|
|
 الزوجة الثانية ... هل فعلا هي خطافة رجالة ؟؟؟؟ ألحقني يا بكري !!!
|
أخي الحبيب بكري !!!
معزتي ...
قبل أن أكتب هذا الموضوع أرجو أن توفر لي حصانة دبلوماسية ودروع واقية من الرصاص إضافة إلى أربعة
بودي قارد من أعضاء المنبر الذين يتمتعون بلياقة عالية وكمال أجسام وهمو كثر !!!
إتصلت بي السيدة أم سعود وهي إماراتية ذكية وسيدة أعمال ناجحة تطلب مني إجراء حوار معهابصفتهاأول
إماراتية شابة تمارس مهنة الخاطبة وأول إماراتية تفتح مكتب تقديم خدمات زواج أو توفيق راسين في
الحلال وقد نجحت أم سعود بعدهذا الحوار نجاحا كبيرا مما دفع الكثيرات إلى فتح مكاتب مماثلة وقبل
أن أذهب إليها دار بيني وبينها الحوار التالي :
* يا أم سعود يا بعد عمري أنا بشكرك كتير لاختيارك لي من دون الباقين لمقابلتك ولكن عندنا مراسلين
ومرسلات في الإمارات الشمالية وهم صحفيون أكفاء ويستطيعون القيام بهذه المهمة على أكمل وجه !!!
تجيب : لا أنا أبغيك إنت بالذات تجين الشارقة وتسوين حوار معي !!!
*( يا دي الحوسة ساعتين ماشي وساعتين جاي ) طيب يا بعد قلبي هل تعرفيني عشان تصري كل هذا الإصرار؟
تجيب : أيوة أعرفك دايما تكتبين مواضيع وايد زينة عن الزواج والطلاق والعنوسة عشان كدي إخترتك ليش
تلعوزيني وأنا أحبك يبا(عبارة تستخدم في الخليج تعني بأبي أنت ) قبل ما أشوفك !!!
* ( أأأأخ ضربت على وتر حساس ,, عرفت نقطة ضعفي !! آآآه منك ياأم سعود) حاضرين ومتى تبين أجيكي؟
تجيب شو رايك باكر ولا عقب باكر ؟
* خلاص باكر خير البر عاجله !!
أخدت المشوار العلقة لأم سعود بعد أن طلبت سيارة من المؤسسة لأني لا احب القيادة في الهاي وي إلا إذا
كنت برفقة شخص أحبه نتجاذب أطراف الحديث فيقصر المشوار ولكن معي المصور فماذا سأقول له ؟؟
وصلنا لمكتب أم سعود بعد دوخة ووجدناها في إنتظارنا ياي مكتب كشخة زي مابقولو ناس الخليج كله حاجة
واوا!!! الأثاث ,,, السكرتيرات جمال لا ليه أول ولا آخر ,,, الملفات وضعت بعناية وقد كتب على ظهرها
( طلبات مواطنين عزاب) ( طلبات مواطنين متزوجين) ( طلبات وافدين عزاب ) طلبات وافدين متزوجين) (طلبات كبار المسئولين وكبار الشخصيات) ( طلبات غير المسلمين ) أخدت قعدتي مع أم سعود التي أثبتت
لي مشروعية عملها بالوثائق ( تصريح من البلدية ) ( تصريح من غرفة التجارة) ( تصريح من مجلس سيدات الأعمال ) كما أخبرتني أن الطلبات تحاط بسرية تامة وأن مخبريها صادقون وأمينون يأتونها بمعلومات
دقيقة عن العرايس والعرسان الذين يضعون على طلباتهم صور جميلة ويعدون الطرف الآخر بأحلام وردية .
أكثر ما لفت إنتباهي أن أم سعود قالت أنها إختارت لشقيقها الذي يبلغمن العمر 27 عاما أربع زوجات رائعات شيد لهن عمارة كله واحدة طابق وعايشين في سلام ووئام كما اختارت لزوج أختها زوجة رائعة أدخلت على حياتهم نوعا من السعادة والفرح لأنها إنسانة لطيفة جدا فقلت لها و متى ستزوجين زوجك؟؟ ضحكت وقالت قريبا عندما يتشجع ويطلب مني ذلك سأختارها بمواصفاتي وليس مواصفاته لأنني أنا التي ستعيش معها أغلب الوقت ( طبعا زواج مثنى وثلاث ورباع عادي في الخليج وليس هناك مشكلة مش زيناالواحدة لو سمعت بالغلط زوجها الكانت راميه في الكوشة عايز يتزوج أعلنت الحرب العالمية التالتة وهاك يا أمثال أنا زي الفريك ما أحبش شريك ,,, ومن غير مخدته راحت محبته ,, ويا أنا وياهي وفي الغالب بيقول ليهاهي وتقوم تمشي تشرب من البحر) يا جماعة الخير أنا بطرح الموضوع دة مش عايزة أحرض الرجال على العرس مرة أخرى أبدا والله قصدي شريف وليس د. ياسر الشريف لأنه الرجل إنسان كبير وواعي يجب أن لا نستخف بعقله لهذه الدرجة كأنه طفل مجرد تحريضه يقوم باتخاذ قرار قد لا يحمد عقباه إلا إذا كان مرمي في الكوشة وعايز يتنفض ويقوم عشان يكون مرمي جوةالقلب وجوة العين ودة من حقو طبعا( في نسوان كتار الليلة لو شافوني حيضربوني بالبراطيش ) لكن ياأخواتي العزيزات وبدون إنفعال أرجو أن لاتأخذكم العزة بالإثم مثلا إذا كان هناك زوج يعاني الأمرين من واحدة شعنونة أو حوامة أو رمرامة أو سواطة ولخباتة أو راميهو في الكوشة أو جاهلة واستحالت العشرة هل نحكم عليه بالسجن المؤبد أو الإعدام طالما ليس لديه اي نية لتطليق زوجته أم أولاده لكنه في الوقت نفسه يريد أن يعيش ما تبقى من عمره مع إنسانة فاهمة تسعده وتسعد زوجته الثانية وأولاده بعلاقة أسرية حميمة مثلما
كانت تفعل أمهاتنا وحبوباتنا ؟؟؟ أرجو أن لا نجيب على هذا السؤال بفيض من العواطف ونقول الكلام
المعهود ( الأولاد ذنبهم شنو؟؟ ودة زول ما عنده عشرة!!! والخاينة خانتنا تاكل في صحانتناالخ من الكلام اللي لا يودي ولا يجيب ) يجب أن نناقش هذا الموضوع بشي من المنطق الرزين الخالي من العواطف والإنفعالات المؤقتة لأنني بصراحة متضامنة هذه الأيام مع صديق عزيز تزوج للمرة الثانية لأسباب مقنعة
ولكن قامت الدنيا ولم تقعد !!!! وروني رايكم بصراحة أنا في إنتظاركم والله يسعدك يا بكري !!
