|
|
|
 Re: أحدث صور من شوارع العاصمة.. (Re: ABUHUSSEIN)
|
Quote: ود المرتضى
سلامات كتار |
ما عارف ليه في الأول قريتا (سلامات دفار)..
كيفك يا وضاحه ..
قوقل شنو الفيهو واناري !!
دي غنيه أو طقطوقة محفوظة في الخاطر الماعاد..
هسه ممكن يكون حرفوها إلى:
واناري المالقيت ركشا .. أتلِّب بالجمبات واموت مع الهبشه..
في أغاني كتيره اتغيرت يا وضاحه ..
أغنية سيد خليفه : أموت في القصر العيني وتنقذني الطبيبه أصبحت:
أموت في مستوصف (....) وتكفِّني الطبيبه..
عادي..
والدفن بعد سداد رسوم القتل
والكفن Buy 2, Get one free
سلامات كتار..
| |
 
|
|
|
|
|
|
|
|
Re: أحدث صور من شوارع العاصمة.. (Re: محمد المرتضى حامد)
|
Quote: Quote:
ود حامد يا قديم ..... |
قديم أنا؟
ياخ القدر أبوي مكنكشين فيها لي هسه،
خليني أكنكش في المنبر دا وانكش الدايرو. .
بالله يا (أبو حسين) لاقاك في بلد شاحنات وحافلات وقوف متكرر ما تمشي إلا شمال الشارع؟
ياخ البصات والحافلات والأمجاد والركشات وعربية الباسطه واللواري والكشات كلهم يغنوا لشرطة المرور:
دركسوني باليمين وانا ماسك شمــــــــــــــــــــال..
حتى السايقين السيارات الصغيره ممكن الواحد يكون ماشي بشمال الشارع السريع بسرعة خطوه اتنين مستحيل،
يتهادى بمزاج ، لاتؤثر فيه حتى رائعة وردي ما تخجلي يا السمحه قومي استعجلي،
بعد أن يتبخر زئبق ميزان ضغطك وتتجاوزه باليمين يرمقك بنظرة فحواها (دا مالو دا)..
أو ( الزارعنا في ظلط الله دا يجي يقلعنا ..)
ياهو الحال يا أبا حسين .. عجبك عجبك ما عجبك ألحس كوعك ..
تحاياي للأسرة .
| |
|
|
|
|
|
|
|
|
|
Re: أحدث صور من شوارع العاصمة.. (Re: محمد المرتضى حامد)
|
Quote: يا مرتضى لو تسمح زور لينا المستشفيات الحكومية
وكحل عيونا بمناظرها الجميلة وخضرتها ونظافتها |
الفتنة نائمة يا ود القرشي،
لعله توارد خواطر أنني كتبت لوضاحة عن المستوصفات في ذات الوقت الذي
كنت تعد فيه مشاركتك،
موضوع المستشفيات دا بجيب لي اللوم والهوا مع صاحبك أسامه مرتضى فقد تم تعيينه
مديرا عاما لمستشفى أمدرمان ليقوم بدور العطار في مواجهة الدهر..
بعدين الناس ديل يقوموا يمسكوها لي ووقتها لن تشفع غنية (جسمي انتحل)..
لكن ليك علي ...
تراجع: ياخ المستشفيات الحكومية حاليا تضاهي مايو كلينيك..
طبعن إنت عارف الكدايس هاجرت..
الدواء مجانا ..
العنابر.. يا سلام..
المجاري كالفن كلاين،
والعيون فيها كلام،
يا حليل تابيتا..
كدي هسه خلينا في الشوارع وشوف الحركه ..
حافلة طارق جبرين ،
خذيني باليمين وتسير بالجمكسين
| |
|
|
|
|
|
|
|
|
|
Re: أحدث صور من شوارع العاصمة.. (Re: محمد المرتضى حامد)
|
من المناظر المألوفة أن تكون الدراجات النارية بلا لوحات أرقام وعلى
مرأى و( مسمع) من شرطة المرور ..
إحدى قريباتي زارتنا وهي في حالة فزع وقالت أنها تعرضت لهجوم من رجلين على دراجة
نارية حاولا خطف حقيبة يدها لكنهما فشلا ولاذا بالفرار وكان ذلك في
حوالي الساعة العاشرة صباحا وفي أحد شوارع أمدرمان الرئيسة، قلت لها
عساك التقطت رقم الدراجة (النارية) فردت بغضب ممزوج بخوف أنه لم يكن عليها رقم وأردفت
:أنا أمسك شنطتي ول أتخلع ول أقرا ، إنت قايل روحك وين؟ لوحة؟ كويس يا بيكاسو..
ربما يلاحظ العامة أن هناك دراجات نارية مركب عليها لوحة علم السودان الفي الفؤاد ترعاهو العنايه..
علم السودان ، يعني لو قائدها اعتدى عليك وهرب تمشي تفتح بلاغ ضد الألوان الأربعة.
أو ضد أنت رجائي أنت عنوان الفداء
| |
|
|
|
|
|
|
|
|
 Re: أحدث صور من شوارع العاصمة.. (Re: محمد المرتضى حامد)
|
| Quote: :أنا أمسك شنطتي ول أتخلع ول أقرا |
ذكرتني حكاية الولد ... جاء من المدرسة إبكي
أبوه سألو : مالك يا ولد..؟؟؟
الولد قال لي أبوه : الأستاذ دقاني ..
أبوه سألو : دقاك كم سوط
الولد زعلااااااان قال ليه : يا أبو أنا أبكي و لا أعِد ...؟؟
| |
|
|
|
|
|
|
|
|
|
Re: أحدث صور من شوارع العاصمة.. (Re: ABUHUSSEIN)
|
في المولد
قال لي صديق أن الساحة التي عشقناها منذ الطفولة (ميدان الخليفة) إستحالت في الليلتين
المنصرمتين إلى (واترلو) سودانية وأصبح بعض الدراويش وخصومهم كجند المارشال بلوخر..
كنا صغارا ولم نك نعرف إسم أي (طريقة) أو جماعة دينية ولجهلنا كانت السمسمية لها شأن يعلو على
السمانية وللفولية أثر يفوق التجانية وأما جوز الهند فكان ملك الصوفية غير المتوج ،
وباختصار كان الطيب سيد مكي ويوسف الفكي هم شيوخنا ونحن (الحيران) تسكرنا الألوان والحلوى ،
الآن تغيرت الأشياء إلى حد بعيد ، بعض المشاركين تناسوا جلال المناسبة وحديث الحبيب المصطفى الذي
أوجز فيه مهمته ورسالته وأنه بعث ليتمم مكارم الأخلاق.
رغم أحداث الليلتين الماضيتين المؤسفة إلا أن هناك من ظل على جماله واستغرق في التسامي الروحي رغم الغبار
الخرافي اليسد الحلق.. ولفت نظري بعض الأسماء وأناس أخلصوا المشاركة رغم اختلاط الأصوات وتضادها.
وسغربني وجود هذا العنوان في المولد إلى جوار تراجم ل(الجذور) لهيلي وحب ماركيز في زمن الكوليرا ..
إستأذنت هذا الشاب في التصوير والنشر.
| |
|
|
|
|
|
|
|
|
|
Re: أحدث صور من شوارع العاصمة.. (Re: خالد العبيد)
|
Quote: الشيخ محمد ميطي يطلع منو ؟
نورونا .. طولنا من البلد |
سلامات يا خالد،
كنت أمني النفس بمعرفة المزيد عن تلك الطرق ولكن الوقت والغبار لم يرحماني،
إستأذنت شابا خلوقا أثناء ضبطه للساوندسيستم لتصوير اللافتة والحضور فاستجاب
وكله حماس .
على أية حال لم تكن خيمتهم - على اتساعها - تضم عددا كبيرا ولكن لاتخطئهم العين،
قلت ليك الزمن لايسعف مع خشية معروفة من الخروج من المولد بدون حمص.
ما تطوِّل الغيبه عن البلد يا خالد عشان ما تطلع (كيت)..
مودتي.
| |
|
|
|
|
|
|
|
|
|
Re: أحدث صور من شوارع العاصمة.. (Re: محمد المرتضى حامد)
|
السودان هو البلد الوحيد الذي تدخله فرحا و قد تخرج منه أيضا فرحا في رياض العاشقين
قلت لي الطريقة السعدية؟ ما شاء الله يعني الواحد تاني يمكن يسخط و كدا؟
و ابناء منو؟ ما شاء الله تبارك الله،
مشيت كيف في داحس و الغبراء دي؟
شد ما يدهشني الموقف الرسمي من ما يدور!
| |
|
|
|
|
|
|
|
|
|
Re: أحدث صور من شوارع العاصمة.. (Re: محمد المرتضى حامد)
|
 إهداء خاص للأحباب :
د . أحمد عبدالفتاح محجوب النصري (طراوه)
د. محمد الفاتح إبراهيم أحمد طه (الخوجلابي)
المهندس نصرالدين عبدالحفيظ وداعة الله هجام (كوستاوي) الخرده
د . عادل التجاني علي عبدالله.
