|
|
 Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: حاتم هاشم)
|
بسم الله الرحمن الحيم
بكتب ليك
...........
للشاعر..ودابن عوف
....................
مالى أنا كل ما أقول فى نفسى إتلمينا
ألقى أقدارى تضحك لى تقول كضِّاب
وكل ما أعمل حساب لظروفى زى الما عملت حساب
مالو فراقنا مترقبنا دون خلق الله واقف ديمة عند الباب
وأعمل إيه عشان يختانا جاى أو جاى
وبينَّا وبينو يبقى حجاب
ونشوف الدنيا موكب فرحة لينا تغنى بى ترحاب
وتدنى عليِّا آمالن بشوفا سراب
ويهل سعدى ونجم سعدى بعد ما منِّى طوَّل غاب
وأقيف خاشع وأقول يا الله كل النَّاس يكونوا أحباب
بكتب ليك وأطوِّل فى كتاباتى
يفيض إحساسى وأملا الدنيا بى كلمات خطاباتى
بجمع ليك لغات الدنيا وأكتب ليك
بى لغة العجم مرات وبالعربى الشديد وفصيح
وبى لغة الملايكة أحيان وبالسريانى والتسبيح
وفوق كل ذرة فى ها الكون
بكتبا ليكى وارسلا فوق بساط الريح
بكتب ليك على الأشجار وفى الأنهار
ومحل ما تمشى قدامك تلاقى حروف رسالاتى
لأنك إنتى من ذاتى وفى ذاتى يا ذاتى
ومهما كتبت ما بقدر أعبر ليك عن الجوايا
مهما طاوعت أقلامى كلماتى
وليه ما أكتب وإنتى الماضى بى أحزانو
بى أفراحو والمستقبل الآتى
كتاباتك شوية خلاص ورسالاتك شوية خلاص
علىَّ الفى منامى أحلام علىّ الفى صحاى وسواس
وأنا الراجيكى تكتبى لىَّ كم دفتر وكم كرَّاس
منَّها داير أفصِّل جبة وانْدروشْ
وكمان طاقيِّى فوق الراس
ومن كلماتا أسوى السبحى والبخرات وكم حجبات
أداريبن عيون النَّاس
كمان تقروقة وفى محراب هواكى اجلس مع الجُلاّس
واخلى الباقى واتغتابو لو بعدك غشانى نُعاس
أنا الراجيكى تكتبى لى
كتاباتك تكون فى الظلمة لى نبراس
أنا العايش فراقك لى بشوفك فى عيون النَّاس
وعازرك لو كتبتى قليل رضيان بيهو
ما دام بى وفا وإخلاص
أريت يومن فرقنى معاك يكون محذوف من التاريخ
وتبقى أيامنا ستة ونبقى فيها قراب
أريت بلدن تحرمك منى لو ما إنتى تبقى خراب
يسكن فى خرابا البوم ويتصايح عليها غراب
تولِّع فيها نار الله وتصبح كوم رماد وهباب
وتمرقى إنتى والنَّاس المعاكى قراب
..............................................
حاتم هاشم
| |
 
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: خالد علي محجوب المنسي)
|
بسم الله الرحمن الرحيم
تعال قص البلد وارجع
........................
تعال قص البلد وأرجع تعال أدي الغُبش طلة
بقالا الليل غـُتا ومُقـنع سُترتك يا صباح الله
ضُراعك ِمدو لي رضع ضروع أُماتة قطن قط
مراكب شوفا لا مشرع ولا بان في مداهن شط
تعال يا شافي يا كافي شموخاً في زمن منحط
من الفي تعال بجي المافي معاك وهطنا وإتوهط
تعالنا نحـن من شـفع نفك الحيرة بي حيرة
متين ما الليل يصن نسمع وراء الآهات غُلب نوره
أبوي قالولنا جيبن دا صباحات الله بخيره
تويب أمي الزمن هدا صباحات الله بخيره
وصباحات الله لاقيته لا كراسه لا قلمه
صباحات الله لاقيته ململم في العيون ألمه
صباحات الله لاقيته تجود في الضحى وتضفر
صباحات الله لاقيته تليس في شقوق بيته
صباحات الله لاقيته أكان لاقيته في مشرع
مكان خليتا تتوجع اكان لاقيته في مستشفى
فطن إنداي جامع سوق محطة ملمة
أكان في بيته أو مصنع
محل لاقيته تنذمر مكان خليته تتوجع
تكد تكدح تباصر كم رجاء أتقطع
أبت تطلع من المدفع طلع خازوق خوازيق البلد زادت
طلع نمراً وراهو ضباع وضاع ما ضاع وكان ما كان
يفيض النيل نحيض نحن يظل حال البلد واقف تقع محنة
طلع خازوق خوازيق البلد زادت
سألت عليها مشيت ومشيت مشيت خشيت على حلة
لاقيت شعاع ضال من ضو صباح الله
لاقيت شعاع أسمر قاعدلو فوق بنبر كابي المُرس يسكر
قنبت جنبو معا دار الحديث ما دار
حدثني بى حرقة حبيته من جواي .. حبيته حبيته
في الحلوة والمُرات شايله القُداحه معاي
آدتني وأديته حبيته حبيته
في يوم من الأيام هلوس مع الفجاج
هلوست دون أحلام من دكة الحجاج
ضلوا الشمس ريحين واحد عماك يا أم زين
والتانى لفحك وطار باعوني للفرقة باعوني للدولار
ملعون أبوك فُرقه ملعون أبوك دولار
أنّ الشعاع الضال أنينا أنينا
صنّ الشعاع الضال صنينا صنينا ما صن غنى و قال
غنالي بحرقة غنالى يا هاجر عقبت يا باكر قاطعني يا هاجر
رددت يا هاكر في الضلمة أولادك
في الفيها طول اليوم لا زاده لا زادك
يا مرمى لا ضل بيت لا أرث أجدادك
يلا وجراحاتك طحلب ضلام الليل دهده صباحاتك
السولبك خلاك برد الخمور مفتون
في أفقر وضع ختاك فاجر وسخ مافون
يلا وهياك يلا لاعن صباح الله صبح الغُنا الميمون
صن الشعاع الضال غنا الشعاع الضال
ما صن غنا وقال يا هاجر التسعى
بين الوطن والبال باب الفجر بفتح فتح القلب موال
فتح اللبق في الصيف تالا الشتل تربال
باب الفجر بفتح يا وضع يا دجال
باب الفجر بفتح عند دقة الرجال
غنا الشعاع الضال غنينا طولنا سوا
شال النغم عتال بايتين عيالو قوى
باكرنا سترة حال ياكر رغيف وروى
باكرنا بقة فال باكر كتاب ودوا
باكرنا للأجيال ينشر نور وهوا
لا تلاقي فيهو وبال لاهم بُعاد لاجوى
باكرنا يا ضلال لسع بلال ما زال
وما دام بلال لسع على الرمضا وهجير يلسع
ما دام في أطفال بتتوجع
صباحات الله يا بيضا وحيحة نوره لاهسع
فجيعة يا نوره يا فُقرا ترف من شدره لى شدره
تلف الدنيا كايسالكم صباحاتو ما انتو
بقوا من الأرض مطره تعالى وشى الوطن دركان
عساكر آخر الزمن واطه تعالى وما على كيفك
تعالى وريحي الواطه
بلدنا أن جيتي دي الكوكب تعالي من اليسار شمساً
تشرق الغربوا المركب
تغربي يا غرب يا باني الكلب يا تجار الموت والرعب
لو ريح ليلكم طفى الصحوة نسل الصحوة في جوف الشعب
ِبقى وضوي نواحى الدرب التالا الفجر الوطن القلب
القلب الشايلك وما ختاك وكان ختاك أبداً ما خطاك
بس يا نوره الصاح و الصبر لمي معانا قُطنة البدري
نغزل منها كفن الليل ننسج منها توب الفجر
فجرن تكسو محنتو الفُقرا
من التعب البلا صالح يجبد الكُدّح الأُجرا
يلا بوليس بلا أجرا شنو الخايفينلو يا فقرا
بيوتا جنها المطره دقيقاً ما يفك الريق
سمكتن مافي في بحرا شنو الخايفينلو يا فقرا
شديراتن بقت حطـبه تمرتن ما تفك طلبه
شنو الخايفينلو يا فقرا بهيماتن تسوى الميع
مغبش كالترب بصرا شنو الخايفينلو يا فقرا
كلبتن لا قلب لا حيل هوت في شبح فوق خيل
كان يتداعر آخـر الليل نرت والشبح حدره
صدت للصريف فتره كان صوت الرصاص قفره
أنَّت والخلق نايمين صنت والخلق نايمين
عفنت البلد يومين كلب العمدة جاب خبره
شنو الخايفينلو يا فقرا شنو الداخرنو في متره
أبو الأربل لأبو الواسوق أبو المحرات
وساقية تسوق لأبو بقره يا بقر السواقي السايقى للأمرا
شنو الخايفينلو يا فقرا
أبو البوليس إذا ما كان أباتم من طرف فقرا
يحرسوا القصر للتلفان وللفي الليل زنى ودعره
ويقوموا مع النهار وزراء
أبو البوليس إذا ما كان أراضيهم يبس شدره
يحرسوا طلمبة الجازولين يقيفوا على البنوك غفرا
إذا ما الشارع استنفر غبش عزل بستنكر
على القيصر خساستو
تقول للغيم محل مطرك قراب منك دالفينك
يضم صدر الوطن حاني يهز للظلم ساساتو
تحن لباكر الأخضر يعم بى خيرو ناسـاتو
تنادى الفارس الأسمر تطالب بي قصاصاتو
من الفجار من العسكر ابو البوليس إذا فكر
يفك فيهم رصاصاتو
أيا بوليس أيا نازل من المريخ جباة الدم من التاريخ
أيا واقف لهم كالسيخ تقيف لنا لامتين دغري
حقارتك تبقى في فقرا فضيحة فجيعة يا بوليس
وجايين من فرد شدره جنانا العاق متين تصحي
تشوف الحاصل المزري متين تدري
بأنو الصوت ده ما مكري معتق للوطن دغري
و بأنو الجاري ما منك على صدر الوطن يجري
وخطاهو التيربت قدره تلاقى الفـجر والفقرا
............................................
منقول
حاتم هاشم
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: Quote: إذما البيت لبخ جالوص
ومزبل للخريف عمه
وكان جواهو محبوبين
وهبابين
وخمسة عيال وسحارة
وكان في البيت
عقاب معزايه للشفع
وكان الدنيا يا الضلمه
وكان القبله جهاره
وكانت غيمه دراره
|
Quote: بادر بالسؤال لرفيق الدرب والجار ات يا محمد دا شهر كم فقال له نحن في مارس وداخلين علي ابريل وما بعيد بجي الخريف
لكن لي شنو سؤالك ,,, والله يا محمد بدور ازبل البيت لكن ماعندي وبدورك تديني قريشات,, فرد محمد والله ما عندي المبلغ الليزبلك كل البيت لكن بديك مبلغ يكفي تزبل البيت عمة بس يكفيكم شر هدم الأمطار ويستركم وكان وقد حدث.
زبالة البيت عمة تعني ان يزبل الإنسان الذي لا يستطيع زبالة البيت كله. أن يزبل فقط رأس البيت وتكون الزبالة نازلة شوية من رأس البيت على الحيطان ولذا شبه هذا النوع من الزبالة انها عمة والجامع وجه الشبة في كل ( مكروبة ومربوطة في الرأس )
هذا البيت البسيط الذي يمثل من مجمل بيوت السودان الغالب الاعظم كان جواهو محبوبين هما اب احمد وام احمد وخمسة عيال كبيرهم أحمد الذي كنيّ به ابيه وسحارة والسحارة هي دولاب يحفظ فيه كل ثمين وقد كانت والتفسير لشباب اليوم اللذين فاتهم زمنها وانشغل أهلهم بتعريفهم بها, وعنزة وحيده وهبابين والهباب هو عنقريب صغير الأرجل ويقرب من الأرض وخفيف بسيط لاحظ معي عزيزي القاري انهم حتى لا يملكون عنقريب عادية وسبعة افراد في البيت وعندهم هبابين فقط. اراد شاعرنا الفذ أن يوحي لانا ويعرفنا عن حالة اهل البيت او النوذج الذي استند عليه في ابيات قصيدته انه بيت عادي بل اكثر من ذلك أنهم فقراء وفقراء وهذا ما طلعوا به من دنياوعلهم يحيو حياة كريمة في الآخرة ونسأل الله لهم ذلك لكل في فقير تعذب وصبر في الدنيا الزايله.
في داخل هذا البيت البسيط وفي ليلة مظلمة وكانت القبلة جهاره كناية عن شدة البروق وكانت غيمة درارة داكنة تحمل الخير للناس ولا يتظلموا أن هدمت ودمرت المطر خير وخير مطلق مهما كان.
|
الأخ خالد المنسي...
صباحاتك زين... تسلم يا الحِبيِّب وأنت تُحلل وتدقِّق لدرجة ما تدينا فَرَقَة دَخْلة معاك...
كميات مودتي...
أبو الحســـــــــــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: ود الحسين و البقية التمام
سلام يغشاكم مع القموري المقيل فوق نخيلكم
وهاكم دي لي ابن كرمكول الطيب وليد صالح في وصف جده
[ ...انه ليس شجرة سنديان شامخة وارفة الفروع في أرض منت
عليها الطبيعة بالماء و الخصب, ولكنه كشجيرات السيال في
صحاري السودان, سميكة اللحي حادة الاشواك, تقهر الموت لأنها
لا تسرف في الحياة.] مؤسم الهجرة للشمال, صفحة 83.
وقال صاحبنا يصف البلد:
[ تتابعت الاعوام, عام يتلو عاما, ينتفخ النيل, كما يمتلئ
صدر الرجل بالغيظ, ويسيل الماء بين الضفتين, فيغطي الارض المزروعة
حتي يصل الي حافة الصحراء عند اسفل البيوت, تنعق الضفادع بالليل
وتهب من الشمال ريح رطبة مغمسة بالندي تحمل رائحة هي مزيج من اريج
زهر الطلح ورائحة الخشب المبتل ورائحة الارض الخصبة الظمأي حين ترتـوي
بالماء.] عرس الزين, صفحة 32.
بجايكم صادي |
الحِبيِّب عوينات الحُرية... (عوينات) دي لزوم زيادة المحنة...
يا هلا بيك وشرفت ونورت ديار أهلك وأحبابك السناجك من جَم...
تعظيم سلام لك وللمبدع إبن الشمال الطيب ود صالح...
ويا هلا بيك بيناتنا...
وراجييييييينك بس لا تطول الغيبة...
كميات مودتي...
أبو الحســـــــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: التحية لكم أبناء الشايقية وانتم ترسمون لوحات الفرح على صفحات السودان العريض... زادكم الكلمة الحنينة .. وحسيس طنبوركم يهمس في أذن كل محب ...
جينا نتاوق ذي كل مرة...لكن لا بد من الرجوع..لكم التحية..
الفاتح عبد الله طه/القرير |
الحِبيِّب الفاتح...
نهارك سعيد وكل القَرارة على إمتداد الدنيا الوسيعة...
المرة دي قلنا نرحب بيك... لكن عليك الله تاني لا تجينا جُرابك فاضي...
وإنتو يا ناس القرير أهل الفن والإبداع على مر العصور... فتجينا فاضي دي ما مقبولة منك...
كميات مودتي...
أبو الحســـــــــــين...
| |
|
|
|
|
|
|
|
|
 Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: متعك الله بالصحة والعافية يا د/ ياسين
ولك منا الود والتقدير
خالد |
لك شكري وتقديري أستاذي خالد
ارجو المواصلة في الشرح البيدغدغ الزول دا ، فترنا من كلام الخواجات دا
الشــــايقية
مرجع لكل من يبحث في قبائل الشايقية وتاريخها
تأليف و . نكــــولز
ترجمة وتقديم وتعليق د . عبد المجيد عابدين
مقدمة المترجم
http://www.sudanjournal.com/Reports/shaigya/shaygya05.html
رأيت أنّ أنقل هذا الكتاب إلى قراء العربية ، وهو كتاب طبعه مؤلفه مستر نكولز سنة 1913م ، وصار منذ ذلك الوقت مرجعا لكل من يبحث في قبائل الشايقية وتاريخها.
وقد جمع المؤلف فيه الروايات الوطنية التي يرويها الشايقية أنفسهم ، وقارن بينها وبين أقوال المؤرخين والرحالة الذين زاروا بلاد الشايقية أو تحدثوا عنها ، وقد تقبل بعض هذه الروايات ، وشك في بعضها . غير أنه مما يعيب الكتاب - في نظرنا - بعض أقوال جمح بها قلمه ، فأساء فيها الحكم أحياناً ، وأخطأته لباقة العبارة أحياناً أخرى . وقد علقنا على هذه الأقوال في مواضعها من هوامش الكتاب .
أضف إلى ذلك أنّ الكتاب لم يتعرض لجوانب من تاريخ الشايقية ، كالبحث في أصل الشايقية ، وهذا موضوع شغل الذين كتبوا عن الشايقية بعد زمن تأليف هذا الكتاب . ونرى إتماماً للفائدة أنّ نعرض لأهم الآراء في هذا الصدد . وبين أيدينا أربعة آراء في أصل الشايقية ، نلخصها فيما يلي :
1- يرى ترمنجهام ( الإسلام في السودان ص 88 ) أنهم ربما كانوا أصلاً في البجة . ويعتمد في هذا على ما رواه المقريزي عن ابن سليم أسواني من أنّ الزنافج ، وهم فريق من البجة ، هاجروا في عصور قديمة إلى بلاد النوبة واستقروا هناك .
احتفظوا بلغتهم الخاصة فلم تختلط بلغة النوبة . ثم لاحظ ترمنجهام أنّ جميع أسماء قبائل الشايقية تنتهي بالمقطع ( آب ) وهو مقطع لفظي مأخوذ من لغة البجة .
وزعم ترمنجهام هذا ، في نظرنا ، لا ينهض به دليل . فإن انتهاء اسم القبيلة بمقطع من لغة البجة ليس دليلاً علي أنّ القبيلة بجاوية الأصل . ولا سيما إذا عرفنا أنّ هذا المقطع يدخل في أسماء كثير من القبائل العربية التي تسكن في أقاليم مختلفة من السودان .
2- ويرى ماكمايكل ( تاريخ العرب في السودان حـ 1 ص 213 وما يلي ) أنه من المحتمل أنّ يكون فريق من هذه القبيلة كان في الأصل من بقايا الجنود المرتزقة من الترك والألبان والبشناق الذين كانوا يؤلفون الحاميات والحرس في بلاد النوبة منذ غزو السلطان سليم العثماني ( 1517م ) وقد استقر عدد منهم في النوبة .
وقد استبعد الباحثون اليوم هذا الرأي . فقد رده كراو فورد ( في مملكة الفونج في سنار صـ 44) ، فذكر أنّ هناك اعتراضاً قوياً ضد هذا الرأي ، وهو أنّ سليماً العثماني لم يغز هذه المنطقة ولم يقم عليها حراساً ولا حاميات . وأنّ المناطق التي قامت على حراستها فئات من هؤلاء ، وهي الواقعة بين الشلال الأول والثالث ، لم تنتج سلالة من السكان عندها من الخصائص ما نجده عند الشايقية . ورد الدكتور عوض ( السودان الشمالي ص 185 ) هذا الرأي بقوله : ( مما يؤسف له أنه ليست لدينا دراسة للشايقية بواسطة رجل من علماء الأجناس حتى نستطيع بالدراسة العلمية للمقاييــس ، وعلى الأخص مقاييـس النسبة الرأسية أنّ نحكم على وجه السبة بين الشايقية وأولئك الجنود الذين إذا كانوا حقيقة لهم نسب ألباني أو تركي أو بشناق ، فإنّ هذا كفيل برفع النسـب الرأسية . ومثل هذا الاختلاف يتنافى مع ما نعرفه من صفات الشايقية الجسدية ، كنحول الجسم والوجه وشكل العيون . أما بروز الأنف فمعروف لدى كثير من العرب حتى في السودان نفسه ) .
3- ويرى فرن ( وهو رحالة ألماني زار السودان في خلال سنتي 1840 - 1841م ) أنّ الشايقية ربما كانوا في الأصل طبقة من محاربي المصريين القدماء أو جماعة من سلالة المحاربين الثائرين الذين تحدث عنهم هيرودوت المؤرخ ، فذكر أنهم كانوا جنوداً في جيش فرعون ، ثم ثاروا ورفضوا العودة إلى مصر بعد أنّ هاجروا منها إلى الجنوب . وكان هذا في عهد أبسماتيك . وزعم هيرودوت أنّ عددهم كان مائتين وأربعين ألفاً على وجه التقريب . ويقول بلينيوش المؤرخ ( 70م ) أنهم فروا من وجه أسماتيك وسكنوا في مناطق قريبة من مروي القديمة (1) .
ويؤيد فرن هذه النظرية بعدة ملاحظات :
(1) موقع بلاد الشايقية قريباً من مروي القديمة التي حموها من غارات برابرة الجنوب .
(2) والنزعة العسكرية المتأصلة في نفوس الشايقية .
(3) وكونهم غير خاضعين لزعيم واحد ، بل كانوا دائماً يعيشون أحراراً في ظل ملوك صغار . ولعل الأسر الحاكمة فيهم تمثل طبقة السادة المصريين القدماء الذين لم يعترفوا بسلطان أحد سوى ملوك إثيوبيا . فلما زال ملكهم صاروا أمراء مستقلين كما حدث لقواد الإسكندر المقدوني بعد وفاته .
(4) وعادة الشايقية في تقصير شعر رأسهم وتلك عادة مصرية تخالف العادة السائدة عند العرب والنوبيين .
