|
|
 لم يسبق له أن اكـل بسبوسـه
|
سلام مرع
اول الحكي
احتجت ارتاح في عيون
فيهن ملامحك ذاتها من غير اي زيف
واشتقت لي ضحكت صباحك
والدعاش عطر رزاز مطر الخريف
انا وانت والدنيا الامان
والناس وفاء وخوة صفا
ودفء المشاعر الشاتيه صيف
الغناء لمصطفي سيد احمد
_________________
اصل الحكي
لم يسبق له ان اكل بسبوسه ومع ذلك كان مصرا على شحذ كل طاقات ذائقته الكسوله ونكش كل مدلولات قاموسه الحسي ..ومقارنة طعم هذه (الداهية) التي يلكوها الان بطعم تلك التي يسمونها بسبوسه . . دق اجرا س عصب راسه معلنا على كافة حواسه السته اعلى درجات الاستعداد والتأهب القصوى ..وبدورها جرت كل كريات دمه الحمراء والبيضاء المغلوبه على امرها توزع بيانات الطواريء .. بحرفة من تدرب في صغره على الخمج واللغوصه في الحلل والصواني والصحانه غمس اصبعه فيها ثم باليه محضه وضع منها على لسانه ..في البدء تمطق بخجل .. لم يجديه الامر شيئا .. تمطق بصوره حاسمه محدثا فرقعة هائلة بلسانه .. لم يصل الى شيئا سوى انه (لم) كثير من العيون ناحيته .. لم يعيرهم التفاته ما بيده الان لخطير جدا .. كان غائبا عن عالم فرجتهم .. غير من تكتيك (غرفته) لهطها على الطائر ، ثم خنقها و فطسها ثم مصرها وعصرها حتى جابت الزيت وانت يا ايتها الذائقة الهرمه اقسمت وحلفت باغلظ الايمان ان لا تاتيه بشي ..
اراد ان يجرب تكتيك اخر لعله يأتيه بالحل والفرج ثم توكل على الحي الذي لا يموت وغمض عين وفتح الاخرى ودردم لقمة منها ثم مررها على لسانه وانتظر لثواني .. فشل في تحديد طعمها ..فشل، لم يحصل على نتيجه بالمقارنه .. مررها الى حلقه وانتظر على بوابة حلقه لثواني .. تعشرق ، قرب يروح فيها .. انزغمت منه داخل حلقومه ..وانتظر لثواني حسبها دهورا ..
امان الليلة ما تعب زول .. الخايف منه حصل لقد سدت لقمته الكبيره مجاري الهواء عنده فتعشرق وتعشرق حتى احست هي بعيونه تخرج ممطوطة الى هناااااااك ثم تعود محدثه دوياً دووووول .. فرصعته على ظهره طااااااااااااااخ رصعة فتتت لقمته المدردمه في حلقه وخرجت فتفوته صغيرة منه فوووووووف الى حيث الهواء الطلق تتتتتتتف ..
ثم فتفوته اخرى اكثر شرزمه خرجت وانقسمت لتخرج كل فتفوته اكثر فتفتة من خلال نخرينه الاثنين .. واخرى مرت بحلقومه ثم للخارج دون ان ترتاح على لسانه او حتى سنونه .. ففففففففففففففييييففف
وتمطت رقبته هناااااااك وانسلت دون ان تنقلع ثم عادت الى مكانها ترتج من مشوار الموت الذي هرولت فيه ..
وشاااااال نفسه فووووووق ثم ختاااااهو ..واوقن انه مازال حياً يرزق .. لم يصل بعد الى حالة يلعن فيها هذه الداهيه .. ليواصل ركضه المجنون نحو الحقيقة ..
وهي بدورها مازالت تحدره بعين عجيبه واستغراب .. حرقته (حمرة) العين تلك التي ناظرته بها رغم انها تضع (عدسات) بنيه فاتحه .. غاظته بشده تلك التحديجه العجيبه حتى اخجلته فنظر الى جزمته فوجد ان فتفوته صغيرة تسكن بوز الجزمه .. التهي عنها قليلا ثم عاد الى خيرات الاطباق التي كانت بالف لون ونوع . .
تلاقت عينيه المدمعتين مع عينيها البنيتين الزائفتين ففشل ان يقرأ شيئا منها .. لشد ما يكره هذه العيون الزائفه .. ولشد ما يكره هذه الوجوه المرسومه بخطوط الوهم والزيف .. ..