|
|
 
|
|
|
|
|
|
|
 Re: الزوجة الثانية ... هل فعلا هي خطافة رجالة ؟؟؟؟ ألحقني يا بكري !!! (Re: عواطف ادريس اسماعيل)
|
كانت تفعل أمهاتنا وحبوباتنا ؟؟؟ أرجو أن لا نجيب على هذا السؤال بفيض من العواطف ونقول الكلام
المعهود ( الأولاد ذنبهم شنو؟؟ ودة زول ما عنده عشرة!!! والخاينة خانتنا تاكل في صحانتناالخ من الكلام اللي لا يودي ولا يجيب ) يجب أن نناقش هذا الموضوع بشي من المنطق الرزين الخالي من العواطف والإنفعالات المؤقتة لأنني بصراحة متضامنة هذه الأيام مع صديق عزيز تزوج للمرة الثانية لأسباب مقنعة
ولكن قامت الدنيا ولم تقعد !!!! وروني رايكم بصراحة أنا في إنتظاركم والله يسعدك يا بكري !!
dear awatif
i read your beautiful well articulated article twice
you are really a gifted writer
i declare you officially the QUEEN OF EHIS BOARD
but i do not agree with married to more than one at a time
marriage to me means to give the other partner 100%
amd all the time during marriage
if you fail to give 100%
then there is no harm in a peaceful divorce
and try again
i hope you understand my point of view
thank you the Queen of this borard
dr mustafa
| |
|
|
|
|
|
|
|
|
 Re: الزوجة الثانية ... هل فعلا هي خطافة رجالة ؟؟؟؟ ألحقني يا بكري !!! (Re: Mustafa Mahmoud)
|
أخي الحبيب د. مصطفى !!!
معزتي الصادقة ...
إنت صاحي بدري كدة ليه يا بعد قلبي دي الساعة عندكم افتكر تسعة صباحا مش كدة ؟؟؟ عموما يا سيد الكل أحترم وجهة نظرك وأقدرها ولكن هل يوجد هذه الأيام ذاك الرجل الذي يمنح زوجته كل عواطفه ومشاعره و وقته و بنسبة 100% ؟؟؟ يا دكتور هؤلاء هم آخر الرجال المحترمين وأتمنى أن يزداد عددهم لكي تعيش بنات حواء في تبات ونبات وتخلف صبيان وبنات ,,, شكرا يا ود محمود يا فصل العقود على كرمك
المعهود.
| |
|
|
|
|
|
|
|
|
 Re: الزوجة الثانية ... هل فعلا هي خطافة رجالة ؟؟؟؟ ألحقني يا بكري !!! (Re: lana mahdi)
|
لنوية الحبيبة !!!
معزتي يا بت يا جميلة,,,
والله تعجبني أفكارك المرتبة رغم قلة تجربتك في الحياة ربنا يهني أخونا الحبيب بعقلك الكبير ,,,
لنا !!! أنا برضو مشتاقة ليك كتير والله ,,,, وحشتني ضحكتك الحلوة وشقاوتك اللطيفة ..
| |
|
|
|
|
|
|
|
|
|
Re: الزوجة الثانية ... هل فعلا هي خطافة رجالة ؟؟؟؟ ألحقني يا بكري !!! (Re: عواطف ادريس اسماعيل)
|
عبد المنعم اخوى,
يا اخ متعة شنو ياخ ,انت ماشفت عواطف كتبت شنو...
| Quote: لكن ياأخواتي العزيزات وبدون إنفعال أرجو أن لاتأخذكم العزة بالإثم مثلا إذا كان هناك زوج يعاني الأمرين من واحدة شعنونة أو حوامة أو رمرامة أو سواطة ولخباتة أو راميهو في الكوشة أو جاهلة واستحالت العشرة هل نحكم عليه بالسجن المؤبد أو الإعدام طالما ليس لديه اي نية لتطليق زوجته أم أولاده لكنه في الوقت نفسه يريد أن يعيش ما تبقى من عمره مع إنسانة فاهمة تسعده وتسعد زوجته الثانية وأولاده بعلاقة أسرية حميمة مثلما كانت تفعل أمهاتنا وحبوباتنا ؟؟؟ |
خليك معانا فى الخط ياخى....دينا شكلها خلت ليك البيت forever
| |
|
|
|
|
|
|
|
|
 Re: الزوجة الثانية ... هل فعلا هي خطافة رجالة ؟؟؟؟ ألحقني يا بكري !!! (Re: عواطف ادريس اسماعيل)
|
عواطف يا بت الذين آمنوا..
شايف إسمي جوة البوست كأنك عارفة أني بجي هنا!! وفعلا جيت..
من ناحية الكتابة والسلاسة ما عندنا كلام تب.. ومن ناحية الموضوع فهو "في السلك" تماما كما يقول ناس الزمن دا..
لكن من ناحية التعاطف مع مسألة التعدد فكلا وألف كلا، ولا تحتاجين لحماية مني لأنني في النهاية لا أفرض شيئا وأعرف أن الواقع ماشي ماشي ماشي وبيمد كمان، بالرغم من الكثيرين الذين يمدون "ألسنتهم".
تلفزيون السودان في برنامج يقدمه الدكتور إسماعيل الحاج موسى كان يناقش قضية الزواج العرفي والزواج السري في الفترة الأخيرة وشاء الله أن حضرت جزء من آخر حلقة .. واتضح منها أن الذين يعددون الزوجات في السودان غالبا ما يخفون ذلك على الزوجة الأولى أو لا يعلنونه إلا بعد أن يتم الزواج.. ولكنك تقولين أن الواقع في الخليج شيء آخر، بمعرفة الزوجة وقد تكون هي الخاطبة كمان:
| Quote: أكثر ما لفت إنتباهي أن أم سعود قالت أنها إختارت لشقيقها الذي يبلغمن العمر 27 عاما أربع زوجات رائعات شيد لهن عمارة كله واحدة طابق وعايشين في سلام ووئام كما اختارت لزوج أختها زوجة رائعة أدخلت على حياتهم نوعا من السعادة والفرح لأنها إنسانة لطيفة جدا فقلت لها و متى ستزوجين زوجك؟؟ ضحكت وقالت قريبا عندما يتشجع ويطلب مني ذلك سأختارها بمواصفاتي وليس مواصفاته لأنني أنا التي ستعيش معها أغلب الوقت |
| Quote: طبعا زواج مثنى وثلاث ورباع عادي في الخليج |
وكلامك الأخير:
| Quote: وروني رايكم بصراحة أنا في إنتظاركم |
وطبعا ظاهر أنو قصدك شريف.. وناس الخليج ديل قولي ليهم "الله يدينا خيركم ويكفينا شركم"..
أما رأيي فهو "لا حول ولا قوة إلا بالله".. بالله في ناس زي ديل؟؟
طب ليه؟؟ أرجو منك أن تقومي بدراسة لماذا هذه الظاهرة؟؟ هل الذين يتزوجون ويعددون هم فقط الأثرياء؟؟ أم أن كل أهل الإمارات أثرياء؟؟ وما هي نسبة الشباب الغير متزوجين هناك وما هي الأسباب؟؟
وما هي نسبة زواج "المسيار" في الإمارات؟؟ وهل هناك زيجات سرية بمعنى أنها غير معروفة بالنسبة للزوجة الأولى؟؟ هذه الخاطبة مستودع يتيح لك الدراسة ما دام الزولة بتحبك شديد ومؤكد سوف تثق فيك خاصة أن الدراسة لا تحتاج إلى الأسماء بقدر ما تحتاج إلى الحالات والأرقام..