(وديار كانت قديما ديارا سنراها كما نراها قفارا
سوف تلهو بنا الحياة وتسخر فتعالوا أحبكم الآن أكثر)
نوستالجيا لمراتع الصبا بالسمسمية بين الدخول فحومل ..
| |
|
|
|
|
|
|
|
|
 Re: أحدث صور من شوارع العاصمة.. (Re: محمد المرتضى حامد)
|
قراءة وحرف و اناقة عن الخرطوم ,
بعزف ماهر مختلف واصل التالق يا غالي
______________________________________________________
ليتهم يعلمون ان عمر اللحظـه في بعـدك يا خـرطـوم سنين طـوال.
د شهـاب الفاتح ـ كوالالمبـور
| |
|
|
|
|
|
|
|
|
|
Re: أحدث صور من شوارع العاصمة.. (Re: شهاب الفاتح عثمان)
|
Quote:
واناري الما بقيت سواق
واناااااري المابقيت سواق
أترك العالي وامشي بالدقداق
ناري الليله وا ناري
|
لا حولا
ده انت كنت بتقعد وين لما العروس يرقصوها
ده انت طلعت أوف صايد
هم كانوا بقولوا
أطلع العالي وأنزل الدقداق
الشغلة بتاعة طلوع ونزول
يعني تشجيع للعريس لزوم السواقة
بس فاتت عليك حركة العالي والدقداق في الرقصة
تترك شنو وتمشي وين
| |
|
|
|
|
|
|
|
|
|
Re: أحدث صور من شوارع العاصمة.. (Re: المسافر)
|
| Quote: ده انت كنت بتقعد وين لما العروس يرقصوها |
على رصيف البراءة يا المسافر ..
صدقني لم أك أدري أنهن كن يقصدن كنتور العروس وطبوغرافيا الجسد
وتقديم خارطة طريق للعريس صائب عريقات تعينه على القيادة الراشدة،
لكن روايتك تتفق ومنطق الأشياء إذا ما استصحبنا سابقة ورا ورا تايوتا
وإشارة ال GPS سوحي وبالجمبه موحي، حينها تغدو روايتي مجرد وصف سطحي لمخالفة مرورية.- أها يا (أبوحسين) تاني قول لي قديم، تعال شوف ناس شامبليون.. حولا..
| |
|
|
|
|
|
|
|
|
|
Re: أحدث صور من شوارع العاصمة.. (Re: المسافر)
|
Quote: لا حولا
ده انت كنت بتقعد وين لما العروس يرقصوها
ده انت طلعت أوف صايد
هم كانوا بقولوا
أطلع العالي وأنزل الدقداق
الشغلة بتاعة طلوع ونزول
يعني تشجيع للعريس لزوم السواقة
بس فاتت عليك حركة العالي والدقداق في الرقصة
تترك شنو وتمشي وين |
لا حولا
انتو كلام الخمسينيات دا بتلقوا وين
والله طلعنا كلنا أوف صايد
| |
|
|
|
|
|
|
|
|
|
Re: أحدث صور من شوارع العاصمة.. (Re: المسافر)
|
بوستاتك دي بقت لينا زي جبنة حليمة
مرة لكن حلوة شديد
فعلاً كثيرة هي الأشياء التي تحتاج وقفات بشوارعنا
كل سنة وإنت طيب بمناسبة مولد الحبيب المصطفى صلى الله عليه وسلم
مؤونة عشرة أعوام من الود
| |
|
|
|
|
|
|
|
|
|
Re: أحدث صور من شوارع العاصمة.. (Re: محمد فرح)
|
| Quote: السودان هو البلد الوحيد الذي تدخله فرحا و قد تخرج منه أيضا فرحا في رياض العاشقين |
يا سعد، زرت أحد الإصدقاء الذين غسلوا أيديهم من غربة تمددت لعقود والآن يعطن يديه
في جروف مزرعة بدنقلا وكان يحكي لي بصدق يشع من قسماته كالواله أو طفل وجد أمه بعد ضياع في
الزحام ، أصبح لحياته طعما ، السودان ليس مساحة جغرافيه وحسب ، دا سوفتوير الروح يا سعد..
هسه إنت وحلان ليك كم شهر وشوف الوجيه عمر المنجي السواها ..| Quote: قلت لي الطريقة السعدية؟ ما شاء الله يعني الواحد تاني يمكن يسخط و كـدا؟ |
إي والله ، بعد دا يزورو فيك ، من هنا ورايح سنناديك ب (شيخ سعد) لنعيد للغم (شيخ) ألقه ومكانته،
وممكن تعمل ليك طريق أما نحن فنكتفي بالتيار الصدري.| Quote: مشيت كيف في داحس و الغبراء دي؟ |
يازول أخوك عاش في مناطق عانت من حروب أهلية وقتل بالمجان ، وبالمئات بقت على المولد؟
لكن البوليس كان حاضر والتفتيش لكل داخل تحسبا لأي طارئ، مافي هذار.| Quote: شد ما يدهشني الموقف الرسمي من ما يدور! |
الموقف الرسمي؟
قصدك موقف الكلاكله؟
| |
|
|
|
|
|
|
|
|
|
Re: أحدث صور من شوارع العاصمة.. (Re: شهاب الفاتح عثمان)
|
| Quote: ليتهم يعلمون ان عمر اللحظـه في بعـدك يا خـرطـوم سنين طـوال. |
د . شهاب،
سلامات يا صفوة ،
ولدنا المازدا رفع البلد لدور التمانيه،
البلد شغاله بنص فرحه،
كمشة الفول وكيس الرغيف والأسعار الوصلت حد السعار كفيلة بامتصاص أي فرح..
كلما أنبت أولادنا قناة ركب الغلاء للقناة سنانا..
رد الله غربة الجميع يا العزيز..
| |
|
|
|
|
|
|
|
|
|
Re: أحدث صور من شوارع العاصمة.. (Re: محمد المرتضى حامد)
|
عرفناك مشيت المولد
وكمان صورت دكان عمنا الطيب سيد مكي
وانا الليله حأقول ليك زي ما قال واحد من المعتمدين
السابقين لمدينة امدرمان لعمنا الطيب سيد مكي بانه يريد منهم
ان يتبرعوا بحلوى لزاد المجاهدين ليرسلها لهم بالجنوب وأضاف المعتمد ( يجب ان تكون من النوع الجيد )
وأرسل له سيارة بيكيب تم شحنها بالحلوى ولا نعرف هل وصلت الجنوب أم لا
انحن يا مرتضى لينا زمن ما أكلنا حلاوة مولد ، عليك الله البتجيبها لازم تكون من النوع الجيد
| |
|
|
|
|
|
|
|
|
|
Re: أحدث صور من شوارع العاصمة.. (Re: Ahmed al Qurashi)
|
| Quote: انحن يا مرتضى لينا زمن ما أكلنا حلاوة مولد ، عليك الله البتجيبها لازم تكون من النوع الجيد |
نستأذن أخونا مرتضى ونحي أخونا القرشي ونشارك بـ الفيها النصيب..
وفي ذكرى مولد النبيّ المصطفى محمد عليه أفضل الصلاة وأزكى التسليم، كل عام والجميع بألف خير ..
| |
|
|
|
|
|
|
|
|
|
Re: أحدث صور من شوارع العاصمة.. (Re: Kostawi)
|
Quote: حد يتذكر المولد المات فيه واحد إسمو أبو طالب
بصعقة كهربائية من العمود الطويل الفي نصف الميدان |
كوستاوي ،
مولد السنه دي سيضاهي في صعقاته الكهربائية كل الموالد..
لكن رغم كل شئ ، المكان والحدث يبعثا حالة تستعصى على الوصف،
راحت عليك يا عم،
أمشي شوف ليك حمصيــه من جيبوتلي..
| |
|
|
|
|
|
|
|
|
|
Re: أحدث صور من شوارع العاصمة.. (Re: Abdlaziz Eisa)
|
Quote: يا سلالالالالام....
صورة وواقع جميل افتقدناه لاكثر من 22 سنة لم نصادف فيها احتفالات المولد بالسودان
|
الطيب عبد الرحيم سلامات،
شكرا للصوره التي تماثل آلة الزمن في مفعولها،
زي ما قال عبد العزيز عيسى الواحد سنين طويله غاب عن المولد
وبيت الخليفة ، الإحتفال بالمولد لم يتوقف عند الحلوى في يفاعتنا
ف(الزفة) وموسيقى البوليس والجوله مع الكبار من الأهل كانت برنامجا
لايقل أثرا عن العيدين،
لم نشهد عراكا ولم يجد العنف أوتادا يربط إليها راحلته ولم يتدخل البوليس
إلا في حالات النشل البسيطة.. مداخل ساحة المولد الآن كمداخل القيادة العامة.
حفظ الله بلادنا من شرور أنفسنا..
| |
|
|
|
|
|
|
|
|
|
Re: أحدث صور من شوارع العاصمة.. (Re: محمد المرتضى حامد)
|
الأخ محمد المرتضى حامد
أشاركك تحية من حييت وخاصة الأخ الكريم ، إبن الجيران ، وزميل الدراسة ، ومرتع الصبا ، وكل الأيام الخوالي الحلوة ، الدكتور محمد الفاتح إبراهيم أحمد طه . من على البعد له التحية الطيبة والأمنيات الغاليات وفي إنتظار المراسلة وتنفيذ الوعد بالزيارة في دولة الإمارات العرية المتحدة.
