|
|
 ليس دفاعاً عن الخمر
|
ليس دفاعاً عن الخمر
هنا التذكر يكون جزء من الاستعباط في قصة المريسة فانا لا اتذكر اول مره رأيتها و لكن عندما صرت اميز بين الاشياء و اكون ذخيرتي اللغوية كان من بين تلكم الكلمات (مريسة)... المهم في النهاية وجدت نفسي بشرب في المريسة كأي ممارسة حياتيتة يومية الي انا دخلت المدرسة و هنا تفشت لغة الحلال و الحرام , الجنة و النار , الاقرع الشجاع و كم و كم من التهديد و الوعيد ....وهنا اختل تجانسي الداخلي مع المريسة للابد و يجب ان لا اتهم بعدم الموضوعية فسلامي الداخلي حتي تجاه اسرتي اختل.... و اصبحت بين شد التهديد الديني و جذب ان اكون في مجموعة مكونة من افراد لم يختاروا طريقة تكونهم .... مجموعة تسمي اسرة .... حاولت ان اقلع عن المريسة لانها حسب معتقد مدير المدرسة تعتبر من ام الكبائر .....
و بمناسبة ام الكبائر دي حاج حسن ( ابوي) يعني اترقي بقي امام المسجد بعد موت الامام القديم .... كدا واحد يجي ناطي لي هنا و يقول لي ما في ديمقراطية في اختيار أئمة المساجد ...بس منصب الحاج الجديد دا عندو تباعتوا يعني كل يومين ناطي لينا زول جديد في البيت ...زول خارج في سبيل الله و بدل ينوم في الجامع ابوي بقرر يجيبو معاهو البيت ....لكن تصدقوا حاجة ياخي الناس البخرجوا في سبيل الله ديل ناس بسيطين بساطة كدا مبالغة و صدقوني انا بشفق عليهم اكتر من اني بكرههم ... عمك الخارج دا ما عارف لقط من وين انا بسكر... المهم لفا الكلام و دورو خشي بحمد و طلع بخوجلي لحد ما جاني لي كلام مدير المدرسة الابتائية القبل عشرين سنة عن الخمر و انها ام الكبائر .... و دار بيننا الحوار التالي:
الخارج: انت عارف يا ولدي الخمر دي سموها ام الكبائر ليه؟
انا: حاولت ان افتح شهيته للحديث بفتح فمي دلالة البله و التعطش للمعرفة ببساطة لاني ما عندي لحظتها اي موضوع فقد كنت في عام العطالة الذي يلي الخدمة الالزامية ... فرديت ابداً يا حاج ليه سموها ام الكبائر؟
الخارج: اعتدل في جلسته و بدأ خطبة من النوع ابو لستك .... انت عارف يا ولدي في راجل صالح ... ربنا داير يمتحنوا ... الزول دا لاقا ليهو مره جميلة (يعني جكس من امو يا عبدالمنعم) جداً , معاها طفلة و قزازة خمر. قامت المره قالت للرجل الصالح دا: اسمع يا تزني بي (دي يكتبوها كيف بالدارجي)...او تقتل هذه الطفلة , و اما تشرب الخمر ....المهم عمك الخارج دا حمر دنقر... ضرب اخماس في اسداس و لقي ان ابسط حاجة ممكن يرتكبها هي شرب الخمر ... شرب ليك الخمر دا ... اول حاجة عملها قام ليك علي المره ...تانياً كتل الطفلة ... يعني عمل التلاتة جرائم
انا: ضحكت بكل ما تسعفني حبالي الصوتية : والله يا حاج انا الليله عندي خميس و داير اشرب لكن ما تخاف ما بجي ببيت في البيت
نرجع لمدير المرسة.... مدير المدرسة كان يدرسنا كل المواد في السنة الاولي و اجتهد اكثر في مادة التربية الاسلامية و خاصة ان له معتقد باننا خراف ضالة ....و لم تمر حصة تربية اسلامية الا و كان بها جزء عن الخمر و عقوبتها و لتقريب الفهم لاذهاننا كانت الخمر عنده تعني المريسة ليس اكثر .... هذه المدرسة اول ما اصابتني به داء الانفصام و الذي قد اكون اعاني منه حتي الان......مدير المدرسة شكل نواة الكراهية الاولي لدينا (فالمرء علي دين مديره).
يجب علي ان اختار ام الجنة أو المريسة و لكن في النهاية اخترت الاثنين ... اشرب المريسة كوجبة متوسطة يعني بين الفطور و الغداء ... اصلي الظهر و ادعو الله حسب مخزوني اللغوي في ذاكم الحين ... ادعو الله ان يكفيني شر الاقرع الشجاع انا شارب الخمر و امي صانعتها و اكتفي بذاكم الشخصين ... لان حسب محدودية ذهني في ذاكم الزمن يجب ان لا ارهق الله بكثرة الدعوات.... استمريت في هذه الحالة لمدة من الزمن الا ان كانت قوانين الشريعة الاسلامية و هاك يا رجم.
المريسة بتتعمل في القرية بشكل دائم و ليس الغرض منها التجارة او السكر و لكنها كمادة غذائية ... وفي بيوت بتعمل مريسة بغرض تجاري في القرية زي ما في ستات كتارفي السودان ببيعوا الكسرة و الشاي يعني الموضوع علي الاطلاق ما فيهو اي مشكلة الا مشكلة الاسلام الجديد دا ... و بعدين وقت كنا اطفال يعني في مريسة خاصة بتكون للاطفال بعدين ما النوع التقيل داك و ما بتتشرب يومي ... يعني الموضوع social .... المهم بجي بعد شوية و بحكي عن طريقة الصناعة لكن اقول ليكم حاجة....... طريقة الصناعة دي طويلة و ممكن تكون مملة للقاري لكن اي واحدة داير يعرف بس يرسل لي اميلو و انا بعمل ليهو اتاش لطريقة الصنع.....
فتكم بعافية و بجي صادي اواصل لو طلع الموضوع سالك و ما بيتنافي مع القيم السودانية او يخدش الحياء السوداني !!!!!!!
|
|
 
|
|
|
|
|
|
|
|
Re: ليس دفاعاً عن الخمر (Re: حافظ حسن ابراهيم)
|
| Quote: فتكم بعافية و بجي صادي اواصل لو طلع الموضوع سالك و ما بيتنافي مع القيم السودانية او يخدش الحياء السوداني !!!!!!! |
الحبيب حافظ حسن
تحياتي يا مُعلم ..
موضوعك في السلك وسالك .. و
ارجع سريع بس ما تقعد تعكلها لينا تراطيب في الحر دا
اصلي عارف ناس المرايس دا موسمهم مع السخانة ..
واصل وبنجيك لكلامك دا بعدين ..
وقبلها اظبط لينا وضع الولد الابوهو امام مسجد وامه بتسوي المريسة دا كيف ؟
تحياتي ومرحب بك
| |
|
|
|
|
|
|
|
|
|
Re: ليس دفاعاً عن الخمر (Re: HAIDER ALZAIN)
|
حافظ ازييييك
يا حليل بوست خالد العبيد الشالوا انشاء الله ايدو تتشل بركة سيدي بكري ود ابوبكر راجل المنبر
الذي اذا اراد ان يقول للبوست كن ياتيه البوست خاسئا وهو حسير فيكون ..
| Quote: ليس دفاعا عن الخمر |
انمـا دفاعا عن الحزب الشيوعي ..
ههههههههههه
يا زول اقول ليك حاجه على بركة الله ..جررررز
| |
|
|
|
|
|
|
|
|
|
Re: ليس دفاعاً عن الخمر (Re: عبد المنعم سليمان)
|
عبدالمنعم سجمنا و هنا كمان البوستات بشيلوهن ... اها نسألك بشيلوا سيدو و لا عندو مقص الشجر
انمـا دفاعا عن الحزب الشيوعي ..
ههههههههههه
منعم ما ترمي فينا طرف الزمان نحنا ناس غلابة
| |
|
|
|
|
|
|
|
|
|
Re: ليس دفاعاً عن الخمر (Re: HAIDER ALZAIN)
|
ود الزين ازيك
(وقبلها اظبط لينا وضع الولد الابوهو امام مسجد وامه بتسوي المريسة دا كيف )
اقول ليك قصة الولد الابوهو امام مسجد و امو بتسوي المريسة ... بالنسبة للابو و الامامة يعني انت عارف ابوي دا كان الوحيد المتاح بعد الامام القديم الله يرحمه... المهم عمودهو ليك امام و قبل موضوع الامامة دا هو بطل طشمه .... و جايك لقصة الام التسوي المريسة يا خي انت امل مش كان بتعوس ليكم الكسرة بس زي دا بالضبط دا كان حال الام التسوي المريسة.... بعدين المريسة نحنا كمثقفين شوية ما قعدين نبيعها لكن للاستهلاك المنزلي فقط ...بمشي و بجي
| |
|
|
|
|
|
|
|
|
|
Re: ليس دفاعاً عن الخمر (Re: حافظ حسن ابراهيم)
|
الكشة اللئيمة
اليوم كان اثنين , سنة 1984, وقتها كنت في سنة رابعة ابتدائي و لسخرية القدر كانت هنالك تسميع لقصيده حتي الان لم انسها .... يعني حصة التسميع كانت اخر حصة بعدها مفروض نمشي البيت للفطور
و سخرية القدر كانت القصيده دعوة صريحة للعلمانية في ظل قوانين الشريعة (سبتمبر),,,,, علي ما اعتقد ان ناس نميري الوقت داك لسا ما لحقوا ينقحوا المنهج عشان يتماشي مع توجه الدولة الاسلامي .... فالقصيده حتي الان اتذكر منها ابيات مثل:
نبني بالإتلاف بلادنا الحبيبة
لا نعرف الخلاف في الجنس و العقيده
فالدين لله و المجد للوطن
لحد هسي ما عارف اني كنت حافظ القصيده دي ليه.... احكي ليكم قصتنا مع قوانين الشريعة .... النميري فجأة صحا من النوم و قال لابد من شريعة تقطع يد السارق و تجلد شارب الخمر..... و الخمر حسب العرف المايوي هي خمر ما فرق لو كان مصنوعة في رورو او شيكاغو المهم خمر و يجلد شاربها 40 جلدة اذا ما عمل ازعاج عام و الا 80 جلدة.... بعد حصة التسميع مشينا البيت للفطور ... لكن عينك ما تشوف الا النور .... جردل مجدوع وين .... زير الموية مكسور و لموية مالية الراكوبة....حبوبة التي لم تعد تخرج من قطيتها لقيناها قاعدة في الشجرة برا و عيونا مليانة دموع .... كل الموجود في البيت الكلب و حبوبة لا احد غيرهم ... و قبل ان نستوعب دهشتنا .... دخلت خالتي حمره .... خالتي حمرة أمرأة ريفية لا تشبه سوي السرة بت عوض الكريم في احدي قصايد حميد .... دخلت تلكم الخاله و ابتدرت الحديث:
حمره: ناس امكم ديل الليله ساقوهم ناس الكشة .... لكن هسي بفيكوهم بجوا...
هنا انفجرت شقيقتي بالبكاء و اختي الكبيرة كانت في سنة سادسة و انا رابعة و يليني اخي الصغير في سنة اولي .... اختي كانت تبكي بينما نحن نبحث عن اجابات لسبب بكائها عند خالتي حمره....
اختي بصوتها المخنوق بالبكاء سألت خالتي حمرة عن سبب الكشة .... خالتي حمرة امي كشوها ليها؟
خالتي حمرة: و الله يا بتي قالوا عشان المريسة .... والله اخر الزمن و الما مات يا بتي بشوف اكثر من كدا.... قادتني خالتي حمره للفطور في بيتها ورجعنا الي المدرسة انا و شقيقي الصغير و كان علي اختي ان تتغيب عن حضور حصص ما بعد الفطور حتي تقوم بدور الام الذي هبط عليها من السماء....
الحال كلو من بعض يعني كان في كمية من اولاد المكشوشات و حتي الما كشوا امو تكون خالتو و الما خالتو علي اقل تقدير مرة الجيران .... بتواطوء غير معلن لم نخض في تفاصيل الكشة و لكن النار اندلعت قبلنا في المدرسة .... المدرسة كانت تخدم عدد من القري و نسمي تلكم القري قري العرب في حالة قل الود بيننا و ابناء تلكم القري عندما لم يكونوا علي ما يرام يطلقون علي قريتنا حلة العبود ... دا شكلوا اسم الدلع لعبيد .... لكن ما علينا رجعنا بعد الفطور و كان الهمس من الكل الا ابناء قريتنا .... بعد انتهاء اليوم الدراسي الكل متوقع ان هنالك حرابة في طريقها الي الانفجار و فجأة بدون سابق انذار او اتفاق اخذ عدد من ابناء القري الاخري بتعيرنا بالمريسة وبعدها تحول التعيير الي هتاف جماعي:
40 جلدة و ..... بالليل ,,,, النقاط دي ابذأ كلام ممكن الواحد يسمعوا و تسمعه انه سيحدث لامك ... المهم 40 جلدة معروفة و النقاط كانت تعني اغتصاب المكشوشات من قبل العساكر .... يا الله .... ما هي الا لحظات و استخدمت كل الاسلحة بدأ باقلام الرصاص المسنونة بعناية لذلك الغرض .... مرورأ بالطوب و انتهاء بالبراجل و البراجل دي كانت عند ناس سنة خامسة و سادسة بس لانهم عندهم علب هندسة... في النهاية تم تقييم الخسائر من الطرفين في تلكم الحرب و انتهي الامر بطابور عوقبت فيه كل المدرسة....