قولك:
| Quote: نناقش هذا الموضوع بشي من المنطق الرزين الخالي من العواطف والإنفعالات المؤقتة لأنني بصراحة متضامنة هذه الأيام مع صديق عزيز تزوج للمرة الثانية لأسباب مقنعة |
كما قلت فإن الشرع الإسلامي المطبق حاليا والمقنن يبيح للزوج أن يعدد على زوجته.. وتضامنك مع الصديق الذي تزوج للمرة الثانية يعطي الإنطباع بأن الحالة تستحق التضامن.. فهل يمكنك أن تسردي الحالة حتى يكون الحكم على بينة؟؟
وشكرا على البوست المتفرد..
ياسر
| |
|
|
|
|
|
|
|
|
 Re: الزوجة الثانية ... هل فعلا هي خطافة رجالة ؟؟؟؟ ألحقني يا بكري !!! (Re: Yasir Elsharif)
|
ياسر الشريف ياالراقي الظريف !!!
سجمي إنت جيت بيجاي هسة أنا قلت أجيب سيرتك ولا من شاف ولا من درى غايتو إنتو يا ناس المنبر شكيتكم على الله لكن عارف أحلى ما في
مداخلتك دي ( بت اللزينا) تصدق من زمان ما سمعت الكلمة الحلوة دي صدقني يا ودالشريف صاحبي مظلوم يا بيه ولمن يوافق حأكلمك
بحكايته وزي ما بقولو يا في السجن مظاليم,,, شكرا يسوري على دخولك بيجنن!!!
| |
|
|
|
|
|
|
|
|
|
Re: الزوجة الثانية ... هل فعلا هي خطافة رجالة ؟؟؟؟ ألحقني يا بكري !!! (Re: عبد المنعم سليمان)
|
منعم!!!
وإنت خايف ومرعوب كدي مالك أكيد عامل ليك عملة سودة ولا متنيلة بستين نيلة؟؟؟ وبعدين تحلف بالله وتقول عواطف دي جنت ؟؟ عايز بكري
يسحب مني الباسوردلعدم الأهلية؟؟؟ حلاص البيك اتعرفت لكن سامحت عشان اكتشفت إني راجل ومش واحدة ست يا واد يا خطير !! لكن ما
تقول لي نقاش جنس نقش وأسمع ألنحدثك نادية عابدالبتكتب خمسين سنة في مجلة صباح الخير على أساس أنها واحدة ست ووتكلم عن مشكلها وعذابتها كأنثى ,,, حب ,,, أحاسيس ,, علاقتها الإسفيرية بالرجال علاقتها الظلامية بالنساء كدي ذكرني تاني في شنو من المصطلحات العجيبة ما قلتو أيوة هلاقتها الأمنجية بأعضاء المنبر وبعد دة كله طلعت الصحفي القدير مفيد فوزي هسة يا ود أمي تقوم تكشفني قبل الخمسين سنة؟؟؟ شكيتك لألله ,وفتك بعافية ....
| |
|
|
|
|
|
|
|
|
|
Re: الزوجة الثانية ... هل فعلا هي خطافة رجالة ؟؟؟؟ ألحقني يا بكري !!! (Re: عبد المنعم سليمان)
|
منعم!!!
وإنت خايف ومرعوب كدي مالك أكيد عامل ليك عملة سودة ولا متنيلة بستين نيلة؟؟؟ وبعدين تحلف بالله وتقول عواطف دي جنت ؟؟ عايز بكري
يسحب مني الباسوردلعدم الأهلية؟؟؟ حلاص البيك اتعرفت لكن سامحت عشان اكتشفت إني راجل ومش واحدة ست يا واد يا خطير !! لكن ما
تقول لي نقاش جنس نقش وأسمع ألنحدثك نادية عابدالبتكتب خمسين سنة في مجلة صباح الخير على أساس أنها واحدة ست ووتكلم عن مشكلها وعذابتها كأنثى ,,, حب ,,, أحاسيس ,, علاقتها الإسفيرية بالرجال علاقتها الظلامية بالنساء كدي ذكرني تاني في شنو من المصطلحات العجيبة ما قلتو أيوة هلاقتها الأمنجية بأعضاء المنبر وبعد دة كله طلعت الصحفي القدير مفيد فوزي هسة يا ود أمي تقوم تكشفني قبل الخمسين سنة؟؟؟ شكيتك لألله ,وفتك بعافية ....
| |
|
|
|
|
|
|
|
|
|
Re: الزوجة الثانية ... هل فعلا هي خطافة رجالة ؟؟؟؟ ألحقني يا بكري !!! (Re: عواطف ادريس اسماعيل)
|
| Quote: ياأخواتي العزيزات وبدون إنفعال أرجو أن لاتأخذكم العزة بالإثم مثلا إذا كان هناك زوج يعاني الأمرين من واحدة شعنونة أو حوامة أو رمرامة أو سواطة ولخباتة أو راميهو في الكوشة أو جاهلة واستحالت العشرة هل نحكم عليه بالسجن المؤبد أو الإعدام طالما ليس لديه اي نية لتطليق زوجته أم أولاده لكنه في الوقت نفسه يريد أن يعيش ما تبقى من عمره مع إنسانة فاهمة تسعده وتسعد زوجته الثانية وأولاده بعلاقة أسرية حميمة مثلما كانت تفعل أمهاتنا وحبوباتنا ؟؟؟ |
عطوفة..
و الله الليلة ما يحلك منى لا بودي قارد ..لا كمال أجسام !!!
دا شنو الكلام العجيب دا؟
ما كنا كويسين..مالك دايرة تحنضلي علينا الفاتيكان؟؟!!!
-----------------------------
شوفي يا ستي....مافي إنسان كامل...بمعنى إنو زي ما ممكونك عندو عيوب و نقاط ضعف..إنتي كمان عندك عيوب و نقاط ضعف...لكن المودة و الرحمة التى تجمعكما تحتم على كل واحد فيكم إنو يقبل الآخر بمحاسنو و بعيوبو..
إذا إفترضنا إنو كل واحد لقى في مرتو عيب..قام إستبدلها بإخرى..
الواحدة اللاقية في زوجها كذا عيب..تعمل شنو؟؟
تطلب الطلاق ؟؟؟ تهجرو؟؟؟!!!تخلعو؟!!! تعمل شنو؟؟؟
يا ستي أنا سبق و قلت ليك أنا مثلي الدائم هو ..
(( كان حصلت شراكة....خليتك للمعاكا ))
و أضيف إليه ما قالته أوبرا وينفري ..
....if you are miserable in your marriage
.... if you are having an out-of-marriage-affair..
??!!why don't you terminate your marriage first
.
| |
|
|
|
|
|
|
|
|
|
Re: الزوجة الثانية ... هل فعلا هي خطافة رجالة ؟؟؟؟ ألحقني يا بكري !!! (Re: Mustafa Mahmoud)
|
سلامات يا عواطف يا خيتى
أنا قاعدة كتير أقرأ بوستاتك ، بس دى أول مرة أشارك فيها.