مع أشواقي واحترامي.
| |
|
|
|
|
|
|
|
|
|
Re: أحدث صور من شوارع العاصمة.. (Re: طارق جبريل)
|
برضو تقول لي ما قديم؟
الناس البيقروا هنا يا محمد بيعتبرو (آيسكريم لولي) حاجة قديمة ..... تجيب ليهم سيرة (الداندرمة)؟
ياخ بي مناسبة المولد ... ما صورت لينا (عروسة المولد) ... أو الحصان داك، الكنا بنستكتر ناكلو .. ونخليهو في رف (البترينة)، لحدى ما يتحول لي ذرات سكر تدخل بيوت النمل؟
سلام يا زول.
| |
|
|
|
|
|
|
|
|
|
Re: أحدث صور من شوارع العاصمة.. (Re: محمد المرتضى حامد)
|
الكمامة \دي لو لونه اخضر مش كان بكون احلى
المولد البقى فيهو بومبان
حاجة عجيبة
الف تحية ليك ورسلولينا حلاوة المولد بي حصانه وعروسته يعني بي كلامك ده كلفنا الجماعة فوق طاقتهم
محبتي ومغروض فيك
ما بترد على التلفونات اول ما تصل تلفنا
محبتي
| |
|
|
|
|
|
|
|
|
|
Re: أحدث صور من شوارع العاصمة.. (Re: محمد سنى دفع الله)
|
Quote: وانا الليله حأقول ليك زي ما قال واحد من المعتمدين
السابقين لمدينة امدرمان لعمنا الطيب سيد مكي بانه يريد منهم
ان يتبرعوا بحلوى لزاد المجاهدين ليرسلها لهم بالجنوب وأضاف المعتمد ( يجب ان تكون من النوع الجيد )
وأرسل له سيارة بيكيب تم شحنها بالحلوى ولا نعرف هل وصلت الجنوب أم لا |
ودالقرشي،
إن كنت تعني حلوى السمسميه والحمصية فالإجابة معروفة،
أما إذا كنت تعني حلوى نيفاشا فقد وصلت ،
عمك الطيب سيد مكي بخير لكنه لا يتواجد في فرع المولد ،
عندي زيارة للهادي نصرالدين ..
| |
|
|
|
|
|
|
|
|
|
Re: أحدث صور من شوارع العاصمة.. (Re: ود الخليفه)
|
Quote: واناري الما بقيت سواق
واناااااري المابقيت سواق
أترك العالي وامشي بالدقداق
ناري الليله وا ناري
|
الحبيب مولانا الأستاذ محمد المرتضى
ذكرتني باصات الشجرة والكلاكلة زمان
يقع موقف باصات الشجرة والكلاكلة في السوق العربي ، وجرت العادة أن يتسابق السائقون لحجز نمرة في الموقف حيث تشحن الباصات حسب الدور ..وفي أثناء السباق يتعمد بعض السائقين الخروج من الظلط في ساعات الذروة و يسوقون في (الدقداق) وكنا نصل الخرطوم مغبرين وحالنا (شلش) وساخطين على سائقي الباصات.رسام الكاريكتير الموهوب الراحل (عزالدين) عمل كاريكتير ظريف جدا لسائق باص ماشي بالدقداق يغني وا ناري الما بقيت سواق أسيب الظلط وامشي بالدقداق.
تحياتي ومحبتي
| |
|
|
|
|
|
|
|
|
|
Re: أحدث صور من شوارع العاصمة.. (Re: Gaafar Ismail)
|
  ياسر طيفور سلام نش،
هذه اللافتات ليست في شارع بلور بتورنتو أو ماركاتو أديس وإنما من الجريف ، صور ساره نورو القيافه
دخلت لافتات الخرطوم، يا حليلنا فيها الزايله، دخلت محلا يبيع الملابس الأثيوبية وقلت أشتري منهم قميص
دمور كتجديد للبيعة وتعبيرا عن الريده المستدامه.. وحاليا أفكر في صالة حفل موريتاني إرضاءا لمحبي الناها..
تجد مصنع السيراميك الإيطالي والحلويات السوريه والإستيك اللبناني والوجبات التركيه بطعم مهند ونور،
معمل الفحص المصري وعيادة الربيع العربي ،
باختصار ، العاصمه قريبات دي حايكون واليها بان كي مون..
| |
|
|
|
|
|
|
|
|
|
Re: أحدث صور من شوارع العاصمة.. (Re: محمد المرتضى حامد)
|
مرتضى
قمت على جنك؟
تعرف كتاب النساء أكثر أهل النار ده عُرض على واحدة صاحبتنا في سوق الخرطوم
قالت للعارض أنا وقت اصلي داخلة النار القارية ليها شنو؟
رد عليها ما ياها مساختكن دي البتدخلكن النار
كبري الحرية أخيراً سموه هو والشارع رسمياً بالحرية، تتذكر لما المتحري كان يقول وقع الحادث بشارع السيد علي الميرغني ونتلفت وفي الأخر عرفنا إنه شارع الحرية إسمه الرسمى شارع السيد علي. أهاالسيد علي رحلوه بحري وجابوا لينا مبارك زروق في شرع القصر جنوب.
أها إنتو يا ناس أمدرمان ما بتمشوا الخرطوم. لعلكم ماسكين في كلام الخليفة عبد الله لي هسة؟
| |
|
|
|
|
|
|
|
|
|
Re: أحدث صور من شوارع العاصمة.. (Re: Asma Abdel Halim)
|
عزيزنا عمران ،
الجيران القاصدم في كلامك أريتنا بي حالم، شوارعم كويسه وعرباتم فارهة ،
لكن المحيرني دور سلطات البلدية في هذا البلد،
معظم الجزارات ومحلات الخضار والمحلات التي تبيع المأكولات الجاهزة وغير الجاهزة كمحلات التِشاشة *
في الأسواق تعرض بضاعتها في الهوا ء والعراء وفرندات مكشوفة (لزوم الشفافيه وكدا ) في ظروف جويه
غير مواتيه فتختلط الهبوب * والكتاحة وما تحمله من أوزار وأقذار بكل ما يكون مآله أمعا ء العباد،
وتفريعا على هذا تروج تجارة الطب ومعامل الفحص وتتسع مساحات المقابر التي لم يعد فيها شاغر،
وهذا مجال آخر سنتناوله بالصور والنقه إن قيض لنا الله أياما في هذه المساحة ، فأمر الصحة في السودان
عموما يحتاج الكثير من العرض الجاد المدعوم بالإحصاءات وآراء أهل الشأن.
قلت لأحد الإخوة إن تناول هذا اللحم المعروض في الصورة والذي يبقى طوال اليوم مهبطا للذباب من
طراز أباتشي ومروحيات بيل أغوستا الخضراء اللامعة حتما سيفضي إلى كل أمراض المناطق الحاره
وفواجع السافنا الفقيرة، فتبسَّم قائلا: ياخ نحن اللحمه كان ما ضربتها الكتاحه ومقاتلات ال F 16 الشايفا
دي زاتا ما بتبقى طاعمه ولك في قندهار آية وأضاف سيادته قائلا :
هو زاتو اليوم الناكل فيهو شئ نضيف ومعقم بتجينا لوَّايه..
 ديفينيشنز لناس الفيس بوك: * محلات التشاشه تباع فيها البقوليات والبلح والبهارات وما إليها وعلى رأسها (الشمار ). * أعجبني عرض فيديو من قنوات تلفزة أمريكية مختلفة تتحدث عن الهبوب Haboob تشير إلى دخول المصطلح بذات النطق إلى قواميس الأرصاد والنشرات الجويه ، لكن لا أظنهم يعرفون معنى عبارة (زول هبوب) ساكت.
| |
|
|
|
|
|
|
|
|
|
Re: أحدث صور من شوارع العاصمة.. (Re: محمد المرتضى حامد)
|
Quote: آآآآآي بالله يا حبيب ركز لي على الجمكسين والجوعير
والبلد دي اصلنا قنعنا منها |
طارق جبرين كنت حايم وين لأنصاص الليالي؟
والله يا طارق - وما طالبني حليفه - بمجرد ما عيني وقعت على الحافله مكتوب عليها (بريدك) إلتقطت
الصوره مع غناعة بأن مالكها واحد من ناسنا وربما إنت زاتو،
عارف يا جمكسين، رغم المعاناة الخرافية وعذاب الهدهد المغربل لكن هذا الشعب يحتفظ بمخزون من الريده
يبلغ ولهطاشر فولت لكل قلب لدرجة أقترح معها تغيير إسم البلد لعشقستان وعاصمتها متيَّم أباد.
الشباب يحرص على الظهور بشكل لافت بتكلفة (قدِّر ظروفك) فالكل يريد أن يصبح جوهر صدر المحافل،
الماعندو حق الأماكن المكلفة بتاعت ناس التويتر يجد ضالته في الحدائق العامة كحديقة حبيبي مفلس
وشارع النيل وشارع جديد يمر بما يسمى بالفلل الرئاسية، يغنون على النجيله جلسنا مع كباية شاي
ونظرة حانه من الحبيبة في حنانك مفعولها يضاهي البف باف في طرد البعوض، ومع النسيم العليل زاد وجدي..
تجد الواحد منهم يفترش النجيله صابرا على قرص النمل أبوريش يهرش الكرعين في هدوء مريب متمتما :
مشاكلي بسيطه بالريده بتحل ..
