|
|
|
 Re: ود الشلهمة كما تناوله ذات مرة الاستاذ الطيب محمد الطيب .. (Re: Ahmed Yousif Abu Harira)
|
والله يا احمد كانى الآن شايل نعلاتى فى ايدى ومتشمر وماشى فى الطين واسمع فى خرير الخور والرعدة فوق راسى تدودى وانظر الى تلك المناظر البهية بعد ان انكسى وجه المريا بالخدار.
ــــــــــــــــــــــــــــــــــــــــــــــــــــــــــــــــــــــــــــ
والله ياود النعيم كأنو ود أب حريرة
بكتب فى مسرحية عن لوحات ود الشلهمة
وأنت بتمثل دور البطل
ونحنا المشاهدين.
| |
 
|
|
|
|
|
|
|
|
Re: ود الشلهمة كما تناوله ذات مرة الاستاذ الطيب محمد الطيب .. (Re: Ahmed Yousif Abu Harira)
|
النُوم البِرَيّحْ ......قَاشَرَنو أبْصّارِي
وأخلى الدكه ظعن الملكة ببرد ناري
شَدَرْة دَارُو قُوقّنْ فُوقْ فِروعها قَمَاري
برتاح كيف ذهن مخي...وتروق أفكاري
----------ـــــــــــــــــــــــــــــ
هى يا أحمد تبرأ من السهر
كدى نوخ... وخلى ظعن الملكة فى محلو
وروق شوية... ماالك مستعجل الفراق !؟
أولا :ـ
بعد شرحك للرواين دا خلاس بقيت ( الطيب محمد الطيب ) المنبر
ما فرقت الحمر الوحشية من الغزلان كتير دا أقرب وصف
تانى هام :ـ
شرح قيسان الليل الطيب محمد الطيب الفوق دا ما ممكن تكلفتو كدى ساكت أبدا
لازم ترجع تجيب لينا كل مربوع مع شرحو فى خانة منفصلة
ولا أسمح لى أنا بقوم بالعملية دى ضرورى.
ـــــــــــــــــــــــــــــــــــــــــــــــــــــــــــــــ
بمناسبة ( شرح قيسان الليل الطيب .... سمعت نكتة
( الضو ود عشامة ) ( بلادى أنا الليلة الشيخ الطيب ؟؟؟)
| |
|
|
|
|
|
|
|
|
|
Re: ود الشلهمة كما تناوله ذات مرة الاستاذ الطيب محمد الطيب .. (Re: سمية الحسن طلحة)
|
سمية
كيفنك؟
شيخ الطيب ، رحمه الله ، رجل عالم بالأدب الشعبي ومتمكن من علمه ...وكنت قد قررت أن اعود إليه تفصيلا وتناوله حبة حبه...بس الوكت معاي مو كتير اليومين ديل..لكنني حتما ولابد أن أعود إليه..
اما قيسان عشا الضيفان فقد عجزت فعلا لا قولا عن شكره ...ونختها ليهو "يدا سلفت ودينٌ مستحق".
| Quote: ولا أسمح لى أنا بقوم بالعملية دى ضرورى |
أغدو شاكرن ومقدرن ....
وإذنك معاك والدار دارك لا شك...
| |
|
|
|
|
|
|
|
|
|
Re: ود الشلهمة كما تناوله ذات مرة الاستاذ الطيب محمد الطيب .. (Re: Ahmed Yousif Abu Harira)
|
| Quote: والندى فوق حواجبو النايرات متجاري |
صباح الخير..ياحمد..
ود الشلهمة دا نحات..ولا شنو
وليه ما قال الندى فوق خدودو..ايش معنى ذكر الحواجب...قاصد يشبه حواجب المحبوب بغش البطانة
لان الحواجب ممكن تميسك التدى لسويعات اما الخدود بتزلقها وبتبقى اللمعة بس..عموما ذكرنا زميلنا لينا..لما يشوف واحدة خدها نايره.بقولك دى البروتين بنطط من وجهها..
لكن كلام شاعرنا دا ذكرنى بحادثة..كنا اتنين مجدعيين فى دلهى بعد ما صرفنا شيكاتنا فى جاناكيا بووورى..وطلعنا من سينمتها العجيبة..اخدنا لينا رقشة ومشينا باليكا بازار.السوق الارضى المشهور فى نيو دلى..قبل ما ندخل و فوق النجيلة ديك..عينى وقعت على هندية من عرب دلهى رابطة شعرها ضنم حضان.وعاجباها نفسها ..اِعلم الله ياحمد.شعرها مرتفع من الارض بشوية .قولت لصاحبى اسحر ليك الهندية دى .. بتشبه فرس البطحانى امرء القيس..قام رد على بتشبها بالحصان كمان ..
ذكرت ليه قوله..فى جواده الكوميت...
....ضليع اذا استدبرته سد فرجه
... بضاف فويق الارض ليس باعزل..
قال والله تشبيهك عبجنى..
اها انا تشبه الندى فوق الحواجب عجبنى خلاص
تسلم..
| |
|
|
|
|
|
|
|
|
|
Re: ود الشلهمة كما تناوله ذات مرة الاستاذ الطيب محمد الطيب .. (Re: سمية الحسن طلحة)
|
ناكر الحاسي بي وعرفوا المعاي وداري
سببي الما هو مسؤول من جَنِيةْ تاري
الخلى غَمِيدي سُكيب من يميني ويساري
ما دام فاقدو بسكت ما بغني خباري ؟؟
--------------------
يعجبني المقطع الأخير...
كيف لي أن أسكت وأتوقف عن نظم الشعر "الغُنا" ما دام المحبوب مفقود ...
لا أدري إن كانت كلمة "خباري" دي موجوده في كل السودان ولا لأ وما عارف هنا هل وردت لتفيد الاستنكار ام الاستفهام...
| |
|
|
|
|
|
|
|
|
|
Re: ود الشلهمة كما تناوله ذات مرة الاستاذ الطيب محمد الطيب .. (Re: Ahmed Yousif Abu Harira)
|
سَاَلْ فرج الله من ضَهَر النُهود مِتدلي
شَابِعْ قَشُو تبّابو الكُبارْ مِتْمَلي
من كُرْمُكْ مِقَنجِر بالصعيد ومولي
مفقودين عرب دُورِكْ كلامهُن يسلي
----------
هذه كانت خاتمة إبداع ود الشلهمة في وضف البطانة...
كنت قد ذكرت ان الشاعر ريما نظم هذه الأبيات وهو طريح سرير المرض...وكانت ولا تزال العهدة على الراوي إلى ان نستقصي ونبحث ونسأل..بيد ان الفقرة الثالثة من المربوع أعلاه توحي بأن الشاعر كان مسافر ..بدليل قوله أنه في منطقة الكُرمك ولا زال مشواره يمتد جنوبا نحو الصعيد..وبالتالي فأن حنينه إلى أرض البطانة وعربها ومن ضمنهم محبوبته بالضرورة سيمتد ويتطاول...