ويضيف ماكمايكل ملاحظة أخرى تؤيد نظرية فرن وهي ما شاهده الرحالة الفرنسي كايو من أنّ الشايقية في إقليم
الجزيرة يقيمون نصباً على صورة إنسان يعيّن حدود الجهات التي غزوها . ويقول ماكمايكل : إنّ هذه العادة بلا شك مقتبسة من الفراعنة الذين كانوا يقيمون تمثالاً على حدود فتوحاتهم ( عوض 148 ، ماكمايكل 1 : 213 وما يليها ) .
5- وترى الروايــة الوطـنية التي يتداولها الشـايقية أنفسـهم أنهم من أصـل عربي . وهــذا الرأي لم يقم ضـده دليل قوى إلى الآن . فقد رأينا في الرأيين الأول والثانـي ضعفاً ظاهراً . أما الرأي الثالث (رأي الرحالة الألماني فرن) فإننا لا ننكر ما فيه من وجاهة ، وهو في الوقت نفسه لا يتنافى مع عروبة هذه القبيلة ، بل يؤيدها . فقد أشار فرن إلى هذه الطبقة من المحاربين الثائرين الذين هاجروا إلى الجنوب من مصر القديمة . والعلماء مختلفون في أصل هذه الطبقة . وقد رجحنا في بحثنا [ ميلاد سوبا ] الذي أشرنا إليه فيما سبق ، أنّ هذه الطبقة كانت من عرب الأراميين الذين كانوا يعملون في مصر جنوداً مرتزقة في عهد بسماتيك الثاني وكانوا قد عهد إليهم في محاربة المناطق الجنوبية (ص 2 - 4 ) . وعلي هذا يكون رأي فرن في الواقع مؤيداً للروايات الوطنية الشايقية ، إذ تكون القبيلة في الأصل ، من هؤلاء العرب الذين هاجروا من مصر الفرعونية بعد أنّ استقروا فيها فترة من الزمن عملوا فيها في جيش فرعون .
ولسنا ننكر مع ذلك أنّ مجاورة الشايقية لعناصر إفريقية وحامية في موطنهم الجديد ، ودخول هجرات عربية جديدة بعد الإسلام في السودان واختلاط أصولهم بدماء عربية حديثة جاءت إليهم من الشمال أو الشرق - كل ذلك قد أحدث آثاراً في عاداتهم ولغاتهم على مر العصور ، ولكنهم فيما يظهر لم يسمحوا للسلالات الجنوبية بأن تمتزج بدمائهم ، لذلك احتفظوا بلون بشرتهم الذي يقرب من لون المولدين .
الخرطوم في نوفمبر 1956م
د. عبد المجيد عابدين
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: أريت بلدن تحرمك منى لو ما إنتى تبقى خرابيسكن فى خرابا البوم ويتصايح عليها غراب
تولِّع فيها نار الله وتصبح كوم رماد وهباب
وتمرقى إنتى والنَّاس المعاكى قراب
|
أُستاذي حاتم...
الشاعر ود أبنعوف من الشعراء المجيدين في الوصف والغزل الجميل الرااااااااايق الما فاحش...
إستوقفني الإقتباس أعلاه الراجل دا عاوز يدعي البلد الأخذت منه محبوبته لكن إتذكر أن محبوبته فيها... فقام تراجع بطريقة حلوة وظريفة...
أريت بلدن تحرمك منى لو ما إنتى تبقى خراب
شوف دخَّل لو ما إنتي كيفن؟؟؟
الله يديك العافية شاعرنا ود أبنعوف ويحفظك...
كميات مودتي...
أبو الحســــــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
كتب الدكتور ياسين...
Quote: أخي وصديقي الأستاذ موسى
أشتاق اليك حقيقة ولأيام الصفاء
متعك الله بالصحة والعافية في غربتك وجمعنا قريباً
جرابي مليان زي ما قال ابو الحسين لكن انت والأستاذ خالد
بتجيبو وتطلبو حاجات صعبة المنال
"طبعاً دا حال الناس القدام والشدر الكبار فيهو الصمغ" ، ما أحلى زمنكما!!!!
حقيقة هذه الأغنية ليست مسجلة عندي لذلك اطلب من
الأستاذ أمين عثمان "أبوعثمان" أن يمدنا بها
ولحين ذاك الوقت أنا استبدلها ليك بـ"صدفة سعيدة دي الجابتني ليكم" محمد جبارة
وأهديها للأستاذ أمين عثمان وتحياتي للإنسان الفنان ودجبارة أين ما وجد
بالله اتمعن في "الزغرودة"
|
دكتورنا الغالي يس...
حمداً لله على سلامة عودتك حقيقة يومين ما تطل علينا كتيرة...
تسلم يا اخوي على الأُغنية الجميلة من محمد جبارة والله سمعتها تلاتة مرات ولسع داير أسمعها وأسمعها... وبالمناسبة دي إتصلت على الأخ حسن عثمان الحسن (المقل) يغريك تحاياه وهو من المتابعين جداً لهذه الدارة الشايقية العاجي... ومن المعجبين جداً بفن ود جبارة... وإستمتع بهذه الأُغنية النادرة القديمة العايشة جوانا من ذلك الزمن الجميل السمح...
لك تحياتي ومودتي... وإنشاء الله جرابك ديمة مليان بالزي دا زي دا يا الحِبيِّب... ومنتظرين تعليقات وتحليلات الأُستاذ موسى المن النوع داك...
أبو الحســــــــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
بسم الله الرحمن الرحيم
سير ياقلبي فوق الفرحه
........................
محمد العبيد سيداحمد
.....................
سير ياقلبي فوق الفرحة سوقنى بعيد من الاحزان
وأيام العمر محدوده خلتني داير اعيش في أمان
ماشفت الصباح ياقلبي كيف يصبح حلو وفرحان
مع صوت المنادي ينادي بي حب الاله ريان
الطير بي نغم رباني يتراقص علي الاغصان
ياقلبي أنشرح للدنيا لا ترجع تكوس الكان
كم لله من ضاق مره يانفسي وصبر غلبان
ياعني السهر والدمعه شن دايراتتجيبن نان
الكون ليه رباً خالقو بي باطن القلو علمان
ومالنا علي همومو نشيله ما دام نحن ناس ضيفان
أنظروا للحياة وشوفها من تالا الوشي النديان
وشن داير يبقي غير الذكري رحماك يابني الانسان
ان بسمت معاي تراها وان عبست تراني كمان
ماشي معاها حسب اطباعه لاحد العمير وصلان
عطفي علي يتيمها الباكي ينبع قلبي ليه حنان
بدوره حياتو تصبح طيبه زي زرعاً شرب تليان
.......................................
حاتم هاشم
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: حاتم هاشم)
|
بسم الله الرحمن الرحيم
اتيقني
........
للشاعر..شريف محجوب
.......................
إتيـقـنـى فـــارق دروبـــك ومـابـعــود
لو تانى تنطبـق الارض تتجمـع اطـراف الحـدود
صورة الحقيقة المؤسفة فى جوفـي تتراكـم سـدود
ثارت براكيـن الاسـي وإتفجـرت وأبـت الركـود
شوق العيون المو كضب سبب الجفا وقول الشهـود
وعذت النفس الابيه البيها كت ليـك راضـي اجـود
مانمت فد يوم في لماك ماضقت يوم طعـم الهجـود
زول صان هواك وقدسو وماخلَ حاجي بلا السجـود
كتفتى بي حبل الاماني خنقتي بـى كـذب الوعـود
وشيعتى ريدو قبل يموت ودفنتى دون كفن او بـرود
فوق قوز خيانتك إختفي وبي فوقو قذيتـي الشهـود
شان يبقي شاهد للوراء واليمشي فوق دربو آ بيعود
ودايراني ارجع وانسي كيف؟ ياغادرة تنتظري الردود
ما إنتي قفلتي الدروب الكنـت فارشـه ليـك ورود
بكره القدر يرحـم أسـاي ويرمينى فـي قلبـاً ودود
يلفاني من آهات بكاي وبحر السعاده أنا فيهو أخـود
اتيقـنـى
إتيـقـنـى
إتيـقـنـى
......................................................
حاتم هاشم
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: خالد علي محجوب المنسي)
|
صدفة سعيد دي الجابتني ليكم
انشاء الله يا دكتور ياسين كل مرة يطلبو منك شئ ما تلقى وتنزل حاجة بمزاجك
الشي دا كلام ناس وشغل جن
صدفة سعيدة دي الجابتني ليكم
يا الحارقين فؤادي وما عليكم
( دا ما البجيب الحمار راجع للطين ذاتو )
إحساساً غريب نحوك غمرني
وساهر بعيوني كتير شغلني
والله ياترى ايه يا القبلي مني
أمكن دا الغرام لو صحا ظني
( عاد ابقى لك شنو ياهو الوجع بس البفرق الرمش وسهر العين )
والله تمازج الطمبور مع الايقاع عند محمد جبارة ليهو طعماً خاص
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
كتب أُستاذ/ خالد...
| Quote: والله تمازج الطمبور مع الايقاع عند محمد جبارة ليهو طعماً خاص |
إخوتي الكرام...
صبحكم الله بالخير والرضا...
كدي خلوني الأرُد علي الأخ خالد دا قبل أجيكم راجع وبالأخص عندي وقفة مع د. يس لكن كلام الحِبيِّب خالد دا وافق هواي تَب...
إنت عارف يا خالد أخوي... محمد جبارة دا... وعثمان اليمني... الله يديهم العافي... من الناس الإيقاعهم مظبوط مع الطنبور... بالذات في الحفلات... يعني إنت عارف يا اخوي الفنان تعرف قيمته الإيقاعية في الحفلة... لأنها مرات كدي مع السرعة والرقيص والطلعات وجرات النفس... الإيقاع قاعد يطِشْ من الواحد... لكن عليك الله شاهد ليك أي حفلة مصورة لود اليمني أو محمد جبارة... تلقى الإيقاع من يطلع لامِن يفارق الطنبور دا ياهو ذااااااااااتو بي فرد جرة... وبالأخص لو كان عثمان طبلة مع محمد جبارة... ولمن يقولها::
الله فوقِك يا زينَبُو... الله فوقك يا زينَبُو...
كميات مودتي... وداااااااااايماً يا خالد تفَرفِر فينا حاجات حلوة الله يديك العافية...
أبو الحســــــــــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: الكون ليه رباً خالقو بي باطن القلوب علمان
ومالنا علي همومو نشيله ما دام نحن ناس ضيفان
أنظروا للحياة وشوفوها من تالا الوشي النديان
وشن دارْ يبقي غير الذكري رحماك يابني الانسان
ان بسمت معاي تراها وان عبست تراني كمان
ماشي معاها حسب اطباعها لاحد العمير وصلان
عطفي علي يتيمها الباكي ينبع قلبي ليه حنان
بدورها حياتو تصبح طيبه زي زرعاً شرب تليان
|
عليكم الله ود العبيد دا خلا حاجة تاني تتقال؟؟؟
صور الحياة كما صورها النبي صلى الله عليه وسلم... لا خير فيها ما عدا العمل الصالح اليوصلك للآخرة... وفي النهاية عرج على كافل اليتيم الذي قال عنه الحبيب صلى الله عليه وسلم... (أنا وكافل اليتيم كهاتين في الجنة وأشار بالسبابة والوسطى...)... قيم قيم قيم ومعاني ودروس دايري مراجعة وتحليل...
تسلم يا الخليفة حاتم على هذه الدُرَر القاعد تتحفنا بيها...
وربنا يخضِّر ضراعك قول آمين...
كميات مودتي...
أبو الحســـــــــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
كتب د. يس...
Quote: الأستاذ ابوالحسين
سلام
يا أخي بالغت
دي صورة جميلة وما أجمل اللوبي المنور دا
تقول لي زهرة لوتس
مما شفت الصورة دي واللوبي اترسمت قدامي صورة النخيل القدام ناس
محمد صالح سعيد (تحياتي لصديقي محمد صالح اين ما وجد) وفيما اعتقد الشتلات دي مصفحا عثمان الخضر
تحياتي للأستاذ حسن عثمان الحسن وقولو ابشر بالخير الجراب ملان تب من نوع دا
القومة لود جبارة
|
الحِبيِّب د. يس...
نهارك سعيد يا اخوي... حقيقة يا اخوي الصورة جميلة وعلى ذكر الرجل الفاضل محمد صالح سعيد... طبعاً هو رجل قدامي ورجل جودية وفاضل بمعنى الكلمة... فكان قبل كدة حلاليهو مشكلة لي واحد في البلد وأنا عملت ليهو قصيدة مجدتو فيها وذكرت فضائلو وجمايلو على الناس في البلد... أقول في آخر مطلع فيها...
تحيا تعيش محمد صالح...
في خيرك ونعيمك سابح...
في شهادة نجدة الملهوف؟؟!! جايب بامتياز ناجح...
ودايماً في فعايل الخير فرسك في الأمام جامح...
ومهما عملو من دورات فريقك للدوري كاسح...
يزيدك الله من فضلو... بين تمرك وشتولك سارح...
(ياها دي الشتول الإترسمت ليك في خيالك فوق الدرب قبلي لي طاحونتهم)...
ويديك مهلة الأيام ويحفظ عقلك الراجح...
وتبقى سحابة للوديان بالخيرات ديمة راشح...
وجُودك يلفى كل عشمان زي بحر المسور الطامح....
التحية عبر هذا البوست لكل أهلنا في كلحية الناس الطيبين ناس حمودة وأزهري عبد المطلب وناس ود سليمان والخليفة (رجل الإحسان) محمد خير السيد والسكينجاب عموم...
وربنا يديك الصحة والعافية د. يس ويحفظك والأهل...
كميات مودتي...
أبو الحســـــــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
طلب الخليفة حاتم هاشم ترجمة الجزء الأول دا كلووووووووو...
Quote: حُُمًَّد إحمد التمرجي
الجزء الأول
جاء داخل من لا برَّا ... رمى الطوريي اللَّتُو فوق القسِّيبي المختوتَة في الكيميِّي الغادي من الدونْكا ... عامنو فاطر وشربان الشاي لكن حسَّا لو بى جويعة كدي ... راح على الدونكا فتح التُقُل الليل الكسري , خمش لو سنسني وبقى يقرض فيها ... كورك لى مرتو ... يا آمني .. يا آمني .. إنتي حُمَدَ إحمَد وينو ؟ قالت لو راح يسقي الحمارة ويجي ... قال لها الحماره ؟ والعَز القت لو ودّها سوق ود شنّه ما ساقها شي ...؟ قالت لو لا لا ... إنت العّز بايعها لى شنو ...؟ غلَّبتك في القش ... ؟ القش مو ياهو دا الراقد ... وبرسيمك البى تحت لى الليلي ما إتفرض ... قال لها :- عمو مرسل لو جواب مع ناس ود الفكي ... قال يرسلوهو ليهو هناك في أدبره , شان يشوف لو صِرفه , يدخلو المدرسة الصناعية يتعلم لو صنعه , وإنتي عارفاني معلم الله ... قتا اللبيع العز تجيب لو حق التذكرة ومصيريفات يوصلنو هناك ... أصلو القراعه ما نفع فيها , أقول لو أمش اسقي الملاح , ولا البرسيم البى تحت , يروح يبعج لي الموية في الحيطان نامن يشرقن آب يجيب خبرن ... وديناهو يبقى مراسلة في المستشفى عمل لهن فيها تمرجي , الحكيم إن بقى مرق يقص الراقدين في العنابر , ولا يقضالو غرد... يتحكر هو في بكانو , ويصرف في الحبوب للناس ... دار الزين بت النعيم كان ما الله شافها ساكت , مو كان دار يلحقها الصِح ؟ .. غَمَت لها الحبوب في إيدها قال لها تبلعيهن كلهن أسع ده , المسكينة جابت لها جك موية , وإتفرجَخَت وكَمَدَتِن في خشمها , بى صَمّتِن زي ما هِن , بلعتن ضمّه في ساعتن , نامن جات تزح للناس برا , غالبها تمشي بى كرعيها .. ؟ مشيت إتحمد لها السلامي لقيت جضوما بتل المنقايي المخورني ..., تعاين لي دار تنضم تقولي شي ... وغالبها تنضم , والعوض ود أم الحسين , جاتو الوِردِي , مشى لقى الحكيم ماهو فِي ...,حُمَّد إحمد مسكو طبزو حُقني تحت أباطو... إيدو لا يوم الليلي مدلدلا بتل بت اللِّعاب ... علا يزحها بى إيدو التاني ... حد ما يلاقيني في السوق يسمعني كلمةً ماها ياها ... دار يسوي لنا عوجي الجنى ده ... وأسع شواليتو الليل كريمي ده , بلا فايدي ساكت , البيلقاها كلها رايحي في كرشو , وإن فضل شي يديهو ناس البنطون ويجي داخل اهلو مع العمال , بتل الزول النعيم ... لزيتي بو كرشك وتقنتي بو تسعة شهور على الفاضي غايتو0
حُمَّد إحمَد سقى الحماره وجايي بالدرب لاقاهو بابكر ود النصيح , زولاً كدي كلمتو حاااضري ما قاع يتلفت لها شي ...ديمي عليهو مباري المداديح , ولاد حاج الماحي , يحمس لهن في الطارات اللتن , ويولع لهن في البخور , يَعَشَقْ في المديح , ويتهوزز في الداره نامن يقع في الواطا مغبي ويرشوهو بالموية , وهو الصلاة ما قاع يصليها!!! ... أها وقفوا ينضموا , حمد احمد قال لو:- أبوي عندو عَز جاي يبيعها , قال لي ودّها السوق , ما تجي اللبيعها ليك ..؟ والله حِسَّها سمح بالحيل ساعة تَمَعْمِعْ ... بابكر قال لو :- حسها سمح ..؟ نان ما تعلمها المديح ...؟ خلاهو ومشى على أهلن ...جاء داخل ..كرعيهو تشوفن من بعيد تحلف تقول لابس لو شرابات , من مشي الحفى والحال العليهن ... ملص عراقيهو وختاهو في العنقريب ... عليكن أمان الله العراقي واقف بتل الزول من الكدوب الفوقو ...إن جيت دار تطبقو يتفترن في إيديك بتل الكسري اليابسي ..وأصلو كان لى حُمَّد إحمد .. الصابونة الحلوي دي يبقى ليهو ستة شهور ما ختاها في جسماً ليهو ... بس يمشي يغتس في البحر ويجي مارق يا إندعك لو بى آشميقا يا ما إندعك ... ياهو ده حمامو , أبوهو كورك لو قال لو :- عمك مرسل قال يسفروك ليهو في أدبره يدخلك الصناعيي تتعلم لك صنعة ... قال لو :- آ يابا انا دار اسوي لي كارو إشتغل بها قبلي هني ... أبوهو ردا لو :- كارة أشني ..؟ البلد ملاني كوّارو ... والحمير وقعات في غضب الله ... زمان الناس يحشوا بن القش ويقضوبن مشاويرن ... أسع يا كافي البلاء حماراً تلقاهو مقَيّل في مراحو ماهو في .. جاتن آفة بقت لهن في رقبتن وشقاوةً إنتلحتن ... وأسع الكارو دي الدار تلقاها منها , تأكلك إنت ولا ياكلها الحمار ...؟ إنتا براك داير لك قيراطين اللات قمح ... بلا المريق ..في فد شهير ... أمك واقفي في دابك من عند الدونكا ما قاع تمرق ... كرش الحاجي اللتك دي كارتك آب تكفيها ... حضر نفسك للقطر الجايي خل المحقة البتسوي فيها دي ... |
ألحقني يا د. يس...
الحِبيِّب ود هاشم قال يشرحولُو قصة حمد إحمد التمرجي دي كلها...
نسوي شنو نحن بيناتنا شوايقة لندن...
بعد ماني داير أنزل الجزء التاني إتذكرت حاتم عندو كلمات ماها واقعة ليهو...
أها يا حاتم أخوي... فتح عيونك ديل وخل بالك وأحفظ الكلمات دي عشان حا نجي نذاكرها معاك...
(1) القِسِّيبي:: حاجة زي البرميل كدي كبيييييييييري مصنوعة من الفخار دايماً يحفظوا فيها العيش والتمر وكدي...
(2) الكيميي: الرُكن بتاع الغرفة يقولولو الكيميِّي أو الكيمِي...
(3) السنسني: دي الطرقة بتاعة الكسرة المرة... البي ياكلو بيها ملاح الخُدرة وأُم رقيقة يا ولاد البندر!!!
(4) القِراعة... دي عملية سقي الزراعة في الساقية تحت... ويقولو ليك فلان دا قَرَّاع يعني شغال يسقي في الزراعة تحت...
أها يا دكتور ياسين إنشاء الله أكون وضحت كويس... خالد المنسي شارك معاي بالحاجات البتتذكرها من حبوبتك زينوبة...
كميات مودتي...
أبو الحســـــــــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: صدفة سعيد دي الجابتني ليكم
انشاء الله يا دكتور ياسين كل مرة يطلبو منك شئ ما تلقى وتنزل حاجة بمزاجك
الشي دا كلام ناس وشغل جن
صدفة سعيدة دي الجابتني ليكم
يا الحارقين فؤادي وما عليكم
( دا ما البجيب الحمار راجع للطين ذاتو )
إحساساً غريب نحوك غمرني
وساهر بعيوني كتير شغلني
والله ياترى ايه يا القبلي مني
أمكن دا الغرام لو صحا ظني
( عاد ابقى لك شنو ياهو الوجع بس البفرق الرمش وسهر العين )
|
الحِبيِّب خالد... ماك براك إنت العملت فيك العمايِل دي...
إنت عارف صاحبي حسن عثمان من أولاد المقل من معجبي محمد جبارة لدرجة العشق الما عادي داك... فأول ما سمعت الأُغنية دي... إتصلت عليهو قلت ليهو أدخل حوش الشايقية شوف د. يس منزل شنو...