قت ليك السودان ما بِنفات ..
| |
|
|
|
|
|
|
|
|
|
Re: أحدث صور من شوارع العاصمة.. (Re: محمد المرتضى حامد)
|
Quote: ياخ بي مناسبة المولد ... ما صورت لينا (عروسة المولد) ... أو الحصان داك، الكنا بنستكتر ناكلو ..
ونخليهو في رف (البترينة)، لحدى ما يتحول لي ذرات سكر تدخل بيوت النمل؟ |
معقوله بس يا محمد،
ياخ العروس دي مره إنكسرت قرب البيت الساعه 11 بالليل مما اضطر أسرة للعودة
للمولد مرة أخرى لتعويضها ب (أختها)..
بالله برضو كنت - مع النمل المُحاذِر اليحدث بعضه بعضا - من آكلي الأحصنة؟  أبو الريش يا قديم
| |
|
|
|
|
|
|
|
|
 Re: أحدث صور من شوارع العاصمة.. (Re: ناظم ابراهيم)
|
كتاب النساء أكثر أهل النار ده عُرض على واحدة صاحبتنا في سوق الخرطوم
قالت للعارض أنا وقت اصلي داخلة النار القارية ليها شنو؟
رد عليها ما ياها مساختكن دي البتدخلكن النار
......................................
يضحك نهارك و باقي يومك يا اسماء :))))))))))))
| |
|
|
|
|
|
|
|
|
|
Re: أحدث صور من شوارع العاصمة.. (Re: mamkouna)
|
Quote: كتاب النساء أكثر أهل النار ده عُرض على واحدة صاحبتنا في سوق الخرطوم
قالت للعارض أنا وقت اصلي داخلة النار القارية ليها شنو؟
رد عليها ما ياها مساختكن دي البتدخلكن النار |
حـــلـــــوة شــديـد
| |
|
|
|
|
|
|
|
|
|
Re: أحدث صور من شوارع العاصمة.. (Re: سيف النصر محي الدين)
|
| Quote: المولد البقى فيهو بومبان |
أستاذي محمد سني،
كل مولد وانت طيب،
الجميع يخشى من نتائج الإحتفال في هذه الليلة (ليلة القفله)،
البومبان دا جزء لا يتجزأ من تاريخنا الحديث وله مكانة سامية في القلب والرئة والعيون،
تمشي المولد فرحان تنشد طلع البدر علينا من ثنيات الوداع،
تجي مارق تغني يا دمعي الاتشتت وغلب اللقاط..
سأتصل بك غدا لكن حلاوه مولد ليك مافي ..
كفايه الحصل ..
ممكن نجيب (عروس الزين)....
| |
|
|
|
|
|
|
|
|
|
|
Re: أحدث صور من شوارع العاصمة.. (Re: ود الخليفه)
|
| Quote: نهلنا من نفس دروبكم ب الاهلية المتوسطة امدرمان |
يا ودالخليفة أمدرمان الأهلية الثانوية العامة دي أجمل مؤسسة تعليمية في المجموعة الشمسية،
للأسف الشديد تم تشويه ذلك الصرح الأكاديمي الفذ وعِوضا عن صيانتها بشكل منتظم يليق بها وبمكانتها
التاريخية تم هدم جزء كبير من مبانيها بعد أن أصبح سورها التاريخي مرتعا للإعلانات القبيحة..
هو شنو الما باظ ياخ..
حاجه تحرق القلب..
| |
|
|
|
|
|
|
|
|
|
Re: أحدث صور من شوارع العاصمة.. (Re: محمد المرتضى حامد)
|
حبسني حابس الشبكة الثقيلة في الايام الفائتة عن هذا المولد الاسفيري
و شايف ناس البيت هادي دخلتهم من القفلة، كان من المفترض اكون هناك لولا بعض واجبات و زيارات مؤجلة،
مالناش في الطيب نصيب، قد نلحق قفلة مولد السجانة غدا، يا مولانا الشافك حتلت ما كضب.
رغم فداحة الصور و ما تحكيه من الاحوال ، الا أن وضع العاصمة المتمدد و الفاير يحتاج لكاميرة فيديو حتى
تكتمل الفكرة عن ما وصلت اليه العاصمة، خاصة بالقرب من الاستاد و قلب السوق العربي حيث تصيح مكبرات الصوت
ب(الرقم المُميّز) للشركة الفلانية و مسوح الشفاء الذي ان مسحته على ركبتك يشيل الالم طوالي و ان مسحته على ظهرك يشيل فوق الدبر ما بميل
الزحمة يا مولانا ضاهت لاغوس و قاهرة المعز، و وزارة التخطيط العمراني موظفيها في مكاتبهم فكهين.
بالمناسبة الذباب الحالي دا من فصيلة البيبي ذباب بدون طيار، بقيت محظوظ و ما شفت الميجات و الاف16 و البي52 الحقيقية رأي العين
الواحدة تسلم عليك في كتفك و تشاركك و تبقوا زي اعز اتنين حبايب،
انا و الضبان في قربك بقينا اكتر من قرايب :)
و لا يفارقك حتى يسلم الوردية لاخيه البعوض و عن هذا حدث ولا حرج، قبل كم يوم نهارا جهارا جات واحدة زانة جنب اضاني اليمين
كادت تسبب لي الصمم لولا ستر الله و لطفه بالمواد الشمعية و مرونة الطبلة، رغم كل ذلك البلد ما بتفات، يكون من شنو يا ربي؟
| |
|
|
|
|
|
|
|
|
|
Re: أحدث صور من شوارع العاصمة.. (Re: saadeldin abdelrahman)
|
الشوارع......
التي تفضي الي القلوب.... وتأتي منها ما تأتي.....
الشوارع تلاقيك بالكتل أبوك ! أو كما قال الوالد عليه رحمة الله، يا ود المرتضي لامن الزول يتجول في شوارع الدنيا أم قدود دي بيشوف العجب العجاب ولامن يكون عندو رادار لاقط للشوارد وكل الموارد أهو بيعمل جنس عمايلك دي، وكثيرا ما يتجول بيرنارد شو في شوارع سوهو اللندنية حتي الساعات الصغيرة من الصباح، ويجي يكتب في البلاوي بتاعتو، ولامن يسألو تكون إجابتو كلمة واحده ..... الشوارع!
لافتات لامعات، عربات حمالة كرب، نساء في( شكل منقة) سخرية ما يكتب في العربات ذات التوقف المتكرر، رجال، قطط كلاب رئحة العرق، ورائحة الاجساد النيئة، ورائحة حيطان الجالوص، كل هذه الاشياء تتمطي في سطور خضراء جميلة ... الشوارع هي ما نراه ولكنها كل الحياة ،
( عندما نمر بشارع ونجده أسود داكن نعرف أنّه بدأ التهجد بضجيج الموت) نعرف أنه قد سُكن بالاسمنت والعمارات وأماكن بيع الأشياء الغريبات علينا .. نعرف أنه مات!
الشواع هي تلك الضحكات الرنانات لأطفال، وهي إبتسامات لنساء فارقن الحزن، وهي نداء الباعة المتجولين، وهي صوت عم محمود بيوصف لي زول وين يلقي جامع مرفعين الفقرا! وهي دندنات (أشول) وهو يرسم في شارع الأربعين، الشوارع يا سيدي هي التي تلتقيك في تسفارك وتلقي عليك تحية الصباح ثم تحملك بقلب حنين نحو طعمية وفول حاجة (السره).
الشوارع أطفال الأورنيش، الشوارع هي حكايات ود البنا، الشوارع الشوارع هي التي تحملها داخلك قبل أن تحملك هي داخلها ، الشوارع هي هذه الكتابة الساخرة الرطبه بأحاسيسك الخضراء.....
الشوارع هي الحياة في كامل بهائها ولك الحمد يا الله أنها أعطتنا من يكتب عنها، بها، لها .....
شكراً كتير للشوارع.... شكراً كتير ليك.....
| |
|
|
|
|
|
|
|
|
|
Re: أحدث صور من شوارع العاصمة.. (Re: ibrahim kojan)
|
| Quote: رغم كل ذلك البلد ما بتفات، يكون من شنو يا ربي؟ |
الصــرة الصــرة ( الحبل السـري ) يا ســعد الدين و تشـدنا اليها
أها ممكن بعـد العمر دا نمشـي نفتش مكانها و نحفرها و نرميها البحـر
ســلام سـيد البوســت , بس ما تكون دفعة محمد الفاتح
| |
|
|
|
|
|
|
|
|
|
Re: أحدث صور من شوارع العاصمة.. (Re: محمد المرتضى حامد)
|
أستاذتي الماجدة د. أسماء ،
بمناسبة المحاكم ،
في واحدة من أطرف مقابلات التلفزيون السوداني حكى أستاذنا الراحل عبدالعزيز شدو المحامي أنه
في بدايات عمله بالمحاماة ترافع عن مجموعة تسببوا في قتل (حرامي) هاجم منزلهم وهم (عزَّابه)
فأمسكوا به و (دقَّوهو دق الطار) مما أفضى إلى موته ، يعني "إتلحس" بلغة سغافة اللِنغاز ، وانتهت
المحاكمة إلى براءتهم وعندما سألوه عن أتعابه عرض مبلغا كبيرا بحسابات تلك الأيام فما كان
من أحدهم إلا وأن قال له ما معناه :
يعني يا المحامي .. كان أخير لينا الحرامي ..