وفي رأي أن الخاتمة كانت أكثر من رائعة:
فقد ضمن كل أشواقه ومشاعره وحنينه ووضعها جميعا في كبسولة واحده من خمس كلمات :
| Quote: مفقودين عرب دُورِكْ كلامهُن يسلي |
وصحيح:
مفقودين عرب دُورِكْ كلامهن يسلي !!!
| |
|
|
|
|
|
|
|
|
|
Re: ود الشلهمة كما تناوله ذات مرة الاستاذ الطيب محمد الطيب .. (Re: سمية الحسن طلحة)
|
سمية كيفنك؟
شفتها والله يا سمية لكن عديتها بي مزاجي قلت النبطرو شوية الزول الماصع ده...
وشكرا علي التلحيقة ..
تعرفي غنا عمك طه ده زي الموَسّم (موسوم) ببصماته...إذا لقيتي لك واحدة طافرة في وسط 1000 غنوة تستطيعي التعرف عليها بكل سهولة وردها إلى صاحبها لانها لا تشبه سواه...عليك الله هسع دي البيقولها منو غيرو:
بـرقـك لاوح المِـزرة وبسَــم مبســوط
واتكـّـل سحابك ونيـل زراقـو خـطـوط
سيـلك في عـوالي الأرض ...مَحَر بشروط
وتباباالمقرّن ......جابو منو الحوت
كيف للبرق أن يبتسم؟...أهي بسمة المنتصر بعد ان صرع المزنه وخلى مويتها تتدفق..؟؟
ده بيذكرني بي مقطع قيل في وصف الناظر شيخ محمد:
Quote: يضحك وكت يشوف خصمو وحلاتو تزيد
لامن يعوسا لي قدرو ويقلبو نجيض |
بعدين شوفي المقطع الأخير ...تبوب البطانة جابت الحوت..
وثانيا:الكتبناهو هنا ده لا يمثل كل ما نظمه ود الشلهمة بخصوص الموضوع ده واعني (البطانة)...والطافر مو مخبور منها كتير...لكنه لحسن الحظ محفوظ في صدور العارفين به ومحبي شعره ...
وهذه لن تكون خاتمة المطاف ..وناوي ان شاء الله أصل شبله الاستاذ عمر طه الشلهمة عشان نميز الطافرات ديل ونلمهن علي مراحهن..
وإنتو في كواستكن دي كان لقيتولكن واحدةً طافره قبلوها علينا جاي..
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
| Quote: هنا يتابع شاعرنا بخياله حركة انتقال أحبابه في هذا اليوم من دار الدمر إلى الديار المؤقتة فيصف ظعائنهم التي تسير مجتمعة مع بعضها البعض في كتلة واحدة ...ورحيل العرب في هذه الرحلة مثير للاشجان ومنظرهم في غاية الروعة تكسو وجوههم فرحة ومسرة ونشوة عظيمة ... ولما كانت وسائل النقل خلال هذه الرحلة هي الدواب ففيهم من يسير ضمن القافلة راكبا بعير او حمار أو من يمشي راجلا ، وبينهم الشيوخ والأطفال والنساء والشباب وبينهم الغيد الحسان على العُطف والهوادج. ويحلمون معهم البروش والشُُمال والحنايات والشِعّبْ والحصائر والشُكّابْ واللدايات والعناقريب والدنبهوب والحبال والتباريق والاباريق والحلل والمشالعيب والقِرَبْ والسِعُونْ والجِربان والسحّارات والرُسانه والشكائم والصرائم والأخلة والسكاكين والسيوف والعصى والعكاكيز وغيرها مما خف وزنه.. تتبعهم معيز اللبن وكلاب الحراسة وكلاب الصيد...وقد سبقتهم قبل ايام قطعان الضأن والإبل والأبقار إلى مكان الإقامة الجديد وتقدمهم المزارعون بادوات الزراعة من سلاليك ومحاريث وملدات ونجامات وخلافه.. .. |
------------------
أحمد اب حريرة ..
حصل مرة مشيت مع الناس ديل في ترحالهم دا؟؟
انا غايتو فاتتني بي شوية ..
وكتي الجيت للدنيا دي لقيت اهلي بقوا ناس بحر وجروف ..لكنهم إحتفظوا بهذه الأدوات..
سلام
| |
|
|
|
|
|
|
|
|
|
Re: ود الشلهمة (Re: gessan)
|
| Quote: حصل مرة مشيت مع الناس ديل في ترحالهم دا؟؟ |
قيسان عشا الضيفان
لا والله عمري ما قمت لي مع رحيل...وليتني فعلت...لكن كلما قام رحيل تجد قلبي مع الجُراسه البنقرِن قام كلو...
نحن يا قيسان اخدتنا المدارس...ولا شك انك تعلم أن موسم الخريف هو بداية السنة الدراسية في السودان...كذلك فإن أهلنا ابتدو يستقروا في قرى دائمة وحلال منذ صبانا الباكر...وفي بداية التمانينات (أيام جهلنا) أصيب السودان كله بموجة جفاف وتصحر تلاشت على إثرها عملية الترحال مع البهائم واصبحت الزراعةمحلية في البلدات والتروس المحيطة بالقرية حسب ندرة المطر في تلك السنوات...
ففاتنا من هذه العملية الكثير ...وكم كنت أغبط بل أحسد ندادتنا الأولي تساقطوا مبكرا من المدرسة ودخلوا في المجرى العام للحياة في تلك النواحي...فكانت قوافل الترحال على ندرتها تأخذ من بين أيدينا الأقران ...ونحن بين فصل وفصل في مدارس الجن دي...
لا زلت أذكر حال أقراننا وقد تشبهوا بالكبار .. فتجد الصبي (من أقراننا) وقد لبس العراقي والسروال ووضع سكينو في ضراعو ولف عمامة تتسق مع حجم جمجمته الصغيرة مع (شقيانة) أو حذاء شِده ، وفي أحسن الأحوال مركوب صغير و(حُرحاف) يعني سفروق ومطرق سلم وجهبذ زاملته استعداد لرحلة الخريف الجميلة..ويمتد غيابهم شهورا ويعودون إلى الديار وقد كبروا سنوات بالمقارنة معنا....كيف لا أدري!!!
ويعودون إلينا بالحكاوي والقصص بعضها خيال صبية وبعضها حقائق عن البطانة ونباتاتها وحيوانها وقدر كبير من الطرف والملح..
ليتني أعود القهقرى إلى تلك السنوات ...ولربما كان اختياري مختلفا عندئذ..
دمت يا قيسان ياخيييييييي
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
وإنتو في كواستكن دي كان لقيتولكن واحدةً طافره قبلوها علينا جاي..