إنت عارف قال لي شنو؟؟؟ قال لي أول حاجة حنيت حنيت حنيت لامِن داير أبكي... وفكَّرت في الحجز لأنه كان مأخر إجازتو... شُفت السواها الدكتور في الناس خلاهُم ينطقْشُوا كيفن زي الماهُن طيبي...
وعزانا بس نحن يا أُستاذ/ خالد إنو الجراب ملياااااااااان حلالي... وإنشاء الله ما ينضب معينكم يا الحِبَّان...
كميات مودتي...
أبو الحســـــــــــــين..
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
كتب أُستاذ/ موسى الحسين...
Quote: مشغول مشغول مشغول جداً .
إتتاوق على عجل ولكن جاييكم جاييكم الله يدينا مهلة ونلقاكم تامين لا مين آمين. |
اللللللللله يحل مشغوليتك دي يا اخوي...
والبركة في متاوقتك لينا دي... وقلبك المعانا... والبصيص الشويي الجايينا من نور وجهك من المتاوقة منور علينا الشاشة...
التوفيق والسداد لك وتجينا راجع لتعليقاتك وتحليلاتك الممتازة ومؤثرة ديك...
كميات مودتي...
أبو الحســــــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
بسم الله الرحمن الرحيم
عبدو اخوي
..............
الشاعر.. حسن الدابي
.....................
صحيح ياعبدو اخوى قولك حقيقه
كتير الطفشه ( الجلا ) من فريقه
يزازى نقل سميحات الخليقه
ورنين صفارتو نفسى ابت تطيقه
معاها انا كيف اسوى شنو الطريقه
تعيق فى الناس اله الناس يعيقه
اتمناله فى دالة غريقه
تحتل فيها ما تفضل شقيقه
تطير ريشاته منها بى فريقه
وصميم مكناته تلتهمو الحريقه
قمرات نومه تسكن ام دريقه
وتولد فى عنابرو عشان غريقه
بناتنا حليل سروحن فى السبيقه
لقيط ام راس مبقعى و الكريقه
اديهن حلوه غير لبس ام دقيقه
وبدون كترت غويش نفسن طليقه
جمالن خلقه لو لفحن طريقه
وبدون مضغوط فراد باهى زيقه
يا حليل قتانن الفوق السليقه
ليقيمتو تطمن الضارباهو ريقه
كتير قبلك يئن مضروب بديقه
تسد عبراتو تسمع لى شهيقه
...................................
حاتم هاشم
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: حاتم هاشم)
|
بين الخليفة وأمونة بت حاج أحمد
للشاعر الفذ محمد طه القدال
ما ضهبته أقول لقيتك
وانت في كل الخواتم
والمأتم...
والنجيمات والعواتم
والمغنين المطاليق
وما حزنت أقول بكيتك
أنت في حزن المخاليق
الفرح جايك وعد
غنوة أولاد التحاريق
السعد ولا البعد
البعد ولا السعد
وكنتي في ليل الخوابي
تهاتي بينات الطوابي
تحاكي جقليب السعي
الجنانيب خلو حجرك
ريح يفوفي
وعين مزرزره
من شقى الفرح المرابي
ومنية الوعد الدعي
يا دياري الوين أني
تور عفين الشين أني
ما أضينة وزين أني
وأنت في خوفك تكاتل
رفة الطير والحفيف
وأنت في شوفك تخاتل
عينّة الجلبت خريف
وأنت في اللالوبه
مصلبة البنيات
النسيمات الهفيف
بطنك كرّشت
غي البنات نافي
دقنّك حمست
جلدك خرش مافي
وكنت في اللالوبه
مشنقة الوليدات
ناس نجومي
ومحبس النفس الرهيف
وكت الوهم وافيت
وكت العلم جافي
صدق الوعد نافيت
مر الصدق وافي
وكنا بنشيل الغبائن والأناشيد
جهديه الأورطية
جهديه الحلبونة
شدو جمالن وجونا
وجلبنا ليهم سمسم
السمسم ما كفاهم
حلبنالهم سعية
وجينا للبقعة أم قبائل
سيل من الوادي الكبير
الكفيف شايل الكسيح
يا عيون ود اب بكير
واحدة من توشكي وتقلع
والتاني تقلع في المطامير
يا جبة الدرويش
البابا إسل العيش
الله بسلا
والبابا خدمته الديش
الله بسلا
والبابا القول بشويش
الله بسلا
والبابا القول عضير
يا عيون ود اب بكير
وعماك في حقّك ديه
لزمنن مو جهديه
جهديه الأورطية
جهديه الحلبونه
شدو جمالن وجونا
جلبنا ليهم سمسم
السمسم ماكفاهم
حلبنالهم سعيه
ياعيوني شن بتشوفي
يا أمونه شن بتشوفي
شدرن تال اليمامه
ولا الصقر الحمامه
ولا البطن التفوفي
يا امونه شن بتشوفي
يا عيوني شن بتشوفي
جهديه وسيف ورايه
تبروقه وخيل وشايه
آذان بالجوع آذن لي
أم خوفك فايت خوفي
يا امونه شن بتشوفي
ياعيوني شن بتشوفي
تلت التلاته شلّق
تاني التلات محلّق
والتالت جا يبشرني
ختفو الدايرين حتوفي
يا امونه شن بتشوفي
ياعيوني شن بتشوفي
سنتن والعيش بالقبضه
قلبك شاباي للنبضه
جوني العشامه لقوني
جهديه ماكله كتوفي
يا امونه شن بتشوفي
يا عيوني شن بتشوفي
شايفه الدموم واللمه
بين الدقون والعمه
ولا آنا الفوق معلق
صقر الحدي مندوفي
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: خالد علي محجوب المنسي)
|
Quote: كدي خلوني الأرُد علي الأخ خالد دا قبل أجيكم راجع وبالأخص عندي وقفة مع د. يس لكن كلام الحِبيِّب خالد دا وافق هواي تَب...
إنت عارف يا خالد أخوي... محمد جبارة دا... وعثمان اليمني... الله يديهم العافي... من الناس الإيقاعهم مظبوط مع الطنبور... بالذات في الحفلات... يعني إنت عارف يا اخوي الفنان تعرف قيمته الإيقاعية في الحفلة... لأنها مرات كدي مع السرعة والرقيص والطلعات وجرات النفس... الإيقاع قاعد يطِشْ من الواحد... لكن عليك الله شاهد ليك أي حفلة مصورة لود اليمني أو محمد جبارة... تلقى الإيقاع من يطلع لامِن يفارق الطنبور دا ياهو ذااااااااااتو بي فرد جرة... وبالأخص لو كان عثمان طبلة مع محمد جبارة... ولمن يقولها::
الله فوقِك يا زينَبُو... الله فوقك يا زينَبُو...
كميات مودتي... وداااااااااايماً يا خالد تفَرفِر فينا حاجات حلوة الله يديك العافية... |
عوافي سيد الحوش ابوالحسين
كيف حالك اي والله صدق يا اخوي لاحظت ذلك في غنى اليمني ومحمد جبارة وهناك آخر لم تذكره اسمه برو ايضا تحس في غنائه بالطمبور متعة لما تجده من توافق وتوأمة بين طمبوره والايقاع وصوته.
لك الود والتقدير
خالد محجوب
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: خالد علي محجوب المنسي)
|
الأخ الفاضل خالد المنسي
إليك هذه المقاربة التي تعطي صورة تقابلية لمأسأة أمونة بنت الحاج حمد، قد سبق نشرها في المنبر، وهي مستلة من أوراق قديمة يرجع تاريخها لعام 1987م، لكن أحياناً الحديث يجيب الحديث ولو كان الحديث مكرراً، وياحبذا لو أردف الأخ ياسين ذلك بالصوت والصورة: بت البلد.
مع خالص تحيتي ومودتي
أبوشوك
**************************
الدلالات الرمزية في شعر الشايقية الغنائي:
بت البلد نموذجاً
د.أحمد إبراهيم أبوشوك
مجتمع الشايقية كسائر المجتمعات في السودان، يعيش في صراع بين القديم الموروث والجديد المستحدث بفعل حركة العمران البشري المتجددة دوماً، ونلحظ أن جدلية هذا الصراع لها حضور كثيف في أدبيات الطيب صالح وشخصياته الدائرية، كما حدث في رواية عُرس الزين الشهيرة، التي اتخذت من قرية ود حامد موطناً لها، حيث تعاظم الجدل بين الجد المحافظ "محجوب"، والحفيد النازع نحو تجديد الماضي التليد "الطريفي".
ونود في هذه الإطلالة أن نقف على فصول صراع تراجيدي آخر، نسج حيثياته شاعرنا المبدع الأستاذ السر عثمان الطيب في لوحة أدبية رفيعة الخيال ورمزية المعنى، تقوم على ثلاثية خلاقة، أبطالها: "بت البلد" التي تنادى بإقرار حقها المشروع في الحب، والدها "حاج مُحُمد" الذي ينظر إلى إله الحب نظرة احتقارٍ وتوبيخٍ، لأنه يعُدَّه إلهاً ناسخاً فاسخاً لعادات الأهل والعشيرة، و"ودالبلد" الذي يمثل الطرف الغائب في حيثيات الحوار، غياباً حسياً، والحاضر في مخيلة بت البلد حضوراً معنوياً، لا تؤمن بشرعيته أدبيات ذلك المجتمع الريفي الغارق في موروثات الماضي بخيرها وشرها. وفي تناولنا لهذه القصيدة الرمزية سيتركز النقاش حول المحاور التالية:
البيئة التي عاشت فيها بت البلد
عاشت بت البلد في بيئة رغدة، وبسيطة من غير تعقيد، هائنة لا يكدر صفوها إلا صفاء قريحة أهلها الطيبين الأخيار... الفرد في ذلك المجتمع عبارة عن خلية حية في ذلك الجسد المترابط، ومشاركته فيه قائمة على عموميات وقيم تواضع عليها الأهلون، يحتفلون ولا يدركون حقيقة مشاعر المحتفي به، ويشاركهم المحتفي به الفرحة أحياناً بمشاعر مصطنعة وقناعات مهزوزة، دون اتخاذ موقف فردي يعكر صفو ذلك الاجتماع البشري، حتى لو كان ذلك الموقف على حساب قيم وأحاسيس ارتضاها لنفسه. وفي هذا الواقع المحكوم بقيم العقل الجمعي أذيع خبر زواج بت البلد من غير إعلان مسبق، علم به العوام دون الخواص، باركه الجميع لأنه عمل خير، يجب أن يتم دون مشورة صاحب الشأن، هكذا يصور لنا الأستاذ السر سرعة انتشار خبر خطبة بت البلد من ذلك العريس الذي اختاره لها والدها حاج مُحُمد في الأبيات التالية:
بلا خبر تلقى الخبر مالي البلد
قالوا العريس قام بالأحد
الحلة جاطت والحريم يتهامسن جاي الولد
كوم من بنات للبير ورد يتحدثن جاي الولد
يابختها وشوقنا نحن اللينا جمر الشوق وقد
*****
لامن خلاص الليل دخل
آخر شعاع من الشمس روح نزل
ضو القميره جاء من بعيد بهر قدل
دافر ظلام الحله قدامو وصل
****
ناس البلد النام رقد
والماسك السبحي عبد
مشغول هو بى خبر العريس القالوا قام بالأحد
إذن ما هو موقف بت البلد صاحبة الشأن من هذا النبأ الذي لم يطرق سمعها من قريب أو بعيد؟ اغمضت بت البلد جفنيها على أحلام ضياع، منسوجة بخيال تطلعات أوهى من حبل العنكبوت، وذلك الضياع كان يتجسد في طيف "ود البلد" الذي أحبته دون أن تراه أو تعرف عنه شيئاً.
الليلة هناك بعيد بقادي في آخر الديار
راكوبة ضلها أحر من حر النهار
كوم من بروش وجريد تمر عيدان صغار
دلوق هدوم موروثه من زمن الكبار
تلات عناقريباً صغار كرابه منقطع نزل
والنوم من البى فوقها روح داك جفل
***
راقد هناك كوم من ضياع
مركب مسافرة بلا شراع
وأحلام مسافرة بلا وداع
دموع ضياع تجاره من غير انقطاع
أحرف أنين ما خطتن أيد بيراع
الحلم الضائع والكنـز المفقود
استيقظت بت البلد من قفوة حلم عابرة، وإحساس خفي أبحر بها إلى ضفة النيل اليمنى، حيث يسكن ود البلد ذلك الكنـز المفقود... أبحر بها الخيال إلى ذلك الشاطي المجهول، حيث رسى بها زورق الأحلام...
بت البلد عبراتها سدت في الحلق
تبكي تنوح تشرب دموعها تنشرق
لمن حسيس نقارة جاها من الشرق
***
قامت على الحيل صنقرت
شالت طريحتها للدميعات كفكفت
فلا عجب أن هذا الحلم هو حلم طفولة باكرة عابثة، لأن بت البلد لازالت في هذه الأثناء ماثلةً أمام لوحة من خيال ماضيها الغرير، حيث يظهر في الأفق والدها حاج مُحُمد، وبجانبه روتين حياة هادئة وهائنة بما كسبت، حيث تبدأ من فجر صباحها البازغ إلى غروب شمسها الساكن عند ضفاف النيل الخالد: كوب من شاي الصباح الممزوج بحليب أغنام راتعات في مُراح مجاور لمنـزل حاج مُحُمد ... مصحوباً بحفنة تمر من ثمار شجيرات نخيلهم الباسقات ... ثم يعدون في العشي بزوامل بطان، ومعهم حِزم (كُليقات) من لوبي الجروف الذي يزرعونه على ضفاف النيل لقوت أنفسهم المتواضعة على البساطة، وقوت أنعامهم ذات الضروع الحالبة ... ويصور لنا الأستاذ السر هذا المشهد بقوله:
أتذكرت فجاة السنين الفاتو جن
وأيام زمان اتلملمن
أتذكرت كانت تقوم فجراً صباح
لمن يقموا أهل الصلاح
وأبوها شايل السبحي صاح
ياشفعه شدي سريع سوي الملاح
شيلي المناجل وأمشي قدامي الجرف
أتذكر كانت تسبقو تمشي تنـزل بي تِحِتْ
تمسك صبيت التمرة بايده تَحِتْ
تقعد تحش اللوبي لي الكاويق تقش
تصل البحر والموج يداعبها فوق هدومه ينط يرش
وبعدين تشيل القش تفوت واليوم يفوت
وتفوت سنين وتمر سنين يكبر عمير بت البلد
ويكبر معاه كمان حنين
أريحية الفطرة ورمانسية الخيال
تعاقبت حلقات الزمن على بت البلد، وكانت هذه الحلقات تمثل بُعداً مهماً من أبعاد حياتها الباكرة، حيث بدأ ينمو في صدرها الناهد شعور دفين وأحساس صادق بقيمة الحب في الحياة، حباً يربو على هامات الغريزة وماديات الحياة البازخة، لأن غاياته المنشودة تتجلى في عشقها العذري لود البلد، ذلك الفتي الذي بادلها المشاعر، ورأت في جبينه علامات الوفاء، وبين جفنيه سحائب الوجد والصبابة الهاطلة، وقد صور لنا ذلك الواقع الأستاذ السر عثمان الطيب بخياله الخصب في لوحة أدبية فريدة:
الليله في يوماً صباحو صباح هنا
واحة عبير نغمة غنا
ريحة لبينه مقننه
مر الجنى وسلم على بت البلد
ذي عادتو سلم وأبتعد
تابعاه عين بت البلد
بت البلد سمعت ضريبات القلب
ياالله مالو ده ها القلب
بعد الثبات كيفن خرب
بت البلد عرفت تحب
***
واليوم داك وماجاها نوم
مادام خيال ود البلد يمشي يحوم
بين الخيال شافت وجيهو الهاش وباش
شافت عيونو الفيها فيض أحلامها عاش
شافت سحاب الريدة فوق واديها راش
أحلام مدينة "بت البلد" الفاضلة والمستقبل المجهول
تاهت بت البلد مع وجدها المكتوم، وشرعت تبني في عش زوجية حالمة على أطراف مدينة فاضلة شُيد أساسها على رمال رومانسية متحركة في أرض لا تؤمن بقيمة الحب، تصورت أن ود البلد تقدم إليها، وطلب يدها من حاج مُحُمد، ثم هيأت لهما الأيام متكأً عند محفل عُرس، فجلسا سوياً وقت الأصيل والشمس تحن إلى خدرها جهة الغروب ... تبادلا نظرات الوفاق، بعدها تصافحا معلنين زوجهما على عامة أهل البلد. فلا غرو أنها أحلام وردية غُرست في أرض نكدة وواقع مرير، تجسدهما المقاطع التالية:
الليلة تاهت مع الشوق الما عاد ينكتم
والصورة هاد في قليبه صبح وسم
تاهت مشت سايقاها دقات الدليب
لي دار حبيبها منى القليب
لي قعده عصراوية فوق العنقريب
لي الونسة والخاطر يطيب
لي مسكة في أيد الحبيب
***
الوقفة قدم الجنيات
القرمصيص وغنا البنات
ياالله وين تلقى الثبات
والصفقة من تال الولاد
تسمعها جاياها من أخر بلاد
تراجيديا العواطف وتقاليد الزمن الغادر
ثم بعد هذا المشهد الرومانسي ينقلنا الأستاذ السر إلى عرض حيثيات موقف حاج مُحُمد، وهو موقف شخصية معيارية في مجتمع تُلوى بين يديه صوالف الوجد والصبابة، وتُؤاد أحلام العذارى... مجتمع يكفر بقيمة حب، ولا يؤمن بأن للمرأة أحساس وعواطف ورغبات ذاتية تشد إليها نبلها... في ظل هذا الواقع التراجيدي يعقد حاج مُحُمد زواج ابنته خلسة من وراء حجاب مع العريس القادم بقطار الأحد، راجل موظف وعندو مال، وبذك يسدل الستار على مشاعر صادقة، كانت تود بت البلد أن تعيشها مع محبوبها ود البلد. حاولت بت البلد أن ترفض هذا العرض، لكنها قبلته كُرهاً عندما ...:
أتذكرت قول حاج مُحُمد والدها
حالف بي يمين ود البلد ما يخدها
لو كان ركع قدامها صلى يعبدها
***
أتذكرت قول حاج مُحُمد والدها
وصف العريس الجاي بقطر الأحد
كتَّر محاسنو عددها ....
راجل موظف عندو مال
يأويك في بيتاً حلال
تبقي لو أماً للعيال
بالرغم من أصرار حاج مُحُمد إلا أن بت البلد حاولت أن تقدم رفضها الحاسس بالدونية في ظل إحساس عميق بغلظ قيود الواقع المرير، وكآبة البدائل المطروحة، وعند هذا المنعطف تحطمت الأحلام الوردية التي حلمت بها بت البلد:
أتذكرت لمن أبت قول حاج مُحُمد والدها
كيف نهرها وكيف نهزرها
حالف بي يمين بيودرها
لو ما رضت بالجاي بي قطر الأحد
***
قاليها: ما عندك أدب
تعبان سنين فوقك تعب
بديك لي زولاً كعب
تربال عشتو عدم عدم
لو قاري لو ماسك قلم
لو أخديتو تندمي صح ندم
يشقيك يورك الألم
هنا شعرت بت البلد بقساوة الزمن الجائر، وبدأت تعيد ذكرياتها مع ود البلد لكن لا حياة لمن تنادي... آمنت بت البلد بقدرها المحتوم، أن تكون كماً مهملاً من أكوام الضياع في بلاد لا تقدر قيمة الأحاسيس والمشاعر، وألقت لواء التحرر عندما هاجر دو البلد بوجدانه وجسده بغية البحث عن لقمة عيش كريم لتأمين مستقبل المجهول، وواقع حالها يقول:
أتذكرت كيف الحبيب ود البلد
في الغربة سافر وأبتعد
بكت لمن الخبر زاع في البلد
أنو العريس قام بالأحد
***
الحلة جاطت والحريم يتهامسن جاي الولد
لكنهن ما عرفن الشوق كيف وقد
ما عرفن هي شوقها تب ما عندو حد
مو للعريس للحبيب ود البلد
دا الراح في زحمة ضياع ما توجد
يا حليلك إنت يا بت البلد
هكذا استشهدت ريحانة التجديد في بلاد لا تؤمن بقيمة الحب، وبذلك شكلت حلقة من حلقات المقاومة الصامتة، التي حملت لواءها من قبل أمونة بت الشيخ حمد عندما ألقت بجسدها العاذر في جوف النيل الخالد، رافضة الزواج من رجل بلغ من الكبر عتية، اختاره لها والدها الشيخ حمد على حساب مشاعر صادقة تبادلتها مع الحبيب ود البلد. هكذا انتصر حاج مُحُمد الذي كان يمثل واقعاً كلاسيكياً، يعيش على اجترار الماضي دون شرعة ولا منهاج، على ريحانة التجديد (بت البلد) التي حاولت الانفصال عن ذلك الواقع لكن دون جدوى... هكذا بفضل حاج مُحُمد وأعوانه ظلت العواطف بمثابة برعم نامٍ وضع عليه صندوق اجتماعي ذو ثقب واحد، يأتي منه الهواء والضوء، وعلى الريحانه التي بداخله أن تكيف مسار حركتها تجاه ذلك الثقب، الذي يشكل ضمان بقائها على قيد الحياة، لذا ظل مصير العواطف والوجدان معوج القوام لعدم استقامة أصله، وهذا الأثر نجده واضحاً في أشعار الأقدمين من شعراء الشايقية والبديرية أمثال: إسماعيل حسن، وخضر محمود، وإبراهيم ابن عوف، وفي أدبيات المحدثين أمثال: علاء الدين أبوسير، وحاتم حسن الدابي، والأخ الصديق: محمد على الحبيِّب.