يافضيحتك يا ود (كلتوح) .. ما الذي افعله هسع في النهار الضيق دا ؟؟ قاتلها الله هذه الحضارة التي تتشكل في اطباق باسم التمدن .. وقاتلها الله تلك البداوة التي قضي سنواته السبعة عشر في فيافيها .. ولزهجة خاصة كاد ان يرسل لعناته الى جدوده وجدود جدوده بسبب حبسهم اياه في حظيرة بلدتهم التي تقع خارج حدود العالم .. . الم يسمعوا بهذه المدينه الكبيرة .. الم يحدثهم احد عن الخرتوم .. وتذكر انهم اموات والذين خلفونا في هذه الارض ثم مضوا لا يستحقون الا الرحمه .. فدخل في نصف هدومه من كسوفه ..فلم يجد امامه غير العمده ود شقلينــي فارسل كثير سبابه ولعناته الفاهمات ..
_____
للهترشه بقيه
شوية مع الاعلان وصادين تاني
|
|
 
|
|
|
|
|
|
|
|
Re: لم يسبق له أن اكـل بسبوسـه (Re: shiry)
|
مازال البحث عن الطعم مستمرا
وعاد اكثر اصرار على اقتحام الموت .. لكن مابال هذ االطعم يتزاوق منه .. لما تاخرت ساعات الولادة اكثر من اللازم .. يا لي من فتى عروووووب .. ياااااه ده شنو دا زهجتييييييني ... يا ليتني لو كنت مشيت مع ناس (ود سمبتوك) . قال ليك الجماعة ديل خشوا كورة الهلال والموردة . ودخلوا الداهيه ديك البسموها سمنا فلما هندي بنوتو حلوات بالحيل والله قالوا لك احلى من 0بلح رطب المدينه ... اها احمد ود العوض قال كده دق سدره وقااااام عزمهم . الكبده الما كبدتك والفول الما خمج ..واكلهم الداهية الحلوة ديلك قالك قام عزمهم عليها .. ياربي اسمها شنو .. شيتا كده حلوه بالحيل .. يالتني كنت معاهم . لعن الله تلك المشافي ، لو ان حبوبتي بت عوض السيد كانت كويسه ، لكنت حضرت معهم ، وكنت ضقت هاتيك الاكله الهنيه ، وكنت اليوم عرفت ماهي هذه الداهية التي ابت ان تنزل لي من حلقي ..
كان عقله يودي ويجيب مثل خيط يتكون على رحم قماش تنسجه ماكينة قطن . بسرعة .. شششششو ششششو شووو
رفع نظره اليها ..وجدها مازالت على تلك النظرة العجوله .. لشده مايكره اوقات الهزائم .. نظرات التشفي .. يخاف ان يضحكن فيه اولئك النسوة . عندما كان ينشر شباكه للدباااااس والقمري .. كان اكثر اترابه تحدي واصرار على ملء (قلوبيته) ..
فكر سريعا في محمد ود البلال .. ربما هو من قام بتدبير هذا الموقف .. الله يكرهو ذاك المسنوووووح براسه المدوقس داك ..ابدا لا يسلم احد من مقالبه المعفنه تلك ..
حانت معركة الحسم فليوحد الله ويخوضها .. كم مره الناس تموت . اجاب بتاكيد .. مرة واحدة بس .. شمر عن كم قميصه غاص باصابعه الخمسه في تلك الكتله الهلاميه ، ثم كور منها كتلة صغيرة وجعل يدردم باصابعه فيها ويدردم ويدردم حتى اصبحت بيضاويه تماما . ثم عاد بذاكرته الى حيث جاء .. غنم .. خيمه .. لحم . كبده . جلد .,. بصل . طمام .. عجين .. سكر .. رطب بلح المدينه .. مديده .. شعيريه باللبن تعني عنده الحلا .. لا شيء بعدها ولا قبلها .. في اوقات متقدمه جدا دخل الكاستر .. ايووووه كستر .. كاد ان يصرح بما تفتق ذهنه وتوصل اليه . لكنه تراجع خجلا ان لا تكون هي ..
ايييييواااااات ليككككككك بت الكلب يا بت الكلب اماني مازريتك جنس زره .. انا اخوك يا فاطنه ..عاد في زولا يقدر علي .. شنو بنسوسه .. لا بسدوسا ..لا لا بس ب و س ا .. بسبوسا .. بس ياها هي .. بس اظنها هي ..
ثم توقف برهة يقيس حجم انتصاراته وعاد خائبا اقل حماسا .. بس قالولك البسبوسه لونها بني ... والداهية دي كل الوان الدنيا فيها بس اللون الاحمر دا شنو ... . وتراجع خائبا مثل ماجاء بخفي حنين ..
