|
ساخر سبيل : فتة أسلاك
|
صحيفة الرأى العام الأحد الموافق 16 نوفمبر 2008م _____________________________________________________________________________________________
عندما عدت بالأمس إلى منزلى بعد يوم عمل شاق والجوع يعتصرنى قمت بسؤال (المدام) ذلك السؤال التقليدى : - اها الليلة طابخة لينا شنو؟ - والله الليله عاملة ليكم (فتة أسلاك) تاكلو صوابعينكم وراها - (فى دهشة) : فتة شنو؟ - ما سمعتنى يعنى ؟ آآآيا (فتة أسلاك) ... الأسلاك الواااحده دى وكمان عاملة ليكم معاها (شوربة بتاعت جاز) ما حصلت ! ومن بكرة ح أحشى للأولاد سندوتشات (فولتات) يمشو بيها المدرسة ! إقتربت منها قليلا ووضعت يدى على جبهتها وأنا أقول فى نفسى (أكيد الوليه دى جاتا ملاريا) إلا أنها أزاحت يدى وهى تضحك وتناولنى إحدى الصحف قائلة : - إنت قايلنى (بهظر) كدى أقرأ الكلام الفى الجريده ده ! وأمسكت بالصحيفة وجلست فى أقرب كرسى أقرأ فى الخبر الرئيس والذى يقول بأن مجلس الوزراء قد أجاز فى إجتماعه الدورى (أول أمس) مشروع الموازنة المالية للدولة لسنة 2009م وقد تعهدت (الحكومة) بعدم زيادة أسعار المحروقات والكهرباء . - طيب الكلام ده ما كويس مالو ! - آآى كلام كويس ما قلنا حاجه لكن باقى الحاجات الكلو يوم زائده دى ما يتعهدوا لينا إنو ما ح تزيد – مواصلة- هو المواطن ده بياكل (جزولين) ولا بيشرب (كهرباء) ! - تقصدى شنو؟ ما فاهم ؟ - هى دى كمان عاوزة ليها فهم هسه (شن فايدة) عدم رفع أسعار (الكهرباء) والمحروقات القالوها دى كان (سعر الرغيف) زاد؟ - والله فعلن مافى فائده ! - هو الرغيف براهو شن الفائده أكان أسعار (الخضروات) زادت و(اللحوم) زادت و(حليب الأطفال) و (الأدوية) زادت و(الإيجارات) والمواصلات زادت ؟ أها الحاجات دى بيضمنو لينا ممن وين إنها ما تزيد؟ - والله كان جيتى للجد ضمان مافى
هنا فقط تأكدت بالفعل أن (حرمنا المصون) لا تعانى من أى أعراض مرضية وأنها فى كامل قواها العقلية والصحية فهى ترى بان التعهد بعدم رفع هاتين السلعتين شيء مهمّ ويطمئن المواطن (الغلبان) كثيراً لكنه ليس كل شيء ، فهنالك (حالة فلتان) فى أسعار السلع التمونية الضرورية تشهدها الاسواق بل أن بعضها يتضاعف سعره أكثر من مرة فى الشهر الواحد بينما (المرتبات) و(المعاشات) و(الدخول عموما) لم ترتفع أكثر من 10% منذ أعوام طويلة .. - إنت عارف كيلو العدس (أكل الناس الغلابه) بى كم ؟ - لا ما عارف ! - الكيلو يا سيدى بى (تمانية ألف) ! - وعارف ربع البصل الواااحد ده بى كم ؟ - لا ما عارف ! - وحاتك بى سطاشر ألف وماشى على العشرين ! - والله قصه عجيبة .. هسه عم سليمان (جارنا) ده معاشو فى الشهر (مية ألف) يعنى (خمسة أرباع بصل) !! فجأة جلست (حرمنا المصون) ثم نظرت نحوى فى حزم وهى تقول متسائلة : - هسه (ثورة التعليم) دى تاكل شنو؟ فاجأنى سؤالها (الغريب) وقربت تاانى (أخت إيدى أشوف حرارتا) لولا أنها واصلت حديثا قائلة : - إنت عارف إنو الميزانية دى ما فيها أى فرص عمل جديدة للخريجين العواطلية الـ بالألاف (الملو الشوارع) ديل ؟ طيب ديل ياكلو شنو ؟
أجبتها والجوع يعتصرنى : تسألينى أنا ؟ أسألى ناس (الحكومة) ديل ! كدى أمشى جيبى لينا (فتة الأسلاك) دى خلينا ناكل الجوع قطع مصارينا !
|
|
|
|
|
|
|
العنوان |
الكاتب |
Date |
ساخر سبيل : فتة أسلاك | الفاتح يوسف جبرا | 11-16-08, 08:20 AM |
Re: ساخر سبيل : فتة أسلاك | ismeil abbas | 11-16-08, 08:42 AM |
Re: ساخر سبيل : فتة أسلاك | الفاتح يوسف جبرا | 11-16-08, 08:51 AM |
Re: ساخر سبيل : فتة أسلاك | Safia Mohamed | 11-16-08, 09:36 AM |
Re: ساخر سبيل : فتة أسلاك | الفاتح يوسف جبرا | 11-16-08, 10:18 AM |
Re: ساخر سبيل : فتة أسلاك | أبو الحسين | 11-16-08, 11:08 AM |
Re: ساخر سبيل : فتة أسلاك | الفاتح يوسف جبرا | 11-16-08, 11:21 AM |
Re: ساخر سبيل : فتة أسلاك | هاشم أحمد خلف الله | 11-16-08, 11:23 AM |
Re: ساخر سبيل : فتة أسلاك | الفاتح يوسف جبرا | 11-16-08, 11:42 AM |
Re: ساخر سبيل : فتة أسلاك | ismeil abbas | 11-16-08, 12:00 PM |
Re: ساخر سبيل : فتة أسلاك | الفاتح يوسف جبرا | 11-17-08, 05:48 AM |
Re: ساخر سبيل : فتة أسلاك | نورالدين بابكر بدري | 11-17-08, 08:24 AM |
Re: ساخر سبيل : فتة أسلاك | ismeil abbas | 11-18-08, 07:29 PM |
|
|
|