تمشي لطبيب يمسح كيانك بفاتوره ويرسلك لمعمل يفرِّج فيك خلق الله وينتهي بك إلى روشتة تهشِّم العظام
لدى الصيدلية ، فتردد سرا : كان أخير لينا المرض ..
لأول مره أعرف معنى مقولة أبوصلاح : الأمرضني وما طباني.
-
تنويه : كل ما ورد بين قوسين من عندياتي
| |
|
|
|
|
|
|
|
|
|
Re: أحدث صور من شوارع العاصمة.. (Re: saadeldin abdelrahman)
|
Quote: انا و الضبان في قربك بقينا اكتر من قرايب :)
و لا يفارقك حتى يسلم الوردية لاخيه البعوض |
زمان عبدالقادر سالم غنى (النوم جافاني قسمتو لجيراني) هسه الجيران
زاتم ما جاييهم نوم بسبب البعوض السوخوي ، المؤذن عوضا عن الصلاة خير من النوم
ممكن يسهى ويقول ( يا ناس طول ليلي حاس)..
الضبان والبعوض مشكله حقيقية في نهار وليل العاصمة يا سعد..
| |
|
|
|
|
|
|
|
|
|
Re: أحدث صور من شوارع العاصمة.. (Re: محمد المرتضى حامد)
|
Quote: كانت الدنيا عزيزه ولذيذه
كما اشعر هاشم صديق |
هسه يا ناظم لو مشينا في كلامك الصاح دا المسغفين يقولوا علينا ديل مصابين بكرونيك نوستالجيا، أذكر جيدا أنني والكبار من الأهل كنا نزور أحد خؤولتي وهو طريح المستشفى فيما كان يعرف ب (القسم الجنوبي ) وكنا نمر بالشارع الموازي له من ناحية الشمال ونبقى مع الصغار في الحديقة الجنوبية الجميلة التي يطل عليها (القسم الجنوبي أو South Block) وكانت المستشفى والشارع في مستوى نظافة وأناقة وترتيب واضح، لا أريد التحدث عن المستشفى الآن لأني لم أدخله منذ سنوات لكنني مررت بالشارع ( شارع الدكاترة) وهو يحتشد بالمرضى والشحادين والمرافقين والملتاعين والنشالين ( النشل خشوم بيوت يا ناظم) وتتزاحم فيه عربات تفتك بالسمع قيل أنها عربات إسعاف وركشات وبكاسي ماركة العذاب علي قاسي وأناس يفترشون الأرض ونساء ثكلى لفقدهم عزيز ورجال في ذهول من عمليات شفط مابجيوبهم بمكانس كهربائية حديثة FRCS وأخرى MRCP وبقالات وصيدليات ومعامل وغبار ينافس الباعة الجائلين ويغازل السندوتشات البارده والمشروبات الحاره و.. لا أراكم الله مكروها في عزيز لديكم، باختصار يا ناظم ، في ذلك الشارع يمكنك أن تجد كل شئ ، تجربة مريرة وكابوس حقيقي يصيب كل من يعبر مثلث برمودا، كل هذا يجري في النهار وحين يرخي الليل سدوله ( سدوله دي كيف معاك؟) ستجد أنك بالفعل في بحر الظلمات أو أن قلبك يمخر في (خليج من أحزان) .. منظر يستدعي بيكاسو آخر ليرسم Guernica الفشل المستدام..  شـــارع الدكاتره
| |
|
|
|
|
|
|
|
|
|
Re: أحدث صور من شوارع العاصمة.. (Re: محمد المرتضى حامد)
|
Quote: Quote: كتاب النساء أكثر أهل النار ده عُرض على واحدة صاحبتنا في سوق الخرطوم
قالت للعارض أنا وقت اصلي داخلة النار القارية ليها شنو؟
رد عليها ما ياها مساختكن دي البتدخلكن النار |
......................................
يضحك نهارك و باقي يومك يا اسماء |
العزيزة الممكونه،
ورد بحديث البخاري « يَكْفُرْنَ الْعَشِيرَ ، وَ يَكْفُرْنَ الإِحْسَانَ ،
لَوْ أَحْسَنْتَ إِلَى إِحْدَاهُنَّ الدَّهْرَ كُلَّهُ ، ثُمَّ رَأَتْ مِنْكَ شَيْئاً قَالَتْ مَا رَأَيْتُ مِنْكَ خَيْراً قَط"
لست من أهل الفتيا ، لكن إحتياطي كدا بطِّلوا النقه..
| |
|
|
|
|
|
|
|
|
|
Re: أحدث صور من شوارع العاصمة.. (Re: محمد المرتضى حامد)
|
| Quote: يو ميد ماي زي مية داي كده. |
عزيزنا د. سيف النصر،
علمت بقرارك الإنتقال جغرافيا،
ربنا يهوِّن عليك القواسي ويعدل خطوتك شقيش ما تقبِّل،
معليش، حمَّلنا عليكم شويه في هذا البوست لكن أظنك تتفق معي
أن بعض الأطباء في السودان إتخذوها تجارة ،
حكى لي من أثق في روايته أن بعض الأطباء وأصحاب المعامل لهم مندوبين
في المستشفيات الحكومية يشيرون على المرضى بأن المعمل
الفلاني والطبيب العلاني له خاتم سليمان أو عصا موسى
وأن تشخيصه يلقف ما يأفك بقية الزملاء، فيجري الملهوف
إلى الطبيب أو المعمل السحري والكوميشن حاضر للمندوب per head ..
كان هنالك سلوك متعارف عليه بين الأطباء ألا يأخذ طبيب أتعابا
عن معالجة أحد أهل زملائه لكن الأمر تغير الآن إلا من رحم ربي..
لا تجويد ولا متابعة ولا .. سوى القلة والعلاج للموسرين فقط.
قال مرافقي إنه أحدث المشافي الخاصة .. رويال كير.. لا أعرف تكلفة العلاج فيه لكن أتمنى أن يكون خصص أسرة مجانية للمحتاجين فما زال في الوطن من الرأسماليين من يتمتع بقلب دفئ رحيم.. أتمنى ..
| |
|
|
|
|
|
|
|
|
|
Re: أحدث صور من شوارع العاصمة.. (Re: محمد المرتضى حامد)
|
قضينا جل يومنا امس في البازار المذكور اعلاه أو ما يعرف بشارع المستشفى، بين فضيل
و مختبراته و الدنيوات التي بالشارع، خذوا دنياكم هذه فدنيواتنا فارشة على الرصيف و العربات!
رفقة احدى امهاتنا التي لم نجد حتى الآن تفسيرا طبيا لما تعانيه من تورم في الساقين مع صعوبة في المشي حتى باتت مقتنعة تماما و غيرها بأن هذا الامر
ليس مرض دكاترة! فالفحوصات اغلبها نظيفة و نحن بانتظار نتيجة الرنين المغنطيسي لاقتنع أنا زاتي معاهم!
بين رسوم الطبيب و فواتير المختبرات و الفحص يطير البنكنوت بلون الشمس طعم الشمس قرشك طاير طاير!
قديما كان يقال بأن الجعلي يقضي يومو خنق، حاليا السوداني يقضي يومه في هذا الشارع خنق و دفر و عضعضة
، مضينا بعدها لزيارة في السلاح الطبي الذي كان على العكس منظما و حدائقه تفتح النفس رغم اهمال البعض برميهم باقات العصائر على العشب
ثم زيارة في عمق امدر إو قل اطرافها،
تذكرتك و أنا على الكبري حين استنشقت ذلك الهواء النيلي فامتلأ صدري منه (ما تقول لي بتكون رافع القزاز؟)
و نحن عبور الى ام در فحاولت الاتصال دون جدوى!
حفظم الله في حلكم و الترحال و عافانا و اياكم في اجسادكم و اهليكم.
| |
|
|
|
|
|
|
|
|
|
Re: أحدث صور من شوارع العاصمة.. (Re: saadeldin abdelrahman)
|
لاغوس؟
يا سعد لاغوس شنو والقاهرة شنو البيشبهونا!!
نحن في تطور مستمر..
في العام المنصرم التقطت هذه الصورة ومكتوب عليها (أكبر درع تذكاري من حيث الحجم وعدد الجهات
المقدمة له وهو مقدم للسيد رئيس الجمهورية عمر حسن احمد البشير تضامنا مع سيادته ضد قرارات
ما يسمى بمحكمة الجنايات الدولية) وكنت أرى أن ثمة عيوب فنية في الدرع وفي زيارتي الأخيرة
تم تلافي تلك العيوب والحمد لله فتم قطع البورض ليصبح على هيئة درع وتم إعادة كتابة إسم الرئيس
بمادة معدنية ليصبح أكثر تألقا ولمعانا)..
من محاسن وفوائد الدرع أنه غطى جزئيا على قبة مجاورة لمعمل استاك مشققه ومبهدله إلى حين صيانتها
ومن فوائده أيضاأنه شغل مساحة معتبرة كان يستخدمها ناس معمل استاك كموقف سيارات..
فليخرس المعارضون الذين لايرون إلا النصف الفارغ من الكوب ومن هذا المنبر أقول لهم : إتلهو..