__________
شوية كد شيلوا نفسكم
واصد ليكم
| |
|
|
|
|
|
|
|
|
|
Re: لم يسبق له أن اكـل بسبوسـه (Re: shiry)
|
فردة سجي الجديد من اهــل العوض
وعندما رفع نظره ليعاين من حوله ، كان الجميع قد عرف ان (فردة) (سجي) الجديد يااااااااي موش استايل .. كلهم اجابوا بنفس هذه اللهجة المخنوعة .. وهي بدورها ايضا توصلت الى ماتوصلوا اليه .. رغم انها كانت في تلك اللحظة رأته حاجة كده عجيبه موديلز مختلف عن كل مارأته في حياتها .. ارادت ان تجلبه كنوع من التغيير وموديلز كمودي يغير من وتيرة احتفالاتهم شويه.
وكنت انا شيري الشمشاره اتابعهم بشغف .. كنت اريد ان اري الى اي طريق سوف ترسي هذه السخافات .والى اي نبع سوف تسقط هذه المياه الماجنه الاسنه ..
كانت امارات القلق واليأس قد بدأت تدب في ملامح وجهه بعد مرور اكثر من دقيقة على توقفه امام هذه الداهيه ، كان من الممكن ان لا يلفت نظر كائن من يكون ، لكن عشقرته الخفيفه الاولى ، وضحك صديقتها (مباهج) اربكته وحلقت حوله الانظار الفارقه ..
هي (فردته) كانت تتابعه ، وهو من ناحيته كان يريد ان يبرهن لها انه راجل تفتيحه وموش داقس ..يسعى جاهدا لينفي للكل انه ليس باهل العوض .. لذلك كان مصرا على اخبارها انه يعرف هذه الاصناف التي تتراصي امامه على اطباق .. في جامح خيالاته كان يرى انها من طعام اهل الجنه . لذلك استمر في مشواره انه يعرف اكثر .. رغم انها لم يمض على تعارفهما اكثر من ظهيره واحده .. راقبها منذ اول دخوله الجامعة هذا الشهر .. لم تنتبه له ولم يكن اصلا من (الحاجات) التي يمكن ان تلفت نظره .. لا في طريقه استايل لبسه ولا استايل كلامه ولا تسرحيه شعره ، ولا في شكل جزمته التي عليها اكثر من 45 مسمار يشارك جلد جزمة اتسهكت سنة صنعها من قرن كامل . متفوقا اكاديميا كان .. كحيلة العينين ، دعجاء .. سيالة الخد ، هيفاء ، كانت .. اذا تكلمت نقط منها العسل تف تف تف .. حتى يتعشرق كل من حولها ..بناتنا واولادنا .. حتى الطيور كان من السهولة سماع شدوها وشقشقتها تتبدل نحو الشدو الرخيم لمجرد ان تكون فوق مساحة تحتلها هي او حسنها او ظلها . ومع ذلك كانت لا تعرف هي ذلك عن نفسها .. قبل ان ترفع رجلها الى اول عتبه للقاعة ون او تو ، كان صاحبنا يهرول فطقشها فرد طقشها اطار حقيبتها التي لا تتعدي مساحتها مساحة جيب قميصه .. خلقعها اولا ثم آلمها في اصبعها الصغيروني .. فندت عنها صرخه ارتدى صدادها الف مرة فوق سماء الجامعة :
اااااااحي انا يو هيرت مي تو موتش .
وانخلع اكثر لكونه اخترقته اهااااااتها عميقا ، دشدشت شراييينه وهتكت اوتار حباله الصوتيه و انطم لتخترس كل الاصوات وكل حركة كائنات الدنيا على حاسة سمعه .. ومشت تلك الاهااااات تزحف وتدب كدبابة مجنزره على كامل مساحات اوردته . وتلخبط ، وتلعثم .. وخرجت خرابيطه التي كانت تسكن ازقة شرايين الراس . وكل ماخلى مكان في انسجته احتلت طعامتها . رائحتها .. صرختها بسمتها مساحة من تلك الانسجة ..
.......
لم يتبقي كثير للهترشه
شيلوا الصبر
الصابرات روابح
جايه صاده
| |
|
|
|
|
|
|
|
|
|
Re: لم يسبق له أن اكـل بسبوسـه (Re: shiry)
|
كيف فاجأته وسكنت جواهو
واصبح فارغا الا منها .. وعندما كحلته بنظره كانت قد رأت فيه شيئا مختلفا .. لم تعرف ماهو .. قميصه الذي خرجت اكمامه للتو من خشم بقره .. ام بنطاله الذي ترتسم عليه كاروهات كبيييييره . ام جزمته التي تخربطك الوانها ولا تعرف ان كانت سوداء ام لا لون لها .. شعره الذي يشاكس الرياح ويشلغ الكون بصفيره .. نظارته السسوداء الكبيييرة .. ربما كان قد ورثها من جده الذي جاء يستلم نوط الشجاعة من الامام المهدي قبل اكثر من قرن كامل .. لست ادري لا تسألوني عن تاريخها ولا عن شكلها ..