ــــــــــــــــــــــــــــــــــــ
أنا ياأحمد دايما بخت كلمتين بدويات وبتأمل الفرق
مثلا زى الكواسة والرواغة
بفسرا بى مزاجى كدى الأولانية زولا منمهل
والأخرانية زولا منكرب وعجلان
رأيك شنو نديك من مسدار الفنجرى فوق البطانة ؟
لعقد مقارنة بين الأخوين والإختلاف الظاهر رغم انهم
من بطن بيت واحد
زى ما قلت كلام طه بشبهو فعلا
طه أنا عايشتو إنسان
مرهف للغاية ولوحاتو تستاهل ناس نور الهادى والتشكيليين
أما الفنجرى تحش فى شعره الخشونة ودا داير نجارين زى
نزار حسين
و
مجاهد عبد الرحمن
لكم تحايا وسلام وإحترام
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
Quote: رأيك شنو نديك من مسدار الفنجرى فوق البطانة ؟
لعقد مقارنة بين الأخوين والإختلاف الظاهر رغم انهم
من بطن بيت واحد |
سمية كيفنك؟
لا مانع لدي طبعا...ولا تنسي وعدك بتنزيل شعرهما فوق شقيقهما المرحوم عمر..
والفنجري شاعر معروف...رغم أنو نال حظا أقل من الشهره مقارنة بشقيقه طه..
وده مجال جيد للمقارنة بين شاعرين من نفس البيت والبيئة والاتنين تناولا نفس الموضوع (البطانة)..
أنتظر مع المنتظرين ، ومن يوم الليلة سلمناك مقود هذا البوست وتنحينا إلى المقاعد الخلفية..
و دمتم
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
دوبيـــت : الفنجري فوق البطانة
برقِك قلـَّع السارية أم صبيبا ســاح
وتعّـالك كتـَـم من الهـواء اللفــّــاح
رعـدك رَزّ في المطرة التقيلة وقاح
وهَجـِك لاقى شمس الغيبة باكِر زاح
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
Quote: برقِك قلـَّع السارية أم صبيبا ســاح
وتعّـالك كتـَـم من الهـواء اللفـاح
رعـدك رَزّ في المطرة التقيلة وقاح
وهَجـِك لاقى شمس الغيبة باكِــر زاح |
هنا الذخيرة واحدة وفكرة البناء والتصوير متقاربة جدا... يعني الفكرة بشكل عام قريبة جدا جدا ..
ولو جيتيني وقلت لي عمك طه قال الكلام الفوق ده ...لن استغرب
واصلي
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
سلامات
وعوافي
يا ودابحريرة امانك اخوك ماغلتان غلت شديد خلاس ..
يازول بوستيك دا منجم يعلم الله ..
واخوك شوفو كعب علا بكرة بطبعوا هارد كوبي بالخط الغلاد داك باقيلك المسادير دي بتفك الزهج وبتجيب الرايحة ..
مرحبا بي النحرير ود الشلهمة .. وبي صناديد البطاحين لي حدهم ..
اها طبعا نحن البطاحين ديل بيربطنا بيهم نسب ..ظنيتك بتعرف عيال "ابقمزة" ..تيرابن في كوستي والخرطوم وما اظن فضل منهم شي علي ابودليك وباقي العقاب علا منتشرين في قري الجزيرة والبنادر ..
بجيك صادي بخدر ضراعك يالعزيز ..
وامانة البوست ما لقالو حارس ..
| |
|
|
|
|
|
|
|
|
|
Re: ود الشلهمة (Re: ودرملية)
|
Quote: برقِك قلـَّع السارية أم صبيبا ســاح
وتعّـالك كتـَـم من الهـواء اللفــّــاح
رعـدك رَزّ في المطرة التقيلة وقاح
وهَجـِك لاقى شمس الغيبة باكِر زاح |
بت طلحة سلامات
انا غايتو زى ما قال اخوى احمد زول نيل وجروف وباعى فى الغنا مو طويل، لكن اقولك ان ما قرأته عن ود الشلهمة فى هذا البوست وبين كلام الفنجرى الفوق دا فى رأيي يخرج من مشكاة واحدة.
واصلى وسوف نتابع بشغف
| |
|
|
|
|
|
|
|
|
|
Re: ود الشلهمة (Re: ودرملية)
|
أخونا العزيز
ود رملية
مرحبا بك وحللت أهلا ونزلت سهلا...
تعرف نحن قربنا نقطع في ناس الدوحة ديل وأوشكنا نقول ما فيهم رِفقة...
وإنت يا دوب التاني بعد قريبي ود الأمير يزور مكاننا ده...
لكن بعد وعدك القاطع بالعودة نخت اللوم الشايلنو...وننتظر.
---
أهلك البطاحين ناسا مزواجين لكن بي فهم...البتعجبهم خصالوا (من الرجال) بكرموهو ، يعزوهو وبناسبوهو..
شرفتنا كتير يا ود رملية ومرحبا بك once again ..
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
أحمد وود النعيم
لولا أننى سمعت كلام الفنجرى دا من خشم
عمر ود طه لى أضانى لأختلط على الأمر زيكم
ولكن كما قال أحدهم معبرا عن غلظة وخشونة
كلام الفنجرى : ـ
(مرحاكة الفنجرى طحينافشخة و درااش )
أصبروا جاييكم لوتو ...
إتسمحتي من صيفة وخـلاء وقهَبونة
واتفشَّت سحابتـك فوقــك المشحونة
أصبَحَت المواطي والضهور مطيونة
واتكسِّـيــتي بي تيابــاً مَنـوّع لونا
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
Quote: إتسمحتي من صيفة وخـلاء وقهَبونة
واتفشَّت سحابتـك فوقــك المشحونة
أصبَحَت المواطي والضهور مطيونة
واتكسِّـيــتي بي تيابــاً مَنـوّع لونا |
هنا الدروب قرررررربن يتفرقن...
البيت الأول مع دقة تصويره لكنه حاراً نار... صيف وخلا وقهبونة...ورِهاب وعطش ويباس ريق...
لكن المقطع الأخير فيه شئ من نفس طه..
---
أرجو أن لا نقسو على الفنجري عندما نضعه في موضع المقارنة مع طه...
يمكن محاولتو في ان يتخذ لنفسه منهج مستقل بعيدا عن منهج طه هو ماجعل مرحاكتو طحينها فشخة ودراش ..مقارنة بي غزل طه الدقيق وكاميرتو الديجيتال
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
سلام ..
فلتواصل أختنا العزيزة سمية في غنا الفنجري ..الله يديها العافية ..
عندي تسجيل صوتي يحكي فيهو "ود شعيت" عن قصة مجلس جبنة"وزنين"..
حاولت تفريغه كتابةً ..حتى نقف على ما يحكونه عن مجالس أنسهم ..
رايكم شنو ..نشوفو ونثري بيهو البوست دا؟؟
خاصة وأن سمية لديها فكرة اكثر مني حول مجلس وزنين.
او
كأني سمعتك يا اب حريرة إنك حترجع لي ود شعيت براهو ..ففي هذه الحالة سننتظرك طبعاً..
أها شِن رايكم ؟؟
سلام تاني ..
| |
|
|
|
|
|
|
|
|
|
Re: ود الشلهمة (Re: gessan)
|
سلام ..
فلتواصل أختنا العزيزة سمية في غنا الفنجري ..الله يديها العافية ..
ـــــــــــــــــــــ
الله يعافيك أخى العزيز
أها شِن رايكم ؟؟
ـــــــــــ
أرى أن هذا الأمر لايختلف عليه إثنان
وبالمناسبة أنا كنت أضن بمثل هذه
الأقوال الصحاح لأنى لاأجد مقاما يناسبها
وكنت أتلهى عنها ببوستات تسد الرمق هنا
وهناك وتناسب وتتماشى مع الفهم السائد
مع إحترامى لكل القامات بالمنبر.....