2011
2012
| |
|
|
|
|
|
|
|
|
|
Re: أحدث صور من شوارع العاصمة.. (Re: Hisham Ibrahim)
|
| Quote: و مسوح الشفاء الذي ان مسحته على ركبتك يشيل الالم طوالي و ان مسحته على ظهرك يشيل فوق الدبر ما بميل |
بالله يا أبوالسعود قبل ما تسافر تصور لينا مسوح الركب دا لأنو الواحد عندو قرحه وكدا،
تمسح ركبتك وتلحس كوعك، برضو بالله تجيب لينا مرهم (دغمسه) فهو مجرب مثنى وثلاث ورباع،
ياخ السنه الفاتت فتحت بوست بالصوره التحت دي وسألت عن الجهة التي ترخص أو (ترعى) محلات
العلاج خارج المستشفيات وما هي المعايير والشهادات و(الأجهزة) المطلوبة وما إذا كان الترخيص
يصدر من وزير الصحة أو وزير الأوقاف أو الزراعة والشؤون البيطرية أو السياحه أو هيئة علماء
أفغانستان أو الذكر والذاكرين أو ست الودع ، تخيل يا سعد زول رد علي مافي..
أي زول يجي يقرا ويمشي بس.
كنت مغروض في جهة الترخيص يا صاح،
بدور ارتاح واخلي الليل يكون صباح وأعوِّض بيو شبابي الراح،
أتعالج وبعد النغاهة أفتح لي عيادة بشهادة الغانون معاها زهور وتركيب عطور.
واستلم المجال..
الجوي
خط هيثرو المسافر لندن خلاني براي..
عموما نحن الخُرُز بنملاهو وبنربط ضيفنا ونحن الفوق رقاب الجن مجرب سيفنا
| |
|
|
|
|
|
|
|
|
|
Re: أحدث صور من شوارع العاصمة.. (Re: الطيب شيقوق)
|
مستر كوجان،
هاو آر يو دوين؟
على مر الأزمان كانت الشوارع محرضا على الأدب وقلته معا ففيها كل النشاط البشري باستثناء
قائمة قصيرة من الأنشطة التي تتعارض مع (جو) الأماكن العامة ، والشوارع مرآة حقيقية للمجتمع
وهي برنامج مفضل لكثير من أهل الأدب وأهل قلة الأدب برضو فكثير من عيون الأدب والفن جاءت من
أفكار منبعها الرئيس الشارع و بتاعين الشوارع.
الصورة البانورامية التي رسمتها بكلماتك يا إبراهيم تكفيني عن أية إضافة وأية لوحة أو صورة
فوتوغرافية ، ولمن لايعرف كوجان فهو رسام أديب يعمل كجراح قلب محترف في بلاد الإنجليز وتساورني
شكوك حقيقية أنه له قرين من الجن نشأ في منطقة محددة في الربع الخالي ولاداع للمزيد فالظروف
ما معروفة سيما وأن ، أبواب القلوب أصبحت مشرعة على أمراض عدة أحد أسبابها أنظمة تفتقر لأدنى
درجات الحس وذات مرجعية في الأمية الجمالية كما يحلو للرائع الصلحي أن يقول ، أنظمة بينها
وبين الذوق ما بين الذرة والمجرة ، قلوب موجوعة بذكرى ماض جميل وحاضر كالح مسهد ، قلوب كانت
ترتوي بحديث عن أباريق بِتن في إطراق وحاضر يلوب بين حرامي القلوب وحرامي الجيوب عساه يفتينا
بحكم الوضوء على طلاء الأظافر.كان
الآن
لا تسالوني أين القصر وأين الشباب وأين الأطفال
| |
|
|
|
|
|
|
|
|
|
Re: أحدث صور من شوارع العاصمة.. (Re: محمد المرتضى حامد)
|
ما بقدر اقول ما بقدر اصرح عن القصر الذى اضحى اثرا بعد عين،
لولا اشجاره و عشبه، فقد اصبت في كافتريته بعضا من الفسيخ و السلطة و التقيت فيه الاستاذ شاكر
الذي يدير مدرسة للجيتار في طابقه الرابع و كانت حفلة الادارة مدورة في طابقهم الارضي،
الجماعة ديل بيني و بينهم عيش و ملح و طرب و لؤي شمت ( مين لؤي شمت ده؟ )
---------
بالله الشاف المذكور اعلاه ما يكلمه ؛)
| |
|
|
|
|
|
|
|
|
|
Re: أحدث صور من شوارع العاصمة.. (Re: saadeldin abdelrahman)
|
Quote: زرتنا الزفة وليلة القفلة وما بينهما من روائع
واههٍ يا زمناً مضى |
يا حاتم فاتك المولد،
كلو موجود،
لفتت نظري خيمة الختمية التي تجاور خيمة الأنصار الحيطه بالحيطه منزوع عنهما
الدسم السياسي لكن أثرو ظاهر نزولا عند أغنية أنا والأنصار بقينا أكتر من قرايب
ما بنغيب عن بعض أبدن .. أبدن أبدن .. زي أعز اتنين حبايب ..
أنا والأنصار،
لكن بيني بينك خيمة الختميه خمسة نجوم، زينه وعاج باني
تجملها صورة ضخمة في الخلف ل (سيدي )، عاش أبوهاشم.
لم أجد خيمة للقصر ولا المنشية ، ما عارف ليه فرزوا عيشتم ،
حقو الواحد يكلم ليهم ناس حق.
يا ود الزبير الحلوى غالية في ميدان الخليفة ، تلاتين ألف جنيه للكيلو،
في آخر مولد شهدته التلاتين ألف كانت بتجيب بيت في الرياض ، لكن الكيلو في
المنطقة الصناعية بعشرين ، فرق كبير ، وممكن في المصنع بأقل بس بدون
شهادة منشأ ، أطعم واحده بيسموها ( سمسم علف) و (فوليه علف) سكرها قليل
ويغلب عيها عنصر سمسم القضارف..
يا سلام على المولد ياخ..
| |
|
|
|
|
|
|
|
|
|
Re: أحدث صور من شوارع العاصمة.. (Re: محمد المرتضى حامد)
|
| Quote: انا دستوري نازل في الخرطوم تلاتة |
نحن دستورنا نزل الخور يا فيصل،،
هو أصلن في دستور؟
بالله يا فيصل خليل (بوستي) دا ما فيهو سياسه ، هسه الجاب الدستور شنو ..
يعني لازم تحرف إتجاه الحوار؟
بحروفك الناعسات كاحلاته دي حا توصلني لبيت الخياته.. بالله شوفو الزول القديم دا،
إنت من زمن عشا الفنانين !!.
الحفلات بقت في صالات ، تدفع للفنان 8 مليون لثمانية أغاني لأنو بيجي الساعه 9 وتبدأ الفرقة
توزن الكمنجات ثم بتاع الطرمبه برضو يجرب طرمبتو و (يوزنا) مع بتاع الساكس يشوفا بتجيب
كم رطل وتكون الساعه 9 ونص جات ويلا بُنقُز ودرمز ودُنَب ون قو ثم استراحه قصيره لزوم السفَّه وبعدها الفاصل
التاني 4 أغاني 90% منها صولو ساكس لزوم الحت والجبجبه ورقصة الشمبانزي وحداشر إلا عشره يعاين
المغني للساعه ويعمل إشاره براسو لبتاع الطبل وبراااااحه يسلم المايك لواحد من الفرقه وينسحب
في هدوء وعندما تصل عقارب ساعة البلدية إلى 11 يكون هو في الطريق للبيت أو أوفرنايت ، وصباح اليوم التالي
وبعد أن يفيق العريس من الغيبوبة ، يعرف ويحس آثار الحادث وهاك يا مكمدات . .
الغنيه يا فيصل بمليون جنيه وهذا يساوي مرتب إختصاصي أنف وأذن وحنجره بوزارة الصحة ، أجر الفنانين
هنا أغلى من أجر كريستينا أغويليرا.. إنت ما سمعت بشوشو سمكره دافعت عن أجرها العالي وقالت :
فيها شنو يعني ، هسه بيونسي دقيقتا بالشي الفلاني.. وقالوا بيدفعوا ليها بالدونار مش بالجنيه النازل
وناصل يوماتي زي بناطلين بتاعين الفيسبوك.. فرقها مني شنو؟ وهي زاتا ما بتعرف تكشف
ولا عندها سماعه من أصلو...
عشا؟
| |
|
|
|
|
|
|
|
|
|
Re: أحدث صور من شوارع العاصمة.. (Re: محمد المرتضى حامد)
|
Quote: قال مرافقي إنه أحدث المشافي الخاصة .. رويال كير..
لا أعرف تكلفة العلاج فيه لكن أتمنى أن يكون خصص أسرة مجانية
للمحتاجين فما زال في الوطن من الرأسماليين من يتمتع بقلب دفئ رحيم..
أتمنى .. |
:) :) :) وكتار تاني
ونحن معك نتمنى قبل ما يجودوا على خلق الله التعابي المحتاجين باسرة مجانية وعلاج، أنهم يسيبوا الاستيلاء على مجهودات غيرهم من المحسنين- لما كان الاحسان خال من المآرب .. وتحويلها إلى ممتلكات خاصة ووسائل لملأ جيوبهم بالكسب الساهل. عالم تستولى ما تختشيش..