* (مستلة من أوراق قديمة: بورتسودان 1987م)
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: وكت السمحة فى هيباته تتجلى
تشيل خطوات فى ايقاع
حلات ايديها فى التله
تودى صديرا قداما
تسيبو سبيبا يندلى
تخلى الداره فوق نيرانا تتغلى |
والله إنت يا حاتم قاعد تنْكُتْ لك في جنس بركاوي من قِسيبتك... الله يجعلها دايماً عامرة...
إنت عارف يا الحِبيِّب قبل كدة في حلقة مع ود اليمني... في التليفزيون تكلم عن الغناء زمان وبالذات عن أغاني الدارة... لأنه كان متفرد جداً في هجيج الدارات... فقام قال... أنا أصلاً ماب أغني إلا للبت لمن تقوم ترقص...
يعني شوف... وكت السمحة في هيباتة تتجلى...
أها هني هي يادووووووووووب داخلي الدار وشافها بي قعر عينو...
تشيل خطواتها في إيقاع حلاة إيدينا في التلة...
هني ملاحظة الفنان ليها... يعني إتمكن بي نظرو في خطواتها عشان يظبط عليها الأُغنية...
تودي صديرها قدامها... تسيبو سبيبها يتدلى...
ودا طبعاً رقيص زمان الرقيص بالرقبة والصدير والفديع والتَلَّة (قديم الحمام)... إنتو ما أظن شفتوهو يا حاتم!!!
وبعد ما وزن الأُغنية عليها...
بعد داك هي عاد تتفنن...
تخلي الدارة فوق نيرانها تتقَلَّى...
والله دي صورة يا حاتم أخوي الواحد ما يحس بيها إلا يكون شافها وشاهدها... وأنا دايماً ومعظم الإخوة العاشقين لفن الطنبور... لمن يسمعوا أغاني اليمني يتخيلو الدارة قدامهم... بالذات أشرطته القديمة المسجلة من بيوت الأعراس...
الله يديك العافي يا حاتم...
ويعافي شاعرنا عبد الله محمد خير والمبدع لي يوم الليلي الفنان عثمان اليمني...
وكميات مودتي...
أبو الحســـــــــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: معاها انا كيف اسوى شنو الطريقه
تعيق فى الناس اله الناس يعيقه
اتمناله فى دالة غريقه
تحتل فيها ما تفضل شقيقه
تطير ريشاته منها بى فريقه
وصميم مكناته تلتهمو الحريقه
قمرات نومه تسكن ام دريقه
وتولد فى عنابرو عشان غريقه
|
إنت عارف يا حاتم أخوي...
الله إستجاب دعوات شيخنا حسن الدابي دي... هسع لا الجلاء ولا كربكان ولا عطارد ولا الزهرة... يا كافي البلاء كلها وقفت... ربنا يبَّس عليها النيل... لكن ربنا يقوم الخزان دا أملنا تاااااااااني تنتظم حركة البواخر دي والخير يعم البلد من كريمة لا دنقلا...
كميات مودتي... وواصل إبداع الله يديك العافي...
أبو الحســــــــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
كتب أُستاذ/ خالد المنسي...
Quote: عوافي سيد الحوش ابوالحسين
كيف حالك اي والله صدق يا اخوي لاحظت ذلك في غنى اليمني ومحمد جبارة وهناك آخر لم تذكره اسمه برو ايضا تحس في غنائه بالطمبور متعة لما تجده من توافق وتوأمة بين طمبوره والايقاع وصوته.
لك الود والتقدير
خالد محجوب |
إسمه عيسى بروي... وهو من الفنانين المجيدين جداً... ورسخ للأُغنية السريعة المضبوطة في فترة مضت...
إنت عارف يا خالد أخوي... زمان عيسى بروي دا... طبعاً هو من أحدى جزر المناصير وعلى ما إعتقد من (شري)... فعيسى دا إتذكر لمن كان يجيبوهو أول حاجة من الإنطباعات الرسخت في نفوسنا من بدري خلاااااااااس يقولو ليك عيسى دا ماب يشرب (الشي الفلاني داك)... يشرب اللبن... أها وتاني... جزمتو (بدون ما تواخذوني يعني) دايماً بيضاء.. وتاني... العمي كبييييييييري ومجدوعة لا وراء... تاني... لازم تكون قدامو طربيزة لمن يطرب يضع عليها رجله... وإنت عارف يا دكتور/ ياسين... سر الطربيزة دي لي شنو؟؟؟ أولاً عشان تظهر ملامح الجزمة البيضاء وتانياً عشان طنبورو تقيل خلااااااس عيسى دا الطربيزة بيرفع عليها رجلو اليسار البي جنبها إيدو اليسار شايلي الطنبور!!!... أنا قابلتو في حفلة في الخرطوم قريب سفري وواجهتو بالكلام دا... قال لي يا ولدي كلامك دا كلو صاح... بس حكاية الجزمة دي ماها صاح... وفكاها ضحكة...
فعيسى بروي... فنان بمعنى الكلمة... وهو يخيل لي من أدخل الإيقاع السريع لكن ما بالسرعة المفرطة اليومين دي... وكان إيقاعو زي ما قلت يا خالد موزون ووقفة طنبورو مختلفة قريبة لي وقفة الرواويس... وهسع اليومين دي كمان لو شفتو في الفضائية السودانية يمدح (أحمد صادق الميعاد... هووووي بهجة الأسياد)... تدي ربك العجب...
الصحة والعافية للمبدع دوماً عيسى بروي وكل أهلنا المناصير أهل هذا الذوق الفني الرائع والتحية لك أخي الكريم خالد وأبقى قريِّب...
كميات مودتي...
أبو الحســـــــــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
كتب د. أحمد أبو شوك...
Quote: هكذا استشهدت ريحانة التجديد في بلاد لا تؤمن بقيمة الحب، وبذلك شكلت حلقة من حلقات المقاومة الصامتة، التي حملت لواءها من قبل أمونة بت الشيخ حمد عندما ألقت بجسدها العاذر في جوف النيل الخالد، رافضة الزواج من رجل بلغ من الكبر عتية، اختاره لها والدها الشيخ حمد على حساب مشاعر صادقة تبادلتها مع الحبيب ود البلد. هكذا انتصر حاج مُحُمد الذي كان يمثل واقعاً كلاسيكياً، يعيش على اجترار الماضي دون شرعة ولا منهاج، على ريحانة التجديد (بت البلد) التي حاولت الانفصال عن ذلك الواقع لكن دون جدوى... هكذا بفضل حاج مُحُمد وأعوانه ظلت العواطف بمثابة برعم نامٍ وضع عليه صندوق اجتماعي ذو ثقب واحد، يأتي منه الهواء والضوء، وعلى الريحانه التي بداخله أن تكيف مسار حركتها تجاه ذلك الثقب، الذي يشكل ضمان بقائها على قيد الحياة، لذا ظل مصير العواطف والوجدان معوج القوام لعدم استقامة أصله، وهذا الأثر نجده واضحاً في أشعار الأقدمين من شعراء الشايقية والبديرية أمثال: إسماعيل حسن، وخضر محمود، وإبراهيم ابن عوف، وفي أدبيات المحدثين أمثال: علاء الدين أبوسير، وحاتم حسن الدابي، والأخ الصديق: محمد على الحبيِّب.
* (مستلة من أوراق قديمة: بورتسودان 1987م) |
يا الله تسهل للوِريقَات الباقي تجينا منسلِّي...
إنت عارف يا د. أبو شوك... كتاباتك دي ماشاء الله (وعيني باردي)... دايري الواحد يقراها بي نفس واااااااااحد وسداري كمان ويعيدها ويكررها وبعد دا ما يشبع منها...
الله يديك العافي ويخضِّر ضراعك قول آمين... ولا تطول الغيبة شئ...
كميات مودتي...
أبو الحســـــــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: خالد علي محجوب المنسي)
|
الأخوة الكرام لكم التحية
نحن جيرانا بالحيطة شايقية وناس أصبحوا أهلنا معاونا واحد وهم من القرير ناس حاج محمد سعيد ودقرافي ومشهور بأسم بلول,, ونحن صغار كان مفتي شندي في ذاك الزمان يسمى ( الواعظ ) رجل فحل أسمو علي الواعظ لا أذكر أسمه بالكامل لكن على ما اعتقد من منطقة القرير لانه كان دائماً في زيارة ناس بلول ود حاج سعيد وهو كان رجل شاعر واذكر ان سمعت منه قصيدة قال لبنته الوحيدة وكانت مسافرة من كريمي للخرتوم وهو مقدمها محطة محطة بالشعر من قامت من كريمي.... لاسف لا أذكر هذه القصيدة رغم انها كانت جميلة أذكر فقط بيت واحد منها
عند ابوحمد آذانو كبّر
سؤالي يا الكرام هل منكم من عرف هذا الرجل وهل منكم من يحفظ تلك القصيدة ؟؟؟
لكم التحيا والاحترام
خالد محجوب
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: أبو الحسن سلامات
الصورة مالا ما بتشبه بلدنا (ام دي زراعة بعد الانقاذ" شايف لي سور
بعيد في اليسار واعتقد زول راكبلو حمار او معاهو "بقجة" بيضاء ، والشيء
المزروع ما عرفتو شنو " انتو بقيتو تزرعوا "الهناي داك" يا كافي البلا |
الله يجازي محنك يا د. يس... خليتني أضحك متل الماني نصيح...
الشئ دي سرابات كدي دَقِّق النظر شويي... ما كُنتو في بجبوج قاعدين تزرعو السرابات (الطماطم والفاصوليا والبطاطس؟؟؟!!)... ولة إنت طولت من الحكايي دي...
على شان أُغنياتك الجميلة النزلتها تحت دي أهديك التميرات ديل... والصور دي ملطوشة من حوش الشايقية بالبركل دوت كوم...
شوف الجدول دا مَمَرْتِقِنُّوا كيف؟؟؟ الظاهر جديد يادوب يسَقُّوا فيهو!!!
ولك مودتي... قواسيب قواسيب...
أبو الحســــــــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
كتب أُستاذ/ خالد محجوب...
Quote: تعرف يا دكتور تحضرني الآن أبيات لشاب في منطقة شندي قالها عندما أجبر للزواج من بت عمه وهو كان بهوى آخرى لكن خضع لرأي الأسرة وتزوج بنت عمه وفقط نال من حقوقه أن قال هذه الأبيات من الشعر:
الحال العلي حال العدو المسكين
وحال الكتفوهو وسالين علي السكين
وحال الفي البحر حايشنو تمساحين
وحال الفي السجن ماقدر لو سنين
خالد محجوب
|
الحِبيِّب خالد...
صباحك زين...
أبشرك يا خالد أخوي زي الحالات أعلاه دي إختفت خالص من مجتمعاتنا والحمد لله بإيجابياتها وسلبياتها... ودا طبعاً موضوع نقاش طويل... وفيه آراء شتى... البعض يرى أن ذلك هو الأفضل بما فيه من حفظ الأُسرة وترابطها بين أبناء العمومة وغيره... والرأي الآخر يرى الإنفتاح إلى القبائل الأخرى والبيوتات المجاورة للأُسرة فيه ما فيه من الفوائد خاصة في العِزْوَة وهذا نراه واضحاً في أهلنا السوراب... الآن أكبر بيوتات الشايقية وذلك لإنفتاحهم للزواج والإختلاط بغيرهم من غير الشايقية حتى صارو الآن ماشاء الله ربنا يحفظهم أينما كانوا وحلُّوا...
وبجيك راجع بي نماذج للموضوع دا... لو ربنا حيانا...
كميات مودتي...
أبو الحســـــــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: ابو الحسين ود عمي كيفنك
ان شاء الله تتجازوا
والله لمن سمعتة ود البركل اختللي قدلة ورقصة في نص مكتبي لامن المغاربة قايلني جنيت
الله يحفظكم يا الحبان ويطرح البركة فيكم
انا غايتو مبسوطلي بسطة فايتي على القوانين |
إبن عمي الحِبيِّب طارق...
الللللللللله يديم فرحتك وطربك يااااااااااارب... ومع د. يس (الله يديهو العافي) تحلو القعدة والجلسة ومعاهو دايماً الطرب والفرح الله يعمر جِرْباتُو بالنوع الزي دا زي دا...
عليك الله أمشي راجع أُغنية محمد جبارة صُدفَة سعيدة دي الجابتني ليكم وتعال أديني رايك...
كميات مودتي... قاعد أجي أتاوق أتاوق أدي أهلي ناس الإمتداد والصحافة سلامي سلامي مع الصباح...
تسلم يا الحِبيِّب وأبقى قريب...
أبو الحســــــــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
كتب الأُستاذ/ حاتم هاشم...
Quote: بسم الله الرحمن الرحيم
تعال قص البلد وارجع
........................
تعال قص البلد وأرجع تعال أدي الغُبش طلة
بقالا الليل غـُتا ومُقـنع سُترتك يا صباح الله
ضُراعك ِمدو لي رضع ضروع أُماتة قطن قط
مراكب شوفا لا مشرع ولا بان في مداهن شط
تعال يا شافي يا كافي شموخاً في زمن منحط
من الفي تعال بجي المافي معاك وهطنا وإتوهط
تعالنا نحـن من شـفع نفك الحيرة بي حيرة
متين ما الليل يصن نسمع وراء الآهات غُلب نوره
أبوي قالولنا جيبن دا صباحات الله بخيره
تويب أمي الزمن هدا صباحات الله بخيره
وصباحات الله لاقيته لا كراسه لا قلمه
صباحات الله لاقيته ململم في العيون ألمه
صباحات الله لاقيته تجود في الضحى وتضفر
صباحات الله لاقيته تليس في شقوق بيته
صباحات الله لاقيته أكان لاقيته في مشرع
مكان خليتا تتوجع اكان لاقيته في مستشفى
فطن إنداي جامع سوق محطة ملمة
أكان في بيته أو مصنع
محل لاقيته تنذمر مكان خليته تتوجع
تكد تكدح تباصر كم رجاء أتقطع
أبت تطلع من المدفع طلع خازوق خوازيق البلد زادت
طلع نمراً وراهو ضباع وضاع ما ضاع وكان ما كان
يفيض النيل نحيض نحن يظل حال البلد واقف تقع محنة
طلع خازوق خوازيق البلد زادت
سألت عليها مشيت ومشيت مشيت خشيت على حلة
لاقيت شعاع ضال من ضو صباح الله
لاقيت شعاع أسمر قاعدلو فوق بنبر كابي المُرس يسكر
قنبت جنبو معا دار الحديث ما دار
حدثني بى حرقة حبيته من جواي .. حبيته حبيته
في الحلوة والمُرات شايله القُداحه معاي
آدتني وأديته حبيته حبيته
في يوم من الأيام هلوس مع الفجاج
هلوست دون أحلام من دكة الحجاج
ضلوا الشمس ريحين واحد عماك يا أم زين
والتانى لفحك وطار باعوني للفرقة باعوني للدولار
ملعون أبوك فُرقه ملعون أبوك دولار
أنّ الشعاع الضال أنينا أنينا
صنّ الشعاع الضال صنينا صنينا ما صن غنى و قال
غنالي بحرقة غنالى يا هاجر عقبت يا باكر قاطعني يا هاجر
رددت يا هاكر في الضلمة أولادك
في الفيها طول اليوم لا زاده لا زادك
يا مرمى لا ضل بيت لا أرث أجدادك
يلا وجراحاتك طحلب ضلام الليل دهده صباحاتك
السولبك خلاك برد الخمور مفتون
في أفقر وضع ختاك فاجر وسخ مافون
يلا وهياك يلا لاعن صباح الله صبح الغُنا الميمون
صن الشعاع الضال غنا الشعاع الضال
ما صن غنا وقال يا هاجر التسعى
بين الوطن والبال باب الفجر بفتح فتح القلب موال
فتح اللبق في الصيف تالا الشتل تربال
باب الفجر بفتح يا وضع يا دجال
باب الفجر بفتح عند دقة الرجال
غنا الشعاع الضال غنينا طولنا سوا
شال النغم عتال بايتين عيالو قوى
باكرنا سترة حال ياكر رغيف وروى
باكرنا بقة فال باكر كتاب ودوا
باكرنا للأجيال ينشر نور وهوا
لا تلاقي فيهو وبال لاهم بُعاد لاجوى
باكرنا يا ضلال لسع بلال ما زال
وما دام بلال لسع على الرمضا وهجير يلسع
ما دام في أطفال بتتوجع
صباحات الله يا بيضا وحيحة نوره لاهسع
فجيعة يا نوره يا فُقرا ترف من شدره لى شدره
تلف الدنيا كايسالكم صباحاتو ما انتو
بقوا من الأرض مطره تعالى وشى الوطن دركان
عساكر آخر الزمن واطه تعالى وما على كيفك
تعالى وريحي الواطه
بلدنا أن جيتي دي الكوكب تعالي من اليسار شمساً
تشرق الغربوا المركب
تغربي يا غرب يا باني الكلب يا تجار الموت والرعب
لو ريح ليلكم طفى الصحوة نسل الصحوة في جوف الشعب
ِبقى وضوي نواحى الدرب التالا الفجر الوطن القلب
القلب الشايلك وما ختاك وكان ختاك أبداً ما خطاك
بس يا نوره الصاح و الصبر لمي معانا قُطنة البدري
نغزل منها كفن الليل ننسج منها توب الفجر
فجرن تكسو محنتو الفُقرا
من التعب البلا صالح يجبد الكُدّح الأُجرا
يلا بوليس بلا أجرا شنو الخايفينلو يا فقرا
بيوتا جنها المطره دقيقاً ما يفك الريق
سمكتن مافي في بحرا شنو الخايفينلو يا فقرا
شديراتن بقت حطـبه تمرتن ما تفك طلبه
شنو الخايفينلو يا فقرا بهيماتن تسوى الميع
مغبش كالترب بصرا شنو الخايفينلو يا فقرا
كلبتن لا قلب لا حيل هوت في شبح فوق خيل
كان يتداعر آخـر الليل نرت والشبح حدره
صدت للصريف فتره كان صوت الرصاص قفره
أنَّت والخلق نايمين صنت والخلق نايمين
عفنت البلد يومين كلب العمدة جاب خبره
شنو الخايفينلو يا فقرا شنو الداخرنو في متره
أبو الأربل لأبو الواسوق أبو المحرات
وساقية تسوق لأبو بقره يا بقر السواقي السايقى للأمرا
شنو الخايفينلو يا فقرا
أبو البوليس إذا ما كان أباتم من طرف فقرا
يحرسوا القصر للتلفان وللفي الليل زنى ودعره
ويقوموا مع النهار وزراء
أبو البوليس إذا ما كان أراضيهم يبس شدره
يحرسوا طلمبة الجازولين يقيفوا على البنوك غفرا
إذا ما الشارع استنفر غبش عزل بستنكر
على القيصر خساستو
تقول للغيم محل مطرك قراب منك دالفينك
يضم صدر الوطن حاني يهز للظلم ساساتو
تحن لباكر الأخضر يعم بى خيرو ناسـاتو
تنادى الفارس الأسمر تطالب بي قصاصاتو
من الفجار من العسكر ابو البوليس إذا فكر
يفك فيهم رصاصاتو
أيا بوليس أيا نازل من المريخ جباة الدم من التاريخ
أيا واقف لهم كالسيخ تقيف لنا لامتين دغري
حقارتك تبقى في فقرا فضيحة فجيعة يا بوليس
وجايين من فرد شدره جنانا العاق متين تصحي
تشوف الحاصل المزري متين تدري
بأنو الصوت ده ما مكري معتق للوطن دغري
و بأنو الجاري ما منك على صدر الوطن يجري
وخطاهو التيربت قدره تلاقى الفـجر والفقرا
|
ونحن نتساءل ويييييييييينك يا الخليفة ود هاشم... من أمس ما شرفت الدار... عسى غيابك في خير...
أبقى أظهر حتى لو تتاوق بس... وأنا غايتو بقيت أحرسك كل عصراوية تجينا شايل الفرح...
كميات موتي...
أبو الحســــــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: الحنين ابوالحسين
كيف قيلته
شنو يا أخوي خليتنا فاتحين خشومنا وراجين
أولاً الجزء التاني من حكاية حمد أحمد التمرجي
ثانياً قصيدة آخرى من محمد بادي العكودابي
ويا حبذا لو كانت
بالحيل آجني آي والله
الجنيات العادت جابت
أنت الجيب قايلو
قميص أفرنجي
وكرتونات كرملي
لا لا حاشا وكلا
ديل يوم عادوا
أتلافو حقوق الجار
من جنس كتاب ومجلة
الحكمة الولد اتوضئ
وصلى...
عادة البلد الدخلت
جوه قلوبهم مابتتخلى
بالحيل آجني اي والله
خالد محجوب |
الحِبيِّب خالد محجوب...
مساك الله بالخير والرضا...
زي ما قال ليك د. يس يا خالد أخوي طلباتك أوامر وتُنَفَّذ على طول...
بس أسمح لي يعني الجزء التاني ما حا أنزله هسع إلا خلاص إتأكد إنو الخليفة حاتم هاشم الكلام المشروح وقع ليهو خلاص... ويُجاز بعد الإختبار من د. يس أو شخصكم الكريم...
أما طلبك التاني يا اخوي... فأنا لها وأي طلب من د. محمد ود بادي أنا جاااااااااهز وتحت الطلب... لأن مكتبتي مليااااااااااااني منو...
أهديك وللجميع القصيدة المطلوبة... والتحليل والتعليق عليكم إنتو...
