده الجميع ما الحزب الشيوعي براهو . شي مخجل و مقرف . نجي للشيوعيين ( بقول الشيوعيين ) و ليس الحزب الشيوعي . الشيوعيين العرفتهم و بعرفهم طول حياتي بعتز و بفخر بيهم . الشيوعيين الملّكونا ( انا و بعض جيلي سعيد الحظ ) أدوات الوعي و ألف با تا ثا المعرفة . الشيوعيين الحقيقيين الصادقين الواعين الموجوعين بالناس و قضيتهم . الشيوعيين أولاد الحلة البيشيلو الحارة و تلقاهم وكتها أسياد الوجعة هم . المدرسين الشيوعيين الكانو بيساهرو معانا الليل و يرفضو ياخدو ملين أحمر في المقابل عشان ننجح و نقيف على رجولنا ( و دمعت عيون أستاذي محمد خير محمد أحمد عبد الحليم أجمل الشيوعيين لما نتيجة سهرو و همو و مجهودو كانت نجاح كل الفصل للثانوية العامة .. ما بنسى ده ) . و الشيوعيين الدافعو عن أبهاتنا العمال المساكين و جابو ليهم حقهم أيام الحق ولا خرط القتاد ما بيجيبو ( أبوي الله يرحمو من عمال سكة حديد العتيدين الأميين الكرام , ما شيوعي .. لكن كلو كوم و الشفيع عندو كوم تاني ) . الشيوعيين و الشيوعيات الكانو وحدهم بيمرو على البيوت و يشجعو النسوان يجن محو الامية .. بدون كلل ولا ملل و لا منة ( و أمي قاعدة و موجودة .. الله يديها العافية ) . الشيوعيين الحولو نادي ميتان و منسي زي نادي الربيع لشعلة نشاط ثقافي و فكري و تنويري و فتحوهو لكل الداير بدون فرز .. و فعلا دخلوهو الناس بدون فرز ( و النادي قاعد و موجود ) . الشيوعيين زي صديقي الشهيد الأجمل علي فضل , ما دخل عيادتو زول مسكين و مريض و عدمان حق الكشف حتى إلا و طلع يدعي ليهو . و ما قفل عيادتو إلا بعد يتأكد مافي زول لسه قاعد بره , و إلا إنو الدولاب الوراهو البيدي الناس منو الدوا المجاني بقى فاضي , و اللي إشتكى زملاؤه الدكاترة من رخصة كشفه الكتل عليهم السوق . الشيوعيين الكانو بيقولو للمتظاهرين أيام 24 و 25 أبريل و البلد مولعة و فالتة : ما تكسرو شي , ما تخربو حاجة , ما تأذوا زول من ناس البوليس ( و أسامة أب شنب و مصطفى بحيري موجودين ) . الشيوعيين البنتبادل معاهم الكتب ( لضيق ذات اليد ) و ما بيسعدهم شي قدر أنهم يلمو في كتاب يستاهل , و يوم يومين نتلم عشان نتناقش حولو لساعات الليل كلها. الشيوعيين في فترات الدراسة الجامعية .. شمس الدين آدم و وفاء حسين و نجاة عثمان و عصام عبدالحفيظ و فتحي محمد عثمان و غيرهم و غيرهم .. ناس تعتز بأنك صاحبهم لكل تفاصيل سلوكهم و منهجهم و احتفاءهم و حدبهم عليك و على الناس و البلد . الشيوعيين الزاملتهم في العمل و كل ساعة كانوا بيكبرو في نظري بمواقفهم و أقوالهم و أفعالهم ( صحفيين و مصممين و كتاب و شعراء و أدباء و عمال مطابع و سواقين ) . شيوعيين زي طلال و خضر و معاوية و عصام جبرالله .. و غيرهم و غيرهم .. ... ديل الشيوعيين . الشيوعيين عاطف و هنادي و آخرين كتار لا يشبهون الشيوعيين الذين أعرفهم . الشيوعيين البيكونو خصم على تاريخ سيرة كاملة لرجال و نساء أحبو البلد دي و أدوها ما أدوها. الشيوعيين ديل أقل ما يمكن أن يقال لهم : ( ياخي أسكتو ياخ .. أسكتووووووووووو ) . أنا ما شيوعي .. و لكن ديمقراطي أؤمن بالحرية لكل الناس و الحقوق الأساسها المواطنة , و أؤمن بالعدالة و القانون و الحق . و كذلك يفعل الشيوعيون . بتلاقى معاهم على أرضية واحدة و أختلف معاهم حول الوسائل و الأساليب . أن تزوغ بوصلات الحزب لأسباب تعلمها عضويتو و كوادرو فهذا شأنهم .. لهم وحدهم ان يقوموا أداءهم و هياكلهم التنظيمية لو شافوها محتاجة .. أو لا يفعلوا . مواقف الحزب الأخيرة مهما اختلف الناس عليها و حولها فهناك وسائل و ادوات أرفع و أنفع و أفضل عشان الناس تناقش و تحلل و تنتقد بيها . أنا ما شيوعي .. و صديق للشيوعيين الشيوعيين . .... أخونا بكري لا يحرك ساكناً و العفار و الكترابة زكمت أنف البورد و قريباً هي مفطساه .. اللهم لا إعتراض .