آل دفيء رحيم آل
| |
|
|
|
|
|
|
|
|
|
Re: أحدث صور من شوارع العاصمة.. (Re: rummana)
|
تحياتي
وللأمانة انت صاحب فكرة ولقطات في التنك
يعني انت عارف بتصور في شنو واستعجابك كان
من شنو ؟؟؟ طريقة ولو عفوية لكنها فنانة .
بس اوووع تكون فاتت عليك الامجاد وروشتتها في
علاج كافة الامراش ابدأ من القولون وانت ماشي
لاعلى سقف علاج (شفت البلد مشت وين ؟؟؟ يعني
عربية امجاد بجوار كلية الطب جامعة الخرطوم
مطروح روشتة فيها علاج كافة الامراض ؟؟؟؟؟؟؟؟
................................................................حجر.
| |
|
|
|
|
|
|
|
|
|
Re: أحدث صور من شوارع العاصمة.. (Re: rummana)
|
Quote: أنا أسبقكم بدفعة ، فقد كان الأخوان الأعزاء ، الدكاترة أحمد طراوة ، ومحمد الفاتح إبراهيم
خلفنا بسنة أي الدفعة الورانا على طول ، وأذكر أن الدكتور محمد الفاتح إبراهيم كان في
النهر ( ج ) وكان حارس مرمى النهر (ج) الذي لا يقهر والذي انتمي إليه ، وكان له جمهور
رهيب يشجعه بحماس ، وكان رائعاً بالفعل. |
أخي ميرغني الأمين..
النهر (ج) في الأهلية كنا نسميه النهر الخالد..
د. محمد الفاتح إبراهيم ود. أحمد طراوه من رفاق الدرب بالأهلية الثانوية العامة ، و (فِرَد) بلغة شباب
سولتير وكانا إلى جانب إنهم شطار لكن برضو حرفا في الكوره ومحمد الفاتح كان حارس مرمى المدرسة ولكن
تم تحويله إلى جناح أيسر في العالي ثم الجامعة ولعب بفريق ودنوباوي وكذا طراوه كان من أحرف اللاعبين
وكثيرا ما التقيا ضد بعض في دار الرياضه أمدرمان ودنوباوي ضد ابروف ( التطعيم ضد الكوليرا) ، الزول
الوحيد اللي كان عاطل عن أي موهبة وحتى تاريخه هو شخصي، لكن طالما الناس ديل هسه من معارفك فالمعلومات
اللي ممكن يكون قالوها ليك عني غلط على بياض وخليها سر لأني في المنبر دا متقمص شخصية تانية وكنت عايز
أكتب ليك في مسنجر بكري الزي حلاوه قطن (الفي الخشيم تنماص) بس خايف ما أعبِّر كويس وبرضو خايف تقوم
في أقرب زعله مني تشيل حسي بيهو في العام وتبقى (دقسة) العمر كما تقول قيادات السودان في خطاباتها..
...
| |
|
|
|
|
|
|
|
|
|
Re: أحدث صور من شوارع العاصمة.. (Re: محمد المرتضى حامد)
|
Quote: رفقة احدى امهاتنا التي لم نجد حتى الآن تفسيرا طبيا لما تعانيه من تورم في الساقين مع صعوبة في المشي حتى
باتت مقتنعة تماما و غيرها بأن هذا الامر ليس مرض دكاترة! فالفحوصات اغلبها نظيفة |
إنت جاد يا سعد؟
كيفن يعني زول في السودان فحوصاتو نظيفة؟
الفحوصاتم نظيفة يتعدو على أصابع اليد وديل زاتم عندهم نقرس من كتر الضبايح ،
لاقاك زول عمل X Ray وطلع خاطرو ما مكسور؟
إنت زاتك الودَّاك هناك شنو؟
الحاجه دي كان تدوها محريب مع شوية حرجل والشفاء من عند الله.. هل سمعت بالمرابطين؟
ورد في تاريخ حوض النيل أن جذورهم وأصولهم تعود إلى شارع الدكاتره..قِدَّام البكاسي
| |
|
|
|
|
|
|
|
|
|
Re: أحدث صور من شوارع العاصمة.. (Re: محمد المرتضى حامد)
|
مولانا الحبيب محمد المرتضى حامد...
تحية طيبة ،، وبعــد ،،
فرغنا للتو من قراءة هذا السحر..الآن الساعة الثالثة وإحدى عشر دقيقة صباح الخميس الموافق 9 فبراير 2012..
كلمة كلمة...صورة صورة...مشهد مشهد..وهاك يا سرحان في النص بين السطور والكلمات والصور والمشاهد..
يا أخي ما اااااااااا أروعك ...
منتهى اللطافة والله..
أها عاد الله يحيب النوم بعد كدي...
النايمينلها شنو زاتو..
..
.
| |
|
|
|
|
|
|
|
|
|
Re: أحدث صور من شوارع العاصمة.. (Re: Mahmoud Mustafa Mahmoud)
|
Quote: تمشي لطبيب يمسح كيانك بفاتوره ويرسلك لمعمل يفرِّج فيك خلق الله وينتهي بك إلى روشتة تهشِّم العظام
لدى الصيدلية ، فتردد سرا : كان أخير لينا المرض .. |
Quote: منذ سنوات لكنني مررت بالشارع ( شارع الدكاترة) وهو يحتشد بالمرضى والشحادين والمرافقين
والملتاعين والنشالين ( النشل خشوم بيوت يا ناظم) وتتزاحم فيه عربات تفتك بالسمع قيل أنها
عربات إسعاف وركشات وبكاسي ماركة العذاب علي قاسي وأناس يفترشون الأرض ونساء ثكلى لفقدهم عزيز
ورجال في ذهول من عمليات شفط مابجيوبهم بمكانس كهربائية حديثة FRCS وأخرى MRCP وبقالات
وصيدليات ومعامل وغبار ينافس الباعة الجائلين ويغازل السندوتشات البارده والمشروبات الحاره و..
لا أراكم الله مكروها في عزيز لديكم، |
Quote: حكى لي من أثق في روايته أن بعض الأطباء وأصحاب المعامل لهم مندوبين
في المستشفيات الحكومية يشيرون على المرضى بأن المعمل
الفلاني والطبيب العلاني له خاتم سليمان أو عصا موسى
وأن تشخيصه يلقف ما يأفك بقية الزملاء، فيجري الملهوف
إلى الطبيب أو المعمل السحري والكوميشن حاضر للمندوب per head ..
كان هنالك سلوك متعارف عليه بين الأطباء ألا يأخذ طبيب أتعابا
عن معالجة أحد أهل زملائه لكن الأمر تغير الآن إلا من رحم ربي..
لا تجويد ولا متابعة ولا .. سوى القلة والعلاج للموسرين فقط. |
| |
|
|
|
|
|
|
|
|
|
Re: أحدث صور من شوارع العاصمة.. (Re: Mahmoud Mustafa Mahmoud)
|
Quote: السلام عليكم
رحم الله الشيخ محمد علي ادريس الشهير بالشيخ ميطي
تقع خلوة وزاوية الشيخ ميطي بحي الركابية بامدرمان في نفس الشارع الذي اسكن به ويفصلني عنهم زقاقان من شوارع امدرمان الحنينة
والخلوة ذكرها الطيب محمد الطيب في كتاب المسيد ص 282 (طبعة دار عزة 2005 ) في حديثه عن الخلاوي في امدرمان زمن المهدية
وبالرجوع لاحفاده عن سبب التسمية ذكروا روايتين
اولاهما واقواهما ان والده اصطحبه وهو صغير لخلوة في الدامر ليتعلم
وكان الصغير يرتدي عراقي فقط دون سروال كحال الفقراء في ذلك الوقت
فقال له الشيخ ممازحا ابيه ( جايبو لي ميطي ؟) فالتقط اطفال الخلوة هذا اللقب والتصق به
اما الرواية الثانية فعندما استوى عوده واسس خلوته في امدرمان كان عندما يقابل مسكينا او سائلا يجود عليه بجلبابه والعراقي
ويعود للمنزل بالسروال فقط
ولعل في ذلك استدعاء للقب الذي اكتسبه صغيرا
انحسر نشاط الخلوة في الفترة الاخيره حيث اصبحت سكنى احفادة ولا تقام يها الا الصلوات لكبار السن في الحي دون صلاة الجمعة
وبعض المناسبات والاذكار من بعض عارفي فضله
تقع حاليا الخلوة في حي العمدة جنوب وهو حي اقتطع من حي الركابية الكبير بسبب التقسيمات الادارية التي لا تراعي تاريخا
وهو حي صغير نسبيا ويحتوي على مدرسة الركابية الابتدائية وبعض بيوت السادة الركابية اهل الجلد والراس
ولا يفصل بين الحيين الا شارع لا يتسع لعربتين |
شكرا للأخ مرتضى على البوست الممتع.
وشكراً للأخ الأصغر ود الخليفة الذي أغناني عن تعريف من هو الشيخ ميطي بنبذة كاملة عن الخلوة وأهلها الأكارم فهم جيراننا أيضاً.