في ذاكم اليوم لم تأتي امي و لكن خالتي تزورنا في رأس كل ساعة الي ان اتي ابي من الخلا ... اختي الكبيرة خشت ليك في دور الام ... يعني زام ليك خشمها بحسم ... كنست الحوش, امرتنا بالاستحمام , و خلاص بعد دا ما في واحد يطلع لانو الوطا مغربت .... المهم اختي خشت الدور بطريقة صح....
بعد المغرب ذهب ابي الي اجتماع يضم كل رجال الحلة و علي ما اعتقد كان لمناقشة امر الكشه ... يوقفوها كيف ؟ كيف يحموا نسائهم؟ و لكن الاجتماع تمخض عن اشياء مصيرية بجيها راجع....
في تلكم الليله تبولت في السرير لاول مره من زمن زمين و بعد الظهر عادت امي و كل نساء القرية المكشوشات... عدنا حزينات منكسرات ....
| |
|
|
|
|
|
|
|
|
|
Re: ليس دفاعاً عن الخمر (Re: حافظ حسن ابراهيم)
|
| Quote: بعدين المريسة نحنا كمثقفين شوية ما قعدين نبيعها لكن للاستهلاك المنزلي فقط ...بمشي و بجي |
المعمولة للاستهلاك المحلي دي يا دوووب البتخلينا نصاحبك لانها بتطلع السوسيو يمشي فيها .. ودُقتها واجبة كاملة الاسباع ..
بالله ما تطول اسلوب جميل وكتابة ولا اروع
تحياتي لك
| |
|
|
|
|
|
|
|
|
|
Re: ليس دفاعاً عن الخمر (Re: HAIDER ALZAIN)
|
قصة واقعية ايام نميري وقوانين سبتمبر
القاضي : هوي انت مالك
المتهم : والله كنا بنتغدو الجماعة ديل قبضونا جابونا هنا
القاضي : كنتوا بتتغدوا بشنو
المتهم : بنشربوا في البغو
لك التحية الاخ حافظ
| |
|
|
|
|
|
|
|
|
|
Re: ليس دفاعاً عن الخمر (Re: فيصل محمد خليل)
|
العزيز الدرديري ... شكراً ليك علي المرور لكن ما تراهن شديد علي قصة الروعة دي ... يا روعة لو عز اللقاء يجمعنا ما عارف مين ... و حالتا دي ما بدينا لسا منتظرين الخيمس بس شكلوا بعيد
فيصل كيفك ... عرفتك مرسل الاميل لشنو و تشكر و مرحب بيك 10 بلا كشرة و انا كمان بدل الاميل بس رسلت ليك التلفون كمان في رجالة عليك الله اكتر من كدا...
يلا نواصل في موضوعنا
قعدات التضامن
امي كانت اكثر انكساراً من ان تجيب علي اي من اسئلتنا و استفساراتنا و لذا لذنا بالصمت احتراماً لحزنها ... لذنا بالصمت و لكن بمخليتنا نحن الثلاثة اختي الكبيرة, و انا و شقيقي الاصغر ... كل تدور بمخليته اسئلة علي شاكلة:
هل تم جلد امي 40 جلدة؟
ماذا عن الاغتصاب؟
و يا تري ما هو شكل العسكري الذي قام بهذا الفعل الحماري؟
هل هو واحد ام مجموعة ؟
وما هو رد فعل امي؟
كل تلكم الاسئلة وجدت لها بعض الاجابات قي قعدات التضامن... مجموعة من نساء القرية من غير المكشوشات ياتين لحمدالله السلامة و هن محملات بسكر و بن و جردل بلاستيك معروف المحتوي و اكثر محملات شوقاً لرواية احداث الكشه و ماذا حدث هنالك ... في تلكم القعدات التضامنية وجدت ضالتي فانا متلصص جيد لاخبار الكبار.... سمعت قصة الكشة عشرات المرات و في كل مره تضاف عبارات جديدة او تحذف اخري ... احياناً يتغير ترتيب الاحداث و الاشخاص المهم رواية الكشة تروي بعشرة روايات و لكن كلها صحيحة....
و دوماً تبدأ ب
(والله كنت قاعدة كويسة اها عندي حبة المريسة ديك قمت صفيتها .... كبت بلاستيك مودياهو لبت عبدالرحمن النفساء .... اها قبل ما نلبس توبي اشوف ليك امامة الظلم (امامة الظلم تطلق علي البوليس و دائما في حالة اللا امن لا تذكر الاشياء التي تهدد امن وسلامة البشر باسمائها .... فمثلاً عندما تحكي جدتي عن الثعبان تقول ليك (طرينا ما نادينا), و عند الحديث عن الجن يقول ليك باسم الله او دا زول عندو بسم الله يعني مجنون) .... في المخزون الشعبي كانت حبوبة في الليالي القمرية و اعتدال مزاجها تحكي لنا عن الجن, الغول و بعض الالغاز التي تطالبنا بحلها و اذكر من تلكم الفزورات (ديك شرارة في حلة فزارة القلوب خافنها و الكلاب نبحنها ..... و كانت تقصد البوليس او العسكري بشكل عام يعني العسكري دوماً هنالك مرتبط بالخوف)
نواصل حكاية امي مع الكشة ..... اها اشوف ليك ناس امامة الظلم جارين علي البيت .... ثابتة ثابتة ما تتحركي ... قلبوا البيت دا قلب و في الاخر لقوا ليك المريسة في جردل البلاستيك المودايهو لبت عبدالرحمن النفساء .... جدعو ليك العدة و الزير شوف عيني واحد من امامة الظلم فتحوا و لقاها موية زرقاء ... اها قوم بقعر بندقيتك يا ود المره اكسر الزير.....
النساء مندمجات اكثر ما يستوجب ... بعدين لو في واحدة فاتت حاجة امي ما عندها اي مشكلة ممكن ترجع و تعيد القصة تاني ما اصلها الفورا الف .... المهم ما كان في داعي للاندماج دا كلوا .... لكن ما علينا
و تواصل امي في السرد: أول ما وصلنا ... جابوا دفتر كبير ... بسجل فيهو:
اسمك
اسم راجلك
اسم شيخ الحلة و اسم الحلة زاتها...
الصباح بدري جاء الشيخ و طلعونا كلنا قال ليهو ديل كلهم شيخاتك....
قال ليهو نعم ديل نسوانا
المهم القالهو ما قالوا .... طلعونا لكن ما جلدونا لا اي حاجة .... ادونا كتب دين (مصحف) و قالوا لينا دي اول مره ... المره الجاية في جلد و غرامة .... كتاب الدين جبنا معانا و داكو جوا ....
يا بت عليك الله جيب كتاب ناس امامة الظلم داك من جوا ... هكذا تنادي امي علي اختي حتي تأتي بالمصحف ليرينه تلكم النسوة.... لحد هسي انا ما عارف ممكن يشوفوا في المصحف دا شنو و مختلف عن باقي المصاحف التانية شنو ... لكن الذي اعرفه من هنا بدأ الدجل الاعظم...
اجمل ما في قصة الكشة عندما ترويها امي حكاية بت ناميس ... بت ناميس امرأة ابسط ما يمكن بسيطة لدرجة السذاجة .... بت ناميس كانت تجادل العساكر طول مسافة السكة .... تجادل علي انها لم تفعل شيء قائلة ( والله انا ما سويت شيئ غير المريسة المره دي يا عيالي والله ما سويت حاجة).... ببساطة بت ناميس لم يدر بخلدها ان المريسة ممكن تكون جريمة يعاقب عليها القانون.....
قعدات التضامن دي عملت rehabilitation لكل ناس البيت .... يعني خففت جزء كبير من الاسئلة الوجودية التي تعلقت بكشة امي.
هدأت الاحوال بعد الكشة و تعهدات شيخ الحلة و لكن المريسة و العسلية لم تقفان فقط تغيرت اجراءات الامن و السلامة التي تختص بالصنع و التوزيع .... و انا في رأي فكرة بيت التصبينة دي ظهرت مع قوانين شريعة نميري .... اها كل الشباب بعرف بيت التصبينة و لا في حد داير شرح ؟
| |
|
|
|
|
|
|
|
|
|
Re: ليس دفاعاً عن الخمر (Re: HAIDER ALZAIN)
|
Quote: Quote: ÇåÇ ßá ÇáÔÈÇÈ ÈÚÑÝ ÈíÊ ÇáÊÕÈíäÉ æ áÇ Ýí ÍÏ ÏÇíÑ ÔÑÍ ¿
|
ÃÓÇá äÇÓ ÇáÔåÇÏÉ ÇáÚÑÈíÉ íÇ Úãß ... |
الله الكتابة دي مالها بقت كدا؟؟؟؟؟!!!!!!! ....
ناس الشهادة العربية مين يا عمي ... والله كان معانا واحد شهادة عربية في الجامعة دا اول من دخل لينا فكرة القرنفل يعني تأكل ليك كم حبة بتاعت قرنفل كدا بعدين تتونس مع االجكس ذي الترتيب كل البلاحظو الجكس فيك انك بقيت لطيف و دمك خفيف خالص و احتمال برضو يلاحظو انو رأسك خفيف و الاخيرة دي بتعتمد علي دراية الجكس و درجة رأسك .... لكن با منقة حكاية تسأل ناس شهاددة عربية بقت ما جايبة حقها
| |
|
|
|
|
|
|
|
|
|
Re: ليس دفاعاً عن الخمر (Re: حافظ حسن ابراهيم)
|
احكي ليكم النكتةقبال النوم كدا والله هي ما نكتة قصة حقيقية ... في مرة من حلتنا مشت الحج ...
الحج دا يا سوركتي بمشوا ليهو في مكة الجنب السعودية ...
المهم خالتي عشة دي مشت الحاجة ووقت جات من هناك اسمها بقدر قادر كدا اتغير ليك اسمها بدل خالتي عشة لحاجة عشة ...
جات ليك من الحج و بعد كحة الحجيج ديك انتهت و الزوار خفوا ... مشيت جابت ليها بلاستيك زي الما حاصلة حاجة...
في بت من البنات القاريات في الحلة قامت قال ليها .... لكن يا حاجة عشة انتي ما حجيتي و المريسة دي حرام
خالتي: اسمع يا منجوهة انتي بتعرفي شنو ... انا والله سألت في بيت الله ... و قال لي المريسة دي حلال الا العرقي حرام ....
من يوم كدا السمع يكلم الما سمع ما في واحدة يجي يقول مريسة حرام.
| |
|
|
|
|
|
|
|
|
|
Re: ليس دفاعاً عن الخمر (Re: عبد المنعم سليمان)
|
سلامات يا حافظ
دا واحد من اهم البوستات التي قرأتها في حياتي...
يناقش قضية كبيرة جدا وهي التعدد الثقافي واحترام الثقافات الاخرى
وتصالح الثقافات الوافدة مع الثقافات المحلية...
وقضية المركز والهامش..
لناس السطح حيجو ينططو هنا ويعملوه مكاواة وتفريغ
لمعني البوست الهام الجا في الوقت الراهن المحتاجين الناس يسمعو وجهة نطر الهامش.
ولناس الغور اتمنى يتناقش هذا البوست بجدية تامة
وللجندريات هذا بوست مهم جدا جدا.بيناقش موضوع الكشة ومشكلة القبض على النساء
وجلدهن واغتصابهن..
| Quote: بت ناميس امرأة ابسط ما يمكن بسيطة لدرجة السذاجة .... بت ناميس كانت تجادل العساكر طول مسافة السكة .... تجادل علي انها لم تفعل شيء قائلة ( والله انا ما سويت شيئ غير المريسة المره دي يا عيالي والله ما سويت حاجة).... |
ودا جزء ما ساهل ابدا...
شكرا يا حافظ انك كتبت البوست الهام دا..
| |
|
|
|
|
|
|
|
|
|
Re: ليس دفاعاً عن الخمر (Re: د.نجاة محمود)
|
Quote: لناس السطح حيجو ينططو هنا ويعملوه مكاواة وتفريغ
لمعني البوست الهام الجا في الوقت الراهن المحتاجين الناس يسمعو وجهة نطر الهامش.
ولناس الغور اتمنى يتناقش هذا البوست بجدية تامة |
نقول شنو .. غايتو بس الحمد لله
اللهم طولك يا روح
__
واصل يا حافظ
| |
|
|
|
|
|
|
|
|
 Re: ليس دفاعاً عن الخمر (Re: سيف النصر محي الدين محمد أحمد)
|
لاول مرة اعرف ان بكرى بيجاوب ليهو سؤال
| Quote: انا سالت بكري نفس السؤال قال لي انتهت صلاحيته |
......
شــاهد عيان فى زيارة لولاية من الولايات السودانية :
اجتمعت لجنة امن الولاية وخرجت بالقرارات التاليـة:
بعد التفشـــــى الشديد لشرب الخمور فى عاصمة الولاية نصدر القرار التالى ..
اسم القرار : تنظيم صناعة الخمور وتنظيم شربها ..
بدء العمل به : اعتبارا من تاريخـــه ( خريف 2001م )..
ملخص القرار :
يمنع صناعة الخمر لاى شخص الا بعد استخراج رخصة من المحلية ((فى ذلك الوقت ))..
وضع علــم ( احمر ) فى اعلى المنزل الذى يصنع فيه ( العرقـــى ) ..
وضع علم ( ابيض ) فى اعلى البيت الذى تصنع فيه المريســة البيضاء ..( في مريسة ما بيضاء ).
يباع العرقى بعد الساعة (2) ظهرا ..
تباع المريســـة بعد الساعة ( 11) ظهرا ..