المهم ذاك ماحدث ، وهذا بالضبط ما جعل (البنيه) تنسي ماحصل ، وتسحبه من يديه بعد عشرة دقائق تعارف .. لم يكن يعرف شيئا يقدمه لها كواجبا للضبافه تعلمه هناك في اهله سوي ان يعزمها وعلى استحياء على كباية (كركدي) باااااارده .. رغم ارائه المتجبرة جدا في المرأة . اقلاها سؤا ان تقف مشحوطة في كشك حاجة بااااردة وتكرتع الحاجة البااااردة وسط الرجال .. ومع ذلك ورغم كل هذه التحفظات .. تنازل مؤقتا وعزمها على الكركدي البارد .
وسط تشجيع من صديقاتها اصرت ان تسحبه معها لحضور حفلة عيد ميلادها في فندق القراندهوتيل .
كل ماكان يعرفه عن القراند هوتيل انه تابع للخواجات ومكان مؤقت لسكن العرسان ورئيس الجمهوريه .. وكل الذي كان يعرفه عن االقراند هوتيل انهم ربما يجهزون طعام اهل الجنه والتي من ضمنه طبعا (البسبوسه) . اكثر من ذلك لم يكن خياله بقادر على اجتياز مسافات ربما تهد حيله خيله وتلحقه امات طه .
وفوق كل ذلك عاد من تاني يحاول ان يتابع لقمته التي كانت ماتزال تواصل زحفها عبر حلقومه لتفسح للهواء المرور بسحب نفسها وطوطت حجمها حتى التصقت بجدار حلقومه وقصاد تفاحة ادم لكن من الداخل .
كانت ما تزال تنظر اليه باستغراب شديد . وتلك النظرة العجولة تحثه على مواصلة عمله .. وهذه الذائقة المشلوله التي تخصه تتكعوج وتتباطئ في اراحتها .. صديقاتها يجلسن على مقربة منهما وانا كنت هناك في زاوية ما اراغب كعادتي في شمارات من مثل هذا النوع .. تصلني الاصوات متداخله خام فيقوم (جهازي) السمعي بفلترتها وغربلتها فانتقى منها الصالح والذي يعتبني ارميه الى ماوراء الساوند سيتيم .
نفس الفكره المجنونه اخرجتني من شرودي واعادتني الى المساحة التي كانت تجمع تلك الشلة ، على بعد صحنين كنت اقف انا، اقصد على بعد شخصين فقط فقد كنت مدعوة شخصيا منها ..
......
صراحة ماعندي عذر للهترشه دي كلها
بس دا اخر اعلان
في الهترشه دي
شيلوا الصبر
| |
|
|
|
|
|
|
|
|
|
Re: لم يسبق له أن اكـل بسبوسـه (Re: shiry)
|
هترشه قبل النوووم
وعاد الى مابيده وعجز تماما ان يصل الى نتيجه وتذكر انه لم يسبق له ان اكل باسطه .. وانتظر لثواني اخرى حسبها ساعات .. وتنحنح ثم اعاد النظر الي عينيها وجد تلك النظرة العجولة .. خاف اكثر ان يتهم بانه من اهل العوض .. فتوكل على الحي الذي لا يموت وادخل تلك (الضواقة) الى خشمه دفعه واحده .. لم يحسن درمدتها كما لم يحسن تنفسها ، وفشلت ذائقته التي كانت من غير اي ذاكره .. ارسلت اشارات الحواس .. لتشمشم لها على خبر .. لحم .. كمونيه ، سليقه .. سبروك . مديده .. كاستر .. وشهههههههق ياربي دا كستر افرنجي ؟؟
كان هذا كل ما توصل اليه . ولو انه ترك شلاقته واكل دون ان يتجاري وراء تلك المسميات التي حاول ان يقطع لها اسما من راسه .. لكان كفى نفس شرا ، لم يكن يتوقعه بهذه الشراهة والكراهة ..
كانت (الضواقة ) تلك وهي تحط رحالها على لسانه قد تشتت بفعل الخلعة وعدم انتظام دقات القلب ، وكراكيب الحب التي سكنت حديثا قلبه .. وزحفت كل ذرة منها ترغب في عمل معين .. مثل افكاره المتضاربه والمتسارعة.. فكان لابد لشهيق يمسد شراييينه المخنوقه .. وكان الزفير مخنوقا على الجانب الاخر من حلقومه يتدافع للخروج ..
تلاقت كلها ذرات لقمته العجينيه السكريه وشهيقها الداخل مسعفا ، وزفيره المخنوق .. وذائقته التي ضاع تاريخها . فتعشرق عشرقة ارتجت لها كل الاطباق وطارت تتتتترااااااح ... كبكبرب .
