طلال عفيفى ...أشجار على طريق العمر!!!

Quote: طلال عفيفي سلام يا زول يا فلتة .. و حزنك بيوجع .. لكن ما بطال شوية حزن مرة مرة كدة , و حبة وجع يصحصح الزول .. بعدين شنو حكاية أزمة منتصف العمر دي ؟؟ .. هو التلاتين بقت منتصف يا طلال ؟؟ .. كده أنا بكون مارقها في أم طرقا عراض هسه . عارف يا طلال .. البني آدم ده كائن جميل و طماع .. و مرات غبي , أنا لما بقى عمري تلاتين حسيت باحساسك ده .. عدمية كده و هم ما ليهو أول ولا آخر .. وندم , ندم بتاع شنو ؟؟ ما عارف .. هل هو ندم على العملتو !! وللا ندم على الماعملتو و حاسي إنه زمن عملو راح !! وللا ندم على اللسه عندك نيه تعملو و خايف ما يكون في بقية في العمر!!! لخبطة يا صاحبي ما عندها أي طايووق . معادلة غريبة جدا .. عمار صاحبي قال لي دي إسمها ( النفس اللوامة !!! ) عجبني التعبير , و اتذكرت قريبك زوربا . كان سايب نفسو لآخر جنها الربنا ختاهو فيها , و برضو زول قريب من الله زي زوربا ده أنا ما شفت , زول متعادل مع وجوده و نفسه ومع خالقه , و بيحب رفاقه موجودات الوجود كلها .. جماد و أحياء و جن و ملايكة , أي شي عنده بيهو علاقة ودودة و موزونة بميزان : ( نحنا و إنتو يا أخواني في الوجود طلعنا من بين أنامل قدرة جبارة و مطلقة .. إذن نحن أشقاء بالميلاد ) . عنده شغف بالوجود و استمتاع بيهو حد ( فبصرك اليوم حديد ) .. حديد من الحدة , بصر حديد بيشوف شوف تاني .. بمقاييس تانية و معيار مختلف للوجود .. يمكن فيهو المحاذاة ديك بتاعت أمل دنقل : ( حاذيت خطو الله .. لا أمامه ولا خلفه ) و أنا متأكد إنه كان عنده حكاية النفس اللوامة دي ( على كل شي نوى يعملو و لسه ما عملو و مستعجل يعملو ) .. استغفر الله من حقك يا طلال . طيب .. أورورتكم دي بتوجع الروح .. كيف ناسكم ديل بيوجعو الروح ؟؟ الواحد يكون عندو وجع روح .. حاجه كويسه . مرض جديد .. يستاهل التجربة . في الثانوي كان عندي رمد , حسين مرسيدس صاحبي مزهجاهو عيوني الحمر ووسخانات , قال لي : إشتري فرشة عيون , أصحي الصباح سوك أسنانك و عيونك . يا طلال .. أصحى الصباح .. سوك روحك . من كل عوالق و عواليق صدمت روحك كع .. وعينك كع .. و شعورك كعين . عارف .. كويس إنه الحاجات الكعبه و الأحاسيس الأكعب دي موجودة .. لو هي ماكانت في , الواحد ما كان ح يكون عندو مقياس للحاجات الحلوة . تقيس كيف و الميزان فيهو كفة واحدة ؟؟ طيب خلاص .. زهجتك , عارف . لمن تمرق من آلام وجع الروح ( و إن شا الله ماتطلع منها قريب .. عشان ما تبقى زول عادي .. ما ناقصين غلب نحنا , الدنيا مليانة بالعادية ) لما تتحل بالسلامة من المخاض ده .. ح نقعد نتونس .. في الخرطوم يمكن , تحت لبخاية شطورها مدلدلات قدام النيل القديم . مرة تماضر قالت دليب في شارع النيل !! .. شفت زوربا النسخة النسائية ؟؟ يا ها تماضر . عارف .. نسيت أقول ليك , أنا في منتصف الأربعين , و إحساسي بالدم فاير فيني أحسن من أي و قت تاني كان . و فاتح ضراعاتي للآخر لأي شي و كل شي . قال أزمة منتصف العمر قال !!!! محبط إنت ياخ .