طبعا أولا قصة (التعدد) دى أنا ما عندى بيها شغلة ، ولا في قاموس (زوجي) ((عشان ما أقوم أحنضل عليهو ليلو و آخرتو  )) بس و أنا بقرأ فى الموضوع إتزكرت كلام المهاتما غاندى لما قال (( لو مشينا بمثل ((العين بالعين)) كان العالم كلهم بقوا عور)) ، بمعنى إنو لو كلو راجل عشان مرتو " نقناقة و لا رمرامة و لا حوامة و لا شعيتة" قال يعرس فيها كان النسوان يا بقن "عزبات" أو "أرامل" لأنو من الحب ما قتل ..
و لا رايك شنو يا "حلالة العقد" ؟؟؟
| |
|
|
|
|
|
|
|
|
|
Re: الزوجة الثانية ... هل فعلا هي خطافة رجالة ؟؟؟؟ ألحقني يا بكري !!! (Re: نوسة)
|
يا عواطف
أوقاتك سعيدة ،،
عندنا عم اسمو حاج احمد عرس للمرة التانية بعد زواج دام لاكتر من عشرين سنة وبعد العرس اخوي سالو أها يا عم حاج احمد العرس التاني كيف ؟ رد عليهو العرس التاني زي حكاية يا ولدي الزول كان ماشي بي كرعيهو مسافة طويلة وهب ظهرت ليهو عربية وكف شالتو ،، دحين مابرتااااااااااااح ؟ قال ليهو برتاح ،، قام حاج احمد قال ليهو أها دا العرس التاني يريحك ويجدد شباب المرا القديمة تهتم بي نفسها تولع حفرتها وتنقش حنتها.
| |
|
|
|
|
|
|
|
|
|
Re: الزوجة الثانية ... هل فعلا هي خطافة رجالة ؟؟؟؟ ألحقني يا بكري !!! (Re: نوسة)
|
نوسة الننوسة!!!!
كيفك ياخيتي...
نورت البوست ومالك من زمان واقفة تتفرجي علينا ساكت ؟؟؟ عموما مرروك حلو وجيدن جيتي بس أنا خايفة توكوني دخلت من منطلق العيار
اللي ما بصيب بدوش !!!بس أنا شايفاك يا نوسة نجيضة ومكنكشة بيديكي ورجليكي لكن نصيحة مني ليكي فكيها شوية النسوان اللي بكنكشن
شديدديل بياخدن زمبة كبيرة فكي زرارة واحدة ... معزتي...
| |
|
|
|
|
|
|
|
|
|
Re: الزوجة الثانية ... هل فعلا هي خطافة رجالة ؟؟؟؟ ألحقني يا بكري !!! (Re: mamkouna)
|
ممكونة الطيبة الحنونة!!!
مالكن يا نسوان كدي قولن بسم الله !!شمتو علينا الرجال ,,, ناس الحلة والجيران ,,, أنا من أول مرة قلت ليكم في حالات خاصة عايزين
تخالفو شرع الله والرسول وتقولو لي أوبرا قالت وأوبرا ما قالت أها لو أوبرا قالت ليهم أعملو قيل فريند حتستشهدوا بكلامها وأخير
الضرة ولا الطلاق وجديع العيال وأنا من أول مرة قلت ليكم الكلام دا ما كلام تحريضي كبرن مخكن شوية ,,
ممكونة !!! تقولي لي البودي قارد ما بحلك مني خلاص الفيك اتعرفت أنا قلت إنتي العاقلة الرزينة تطلعي شعنونة يا ممكونة؟؟
| |
|
|
|
|
|
|
|
|
|
Re: الزوجة الثانية ... هل فعلا هي خطافة رجالة ؟؟؟؟ ألحقني يا بكري !!! (Re: هاشم أحمد خلف الله)
|
| Quote: إذا كان هناك زوج يعاني الأمرين من واحدة شعنونة أو حوامة أو رمرامة أو سواطة ولخباتة أو راميهو في الكوشة أو جاهلة واستحالت العشرة هل نحكم عليه بالسجن المؤبد أو الإعدام طالما ليس لديه اي نية لتطليق زوجته أم أولاده |
يا خالتو ربنا ما بحب الظلم وحرمه علينا
يعني لو انطبقت المواصفات اعلاه, فحلال عليه المرة التانية وربنا يسعده ويهنيه
لاننا دايما بنتكلم عن الحب اولا واخيرا,, يعني لو انعدم الحب في البيت فحرام الناس تنجبر عشان
خاطر الاولاد.
لكن بنفس المبدا الخلاهو يفتش علي سعادته مع مرة تانية تديهو الحب الافتقدو في بيته, واحنا وافقنا
علي الفكرة دي وقلنا من حقه,, تفتكري لو المرة هي البتعاني من عدم الحب دة ومن البيت الما لاقية
فيهو الامان والعطف,, راي المجتمع وراينا احنا زاتنا ح يكون شنو لو حاولت تبحث عن الحب دة زي ما
سيادته عمل؟؟؟؟؟؟؟؟؟؟؟؟؟؟؟
كويس,, عشان ما نظلم واحد فيهم,,نخلي الراجل والمرة كل واحد يشوف راحته وسعادته والحب البيحيي
شبابهم من اول وجديد.والاولاد في ستين داهية,,, ويملوا لينا المجتمع لما يكبروا بالشواذ
والمهتزين نفسيا والمعقدين.
| |
|
|
|
|
|
|
|
|
|
Re: الزوجة الثانية ... هل فعلا هي خطافة رجالة ؟؟؟؟ ألحقني يا بكري !!! (Re: عواطف ادريس اسماعيل)
|
لكن ياأخواتي العزيزات وبدون إنفعال أرجو أن لاتأخذكم العزة بالإثم مثلا إذا كان هناك زوج يعاني الأمرين من واحدة شعنونة أو حوامة أو رمرامة أو سواطة ولخباتة أو راميهو في الكوشة أو جاهلة واستحالت العشرة هل نحكم عليه بالسجن المؤبد أو الإعدام طالما ليس لديه اي نية لتطليق زوجته أم أولاده لكنه في الوقت نفسه يريد أن يعيش ما تبقى من عمره مع إنسانة فاهمة تسعده وتسعد زوجته الثانية وأولاده بعلاقة أسرية حميمة مثلما
كانت تفعل أمهاتنا وحبوباتنا ؟؟؟
اها لو هي صفاتها عكس كل الكلام ده وانسانة محترمة وراسية وعاقلة ومتفاهمة وشايلة معاه الهم ومشاركاه في كل الحمول وحافظة نفسها وصاينة عرضو وماله وبيته وجميلة وبت ناس ومتعلمة ومثقفة وجابت ليه البت والولد زي القمر كلهم ومؤدبين
وبعد ده كله مشى يفتش للمرة التانية !! أها هي في الحالة دي تعمل ليه شنو ؟؟؟ تقتله ؟؟ تخلعه ؟؟ تدعي عليه بعد كل صلاة ؟؟
ولو زي ما قالت واحدة من الاخوات هو فيه عبر الدنيا كلها وهي مستحملة وبعد ده مشى يفتش للعرس تعمل ليه شنو ؟؟؟
| |
|
|
|
|
|
|
|
|
|
Re: الزوجة الثانية ... هل فعلا هي خطافة رجالة ؟؟؟؟ ألحقني يا بكري !!! (Re: د.محمد حسن)
|
Quote: يريد أن يعيش ما تبقى من عمره مع إنسانة فاهمة تسعده وتسعد زوجته الثانية وأولاده بعلاقة أسرية حميمة مثلما
|
دي بتحصل بس محتاجة بعض الشروط (طبعا بعد حسن الإختيار)
1- عمل جدار حماية ضد الناس (خرابين البيوت)
وخصوصا الخايفات على رجالن من العدوى لأنهن ح يحاولن
بكل السبل إفشال هذه التجربة حتى تكون عظة للزوج
بمعنى (دقوا القراف خلوا الجمل يخاف)
2- على الزوج العدل المطلق مع حفظ مكانة الأولى حتى لا تشعر بالإهمال
وحتى لا تسعى الى الفركشة.