يمنع دخول موظفى الحكومة الا بعد الساعة (2) ظهرا ..
يمنع دخول افراد القوات النظامية (بزيهم الرسمـــى ) ..
على الشرطة تطبيق القرار ..
...........
الـــعرف والقانون وعلاقتهم بالديـــن
مكونات الثقافــة المجتمعية
الانماط الغذائية لاهــل بــلادنــا
تطبيق القانون وانفاذه
صناعة الخمور ( وسائل كسب العيش ..
لماذا لا يصــنع الرجــل الخمــر فى المجتمعات التى تشربهــا ؟
....
شكرا الاستاذ على موضوع الخمـــر بمســــارات جديــدة ..
| |
|
|
|
|
|
|
|
|
|
Re: ليس دفاعاً عن الخمر (Re: بدر الدين اسحاق احمد)
|
| Quote: لماذا لا يصــنع الرجــل الخمــر فى المجتمعات التى تشربهــا ؟ |
سلام ياالبدري
انت هنااتعاملت بالفهم المركزي للخمر..
ممكن في عطبرة نقول ليه الرجال ما بعملو الفول البياكلو
ولا ليه في مورة الرجال ما بعوسوالقراصة البياكلوها
اذا كنت المريسة كما قال حافظ انها بالنسبة ليه وجبة..
يبقى اصلا الاطعام هو شغل الام..
مع التحية ليك
| |
|
|
|
|
|
|
|
|
|
Re: ليس دفاعاً عن الخمر (Re: د.نجاة محمود)
|
اعمل حسابك يا حافظ دكتورة نجاة عاوزة تقعد على اليسار وتنصّب نفسها كنج القعدة
وتصنف المجال سطح ( يعني راسه خفيف ) وغور ( ودا حوض رملة ) ..
وبعد داك تطول وتقصر في الكاسات زي ما عاوزة للجالسين ..!!
وحسب جلسات سابقة انا عارف ومتابع حاتطول كاس منو تخليهو يلُط بدري ويكسر الكبابي
وتقصر لمين عشان بعدين يدرجها وهي طالعها البيت ..
فدحين نعرف من هسع المريسة دي استهلاك محلي والا تجاري عشان ما نُخت بنبرنا دا ساكت .. !!
و
تحيات صباحية على انغام ام فتفت وكدة :)
| |
|
|
|
|
|
|
|
|
|
Re: ليس دفاعاً عن الخمر (Re: خالد عويس)
|
اخي حافظ
شكرا على هذه السياحة الفكرية
| Quote: ما بتتشرب يومي ... يعني الموضوع social .... المهم بجي بعد شوية و بحكي عن طريقة الصناعة لكن اقول ليكم حاجة....... طريقة الصناعة دي طويلة و ممكن تكون مملة للقاري لكن اي واحدة داير يعرف بس يرسل لي اميلو و انا بعمل ليهو اتاش لطريقة الصنع..... |
المريسة في عرفنا نحن ابناء الشمالية غير موجودة الا ان من تعاطاها من اهلنا إما كانوا في الجيش او البوليس او حتى معلمين في جنوب وغرب السودان اما نحن فلم نعرف المريسة الا في الخرطوم وقد شربت المريسة لذات الفهم الذي يقول ان المريسة غذاء متكامل من دسميات وزيوت نباتية الى اخره.. ولكن عند متابعتي لسردك وجدت ان هنالك تطابق بين صناعة المريسة وشربها لديكم وبين صناعة الدكاي عندنا في الشمالية ويالذات في منطقة المحس والسكوت حيث يتم نقع التمر في قواسيب خاصة (ازيار) وتترك لفترة اسبوع حتى تصل لدرجة معينة من التخمر ومن ثم يشرب كحالة اجتماعية ولم يسجل اي تاريخ في المنطقة النوبية ان تم بيع الدكاي..
كان لوقت قريب (نهاية السبعينات) ان يقوم اهل العريس بتوفير كمية من التمر لعمل الدكاي للضيوف الذين يتم دعوتهم وقد يتم تقييم عظمة العرس بعظمة نوع الدكاي اذا كان مسكرا فيقال ((انه ان دكاي عرس فلان كان اجود نوع)) وكان مثالا للتفاخر.. اما جلسات الدكاي فكان يقتصر على الرجال ويدخل ضمن الاجتماعيات.. وكانت جداتنا يقمن بصناعة الدكاي لازواجهن كنوع من الخدمة الواجبة ويتفخر الرجال بازواجهم اللائي يجدن فن صناعة الدكاي.
شكرا لنا عودة
| |
|
|
|
|
|
|
|
|
|
Re: ليس دفاعاً عن الخمر (Re: Zomrawi Alweli)
|
أخي الفاضل حافظ... هل سمعت بشخص بيقول ليك: الحمد لله ما بحلل صيامي إلا بكاس بغو!
لقد سمعت من أحد المعارف أغرب تبرير لشرب الخمر:
قيل له لما لا تترك شرب العرقي؟
قال: وفاء للعرقي!
كيف ذلك؟
قال: كنت في رحلة إلى إحدى مدن الجنوب. وصل بنا اللوري ليلا... والدنيا برد... ولا أحمل معي أي غطاء.. فما وجدت إلا نصية عرقي أتدثر بها... والحمد لله نمت دون أن أشعر بالبرد! ومنذ ذلك اليوم أنا أحفظ هذا الجميل للعرقي وليس من المروءة أن أتخلى عنه بعد أن وقف معي هذه الوقفة النبيلة!
| |
|
|
|
|
|
|
|
|
|
Re: ليس دفاعاً عن الخمر (Re: محمد الأمين موسى)
|
شباب صباحاتكم عسلية .... انتو عارف انا عندي مشكلة في الاقتباس اي حاجة اقتبسها القاها طلعت كلامخارم بارم ... شكلوا البوست دا وقف شيوعي عذراً قصد قرد ..... عشان كدا بطلت اقتباس
الجيلي ..... سلامات و شكراً علي المرور بوست خالد العبيد تكون الطارة كبست و شالتو ... يا د. بيان الطارة دي مصطلح للكشة و بعدين في اغنية سباتا بتقول (الطارة كبست الطرحة وين)
منعم: يا خي انت فرده صاقعة و بالجد انا عازمك عسلية في البلد لكن بعد ما احنك لي الحاجة لانو الفترة الفاتت خشيت ليهو في دور كدا و السنة قالت ماشة الحج .... المهم لكن بتحنكك لانو الامهات ديل دايماً قلبن رهيف...
عثمان كرار ... رسلت الاميل بتاعك داير تحجز و لا شنو .... بس معليش يا حبة نحن الخدمة دي ما عندنا يعني ما عندنا Delivery بس بعمل ليك اتاش جردل بلاستيك كدا وما بينا قروش......
د. نجاة حبابك و حباب البوست الجابك .... لكن يا دكتورة مالك دايره تعمل لي مشاكل مركز و هامش و بكره كمان تجيب ليها التوزيع الغير عادل للسطلة و الثروة ... و غياب الديمقراطية في انتخاب ائمة المساجد .... دا شعر نحنا ما عندنا ليهو رقبة .... و تاني شكراً يا دكتورة علي المرور و المهم دعوتي ليكي قايمة اول ما تجي من بلاد برا سالمة و غانمة كدا يا رب تخلينا نعرف و ليكي علي عاملين ليك سلام ... سلام بكل مكوناته .... عسلية و مريسة و العصر نقارة في السماء .... و سلام دا مصطلح محلي جدا لكن بشرحوا لقدام
سيف النصر: يا حنين سلامات وهذا نحنا في مرحلة التخمير لكن التعتيق جاي لقدام
بدر الدين: ازيك و شكراً علي القصة دي
حيدر الزين: وينك شايفك متابعك .... دكتورة نجاة مرحب بيها و بعدين نحنا ناس احواض رملة .... و بعدين الدكتورة دا نديها مهام المزة و كدا
خالد عويس: ازيك يا نجم كيفك و شكراً علي المرور و انشاء الله اواصل .... خالد عويس انا عاصرتك في الجامعة بس انت كنت زووووووول كبير نحن شفع فاتحين خشومنا شايفنك تنضم و تنضم لمين خليتنا نصوت للتجمع .... مرحب يا خالد
زمراوي ازيك : يعني الشباب في الهوا سوا يعني انت عندكم الدكاي و نحنا عندنا المريسة .... واحدة بواحدة و ما في حد احسن من حد .... تشكر يا زمراوي و معزوم معانا
محمد الامين: سلامات يا خي و دا تبرير جميل للشراب
المهم جاي مواصل
| |
|
|
|
|
|
|
|
|
|
Re: ليس دفاعاً عن الخمر (Re: حافظ حسن ابراهيم)
|
الانتفاضة و الخمر
الحياة في القرية إستانفت المسير و لكن بحذر عالي وسط اجراءات الامن و السلامة الجديدة ... لم تتوقف صناعة كافة الخمور كما ذكرت لكن قللت الكمية و اختلفت وسائل التوزيع و التخزين ... استمرت هذه الحالة الي ان جاءت الانتفاضة و تنفس الناس بعض الشئ و لكن للامانة الانتفاضة يمكن ان تكون اتت بما هو اسوأ من مايو ... فهنا كانت الجبهة الاسلامية ... هنا الارهاب الفكري ... هنا الكل يدافع عن ذاته ضد جرائم اخلاقية مفتعلة من قبل هذه الجبهة ... تراجعت مساحة الحريات الفردية أكثر من السابق , تراجع الانسان كقيمة وسط زعيق الجبهة و تبعها اليسار المائل بشكل تبريري ... بمناسبة الجبهة الاسلامية و الانتخابات في طرفة ليس لها علاقة هنا بالمريسة لا العسلية... بعد نميري اختفd بواسطة الانتفاضة ... صدحت البنات في السباتة باغنيات مثل
(طلعنا فوق الجبل و سكرنا اخر سكر ... و سكرنا اخر سكر يا نميري حكم فشل)...
ايضاً هنالك هتافات او اقوال لكن ما داير اقول مأثورة عشان نحنا ما دايرين مشاكل اقول كنا بنرددها مثل
(الشريعة تدق و نحن نبق)
(ما في شريعة بدون زريعة)
المهم نرجع لقصة الانتخابات و الجبهة الاسلامية ... ما اظن اكون براي في الدنيا دي لكن علي ما اعتقد معظم العقوبات التي نلتها في حياتي كانت بسبب معاكستي للكبار و كل تلكم العقوبات كانت بدنية ...
الله !!!دا مش العنف ضد الاطفال ؟
مره قاعد في امان الله و حفظه جاني ليك ابوي الما يغباني ...قال لي شوف الليله في عربات بجن بمكروفونات تشتروهم؟
الله!! ابوي دا جن و لا شنو؟
امس انا ما اتجلدت لاني شترت عربي راكب جمل؟
المهم خليت ليك موضوع الجن دا لحد ما انتهي من المهمة الابوية دي ...يا سلااااااااااام ابوك يقول ليك شترت دا خبر بمليون جنية لكن بالقديم ....حاولت ان احدث تغيير نوعي في ادوات الحصب فبدل الطوب و الحجارة التقليدية فكرت في وسيلتين الاولي كانت القزاز و الثانية البيض الفاسد..و بتلصص سرقت 3 كبابي من دولاب امي و انا علي يقين حتي كتابة هذه السطور هي ما عارفة وين الكبابي دا فاتت... لانو ممكن تتساهل في كل شي الا العدة و كمان عدة الصيني و كباب الموية و الله دي فيها قطع من خلاف.... سرقت الكبابي التلاتة و كسرتها .... وضعت كل الزخيرة في القنانة و بدأت رحلة البحث عن البيض الفاسد ....
لحظات و صوت الميكرفون يشق السماء ... والله كانوا بقولوا شنو ما في واحد من الاطفال الجنود كان عارف ... بعدين ما قلت ليكم لقيت لك كل اولاد الحلة في سني معباؤون من قبل ابائهم .... المهم شعرت بنوع من الارتياح باعتبار ان جن الاباء هذا جماعي و لا يخص ابي وحده ... جات العربات مليانة بنات مربطات من الرأس حتي اخمص القدمين و يزعقن بعبارات لم تكن مفهومة لدينا ... و بدأت الحرب و ما هي الا دقائق و العربات بما تحمل خارج القرية....
القيمthe game كان جميل جداً و في الصبح استعد كل الاطفال لحصب اي عربة بميكرفون باعتبار ان الكود هو المايكروفون .... عملنا خطة عسكرية سريعة .... المجموعة تقسمت الي 3 اقسام .... مجموعة اولي تكون عند مدخل القرية و هذه مهمتها حصب عربة المؤخرة ... المجموعm الثانية و كنت واحد من تلكم المجموعة و هي في وسط القرية باعتبار ان العربة اسرع من الطفل و لذا علي مجموعة الوسط ان تحصب العربات التي فلتت من المجموعة الاولي اما المجموعة الاخيرة فكانت مهمتها ملاحقة العربات و هي خارجة .... خطة محكمة صح؟
المره دي كانت لواري لكن الميكرفون موجود ....كنا في مجموعة الوسط متحفزين لوصول تلكم العربات و فجأة دوي زغاريد طغي علي هتاف الميكرفونات ... التفت الي الوراء و اذا بأمي و خالتي حمره يزغردن بكل ما اوتين من قوه .... زول من الحلة لابس ليهو جلابية مرقعة .... المهم المنظر كان غير مطمئن علي الاطلاق و لكن المجموعة الاولي بدأت الحصب .... دقايق و عينك ما تشوف الا النور .... يعني اي زول من الحلة بلقاك بجلدك ..... الحلة طلعت انصار و دي قصة تانية....