وفي ثواني كانت عيونه تخرج مذعورة تبحث لها عن اماااااان .. وحباله الصوتيه تتقطع نياطها .. والنفس المزرور يهبط بصدره ويعلو به في غير ما انتظام ولا سكون .. وخرجت اصواتا كثيرة متداخله .. فكان لابد للخرابيط التي خرجت من ان تخرج من كل مسامات جسده . من اذنيه خرجت فتافيت . من مسامات جلده .. من نخرينه .. من خشمه .. من لثته ، من اسنانه.. من عيونه خرجت دموع غزيرة ..
وبما ان خوفه من الفضيحه كان اكبر من كل ما فعلته ذائقته تلك . فكان لابد ان يكون رد فعله اكبر بكثير مما توقع هو .. فخرجت التنهدات والتشهقاااااات .
والكحه كح كح كح كح . هيييييع
ثم انسدت المسامات كلها نهائيا .. لا كحه ، شهقه .. لا زفير ... توقف الصوت . واستعاض جسده بدلا من ذلك بالحركه والرفيس والملاووواه .
الاصبع اليمين كان قادرا وهو في حالات التصارع تلك ان يشتت اطباق اللحوم . وابهام يده اليسرى بفرد رفسه ... كشح قوالب السلطات . ونخرنينه شفطوا كل المقبلات . والسلطات .. والجرجير .. والخس .. وتطايرت قطع الدجاج ، واصابع الصوصيج . واختلط الكاتشب مع ام علي .. الباشميلا مع الجاتووه ..والمايونيز مع اصابع لقمه القاضي . وووو
وكنت انا خلفه تماما تخليت عن ضحكي عندما رأيت ان الوضع لخطير جدا ورحت ادق على ظهره دق دق ، ومن خلعتي وخلعته وخلعتنا والسفرجيه والطباخين وحراس الامن .. كل تناول ماعونا في يده واصبحنا نغرف من اي مصدر مائي يقابلنا ونغرغره لها في خشمه .. . صببنا له الماء السخن الذي يضع من فوقه القدور وهو من خوفه وخلعته يشيل ويقرطع فيها ..
وبعض من الحناكيش و من خلعته وخوفه استطاع ان يخطف (انبوبه) الدفاع المدني وهرول نحوه يسعي لافراغ محتوياتها فيه . لكن ربك ستر لم يعرف كيف يفتحها ..
وبعد معاناة وصراع مر مع الموت .. استطعنا ان نهزم الموت ونعيد اليه نفسه المقطوع .. فدني مني وهو يقول لي بالله ياشيري الداهية ديك (( ماياها كريند كرميلا البقولوها ؟؟)....
..
انشاء الله ماعدمناكم
تصبحوا على خير
| |
|
|
|
|
|
|
|
|
|
Re: لم يسبق له أن اكـل بسبوسـه (Re: robenson)
|
يا هوبلس ذكرتني بي نكتة الراجل الاحوص الي اشتري ليهو ببغاء احوص داير يدخلو في القفص ختاهو برة والببغاء عايز يطير دخل في القفص....
والا الاحوص التاني البيصرف راتبو بختو في جيب الواقف جمبو
| |
|
|
|
|
|
|
|
|
|
Re: لم يسبق له أن اكـل بسبوسـه (Re: shiry)
|
والله يا شيري انت ابداع مصفى (على وزن عسل مصفى) وكدة
انت عارفة انا بقرا كل بوستات الهترشة بتاعتك وحقيقي بستمتع بكمية الابداع الساكن فيها... لكن كل مرة الرد يغلبني والقى الناس سبقوني .
المرة الكلام وقف لي هنا دا ...بس قصاد تفاخة آدم القلتيها دي ..وقلتا علا امرقو...بالمناسبة الكلام الحا اقولو دا ما اقلال من شأن بقية الهترشات ولكن دي عن جد تستحق كاس الدوري ...وهي مليئة بالصور الملتقطة بمهارة من واقع كنت اظن انك بعيدة عنه بحكم اقامتك.
انت تعال يا هوبلس يا اخوي الحاصل عليك شنو؟؟؟ مالك طاشي وللا شنو؟؟
وللا آآآآ
ديل ناس تماضر وبدرالدين شنا عملوها فيك...
| |
|
|
|
|
|
|
|
|
|
Re: لم يسبق له أن اكـل بسبوسـه (Re: shiry)
|
الأخـت شــيــري الـبـرااااااااااااااااااااااااااايـة
ســـلام و لا مـربـع و لا مخمس سـلام عـدييييييييييييييييييل كــدا
الحـمـد لله و صلتي للبسبوسة يعني خلاص وصلنا للتحلية باقي الشاي بس
و نتفك من بوستاتك الكلها لـهـطـ دي. ‘نتي يا بت لناس كلامك كـلـو
عـن الأكـل ما ملاحظة كدا و الله الواحد فينا بقى إتخيلك بس برميل
و كافين فيهو كـورة من فوق يعني ما أقل من 190 كـلـيـلو مربع
ما خليتي أي نوع من أنواع الأكل إلا و إتكلمتي عنو أو جبتي سيرتو
و كـل هترشتك و قصصك و حكاويك حصلت ليك يا في المطاعم يا مملحة في مناسبة
و بعدين قاعدة بس تصوري في الناس الله لا لمانا معاك في مناسبة و الله
المسكين دا ليهو حق كان تقيف ليهو البسبوسة في حلقو كان إنتي قاعدة
حتى حركة الأصابعين مراقباها.