أنا أخو البت اللكعت قرن الخمرة النازة
على وردان الصبوة الراكزة
الجنيات الهازة .. صدورن لازة ورقّ النص زي خيت الشلة
بالحيل آ جني إيه والله
الجنيات الحزمو الجبة
وعرق الشتوي عليهم نايا و صب
قول ما دل .. رجالا حصدوا الحبة
عيشهن هادو انكال واتعبّ
ومنو كتير في الواطا انكبّ
وباقي مصوبر واقف قبة
الحمد آلاف .. الشكر آلاف
الحمد آلاف الشكر آلاف
العيش الرقد أصناف أصناف
الولد الكال.. عزام .. حلاف...ضياف
الرزق الجانا مدلة.. الحلق الجاف اتبلة
بالحيل آ جني إيه والله
الوادي الجانا مترقن
مدّ جناحو الطايل شرقا وغربا
القبلي بروقو على القلعات يضّربن
الدُكّن البِعدن قِربن
فوق صنقور المحلة الطالت كبّن
قول للمحلة بيوتك خربن
قول ما دلة.. الحلق الجاف اتبلّ
بالحيل آ جني إيه والله
مرحاتنا شرابهن يوت ماغبّن
شبعانات في الشقل أب شوك ما شبّن
الحُمَّل ولدن وربّن
حلماتن تقلن.. جرّن.. فوق سيقانن كبّن
اللبن العاتم في ضرعاتن جبّن
المغصة إن كان ضرعاتن خربن
القرعة آ وليد .. السعن آ بنية
القربة كمان... كبوها المية
المغصة إن كان ضرعاتن خربن
شوفو النعمة السالت فوق قيزان الرملة
ناس البندر لبن الشاي بالعملة
سمح الخمج الفوق أسيادو
سمح العز المن أجدادو
الجنيات المشو ما عادو
كان بالردة أكان اتنادو
غرّب حامد وشرّق بلة
كانوا بحلبو الضرع الدلّة
كانوا بحضرو الخير القدحو معلّا
الجنيات ما كفرت بنعمة الله
بالحيل آ جني إيه والله
ذات في يوم والغيمة تهتّف مطرا نقّع
فوق نوار الطلح الفقّع
ريحة البرد إن جاتك عطرا فايت خمر الفوق أردافا مجضّع
شفنا الوادي يقشقش في دمعات الليل
والتعل الشايل بدا يتفقع
تلب حامد فوق مخلوفة أب زور واتربّع
طلق الرسن أب زمة وسوّا خبيبا بدّع
هوّد في رقّاب الصي
لا قوه ثلاثة زبيديّة
خالفين سيقانن فوق السنكيت ورقاب ألبل بيناتن مرخيّة
محجوبات بالخرز الفصلو السوميت
كل واحد درقة وسيف وطبنجية وباقي جرابن مليان دلميت
الجنيات اتقبلو وضاقو الحارة وضاقو المرة
وكان حجازن صقر الجو
حامد كان عارفين ضاقوه رجال قبالكن
شوفو أرزاقكم أخير من ضو
حامد عوج الطندب آ وليدات
عوج الطندب نار القصب الهبلت ما بتعدلو
شوفو شلوخو تلاتة مطارق رقدن
وكل تلاتة يمين سياف اتقبلو
حبوب القارح ... ما دلّة
ولدا ما ختالن زلّة
شن قولك فيهو عليك الله
بالحيل آ جني إيه والله
وينا مراتع الدرت الباسط دايما ببكي عليهن
وين بنوت الحلة البكّر عصرا بدري يسوّن في شاهيهن
بعد الليل ما يهّود ونحن نهّود.. عاد أماتن ينادن ليهن
نمشي على القيزان نتقادم.. أقيس الخطوة مع التاتاي ومشيهن
والله البعد الحاصل ما نساني
وحاتكن في قمراتنا بشوفو وشيهن
الا النضم أب غنة اللهج السكر وين بلقاهو
بنات الريل الدوب ليهن
الخوف يا ناس كان يبقى الشوق الحاصل بينا معشعش فيهن
مقنع سابل وين بلقاهو
طرفا ذابل وين بلقاهو
وعين بتدنقر من واليهن
الوجنات الشعّن بقّن
ود العين النايم زرقن
مو زايغ رسيان وميقّن
زولن كان خدران ومحقّن
من الشوفة عروقو يطقّن
كان الدنيا بصح تتخلا
كنّا بركنا معاهن فوق رملاة الحلة
الا كمان بنشوفا مذلّة
الجنيات الغابت جابت
إنت الجيب بس قايلو قميص افرنجي وكرتونات كرملّة
لا لا وحاتك حاشا وكلا
ديل يوم عادوا اتلافو الجاهل بحقوق الله
ديل كم لحقو البشهق ضايق وداوو العلّة
الولد الجايب حقايب سفرو تقال.. تقال من جنس كتاب ومجلة
الحكمة النضم إيّاهو الكان.. الحكمة الولد اتوضا وصلّ
عادة البلد الدخلت فيهم سكنت .. سكنت ماب تتخلا
نحن كما طارين الحلة ودرنا الطلة
نشيلا معاهم فرحة وميتة
حلاة الموت كان في عبدلة
ولك أخي خالد وللجميع كميات مودتي...
أبو الحســــــــــــــــين...
| |
|
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
عدت بعد غيبة قصيرة والعود احمد كا يقولون ، وجدت عندكم الكثير المثير ال..... .
(التحية عبر هذا البوست لكل أهلنا في كلحية الناس الطيبين ناس حمودة وأزهري عبد المطلب وناس ود سليمان والخليفة (رجل الإحسان) محمد خير السيد والسكينجاب عموم...)
هيج كوامن شجوني حديث أبو الحسين عن محمد صالح سعيد وأهلنا وأحباءنا في كلحية وانا بحكم دراستي بمدسة المقل المتوسطة(ام قبة) كانو يسمونها "الثانوية العامة" على زمننا منتصف السبيعينات) كما ان والدي الشيخ الحسين الحاج موسى رحمه الله حفظ القراآن بخلوة شيخنا عبدالرحيم ود كرار بالمقل ولذلك أنا منحاز إلى هذه المنطقة ولي ذكريات وصداقات في كل حي من أحيائها الحجير النافعاب كافوته كلحية الكوانجي والمسوداب أهل القبب وفي مرحلة لاحقة تعرفت عن قرب على الشيخ محمد خير السيد مسود بالخرطوم متعه الله بالصحة.
قرأت أيضاً ما استله الأخ الحبيب العمدة الهمام د/احمد أبو شوك من أوراقه القديمة من دراسة وخواطر ممتعة عن قصيدة بت البلد وهي كلمات يستحق عليها درجة علمية رفيعة أكبر من الدكتوارة (درجة عمدة في الادب الرفيع).
قرأت وقرأتم لا شك قرار صاحب الموقع (أرشفة مواضيع الموقع بحلول يوم 20/12/2006م) بما في ذلك هذا البوست.
وحيث لا يزال في النفس شئ من حتي لدى الكثيرين ممن شاركوا في هذا البوست الرائع، وكانت تراودني فكرة قد يكون هذا القرار مناسبة طيبة لطرحها على الاخوة خاصة وانكم تلاحظون أن المعلومات التي حواها هذا البوست كثيرة وقيمة جداً ولكنها مبعثرة هنا هناك وتحتاج إلى جهد للملمتها و ترتيبها وتصنيفها بشكل علمي والهدف من ذلك هو لملمة وتوثيق تراث المنطقة على أسس علمية مستفيدين في ذلك من هذه التكنلوجياالهائلة التي إخترقت الحدود والحواجز و سهلت التواصل بين البشر على ما بينهم من أميال وفراسخ وكذلك إمكانيات الأخوة وجراباتهم(حمع جراب) المكتنزة بالدرر، بحيث يمكن الأستفادة منها ببشكل أفضل بل يمكن أن تشكل (إذا جمعت بشكل جيد) معين للباحثين في هذا الثراث وقد تكون حافز لآخرين لجمع تراث المناطق الأخرى في وطننا الكبير، ولذلك أقترح عليكم - والامر مطروح للنقاش أن يفتح صديقنا الهمام أبو الحسين بوستاًبعد التاريخ المذكور باسم علم من اعلام المنطقة يساهم فيه كل من يملك معلومة عن هذا العلم حصراً بحيث نجمع كل معلومة عنه مناقبه ومواهبه شعراً كانت أو نثراً و ما يروى عنه وكل شئ مفيد عنه بل ويمكن الإتصال بكل شخص يمكن ان يكون مفيداً لأغراض التوثيق بحيث تكون المحصلة في نهاية المطاف كتيباً يشمل كل شء متوفر عن هذا العلم وينتقل إلى علم آخر أو بالتزامن .
ويمكن لصديقنا الحبيب العمدة د/ أحمد إبراهيم أبو شوك أن يضع لنا خارطة طريق وإطار علمي يمكن أن يحقق الهدف من الفكرة.
هذه بإختصار ما قصدت به تطوير فكرة بوست اخونا أبو الحسين والامر مطروح للنقاش .
مع تحياتي،،،
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
أبو الحسين
في هذا البوست الرائع
....................
أنا ممكن ألخص كلام الناس القالوهو ديل كلو في كلمتين
( الشايقية ما بيتلحقوا في أي حاجة)... يعني أي حاجة يجودوها تجويد نهائي ما بعدوا تجويد.. والذي يادي أي شئ كان بعد أدائهم يخربوا ويرجع به الى قامة أقل.. والمشاهد هو الحكم...والذوق الرفيع هو الحكم..
قال عنهم الشهيد الأستاذ محمود محمد طه( أنا لهجة الشوايقة تسحرني عديل كدة.. )وكان يطلب من تلاميذه الشوايقة التحدث بها دون غيرها...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: الأخ عصام
سلام
لي صديق اسمه عصام على أحمد أبودية وهو شايقي من
منطقة الباسا/الغريبة ودرس قانون في جامعة القاهرة
وكان عضو لجنة تنفيذية لرابطة مروي في الثمانينات
عموماً ان كنت هو فالشكر لبكري الذي لماني فيك وان لم تكن
فلك السلام ومرحبابك في هذ الديار |
الفوق دا إستفسار... د. يس محمد يس...
Quote: يانوراى يادرقه وسيف
ياحضنا كيف من حر الصيف
والشتا ضاراي
أبو الحسين متابع معاك من كل الاعماق
أنتمى لتلك الارض الطاهرة
عصام على أحمد أبودية
الباسا - الزومة - تنقاسى الرويس
|
والإقتباس الفوق دا... تعريف الأخ عصام علي أحمد أبو دية...
في أول مشاركة ليهو في الديار دي...
وأنا أبو الحســــــــين... أسأل الله أن يكون عصام دا هو صديقك يا الحِبيِّب د. يس... وأكون ساهمت في جمع صديقين من الزمن الجميل في هذا الفضاء الإسفيري الجميل...
وهلا بيكم د. يس... وأُستاذ/ عصام...
وأمس الأخ خالد المنسي ما ظهر... والخليفة حاتم هاشم ليهو يومين مسجل غياب... عساهم والجميع بخير وعافية...
كميات مودتي...
أبو الحســــــــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
كتب د. يس...
Quote: تسجيل قديم جدا للأستاذ صديق احمد
له التحية في مكان ومده الله بالصحة
متين يتحل قيدي
|
تشكرات د. يس على الأُغنية الجميلة ومتين يا ربي انا... يتحل قيدي ومتين يا يمة تفرحي بي جديد...
الله يديك العافية...
وبالمناسبة دي... في موضوع للأُستاذ/ موسى ود الحسين... وبرضو محشُور بين الرود الفوق... أرجو الإنتباه له ورايك ضروري... لأن الموضوع في غاية الأهمية...
أما أنا ردي للأُستاذ/ موسى... أنا يبقى لي لو البوست حولوهو الإرشيف نعمرو تااااااااااني من الأول... ونطالب الأخ بكري بمكتبة خاصة بالبوست وإنشاء الله يرد لي طلبنا... أنا غايتو اليوم أرسلت ليهو رسالة في الإيميل الخاص بيهو... وطلبت منه بأن لا يأرشف البوست فما عارف ردو بكرة حا يكون شنو...
على العموم أخي موسى آراء الإخوة مع رايك تبين لنا هدى الطريق...
وبجيك راجع يا أُستاذي موسى لشخصيات المقل الذكرتها وبالاخص الخليفة محمد خير السيد (الله يديهو الصحة والعافية ياااااااااارب)...
كميات مودتي...
أبو الحســـــــــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: الحِبيِّب خالد محجوب...
مساك الله بالخير والرضا...
زي ما قال ليك د. يس يا خالد أخوي طلباتك أوامر وتُنَفَّذ على طول...
بس أسمح لي يعني الجزء التاني ما حا أنزله هسع إلا خلاص إتأكد إنو الخليفة حاتم هاشم الكلام المشروح وقع ليهو خلاص... ويُجاز بعد الإختبار من د. يس أو شخصكم الكريم...
أما طلبك التاني يا اخوي... فأنا لها وأي طلب من د. محمد ود بادي أنا جاااااااااهز وتحت الطلب... لأن مكتبتي مليااااااااااااني منو...
أهديك وللجميع القصيدة المطلوبة... والتحليل والتعليق عليكم إنتو... |
السنجك الحنين أبوالحسين
سلامات وعوافي
والله ما بنقدر علي جزاك انت والدكتورين ياسين وابوشوك واخونا حاتم ما فتحنا خشمنا بطلب ألا كنتم حاضرين جزاكم الله عنا كل خير وخيل وزوجة للما متزوج منكم ودبل للمتزوج منكم.
بالحيل آجني اي والله
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: عصام على أحمد أبودية
الباسا - الزومة - تنقاسى الرويس |
الحبيب الأستاذ أبوالحسين
سلام
يا أخي دا زول أم بص وكمان بص / بنطون (أول مرة أشوف شي زي دا)
صاحبي دا زمان كان حوام ومشاي والأستاذ موسى الحسين
يعرفه (طبعاً إذا ما لعب المشيب بذكرياته
شايفو ذكر السبعينات في المقل) ولكن صاحبي دا ما بعيد
يكون اغترب وجابلو شوية قريشات وعملو بنطون على وزن
الشايقي اللغترب وجاء فتحلو نقطة بوليس
Quote: أما أنا ردي للأُستاذ/ موسى... أنا يبقى لي لو
البوست حولوهو الإرشيف نعمرو تااااااااااني من الأول |
أتفق مع فكرة أستاذي موسى الحسين واذكر أن أجزاء مما
طرحه الأستاذ موسى كان قد بدأ في سابق السنين في هذا
البورد لكنه لم يتواصل وبعض البوستات موجودة في الأرشيف
لذلك يمكننا تطويرها حسب الطرح الجيد من
الأستاذ موسى و "تعميرها" حسب وصفك وما أقوى الكوامر المعمرة !!!!
لكما ودي
ومعك أتساءل عن الحبان خالد وابوهاشم
لكن يبدو أن خالد قال عندو نية سفرة
واعتقد ابوهاشم مضروب شاكوش في دقنوسو دا
ان شاء الله ما يكون سوالو الوردي
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: خالد علي محجوب المنسي)
|
الأحباب العزاز بالحيل
سلام وود ومحبة في الله والله جمعنا بها السنجك الحنين أبوالحسين
من ريحة التراب كما كرفها شاعرنا الجميل أسكنه الله فسيح جنات الخلد مع الصديقين
سماعين ود حسن
بدور بيـــتن بعيـــد يا خي
حلاوة النسمة
في الوديان
تهبهب
فوق بيوت النال
وتغرق
في حفير الحلّه
تشرب
خدرة السيال
نخيلك ....
بحديثن
أصلو لا قالوهو
لا بنقال.....
نهار الغيمة
في الوديان
تغازل
ضحكة الشلال
تهش...
وتبش...
تقالدك
بي حنان الراعي
لمان يرجع الحلال
توشوش ليك
توسوس ليك
تمرحب بيك
تكدّب فيك
زي أمونه
تتمردغ ...
علي صدرك
وتهمس ليك
حباب الخال
تشيلك بجناح الشوق
لما الشوق يسافر
فوق زوامل الغربه
في الترحال
تشم العافيه
لما الريد
يطوّع ليك
كل محال
وتتخدّر ....
وتتفتح ....
مشارف الدنيا
في عينيك
نبؤة قديمه
من الماضي
وشوش بيها
من بعد الودع...
رمال
حلاة النسمه
لما تجيب
نسيمات ..
طيبة الطيبين
زغاريدن
أغاريدن
شبابيلن
تجلد الليل
ويصحى الليل
مع الموال .. مع الموال
وتحكي ليك
عن بنّوت
مأصله
من سلالة الريل
ابوهن
كان مربي غزال
كلامن كان
يقولو ضرير
سنين
ودنين
علي صهر الهجين رحال
حكايات
من جزور الماضي
ضاربات
في التراب أميال
وفوق الفوق
شموخن
ما بتطاولو جبال
إذا رعد النّحاس
بيجوك
دوابي الخشه
تزحف ليل
تفح
وتوح
وكايسه كتال
نهار العركه
يصبح ليل
وتتغنى الشمش
تطمس
إذا هلت
عليها رجال
هديرن
يا هدير الموت
ويا رجفة
بيوت الحي
إذا ما زلزل الّزلزال
كلامن كان
بقولو ضرير
سنين
ودنين
علي ضهر الهجين رحال
شيت الباديه
كله جميل
موتها جميل
وخاصة بناتها
كان جفلن
علي الوديان تقول الريل
تدوب في شهقة الدوبيت
وليل الباديه
زي مجنون
يناتل
في الكتاف محروم
إذا ما نسم النسام
وريحة الشاف مع الكوليت
ديك اللحظه
تهوى الدنيا
كل الدنيا
من دون بيت
تكربت
في ضلوع الصي
وتبقى حنين
يزغرد
في الدروب يا خي
وصوت الريح
يولول وي وي
وتحتك
تنطوي الأيام
وخوى الصاقعة يا المربيت
حلاة النسمة في الوديان
رزازن
في البعيد وشال
سحابات الخريف
بتغني
وجه القمره
متل الشال
ودابي الليل
علي
كبد السهول رقّال
برق الصعيد الشال
بدور أتوسد اللّيدين
واشم
في القبسه ريحة النال
وانوم والسيسبان
متّاكي
ضافر
شعره في السيال
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: خالد علي محجوب المنسي)
|
Quote: ويمكن لصديقنا الحبيب العمدة د/ أحمد إبراهيم أبو شوك أن يضع لنا خارطة طريق وإطار علمي يمكن أن يحقق الهدف من الفكرة.
هذه بإختصار ما قصدت به تطوير فكرة بوست اخونا أبو الحسين والامر مطروح للنقاش . |
الأح الفاضل / موسى الحسين سيدأحمد
السلام عليك ورحمة الله وبركاته
كلامك جميل واقتراحاتك أجمل وعلمية وهادفة والحمد الله ابناء اراضي الشايقية الأعضاء كثر ويمكنهم أن يحققوا ما ترمي له أخي الفاضل.وأرض الشايقية غنية في كل ,,,جغرافياً, تاريخ, تراث وتقاليد, شعر ونثر,, غناء ,, حكاوي وقصص ,, واظهار نواحي التطور والنقلة في تلك المنطقة..
وكما قلت الأرض غنية وتحتاج لجهد. والبوست هذا ممكن أن يكون في متناول الكل أعضاء وزوار من غير الأعضاء وتعم الفائدة.
أنا طبعاً ما شايقي وغير ملم بكل ما ذكرت مسبقاً لكن أحب أن اعرف الكثير عن كل قبائل السودان,,, واحب الشعر والأدب عموماً في بلدنا الحبيب ويروقني جدأ شعر أهلنا الشايقية وحبيت أن أشارك بما أحفظه في هذا البوست الجميل.
وزي ما قلت ممكن الأستفادة ممن لهم باع في ذلك أمثال الدكتور ابوشوك وغيرهم من ابناء الشايقية
في هذا المجال.
ولك مني كل الود والتقدير
خالد محجوب
(عدل بواسطة خالد علي محجوب المنسي on 12-13-2006, 05:48 PM)
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: السنجك الحنين أبوالحسين
سلامات وعوافي
والله ما بنقدر علي جزاك انت والدكتورين ياسين وابوشوك واخونا حاتم ما فتحنا خشمنا بطلب ألا كنتم حاضرين جزاكم الله عنا كل خير وخيل وزوجة للما متزوج منكم ودبل للمتزوج منكم.
بالحيل آجني اي والله |
الحِبيِّب خالد...
صبحك الله بالخير والرضا... يا اخوي إن بقينا ما نفذنا ليك طلبك إنت ننفذ طلب منو يا الغالي...
أما دعواتك دي كيف صادفت هواي... لكن أعصر بالتأهيل والزواج لغير المتزوجين والصحة والعافي والسعادة والهناء للمتزوجين يااااااااااارب...
كميات مودتي... وربنا يسهل ليك عثراتك إنت وينزلك إجازتك الناويها دي...
أبو الحســــــــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
ود حمداحمد والحالة الصعبة والبنوك
الأستاذ الشاعر الفاتح ابراهيم بشير
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
(Quote: يا أخي دا زول أم بص وكمان بص / بنطون (أول مرة أشوف شي زي دا)
صاحبي دا زمان كان حوام ومشاي والأستاذ موسى الحسين
يعرفه (طبعاً إذا ما لعب المشيب بذكرياته
شايفو ذكر السبعينات في المقل)
الأخ العزيز جداً د/يس محمد يس
لك التحية والشكر خقيقة في شوق دائم لك ولكل الحبان الذين شاركونا الزمن الجميل، وبهذه المناسبة أين الرجل الصبوح عبدالوهاب الطيب القادري الطريقة الطنبوري الهوى .
صديقناد/ يس صحيح الذاكرة خربت لكن الأخ عصام أبو دية اعرفه جداً فهو غير أنو زميل مهنة وتعاصرنا في الجامعة هو ورانا شوية، إلا أنهم من الغريبة ومن نفس أسرة الفنان الراحل أبو ديه (رحمه الله) الذي شكل والفنان السني الضوي ثنائي العاصمة وهم أقرباء أسرة المرحوم سراج الدين فتح الرحمن بالنافعاب .