تساؤولات لازمتنا لفترة ليست بالقصيرة مثل:
لماذا اذن لنا ان نحصب عربات امس و اليوم لا ؟
ما الفرق بين عربات الامس و اليوم فكلها تزعق بميكرفونات؟
المهم اسئلة كتيرة .... لكن السؤال ال حتي الان لم اصل فيهو لنتيجة قاطعة ...
هل الاهالي كانوا يدرون ان الجبهة هي أس البلاوي؟
و هل يدرون ان الشريعة التي نكلت بهم هي من بنات افكار الجبهة؟
اما ان القرية قرية انصار و يمنع الاقتراب و التصوير من قبل الاخرين؟
| |
|
|
|
|
|
|
|
|
|
Re: ليس دفاعاً عن الخمر (Re: حافظ حسن ابراهيم)
|
| Quote: انا عندي مشكلة في الاقتباس اي حاجة اقتبسها القاها طلعت كلامخارم بارم |
يا حافظ
ظلل الكلام العاوز تقتبسو اول شئ
وبعدين لمن تضغط على ايقونة اقتباس وتفتح معاك اضغط اعادة تعيين
وبعد ما يتمسح الكلام الخارم بارم اضغط بالماوس فى نفص النافزه واعمل لصق
واعمل ارسال للرد ويطلع كوتك زى الورد
| |
|
|
|
|
|
|
|
|
|
Re: ليس دفاعاً عن الخمر (Re: حافظ حسن ابراهيم)
|
سلام يا حافظ
بالله ما تقيف ، خليك مُدوّر كده طوالي ..
| Quote: كدا انقر انا مرسل ليك ايميلي ليه |
فيصل محمد خليل ،،، يا خلبوص ، نويت تعمل ليك ( طرمبة ) ..
بيكشوك ، أعمل حسابك ... هههههههه
الله يدينا خيرك ، إنت ومنعم..
| |
|
|
|
|
|
|
|
|
|
Re: ليس دفاعاً عن الخمر (Re: Salah Abdulla)
|
| Quote: تبعها اليسار المائل بشكل تبريري |
لووووووووول يا حافظ ريحتني من امبارح بقنع في صاحبي شيوعي (كويس)
انك قوات "صديغة"...
بالله كمل انت قايل ماركيز دا بقى ماركيز ليه ما عشان حكاي..
دعوتك مقبولة يا حافظ ليك علي اصل كدا اجيكم..بس عاد ما تشتروني..
__________
يشتر لناس الشهادة عربية معناها يفلع.
| |
|
|
|
|
|
|
|
|
|
Re: ليس دفاعاً عن الخمر (Re: محمد الأمين موسى)
|
Quote: أخي الفاضل حافظ... هل سمعت بشخص بيقول ليك: الحمد لله ما بحلل صيامي إلا بكاس بغو!
لقد سمعت من أحد المعارف أغرب تبرير لشرب الخمر:
قيل له لما لا تترك شرب العرقي؟
قال: وفاء للعرقي!
كيف ذلك؟
قال: كنت في رحلة إلى إحدى مدن الجنوب. وصل بنا اللوري ليلا... والدنيا برد... ولا أحمل معي أي غطاء.. فما وجدت إلا نصية عرقي أتدثر بها... والحمد لله نمت دون أن أشعر بالبرد! ومنذ ذلك اليوم أنا أحفظ هذا الجميل للعرقي وليس من المروءة أن أتخلى عنه بعد أن وقف معي هذه الوقفة النبيلة! |
وا سى /محمد...لاباس عليك؟؟ كل شى لا باس؟؟ واش هادى البسالة؟؟وا بغيت كل شى يدير الطاصة؟؟
وانشط مع راستو؟ ...ويلى ياصاحبى ..هديل الدرارى السودانيين كى احمقو على الطاصة والنشاط
والزبل ...سيروا ......
| |
|
|
|
|
|
|
|
|
|
Re: ليس دفاعاً عن الخمر (Re: على تاج الدين على)
|
Quote: وا سى /محمد...لاباس عليك؟؟ كل شى لا باس؟؟ واش هادى البسالة؟؟وا بغيت كل شى يدير الطاصة؟؟
وانشط مع راستو؟ ...ويلى ياصاحبى ..هديل الدرارى السودانيين كى احمقو على الطاصة والنشاط
والزبل ...سيروا ...... |
والله يا علي تاج الدين ما فاهم اي حاجة لكن للضمان سلامات و انشاء الله كويس
| |
|
|
|
|
|
|
|
|
|
Re: ليس دفاعاً عن الخمر (Re: حافظ حسن ابراهيم)
|
ما اسهل ان تكون ارهابياً
لا صوت يعلو فوق صوت الضلال ....
جمعية القرأن الكريم ..... استاذ اللغة العربية .... مدير المدرسة كل هؤلاء تأمروا علي اطفال يعتبون علي سلالام المراهقة بخوف ... و رغم الديمقراطية , هامش الحريات, و الجمعية التأسيسية لحليفة الطلاق ... لا صوت اخر سوي صوت الضلال .... المرحلة كانت المتوسطة ... الاصوات بدأت تخشوشن ... برزت العضلات و اشياء اخري كثيرة بعنفوان ... الكل لم يعد بريئاً بعد ملامسته ثدي بنت الجيران عن قصد او صدفة,,,, في تلكم المرحلة الدقيقة من العمر تم تزويدنا بقائمة من المحرمات تبدأ بأم الكبائر و بها تنتهي ... و تمر بالنظر للمرأة .... جسد المرأة يجب ان يغطي لا يظهر منه سوي الوجه و اليدين ... المرأة اس المشاكل.... و الخمر أم الكبائر ....علمونا الحذر من الحياة ... الخوف من ظلامات القبر وعذابه,,,, الاقرع الشجاع و دابة الارض, درب الصراط ووداي الاعرف ... و القائمة تطول و تطول من المحرمات....في تلكم الفترة كانت الساحة فقط وفقط اذا كان ضلال و الباقي كمبارس ... اليسار في حالة تبرير لسلوك قديم متجدد الاتهام و بوست خالد العبيد المسحوب نموزج..... الاحزاب الكبيرة انتهت مهتمها عند دخولها البرلمان.... هذا الزخم زودنا بكم من الكراهية يكفي لتدمير جبل احد ...اول الكراهية تبدأ بذاتك ... تمر باسرتك الصغيرة ....ثم القرية و بعدها المجتمع ككل. نتيجة لهذا الزخم قررنا ان نحارب الرزيلة في قريتنا.... يا الله يا الهي .... بمن أبدأ؟
بامي لانها تصنع مريسة كجزء من الوجبة؟
امي التي ترقص في حفلات الزار؟
امي لابسة التنانير القصيرة؟؟؟
ام أبدا باختي التي قد تكون علي علاقة بود الجيران؟
اختي التي اصبحت لا ترتدي التوب السوداني في الحفلات... بعدين التوب السوداني دا مجازي هنا
اتراجع قليلاً و افكر مقطباً جبيني حتي يجود عقلي بنقطة البداية ... و بعدها تتراكم الاسئلة التي ليست للاجابة ... و اتساءل و اعيد التساؤل
حتماً سأبدا بابي لانه رجل ديوس لم يستطع ان يمنع امي من صناعة المريسة و الرقص في حفلات الزار او ارتداء ثياب محتشمة ؟؟؟؟؟؟
اما ابدأ باخوتي الكبار .... حيث انهم لماذا صامتون علي هذا امنكر؟؟؟
و لكن في الختام لابد ان تكون هنالك بداية....لي اصدقاء اثنين بنفس الفكرة و الحماس و يعيشون نفس الوضع ... تشاورنا في الموضوع كثيراً و في النهاية خرجنا بفكرة قومية ... المهم طلعنا ان حكايات انصار السنة قصة تبدأ بالفرد المسلم, الاسره المسلمة و بعدين المجتمع المسلم .... دي قصة بيض جدا و مفروض نبدأ من فوق طوالي و نبدأ بامسك لي و اقطع ليك .... اتنفقنا ان نقاتل الرجال الذين يأتون القرية بعد غياب الشمس بغرض السكر و نحن نعي جيداً ان السكر ام الكبائر ... فالبداية كأس و البقية تأتي.....
الفكرة راقت لجزء كبير من شباب القرية .... فهي فكرة غير مكلفة كثيراً يعني ما بتكلف الانسان حد عزيز عليه وحتماً ستخلق نوع من التناغم الداخلي حد زعمنا ......
المهم بقينا ليك قطاع طرق ما داسنها لا ناكرانها بس كويس وقت داك الشريعة مجمدة و الا كان قطعونا من خلاف.... أدوات النهب كانت سلاح ابيض و كنت املك خنجراً (فاجمل الناجين من الموت صار يعبد خنجراً) ... لكن والله و لا يوم ما طعنا حد بس بندقوا فتاشا بنشيل الفيها النصيب و نخليهو يتخارج .... بعدين نجي فرحانين نصلي العشاء و ننوم لحد بكره.... هذا الوضع استمر زي اسبوعين و ردود الافعال كانت تتراوح من خفيفة الي عنيفة جداً ... فكانت خفيفة عند الرجال حيث لم يقلقوا كثيراً علي هذا الوضع ... اما عند النساء فكانت عنيفة جداً لان هذا ارتبط بشكل مباشر بسوق العمل ..... واصلنا في الموضوع دا لمدة اسبوعين لحد ما قابلنا ليك واحد ادروب ... هو ادروب مسكين جداً .... طالع من الحلة زي الساعة 9 مساء كدا ....
اقيف يا ادروب .... ماشي وين ؟
ادروب ردد بكل غتاتة قائلاً: ماشي في الشارع
نحن: يا .... الشارع دا حق امك؟
قبل ان تنتهي عبارة امك ... بخفة النمر ناول ليك صاحبنا التالت دا بسطونة في الرأس ... الزول جاء ليك ارضاً.... و نحنا فتح
من ديك بطلنا حركات نهب .... لكن والله حتي الان انا احمد الله لكن في الفترة ديك لو لاقني اي بن لادن ... يا خي بن لادن مين الكبير .... اي زول عمل ليهو لحية قعر بصل كدا .... يعني ببساطة كان ممكن يقنعني افجر نفسي .... يعني الواحد كان المواعيد دي في الجنة يقزقز ليك ساي بالسبعين ديل و ما مشكلة اول ما اجي خاشي كدا اقرأ ليها نشيد الحكومة في بداية الانقاذ داك
حوريتي لا تحزني .... انا اخ لبلال انا من السودان ....
يا شباب معليش علي القصة البايخة دي و عارف في شباب الوقت دا الكاروشة جاتهم لكن برجع ليكم لموضوع مناسبات اجتماعية لا تصلح دون خمر.....
| |
|
|
|
|
|
|
|
|
|
Re: ليس دفاعاً عن الخمر (Re: حافظ حسن ابراهيم)
|
| Quote: والله يا علي تاج الدين ما فاهم اي حاجة لكن للضمان سلامات و انشاء الله كويس |
تحياتى
يا حافظ ....دى لهجة مغربية بشاغل بيها اخونا محمد الامين...وهى ذات صلة بموضوع البوست
تسلم
ياسيدى
| |
|
|
|
|
|
|
|
|
|
Re: ليس دفاعاً عن الخمر (Re: على تاج الدين على)
|
Quote: واصلنا في الموضوع دا لمدة اسبوعين لحد ما قابلنا ليك واحد ادروب ... هو ادروب مسكين جداً .... طالع من الحلة زي الساعة 9 مساء كدا ....
اقيف يا ادروب .... ماشي وين ؟
ادروب ردد بكل غتاتة قائلاً: ماشي في الشارع
نحن: يا .... الشارع دا حق امك؟
قبل ان تنتهي عبارة امك ... بخفة النمر ناول ليك صاحبنا التالت دا بسطونة في الرأس ... الزول جاء ليك ارضاً.... و نحنا فتح
من ديك بطلنا حركات نهب .... لكن والله حتي الان انا احمد الله لكن في الفترة ديك لو لاقني اي بن لادن ... يا خي بن لادن مين الكبير .... اي زول عمل ليهو لحية قعر بصل كدا .... يعني ببساطة كان ممكن يقنعني افجر نفسي .... يعني الواحد كان المواعيد دي في الجنة يقزقز ليك ساي بالسبعين ديل و ما مشكلة اول ما اجي خاشي كدا اقرأ ليها نشيد الحكومة في بداية الانقاذ داك
حوريتي لا تحزني .... انا اخ لبلال انا من السودان ....
|
كاااااااااااااااااااااااااااااااااااك
ياخ الله يجازى محنك 
| |
|
|
|
|
|
|
|
|
|
Re: ليس دفاعاً عن الخمر (Re: حافظ حسن ابراهيم)
|
Quote: احكي ليكم النكتةقبال النوم كدا والله هي ما نكتة قصة حقيقية ... في مرة من حلتنا مشت الحج ...
الحج دا يا سوركتي بمشوا ليهو في مكة الجنب السعودية ...
المهم خالتي عشة دي مشت الحاجة ووقت جات من هناك اسمها بقدر قادر كدا اتغير ليك اسمها بدل خالتي عشة لحاجة عشة ...
جات ليك من الحج و بعد كحة الحجيج ديك انتهت و الزوار خفوا ... مشيت جابت ليها بلاستيك زي الما حاصلة حاجة...
في بت من البنات القاريات في الحلة قامت قال ليها .... لكن يا حاجة عشة انتي ما حجيتي و المريسة دي حرام
خالتي: اسمع يا منجوهة انتي بتعرفي شنو ... انا والله سألت في بيت الله ... و قال لي المريسة دي حلال الا العرقي حرام ....