و زي ما قلت ليك شكلك كـدا البوست الجاي بتاعك فيهو شاي مصلح بالهبهان
ســــــــــلااااااااااام
| |
|
|
|
|
|
|
|
|
|
Re: لم يسبق له أن اكـل بسبوسـه (Re: ABUHUSSEIN)
|
هوبليز
سلامة النظر ياخوي ..والحوص ذاتو قالوا خشم بيوت
تسلم ياسيدي
روبينسون
ياخوي انت موش قالوا (رقوك) بس ياكافي البلا انت برضو الشكل ماخليتو .. ولا رقوك في المشاكل والاعمال الشريره بس .. مفروض تضبح خروفين .. خروف كرافه للترقيه وخروف كرامه للخروف ..
جــدو
سلمت ياسيدي للطله وسلمت كميات للاطراء . والله ياجدو ممكن تقول علي اني هتراشه محترفه والمحترف عشان يستحق لقب المهترشاتي لازم ينمي(قاموسو) نحن بناكل عيش منو ..
هاهاهاههاههاهاهاها .
عارف الايام دي عايزه القط كلام (اهل العوض) علا حديثهم صعب بالحيل علي .. دايرلو مترجم ملازم لزوم الشرح.. تعجبني جدا هذه اللهجات .. الله لا وراك (اللياقه) دي من لااايوقه ، اللياقة بتاعتي لمن امسك كلمة جديدة .. غالبا ما اكون في وضع تحسبي واحترازي وتأهبي .. لان اي من ناس بيتنا بكون اخلاقو جاااايه هنا من هذا التكرار الممل (لخفة) دمي الشرباااااااااات
هاهاهاههههااهاها
سلمت ياسيدي
ابو حسين
سلام عديل كده . برضو في النهاية اسم مثلث ..
لانو : سلام : الاسم الاول ..
عديل : الاسم الثاني
كدة : لقب الجد . وايضا اسم مثلث
شفت هترشتي ؟؟ لايمكنك سيدي ان تتخلص منها ..
لا ياسيدي و اكثر .. الله لا وقعك في طريقي .. لانو انت بالذات ح استعمل معااااك كاميرات لديها زووم حساس اوي اوي يلتقط ادق الصور .. والهمس المن نوع اوووووووششش فضحتونااااااا
علي فكره الولد داك ماخنقتو البسبوسه .. يا اهل العوض .؟
| |
|
|
|
|
|
|
|
|
|
Re: لم يسبق له أن اكـل بسبوسـه (Re: shiry)
|
الباشمهترشة الكبيرة شيري
باشمهترشة دي علي وزن باشمونّس النجرا لينا سجيمان اب اضان..
وبالنسبة للترجمة فما عندك اي مشكلة.. البتغلبك كلها قولي عوووووك ..عندنا ناس بي هنا من سنة حفروا البحر (انا ما منهم)....
انا غايتو ممكن اديك ما يكفيك مؤونة اسبوعين تلاتة ...بس ناس النيت ما يعرفو انه دا انا عشان ما يلحقوني بصالح الدعوات ...