تحياتي للأخ عصام ولشخصكم .
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
إخوتي الكرام...
رواد الحوش...
نعود إليكم والعود أحمد... وحمدا ًلله على السلامة...
وأبدأ معكم بهذه القصيدة التراثية...
وهي قصيدة (الدوسيب) وهي من القصائد القديمة جداً وكانت تُغنى عند رقِّيص العروس بعد قطع الرحط.. ففي يوم الزواج وبعد الصفاح (العقد) وعند المساء يذهب العريس ومعه أهله سائرين به إلى بيت العروس لإتمام قطع الرحط الذي لم يكن آنذاك فيه قروش أو حلوى (فكان رحط بي حق وحقيقة) فبعد قطع الرحط تقيف الصفوف لرقِّيص العروس التي تظهر كالقمر بين الكواكب بعد ما جلست على الطلح أكثر من شهر آنذاك وتكون لابسة تنُّور مربوط في وسطها ويبدأ أخوات العريس والعروس وأهلهم في غناء قصيدة الدوسيب....
التي تقول....
الدوسيب .... كدي يا عروسنا
الخضراء جابيق .... كدي يا عروسنا...
سمِحْةَ الذات .... كدي يا عروسنا...
الشروط تامَّات .... كدي يا عروسنا...
سمِحْةَ الزي .... كدي يا عروسنا...
عيش الكُري .... كدي يا عروسنا...
المفوسِب ني .... كدي يا عروسنا...
الحرير للطي .... كدي يا عروسنا...
العظمة زينة الحي .... كدي يا عروسنا...
عيش الباجور .... كدي يا عروسنا...
(الما نقدو زرزور) .... كدي يا عروسنا...
الغَفَرو حاس دور .... كدي يا عروسنا...
عيش القُرير .... كدي يا عروسنا...
الماب يحومبو الطير .... كدي يا عروسنا...
الجنيه في الجيب .... كدي يا عروسنا...
البِقت فوسيب .... كدي يا عروسنا...
الدُّقة والنُقَّار.... كدي يا عروسنا...
القرمصيص العال .... كدي يا عروسنا...
الرصَّة والشبَّال .... كدي يا عروسنا...
شديرة البار .... كدي يا عروسنا...
تضوي فِنْيار .... كدي يا عروسنا...
تِبْش الرمال .... كدي يا عروسنا...
الدوسيب يا خدرة كَمِّك
يا جلادةَ الشم جِبْتي ابن عمك..
الدوسيب نايري وعديلي
عروسنا ام زين مُقْد الجزيري
الدوسيب فاحت جلادها
عروسنا ام زين مسكت وصاتها....
ونترجم بعض الكلمات لشوايقة لندن... ناس الخليفة حاتم وخالد المنسي!!
الدوسيب والفوسيب: القصب الأخضر الغض....
الجابيق: كلمة نوبية تستخدم في قطع صفق القصب الأخضر أي أن هذه البت أصبحت جاهزة للجيبيق (الزواج)
الفِنيار: الفانوس.
الجلاد والزباد: من أنفس العطور في ذلك الوقت...
كميات مودتي...
ونواصل بإذن الله تعالى...
أبو الحســــــــــين....
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
الأخ الحبيب أبو الحسين صاحب الحوش الكبير وزواره الكرام،
لكم تحيتي ومودتي، وأرجو شاكراً كريم تفضلكم بأن ترحبوا بأستاذ الفن التشكيلي والتذوق الفني الأخ الصديق الدكتور محمد أبوسبيب، الذي يعمل حالياً بجامعة ابسالا السويد ... والذي يود أن يتواضع معكم على بساط أحمدي مفروش بتراث أهلنا الطيبين، وبمشاركة أدبية قوامها قصيدة أحمد النضيف المشهورة بـ "إنتو تجرو .. وبي وراكم نحن نجري"، ... علها تكون فاتحة خير لإسهاماته القادمة ...
إنتو تجرو
وبي وراكم نحن نجرى
عرض وتحليل
الدكتور محمد أبوسبيب،
جامعة ابسالا، السويد
الشكر أجزله للصديق العزيز دكتور أحمد ابراهيم أبوشوك على رسالة دعاني فيها إلى زيارة بوستات ابوالحسين، و ابوشوك ليهو ألف حق فهو يعلم اننا مشدوهين فى جري المعايش خاصة فى بلدٍ زى السويد أجاركم الله وحماكم فيها صقيعاً "يعنبج". في سياق الحديث عن أدب الشايقيه لا بد من التأكيد مجدداً مع أبوشوك على ضرورة مقاربة هذا الأدب باعتباره ارث سوداني صميم عبَّر فيه صانعوه عن هموم وأشواق أهلنا في الهامش الناهض فى أطراف السودان المختلفة. أعتقد ما نعيشه اليوم هو "نهضة هامشية" يعيد فيها انسان الهامش صياغة علاقته بمركز سياسي/ آيديولوجي/ ثقافي فقد كل مقومات بقائه.
إعادة الصياغة تعني استرداد تاريخنا الحقيقي والتمعن بعمق في ميراثنا الثقافي والفني، رأسياً فى عمقه المحلى وأفقياً في امتداده الوطني ؛ وهو بداهةً تاريخ وميراث حضارة وادي النيل الأوسط وعلاقاتها العضوية مع ممالك وشياخات دارفور وكردفان والشرق والجنوب. فشايقية اليوم هم نفسهم سكان مملكة المقرة تحدثوا اللغة النوبية المحسية قبل مائتي عام أو تقل، ولا زال كمٌ هائلٌ من لغتهم القديمة جارياً في كلامهم وغناهم (لو واحد من ناس فوق قعد وسط أهلنا الترابله يطلع كيت)، كذلك هم نفسهم سلاله ضمن سلالات شعوب كوش ونبته، وهم حرّاس الضرايح ـ الضرايح الجد جد ـ حيث "جدودنا الجمله راقدين" فى الكرو ونوري (معناها مدينة الرب فى اللغة النوبية القديمة) و البركل، مراقد بعانخي وتهارقا حكام السودان ومصر وفلسطين. أمّا حاضر الشايقيه فهو أيضاً جزء من حاضر سوداني يعاني من غيبوبة سياسية منذ عقدين من الزمان، وعينك سرّك.
في هذا الصدد سأتعرض لقصيدة أحمد النضيف ومطلعها: "إنتو تجرو و بى وراكم نحن نجرى..." فهي شاهد حي على هذا التواصل العضوي بين المحلي الخاص والوطني العام، بين الشاعر الشايقي يشرع صوته متحدياً رافضاً فى الجابرية وشاعر شايقي آخر يجوس بمبضع حاد فى مجتمعات العاصمة يشرّح به جثة المركز، محللاً ومفسراً عقد السياسة ومسارها . لي علاقة شخصية بهذه القصيدة تعود لعام 1996 عندما أوحت إليّ أبياتها الأولى بعمل فني تشكيلي أسميته "أغنية الكدّاري" يمكن للقارئ رؤيته فى الموقع الآتي بجانب اسمي والشاعر:
http://www.sudaneseonline.com/selectgallery.htm
سمعت القصيدة لأول مرة مسجلة كرمية للفنان عثمان اليمني. لم أكن متأكداً من صاحبها، وبحكم وجودي خارج السودان إتصلت بمن أكد لي أن صاحبها هو أحمد النضيف. هذا العمل الشعري هو في رأيي نتاج لذهنية ذات بصيرة تشكيلية عالية عبرت عن نفسها بوسيط أدبي شعري رفيع، لذلك يمكن بالفعل تحويل القصيدة إلى معرض كامل من اللوحات البصرية. كذلك يتمتع صاحبها، والحق يقال، برؤية سياسية ناضجة ومنظور اجتماعي صحيح أعطاه جسارة فائقة على فضح وتعرية واقع المركز وتفسخ الطبقة الحاكمة خاصة عندما يعرج على نماذج حية من حكامنا يتناول فيها مفردات حياتهم، لبسهم، شرابهم ومأكلهم، سلوكهم و"إسلامهم" :
سوّيتو دقونكم ستاير
وفيها تدسو السجاره
ومره تدسو السجاير
يتنقل بك الشاعر من صورة إلى صورة في تواتر مثير، لا تفرغ من حدث حتى يقودك إلى حدث آخر فى إنتقال سلس. هذا مقابل رسمه البليغ لحيوات محمد أحمد رمز أهلنا الطيبين المكدودين المظلومين يرويها لنا في صور ومواقف سرعان ما تضعك في البرزخ المعروف بين الضحك والبكاء وسرعان ما تجسد لك الحكمة الشائعة : "شر الأمور ما يضحك"، أنظر إلى هذه اللوحة:
حالة المسكين تشفق
وفى الشماعة متعلق
لما السواق يعشّق
ضهرو المسكين يطقطق
ياخى ربع الكيلو بيشبّع ؟
بتلق المصران يجقجق
ينطط داير يدفق
فيهو الشافع مبحلق
وهذه لوحة أخرى:
شعب فاضل ليهو يختف
اليشوف كبريته يرجف
واليشوف صابونه يهتف
ما دا شعب الانتفاضه
شوتو بى فوق العرَّاضه
ما أظن الشبكه شافه
و ما أظن قاس المسافه
و شاته بى فوق الكشافه
نقلت هذه القصيدة من شريط لليمني وبعض الكلمات غير واضحة فأرجو المعذرة إذا كانت غير ما قصد الشاعر.
إنتو تجرو
و بي وراكم نحن نجرى
و للوراكم ما بتفكرو
تلقي ناس قاعدين يزكرو
و بعد شويّى يقولو سكرو
إنتو جارين بى لساتك
و نحن جارين بى حداشر
إنتو فى الطابق الحداشر
و نحن فى الحاره الحداشر
إنتو توصلو من تلاته
و نحن نقعد لى حداشر
و برضو تجرو
الفرق بيناتنا شاسع
إنتو ماسكين ياتو شارع
إنتو حارساكم مدافع
و نحن بالليل أى شافع
يكورك يمه يابا
و يمه شالتنى العصابه
و برضو تجرو
كل نايب عندو دايره
و أى واحد عندو دايره
و الحقيقه الدنيا دايره
و فى الجنوب الحرب دايره
و محمد احمد مرتو دايره
و بتو دايره
و القيم فى بلدى بايره
القاعه بارده وبالمكيف
و ناس ورا الباصات تصيّف
شعب فاضل ليهو يختف
اليشوف كبريته يرجف
و اليشوف صابونه يهتف
ما دا شعب الانتفاضه
شوتو بى فوق العرَّاضه
ما أظن الشبكه شافا
و ما أظن قاس المسافه
و شاته بى فوق الكشافه
كل نايب عندو قطعه
و قطعه ناصيه و درجه أولى
و كلًو كيّال ليهو فوله
الحكومه التم حولا
تزغرتولا تفرتكوها
تكيلو للطرف البناكف
و البقيه ترجعوها
و البلد ملعون ابوها
الرايه فوق القصر شامخه
و الرايه برضو كمان جريده
البنوك مسكو اقتصادنا
و نحن جيبنا على الحديده
النمر و مركوبو يرقش
و سبحه لالوباً غليده
الدقن بالحنه تلمع
راكبه مرسيدس جديده
و ناس تكابس فى العصيده
إنتو تضربو فى الكويتي
و محمد احمد و ناس بخيتي
ياكلو عيش ماسكه الهريتي
و يا عصيدة فيتريتي
تاكلو شيّه و كبده نيّه
و نحن راجين الضحيه
يا لقينا يا عدمنا
و مافى صابون لى هدمنا
إنتو سكان السرايى
و قولو لينا شنو الحكايى
جيب لى كوريقه و دوايى
و جيب لى قرطاسة محايى
أنا أصلى محتاج للكتابي
يا حليلك يا ترابي
و واخرابك وا خرابي
و ناس تكابس فى الروابي
و تلق شافع لادغو دابي
و ناس ورا الباصات تشابي
من الكلاكلا و للصبابي
ناس يوردو فى الكبابي
و ناس يحنسو فى الترابي
و برضو تجرو
والله لسًّه القاعه بتصفق
حميركم بره بتهنق
و طياراتكم تحلق
طاحونه بلا عيش تدقق
محاكم لسًّه بتحقق
و تلق محامى متريق
جوّه المحكمه يقرّق
بتلق الغنيان بيسرق
بى مارسيدس مروق
حالة المسكين تشفق
و فى الشماعه متعلق
لما السواق يعشّق
ضهرو المسكين يطقطق
ياخى ربع الكيلو بيشبّع ؟
بتلق المصران يجقجق
ينطط داير يدفق
فيهو الشافع مبحلق
و تلق عماره مفروشه
ناساً تحشم كروشا
الكرشه ديك ما بتحوشه
و ناس ماسكاها كاروشه
أوضته ماها معروشه
و ناس تحلم بالرشوشه
عيشته يابسى كركوشه
و تلق التـِّفه منكوشه
تفتش ديمى فى الكوشه
عشان تلقالا قرقوشه
تلق عماره معروضه
و ناس بى غادي مقروضه
و ناساً تاكل قروضه
و عشان ما تحفظ عروضه
أطفالم ما شافو روضه
عشره يسكنو فى اوضه
بره ان مرقو الرطوبه
جوه إن دخلو البعوضه
و ين يا ناس الضماير
و خافو الله فى المتاجر
سويتو دقونكم ستاير
و فيها تدسّو السجاره
و مره تدسو السجاير
و تشربو أم الكباير
إتذكر يوم المقابر
يوماً تبلى السراير
و راكبه جناح ام جكو
و داك ختامه مِسْكـو
حزام الفرجيّى تحتو
و لبس العراقى تحتو
تعالو ورقنا الندكو
بنوزعوا قبال نشكو
أقعدو معانا النفركو
ان شاالله تجونا بى ككو
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: yasiko)
|
Dear Wad Yassin
Wonderful!!you know, I have so many nice memories about you, as a colleque of my brother, Mawlana Abdel Mouniem Mohamed Kheir( god bless his soule) and I read your comment some where in the baord
about him , when a warm tears came down!!because when he died I was some where missing in this hard Europe, and it was so diep to miss a dear person like him, particulrly when you have an special band with some one!!
Life is getting harder and harder!!
Its a cruel world, dr!
many thnkx
Haj
| |
|
|
|
|
|
|
|
|
|
الحمد لله على اللمة معاكم... (Re: أبو الحسين)
|
إخوتي الكرام رواد حوش الشايقية...
مساكم الله بالخير والرضا...
الحمد لله رب العالمين اليوم إتحلت مشكلتي بتاعت المشاركات...
حمداً لله وشوووووووووووووق شديد ليكم من أمس ما طليت عليكم...
أها بالمناسبة دي أرحب شديد الترحيب بالأخ الدكتور أبو سبيب... وكل من يأتي من د. أبو شوك فهو جميل يا اخواننا والله... وإستمتعت جداً للتحيلي الجانا منو ويااااااااارب يكون بيننا قريباً...
وأهديه وأهديكم أحبتي قصيدة الشاعر حميد بين الموجة والخزان...
قصيدة بين الموجة والخزان للشاعر محمد الحسن حُميد...
بين الموجة والخزان...
هَرَدْتَ لهاتي بالغنوات
وقُتْ يبُردْ حَشَاك يا امِّي
ومن التّعب البلا صَالِحْ
تفيقي
تروقي
تنجمِّي
تسوِّي مكانسِكْ المطرة
تضوِّي البيت وتنحَمِّي
تمرقي صبوحة للجيران
قدح فوق ايد وفي ايد أَلمْي
يلاقوك شُفّع الكُتّاب
نُضاف وظُراف بلا النّسْمي
ويغنولِك
يغنّولِك غناوي السّابْ
وفي بيّوضة مافي سرابْ
جُبال كَجَبي وفيافي الكاب
تميد بالخُضرة منقسمي
ولا غُبار ولا هو سحاب
وتنهجمي من الدّهشة
وتحاحيهُن
غناكُن نيي
غناكنُ نيي
غُنا الوهْمي
ويهتفوا زي كلاب الحي
على الأغراب
حوافي الصّي وبيوضة
البراسيم فيها مفروضة
خدارا يراري شوف عيني
على الأبوابْ
قماريها
وحواريها
وطواريها
بقت روضة بقت تشرب من الحامدابْ
تشربي عافيي من إيديّ
تدوِّي اليوية بي حِشْمي
تسوّي السّي وتبتسمي
تشوفي رهاب بُعُد نجمي
وأشوفو قريب قُرُب نَضْمِي
أشوف العالم التِّحْتَاني
هيلا هوب وقف ناهِضْ
ودكّ عمايد الفوقاني
جوه الُّجب رَمى العارضْ
وفي السّاقو الدّمَار أفراق
عريق الحُب نَبَضْ قابِضْ
مِتِل قَبْض الحروف في اسمي
غناوينا القبيل رَقْرَاقْ
علينا تَصُب بَرِدْ قَارِضْ
أَلُكْ طيناتا من دمّي
وارْمُلا من عصب عشّاق
أنُطْ تُلُّبْ وأجيك عارِضْ
واجُرْ نمَيِّ
أدودي لهاتي بالغنوات
عُقُب يبرد حَشاَك يا امِّي
تسوِّي السّيْ وتبتسمي
تسمِّي الشّعب وتعتّصْمِي
بحبل القُدرة تتفرّقْ
ظُلُمةً فيها تتحرّقْ
صُرُمةً قالوا ليك قِسْمي
أدودي لهاتي بالغنوات
عُقُبْ يبُردْ حَشَاك يا امِّي
تقلبي الكلمة بي الكلمي
ضُراعِكْ يرْمِي ما يَدْمِي
تقيفي بعيد عن الشُّمات
تكوني اقرب لي من إسمي
واضُمِّكْ بارتياح يا امِّي
أحبِّكْ صَاحْ
وصَاحْ حلمي
ولاكي سعية للضَبّاحْ
ولا شمش الصّباح حِزْمِي
ولا كَتْف السِّلاح سوّاحْ
ولا نزف الجراح ألمي
هيا أنحزْمي
هيا أنخلْقي
هيا أنعتْقي
متين مو دايرة ري تسْقِي
ولا في إيد النّزيف تبقَي
ولا في إيد الخريف تبقِي
ولا الفيضان يبدِّع بِكْ .
ولا في القيفة تنهدْمِي
ولا إنْ جَاتْ حارّه تنهزْمِي
ولا يغشى الغُلُب قلبِكْ
ولا تشقِي
ولا انتِ تخافي لا تَدْمِي
ضُراعِكْ يرْمِي ما يَدْمِي
فيا حزن البلد عوك كَرْ
ويا سعد الولد
ضَرْ ضَرْ
مع النّسْمِي
و ألِوْ قيمة العَمَل عِمِّي
وافتحي ظلمَتِكْ للضّي
سِنِّي على النضال إيدي
سوِّكي بالهُتَاف فَمِّي
شوارعِكْ لَيْ
دَويها عَلَيْ
إذا ما آخر العلاج الكَيْ
مراويدِكْ حُمُر صُمِّي
مراويدِكْ حُمُر يا امِّي
بليلتي ولا ضبايح طَيْ
قليلتي ولا كُتُر سِمِّي
وطني ولا مِلي بطني
سُكَاتي ولا الكلام النيّ...
ولكم جميعاً مودتي... وبجيكم راجع بكرة لو ربنا حيانا للتحليل والغوص في كلمات الدكتور أبو سبيب ولا يفوتني أن أشكر الدكتور/ يس على الهدايا الرائعة التي أتحفنا بها... وربنا يخدِّر ضراعك يا اخوي... والترحيب عبرك بالأخ الكريم محمد خير... وأبقى أظهر...
أبو الحســـــــــــــين...
| |
|
|
|
|
|
|
|
|
|
Re: الحمد لله على اللمة معاكم... (Re: أبو الحسين)
|
Quote: أنا أخو البت اللكعت قرن الخمرة النازة
على وردان الصبوة الراكزة
الجنيات الهازة .. صدورن لازة ورقّ النص زي خيت الشلة
بالحيل آ جني إيه والله |
قد يكون مولدها ( أعني القصيدة ) أحساس دفين طفح للسطح في ليالي العاصمة بما فيها من زخم, وهذا الأحساس المدغدغ يبرز عند الشعور بفقد المكان ومافيه والزمان وما حدث فيه, هنا يأتي شيطان الشعر يكلكل يكلكل حتى تتدافع كلمات درر مضمومه, شعراً يحدو بها الركاب في الحل والترحال والمكوث.
كلمات قصيدة الشاعر الفحل ود بادي تنبئ أن ذاك الشعور أنتابه ودغدغ أحشائه وهو في الخرتوم بداعي التعلم في جامعة الخرتوم.
مطلع القصيدة جميل جمال ما بعدو جمال, كان الفخر والأعتزاز بالنفس ... أهلنا في المفاخرة أن يقولك الواحد منهم,,,, أنا أخو البنية ,, أن أخو..... ويسم أخته,, أو أنا أبو فلانة .....
كانت تلك ( الفتاة )التي أعتز وأفتخر بها ود بادي نوارة فريقها.. فادعة تتمايل في الرقيص تلكع جادعه بقرنها اي ديسها المعطن بالخمرة على جيد الصبيه.. بل دقق أكثر وقال على وردان جيد الصبية ترمي قرنها بالشبال,,, وحتى الصبية ماهم لقاط طرف بل صفوة وشجعان ولاد الحلّه.
الجنيات الهازة .. صدورن لازة ورقّ النص زي خيت الشلة
بالحيل آ جني إي والله
عادة أهلنا وناسنا في وصف الجنى الهاش وباش أقولولك دا جنى هازي ولازي أي هاز ومبشر بيده مستقبل ومرحب ولازي اي فارد صدره يوحي لك بمافي دواخله من شجاعة وشهامة وكرم
وبعد كلو عرج على وصف الصبية أنهم صدورهم لازة ومن الوسط ولتحت رقيق زي خيت الشله وهي صفة الشجعان لا هو سميناً برل لأ هو رقيق ملصوق جلدو علي عضمو.
