يوميات الثورة السودانية – الجزء الثانى

Quote: إلتقت (حريات) بأسرة الشهيد عصام محمد بخيت بمنزلهم بالحارة (76) أم درمان الثورة . وكان عصام طالبا بالتدريب المهنى ، استهدفته الاجهزة الامنية برصاصتين مباشرتين على رأسه فاستشهد يوم 24 سبتمبر ، وهو الابن البكر لوالدته الشابة رجاء موسى والتى رغم مصابها إستقبلتنا بكرم لم تطاله يد الإنقاذ المجرمة التى طالت جسد ابنها الفتى. جلست شقيقته الصغيرة وشقيقه بعيون مشدوهة يستمعون للحديث عن اخيهم الكبير الذى لايصدقون انه غادرهم للأبد ، فقد كان رغم صغر سنه يقوم مقام الوالد المغترب الذى طاردته ظروف السودان فهاجر طلباً للرزق. قالت اخلاص جدة الشهيد عصام انه كان (ونسة البيت يهظر مع أخوانه وما ممكن يخش البيت وما تحس بيهو كان بيحب اخته واخوه كتير وبيساعدهم ويونسهم ويونسنا كلنا). وقالت السيدة رجاء موسى والدة الشهيد انه كان ممتلئا بالخير وحب الناس (كنت بعرف أصحابو من هدومو كان كريم بتقاسم الهدوم بتاعتو مع أصحابو) ، واضافت انه كان من يعد الماء لفريق كرة القدم وانه من أوائل من يشمر لحفر المقابر وإعداد صيوانات الأفراح ، وقالت والحسرة تملأها عن يوم استشهاده (جانى أخوهو عبد الناصر قال لى يا امى عصام ضربوهو كانت الساعة واحدة ونص ظهر جريت انا وأخواتى لى تقاطع 74 محل انضرب ، ضربوهو رصاصتين فى الرأس والشباب المعاهو ركبوا ركشة شايلنوا نزلوهم ناس الامن وشالوهو فى عربيتهم ، عصام ما إندفن الا اليوم التانى المغرب لاننا كنا بنفتش فى كل المستشفيات وناس الأمن فى أى مستشفى كانوا مابيخلونا نتكلم مع الاطباء وكنا قلقانين وما متخيلين انه قتلوهو. مشينا زى المجانيين لمستشفى النو كان الدم والجرحى فى كل حته شباب كتار خالص مضروبين أختى لقت طريقة تسأل دكتور فعرض عليها صورة لعصام وقال ليها فعلا الشاب ده اتقتل. لمن عرفنا انه مات انهرنا وبقينا واقعين فى الواطة ناس الأمن فجأة ظهروا ودخلونا فى مكتب جوه كده ولمن سألنا من الجثمان قالوا أمشوا مشرحة أمدرمان مشينا هناك ما لقيناهو ، ناس الأمن قالوا لينا مافى جثة هنا وخلاص تانى ما تفتشو ، تانى قالوا لينا أمشوا قسم المخ والأعصاب فى الخرطوم تانى أمالنا ارتفعت انه ممكن يكون حى والصورة الشفناها غلط …إجرام إجرام ما تتصورهو ولو ما عندنا قريبنا اتصل بطبيب فى مشرحة الخرطوم ما كنا حنلقاهو، لقيناهو ملفوف بى ملاية مرمى فى الواطة ورجلينه عارية ورفضوا يسلمونا له. دخلنا فى شجار معهم وتعارك معهم أعمامه وأهله ورجعوا بيهو قريب المغرب وهدومهم مقطعة وممزقة من الضرب مع ناس الأمن …. شيعه الالاف من منطقتنا والأهل وحاول أصدقاؤه ان يقفوا محل اغتياله فتم تفريقهم بالغاز وهددوهم عديل انهم حيلحقوهم عصام لو واصلوا وقفتهم وأيام العزاء كلها كانوا مطوقين المنطقة واى تجمهر بيجوا يفضوهو بالقوة). واضافت رجاء بدموع غزيرة (قبل وفاته باسبوع أصر على والده ان يرسل لنا قروش الخروف لنشترى خروف كبير)، لم يعلم عصام ولا أسرته ان الأضحية ستكون مالحة بدمه ودم الشهداء الأبطال أمثاله . ورغم مرارة الوجع ودعتنا والدة الشهيد برسالة لكل الامهات الا يمنعوا اولادهم من الخروج ضد الظلم وقالت: (… اتمنى انو اى ام عندها ولد ما تحرموا انو ينزل الشارع واقول رأيو بصراحة ، لانو فى ظلم وقهر واضطهاد … الناس لازم تطالب بحقوقها وتقول لا للظلم … والناس لازم تقيف وقفة واحدة وتقول لا للظلم …).