جدو
| |
|
|
|
|
|
|
|
|
|
Re: لم يسبق له أن اكـل بسبوسـه (Re: جدو)
|
جدو
سلام مربع
حقيقي والله يا جدو . انا معجبة جدا بمفردات اهل الوسط عموما
وخاصة مفردة الهمباته
وبحس دائما انها مفردة بتركيبتهامتمردة وثورية
بتمني الناس البتعرف هذه اللهجات الحلوه
ما يبخلوا بيها على الناس المساكين اللي زينا
لانو من المهم جدا ان يعمل كل اهل السودان
على تأصيل وتأطير علاقتنامع المفردات
التي تتشكل في مناطق جغرافيه معينه
حتى اللهجات النوبيه ارى انه من الضروري جدا ان تدرس في المدارس
| |
|
|
|
|
|
|
|
|
|
Re: لم يسبق له أن اكـل بسبوسـه (Re: shiry)
|
الرائعة حد موت الحيل شيري
قتي بتدوري مفردات اهل العوض والهمباتة
امانة ما وقعتي لكن بس لوكي الصبر
النبدا ليك بالهمباتة
كم شديت علي تيسا حديدو بشل
وكم قرن بكار خاتر بهن في قل
يوم دكام بقول كل لي اللديبس حل
بلا فطس البليب دا كلو عيشة ذل
المشكلة الكلام دا بدون تنوين حا تشوفيه زي الفرنسي
وانا خايف كان شكلتو يبقي ليك هندي عديل كدا
وعشان ما اتعبك حا اشرح مع انو الشرح مخل جدا في شعر الهمباتة
قرن بتشديد الراء وهي اصلها قرنت يعني اوصلت الشي بآخر
وبكار هي الابل صغيرة السن يعني كم من مرة ربطت بكار صغار
خاتر تعني ماشي القل بكسر القاف معروفة
دكام ده اسم صاحب الهمباتي
اللديبس هو اللون المائل الي السواد والمقصود به هنا ثور كانا قد نهباه سويا وهو الامر الذي يتعارض مع الهمبته فالهمبته كانت معنية بسرقة الابل
عشان كده صاحبو ده قالو فك التور نحن بلا الابل عيشتنا ذل في ذل كما سياتي في البيت التالي
فطس بضم الفاء من افطس وهي عربية في اشارة الي انف الابل
البليب جمع بليبة وهي نوع من القماري
والبيت فيه تشبيه للابل بهذا النوع من الطيور
وهاك دي بدون شرح
يا ابتقزي اندرج منك فلانه فريقه
ارفق بالقران شينات مطابق الضيقة
زولي الناقدو منسول من عضام ناس كيقة
صبارا بترك العايلة ما هو حميقة
والكلام كلو للطيب ابو الزينة
وهو لم يسبق له ان اكل البسبوسة ولا انا
| |
|
|
|
|
|
|
|
|
|
Re: لم يسبق له أن اكـل بسبوسـه (Re: ايهاب)
|
سلام مربع
الزول الرائع
نزار حسين
بس انت قول لي كيف اجمع هذا النوع الراقي من الادب
ياربي الناس دي عارفه انو
البعوسو فيهو دا
ادب راقي جدا
؟؟
حتى لو هم عارفين
مثقفاتينا ماعارفين
بس فالحين لي
للنورس
والبنفسج
مع انو نادري جدا تلقي ليك ناس
شافوا النورس باستمرار
او في وضع يخلي النورس صديق للفرد السوداني
مثله مثل القمري
والبلوم
وعشوشه
كدي اشرح لي دي كتلني شمارا
زولي الناقدو منسول من عضام ناس كيقة
صبارا بترك العايلة ما هو حميقة
اتخيل لي بتكلم عن حبيبة الهجرتو
ايهاب
صااااح يا ايهاب
بالله عرفتني كيف ؟
دي كلمة ابوي على فكره كلما زهجته بكثرة اسئلتي
سلمت ياسيدي للطله
وربنا يخليك ياسيدي
| |
|
|
|
|
|
|
|
|
|
Re: لم يسبق له أن اكـل بسبوسـه (Re: shiry)
|
يمة خنقتني الداندرمة
يابا جرحتني الفلسكابة
مشروع حنكوش من اهل العوض
البت النضامة مكنة السنجر شيري
سلام مجدع بالدفعات
قسط اول
التقاها في بوابة الجامعة
نظرت اليه ونظر اليها
اُعجبا
جلسا معا ادهشها بثقافته
خلبت لبه برقتها
ذهبا الي الكفتريا
طلبت جاتوه واشتري من البائع المتجول نبقا
افترقا وهم متفقين علي انهم من بيئتين مختلفتين
قسط اخير
قاتلت من اجله اهلها وفضلته عليهم
تزوجا قسرا
ذهبت معه الي اهله
سالته امه :ماهذه المفعوصة التي جلبتها
عادت الي اهلها منكسرة
وكسب رضا امه
| |
|
|
|
|
|
|
|
|
|
Re: لم يسبق له أن اكـل بسبوسـه (Re: اساسي)
|
سلام مربع
اساسي
ايها المنحاز الى الجنس الذكوري على حساب الاناث
اذ مشيت تهلل لان الرجل
انحاز الى رضا امه
مع (انثانا) هي التي ضحت بكل شيء من اجله
وبعدين يجي (زولك)بكل سهولة
يبيع القضيه
قاتله الله ياله من ظالم
شفت الليلة قلبتها ليك قضية تفرقة عنصريه
وانحياز وجماعات السلام
والخضر والجميعات المناهضة
للحرب ضد الفراوله
شكرا لانك تمنيت لمشروعي
الهمباتي التوفيق
بكره تشوف يااساسي
كيف اقول
الرباعيات وكلام الهمباته
سلمت ياسيدي للطله
واحييي انا من عينك الحاره دي
لي يومين عندي وجع حلق
لمها عليك شويه
نزار حسين
تجدني شاكره جدا على هذه الابيات الحلوات .. والشعر الراقي المستوي الذي تتحفنا بها .. وانا مستعده جدا لهذه اللكاشر العظيمة
وزيدني منها اذ كانت ثقالتي لا تسبب لك تعبا ..