لذا نجد أن بنونة بت المك نمر عندما رثت أخواها عماره ( ومات بمرض الجرب عافانا الله وأياكم )
ماهو الفافنوس ماهو الغليد البوص
ود المك عريس خيلن بجن عركوس
أحي علي سيفو البحد الروس
(عدل بواسطة خالد علي محجوب المنسي on 12-18-2006, 11:07 PM)
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
شكراً يا ابو الحسين
Quote: بقت روضة بقت تشرب من الحامدابْ
تشربي عافيي من إيديّ
تدوِّي اليوية بي حِشْمي
تسوّي السّي وتبتسمي
تشوفي رهاب بُعُد نجمي
وأشوفو قريب قُرُب نَضْمِي
أشوف العالم التِّحْتَاني
هيلا هوب وقف ناهِضْ
ودكّ عمايد الفوقاني
جوه الُّجب رَمى العارضْ
وفي السّاقو الدّمَار أفراق
عريق الحُب نَبَضْ قابِضْ
مِتِل قَبْض الحروف في اسمي
غناوينا القبيل رَقْرَاقْ
علينا تَصُب بَرِدْ قَارِضْ
أَلُكْ طيناتا من دمّي
وارْمُلا من عصب عشّاق
أنُطْ تُلُّبْ وأجيك عارِضْ
واجُرْ نمَيِّ |
وأهديك وزوارك جزء من نص قصيدة حميد الواردة أعلاه بصوته وفنان آخر
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
وتعمقت تلك الصلة بعد عملي بالمحاماة وذهابي مع زميلي المرحوم أيضاً
الأستاذ عبد الهادي أحمد عثمان"عبود سندول" لمحكمة الدبة ، وفيها
عرفت أخاكم أمين وبعض أهليكم ، لقد قضيت في بيت الشاعر عبد الله محمد خير
أمتع الجلسات أمام داره في صحبة الأستاذ صديق أحمد وعباس مدني يقول
لنا الجديد من أشعاره ويحكي أسرار قصائده والمعنيات بها
مثل (بلدكم مر بيها صدف وجنب دار البريدو".دار ......" وقف يا جميل) وقصيدة
سعاد ومن المعنية بها و و و و ويطول الكلام في هذا ، كما عرفني
بنفر كريم من دياركم في الككر والدبة
ألا رحم الله عبد المنعم بقدر جلال عمله وحبه للناس
Quote: Quote: ßáãÇÊ ÞÕíÏÉ ÇáÔÇÚÑ ÇáÝÍá æÏ ÈÇÏí ÊäÈÆ Ãä ÐÇß ÇáÔÚæÑ ÃäÊÇÈå æÏÛÏÛ ÃÍÔÇÆå æåæ Ýí ÇáÎÑÊæã ÈÏÇÚí ÇáÊÚáã Ýí ÌÇãÚÉ ÇáÎÑÊæã.
|
æÅäÊ íÇ ÎÇáÏ æÇááå ÏÛÏÛÊ ãÔÇÚÑäÇ æÃÍÇÓíÓäÇ ÈÊÚáíÞÇÊß ÇáÌãíáÉ Ïí...
æÇÕá Çááå íÎÏøöÑ ÖÑÇÚß æÃæá ãÇ ÊäÊåí ãäåÇ ÃäÒá áß ÛíÑåÇ æÈÇáØáÈ ãäß ßãÇä ÞÕÑÊ ãÚÇß¿¿...
ãæÏÊí...
ÃÈæ ÇáÍÓÜÜÜÜÜÜÜÜÜÜÜíä...
|
وانا أيضاً من الذين زاروا داركم العامر بالحسيناب في اللكر وقضينا امسية طيبة في حضرة والدكم المغفور له بإذن الله الشيخ محمد محمد خير الذي روى لي أنه تتلمذ على يد شيخنا الراحل أحمد صالح فضل بمورة، وكان وقتها صديقنا الراحل عبدالمنعم يخطو اولى خطواته بالهيئة القضائية وكانت زيارتي تلك في عام1992م تقريباً برفقة المغفور له صديقي الراحل أيضاً عبودالذي لا يعرف إلا الرجال ولا تجده إلا في مواقع الرجال.
ولقد تركت هذه الرحلة أثراً طيباً في نفس صديقي الراحل البشوش الضاحك دوماً عبد المنعم رغم أنها تمت في غيابه، فقد عبر لي عن ذلك بعد أيام قليلة من هذه الزيارة حينما سمعت صوتاًأتي من جهة عمارة بنك الشمال ينادي (مولانا موسى مولانا موسى) فإذا به مولانا عبدالمنعم ولكنه إزداد بشاشة وترحاب قابلني بنفس الود المعهود فيه وكان ذلك آخر لقاء بيني وبينه حيث غادرت بعدها السودان وحزنت جداً لخبر وفاة والدكم رحمه الله ثم كانت الفجيعة برحيل مولانا عبدالمنعم عوض الله شبابه الجنة وهو ثاني نجم يهوي من زملاء الدراسة سبقه صديقنا احمد الننقة تم لحق بهما صديقنا عبد الهادي الخلفة ثم رحل عبود وقد سكنناالحزن والأسى بفراقهم رحمهم الله وأسكنهم فسيح جناته.
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: طارق جبريل)
|
Quote: وإنت يا خالد والله دغدغت مشاعرنا وأحاسيسنا بتعليقاتك الجميلة دي...
واصل الله يخدِّر ضراعك وأول ما تنتهي منها أنزل لك غيرها وبالطلب منك كمان قصرت معاك؟؟...
مودتي...
أبو الحســـــــــــين... |
الحنين السنجك ابوالحسين السلام عليك بعد الغيبة التي طالت لثلاثة أيام لكن نزلت علينا كثلاثة سنوات وكان عزانا أنكم أصبحتم رواد سودانيزونلاين في رويشات القليب المكلوم ....لكم التحية والتقدير والأحترام
خالد محجوب
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: خالد علي محجوب المنسي)
|
Quote: الجنيات الحزمو الجبة
وعرق الشتوي عليهم نايا و صب
قول ما دل .. رجالا حصدوا الحبة
عيشهن هادو انكال واتعبّ
ومنو كتير في الواطا انكبّ
وباقي مصوبر واقف قبة
الحمد آلاف .. الشكر آلاف
الحمد آلاف الشكر آلاف
العيش الرقد أصناف أصناف
الولد الكال.. عزام .. حلاف...ضياف
الرزق الجانا مدلة.. الحلق الجاف اتبلة
بالحيل آ جني إيه والله
الوادي الجانا مترقن
مدّ جناحو الطايل شرقا وغربا
القبلي بروقو على القلعات يضّربن
الدُكّن البِعدن قِربن
فوق صنقور المحلة الطالت كبّن
قول للمحلة بيوتك خربن
قول ما دلة.. الحلق الجاف اتبلّ
بالحيل آ جني إيه والله
مرحاتنا شرابهن يوت ماغبّن
شبعانات في الشقل أب شوك ما شبّن
الحُمَّل ولدن وربّن
حلماتن تقلن.. جرّن.. فوق سيقانن كبّن
اللبن العاتم في ضرعاتن جبّن
المغصة إن كان ضرعاتن خربن
القرعة آ وليد .. السعن آ بنية
القربة كمان... كبوها المية
المغصة إن كان ضرعاتن خربن
شوفو النعمة السالت فوق قيزان الرملة
ناس البندر لبن الشاي بالعملة
سمح الخمج الفوق أسيادو
سمح العز المن أجدادو
الجنيات المشو ما عادو
كان بالردة أكان اتنادو
غرّب حامد وشرّق بلة
كانوا بحلبو الضرع الدلّة
كانوا بحضرو الخير القدحو معلّا
الجنيات ما كفرت بنعمة الله
بالحيل آ جني إيه والله |
أنا يخيّل لي أنا لسان حال الشاعر الفحل ودبادي كان يقول الزمان الأنقصدانا وفي البلاد شتت عددنا تلقانا شرقاً وغرباً... ورغم ذلك الخير عمّ البلد لكن الخوف ما يلقالو زولاً يحرت أرضو... ولا يجود ويرقد أرضو...ولا يرفع التقانت ... ولا يسرّب سرباتو ويزرع ويحصد ويحلب ولا..ولا ... ولا .....
الجنيات فاتوا البلد الفي قرايتو والفي طلب رزقو جوه وبره..
الجنيات الحزمو الجبة
وعرق الشتوي عليهم نايا و صب
قول ما دل .. رجالا حصدوا الحبة
عيشهن هادو انكال واتعبّ
ومنو كتير في الواطا انكبّ
وباقي مصوبر واقف قبة
الحمد آلاف .. الشكر آلاف
الحمد آلاف الشكر آلاف
العيش الرقد أصناف أصناف
الولد الكال.. عزام .. حلاف...ضياف
الرزق الجانا مدلة.. الحلق الجاف اتبلة
بالحيل آ جني إيه والله
الوادي الجانا مترقن
مدّ جناحو الطايل شرقا وغربا
القبلي بروقو على القلعات يضّربن
الدُكّن البِعدن قِربن
فوق صنقور المحلة الطالت كبّن
قول للمحلة بيوتك خربن
قول ما دلة.. الحلق الجاف اتبلّ
بالحيل آ جني إيه والله
الخريف عادة يكون بشارة خير لبدء العمل وأول ماتشيل سحيبات بدر الخريف,, يلقى الناس البحرت وكرباجو يعوي فوق ضهر تيرانو ..جوه.. بره.. أرقد.. قوم.. والتور مجرّق يفهم كل كلمة ويستجيب لها ... وابدع ود بادي في وصف الجنيات واستعداهم لموسم الزراعة .
شنق كل واحد كم قميصو لافوق وابرز عضلاتو ووحزم جبتو في وسطو وشن الجبة هي الوحيدة تراكم عليها عرق الشتاء لكنو عرق رجال
قول مادلاوهي تعني قول ماشاء الله
بعد ما حرتوا وجودوا وقصبوا ورفوا وشتتوا بزورهم ,, جاء وقت الحصاد كان الموسم خير وعيشو كتير كالو وعبو .. وصوبروا .. وتصدقوا .. وآكل الطير .. وآكل الجار الداني والقاصي
ومن هم اللذين زرعوا وحصدوا وكالوا ... جنيات تكسوهم صفات الكرم والجود
( الولد الكال عزّام حلاّف ضيّاف )
رجع من تاني ودبادي يصف حال بشائر الخير في تلك المنطقة
الوادي الجانا مترقن
مدّ جناحو الطايل شرقا وغربا
القبلي بروقو على القلعات يضّربن
الدُكّن البِعدن قِربن
فوق صنقور المحلة الطالت كبّن
قول للمحلة بيوتك خربن
ضرب المطر الخلا الفوق وحملت الوديان السيل العارم بخيرو وشرو جووو كبّ فوق البحر وبعدها بأيام بدت بشائر الخير ببروق قبلية والسحاب الدكّن بعد ماكان جهة الصعيد بدأ يقترب شيئاً فشئ وشويتين وسووى شو مطرن تقيل بالحيل وروى الأرض الضربها المحل وأول ماسقى بدأ بري صنقور الأرض اي رأسها
مرحاتنا شرابهن يوت ماغبّن
شبعانات في الشقل أب شوك ما شبّن
الحُمَّل ولدن وربّن
حلماتن تقلن.. جرّن.. فوق سيقانن كبّن
اللبن العاتم في ضرعاتن جبّن
المغصة إن كان ضرعاتن خربن
القرعة آ وليد .. السعن آ بنية
القربة كمان... كبوها المية
المغصة إن كان ضرعاتن خربن
شوفو النعمة السالت فوق قيزان الرملة
ناس البندر لبن الشاي بالعملة
سمح الخمج الفوق أسيادو
سمح العز المن أجدادو
حال المنطقة في أيام المحل يقل فيها الماء الكلا ولكن بعد نزول هذا الخير كانت البهائم ترد للشرب ( يوت ) اي يومياً وكمان شبعانات, الخير مارقد وقش الخريف ملا الأرض فوق تحت وكان مرعاهن شبيب في الشقل والسلم اب شوك ,,
الحمّل ولدن, ضرعاتن جرن وما لاقيات اليحلبهن وبقاء اللبن في الضرع قد يفسده ,, يا سلام ومنظر البهائم جايا راجعة مغيرب من مرعاها متقّل ضرعاتها باللبن وزاد جمال اللوحة رب البيت يصيح ناولني القرعة آوليد انّحلب البهائم أتملت القرعة جيب السعن وفضي القربة من الموية الشكر آلاف والحمد آلاف الخير كتير نحمد ربنا
عليك الله شوف جنس الخير الجانا, نعمة سالت فوق قيزان الرملة الرضيع والبحبا والبتاتي والبمشي للجيران والكبير والمسن شبعو وما زال الخير وفير,, عندها تذّكر اين يوجد هو في الخرتوم الناس تشتري في اللبن بالعملة ,, والله أهلنا عايشين في رغد من العيش ( وسعيد العيشتو جنب طينو وتمرتو )
غرّب حامد وشرّق بلة
كانوا بحلبو الضرع الدلّة
كانوا بحضرو الخير القدحو معلّا
الجنيات ما كفرت بنعمة الله
بالحيل آ جني إيه والله
البلد فضت تعد الصبيان فيها فوق ىيدك الواحده, حامد ضرب شرق وبله ضرب غرب ومحمد في الخرتوم بقرأ وعلي ود عتمان بعّد تب وسافر للخليج وود حسنين اللخيدر اب شعرن سبيبي أتوكّر في بلد النصارى والخوجات, والله أن كانوا معانا كانو حضروا الخير الجانا مدّله
اللي ساب أهلو ديارو
وخلّف الأحزان وراهو
الطشه من أمو وابوهو
يقضي حوول مايشوف جناهو
يا حليلنا ونحنا النايمين علي حيلنا قضينا نص عمرنا في غربه والله يهون أن لا تطمر أجسادنا تحت الجليد والله أخير لينا ألف مرة قهنوبة وسموم بلدنا يا حليلنا ويا حليلنا
(عدل بواسطة خالد علي محجوب المنسي on 12-19-2006, 09:14 PM)
(عدل بواسطة خالد علي محجوب المنسي on 12-19-2006, 09:22 PM)
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
الحبيب الأستاذ خالد
سلام نحتاجك لتحليل كل كلمة ترد هنا
Quote: يلقى الناس البحرت وكرباجو يعوي فوق ضهر تيرانو
..جوه.. بره.. أرقد.. قوم.. والتور مجرّق يفهم
كل كلمة ويستجيب لها |
يا سلام يا سلام
Quote: فوق صنقور المحلة الطالت كبّن
قول للمحلة بيوتك خربن |
| Quote: وأول ماسقى بدأ بري صنقور الأرض اي رأسها |
Quote: وود حسنين اللخيدر اب شعرن سبيبي
أتوكّر في بلد النصارى والخوجات |
كان الله في عونك وايانا ، كلنا في الهوا شرق
| Quote: يا حليلنا ونحنا النايمين علي حيلنا |
بالغت عديل يا أخي
لك ودي وحبي
هل من مزيد
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
إخوتي الكرام...
صبحكم الله بالخير والرضا...
يا اخواننا والله اليومين دي عندي مشكلة في النِت حقي... إنتو عارفين بقى زي الكُومَر الزمان داك... إلا يقوم بالدَفْرة!!! أها إن بقيت ما طبقت ليهو الدفرة يجيك مِتوَرِن راجع!!!
وهسع الرد دا أزازي فيهو وأضاير فيهو ماعارفو حا يصلكم ولة لأ... عشان كدي أعذروني... ووييييييين يا اخواننا الخليفة حاتم طول مننا أوعة يكون عندو نفس المشكلة... تحياتي لكل الإخوة الإنضموا إلينا...
وبمناسبة إعلان إستقلال السودان من البرلمان أمس التاسع عشر من ديسمبر... أهديكم ملحمة الشاعر إسماعيل حسن بلادي أنا... ويا ريت لو د. يس شافها لينا من جرابو المليان ديمي... بصوت المبدع عثمان اليمني (رمية) ولة تماسيح الحامداب...
بلادي أنا بلاد ناساً في أول شئ...مواريثم كتاب الله
وحصان مسروج، وسيف مسنون حداه درع
كتاتيبم تسرج الليل مع الحيران
وشيخا في الخلاوي ورع
وكم نخلات تهبهب في جروفا الساق
وبقرة حلوبة تتضرّع وليها ضرع
بلدي أنا
تشيل الناس ، كل الناس وساع بي حيلا وليلا يسع
وتتدفق مياه النيل على الوديان
بياض الفضة في وهج الهجير بيشع
بلدي سهول ، بلدي حقول بلدي الجنة للعاشوها
ولي البرّة بيها سمع
بلدي بلد ناساً تكرم الضيف
وحتى الطير يجيها جعان ومن أطراف تكيها شبع
بلدي بلد الصفقة والطنبور وجاراتن تنق بالليل
وبنوتن تحاكي الخيل
يشابن زي جدي الريل
بلدي أمان ، بلدي حنان وناسا حُنان
يكفكفوا دمعة المفجوع
ويبدّوا الغير على زاتم
يقسموا اللقمة بيناتم
ويدّوا الزاد حتن كان مصيرم جوع
يحبّوا الجار
يموتوا عشان حقوق الجار
يضوقوا النار عشان فد دمعة
وكيف الحال لو شافوها سايلة دموع!
ديل أهلي .. واللــــــــــه ديل أهلي
البقيف في الدار في نص الدار
وأقول لي الدنيا. كل الدنيا ديل أهلي
عرب ممزوجة بي دم الزنوج الحارّة
ديل أهلي .. ديل قبيلتي لمّن أدور أفصل للبدور فصلي
ديل فصلي
أقول بعضي
ألاقيهم تسرّبوا في مسارب الروح
بقوا كولي
ألاقي قلبي والإحساس
وسافر في بحار شوقم زمــــان عقلي
أنا محل قبّلت ألقاهم معاي ، معاي زي ضليّ
أنا لو ما جيت من زي ديل كان وا أسافاي ، وا مأساتي وا زّلي
تصوّر كيف يكون الحال لو ما كنت سودان...
وأهل الحارّة ما أهلي تصوّر...
ولكم مودتي قواسيب قواسيب...
أبو الحســـــــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: yasiko)
|
الأخ الأستاذ أبو الحسين
تحية طيبة
بداية أود أن أهننئكم على هذا البوست والذي يعتبر إضافة مميزة للمنبر ..
وأنا من العاشقين جداً للفن الشايقي بالرغم من أنني محسي أب عن جد من منطقة بدين
ولكن ارتباطي بمنطقة كريمة أكبر من دنقلا ... وسبب هذا الارتباط هو أن أحد
أعمامنا تزوج من شايقية منذ أكثر من أربعين سنة .. وهذا ساعدني في زيارة أغلبية
مدن كريمة وأن احفظ أشعار وأغاني شايقية كثيرة.. وقد رافقت الشاعر الأستاذ
إسماعيل حسن ـ رحمة الله ـ في رحلة إلى مدينة الزومة عام 1981 عند ما فاز في
انتخابات المجالس في عهد نميري في مدينة كريمة..
وأود المشاركة بقصيدة كتبت بمناسبة فيضانات 1994 بكريمة ولا أدري من شاعرها ولكن
كتبها لي الأستاذ الفنان عبد القيوم الشريف قبل عودته النهائة للسودان وقد كان
في ضيافتنافي منزلنا في أحد أعياد الفطر بمدينة جدة :
يا خالق الإنسان من هابٍ وطين
سميت بسم الله يا حي يا معين
يا من خلقت الدنيا بالمال والبنين
غفار الذنوب هادي العصاة المذنبين
سميت بي نبي خاتم المرسلين
شافع الأمم يوم الخلوق ملياني دين
أهلاً وسهلاً يا ضيوفنا مشرفين
مرحب حبابكم عشرة في البلد الأمين
أهلاً وسهلاً من تمود بركاوي مشرق ومن مدين
أهلاً وسهلاً من قلوب تنبض صلاة طيبة وحنين
بإسم القرار بإسم الغبش بإسم الغلابة الكادحين
باسم البحر لمن قرر قايل ودلانا مقصرين
عوبس وشيهو نعل قفاه قابلنا بيهو قبيح وشين
حالف يعم البلد واليابسة كلها تبقى طين
إتكاتفو الشيب والشباب في الحلبة هتفو مكبرين
الله أكبر يا شمال الله أكبر يا قرير الله أكبر دار ودين
الله أكبر يا مكافح قبلة المتماسكين
وقفوا الرجال دقوا الصدور إتحدوا قاموا مشمرين
ديل خلطو مويتك بالنهار في الحرة بي عرق الجبين
ديل حاوشوك بي قفة بي طورية بي قلباً سمين
حرسوك ذي حرست عريس مشرودة فوقو عديل وزين
قالولو مقطوع النصيب جاينا زاحف ماشي وين
بالله ناسي مشيك ستة وأربعين
وناسي العملتها فينا ماني مصدقين
بالله ما كافاك هالسويتة في سنتاً عداده تمانيتين
شتتنا وفرقتنا وشلت التعبنا زرعنا قبال كم سنين
لكن أذتنا مخلفاتك وفوق جسمونا بدت تبين
كل البيوت مزحومة بالمتألمين
هاك يا وزير الصحة جيناك مشتكين
ما شفت حالتنا فوقنا كتفت الإيدين
وكانت سندنا جبارة الأحد الأمين
نحنا البعوضة دي دمرت قوانا بالعض الطعين
تنضم عديل كل اللغات بأنواعة من عربي ورطين
أغرب كلام أرويهو ليك أسأل جميع الواقفين
عمرك سمعت بعوضة تبتسم غذاها كلوركين
نحن الحبوب في ذاتة أبت تنفعنا حبة وحبتين
الكورس أصبح يا وزير الصحة يصرفو لينا هين
ما ودر الألم البعضعض جوه في الوجدان دفين
صبحت حياتنا كئيبة والناس مهلكين
الحمى والجلوكوز مع الكينين مركب كل حين
نحن لا سكر ندور ولا إغاثة زبيب وتين
كل الإغاثة المن وزارة الصحة نطلبة أندرين
دايرين نودر لسعة البعوضة المرض اللعين
أدونا صحة بيئة تسلم وتستكين
بعد دة البحر إن قلتو أحبسو من الفراعنا نردمو طين
ولكم فائق التحية ...
