|
|
 ثورة أهل العوض المسلحة
|
قال شيخ من أهل العوض :
نحن آجنيات سكتنا وشلنا الشيلة ، وقلنا الناس ديل أخوانّا ومافي مانع نقسم معاهن شقانا وعرقنا ، لكين هن ما رضوا ، وقالوا دايرين يقعدوا مع الحكومة ويقسموا معاها ، بس المشكلة هم ناسيين أنو الحكومة ذاتها بتاكل من عرقنا ومن شقانا نحن ، الحكومة لا زرعت لا حشّت ، ولا ربّت ولا رضّعت ، القطن ده من الله خلقنا نحن نزرعو ونحشّو ونسقيهو ونرفع جداولو ونشلخو ونلقطّو ونكبسو في الشوالات ونرحّلو للمحطة فوق جمالنا وحصينّا ، ونرجى الحساب البجيبو لينا ، ونرضى بالقاسمو لينا رب العالمين ، ونقول كان في شيتا شالوه منّنا بيمشي لي أخوانّا كان في الشرق وللا الغرب وللا الجنوب وللا الشمال .
بس أخوانا طمعو كتير وقالوا داريرين حقهم ، سووا ليهن حق في شيتا لا زرعوه ولا حشّوه ولا لمّوه ، عاد آجماعة الحق ده كيفنو ؟ نحن زرعنا وسقينا وحشينا ، ولما قطنّا نوّر قلنا ليكن تعالوا ، القطن قرّب يفقع ، تعالوا لقطوه معانا ، قتّو : لا ، نحن ما ناس لقيط ، نحن بنبيع الموية في الخرتوم ، ونحرس العمارات والبيوت البيبنو فيها جديد ، ومشيتوا وخليتونا ، ونحن قمنا اتحزمنا واتلزمنا وشمرنا ولقطنا القطن ، شيتا قدرنا عليهو ، وشيتا خليناهو في شدرو ، وصلناهو لمن بقى دولارات ، ولمن جاء وقت القروش جيتو قتّو دايرين حقكن ، عاد آجماعة حقا ليكن وين .
الحكومة قالت الناس ديل عندهن حق ، والناس ديل شايلين سلاح ، ونحن لازم نديهن حق ، وكان ما أديناهن حقهن بسوو لينا حرب ، دحين آجماعة إتو اتنازلوا من حقكن لي أخوانكن ديل .
قلنا آجماعة ما في مشكلة نحن اتنازلنا ، وعمرنا كلو نحن متنازلين ، لكن الجماعة ديل لما جاهم البترول والبلد بدت تصّلح فندروا فد مرة وقالوا تب ما معانا شريك . الحكومة قالت : آي ، كلام الجماعة ديل صاح ، بس نحن بنحنّسن عشان يدونا شوية بترول معاهن ، والحكومة حنست الجماعة ورضوا يدّوها شوية بترول ، لا حايق جاي ولا جاي ، أها قنّا ليهن ما دام أبيتو بي بترولكن نحن كمان بنابى بي قطنّا ، وكل زول يموت بي شغلتو ، قالوا لا القطن ده من زمان مقسم ، وما في طريقة يتغير تقسيمو ، ونصيبنا منّو ياهو نصيبنا ،
قنّا ليهم الكلام ده عيب ، وده كلاما بجيب اللوم ، قالوا والله يجيب اللي يجيبو ، نحن ما عندنا شغلة ، الحكومة قالت : آجماعة هوي ، الناس ديل معاهن سلاح ، ونحن ما بنقدر عليهن ، وامريكا معاهن ، دحين آجماعة ارضوا بالقسمة القالوها دي .
قلنا للحكومة : خلونا نقعد برانا ونشوف كلامكن ده ، ونقلّبو جاي وجاي ، وبعدين نقول ليكن راينا ، الحكومة قالت : بس ما تطولوا ، عشان أمريكا دي مستعجلة والجماعة ديل زي ما قّنا ليكن شايلين سلاح .
قعدنا أنا وحاج علي وحاج أمحمد ود الزين وحاج بخيت ود النور ومعانا فاطنة بت دفع الله ، قعدنا في ديوان حاج الطاهر ود اللمين ، والطاهر زاتو حاضر معانا .