ولكن أحمد ربنا يديه العافية فتح هذه
الدار ولذا وجب علينا إيراد كل مالدينا
من كلام هؤلاء الفحول فلنتعاون جمعينا فى
جمع هذا التراث الثروة...
فبعد أن ننهى ما بداناه عن ود الشلهمة
نتجه لصنوه ودشعيت وهكذا ويجب أن لايبخل
صناديد القراء بما لديهم وفاءا لهؤلاء .
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
نواصل مع الفنجرى فوق البطانة
فيك لون الصفاري ذي كِم البَرَص مجليّة
واللبلب حُمرتـُو تقول عُيون قمرية
إنفرش التـَبَر عِرقـو إنفرط شمسيـة
يضرب في شعاع شمش الصباح النيّة
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
| Quote: كأني سمعتك يا اب حريرة إنك حترجع لي ود شعيت براهو ..ففي هذه الحالة سننتظرك طبعاً.. |
قيسان
كيفنك؟
طبا ما عندي مانع...
لكنني أقترح تأخيره شوية حتى تنتهي سمية من كلام ود الشلهمة والفنجري ومن ثم نجي فوق القامة عبد الكريم ودشعيت ومجادعاته مع زملائة من كبار الشعراء في صالون وزنين الأدبي..
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
سلام عليكما..
يا سمية واحمد..
انا في حالة زي دي ..ببقى متابع ليكم ..حاشوف لي سَمرة ضليلة انزّل فيها مخلوفتي ..
واقيّد الجمل يرعى في السِليم القريب دا ..وياني ماني بعيد منكم ..
ونامن تبقوا علي يا أحمد "أومي" لي بالعِمة ..
سلامين ..
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
| Quote: جبالك جَبَد كُجَرْ ......التِعُول واتغطى |
شوف هذه الجمادات من الجبال كيف تحولت الى أحياء متوهطة فوق تبروقة البطانة ومنسندة على مخدتها الخضراء ومدت يدها وجبدت كجر التعول واتغطت!!!
شوف كلمة (جبد) المفعمة بوفرة (كجر التعول) والقابلة لأن تنجبد لتغطى كل الجبال.
أبحريرة وسمية بت طلحة ربنا يديكم العافية يا النفوسكم صافية.
| |
|
|
|
|
|
|
|
|
|
Re: ود الشلهمة (Re: Balla Musa)
|
إتحلـّيتي بى طيباً وطاكي عريــس
مرقــن فوقـــك المتحزِّمَات بالدِيس
فكـّن فيك بخور واتمطـَّرن بالسيس
خلـّن عاشِقِن يابسـاً لهاتــو بَسِيـس
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
Quote: إتحلـّيتي بى طيباً وطاكي عريــس
مرقــن فوقـــك المتحزِّمَات بالدِيس
فكـّن فيك بخور واتمطـَّرن بالسيس
خلـّن عاشِقِن يابسـاً لهاتــو بَسِيـس
|
سلمت يدا جلالتك...وأدام تاجك وعزك
مرقــن فوقـــك المتحزِّمَات بالدِيس
فكـّن فيك بخور واتمطـَّرن بالسيس
بخور الفنجري مع نسايم طه يزيدن البطانة حلا فوق حلاتها المتأصلة فيها..
| Quote: خلـّن عاشِقِن يابسـاً لهاتــو بَسِيـس |
*
التعبير عن العشق بي عبارات مثل يباس الريق ونشاف اللهاة ده فيهو شفافية شديدة بالحيل..
* البسيس نشاف محلل للجزيئات ...والدقيق أقرب وصف له.
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
| Quote: شوف كلمة (جبد) المفعمة بوفرة (كجر التعول) والقابلة لأن تنجبد لتغطى كل الجبال. |
الدكتور/بله ود موسى
عندما نظم ود الشلهمة جداريته عن البطانة كان يعني من يمتازون بهذه الذهنية النابهة...ونحمد الله أنه لا زال هنالك من يستوعب هذا الجمال في العصر ده وبعد مرور عقود على رحيل ودالشلهمة (رضي الله عنه) كما تحب ان تبجله ...
مداومتك معانا تمنحنا العزم على المواصلة
ولك دوام المعزة والتقدير
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
سلووووووم اهل الدار
يا جماعه انا اليوم ما فضلت فيني دمعه تب من دخل داركم لمن مرق دماعي يتشتت متل حب العيش .
قيسان يا جنا لنك الحفظ ما تنسا
| |
|
|
|
|
|
|
|
|
|
Re: ود الشلهمة (Re: doma)
|
| Quote: سلووووووم اهل الدار |
حباب خالة الكل دومة
حباب صوت العقل والحكمة والاتزان بالمنبر
حباب داعية الحق والجمال والسلام
ونحن متلبسون حالة من الشرف الكبير بسبب هذا الحضور البهي
| Quote: يا جماعه انا اليوم ما فضلت فيني دمعه تب من دخل داركم لمن مرق دماعي يتشتت متل حب العيش . |
ده لأنك حنينة وأصيلة ونبيلة
شكرا الأستاذة دومة...ولك دوام الإحترام والتقدير..
| |
|
|
|
|
|
|
|
|
|
Re: ود الشلهمة (Re: Yassir Tayfour)
|
أتسمحتي من صيفـة وسمومـاً قالية
واتلاقت سواريك ياأم صبيب متـوالية
فكـّيتي الدُعاشــات والنسايــم الحالية
عربك ختـّو بى نيب الضهــور العالية
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
سلامات
وعوافي
حباني عيال البطاحين والحداهم ..
صبحتو بي رضاي الله ..
اها صالونكم متقب بالضيوف وناركم موقدا وابلكم واقفا وراسكم مزين كبد الوعر ..امانة مابتعجبوا يالحبان كرمكم دافق ورا وقدام ..
دحين سالتكم بي الله ديوانكم دا ماتسدوا بابوا كلو كلو ..
اياها واحتنا نجي نتكي فيها نشربلنا فنجان الييل قهوة ونبقا مارقين علي معايشنا ..
اها اقعدوا عافية وانشاء الله الخير طاريكم صباح ومسا
..
| |
|
|
|
|
|
|
|
|
|
Re: ود الشلهمة (Re: ودرملية)
|
| Quote: دحين سالتكم بي الله ديوانكم دا ماتسدوا بابوا كلو كلو .. |
ود رملية
الخير حالك وفالك
ودارا إنتو من زوارا ما بتنسد تب بإذن الله
فى وداعة الله.
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
الأخوان سلام
جرعتين من الفنجرى
الأولانية قبل مداخلة ودرملية
وهاكم التانية :ـ
هَــرّاسِك عاتم الليل أب صبيبا سـاقي
ووديانــك لفض بـــاردِن متــــلاقي
عربك قامو تب ماخلـّو فيهُن باقي
جاك المن سـقط الزيف ضراهو يتاقي
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
سمية بت طلحة
إليك تحية أخ لأخته
الفنجرى ياسمية أخد المعانى من طه ولكنه لم ينجح فى تصويرها كما فعل أخاه.