أخوكم عادل عوض بلال
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: من اعظم ما قال الشوايقة
..........
ست ريدي في ذاتك عبدت الله
وزاد إيمان قليباً ليا قبلك تاه
...........
مشارع الحب كتير أنا واردا
حتى باللآهات رئاتي مقدده
..........
وأعظم ما قالوا في الأمثال
الكضب من دورين يقوم
يغلبوا الصح في فرد يوم
..........
وقال حاج الماحي في طلبه من ربه
عصاتنا البشربوا الدكاي
مع الصديق سديس الراي
( قوافل درجن بي جاي
طالبات المدينة مناي)
........... |
أُستاذي المنصوري...
نهارك سعيد... وتطلنا مرة وتغيب مرات...
حقيقةً أوافقك أن معظم أشعار الشايقية جيدة لدرجة الإمتياز... والمرحلة المرت بيها القصيدة الشايقية ووضع لبناتها الفحول الزمان ماشي بإتزان شديد إلا أن بعض الشباب إنحرفوا شوية كدي من قالب الكلمة الشايقية نفسها... وديل بجيك راجع لي موضوعهم لي قدام إن بقى الله مد في الأيام لأن كثير من تصدوا لهم منهم المرحوم الباحث محجوب كرار (رحمه الله) ومحمد جيب الله كدكي ومحمد أحمد الشايقي... وكثير من عمالقة الشعر الشايقي والمهتمين بالأُغنية الشايقية...
لكن يا أخي المنصوري... أنا إعتبر من أعظم ما كُتِب في الشعر الشايقي قصيدة للشاعر المادح علي ود حليب... (اللهم أرضى عنه)... وهي قصيدة من أولها لي نهايتها بقافية الجيم... (القافية القليلة جداً في الشعر عموماً) كان جاهلي وكان عباسي وكان شايقي...
يبداها... بي
واشوقي علي طيبة أُم نخيلاً قَجْ...
نعمة الزار حبِيبُو ووافى يوم الحج...
والقصيدة عندي في البيت كاملة إنشاء الله حا أكتبها ومناسبتها وأنزلها ليكم يوم السبت بإذن الله تعالى...
كميات مودتي... لك ولكل الإخوة المقيمين معانا في الحوش دا والزوار الكرام... وأبقى لا تِنْقطِع شئ... وإنشاء الله العناوين الكتبتها دي يقوم د. يس ينزلها لينا أغاني الله يديك ويديهو والجميع العافي...
أبو الحســـــــــــــــين....
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: حُُمًَّد إحمد التمرجي
الجزء الأول
جاء داخل من لا برَّا ... رمى الطوريي اللَّتُو فوق القسِّيبي المختوتَة في الكيميِّي الغادي من الدونْكا ... عامنو فاطر وشربان الشاي لكن حسَّا لو بى جويعة كدي ... راح على الدونكا فتح التُقُل الليل الكسري , خمش لو سنسني وبقى يقرض فيها ... كورك لى مرتو ... يا آمني .. يا آمني .. إنتي حُمَدَ إحمَد وينو ؟ قالت لو راح يسقي الحمارة ويجي ... قال لها الحماره ؟ والعَز القت لو ودّها سوق ود شنّه ما ساقها شي ...؟ قالت لو لا لا ... إنت العّز بايعها لى شنو ...؟ غلَّبتك في القش ... ؟ القش مو ياهو دا الراقد ... وبرسيمك البى تحت لى الليلي ما إتفرض ... قال لها :- عمو مرسل لو جواب مع ناس ود الفكي ... قال يرسلوهو ليهو هناك في أدبره , شان يشوف لو صِرفه , يدخلو المدرسة الصناعية يتعلم لو صنعه , وإنتي عارفاني معلم الله ... قتا اللبيع العز تجيب لو حق التذكرة ومصيريفات يوصلنو هناك ... أصلو القراعه ما نفع فيها , أقول لو أمش اسقي الملاح , ولا البرسيم البى تحت , يروح يبعج لي الموية في الحيطان نامن يشرقن آب يجيب خبرن ... وديناهو يبقى مراسلة في المستشفى عمل لهن فيها تمرجي , الحكيم إن بقى مرق يقص الراقدين في العنابر , ولا يقضالو غرد... يتحكر هو في بكانو , ويصرف في الحبوب للناس ... دار الزين بت النعيم كان ما الله شافها ساكت , مو كان دار يلحقها الصِح ؟ .. غَمَت لها الحبوب في إيدها قال لها تبلعيهن كلهن أسع ده , المسكينة جابت لها جك موية , وإتفرجَخَت وكَمَدَتِن في خشمها , بى صَمّتِن زي ما هِن , بلعتن ضمّه في ساعتن , نامن جات تزح للناس برا , غالبها تمشي بى كرعيها .. ؟ مشيت إتحمد لها السلامي لقيت جضوما بتل المنقايي المخورني ..., تعاين لي دار تنضم تقولي شي ... وغالبها تنضم , والعوض ود أم الحسين , جاتو الوِردِي , مشى لقى الحكيم ماهو فِي ...,حُمَّد إحمد مسكو طبزو حُقني تحت أباطو... إيدو لا يوم الليلي مدلدلا بتل بت اللِّعاب ... علا يزحها بى إيدو التاني ... حد ما يلاقيني في السوق يسمعني كلمةً ماها ياها ... دار يسوي لنا عوجي الجنى ده ... وأسع شواليتو الليل كريمي ده , بلا فايدي ساكت , البيلقاها كلها رايحي في كرشو , وإن فضل شي يديهو ناس البنطون ويجي داخل اهلو مع العمال , بتل الزول النعيم ... لزيتي بو كرشك وتقنتي بو تسعة شهور على الفاضي غايتو0
حُمَّد إحمَد سقى الحماره وجايي بالدرب لاقاهو بابكر ود النصيح , زولاً كدي كلمتو حاااضري ما قاع يتلفت لها شي ...ديمي عليهو مباري المداديح , ولاد حاج الماحي , يحمس لهن في الطارات اللتن , ويولع لهن في البخور , يَعَشَقْ في المديح , ويتهوزز في الداره نامن يقع في الواطا مغبي ويرشوهو بالموية , وهو الصلاة ما قاع يصليها ... أها وقفوا ينضموا , حمد احمد قال لو:- أبوي عندو عَز جاي يبيعها , قال لي ودّها السوق , ما تجي اللبيعها ليك ..؟ والله حِسَّها سمح بالحيل ساعة تَمَعْمِعْ ... بابكر قال لو :- حسها سمح ..؟ نان ما تعلمها المديح ...؟ خلاهو ومشى على أهلن ...جاء داخل ..كرعيهو تشوفن من بعيد تحلف تقول لابس لو شرابات , من مشي الحفى والحال العليهن ... ملص عراقيهو وختاهو في العنقريب ... عليكن أمان الله العراقي واقف بتل الزول من الكدوب الفوقو ...إن جيت دار تطبقو يتفترن في إيديك بتل الكسري اليابسي ..وأصلو كان لى حُمَّد إحمد .. الصابونة الحلوي دي يبقى ليهو ستة شهور ما ختاها في جسماً ليهو ... بس يمشي يغتس في البحر ويجي مارق يا إندعك لو بى آشميقا يا ما إندعك ... ياهو ده حمامو , أبوهو كورك لو قال لو :- عمك مرسل قال يسفروك ليهو في أدبره يدخلك الصناعيي تتعلم لك صنعة ... قال لو :- آ يابا انا دار اسوي لي كارو إشتغل بها قبلي هني ... أبوهو ردا لو :- كارة أشني ..؟ البلد ملاني كوّارو ... والحمير وقعات في غضب الله ... زمان الناس يحشوا بن القش ويقضوبن مشاويرن ... أسع يا كافي البلاء حماراً تلقاهو مقَيّل في مراحو ماهو في .. جاتن آفة بقت لهن في رقبتن وشقاوةً إنتلحتن ... وأسع الكارو دي الدار تلقاها منها , تأكلك إنت ولا ياكلها الحمار ...؟ إنتا براك داير لك قيراطين اللات قمح ... بلا المريق ..في فد شهير ... أمك واقفي في دابك من عند الدونكا ما قاع تمرق ... كرش الحاجي اللتك دي كارتك آب تكفيها ... حضر نفسك للقطر الجايي خل المحقة البتسوي فيها دي ... |
إخوتي الكرام...
نهاركم سعيد...
بمناسبة الإخوة الإنضموا إلينا حديثاً أهديكم الجزء الثاني من قصة حُمد إحمد التمرجي...
حمد إحمد التمرجي ـ الجزء الثاني
مشى باع العّز في السوق وجاب القريشات لى أبوهو وجاء ... فضَّل للسفر كم يوم كدي ... أبوهو ساقو قطع لو جلابيي اللت دبلان , وعراقيين اللات دَمُوريي بى سراويلن , وأدوهن للترزي , وأخد لو جزمة باتا بيضاء , وطاقيي حمراء ... وحمد احمد مكوزم ماد تلاليشو , مااااااهو راضي بالسفر ده شي ... عمرو ما عدا من كريمي لا غادي ... زمااان قبّال يعرف كريمي والمشي ليها .. كان حِرِد مع أبوهو مرة , مسك التحتانيي بالبحر بى كرعيهو ومرقها في الحامداب , مشى قعد لو مع ناس هناك ... , وبقوا يكوسوا فيهو بى هِنِي ما خلولن بكان , وأمو وأخواتو بى بكياتن , بس قلبنَّها مناحة عديل , وخيلانو وأعمامو بالنَبِيشِي أكلوا لحم أبوهو .. ما خلوا لو صَفِحْةً يرقد عليها , واقع في الشِنّيف والهَرَجِي كل يوم ...نامن قرب يطفش حتى هو ... خسوساً واحداً في خيلانو , مسمنو المَكَاجِر ... إضنيهو مفندرات بتل الطانجة اللت اللحم , نضَّام نَضَمِيّاً , تقول مَحَنِّكِنُّو في الاذاعة اللت أم درمان زي ما قاعد يقول لو هو ... يجي يكوس الوَنَسِي مع الناس و الناس ويشردوا منو ... ماب يخلي لو زولاً ينضم معاهو ضمّه ... إن بقيت نعست وقعدت تنشهق لو آب يفكك ... وإن بقيت نمت عديييل فوق كتفو يهزك يصحيك وينضم معاك ... منجض ناس الحِلِّي نجاض ... ود حُمدين مرة قال لو : ناس الحيكومة ديل مالن آب يشغلوك معاهن ..؟
على التَعَتِّر يوم من الليام ... عوض الله ود أب كرُّوقة ...شدّا حمارو على الحامداب ... ماشي يتَمِّنْ لو شوالات اللات حَرْجَلْ وشَمَار , يجي يبيعن للتجار هني في البلد , يتمكسب فيهن , حايم في السواقي اللت الحامداب ... بلا لقى لك حُمّد إحمد بارك لو في حيضان يحش في القش ... لكدو بالعصا فوق قفاهو براااحه ... حمد أحمد اتلفت قال لو هَي هَي :- حتى أنت جيت في بكان السفر ..؟ قايل نفسو سافر مرقها في بلداً طيرا عجمي وهي المسافة كلها ساعتين بالحمار , بس مافي زولاً قايلو يقبّل على الجيهي ديك ... كراهو من قفا وركبو في الحمار جابو صاد لى أهلو ... اليوم داك أمو ضبحت لها عَنَاق وقسمتها للحيران في الخلوة ...
.............................................................
وجاهزين لترجمة أي كلمة صِعِب عليكم فهمها...
ولكم مودتي... وتحايا الكاتب عبد العظيم الطاهر...
أبو الحســـــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
يعلم الله وهل تصدق يا حبيب اللحظة المرقت فيه هذه
الغنية وداير اهديها لصديقي موسى الحسين دون سبب إلا لمعرفتي
بذوقه الرفيع ووضعتها في الشاشة ، فتحت البوست فوجدت طلبك هذا
التحية لكل السودان بهذه المناسبة العظيمة وأهديها للجميع وبصورة
خاصة للأستاذ موسى الحسينQuote: Quote:
الأخ د/ يس
سلامات وشكراً على ذوقكم الرفيع، أغنية بلادي أنا من الأغنيات الرائعة من حيث الكلمات واللحن والأداء (تماسيح الحمداب) ميرغني النجار وعبدالرحمن عجيب وعبدالرحمن أحمد محمد ، وتظل هذه الأغنية محببة إلى النفس وانا دائما أضعها في مرتبة نشيد العطبراوي (أنا سوداني أنا)، شكراً لك د/يس على هذا الإهذائ الرائع ولو عقبت بأغنية أيوة شفتك في الدغيش سايقي المراكب لي بلدنا للرائع ود جبارة تكون كملت الناقصة.
الأخ أبو الحسين
رحبوا بالمحس في دياركم.
دخل حوشكم صديقي المريخابي/ عادل عوض بلال بقصيدة حلوة، نقلها من فم الفنان المبدع عبد القيوم الشريف، فقد عرفته محب لدرجة العشق للطنبور وله جراب عامر بأغنيات الطمبور وأشعار الشايقية وأهداف المريخ في الهلالة . ومتابعة ما يكتبه الشباب في هذا البوست المبدع خالد منسي والدكاترة أبو شوك ويس والبقية، رحبوا به وهو رجل يستحق الضبيحة.
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: موسى الحسين سيد أحمد)
|
Quote: الأخ أبو الحسين
رحبوا بالمحس في دياركم.
دخل حوشكم صديقي المريخابي/ عادل عوض بلال بقصيدة حلوة، نقلها من فم الفنان المبدع عبد القيوم الشريف، فقد عرفته محب لدرجة العشق للطنبور وله جراب عامر بأغنيات الطمبور وأشعار الشايقية وأهداف المريخ في الهلالة . ومتابعة ما يكتبه الشباب في هذا البوست المبدع خالد منسي والدكاترة أبو شوك ويس والبقية، رحبوا به وهو رجل يستحق الضبيحة. |
أُستاذي ود حاج موسى...
مساك الله بالخير والرضا...
وآلاااااااااااااف مراحب بيك وبي أخوالي المحس... (بالمناسبة يا ود حاج موسى المحس ديل أخوالي ناس جزيرة صاي)...
فيا هلا بالأخ عادل عوض وسط أهله وأحبابه السناجك ونحن الحوش دا يا موسى أخوي فتحِنو لكل الجمال السوداني الأصيل... فيا مراحب بكل أهلنا وأحبابنا من شمالنا لي جنوبنا ومن شرقنا لي غربنا...
وهل يأتي منك يا الحَبيِّب إلا كل جميل؟؟؟ شرفنا الأخ عادل في لَقَدابة الدكتور/ يس ودانْقَة د. أبو شوك وصالون الحِبيِّب خالد ودائرة الخليفة حاتم ود هاشم... يا هلا بيهو تاني وتالت... ومراحب بكل الإخوة والأحباب الزارونا والقاعدين يتاوقو لينا من لا برة... وأنا مفروض أرحب وأشارك اليومين دي كتيييييييير عشان الغياب الكان داك... لكن زي ما قلت لي د. يس اليومين دي النت عندي زي الكومر الحكومي الزمان دا... إلا يقوم بالمنفِلَّة وإن ما عملت حسابك يرجع يتوتْرَن تاني لا ورا... بس ربك يعين ويظبط معانا اليومين الجايات ديل...
كميات مودتي... ويا هلا بكل الحِبان...
أبو الحســـــــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: موسى الحسين سيد أحمد)
|
Quote: الحبيب الأستاذ خالد
سلام نحتاجك لتحليل كل كلمة ترد هنا
Quote: يلقى الناس البحرت وكرباجو يعوي فوق ضهر تيرانو
..جوه.. بره.. أرقد.. قوم.. والتور مجرّق يفهم
كل كلمة ويستجيب لها |
المبروك سنجك مائة واربعطاشر دكتور ياسين حفظك الله
مساك الله بالخير
تلقى الجنى كافي سروالو الطويل لافوق والسروال خيطو النعيم عجوبه وقاطع قماشو من النقادة ناس حزقيال, لكن فتح البرباخ وقرع الموية أكسبة لون حمرة طين البحر, ودفيق البلح خالق بقع عليه أشد حمرة داكنة من لون موية البحر وحكمة الله لما قطع قماشو وفشى كان أبيض زي لبن البقرة الحواء.
وزولنا قابض علي المحرات ويدوبي حيناً ويترنم بأغنية حيناً أخر.الحراته هي يقلب الأرض ويستوجب ذلك أن يغرق في مناطق وأن يقلب الأرض قرب الجداول وهي أصعبها وعادة يستلزم هنا التيران الجرق, والتور المجرق اي مدرب ويفهم هذه الكلمات, عندما يقول له جوه تعني أن يميّل لداخل الأرض فيبعد عن الجدول وعندما يقول له بره يخرج أحد التورين لخارج الأرض حتي يستطيع المزارع ا، يقلب الارض في حافة الجدول , وأرقد حينها تجد قعر ( ضدد كلمة حدب ) ضهرو رافع رأسه حاني كرعي حتى يستطيع المزارع أن يغرس بكل قوته علي المحرات ويغرغ في حفر وقلب الأرض في ذلك المكان وبعدها قد يستوجب ان يكون المحرات غرسه عادي لذا يناديه قوم
يا سلام يا دكتور والله أكتب لك واسمع في نقة المجرين وأنا بكل حواسي هناك بعيد بين أهلي يا سلام هيجت الاشجان
ولك ودي وأحترامي وتقديري
خالد محجوب
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: موسى الحسين سيد أحمد)
|
الحبيب ابوالحسين تحيه واجلال
عيني بارده.. والله داركم عامره بالحيل ..كل الجمال والحب في بلادي
ابداع فطري ..لوحه ممزوجة بكل الالوان الزاهيه ...هذا هو شعر الشايقيه
ما فيهو زيف طبيعي وصادق مليان حنيه ...
وكتين نحن عندنا شعر متل ده ..كاتلننا بي المعلقات في شنو؟؟
طبعا انا من محبي الطنبور وخاصة غنا الشايقيه ..ولي زمن بفتشلي في اغنيه
لي 15 سنة ...
القدم ليهو رافع قاسي فرقك يوم اوادع
لو فضل من عمري ثانيه تاني لابد ليك راجع
والله راجع يابلادي تاني راجع يابلادي ,,,
لونسيت ما بنسي مره كسره مره ....
اخونا ود المنسي انت من مويس والا جعلي من كريمي ؟؟؟
تسلموا حبايبي ربنا يديكم العافيه ويزيدكم في الابداع ...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: الحبيب الأستاذ خالد
سلام نحتاجك لتحليل كل كلمة ترد هنا
Quote: يلقى الناس البحرت وكرباجو يعوي فوق ضهر تيرانو
..جوه.. بره.. أرقد.. قوم.. والتور مجرّق يفهم
كل كلمة ويستجيب لها |
الحبيب المبروك سنجك ميه وأربعطاشر ... مساك الله بالخير وعلك عافي
الصبي نصو الأعلى عاري ويكسو أسفل جسمه سروال طويل قاطع قماشو الدبلان من صبحي النقادي وخيطو النعيم عجوبا,, ذاك السروال يوم فشّو كان لونو زي رغوة اللبن لكن الليلي صبغته موية البحر بلون طينها وبه بقع أدكن من مخلفات دفيق البلح, وكافي سروالو لافوق في وسطو ومعقودة فيهو حقّة الصعوط وهو صعوط خمج, جايبو من سلطان الكيف ود الفور ومدنكل سفة قدر الضرب زي دقار اللوري.
عند حراتت الأرض يتحتم ذلك تيران جرّق اي مدربة تدريب خاص لهذا العمل, كذلك قلب الأرض يحتاج في بعض المناطق أن يغرق وفي بعضها لا يعمق وايضاً في بعضها يقلب قرب الجداول وفي اخرى يبتعد لذا كان لزوم تدريب التيران على ذلك.
عندما يحرت ويقلب الأرض قرب الجدول يلزم أن يقول له بره عندها يخرج أحد التورين حتى يدخل في الجدول وهنا تصيب سن المحرات حافة الجدول والعكس عندما يخلص من حراتت حافة الجدول يستوجب أن يقول جوه اي أرجع لداخل الأرض ويستجيب التور النجيب.
وعندما يحب أن يغرق ويغرس السن أعمق في الأرض يردد كلمة أرقد وعندها يقعر التور ضهرو ويتني رجليه لأسفل رافع رأسه حتى يمكن الجنى أن يغرس بكل قوته سن المحرات وعندما يغرق يردد له قوم فيقوم مما كان عليه,
وأجمل مافي ذلك وتراني مضطر أن أقولها وحتى لو يرفدني بكري من البوست
دائماً جرت العادة أن يقول المزارع للتور قوم يا خوّل بره يا خوّل
لك ودي وتقديري وأحترامي
خالد محجوب
| |
|
|
|
|
|
|
| |
|
|
| |
حاتم هاشم
خالد علي محجوب المنسي
أبو الحسين
yasiko
طارق جبريل
حيدر حسن ميرغني
عصام علي أحمد
منصوري
عادل عوض بلال
عماد شمت
فيس بوك
تويتر
انستقرام
يوتيوب
بنتيريست