من يوم كدا السمع يكلم الما سمع ما في واحدة يجي يقول مريسة حرام. |
اضحك الله سنك فقد اضحكتني من جوة الجوة .
شكرا لهذا الحكي الرائع والسلس . وحقا هذا وصف لواقع سابق يحتاج الى دراسة ففيه كثير من العبر .
| |
|
|
|
|
|
|
|
|
|
Re: ليس دفاعاً عن الخمر (Re: أسامه الكرور)
|
Quote: وا سى /محمد...لاباس عليك؟؟ كل شى لا باس؟؟ واش هادى البسالة؟؟وا بغيت كل شى يدير الطاصة؟؟
وانشط مع راستو؟ ...ويلى ياصاحبى ..هديل الدرارى السودانيين كى احمقو على الطاصة والنشاط
والزبل ...سيروا ...... |
آ سي علي آلخوادري... واش بغيتني نعاود لهم السيرة ديال الماحية والقرقوبي؟! ها ودني منك!
| |
|
|
|
|
|
|
|
|
|
Re: ليس دفاعاً عن الخمر (Re: محمد الأمين موسى)
|
والله يا حافظ اخوي المريسة البتجيب الفهم دا..
| Quote: و لكن للامانة الانتفاضة يمكن ان تكون اتت بما هو اسوأ من مايو ... فهنا كانت الجبهة الاسلامية ... هنا الارهاب الفكري ... هنا الكل يدافع عن ذاته ضد جرائم اخلاقية مفتعلة من قبل هذه الجبهة .. |
حقو يوزعوها بمواسير الهيئة القومية للمياه..
| |
|
|
|
|
|
|
|
|
|
Re: ليس دفاعاً عن الخمر (Re: HAIDER ALZAIN)
|
شباب صباحاتكم بقنية
علي محمد بشير شكراً علي المرور و جايك صادي
عمر عبدالله : انشاء الله ديمة ضاحك يا رب ... و شكراً علي التشجيع
اسامة الكرور ... يا اسامة عليك الله دا اسم اب ليك؟ و يا حبة ما تشيل هم انت دايما قريب و في القلب كمان ... بعدين شكراً للانترنت يا حنين
محمد الامين : والله لغتكم سمحة انت و صحبك بس ما عارفين قعدين تشتمونا و لا لا لكن للضمان مرحب بيكم و اقعدوا عافية.
نوباتيا سلامات و صباحاتك منقة
حيدر يا دفعة .... انت لحد هسي من زمن الكشة انت ناسي نيفاشا و لا شنو
نواصل يا فرد
| |
|
|
|
|
|
|
|
|
|
Re: ليس دفاعاً عن الخمر (Re: حافظ حسن ابراهيم)
|
مناسبات لا تقوم دون خمر
حفلات الزار ..... يا سلام حفلات الزار ... الامية حبوبة الرجا ... الامية دي المرة البتدق الزار ... قعدة نسوان بدون اي تياب سودانية ... يعني امك اول ما تخش حفلة الزار بتقلع توبها و كل التياب بتكون في عنقريب ... يعني بالضبط زي انك في اروبا و لابس ملابس البرد في الشارع و اول ما تصل المكان المحدد بتقلع ملابس البرد الي حين اشعار اخر .... دا بالضبط البحصل في حفلات الزار ... يلا تعال شوف ليك الطبول الافريقية طبول لا تقاوم علي الاطلاق ... مصحوبة باصوات نحاسية ...الامية دي تبدأ ليك كدا و كل النسوان شغالات كورس ... يلا يا بشير (بشير يا بشير يا هي الحبشي المكادي) ... وهذه الاغنية تذكرني باجمل امرأة في القرية لكنها سافرت دون عوده سافرت سفر ابدئي..... تذكرني بأمراة تسمي ارض الجنان و فعلاً هي ارض الجنان بكل حلاوتها ... ارض الجنان ترقص بكل هيستريا و كانت ترقص واقفه علي طول ... و بمناسبة وضع الرقيص في الزار .... يعني اي وضع يعني شئ محدد ... مره سألت امي ليه يا امي ارض الجنان و كم مره كدا من الحلة سالتها ليه ديل برقصن واقفات و البقية جلوس او في وضع بين الجلوس و الوقوف؟
امي: البرقصن واقفات ديل عملوا ميدان و شربوا دم.... و الراقصات ما بين الجلوس و الوقوف ديل عملوا ميدان لكن ما شربوا دم .... اما الاخيرات لا سوا ميدان لا شربوا دم....
شرح:- الميدان و بعنوا بيهو ان الست عملت حفلة زار علي شرفها .....
و بعد بشير في اللولية ... بعدين اللولية دي عاملة جنس حبشية يعني sex worker بكلام الخواجات و في ملاحظة انا لاحظتها اخيراً بعد تراجع حفلات الزار او بعد تقدمي في العمر الذي لا يسمح بحضور حفلات زار و ربما لمشاكل الحياة ... عندما استرجع حفلات الزار دوما اتوقف عند اللولية فمعظم النساء البرقصن في اللولية يا واحدة زوجها متوفي او زوجها طافش .... يعني بالعربي كدا ست عندها مشكلة سرير .... و بعدين اللولية دي بتتصرف بكل سلوك ال sex worker و هي بترقص و تتأوه ... اللولية دي محصورة في شرق الله البارد فمثلاً المقاطع زي .... اللولية انا ما عارف الطريق حلفا و القضارف
.....اللولية انا ما تعبان انا بحب كسلا و بورتسودان
يعني الكلام كلو قريب قريب من الحبشة ... ياخي دي جارتنا تدوم لينا جارتنا ... و ملاحظة تانياً انا النسوان هناك اقص سقف جنسي لهن هو بورتسودان وقت داك شكلهم ما عارفين انا في الكرنتينة في جدة ,,, ما عارفين في دبي و تاني وين يا حيدر؟
بعد اللولية في الخواجة ... (خواجة رندو البيرة عندو و الويسكي جنبو خواجة رندو) .... و كمان في خواجة تاتريسا الكسر الكنيسة .... لكن كسر الكنيسة مالو والله ما عارف دا يكون من جماعات التنوير و لا شيوعيين اروبا .... عفوا يا شيوعيو بلادي والله ما قاصد حاجة .... نرجع لقصة الزار .... كل الانواع بشير الحبشي ... اللولية عاملة الجنس, الخواجا .... ديل كلهم بطشموا مريسة يعني ما في اي ويسكي او بيره الموضوع بغوا ساااااااااااااااااي
يلي حفلات الزار موضوع النفير ال ما داير شرح .... بعدين النفير اهم ما فيهو المريسة و العسلية ... بعد الناس يجوا من الضحوة او اليومية بتاعة النفير (المساعدة)... يعني بعد الناس يجوا ... بجي سيد النفير بعزمهم يا اخوانا تعالوا لي في البيت .... و هي دعوة زي الازان بالضبط ...فبرغم ان كل المصليين بعرفوا وقت الصلاة برضو بكون في اذان بناديهم ... الناس بقعدوا علي البنابر قروبات .... بعدين اي واحد\ة بقعدوا مع ناس ونستهم لايقة معاهو .... بعد الناس ينتهو من العصيدة تمر الجرادل ... و اي مجموعة لازم يكون قدامها جردل مريسة و اخر عسلية .... لانو في واحد بشرب مريسة و ما بحب العسلية , في حد تاني عسلية فقط , في اخر داير يعمل خلطة من الاتنين... و في حد ما بشرب لا عسلية لا مريسة (ربنا حارمو).... وأجمل من الشراب القعدة طبعاً ... ما في ون قو one go يا منعم ... لانو الناس ما لاحقة اي حاجة .....بعد الشلعة دي بكون الطمبور بدأ... و الطمبور دا رقيص ما ألة موسيقية زي بتاعت الشمال .....
صفقة حارة قوية .... خالتي حمرا بصوتها الجرسي تبدأ:
(عبدالرحيم جنا ... و جنو ما بتمني ... ركب الاندروبل كرعينا سابقنا) .... الصفقة الحارة تشكل مع الطبل الافريقي و الصوت الصادر من صدور الرجال .... تشكل خلفية لصوت حمره و بقية النسوة ... و بعدها يكون الرقص ..... تقذف النساء اجسادهن في الهوا و و يصفقن ثلاث مرات و كذلك الرجال ... موضوع الرقيص دا حاجي ليهو في موضوع عرس اخوي عشان ما اكرر الكلام .....
نكتة علي الطاير كدا
في واحد فجأة كدا و بدون اي مقومات او مقدمات بقي انصار السنة ... بكامل وعيوا قرر يكون انصار سنة و ما في حد حاشوا.... بعد ما الاسلام الجديد دا وقر في قلبه قرر ان يحارب الرزيلة و بدأ باقرب صلة الرحم .... بدأ بأمه و يا للعار من زنا المحارم .... هي زنا المحارم دا كلام ساي ...خلاصة القول انصار السنة دا قال لامو يا خي تاني ما تسوي مريسة .... يعني بدأ من الدرجة الثانية و هي التغيير باللسان و عندما لم ينفع ذاكم الاسلوب قرر الانتقال الي الاسلوب الأخير وهو اليد... كسر الازيار و بدأ في طرد الزبائن بخشونة .... الحاجة استسلمت للامر الجديد و بطلت تسوي شراب ... و بعدين ما تنسوا انصار السنة الجديد دا ناسي حاجة ان الشراب كان مصدر الرزق في البيت .... الحاجة بعد ما بطلت باسبوع كدا شكلوا الادخار انتهي ... جاء صاحبنا دا و بكل قوة عين قال لامو : وين الغداء؟
فردت الام: والله الليله انصار سنة سااااااااااااااااكت
| |
|
|
|
|
|
|
|
|
|
Re: ليس دفاعاً عن الخمر (Re: حافظ حسن ابراهيم)
|
حافظ تحياتي :
شكراً لك علي هذا البوست الرائع ، في ايام الديمرقراطية الثالثة سافرت لي اقدي
وفي بحر تلك الرحلة ركبنا القطر الي الدمازين ، وهناك سمعت نقاش سياسي بسيط بين
اثنين من ابناء المنطقة حول لمن سيصوتون الاثنان متفقات علي حزب الامة ....فقال
احدهما ولكن الصادق سوف يمنع المريسة ...فكان رد الاخر لا الصادق لن يوقف المريسة
ودي دعاية مضادة بس...وهنا تدخلت وقلت له نعم الصادق سوف يوقف المريسة اليس هو
الذي ينادي بتطبيق الشريعة؟ فكان رد الثاني نعم سوف يطبق الشريعة،، ولكن مادخل
الشريعة بالمريسة؟؟ففهمت علي طول ان مفاهيمه حول الشريعة تتناقض مع اطروحة
الصادق الاصولية ....او ان حزب الامة في هذه المناطق يطرح الشريعة باسلوب اخر
ربما يكون مستوعباً لطبيعة المنطقة ومفاهيمها حول النصوص الاسلامية .......
المهم توقفت عن النقاش ...وعرفت ان هؤلاء القوم ليس ضد الشريعة ولكنهم ضد
المساس بعاداتهم وتقاليدهم ......
| |
|
|
|
|
|
|
|
|
|
Re: ليس دفاعاً عن الخمر (Re: د.نجاة محمود)
|
Quote: لي سنين ما فرحتابزول دخل البورد قدر الزول دا
دا افضل كاتب من روضة مردة..حتى الان.. |
شكرا يا دكتورة و انشاء الله دايما فرحانة يا رب ... لكن كدا بتكبري لي رأسي شديد و اصدق وشويتين كدا اقوم اصرصر ليك وشي و ما اسلم علي الناس في الشارع لزوم ثقافة و كدا هههههه .... شكراً ليك يا دكتورة
| |
|
|
|
|
|
|
|
|
|
Re: ليس دفاعاً عن الخمر (Re: ibrahim alnimma)
|
ابراهيم سلامات
Quote: شكراً لك علي هذا البوست الرائع ، في ايام الديمرقراطية الثالثة سافرت لي اقدي
وفي بحر تلك الرحلة ركبنا القطر الي الدمازين |
ايييييييييك يا ابراهيم مرقت في اقدي كان بالمره تمشي ود ابوك و احمر سيلك.... فعلاًً كلامك صاح فالاسلام في معظم انحاء السودان اسلامي سوداني اسلام امتزج مع العادات و القيم المحلية و انتج الاسلام السوداني الكان موجود
| |
|
|
|
|
|
|
|
|
|
Re: ليس دفاعاً عن الخمر (Re: حافظ حسن ابراهيم)
|
Quote: انصار السنة دا قال لامو يا خي تاني ما تسوي مريسة .... يعني بدأ من الدرجة الثانية و هي التغيير باللسان و عندما لم ينفع ذاكم الاسلوب قرر الانتقال الي الاسلوب الأخير وهو اليد... كسر الازيار و بدأ في طرد الزبائن بخشونة .... الحاجة استسلمت للامر الجديد و بطلت تسوي شراب ... و بعدين ما تنسوا انصار السنة الجديد دا ناسي حاجة ان الشراب كان مصدر الرزق في البيت .... الحاجة بعد ما بطلت باسبوع كدا شكلوا الادخار انتهي ... جاء صاحبنا دا و بكل قوة عين قال لامو : وين الغداء؟
فردت الام: والله الليله انصار سنة سااااااااااااااااكت |
ود الكلب،،،
كان ثايل الغداء بجي من وين؟؟؟؟
اوع يكون ارتد عشان يتغدا؟؟
| |
|
|
|
|
|
|
|
|
|
Re: ليس دفاعاً عن الخمر (Re: حافظ حسن ابراهيم)
|
Quote: انصار السنة دا قال لامو يا خي تاني ما تسوي مريسة .... يعني بدأ من الدرجة الثانية و هي التغيير باللسان و عندما لم ينفع ذاكم الاسلوب قرر الانتقال الي الاسلوب الأخير وهو اليد... كسر الازيار و بدأ في طرد الزبائن بخشونة .... الحاجة استسلمت للامر الجديد و بطلت تسوي شراب ... و بعدين ما تنسوا انصار السنة الجديد دا ناسي حاجة ان الشراب كان مصدر الرزق في البيت .... الحاجة بعد ما بطلت باسبوع كدا شكلوا الادخار انتهي ... جاء صاحبنا دا و بكل قوة عين قال لامو : وين الغداء؟
فردت الام: والله الليله انصار سنة سااااااااااااااااكت |
ود الكلب
كان قايل من وين بجي لغدا
اوع يكون ارتد عشان يتعدا؟؟؟؟
| |
|
|
|
|
|
|
|
|
|
Re: ليس دفاعاً عن الخمر (Re: Zomrawi Alweli)
|
التحايا لسكان هذا المكان ولصاحب المكان
تحضرني قصة في ذات الاتجاه ... حكى لنا احد الاصدقاء
من مناطق النيل الازرق ان منظمة الدعوة الشاملة قررت محاربة
اكل سكان تلك المناطق للحلوف البري " الكدروق " فقامت بتوزيع كم
غنماية وكم خروف وبعداك جابت عدد من الشيوخ لشرح الموضوع من الناحية
الدينية ومسالة الحرام ....