عندك هنا فى دى:
Quote: برقك شــال سحابـــو ولحّ متوطيك
صبّح ماك راكب فــوق ضهر عاليك
القلب قام مع عربــاً نشــوقـن فيـك
عُقب ياعيني حرمانه الســهاوي عليك |
أديك مثال لما تحته خط:
| Quote: بى قلبى المعاكن ياحبيب اتوصى |
وكل بيت له مايشابهه فى المعنى عند طه ويفارقه فى دقة التصوير.
غايتو يكفيه فخرا أنه أخو طه ودالشلهمة.
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
مقارنة سريعة :
قال طه:
من قدحي البريقات ..مايقي سَقَدْ وحسّ
وفى نفس المعنى:
سَقّد مايقي روقة الغمدة ...مابِتطلو
قال الفنجرى فى ذات المعنى:
عُقب ياعيني حرمانه الســهاوي عليك
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
أخى ياسر طيفور
رفع الله قدرك
لن نسامح أنفسنا إذا تركناك ترحل من المنبر
لك التحايا.
الأرباب/ بلة ودموسى
كنت أنتظر هذه الإبداعات منك
أنصفت طه... وهل تعلم أن
الفنجرى يكبر طه سنا....!
ولكن بالطبع ليس هذا مقياسا .
نواصل مع تصوير الفنجرى للبطانة :ـ
َرزّت فوقــك الخنـّا الدّويـها تـقيــل
علاويــك كلهن متحـزمات بالســيل
نزلن فيــك متجــاورات جنايب خيل
فـُراقك حرّ ياأم طعَمَــاً سمح بالحيل
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
الأستاذ أحمد أبو حريرة
تحياتي و إحترامي
تابعت هذا البوست المتدفق جمالا و ألقا
و الصمت في حرم الجمال جمال...
أنظر أخي إلى هذا الكلام
Quote: قَبَضْ القِبلي في كُوع الشمال برّاقِكْ
وقَشّطْ سدرو في عَامِر سحابو وسَاقِكْ
تِبُوبِكْ قَرّننْ السيل دَهَجْ شقاقِكْ
والضايق نُشُوقِكْ حَار عليهو فُرَاقِكْ |
حرَّم كاميرا ديجيتال ما تجيب جنس التصوير دة ..
أنظر إلى ( كوع الشمال ) .. وصف جغرافي يستحق أن يوضع ضمن مصطلحات الأطلس.
( قشط سدرو ) : مبالغة في الإيلاج
( عامر سحابو ) .. يجعلك تتذكر سحاب البطانة ذو اللون الداكن المخلوط بطبقات موغلة في البياض.
( دهج شقاقك ) ... إستعمل شقاقك و ليس المسافر عبر سهولك و وديانك .. فالذي يشق العتامير هو من يدخل معترك الترحال غير هياب ..يدخلها من حيث يشاء .. فهو أدرى بها كما يعرف أهل مكة شعابها.
( الضايق نشوقك ) ... و النشوق هو كل ما يتنشقه الأنف عن قُرْب .. و دعاشنا يسكن الأنف و القلب و الذاكرة ..
متعك الله بالعافية ..
| |
|
|
|
|
|
|
|
|
|
Re: ود الشلهمة (Re: ابو جهينة)
|
أبو النسب
أبوجهينة ناظر عموم بورداب الرياض
تشرفت كثيرا بمرورك ...وقد عزيت نسابتك.. ونحن بحاجة ماسة الى قلمك للكشف عن هذه المعاني السامية
مع وافر التقدير
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
كلمة حق يجب ان تقال وهى ان هذا البوست الذى قام فيه الاخ ابو حريره بتوثيق بعض روائع الشاعر الفحل ود الشلهمه لا اقول قد كان ولكنه مازال فاكهة هذا المنبر ، وكان حرى به ان يكون فى الصفحة الاولى دائما لان شاعره قد سطر اسمه اصلا فى سجل الخالدين والمبدعين.
جزى الله خيرا الاخ ابو حريره على هذا المجهود المقدر ، ونرجو منه ايضا ان يواصل فى مسعاه ويجمع ما تبقى من هذه الروائع من فحول شعراء البطانة قبل ان يطويها غبار النسيان.
| |
|
|
|
|
|
|
|
|
|
Re: ود الشلهمة (Re: على احمد النعيم)
|
Quote: ( دهج شقاقك ) ... إستعمل شقاقك و ليس المسافر عبر سهولك و وديانك .. فالذي يشق العتامير هو من يدخل معترك الترحال غير هياب ..يدخلها من حيث يشاء .. فهو أدرى بها كما يعرف أهل مكة شعابها.
|
الأديب الأريب / أبوجهينة
ثراء وتنوع تعمر به محافلك
ليس فى حاجة لإلقاء الضوء عليه
من حروفى الكليلة...
ولكننى أختلف معك فيما ذهبت إليه
فى هذا الشرح ياأبو النسب ...
الشقاق هنا هى جمع قلة وهى شقوق
الأرض ومفردها شق... والله أعلم
لكم ودى.
نواصل مع تصوير الفنجرى للبطانة :ــ
برّاقك فجيجو متـوالي لاالصباح مانام
عربـِـك عَـيَّنـو الشيـله وعـقـيـدُن قام
ساقـو جَنِيبـَة الملك المِسِـيلا حــزام
وعاشقك إن انتكل فوق جلدو مابنـلام
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
الملكة سمية
سلام لك حتى مطلع العودة للبلد
Quote: ولكننى أختلف معك فيما ذهبت إليه
فى هذا الشرح ياأبو النسب ...
الشقاق هنا هى جمع قلة وهى شقوق
الأرض ومفردها شق... والله أعلم |
بالرجوع لمعنى ( دهج ) فإن ما ذكرتيه يتوافق مع ( شقوق ) ..
شكرا للتنبيه
| Quote: برّاقك فجيجو متـوالي لاالصباح مانام |
تعرفي يا سمية ..
في السبعينات .. قطعت العتمور في فصل الخريف ذهابا و إيابا .. فجيج البروق يجعلك تحسين بأن هناك جوقة مغنين يصاحبها كورال و أوركسترا .. فتارة البرق يديك كوبليه وهاج .. ثم تأتي العتمة قليلاً .. لينبثق برق بعيد في خط متعرج كوتر جيتار يئن و يترنح مع السلم الموسيقي
و هكذا دواليك للصباح .. و يا هو دة المتوالي للصباح
| Quote: وعاشقك إن انتكل فوق جلدو مابنـلام |
لا حول و لا قوة إلا بالله العلي العظيم ..
شفتي العاشق دة ؟ كِمِل لحمو و إنهرس عضمو و ما باقيلو إلا الجلد يتكل عليهو حيلو ..
قمة الإعتصام الروحي و الجسدي .. لدرجة أنه لا لوم عليه و لا هو يحزن ..