3- عدم قبول أي (غيبة) من إحدي الزوجات عن الأخرى لأي سبب
واذا كان لابد فاليكن في اجتماع عائلي يضم الجميع ويكون الريموت في يد الزوج .
هذه بعضا من النصائح (من مجرب طبعا)
أما إجابة السؤال فهي قطعا (لا)
| |
|
|
|
|
|
|
|
|
|
Re: الزوجة الثانية ... هل فعلا هي خطافة رجالة ؟؟؟؟ ألحقني يا بكري !!! (Re: السمؤال بدرالدين)
|
تعرفي يا عواطف
انا بعد سنوات كتيرة حتى قدرت اعرف انه تعدد الزوجات في مصلحة المرأة
قولي لي كيف.؟
اصلا التعدد دا في اي مجتمع وفي اي دين
ايواااااااا العشيقة او المرأة الثانية...
"اللنش بريك قيرفريند"
دي عادة سائدة في الغرب...
اها شوفي المرأة المسلمة
ممكن تكون عشيقة وممكن تكون زوجة لها كل الحقوق
يعني عشيقة بالحلال
اولادها معترف بهم من المجتمع
وراجلها يجيها جهارا عيانا ما بتلبت..لو طلقها يدفع ليها
صداقها ويصرف على اولادو بالقانون..
بكدا تكون احسن من العشيقة
اللي ممكن يدوها شاكوش في اي لحظة..
وما تقدر تثبت بنوة اولادها وتكون مفضوحة لو كشفوها..
ولك التحية..
| |
|
|
|
|
|
|
|
|
|
Re: الزوجة الثانية ... هل فعلا هي خطافة رجالة ؟؟؟؟ ألحقني يا بكري !!! (Re: bayan)
|
بيان !!!
الله يسعدك يادكتورة يا أمورة ,,,
الليلة بس عرفت ليه إنك محاربة لا تنكسر لها شوكة ولا تلين لها قناة ,,, غايتو كلامك كلام عقل وخالي
من الإنفعالات التي تتحكم فيهانزعة حب التملك دون البحث عن سبب المشكلة وإيجاد حلول مثالية لها
وبعدين الليلة بس عرفت ليه بت أختك الودعتيها بالدمع السخين كانت بتعزك ,, بتصدقي قدر ما حاولت
ادخل وأقول ليك زي ما ودعتي تلاقي النت بتاعي بعمل بلوك ما عارفة ليه عموما أشكرك ولا أنسى أنك أول من رحب بي في هذا البوست .. شكرا بيان يا ست الحسان .. معزتي ..
| |
|
|
|
|
|
|
|
|
|
Re: الزوجة الثانية ... هل فعلا هي خطافة رجالة ؟؟؟؟ ألحقني يا بكري !!! (Re: محمد أبوالعزائم أبوالريش)
|
سلامات يا عواطف
مالك يختى مهاجمانى كدة ؟؟ خاطفة راجلك أنا و لا شنو ؟؟؟
عيار شنو (اللى ما يصيبش دة)) ، إتخيلى أنا قصة ((التعدد)) و البصبصة دى كارهاها من أنا لسة بت صغيرة و فى الكلية ، كنت بكره ليك الرجال البيجو "يخلطو" و هم على "زمتهم" واحدة غافلة و ما عارفة الحاصل عليها شنو " و لا عارفة ما عارفة"
أنا ما بتكلم بصورة شخصية لأننا"زوجى و أنابنحب بعض" و البيحب ما بيخون ، بس ربنا حلل التعدد لأسباب محددة و يا ليت الناس بتلتزم بيها ، و غير كدة لا أءمن بالتعدد و لو شنو زاتو ، لأنو من ناحية فيهو ظلم فهو فيهو ظلم ما ليهو حد للزوجة الأولى ، فهو طعن لأنوثتها و كرامتها مهما كان السبب " كان مرض و لا عقم و لا حاجة تانية"
وأنا محاتك ما مزنقاها و لا شئ ، و هو كان فك أنا ما بفك 
ناس الخليج ديل يختي أغلب زيجاتهم تقليدية ، و الزوجة دى بس تمامة عدد "بمعنى تمامة واجهة إجتماعية" يعنى دة الغالب موش كلهم، عشان كدة ما عندهم ولاء كتير "لأم العيال" و هى "على قولتهم" ما أحسن من خواتها اللى صار فيهن ها الشى ...
بس نحن فى السودان مختلفين تماماً ، و عشان كدة أسى قصة التعدد دى ما بتلقيها إلا فى الأجيال القامت جديد دى "من فراغة العين و إستجداد النعمة"
والكلام ما بيخلص يا عواطف بس لحدى هنا خلاص "عيونى زغللن"
| |
|
|
|
|
|
|
|
|
|
Re: الزوجة الثانية ... هل فعلا هي خطافة رجالة ؟؟؟؟ ألحقني يا بكري !!! (Re: نوسة)
|
نهارك سعيد يا عواطف
تعرفي إنتو معشر النساء مفروض تخلو روحكم الرياضية عالية
وكان النفوس اتطايبت أي شي ببقى .. أنا قبل ما اتزوج شرطت
عليها إنو لو الله أداني قريشات بعرس وكان حنكي إنو البنات
كترن وكان ما كان في تعدد الشغلانة بتبوظ بس والله بعد العرس
بي تلاتة شهور سيرة العرس بقت من المحرمات في البيت وبعد
دة كلو لو لقيت القريشات بعملة وزي ما تجي تجي ..
| |
|
|
|
|
|
|
|
|
|
Re: الزوجة الثانية ... هل فعلا هي خطافة رجالة ؟؟؟؟ ألحقني يا بكري !!! (Re: نوسة)
|
نوسة الننوسة !!!
ضحكتيني بلحليل عشان إنت زعلانة بدون سبب وأنا كلامي مجرد مزح يعني حاولي كدة تاخدي الأمور ببساطة
وما تحمليها أكتر من اللازم سمعتي يا بتي ؟؟؟ يعني هونيها وتهون وأنا لأني عارفاك واثقة من نفسك
مزحت معاك وألا فلا إنت يبدو عليك ما عرفتيني لسة أرجعي لبوستاتي كلها عشان تعرفي هل أنا بستعدي
أي شخص ؟؟؟ وأنا هارفاك ما ماخدة الأمور بصورة شخصية لذلك مزحت معك عموما يا ست الكل حقك علينا!