الشيخ للحضور .. ربنا حرم اكل الخنزير والكدروق ده يا هو الخنزير والواحد
ما ياكل الكدروق ده لا في حال انو حيموت من الجوع يعني مضر اضرار شديد
احد الحضور قال ....... والله يا مولانا انا نشوف الكدروك ده (ننتر انترار )
وفي تلك المناطق عندما كان الكودة واليا عليها حاربهم في عاداتهم وواحدة من تلك
العادات عادة جدع النار واعياد الحصاد ... وسنعود
| |
|
|
|
|
|
|
|
|
|
Re: ليس دفاعاً عن الخمر (Re: معتصم ود الجمام)
|
ود الجمام اخونا زمان ازيك و كيف ولدك ابو اسم غريب و الله هسي نسيت اسمو لكن ما عارف لكن يا باشق او زنقار المهم اسم امي لو اجروها ما تقدر تنطقوا ... عليك الله سلم لي عليهو شديد و علي اريج لو سمحتا... و بالمناسبة ناس اريج في السودان و لا معاك في السعودية
Quote: وفي تلك المناطق عندما كان الكودة واليا عليها حاربهم في عاداتهم وواحدة من تلك
العادات عادة جدع النار واعياد الحصاد ... وسنعود |
رد فعل الاهلي طوالي كان بالموسيقي يا معتصم ... الوازا دورت ليك و طلعت غنية كاملة مقاطع منها
محل تطير بطير معاك يلا يا فردتي
محل نطير الكودة في يلا يا فردتي
ابو قمي بلدنا بس
ما تطول الغيبة يا معتصم
| |
|
|
|
|
|
|
|
|
|
Re: ليس دفاعاً عن الخمر (Re: حافظ حسن ابراهيم)
|
صناعة المريسة:
نتيجة للطلب المتزايد علي خطوات صناعة المريسة قررت ان اكتب خطوات التحضير لان هنالك عدد من الرسائل الخاصة وصلتني بخصوص هذا الموضوع اضافة للاميلات.... فلكم الخطوات:
اولاً: الزريعة ... اهم شرط في الزريعة ان الذرة يجب ان تكون قابلة للانبات بمعني اخر يجب ان لا تكون عمر الذرة اكثر من عام ... تغمر الذرة لمدة 24 ساعة في الماء و بعدها تعرض للهواء ليس لاكثر من نصف ساعة ... بعدها تغطي باوراق العشر او جولات الخيش و في حالة جولات الخيش ترطب كل فترة بالماء في اليوم الاول ... تترك الذرة مغطاه لمدة تترواح بين يومين او ثلاثة ... بعدها تعرض للشمس للتجفيف و قديماً كانت تعرض للشمس لمدة ليست اقل من 3 ايام و لكن علي ما اعتقد بعد ازدياد حرارة الارض و قضايا الاحتباس الحراري فيوم واحد يكفي في فصل الصيف اما في الشتاء و الخريف قد تحتاج ليومين لا أكثر .. بعدها تسحن الزريعة و تترك ... دوما في المنازل يكون هنالك مخزون stock من الزريعة حتي يكفي الست من هذه العملية الشاقة.
ثانياً السورج و الفطارة : السورج عبارة عن عجين مطهي ( رأيكم شنو في عجين مطهي دي) و الفرق بينه و الفطارة ان الاخيره عبارة عن عصيده لكن غير كاملة الطهي ... السورج مهمته الاساسية النكهة زائداً الطعم
ثالثا: يعرض السورج و الفطارة للهواء لمدة لا تتجاوز الساعة و بعدها يضاف اليهما كمية من الماء و يترك هذا الخليط لمدة يوم... بعدها يصب مسحوق الزريعة و الزريعة هي الاصل لانها بمثابة الخميرة و الغرض الاساسي منها التخمير ... يترك هذا الخليط لمدة يوم او يومين و هذا يعتمد علي الجو ...
رابعاً: في ال 12 ساعة الاولي من عملية التخمير يفتح الخليط لاربعة او خمس مرات و ذلك بغرض دخول الاكسجين الذي تتغذي عليها البكتريا ... و في حالة عدم تعرض الخليط للهواء فان البكتريا تموت مما يتسبب في ان المريسة يكون لها طعم لازع و في الغالب الاعم يتم ابادتها او منحها للحيوانات لانها تكون غير مستساقة للكائن البشري ... يمنع منعاً باتاً تحريك هذا الخليط بالايادي for hygiene wise ....و الا تحولت المريسة الي مريسة تام زين ... و هنالك مثل سوداني يقول (انشاء الله يجيب مريسة تام زين) ... و تام زين في المخزون الشعبي انها ست خمبة يعني ما حريفة و دوما مريستها ليس لها رواد الا عندما تنتهي مريسة الاخريات و دوماً يرتادها زباين الحيرة و هي بتبيع باي ثمن و غالباً بالدين و من هنا جاء المثل الشعبي.
خامساً الصفاية: عبارة عن قطعة خفيفة من القماش تخيط بما يشبه لباس المراتب و الغرض منها فصل المشك عن المشروب ... و المشك عبارة عن بقايا غير مرغوب فيها و هو بالضبط مثل بقايا الشاي و دوماً غذاء للمواشي ... يعني في الضحية جزء من الدعاية للخراف يقول ليك دا خروف مشك ... مشك الميم و الشين مضمومتان.
| |
|
|
|
|
|
|
|
|
|
Re: ليس دفاعاً عن الخمر (Re: حافظ حسن ابراهيم)
|
حافظ ازيك
يا اخوي حيرتني انت يا متنكر في اسم حافظ حسن ده
ولا تكون ساحر ... على العموم والله انا وديت وجبتا وما نقشتا اي
حاجة ... وبطيبة كدة ولدي اسمو مرهف وهو امو قاعدين في السودان
وانا قاعد مصاقر الكفيل براي ...
يا زول ادينا علومك انشاء الله في مسنجر وتسلم
| |
|
|
|
|
|
|
|
|
|
Re: ليس دفاعاً عن الخمر (Re: معتصم ود الجمام)
|
Quote: و هنالك مثل سوداني يقول (انشاء الله يجيب مريسة تام زين) ... و تام زين في المخزون الشعبي انها ست خمبة يعني ما حريفة و دوما مريستها ليس لها رواد الا عندما تنتهي مريسة الاخريات و دوماً يرتادها زباين الحيرة و هي بتبيع باي ثمن و غالباً بالدين و من هنا جاء المثل الشعبي.
|
والله زمنى دا كلوا أقول فى المثل وما عارف القصه شنو ؟؟؟
>
>
>
>
>
>
لكن ماتقول لى ؟؟ الشيف أسامه زاتو مابحصلك
ما بتلفى ليك قناة تلفزيونيه توظفك ؟؟؟؟؟؟
| |
|
|
|
|
|
|
|
|
|
Re: ليس دفاعاً عن الخمر (Re: أسامه الكرور)
|
Quote:
فالاسلام في معظم انحاء السودان اسلامي سوداني اسلام امتزج مع العادات و القيم المحلية و انتج الاسلام السوداني الكان موجود |
هذا تلخيص كامل التنقيح والاجادة..
| |
|
|
|
|
|
|
|
|
|
Re: ليس دفاعاً عن الخمر (Re: ABU QUSAI)
|
شباب صباحاتكم
معتصم مصاقرة الكفيل هينة بس انشاء الله جايبا مريسة تام زمين عليك نور طلع الولد اسمو مرهف ,,,, ربنا يحفظه انشاء الله ...
و تعال المتنكر مين ؟ دا اسم الادوني ليهو من ما قمت ... راجع الطبيب يا فرده يكون في زهايمر او مرض كبر ساي ... تسلم يا ود الجمام
و شكر علي المتابعة
اسامة الكرور
Quote: لكن ماتقول لى ؟؟ الشيف أسامه زاتو مابحصلك
ما بتلفى ليك قناة تلفزيونيه توظفك ؟؟؟؟؟؟
طالع
|
اها يا اسامة كمان جابت ليها قصص طباخين ... طباخين في الجنة ... لكن يا فرده تمام بحاول اقدم ورق لقناة اسمها زول ...
لانو عندهم مقدم برامج شكلو جمييييييييييييييييل
شكرا الجيلي علي المرور و انت زبون بقيت دايما عندنا و حنعمل ليك حساب في الدفع
ابو قصي شكراً علي المرور و جايكم صادي
| |
|
|
|
|
|
|
|
|
|
Re: ليس دفاعاً عن الخمر (Re: ABU QUSAI)
|
اخي حافظ
اجمل البوستات التي قراتها مؤخرا.
| Quote: بجي سيد النفير بعزمهم يا اخوانا تعالوا لي في البيت .... و هي دعوة زي الازان بالضبط |
بالفعل حتي في الخرطوم كان هنالك النفير في حالة بناء حيطه او حمام او خلافه فيجوا اولاد الحله وعلي الداعي تجهيز حلة العجالي
والمريسه.
لم نكن نري في ذلك اي مأخذ بل انه من الواجب.
| |
|
|
|
|
|
|
|
|
|
Re: ليس دفاعاً عن الخمر (Re: طارق ميرغني)
|
طارق ميرغني سلامات و شكراً علي المرور
عرس اخوي
العيال كبروا ... لكن بامانة العيال اتفلهموا.... قرر اخي الكبير الزواج للمره التانية وفي المره الاولي كانت الضحية ابنة خالي ... بت خالك حلالك ولد دا .... العرس الاول داك ما اثمر اي حاجة غير ردحي بتاع نسوان و غباين دون معني ....يعني لمدة سنتين لا جنا لا تني و الناس هنا بعرسوا عشان يجيبوا اطفال ....غايتو بت الخال المسكينة دي قرروا يطلقوها لانها عاقر ... والله العاقر منو في الوقت داك ما في حد عارف لانو ببساطة لا هي لا هو ما في واحد فيهم عمل كشف عشان يعرف الحاصل شنو ... بس هي مره ما بتلدي و خلاص مفروض السيد الذكر دا يشوف ليهو مره تجيب ليهو اولاد ... لانو الحمار بلدي لراحة ضهروا ..... الغريب في الامر الاتنين ما طلعوا عقر بس كان ما في صبر يبل الابري الاتنين انجبوا من زيجات اخري ...... بعد انتهاء مراسم الطلاق و توزيع القسايم و تحولت بنت خالي الي ثيب (عذبا) تلعن حظها التعيس قرر ذاك الاخ الزواج ... و المره دي كانت الزوجة من سلالة اعيان الحلة ... الزوجة المقترحة كان اكثر ما يميزها لها اجمل ساقان في القرية ... ساقان لم اري مثلهم الا عند كوندليزا رايس ... يعني سواقين كدا انسي ( يا اخوانا دي مرة اخوي هسي و أم اولادو عيب اتغزل فيها كدا لكن دي الحقيقة)... شكلوا اخوي دا اتكسر في السواقين الكوندليزية دي ... تمت الخطوبة و بدأت الاستعدادات للعرس ... بل الزريعة ... الزريعة دي حاجة اساسية جداً في المريسة ... قبل العرس باسبوع اكتشفنا انو امي قررت تعمل سهر و السهر دا طشمة ما اكتر و ما اقل ... الحاجة المسكينة نست انو اولادها اتفلهموا و ما دايرين حد غريب يجي و يلقاهم عمالين مريسة في البيت و خاصة الوليدات ديل في واحد في الجامعة و التاني اتخرجت ... يعني يجي صاحبهم ضيف و يلقاهم عاملين ام الكبائر دي ما فضيحة لا تغتفر .... تاني يمشوا في المين روود مع مين أو قول يخلطوا مين ؟؟؟.....