واصلوا
| |
|
|
|
|
|
|
|
|
|
Re: ود الشلهمة (Re: ابو جهينة)
|
أبوجهينة
شكرا غير منفصم
طلباتكم أوامر نحن هنا لتلبيتها
نواصل مع الفنجرى والبطانة :ـ
فيـك سـماح مناظراً يجـذب الناظرين
فيـك ناس بلا كحـله ودلال سمحين
شــفت جَمَـال عــرباً بجــوك ناشقين
يتـمثـل على حــور الجـنــان العـيــن
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
سـماك زُرقتو زي الطاجـن الممسوح
واتـَّكـّـل سحابك زي سـطــور اللـوح
أتحلــّيتي بى طيبـاً روايحــو تـفـوح
وفيـك ريحــة دُعاشاتـاً تــرد الروح
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
Quote:
سـماك زُرقتو ...زي الطاجـن الممسوح
واتـَّكـّـل سحابك..زي سـطــور اللـوح
أتحلــّيتي بى طيبـاً روايحــو تـفـوح
وفيـك ريحــة دُعاشاتـاً تــرد الروح
|
وفيك ريحة دعاشاتن ترد الروح...
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
والآن ننقلكم إلى جانب آخر ...
إلى ملحمة بطولية من ملاحم أولاد الشلهمة
طه والفنجرى فى رثاء شقيقهم عمر
وضربة البداية مع الفذ طه ود الشلهمة :ـ
الشِّـي الفِيـك مَاهَا ظنُون تمَام مَأكُـودَه
واجبـَـة السُــترَة للبتلك دَوَابي جـدُودا
يافـارس الطوَاقِيهُــن حَدِيـــد الخُـودة
المـوت مُوبدعَــة لكن الرجَال مفقودة
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
| Quote: إلى ملحمة بطولية من ملاحم أولاد الشلهمة |
ايواااااااا دا الكلام الأنا راجيه لى مدة.
بت طلحة زيدينا أدام الله فضلك يابت ملوك البطانة.
تعرفى أنا البوست دا مع بوست ود النعيم خاتيهم فى (الففريت) ومرات كتيرة بفتحهم مباشرة دون الولوج للمنبر العام.
تحياتى وتقديرى
| |
|
|
|
|
|
|
|
|
|
Re: ود الشلهمة (Re: Balla Musa)
|
Quote: تعرفى أنا البوست دا مع بوست ود النعيم خاتيهم فى (الففريت) ومرات كتيرة بفتحهم مباشرة دون الولوج للمنبر العام.
|
تسلم اخى الدكتور بله، ولمثلك والله تنثر الدرر، ولا غرو فى ذلك لانك تعرف تماما من اين تؤكل الكتف.
وجزى الله خيرا الاخت سمية لمواصلتها فى هذا البوست، والعشم كبير فى ان تواصل وبالذات هذه الملحمة البطولية التى بدأتهاحتى نرى كيف تبكى الاسود.
| |
|
|
|
|
|
|
|
|
|
Re: ود الشلهمة (Re: على احمد النعيم)
|
سمية
نحن طبعا عاجزون عن الشكر (وبس خلاس)
| Quote: المـوت مُوبدعَــة لكن الرجَال مفقودة |
هكذا يبكي الرجال الرجال
إذا نطق رجلا بهذه العبارة ، فاعلم أن كل الاحزان قد تجمعت في أم قلبه....
وشوفو معي كيف جمعت هذه العبارة البسيطة في طياتها بين اليقين والجزع...
وتخيلوا مفهوم اليقين ومفهوم الجزع...من حيث الحجم...وكيف لعبارة مثل هذه ان تحتويهما...
والأهم من ذلك ..أنظروا لمقدرات طه (الشاعر) ...شاعر الجمال والمجبول عليه ..وشوفوهو كيف يجمل الموت بعد ان جمل لنا الحياة..
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
سلام الأخوان / بلة وود النعيم وأب حريرة
ماطلبتوا محال طلبكم على العين والرأس
لنرى كيف تبكى الأسود ياود النعيم
وكيف يجمل الموت هذا الشاعر الجميل
طه ود الشلهمة :ــ
قـلبـَـك مُو لحـــم من الدَبَادِب طايـر
صِندِيـد وَقعَـة العَركَة الخِيولها دَمَاير
الموت ياجَلِيـس أم رُوبَـه كَاسَـاً دَاير
سمَاحُو عليك ذي نُورة العَريس السـاير
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
Quote: الموت ياجَلِيـس أم رُوبَـه كَاسَـاً دَاير
سمَاحُو عليك ذي نُورة العَريس السـاير |
يا الله يا الله
والله لقد الجمت الألسن يا بت طلحة. ولا يسعنى الا ان اقول "يا ليتنى اموت مثل هذه الميتة"
والسؤال الذى قفز الى ذهنى وانا اقرأ هذه المرثية هو كيف كان الفقيد وهو حى؟
واعجبنى ايضا ثبات الشاعر وايمانه بالقضاء والقدر "الموت يا جليس ام روبة كاسا داير" وحقا:
وما المال والاهلون الا ودائع * ولا بد يوما ان ترد الودائع
ولكن حق له ان يبكى طالما هناك جمالا يرى متجسدا على وجه الميت.
| |
|
|
|
|
|
|
|
|
|
Re: ود الشلهمة (Re: على احمد النعيم)
|
قـلبـَـك مُو لحـــم من الدَبَادِب طايـر
صِندِيـد وَقعَـة العَركَة الخِيولها دَمَاير
الموت ياجَلِيـس أم رُوبَـه كَاسَـاً دَاير
سمَاحُو عليك ذي نُورة العَريس السـاير
البيت الأخير في غاية البلاغة والعزم في مواجهة الموت ليس من المحكوم عليه بالاعدام وحسب بل من أخوته الذين حضروا لحظة تنفيذ الحكم. ومن حسن الحظ ان فيهم شاعرنا البهي ود الشلهمة الذي صور لنا هذه اللقطة العجيبة..
ومع ذلك أجد البيتن الأول والثاني في غاية القوة ..لماذا؟ لأن كلاهما قد اعدنا لقبول امكانية تهلل وجه المحكوم بالاعدام شنقا حتى الموت ليشبه وجه العريس (الساير) وما ينتظره من سرور وحبور في عش الزوجية الجديد..
فهذا الفارس الجحجاح قد فتح صدره لمواجهة الموت باسارير متهللة وقابله بوجه منور ونفس طيبة راضية بحكم الله..كيف لا وقلبه ليس من اللحم يطير مع وقع النوازل..
بدا الرجل متصالحا مع نفسه في تلك اللحظة ولعله كان كذلك على الدوام..ومشهود له انه صنديد يقابل المعارك ذات العدد الذي لا يحصى من الخيول والفرسان والسلاح..فالموت إذن ليس إلا لحظة قد اعد لها نفسه منذ زمن قديم..
| |
|
|
|
|
|
|
|
|
|
Re: ود الشلهمة (Re: nourelhadi awad)
|
Quote: وود الشلهمة المبروك
يجر النم
وضمة لايسكت
حرم وانعل خاشي
وتراني حلف
أهيج في الخلق من جم
وأكاتل الضل
|
ياجماعة أتزاخرو للزول البكاتل ضلو دا !!!