شكرا على عبورك القيم ... معزتي ,,
| |
|
|
|
|
|
|
|
|
|
Re: الزوجة الثانية ... هل فعلا هي خطافة رجالة ؟؟؟؟ ألحقني يا بكري !!! (Re: عواطف ادريس اسماعيل)
|
العزيزة عواطف
سلامات..
| Quote: فقلت لها و متى ستزوجين زوجك؟؟ ضحكت وقالت قريبا عندما يتشجع ويطلب مني ذلك سأختارها بمواصفاتي وليس مواصفاته لأنني أنا التي ستعيش معها أغلب الوقت |
طبعا يا عواطف كنت بفكر فى المواصفات الممكن تكون
اختنا(الخاطبة) بتفكر فيهابخصوص زوجة زوجها...
اكيد حاتون واحدة فى جمال القرود .. ورشاقة فرس البحر
وبياض الليل اذا ما عسعس .. وبدون لسان لذوم عدم الاكثار
فى الكلام وقيل عدم الكلام اصلا..
اها يا عواطف فهمك شنو فى العروس الموضحة اوصافها اعلاه ؟؟؟؟
باقى ليك راجلة دا بعرس تانى... قايتو زوجها دا كان طارى العرس
احسن يشوف ليه خاطبة تانية غير زوجتة دى لانها ممكن تودر فهمو
بوست مهضوم وجميل .. واصلى وانداحى جمالا يا عواطف.. فقد ادمنا
بوستاتك وعذب حديثك
عوض حمزة
| |
|
|
|
|
|
|
|
|
|
Re: الزوجة الثانية ... هل فعلا هي خطافة رجالة ؟؟؟؟ ألحقني يا بكري !!! (Re: عوض حمزة)
|
توفي
أجي يا الما ختافة رجال!!
هو الختف دة كيفنو؟؟
عاد أتلومتي يا بت أمي!
هسة الكلام دة لو سمعتوا منك أم حسين جارتنا في الحلة
علي اليمين الا كان تمعط شعيراتك ديل
المرة سمعت ليها طقة في الحلة قالوا ابو العيال ناوي يعرس
ومن يومها و الولية غالباها القعدة في بطن الواطــة!
لو جات مرة ساكت تديها حنك حنكين
المرة بتقابلا!!
تقول طالباها دين واللا غضب والدين
قبُلا يا أنتي!!
وحاتك يا غالية
قالوا ليك يةمداك جاتهم عشة ست الصندوق
كابة ليك الشعور دي وما خلت ليها صندلية ما كبتها في راسها
المرة ما مقدرررررررررة وسيطررررررررة
اها!!
قالوا ليك ساعة الدرامات دي بدت
الحلة كلها وقفت عي فد كراع
هوي ها يا عواطف
مالك علينا؟؟
| |
|
|
|
|
|
|
|
|
|
Re: الزوجة الثانية ... هل فعلا هي خطافة رجالة ؟؟؟؟ ألحقني يا بكري !!! (Re: د.محمد حسن)
|
د. محمد حسن !!!
الزول القايد وماسك الرسن ,,,
معزتي ,,,
مداخلتك كالعادة منطقية و واقعية وزي ما ذكرت سابقا هناك حالات فردية يجب أن لا نظلمها و نحكم عليها
من دون معرفة الأسباب وزي ما بقول المثل الأيدو في الموية ما زي اللي إيده في النار أنا ماعارفة الناس فهمت البوست بطرق مختلفة ليه ؟؟؟ الرجال عندهم فهم والنسوان فهم تاني .. شكرا يا جبار الكسور..
| |
|
|
|
|
|
|
|
|
 Re: الزوجة الثانية ... هل فعلا هي خطافة رجالة ؟؟؟؟ ألحقني يا بكري !!! (Re: nourelhadi awad)
|
نور الهادي !!!
الزول الهادي ,,,
شو ها الحكي ؟؟؟ شكلك ما حتجيبها البر ,, تسأل و تجاوب وكمان عايز بوست للتالتة والرابعة غايتو
الليلة يومك حيكون زي بعضه ؟؟؟ ونهارك مش فايت ,, وليلتك متنيلة بستين نيلة.. المهم عندنا بودي
قارد للإيجار كلم كل الأخوان اللي إتجوعلو وما قايلين البوستات مراقبة من قبل وزارة الداخلية وبعدين يا سيد أبوك الشعنونات ناس ممكونة حيقولو ليك عمل الخير دة لازم يكون عرس ؟؟؟ ما ممكن تمشي
دارفور ولا جنوب السودان ولا الصومال ولا حتى العراق !!! غايتو يانور يا عريس السرور فتحت على روحك
فتحة كبيرة وربنا يستر .... معزتي ...
| |
|
|
|
|
|
|
|
|
|
Re: الزوجة الثانية ... هل فعلا هي خطافة رجالة ؟؟؟؟ ألحقني يا بكري !!! (Re: عواطف ادريس اسماعيل)
|
Quote: ممكونة الطيبة الحنونة!!!
مالكن يا نسوان كدي قولن بسم الله !!شمتو علينا الرجال ,,, ناس الحلة والجيران ,,, أنا من أول مرة قلت ليكم في حالات خاصة عايزين
تخالفو شرع الله والرسول وتقولو لي أوبرا قالت وأوبرا ما قالت أها لو أوبرا قالت ليهم أعملو قيل فريند حتستشهدوا بكلامها وأخير
الضرة ولا ...الطلاق وجديع العيال وأنا من أول مرة قلت ليكم الكلام دا ما كلام تحريضي كبرن مخكن شوية ,,
ممكونة !!! تقولي لي البودي قارد ما بحلك مني خلاص الفيك اتعرفت أنا قلت إنتي العاقلة الرزينة تطلعي شعنونة يا ممكونة؟؟ |
عطوفة...
كلام أوبرا ما قاعد يعجبني دايماً لإختلاف المشارب و الإتجاهات و لو إني بحترمها جداً جداً و بتعجبني في إنسانيتها و حبها للخير.....
لكن الحتة الكتبتها عنها دي عجبتني جداً جداً...و فعلاً ما دام زوجي شايف إني ناقصة حاجة و لقاها في واحدة تانية...مبروووووكة عليهو..لكن كدي في الأول يعطني حريتي..يطلق يديا..!
بالنسبة للضرٌة و لا ...الطلاق و جديع العيال...أنا شخصياً أفضِل الطلاق و جديع العيال.أنا أفضل أطفالي يتربوا مع أم ب نفسيات محطمة لكنها قوية و حازمة و حرٌة نفسها و لا ترضى بنصف رجل ...من أن يتربوا مع أم مهزومة و ضعيفة و كل الأعين تؤكد إنها ناقصة و إلا ما كان فتش عن واحدة تانية..
ما لاحظتي يا عطوفة إننا في السودان أول ما يقولوا فلان عرٌس في مرتو...السؤال البعديهو طوالي بيكون..و مرتو مالها ؟؟!!!!
ملحوظة:
أمرقي ليٌ برررررررررررررررررره..إنتي و البودي قارد...