يتكلموا مع مين في موضوع الاخلاق و الرزيلة؟؟؟؟
المهم الوليدات ديل وقفوا قرن احمر ... الاولاد و ابوهم (الابو طبعاً بعد ما رقوهوا سوهو امام جامع الوضع عندو شوية اتغير) الوليدات و ابوهم في كوم و الام براهو شفيعها الله في الطرف التاني و بدأت الملاسنة :
الخريج: يا امي انتي الزريعة دي لشنو ... شايفكم عملتو الابري من بدري تاني الزريعة حقت شنو؟
الام من الاخر و بكل حسم: انا دايرة اسوي سهر .... فيهو عسلية و مريسة و عرقي كمان رايكم شنو؟
الاب بتهكم غاضب: طيب ما تتمي الناقصة و تجيبي بنقو؟
شكلو الموضوع ما ماشي علي بر هكذا علقت في سري.....
الام: البنقو دا انا ما بعرفوا جيبوا انت
الاب بدأت يستخدم سلطاتة التاريخية: اسمعي انا ما بتكلم معاكي انو المريسة حرام او حلال لكن نحنا جايينا ضيوف ما ممكن تحرجينا معاهم ... و اتجه الي الخطاب العاطفي و بعدين يا ولية اولادك ديل بجوا اصحابهم من الجامعة دايرة تحرجيهم معاهم يعني؟
الام: امي زكرتني باركان النقاش في الجامعة ... ذكرتني بالكادر الخطابي البنسي كل الموضوع و بشيل ليك كلمة واحدة و هاك يا نبز ....امي عملت كدا بس مسكت ليكم حرمة المريسة من حلالها... و بدأت في السرد و الردحي ... زكرت ليك عمك بكل قعداتو و كارشتو.... و بنفس الخطاب الانتقائي دا واصلت:
تقول لي دايرة احرج اولادي احرجهم كيف يعني؟ ... و تعال اسمعني هنا الداير يعرس دا ود الجيران ما برضو ولدي انا .... عرسو الاول عملتوا فيني عمايلكم دا و منعتوني ما اسوي مريسة يا هو حصل الحصل ....شومتها علي الولد سنتين لا جني لا تني لحد ما طلق ....
الخطاب دا جاب ليك كثافتنا .... اخوي الخريج دا بنفضة يد قال لامي ( أعملي الدايرة تعمليهو) يعني
الود زعل.....
أمي: شوفوا هنا انا بعمل سهر بعملوا..... يقعد الداير يقعد و الداير يطير يطير ... و اصحابكم البتخجلوا ليهم مني ديل ما تعزموهم ...
و هنا انتهي الأمر ....
بدأت مراسم التجهيز للسهر (عسلية و مريسة) .... موضوع السهر له قوانين غير قابلة للاختراق ... قوانين توارثتها النسوة ام عن جده و هي كالتالي:
1. تجهيز الزريعة دوماً مسئولية الام و في حالة غيابها لاي ظرف توؤل الي اقرب الاقربات و هذه دوما تكون الخالة و في حالة العدم العمة ... و في حالة غياب كل هؤلاء فهنا العريس يكون مقطوع من شجرة و لا يجب عليه السهر.
2. السورج و الفطارة البداية تكون بإمراة لم تطلق في حياتها او تترمل ... و المطلقات و الارامل الله لهن...
3. اما العسلية فوضعها مختلف تماماً و دوما توكل مهمتها لنساء شيخات ... ووقت اسمع كلمة شيخة دي طوالي بتذكر نسوان امدرمان ليه ما عارف ... المهم الشيخات ديل نسوان مقعدات ... ست مفروض تكون حريفة و خبره لانو ببساطة العسلية ممكن تقلب في اي لحظة من لحظات التخميير لاي خطأ ... فهنا نسبة الخطأ يجب ان تكون اقل من 0.001 ....بعدين العسلية دي اقول ليكم بتقلب كيف؟
العسلية اساساً بتكون صافية و هي بالضبط زي البيرة ... ووقت تقلب بتكون عكرة يعني الرواسب ما اترسبت كويس ... و قلبة العسلية يعتبر فال سئ جداً و الاهالي يطيرون به .... تحكي امي ... انا ام عزين ماتت يوم سهر بنتها ... والله المرة كانت كويسة تحمد الله ... قبال السهر بيوم جات فلانة الخمبة ... فتحت العسلية و بعدين العسلية قلبت ... والله انا عارفة قلبة العسلية دي ابدأ ما لاخير ..... هكذا تردد امي هذا القول دوماً.
يوم السهر .... من الصباح النسوان يزغردن و اي منهن لها مهمة محددة و في الغالب الاعم هذه المهمة قد تحددها الحالة الاجتماعية marital status ....رصت 10 ازيار بما يشبه الهرم ... قاعدته 4 ازيار و قمته زير صغير.... كل زير يغطي بقطعة قماش بيضاء و بجانبه كأس من القرع ... و حجم الكأس يعتمد علي نوع المشروب ففي المريسة الكأس كبير نسبياً و في العسلية اقل حجماً...
بعد الغداء الذي يحين في الساعة اتنين تبدأ طقوس السهر ... و يبدأ بشي يسمي الفرعة ... و الفرعة دي مهمة زكورية بحته ..الفرعة اول حد يفتح الازيار مفروض يكون والد العريس و في حالة غياب الوالد تؤول المهمة الي العم ... لحظة الفرعة تبدأ زغاريد تصم الازان ... و بعده تبدأ الطشمة .... يلا اقول ليكم حاجة قبل انا ذكرتي الاولاد الاتفلهمو ... المهم في البداية كانوا برسلوا ليك الشفع ... لا ما مريسة عسلية ... لا مريسة عليك الله سريع ...شويتين كدا الجسم نمل بقوا يجو براهم ... و هاك يا نقارة.....
بجي صادي لموضوع النقارة دي ولا بريتكم شديد يا فرد؟
| |
|
|
|
|
|
|
|
|
|
Re: ليس دفاعاً عن الخمر (Re: حافظ حسن ابراهيم)
|
بين النقارة و الطمبور قارورة عسلية
بعد ان فعلت ام الكبائر فعلها .... بدأ الرقص ... فالافريقي يعبر عن معظم مناسباتة حزينة كانت ام سعيده بالطبول و الرقص..... و هنا سوف اكتفي بسعيد الاوقات ... بعد ان فعلت امي الكبائر فعلها توجه الكل الي السهلة التي امام بيتنا .... تجمع الكل بعد اطلاق زغرودة امي التي لا تحدها اي حبال صوتية ... و تبعتها زغاريد الاخريات وهذا كان بمثابة اعلان لبدء ال body language ... النقارة مجلدة بالجانبين لكن بأي جلد لم اعد متذكر و لكن في الغالب الاعم تكون من جلد الغنم... قرعت النقارة بعيدان رقيقة جداً لكن اصدرت الصوت المطلوب و هذا الصوت ربما بمهارة العازفين .... صفقت النسوة و حمحم الرجال بإستخراج صوت من الصدر (حمحمة)... و بدأ الحفل فاتراً في البدء لكن بالتأكيد سوف يحموا رويدا رويداً ....رقصت النساء ام صلبونج ... ام صلبونج اسم لاحد الرقصات فيها تقفز المرأة الي اعلي لكن اهم جزء فيها ان تحرك اردافها مع ايقاع النقارة و حمحمة الرجال و هذه الرقصة عرفاً اضحت حصراً علي ذوات الارداف المتناسقة ... بعدها كانت عدة رقصات لكن اكثر ما وقفت عندها رقصة لم تسعفني الذاكرة لاستحضار اسمها .....
ابوي زي ما قلت ليكم بعد ما بقي امام جامع ... ينعي انعزل عن الحياة الاجتماعية قليلاً و هذا كان في مصلحة معظم الاطراف ... يعني بقي ما بمشي حفلات الطمبور ما برقص مع النساء الاجنبيات بسفور , لكن المناسبة كانت خاصة جداً و هي زواج ابن ... و ابن دا حيجيب احفاد ...المهم عمك جاء حلبة الرقيص بس كان مكتفي بالنظر ... دخلت امي حلب الرقص كاشفة عن شعرها بكل سفور الفلاحات ... و بيني و بينكم الرقصة كانت صعبة شوية فيها الرجل يربط مع المرأة من الارجل بثوب المرأة مراقصته .... يعني عشرة بدي لكن بنفرين بدل واحد و مع الايقاع يبدأ الاثنين في الانحناء الي الخلف و يستمر الانحناء بايقاع واحد غير بطئ و غير سريع ... و يستمر علي هذا المنوال الي ان يصل شعر المرأة (السلة) الي الارض بعدها يتغير الايقاع و يبدأ قيام واقفاً في لغة العسكر او أمامة الظلم .... فجأة يتغير الايقاع الي ايقاع صاخب جدا و هنا يتعانق الاثنان و تبدأ حركات صاخبة ... لكم ان تتخيلوا ان في تلكم الرقصة كانت أمي تراقص رجل اخر بينما ابي امام المسجد العائد الي اصوله يعانق امرأة اجنبية.... و كذلك 2 من عماتي كن في حلبة الرقص و يقمن بذاك الفعل .... الرقصة دي فترة في الحلة اندثرت لكن شكلهم احيوها في عرس اخوي .... يعني صراحة انا أول مره اشوفها كان يوم العرس .... اخي الذي يصغرني بعامين او 3 اعوام .... رجل فكاهي من الطراز الاول ... مهما كان الموقف سخيف أو حزين يحوله لنكة هذا الاخ اللعنة علق قائلاً :
يا حافظ والله نحنا ما عندنا اهل عندنا ..........وكان يعني sex workers
انا علقت بابتسامة الشلعة المعروفة ديك قائلاً: لكن ما شديد....
و ضحكنا باعلي اصواتنا ... و تجرعنا كأسين من العسلية وواصلنا فجور اهلنا.
| |
|
|
|
|
|
|
|
|
|
Re: ليس دفاعاً عن الخمر (Re: حافظ حسن ابراهيم)
|
Quote: صناعة المريسة:
نتيجة للطلب المتزايد علي خطوات صناعة المريسة قررت ان اكتب خطوات التحضير لان هنالك عدد من الرسائل الخاصة وصلتني بخصوص هذا الموضوع اضافة للاميلات.... فلكم الخطوات:
اولاً: الزريعة ... اهم شرط في الزريعة ان الذرة يجب ان تكون قابلة للانبات بمعني اخر يجب ان لا تكون عمر الذرة اكثر من عام ... تغمر الذرة لمدة 24 ساعة في الماء و بعدها تعرض للهواء ليس لاكثر من نصف ساعة ... بعدها تغطي باوراق العشر او جولات الخيش و في حالة جولات الخيش ترطب كل فترة بالماء في اليوم الاول ... تترك الذرة مغطاه لمدة تترواح بين يومين او ثلاثة ... بعدها تعرض للشمس للتجفيف و قديماً كانت تعرض للشمس لمدة ليست اقل من 3 ايام و لكن علي ما اعتقد بعد ازدياد حرارة الارض و قضايا الاحتباس الحراري فيوم واحد يكفي في فصل الصيف اما في الشتاء و الخريف قد تحتاج ليومين لا أكثر .. بعدها تسحن الزريعة و تترك ... دوما في المنازل يكون هنالك مخزون stock من الزريعة حتي يكفي الست من هذه العملية الشاقة.
ثانياً السورج و الفطارة : السورج عبارة عن عجين مطهي ( رأيكم شنو في عجين مطهي دي) و الفرق بينه و الفطارة ان الاخيره عبارة عن عصيده لكن غير كاملة الطهي ... السورج مهمته الاساسية النكهة زائداً الطعم
ثالثا: يعرض السورج و الفطارة للهواء لمدة لا تتجاوز الساعة و بعدها يضاف اليهما كمية من الماء و يترك هذا الخليط لمدة يوم... بعدها يصب مسحوق الزريعة و الزريعة هي الاصل لانها بمثابة الخميرة و الغرض الاساسي منها التخمير ... يترك هذا الخليط لمدة يوم او يومين و هذا يعتمد علي الجو ...
رابعاً: في ال 12 ساعة الاولي من عملية التخمير يفتح الخليط لاربعة او خمس مرات و ذلك بغرض دخول الاكسجين الذي تتغذي عليها البكتريا ... و في حالة عدم تعرض الخليط للهواء فان البكتريا تموت مما يتسبب في ان المريسة يكون لها طعم لازع و في الغالب الاعم يتم ابادتها او منحها للحيوانات لانها تكون غير مستساقة للكائن البشري ... يمنع منعاً باتاً تحريك هذا الخليط بالايادي for hygiene wise ....و الا تحولت المريسة الي مريسة تام زين ... و هنالك مثل سوداني يقول (انشاء الله يجيب مريسة تام زين) ... و تام زين في المخزون الشعبي انها ست خمبة يعني ما حريفة و دوما مريستها ليس لها رواد الا عندما تنتهي مريسة الاخريات و دوماً يرتادها زباين الحيرة و هي بتبيع باي ثمن و غالباً بالدين و من هنا جاء المثل الشعبي.