نور الهادى
يازول وين ردك ووين بلودك
نحن شاشينا ليك ودودرنا فى كل البوستات
رمينا مالوفة كان تقبض واحدتن منهن وتجيبك هنا
جيدن جيت أنت مطلوب هنا بالإسم لرسم لوحات كلام
طه ودالشلهمة :ـ
ما بخلك حديث صنديد وقلبك قوى
والعمر أصلو موعود بالقبر ياضوى
خايف من ملامة النار غرامو تكوى
كتر خيرك إت علا الرجال بتسوى
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
الموت البريع القلب ويخافو الناس
فرحان بيهو تضحك منبسطلو خلاس ! ؟
مساوى جدودو ندر فى الصدف فراس
ماشفنالنا بنيانا بقيف غير ساس
والله .... ماشفنالنا بنيانا بقيف غير ساس
كلام عجيييب .
حق لنا الفخر بالأباء والأجداد وبك ياطه
وليس الإكتفاء بقول :ـ ها أنا ذا .
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
Quote: B]الموت البريع القلب ويخافو الناس
فرحان بيهو تضحك منبسطلو خلاس ! ؟
مساوى جدودو ندر فى الصدف فراس
ماشفنالنا بنيانا بقيف غير ساس |
الماعندو تاريخ يشوف ليه تاريخ ده احسن كلام سمعتو الصباح ده.
الاخت سميه .جيبى لينا كلام الفرسه المى كضب دى .دا السبب الخلانى
افتح بوست لى صدام لانى شفتو بام عينى امانه يالخوف ماكعب .
تحياتى الى جميع من شارك فى هذا المهرجان مهرجان ود الشلهمة.
صاحب الدار الابن احمد يوسف شكرا.
| |
|
|
|
|
|
|
|
|
|
Re: ود الشلهمة (Re: خالد المحرب)
|
Quote: الماعندو تاريخ يشوف ليه تاريخ ده احسن كلام سمعتو الصباح ده.
|
قلـبَـك مُـو لحَـم طِينـَـة وهـشِيـش دُرّابَة
أصَـــمْ من الحُجَـاره الأرضهـن كـرّابة
الـفـيــك ثـابـتــة مابـتـتـفـشّــر بتـتـورّابا
ليهــا النـّاس شـهـود بينة وجميع قارّابا
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
دود رَبـِيـطـة الوعـرَة أب زرايبا كِـرّة
حِسّـــك كضّـم ألبـِل عِـن صَقِعـة الجـِرّة
ســايـم عُمـرو سَاخيـبـو ومسهلو بَــرّة
خايـف من كـلامـا عُـقـبُـو لوم ومَعَـرّة
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
وي سلووووووووم
انتو عارفين حرم أنا لي يومين مصاقر المنبر ده وقايلو عطلان ..أتارني فاتح الصفحة (القديمة) الميته وأشيل وأفتش عليك ياود الشلهمة سماء وطا مافي وبرق الصعيد مافي ..وأقول يا ربي الحاصل شنو؟ واحاول أتداخل مع الناس ماني قادر وتجيني الرسالة (لا يمكنك ...الخ) الماسنجر مافي...والمواضيع في الصفحة الأولى إياها زاتها ما بتتغير...قلت لي روحي حرم انهقلنا في منبرنا..
هسه بس حتين فَكَرتَ لي عبارة (عنوان المنبر الجديد) ودخلت لقيت الناس زي حيران ودعيسى يسووا أوووووووووو..
أمانة يا الجهل ماك نصيبه
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
Quote: دود رَبـِيـطـة الوعـرَة أب زرايبا كِـرّة
حِسّـــك كضّـم ألبـِل عِـن صَقِعـة الجـِرّة
ســايـم عُمـرو سَاخيـبـو ومسهلو بَــرّة
خايـف من كـلامـا عُـقـبُـو لوم ومَعَـرّة |
انا سمعت انو الزول الفارس كان دخل الدكة ونضم ، ألبل بكضمن الجرة..وفي رأي أن البيت التاني من كلام ود الشلهمة يثبت هذا الزعم المأثور
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
و ما زال الركْب ينتظر الحداء
و أنا أقرأ هذا الكلام الذي يملأ الصدر بشهيق هواء مؤكسد بالأصالة .. و أخرجه زفيراً من راحة الروح ..يتملكني شعور صادق بأنني على ظهر ناقة بشارية تطأ آكام البطانة شرقاً في ذاك الزمان المتخم بالعفوية و الرجولة و الفراسة و الشهامة ..
واصلوا هذه الدوزنة
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
| Quote: أمانة يا الجهل ماك نصيبه |
والله يا أحمد أخوى فقدتك قلت أتصل أشوفك
لكن ما نى حارية ناس قيلى ديل فى شيتاً
بغلبم على وش الأرض بعد شيطنتم دى..
أناهسع من أمس غالبنى أطبع عربى
وأعمل رد من داخل الموضوع ولمن أطلع
على الكمبيوتر يطبع عربى وتانى أنقله داخل الموقع
كيبورد مدستر وبشتغل بمزاجو عربى وأفرنجى
جن كلكى وريح أحمر وحبشى وخواجة ...
كل شي ولا جهل التكنولوجيا دا
أبْ رســوَه الكتـَل وَجّوُ ونتِرتـُو غَـتِيته
يومَك في الكريهة صَدفـتوُ ماها بخيته
ياصَنَـد الخِيـولا مــوَاتِى يـــوم الظِيـته
بَرَاوَة عليك أخد فُرصَـه وشئونـك سيتا
| |
|
|
|
|
|
|
|
|
|
Re: ود الشلهمة (Re: Balla Musa)
|
ماخـجـّـلتَ سِـــتـّات القـُـنـَاع الســابل
وخلـّيت الوَرَاك وَدعِـيـنُـو قوّي يقابل
مِمّا قـُمـتَ دُوداً للقواسِـــي مـدَابـِــل
الموت أصلومَدرُوع في الوريد ومتابل
| |
|
|
|
|
|
|
|
|
|
Re: ود الشلهمة (Re: على احمد النعيم)
|
ماخـجـّـلتَ سِـــتّات القـُـنَاع الســابل
وخلـّيت الوَرَاك وَدعِـيـنُـو قوّي يقابل
مِمّا قـُمـتَ دُوداً للقواسِـــي مـدَابِــل
الموت أصلومَدرُوع في الوريد ومتابل
------
رحم الله شاعرنا طه ود الشلهمة الذي يسلبك الخطاب ويخليك speechless و Thunderstruck ...يعني ما يديك فرقة لقول اي شئ سواء انك تمجمج راسك إعجابا وقبولا وإيجابا...
وإذا فتح الله عليك بكلمة واحدة فلتكن لا حول ولا قوة إلا بالله !!
غاية الامتنان لك يا سمية
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
Quote: هـِن حَــالاك حُـلُـــوياً مابتكمِّــل زينـو
إلا يحجبـك المولى إن بقيـت جـِب شينو |
خصال والله يا بت طلحه قل ان توجد.