سلمت يارائع
هوزي العسل
موش بالله ؟؟ حقيقي والله ياهوزي الناس ديل عندهم كمية من الابداع والخبرات الحياتيه وشعر الحكمه والزهد بصورة ماعاديه . . بس هم ماعارفين الحته دي .. اتخيل ناس عايشين في الخلا .. لا قروا مدرسه لا شافوا العالم التاني عايش كيف .. وشوفي الكلام البقولوه دا .. عظيم كيف ..
من ناحية اني جيعاااانه فانا جيعانه وهسع وانا بكتب في الكلام دا . رائحة قدحة التوم . تغلغني حتى النخاع . واحسني وقلمي بنكتب بلون الخضراء .. ونكهة الخضروات وطعمها هو الذي يتحدث بدلا عني ..
انت برضو بتحبي البسبوسه زي ؟؟ رسليها لو من السودان . علي شرط عسلها ينقط . .عشان لو حصل ناس ال دي اتش ال دفقوا العسل بتاعها ارفع ليك فيهم دعوة .. ادفعهم دم قلبهم ..
سلمت ياستي للطله الحلوه وسلمت اكثر للبسبوسه التي وصلتني ياغاليه
| |
|
|
|
|
|
|
|
|
|
Re: لم يسبق له أن اكـل بسبوسـه (Re: shiry)
|
رائعتنا شيري
صدقت وانا شحصيا اري تن شعر الهمباتة فيه
ثقافة سودانية
عالية
نجي
لي زولي الناقدو منسول من عضام ناس كيقة
كيقة اسم طبعا
ناقدو من نقد بفتح النون والقاف والدال ويقول اهل العوض
عشوشة نقدت عيش الريف في اشارة الي عناية هذا الطائر الانيق في اختيار ما يأكل من الثمار فهو يختار اصفي حبات العيش اصفرارة وطلاوة
منسول يعني من نسل
والباقي معروف
صبارا بترك العايلة ما هو حميقة
اولا بترك دي
اقريها
BITORK
فزولو هذا المختار بعناية فائقة كاختيار عشوشة لعيش ريفها
علاوة علي نسله الكريم المنسول من عضام الناس الكرام وهم ناس كيقة
وافتكر انو المنسول من العضم ده ما فيه شك
فيه من الصفات الصبر وعدم الحماقة وتحمل الصعاب ما يؤهله بان يكون زوله
ولا زال المعني في بطن الهمباتي ابو الزينة
واب تقزي المخاطب هنا هو زاملة الهمباتي او جمله
وهاك تاني
امسيت يا جمل حاس بي طعنتا شافية
في الضلع القصار مازياني مي متلافية
كان الزول بساعدو الخالقو يلقي العافية
ما برقد برا ست الصبا المي جافية
طعنتا دي كتبتها لغرض التنوين الما عارف القاه وين؟؟؟؟
| |
|
|
|
|
|
|
|
|
 Re: لم يسبق له أن اكـل بسبوسـه (Re: shiry)
|
العزيزة اللذيذة شيري
اسمعي انتي الكلام ده كتبتيه قبل ما تتعشي
صاح؟
شكله الوقت كان متأخر وكان نفسك في بسبوسة
اسمعيني انتي بس اديني مكانك
بالظبط في السعودية وتليفونك
وبكره بيتصلو ليك ناس البريد الممتاز
وبيجبوها ليك في البيت
لوووووووووووووول
شنو ياخي الهترشة دي سببها جوعها ولا شنو
بس برضو اديني العنوان عشان
نقفل عليك السكك
لكن الاخ نزار حسين ده
اداك حصص اساسية في الكلام ده
والله بس دي فعلا على قولك ثقافات عدييل مفروض نهتم فيها
تحياتي
| |
|
|
|
|
|
|
|
|
|
Re: لم يسبق له أن اكـل بسبوسـه (Re: Hozy)
|
تساقط الظلام وانساب كظل امرأة، عندما أرخت وشاح الريح فوق شعرها ، تسابق ظلالها قوافل الأشرعة ، انحسرت ما بين خصر وثنايا موجة مغرورة ، لتكتب في الشاطيء قصائد وأشعار غزل .
| |
|
|
|
|
|
|
| |
shiry
جدو
ABUHUSSEIN
nazar hussien
ايهاب
فيس بوك
تويتر
انستقرام
يوتيوب
بنتيريست