خامساً الصفاية: عبارة عن قطعة خفيفة من القماش تخيط بما يشبه لباس المراتب و الغرض منها فصل المشك عن المشروب ... و المشك عبارة عن بقايا غير مرغوب فيها و هو بالضبط مثل بقايا الشاي و دوماً غذاء للمواشي ... يعني في الضحية جزء من الدعاية للخراف يقول ليك دا خروف مشك ... مشك الميم و الشين مضمومتان. |
ياخي دا عمل جبار .. خليتني اكرع شديد لامن عيوني جحظن
هل ممكن صناعة هذه المريسة في الشقة في بلد زي السعودية ام أن رائحتها توديني التوج؟؟
| |
|
|
|
|
|
|
|
|
|
Re: ليس دفاعاً عن الخمر (Re: Zomrawi Alweli)
|
| Quote: هل ممكن صناعة هذه المريسة في الشقة في بلد زي السعودية ام أن رائحتها توديني التوج؟؟ |
زمراوي سلامات و انشاء الله طيب .... مضوع التوج بعتمد علي حاسة شم جماعة الامر بالمعروف ....
| |
|
|
|
|
|
|
|
|
|
Re: ليس دفاعاً عن الخمر (Re: Salah Abdulla)
|
ياخي / يابني اتعلمت من كتاباتك او صورك الاجتماعية السياسية الاصيلة حاجات كتيرة فلك فضل ان علمتني ... زي ما قال بلدياتي زمراوي نحن ناس اقصي الشمال بنسمع عن المريسة ولا نعرف كثيرا عن مدلولاتها الاجتماعية والمعيشية وطقوسها الا ما نقرء وهو قليل ... انت تناولت محاور اساسية في حياة غالب شعوب السودان مع اختلاف شكلي في التفاصيل ومصيبة شعوب السودان انها لا تعرف الا القليل عن بعضها البعض وكما ذكرت انا في موضوع اخر باسم "السودان" فان عوامل تماسك شعوب السودان السابقة ممثلة في ارض رحبة واناس قلة صارت تتلاشي لتكاثر في البشر وقلة في المصادر وسوء ادارة للبلاد والعباد وفساد عم الفكر والجيوب ..
لك عظيم امتناني
| |
|
|
|
|
|
|
|
|
|
Re: ليس دفاعاً عن الخمر (Re: Salah Abdulla)
|
ياخي / يابني اتعلمت من كتاباتك او صورك الاجتماعية السياسية الاصيلة حاجات كتيرة فلك فضل ان علمتني ... زي ما قال بلدياتي زمراوي نحن ناس اقصي الشمال بنسمع عن المريسة ولا نعرف كثيرا عن مدلولاتها الاجتماعية والمعيشية وطقوسها الا ما نقرء وهو قليل ... انت تناولت محاور اساسية في حياة غالب شعوب السودان مع اختلاف شكلي في التفاصيل ومصيبة شعوب السودان انها لا تعرف الا القليل عن بعضها البعض وكما ذكرت انا في موضوع اخر باسم "السودان" فان عوامل تماسك شعوب السودان السابقة ممثلة في ارض رحبة واناس قلة صارت تتلاشي لتكاثر في البشر وقلة في المصادر وسوء ادارة للبلاد والعباد وفساد عم الفكر والجيوب ..
لك عظيم امتناني
| |
|
|
|
|
|
|
|
|
|
Re: ليس دفاعاً عن الخمر (Re: abubakr)
|
| Quote: علي اليمين دة أحلا بوست في أشنا دنيا |
يا حبيب نورا بالله كيف نورا و انشاء الله منوره .... حلاوة البوست دي جاي من حلاوتك انت يا حنين و تشكر علي المرور
الليلة زي ما عارف خميس و معزوم علي طول بس بيتنا جنب بسط الامن الشامل و اوعي تكون وزن الريشة... تسلم و تعمر
| Quote: حصلت والله لي قريبتنا...بلو الابري تسع سنوات بعداك فضوها سيرة وهاك يا ولادة |
اها انشاء الموضوع هسي وقف يا عبدالله ... شكراً ليك يا ابو عبده
منعم الزومة قايمة و الدنيا خميس لكين احواض الرملة ديل ما بينفعوا معاي ...
Quote: حافظ ،، إزيّك يا ولدنا ..
( هنقناهو أب ) عشان خاطر منعم ، والليلة الخميس وكده..
ما تطول يا حافظ بالله ، العالم كلها راجياك .. |
يا ابو الصلح ايو الليله الخميس و انا بعد دا طالع لانو ود البدري سمين ... و بعدين قصة العالم الراجياني دي
شنو؟ كلو العالم عندهم خميس الليله ....
ابو بكر شكراً ليك لكن احسن ليك تقول اخوي من ابني دي ... والله انا ابوي لو لاقي طريقة ما حيقول ابني
طبعاً الخبيثين حيحاولوا يفهموها بشكل تاني لكن الموضوع كبر ساااااي ما قلة ادب
تشكر يا ابو بكر و ربنا يخليك يا عمي
| |
|
|
|
|
|
|
|
|
|
Re: ليس دفاعاً عن الخمر (Re: HAIDER ALZAIN)
|
| Quote: دا اطول خميس يقابلني |
فعلاً يا حيدر هو اطول خميس لانو الجمعة زاتها بقت خميس بعد ما يوم السبت بقي اجازة ...و بعدين السبت بقي فكاكة
يعني قهوة و سمك من المورده ... و بعدين يا حيدر انا يوم السبت دا كان اليوم ال انا جيت فيهو للدنيا الفقر ....
و قعدت اتأمل ليك في حياتي .... اتخيل علقت لنفسي قلت شنو ( دينك والله انا خطر) دا كلو اتجاوزتو انا و لحد عايس و لكن
عمر الشقي بقي ....
حيدر كدا ياخي ننقل الصداقة شوية من اجانب الاسفيري دي ... ما احتمال انت تشتاق ليك لشوية غبار كدا و تجي السودان ,
او انا اجي عمره هههههههههههههههههه .....
| |
|
|
|
|
|
|
|
|
|
Re: ليس دفاعاً عن الخمر (Re: HAIDER ALZAIN)
|
الأخ حافظ
قولك(بعد ازدياد حرارة الأرض والأحتباس الحرارى)ومافهمته انا عن تأثيرهما على تحضير وصناعة المريسة فدى شديدة وحلوة..عجبتنى .
مع امنياتى لكل صناعاتنا المحلية بالتطور والأذدهار .
| |
|
|
|
|
|
|
|
|
|
Re: ليس دفاعاً عن الخمر (Re: قلقو)
|
قلقو سلامات و شكراً علي المرور
| Quote: بعد ازدياد حرارة الأرض والأحتباس الحرارى)ومافهمته انا عن تأثيرهما على تحضير وصناعة المريسة فدى شديدة وحلوة |
قلقو شكلك انت كنت يا ادبي او علمي بدك حصة الكيمياء في الثانوي ... مش بقول ليك البكتريا ببتكاثر في درجة حرارة من كدا لكدا ... يعني درجة الحرارة الملائمة و كلما ارتفعت درجة الحرارة ازداد تكاثر البكتريا الخاصة بالتخمير الا ان تصل الحرارة درجة محددة بعدها تموت البكتريا و ارتفاع درجة حرارة الارض المتزايد دا شكلو حيزهر صناعتنا المحلية لكن في نفس الوقت يهددها....
شكراً قلقو علي المرور و نحن تحت الخدمة اي سؤال او استفسار او استشارة مجانية
| |
|
|
|
|
|
|
|
|
|
Re: ليس دفاعاً عن الخمر (Re: حافظ حسن ابراهيم)
|
| Quote: بجي صادي لموضوع النقارة دي ولا بريتكم شديد يا فرد؟ |
.......
.......
يار يت لو كل الناس ببروا ذي بريـك دا
شــكرا لك أن فتحت لنـا صفحـة من التنوع
الثقافي ( البقولوا عليهو )
وشـكرا موصول لبتاع الدكاي وللزول الكتب بوست
العرس عند الدينكا ( منذ زمن )
بس فضـل لينا ناس البقنية وابيض ضميرك و.... و......
تنـوع ثــر , بس نحـن الغبيانين
يا خوي أن طبعت حكيك دا وبديت أوزعـوا بس أوعك
تقول المصنفات الفنية وشـنو وشــنو
| |
|
|
|
|
|
|
|
|
|
Re: ليس دفاعاً عن الخمر (Re: عبدالله احيمر)
|
Quote: [يار يت لو كل الناس ببروا ذي بريـك دا
شــكرا لك أن فتحت لنـا صفحـة من التنوع
الثقافي ( البقولوا عليهو )
وشـكرا موصول لبتاع الدكاي وللزول الكتب بوست
العرس عند الدينكا ( منذ زمن )
بس فضـل لينا ناس البقنية وابيض ضميرك و.... و......
تنـوع ثــر , بس نحـن الغبيانين
يا خوي أن طبعت حكيك دا وبديت أوزعـوا بس أوعك
تقول المصنفات الفنية وشـنو وشــنو |
عبدالله الاحيمر ... شكراً ليك و الله الكتبوا فوق دا ذوقك والله ما اكتر .... التنوع الثقافي شوتين كدا تجيب ليها كلام كبير يا اخوي
و نحن ناس معايش ساااااي ... يا خي عليك الله طلب لو ممكن تساعدني وين القي بوست العرس عند الدينكا دا ... اصلو اخوك جاهل شوية في الكمبيوتر دا و كدا .....
يا زول اطبع قدر ما طابعتك تتحمل انا لاقيك وين ... دا لله و الرسول لا فيهو ملكية فكرية و لا يحزنون
ابقي واصل يا ابو عبده
| |
|
|
|
|
|
|
|
|
|
Re: ليس دفاعاً عن الخمر (Re: الطيب شيقوق)
|
والله ياحافظ سنة 82 لمن كنافى الزمن الجميل000 وكنت بحب عفاف ابوحريره قبل ما اتزوجها عمها على كان جاى من لندن
قبل مايجى نادونا نحن نفير راس مالنا كان قزايز شرى من بار الزين عليك امان ضربنا البيت بهيا00 ولا اروع نقاش
فى بلادى زمان 0 يعنى ماكان فى مشكله وكان معانا اخونا وحبيينا واحد قبطى اسمو مكاريوس قرى معانا فى الجيلى الثانويه00
| |
|
|
|
|
|
|
|
|
|
Re: ليس دفاعاً عن الخمر (Re: خالد المحرب)
|
Quote: نحن نفير راس مالنا كان قزايز شرى من بار الزين عليك امان ضربنا البيت بهيا00 ولا اروع نقاش
فى بلادى زمان 0 |
غايتو يا حافظ عمك خالد اب شنب دا في الشراب بكون مزتو خروف وبعد الشراب عشاهو تور
الحمد لله الـ وقف ما عشان اختنا عفاف عشان نحافظ على ثروتنا الحيوانية من الانقراض
| |
|
|
|
|
|
|
|
|
|
Re: ليس دفاعاً عن الخمر (Re: عبد المنعم سليمان)
|
الاخ حافظ
ابقى لينا حرير واتضاير بالجنبة خلينا ندوبي ليك في الصقيعة دى -
بريد العيش بريد يوم المريسة كتييييييرة
بريد الدقّة صافية الموية فيها قلييييييييييييلة
انا بستغرب في الزول البياباهو صااااااافي وبياكلو بليلة
ده طبعا واحد من عربنا . بعد ولع بالحيل عصر اصبعه في اضانو وصار ينم ويتلولح زى اذان المغربية
هو طبعا بيستغرب في عينة زولك المرشد ده الممكن ياكل العيش بليلة سااااى لكن اكان جابوهو ليهو سكسكو صافي بتر منو لا وراء .
| |
|
|
|
|
|
|
|
|
|
Re: ليس دفاعاً عن الخمر (Re: الطيب شيقوق)
|
Quote: ابقى لينا حرير واتضاير بالجنبة خلينا ندوبي ليك في الصقيعة دى -
بريد العيش بريد يوم المريسة كتييييييرة
بريد الدقّة صافية الموية فيها قلييييييييييييلة
انا بستغرب في الزول البياباهو صااااااافي وبياكلو بليلة
ده طبعا واحد من عربنا . بعد ولع بالحيل عصر اصبعه في اضانو وصار ينم ويتلولح زى اذان المغربية
هو طبعا بيستغرب في عينة زولك المرشد ده الممكن ياكل العيش بليلة سااااى لكن اكان جابوهو ليهو سكسكو صافي بتر منو لا وراء . |
هلا هلا العرريب ات وصلت هنا ...؟؟ ما تقول انت الدوبيت شنو "واحد من عربنا " يرموك في عرر قول امين ....
| |
|
|
|
|
|
|
|
|
|
Re: ليس دفاعاً عن الخمر (Re: الطيب شيقوق)
|
الاخ/ حافظ
لك كل الود
اقول ليك ماشفت البوست ده من بدري اكون كضاب ؟
لكن قلت تلقاهو واحد حيشبكنا نقة ساكت .
لكن الليلة قلت اخش اشوف في شنو ؟
والغتيت حيدر الزين طالع نازل معاي لقيتو رادي هنا وما كلمني
ضحكت من اعماق قلبي
تعلمت ان للآخر منطقه فيما يفعله
اعجبت بأمك ايما اعجاب في صلابة مواقفها وفهمها البسيط .
تعليق اخوك الصغير في اهلو سبب لي احراج في المكتب مع الزملاء ، فلم استطع التوقف عن الضحك
لك الود مرة اخري
| |
|
|
|
|
|
|
| |
حافظ حسن ابراهيم
HAIDER ALZAIN
عبد المنعم سليمان
Abd-Elrhman sorkati
محمد الشيخ أرباب
فيصل محمد خليل
الجيلى أحمد
عثمان محمد كرار
بدر الدين اسحاق احمد
Zomrawi Alweli
محمد الأمين موسى
على محمد على بشير
abdalla osman
على تاج الدين على
عمر عبد الله فضل المولى
أسامه الكرور
حسين نوباتيا
ibrahim alnimma
معتصم ود الجمام
اسامة دفع الله ابوالحسن
ABU QUSAI
حبيب نورة
abubakr
قلقو
الطيب شيقوق
وليد التلب
فيس بوك
تويتر
انستقرام
يوتيوب
بنتيريست