الله يديك العافية.
| |
|
|
|
|
|
|
|
|
|
Re: ود الشلهمة (Re: على احمد النعيم)
|
فيـك شيـتاً مأكدَه ماهـا دَايــــره شهُـود
قِسِمْة المَولى ليك فـَرسَة ومكـارم وجـود
علي وشّــَـك بتـتـخــايـل ملامــح الدّود
مابـِتـزحْـزَح اليــــوم القِبـيــل مَوعُــود
| |
|
|
|
|
|
|
|
|
|
Re: ود الشلهمة (Re: على احمد النعيم)
|
Quote: هـِن حَــالاك حُـلُـــوياً مابتكمِّــل زينـو
إلا يحجبـك المولى إن بقيـت جـِب شينو |
بل هذه صفة الأغلبية ياود النعيم.
القلة فقط يختلفون عن ذلك ..
والقلة من الطرف الإيجابى متسامحون..
ومن الطرف الآخر غتيتون.. يكون حلوين قدامك ويدفنوا ليك.
يا بت طلحة كنت قد سمعت أن لطه ودالشلهمة نضم فى أخيه عمر وتشوقت لسماعه خصوصا بعد براعته فى تصوير البطانة..
لاشك أنه جيد ولكنه يقل كثيرا عما نظمه فى البطانة والشطران أعلاه خير دليل.
عندى أغنية بصوت على إبراهيم اللحو بقول مطلعا:
أبوناصر بقول شعرى ولسانى مطرق
وجبلى الفيهو من العاديات بتدرق..
وكلها بنفس قوة هذا المطلع بس للأسف فى كاسيت وماعرفت أحولو لسى دى أو أدخلها فى الكمبيوتر.
| |
|
|
|
|
|
|
|
|
|
Re: ود الشلهمة (Re: Balla Musa)
|
Quote: يا بت طلحة كنت قد سمعت أن لطه ودالشلهمة نضم فى أخيه عمر وتشوقت لسماعه خصوصا بعد براعته فى تصوير البطانة..
لاشك أنه جيد ولكنه يقل كثيرا عما نظمه فى البطانة والشطران أعلاه خير دليل.
|
!!!
لايتوافق رأيي مع رأيك هنا .
Quote: بس للأسف فى كاسيت وماعرفت أحولو لسى دى أو أدخلها فى الكمبيوتر.
|
لو تمنن علينا ببعض وقتك فتكتبه ثم تطبعه كما نفعل نحن
نكون شاكرين ومقدرين وممنونين .
الحـي فـيـــها موموعــود مِعَمـِّـر دِيمِـة
واصــلو الدنيــا زايله وراحلة ماها مقِيمَة
سـَـاسَـك رَسـمُو بَيّن، طوبتو ثابته قديمة
إت عَمَـّرتـُـو ماباصَـــرتو بى تهدِيمَـة
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
Quote: الحـي فـيـــها موموعــود مِعَمـِّـر دِيمِـة
واصــلو الدنيــا زايله وراحلة ماها مقِيمَة
|
هذا القول الذى يذكر بزوال الدنيا ذكرنى قول احد ابناء البطاحين كان مقيما فى الكويت ويدعى على حسن عكود، عاد فى إجازة واثناء إجازته غزا العراق الكويت وضاعت كل تحويشته، عندها قال شعرا كثيرا فى الحظوظ وفى الدنيا ووجهها العابس:
التاريخ بسجل والدفاتر حاضرة
اصلها دار خراب البى عمارها مغادرا
بقت النفوس من غير سبب متهادره
ما شفتوها فى ناس الكويت ساوالا ستين نادرة
| |
|
|
|
|
|
|
|
|
|
Re: ود الشلهمة (Re: على احمد النعيم)
|
| Quote: يا بت طلحة كنت قد سمعت أن لطه ودالشلهمة نضم فى أخيه عمر وتشوقت لسماعه خصوصا بعد براعته فى تصوير البطانة..لاشك أنه جيد ولكنه يقل كثيرا عما نظمه فى البطانة والشطران أعلاه خير دليل |
بله ود موسى
لك التحيات الطيبات
أتفهم ما تقول ، وذاك من فرط حسن ظنك بالشاعر العظيم ود الشلهمة ، لكنني أختلف معك في التقدير. فشعر طه (فوق عمر) لا يمكن وصفه بأقل من "ممتاز" ...وفي رأي أن (الدوز) العالي الذي تعرضنا له من جدارية البطانة لود الشلهمة نفسه كان وسيظل معيارا تقاس عليه كل الإبداعات الأخرى من هذا الصنف... لكن لابد لنا ان ننتبه إلى إختلاف الموضوع واحساس الشاعر وحالته الوجدانية والظروف المحيطة بكل حالة على حده...
وشخصيا أجد ان شعر (مدح) الشجاعة من أصعب المجالات..ومع ذلك اعتقد ان شعر طه عليه رحمة الله ، قد خلد عمر ولا ينقص مثقال ذرة من الرصانة والبلاغة والجزالة التي اعتدنا عليها منه..
ولكم دوام المحبة
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
تِيرابــَـك طِيـنـُـــو عزيــز ماهـو مبَنقِر
وَد نَاسَــاً رتُوت مَاهُـن عَـويـِت بَازنقِر
ياأب ِرســوَة العَلي ضَهَر المِرَادفَة مصَنقِر
ماخَتـّيت خَجـِلـتاً سِـيــدهَا يمشِـي مدنقِر
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
أبْ رسـوَة الغُلاد كِفـفُـو وشُداد ضِرعَاتـُو
خبـَرك هَجَّج الكـُـون والمِريكِز جَاطُـو
فيـك شِيتاً قطـَـع شَكـّـُو ومنَافِي غلاطو
صبــرك إلا من صابريـن هِلال الفاتـو
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
قولـي فوقـَــك صِحّــا بى كضب مابلفقو
ياأب رســـوَة العجَن فِقر الطوايـيـق صَفقو
مولاي أعـطـاك قســماً كتـيـــر من رفقو
من صبـرك بتصبـر ناس جماعـة إن شفقو
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
ويختم طه ود الشلهمة ملحمته بحكم ومواعظ :ـ
الدنيـــا أم قـدود كل العليـــــها مقـــــافي
والموت فيـــها فرضـــاً للفرائض نـافي
يومـــاً فيهـــو ِبنفـَرز العَكـَــر والصـافي
أخـذت الكـــــاس ِبرنجيِّـــاً عليك عَـوَافي
مابضّـعَت شَــمتانـاً بيـضـــحـك لائـــم
وقلبك مَنشِيء من صخر الجبَال الصايم
العُمُــر أصلُو في الدنيا أم قِـدُود مُودَايم
وقِدّامَـــك شـَـفِيـع ويـل الذنوب وجرايم
| |
|
|
|
|
|
|
| |
Ahmed Yousif Abu Harira
على احمد النعيم
abuguta
الطيب شيقوق
gessan
ودرملية
Balla Musa
doma
Yassir Tayfour
ابو جهينة
خالد المحرب
فيس بوك
تويتر
انستقرام
يوتيوب
بنتيريست