ولولا خوفي من تحويل البوست للحديث عن هذه الخلوة تحديداً لسردت ذكريات ممتعة وشقية لي ولأصدقاء الطفولة في زاوية الأحمدية وزاوية شيخ ميطي.
| |
|
|
|
|
|
|
|
|
|
Re: أحدث صور من شوارع العاصمة.. (Re: سامى عبد الوهاب مكى)
|
| Quote: ولولا خوفي من تحويل البوست للحديث عن هذه الخلوة تحديداً لسردت ذكريات ممتعة وشقية لي ولأصدقاء الطفولة في زاوية الأحمدية وزاوية شيخ ميطي. |
أخي سامي،
سلامات يا عزيز،
ولم لا..
الطرق الصوفية - عبر الإحتفال بمولد المصطفى - بعض هذا
البوست ولا غضاضة في أن تكتب عن ذكرياتك في زاية الأحمدية
أو غيرها..
بالمناسبه ، لم أسموها (زاية) مع إنها دار كبيرة كان من
روادها بعض زملاء الدراسة وكنا نمر بها في بعض الأمسيات.
مودتي.
| |
|
|
|
|
|
|
|
|
|
Re: أحدث صور من شوارع العاصمة.. (Re: محمد المرتضى حامد)
|
يا أخي يا محمد المرتضى
كل هذا الجمال وتقول لي عاطل عن الموهبة
ياخي مافيش حد قرأ في الأهلية أم درمان عاطل عن الموهبة
وبالمناسبة دي بيني وبينك أنا كنت فنان المدرسة وكنا ثنائي أنا وعماد الدين محمد الحسن
وبعدانتقال عماد أعتقد إلى كسلا شكلنا ثنايئ أنا وأخي عزالدين عبد الماجد وهو طبعاً الآن فنان كبير وزميل غربة هنا في دبي ، وكنا فناني المدرسة الأوائل. ولما يستضيفونا في الإذاعة المدرسية في الفسحة تلاقي كل المدرسة مرابطة جنب المكرفونات
أما موهبة الدكاترة أحمد طراوة ومحمد الفاتح فقد تفتحت في منافسات رمضان في الأهلية والتي كانت تقام في ميدان الباسكت أمام مسرح المدرسة بعد انتهاء اليوم الدراسي وحتى قرب موعد الأفطار ( كانت روعة ) ظهرت فيها مواهب مقدرة ، وطراوة كان فنان لاعب حريف بمعنى الكلمة، يا لها من أيام
ستجدني متابع لكتاباتك وفي انتظارها على أحر من الجمر
دمت في نعيم ورفاه
| |
|
|
|
|
|
|
|
|
|
Re: أحدث صور من شوارع العاصمة.. (Re: محمد المرتضى حامد)
|
سلامات يا رمانه،
هذا الشارع الممتد لبضعة كيلومترات أصبح المتنفس الرئيس لكثير من سكان العاصمة
وما جاورها، تلتقي فيه مساءا كل قوى الشعب العامل والعاطل والهامل، تجد فيه كافة
الفئات العمرية والطبقتين الإجتماعيتين باعتبار أن الطبقات في السودان - كما قال
الكاشف – أصبحت مقسمه نص في الأرض ونص في السما، والنص الأخير أقل من 1% ،
يجلسون على المقاعد المغبره ويتلقون خدمات الشاي والقهوه من ستات الشاي اللواتي
تقف لهن المحلية بالمرصاد .
العاصمة لا توجد فيها حدائق عامة تقوم بدور الرئات ، حتى الأماكن التي كانت مخصصة
كحدائق أو ميادين عامة تم تقسيمها بين عشية وضحاها على ذوي الحظوة ، تخطيط المدن
عندنا يستند إلى معايير الولاء والترضيات واللطش وليس على الأسس العلمية المعروفة،
لذا عندما تنظر إلى الخرطوم من الجو نهارا أول ما يلفت نظرك غياب الحدائق العامة
والمساحات الخضراء والأشجار، سترى فقط (أشياء) مغبرة فلا تعرف أنك ستهبط في عاصمتك أم في ثمود..
من المحزن أنه كان بالعاصمة مراكز للشباب وملاعب لمختلف النشاطات الرياضية والمسرحية
والفنية والأدبية وقد تم تجفيف كل تلك الأماكن بعناية ومن ثم عقمت الأرض السودانية أن
ترفد سوح التنافس العالمي في كل المجالات بعد أن كنا أبطالا في عدد من منابر التنافس
الدوليه لذا لن نحلم بساره جادالله أخرى ووليم أندريه ومنوت ومحمد عبدالحي وحبيب اصطمبوليه
ومحيى الدين فارس وإعيسر وسامي عزالدين والطيب صالح والبلوستارز والصلحي وسبت دودو وسانتو
وعماليق غيرهم لايتسع المجال لذكرهم..
ماذا دهانا؟
الشعب كله حوصر في شارع يحتسي القهوة والشاي ليحكي عن النافع والمانافع ويبث الشكوى إلى الله
ويا (نيل) أبقالي شاهد على نار أي حاجه في أي حته.
شارع يصيبك نهارا بالوحشة وليلا بالدهشة
| |
|
|
|
|
|
|
|
|
|
Re: أحدث صور من شوارع العاصمة.. (Re: محمد المرتضى حامد)
|
| Quote: نتمنى قبل ما يجودوا على خلق الله التعابي المحتاجين باسرة مجانية وعلاج، أنهم يسيبوا الاستيلاء على مجهودات غيرهم من المحسنين- لما كان الاحسان خال من المآرب .. وتحويلها إلى ممتلكات خاصة ووسائل لملأ جيوبهم بالكسب الساهل. عالم تستولى ما تختشيش.. |
يبدو أن ماوراء الأكمة ما وراءها والكلام فيهو كلام..
لا أذكر من القائل إن وراء كل ثروة كبيرة جريمة كبيرة وربما لا أتفق معه..
تحية ثانية يا رمانة..
| |
|
|
|
|
|
|
|
|
|
Re: أحدث صور من شوارع العاصمة.. (Re: محمد المرتضى حامد)
|
Quote: بس اوووع تكون فاتت عليك الامجاد وروشتتها في
علاج كافة الامراش ابدأ من القولون وانت ماشي
لاعلى سقف علاج (شفت البلد مشت وين ؟؟؟ يعني
عربية امجاد بجوار كلية الطب جامعة الخرطوم
مطروح روشتة فيها علاج كافة الامراض ؟؟؟؟؟؟؟؟ |
أستاذي حجر،
بالطبع لم تغب عني الصورة وهي لاتنحصر أمام كلية الطب بل تتكرر في
عدة مناطق وميادين ، كيف لا والإعلانات عن أماكن تخصصت في بيع الوهم
للبشر لاتكاد تخطئها عين في وسائط الإعلام المقروءة والمسموعة والمرئية..
يا عزيز إذا كان بعض الأطباء (الكبار) يتبادلون الشتائم على الصحف
ويتهمون بعضهم بتصفية الحسابات وإذا كان صيدلي وطني يتهم إدارة حكومية
بالتلاعب بالدواء ويثبت صحة دعواه فلم لا يلجأ العامة والمحبَطين للدجالين
وباعة السراب بحثا عن الدواء بعد هزيمة فريق الأمل 22/0 من فريق الدجالين؟
صورة مماثلة كان عرضها الأخ أبوبكر عبدالقادر العاقب في بوست لي بعنوانصور من أحد الأحياء (الراقية) في العاصمة ..أعيد نشرها هنا - بعد إذنه - وتحتها تعليقه. Quote: هذه العربة توجد أمثالها كثيرات في قلب الخرطوم وهي تحتوي على أعشاب تعالج البهق
والجارديا والبلهارسيا والسل والضعف الجنسي وسرعة القذف والدوسنتاريا وآلام الظهر
والعقم وتأخر الطمث وآلام المفاصل وسلس البول والسرطان والسكري وإلتهاب الكبد
الفيروسي والملاريا وعرق النسا وتصلب العضلات والكثير غيرها من الأمراض ،،، كما
هو مكتوب على الأوراق الملصقة على جوانبها ..
هل هنالك ما هو محزن أكثر من هذا |
زمان ما كان ببيعوا غير الجردقه والحرجل وربطتين تلاته عرق محبه
هسه ببيعوا إضافة إلى ما أورده العاقب مراهم لإطالة الشعر وتنعيم الشعور
وتبييض البشرة وتفقيس الكلى وبعدها جري على الأردن ومصر لمن استطاع وأحمد شرفي
والبكري لمن خانه جيبه.
| |
|
|
|
|
|
|
|
محمد المرتضى حامد
وضاحة
ABUHUSSEIN
Ahmed al Qurashi
خالد العبيد
saadeldin abdelrahman
شهاب الفاتح عثمان
المسافر
صلاح الدين نزلاوى
محمد فرح
الطيب عبد الرحيم خلف الله
Abdlaziz Eisa
Kostawi
Yassir Tayfour
Mirghani Ali AlAmin
علوبه
طارق جبريل
عمران حسن صالح
محمد أبوالعزائم أبوالريش
Rihab Khalifa
محمد سنى دفع الله
ود الخليفه
Gaafar Ismail
Asma Abdel Halim
الطيب شيقوق
ناظم ابراهيم
mamkouna
سيف النصر محي الدين
ibrahim kojan
Hatim Elzubair
فيصل محمد خليل
Hisham Ibrahim
rummana
الرفاعي عبدالعاطي حجر
Mahmoud Mustafa Mahmoud
محمد حيدر المشرف
فيس بوك
تويتر
انستقرام
يوتيوب
بنتيريست