آزول قدر ما نضمنا ما اتفقنا ، وشوية شوية جونا الوليدات ، وشوية آزول جاتنا البنيات ، والحلة كلها آزول إنخمت ، تقول في زولا كورك ليهن ، والله ناس جوة الديوان ، وناس قاعدة في الضل ، وحاج الطاهر ووليداتو ما قصّروا والله كفّوا الناس كلّهن ، شاهي وموية ،
أها آزول بيني وبينك الوليدات والبنيات راين غلب علينا نحن الكبار ، وقالوا ستين يمين ما نقبل بي جنس الكلام ده ، وقام ود الحسين آزول نضم ، باقي هو ولدا متعلم بلحيل وقاري ، وكمان كايس بلدة ، بعرف الناس كلهن ، لي ناس الحكومة ديل آزول بعرفن واحد واحد ، والله الجنا مو جنا نصاح ، مرق ليهن المدسوسة كلها وما خلا ليهن جنبا يرقدو عليهو ،
والله آزول أتاريهن كلهن حرامية ، ونحن أتارينا ما جايبن خبر ، قلنا الجنيات المتعلمين ديل مادام عارفين متل ده ، مالن من زمان ما فتوه لينا ،
آزول الجنا ود الحسين قال لينا تب ما ترضو ، أكان دايرن يقاسمونا في قطنّا ده ، نحن كمان نقاسمن في بترولن ، وأكان مادايرين يقاسمونا في البترول نحن بنمسك قطنّا علينا .
قنا لي ود الحسين ، تعال آجنا ، إت بتقول كلاما متل ده ، وأكان الحكومة دي جاتنا بي سلاحا نسوي شنو ؟
قال ود الحسين : اللي يقابلكن بالسلاح قابلوه بي السلاح ،
قنّا لي الجنا : آجنا سلاحا لينا وين ؟
قال :
العكاكيز والفرارير والسككّن .
قلنا ليهو الناس البيكاتلو ديل عندهن غابات وعندهن جبال ونحن ده كلو ما عندنا
قال :
أدخلوا غابات القطن ، والعيش ، ألبدو في أمّات عشارين ، ووسط العدسي
وهكذا انطلقت الثورة المسلحة تقودها جبهة تحرير السودان الجديدة جنودها وقياداتها هذه المرة من أهل العوض
|
|
 
|
|
|
|
|
|
|
|
Re: ثورة أهل العوض المسلحة (Re: ودقاسم)
|
و مشينا لي عند سيدي ... لقيناه في صف الجماعه... قال ما عندكم حق و ناس البترول الحق كله معاهم...
قللناله سيدي عيب ....
غايتو تاني ما اظن نكون من ناسه.
ولا مش كده يا ود قا سم.
| |
|
|
|
|
|
|
|
|
|
Re: ثورة أهل العوض المسلحة (Re: Omer54)
|
ود قاسم
أنتو عندكم قطن و أب عشرين تندسو وسطهم ،، نحن شريط من أشجار النخيل و بي فوق عتمور ،، العميان يجيب خبرنا بي نبلة ،، وين نروح ،، إلا كان نقع بيهم البحر
| |
|
|
|
|
|
|
|
|
|
Re: ثورة أهل العوض المسلحة (Re: ابو جهينة)
|
أبو جهينة
لك التحية
ما عليكم إلا أن تنضموا لثورة أهل العوض ، كما انضم الانقسنا وجبال النوبة وأبيي إلى الحركة الشعبية
وعند التفاوض نسميكم المناطق الحليفة ونطالب لكم بحقوقكم
| |
|
|
|
|
|
|
|
|
|
Re: ثورة أهل العوض المسلحة (Re: ودقاسم)
|
اتحاد مزارعي الجزيرة والمناقل من أقدم التنظيمات النقابية في السودان وقد برزت أسماء مثل
الأمين محمد الأمين
يوسف أحمد المصطفى
برقاوي
أبوسنينة
حمد النتيفة
العمدة الريح
ويقوم الاتحاد بدور كبير في الحفاظ على حقوق المزارعين ، وينظم صفوفهم ويرفع مطالبهم ويراقب التزام الحكومة تجاه المزارعين وتجاه المشروع .
وتصدر جريدة الجزيرة وهي جريدة شهرية لتعبر عن الاتحاد وتنقل أخبار المشروع وإدارته وتقدم مواضيع عديدة تختص بتنمية وتطوير المشروع .
| |
|
|
|
|
|
|
| |
ودقاسم
ابو جهينة
فيس بوك
تويتر
انستقرام
يوتيوب
بنتيريست