ممكونة و باقي الشعنونات!!!!!
| |
|
|
|
|
|
|
|
|
|
Re: الزوجة الثانية ... هل فعلا هي خطافة رجالة ؟؟؟؟ ألحقني يا بكري !!! (Re: mamkouna)
|
ممكونة الطيبة الحنونة!!!
والله كلامك في محلو اوبرا عندها مواقف إنسانية وبتعجبني جدا في طريقة طرحها للمواضيع رغم أن أغلب
مواضيعهالا تناسب مجتمعاتناأما حكاية الأطفال والطلاق أو الأطفال والعيشة مع أم همزومة أو العيشة مع
أب غير مسئول وأم قايمة بي كل الحمل والمسئولية دي مشكلة كبيرة ولا يمكن حلها بي بوست وبعدين تختلف
الرؤيا في هذه االمواضيع من شخص لآخر حسب مفاهيم كل شخص عموما لك تحياتي و أشكرك على مداخلاتك الجادة ,,,
ملحوظة:
منتظراكن عاد جيبن عكاكيزكن وتعالن !!!!
| |
|
|
|
|
|
|
|
|
|
Re: الزوجة الثانية ... هل فعلا هي خطافة رجالة ؟؟؟؟ ألحقني يا بكري !!! (Re: عواطف ادريس اسماعيل)
|
الأخت العزيزة عواطف
تحية لك أيتها الكريمة الكريمة
إختزال الموضوع في ما يسمى بإختطاف الرجل من زوجته gorilla action أو كما يحلو للكثيرين أن يطلق عليها أو كما يصورنهاالضحايا أو المنهزمات أو المقهورات لفيه إختزال للأمر ، الأمر في مجتمعاتنا يختلف بعض الشيء عن المجتمعات الخليجية.. فهناك العامل الإقتصادي لديهم يسهل إتخاذ القرار وكذا أن هناك عادات قبلية لا تنتقد التعدد ؛ وأيضاً هناك مجتمعات تتحفظ على التعدد رغم شرعيته ولكن سواء هنا أو هناك فالتعدد له شروط وبرأيي أن الطلاق والخلع هما أداتان مشروعتان إن لم يكن هناك محاذير مثل وجود أطفال حتى لا ينجرف المجتمع نحو التعدد الذي إن لم يكن مبرراً ستكون له آثاراً سلبية.
أسمحي لي أن ألقي بجزء كبير من المسئولية على الزوجة هنا.. فكما قيل أن الزوج طفل كبير .. أو حيوان ضاري تم ترويضه وإدخاله القفص .. وحتماً كان هناك إستدراج وشعور متبادل ولكن المرأة الشرقية
يخبو وهج الحب لديها بمجرد إنجاب أول مولود ولأنها لا تفرق بين الأمومة والزوجة تهمل دورها كزوجة وتركز على دور الأم هذا أولاً .
ثانياً الإفتقار إلى الوعي وإستقلالية الأسرة فكثير من الزوجات يسمعن عن حكم مدمرة مثل( قصي جناح طيرك ليلوف على غيرك)!!.. من هنا تبدأ لعبة توم أند جيري فبدلاً من أن تهتم الزوجة بنفسها لياقة وأناقة وتجملا تتفرغ للبحث عن إدلة نتيجة شكوك مبنية على أن الزوج ما عاد كما كان .. هنا أقول ( كوني له أمة يكون لك عبداً)!!.. هناك زوجات متسلطات يعاملن أزواجهن بطريقة أقل ما توصف أنها مهينة وكذلك بعض الأزواج فهل هذه هي المودة والرحمة والسكن؟
ثالثاً: لاتنظر عين الرجل لغير زوجته إلا إن كان هناك أشياء إفتقدها.. ويمكن أن يمتد البصر إلى صديقة الزوجة أو الأسرة.. لأن الصديقة أو صديقة الأسرة هي الطرف الذي يفترض أنه يعرف الكثير عن الأثنين ومن هنا تبدأ الصديقة أو القريبة أو الزميلة في لعب دور المنقذ من قبل العناية الإلهية
لإنقاذ الزوج التعيس من حضيض التعاسة إلى قمة السعادة كما ستصور لصاحبنا الذي أزعجه صوت الإبن وبدانة الحاجة ورائحة الطبيخ.
رابعاً: المرأة مخلوق ذكي ولديها حاسة سادسة وقدرة على التأويل وقنوات إستشعار ، فطالما منحها الله كل هذه الخصائص فلماذا لا توظفها في خلق جنة من بيتها؟! لماذا توظف كل هذه الخصائص بطريقة سالبة تكون سبباً في تطفيش أخونا؟!! أعرف صديق مرّ بظروف أسرية شبيهة ونصحت زوجته بيني وبينها أن تغير إستراتيجيتها وتبحث عن أسباب المناكفات وتبدأ شوية في التطنيش وهي التي كانت تناكفه 48 ساعة في ال24 ساعة.. قلت لها إستمعي إليه بإهتمام حتى وإن بالغ أو كذب ولا تشعريه بأنك كاشفاه لأن ما بينكما تحول إلى أزمة ثقة.. وفعلاً بدأت تهتم بأناقتها وخفضت من وزنها وفرقت بين دورها كزوجة وحبيبة وكأم
وإتعلمت التطنيش حتى إنعدمت أسبابه!!
خامساً: هناك بعض الأزواج لا يعترف بحتمية التاريخ وتعاقب الأجيال وموضوع الزواج هو غواية ومزاج وكيف
وهذا هو الذي أحال التعدد إلى مسرحية عبثية فهو لا يقيم وزناً لزوجة ولا أبناء وانعدمت لديه قيم الأسرة.. وهو الذي يبحث عن من هن في عمر بناته ( فل أوبشن).. فلا يستحي ولا يتعفف وعندما تبحثين عن الأسباب تجدين أنه تزوج عن حب وأن زوجته غير مقصرة وتوزيع إهتمامها به والأبناء والعمل متكافيء .. فهي أنيقة، جميلة، ودود ، ولود ، هاشة وباشة ‘ فبالله ما هي الأسباب التي تدعوه للزواج؟!! .. فراغة عين.. أم عودة الشيخ إلى صباه؟!!
تحياتي
| |
|
|
|
|
|
|
|
|
|
Re: الزوجة الثانية ... هل فعلا هي خطافة رجالة ؟؟؟؟ ألحقني يا بكري !!! (Re: ابوبكر يوسف إبراهيم)
|
أخي العزيز أبوبكر !!!
لله درك ,,,
أولا تحليل رصين وراقي ويصب في مصلحة المرأة لكي تتعلم وتعالج أخطاءها بدلا من ندب الحظ وجعل الزوج
أو الأخريات شماعة دون أن تفكر أنها قصرت في حق زوجها من جميع النواحي و أرجو أن لا تفهمنني الأخوات غلط لأنني أريد المصلحة وليس الضرر ,, ثانيا ساعدتني بطريقة غير مباشرة في عناصر موضوع أنوي عمله وهو بعنوان (أخطاء قاتلة ترتكبها المرأة تؤدي إلى تطفيش الرجل ) ,,, شكرا أبوبكر مرورك يسعدني ,,
| |
|
|
|
|
|
|
|
|
|
Re: الزوجة الثانية ... هل فعلا هي خطافة رجالة ؟؟؟؟ ألحقني يا بكري !!! (Re: عواطف ادريس اسماعيل)
|
الأخت عواطف
تحياتي لك و للمتداخلين و المتداخلات..
تابعت هذا البوست منذ ( إفتتاحه ) و حتى تاريخه ...
مكوثنا الطويل هنا بالغربة جعلتنا نعايش بعض ( قصص الزوجة الثانية ) ..
منها ما تعاطفنا معها مثلك تماما
و منها ما وقفنا ضدها ..
و لكن هناك نوع إحترمته جداً .. بل أكْبرْته ..
كيف ؟؟
زوج و زوجة .. مثال للحب و التفاني و الإخلاص.
لا يتفارقان ..
سعداء منذ أتتْ له من السودان عروساً ..
و لكن و ما أقسى ( و لكن )
حرمها الله من الولادة ..
جربا الطب هنا و في لندن و الأردن و القاهرة
و لكن دون جدوى
جربا الطب الشعبي
و جربا الفقرا و الشيوخ
و لكن دون جدوى ..
فقد كان العيب فيها.
و بما أنها تعرف فيه ولعه بالأطفال لدرجة أنه إختار إسم أول طفلة و أول طفل لهما قبل الزواج..
و بعد أن إجتاحتهما جحافل اليأس من الإنجاب ..
خيرتْه بين الزواج من إمرأة أخرى أو الطلاق.
كان كالمجنون و هو يحدثني بطلبها الغريب.
حادثتها فوجدتها تقف بصلابة مع رأيها ..
أخيرا وافق و لكن بشرط.
شرطه هو أن تختار له ..
و بالفعل إختارتها له.
يوم زواجه هنا بالرياض ... هيأته بنفسها
يقول أن وجهها كان بلا تعابير .. جامد كتمثال من شمع .. تتحرك بآلية ..
عندما جاءها ظهر يوم دخلته .. وجدها متورمة الوجه رغم محاولاتها المستميتة لتبدو عادية..
الآن بعد مرور ولادة 4 أطفال من زوجته الثانية ..
من يدخل بيتهم لا يعرف من هي الأم الحقيقية و من هي الزوجة التي لم تنجب.
و الأطفال متخمون بكلمة ( يمة ) يقولونها في حضور الإثنتين أو في غياب إحداهما ..
و الزوج .. رغم أطفاله الأربع .. لا زال حبه الأول قنديل حياته .. و هي لم يخبو يوما وهج عشقها له.
الغريب أن الزوجة الثانية تعرف قصة حبهما و كيفية إختيارها.
هل تصدقين أنها تقول بأنها سعيدة لأنها زوجة رجل مخلص لحبه و مخلص لها كزوج و والد أطفال ..
رغم عواصف الغيرة التي تهب من حين لآخر .. إلا أن الزوجة الأولى ربان ماهر تعرف كيف تدير الدفة و تفرد الأشرعة و تطويها بحنكة و دراية و صبر ..
و الزوجة الثانية تتدلل كأم و زوجة .. تثور و تفور و تغلي ثم تخمد براكينها تحت وطأة حب هاديْ و عاقل و متزن .. فتنزوي تحت ظلال أمومتها و كنف زوج يجلها و يحترمها و يفرد جناح الإمتنان كلما رأى أولاده أمامه.
و الأولى إطمأن قلبها لأنها ضربتْ عدة عصافير ( بحجر من نبلة حبها ) ..
أها يا عواطف .. مش دي جديرة بالإحترام؟ هي و الثانية.؟
و رأيك شنو يا أختي العزيزة هبه ؟
دمتم
| |
|
|
|
|
|
|
|
|
|
Re: الزوجة الثانية ... هل فعلا هي خطافة رجالة ؟؟؟؟ ألحقني يا بكري !!! (Re: ابو جهينة)
|
أخي الحبيب أبو جهينة !!!
معزتي ,,,
طريقة سردك الممتعة تنسيني دائما الموضوع الذي نتحدث عنه فأسرح بخيالي بعيدا في فضاء الإبداع
اللامتناهي ,,, متعك الله بالصحة والعافية ,,, هناك يا عزيزي نماذج كثيرة مشرفة لذا يجب أن لا
يضيق أفقنا لهذه الدرجة بل علينا أن نحترم مشاعر الآخرين ونقدر ظروفهم ,,, شكرا لمرورك الجميل ..
| |
|
|
|
|
|
|
|
|
|
Re: الزوجة الثانية ... هل فعلا هي خطافة رجالة ؟؟؟؟ ألحقني يا بكري !!! (Re: عواطف ادريس اسماعيل)
|
العزيزة عواطف، تحية طيبة..
دي أول مره أكتب معاك في بوست.. فأتمني اكون ضيف دمه خفيف...
بداية الزواج مسؤولية مشتركة.. موش مسؤولية المرأة وحدها، لاحظتك ترددين انه المرأة راميه زوجها في الكوشه.. الخطوة الاولى موش انه يمشي يتزوج ليها لو لاحظ إنه مُهمل، الخطوة الأولى انه يتكلم معاها.. عشان ما يكون محيّل ساي... ويشوف أسبابها شنو، او على الأقل يفهمها أثر إهمالها ليه.. الخطوة التانية لو ما نفع الكلام .. ينفصل عنها.. ببساطه لأنها مهملاه، what's the point من إنها تستمر في عصمته ومن ثم يضيف مشكلة جديدة بالزواج من أخرى؟ يحل مشكلته دي سواءاً بالكلام أو بالانفصال.. وبعد داك يفتش على سعادته لو هو عايز كده...ما أفتكر إنه عدم سعادة الرجل في زواجه يمكن حلها بإضافة factor جديد للمشكلة، وهو شخصية جديدة ما معروف حتتعامل مع الأمر كيف... الزواج في الحاله دي حيكون رد فعل فيه رغبة في الانتقام والتشفي أكتر من إنه عمل عاقل...
on another note... تصوري في احتفال بورداب الرياض والشرقية بزواجنا (نادر وانا) السنة الماضية، وبعد حدوث عطل فني في الأورغن.. طرح العم ودقاسم موضوع للنقاش، وهو تعدد الزوجات.. بالله عروس يطرحوا عليها موضوع زي ده؟ أنقري العروس عملت شنو؟ قامت وقالت ليهم، الراجل العايز يتزوج حجره ما تعتر ليه.. لكن هدا طرفي منّه..
بنت الحسين
| |
|
|
|
|
|
|
| |
عواطف ادريس اسماعيل
elhilayla
Mustafa Mahmoud
lana mahdi
ماجدة عوض خوجلى
abubakr
عبد المنعم سليمان
Mahathir
حسن الجيلى سعيد
Yasir Elsharif
mamkouna
نوسة
عبدالرحمن عبدالله أبوشيبة
رأفت ميلاد
هاشم أحمد خلف الله
د.محمد حسن
معتز القريش
السمؤال بدرالدين
Adel Khamis
bayan
Gaafar Ismail
محمد أبوالعزائم أبوالريش
عوض حمزة
حبيب نورة
Tagelsir Elmelik
ismeil abbas
الطيب شيقوق
سمرية
ابو جهينة
مريم بنت الحسين
فيس بوك
تويتر
انستقرام
يوتيوب
بنتيريست