|
|
 الريدي اللولا...
|
الحبيبين كيفنكم..
جيت مارق من درس العصر في المتوسط (الثانوي العام- الإعداد «للحناكيش»)..
شايل كتيباتي في جلدايي ألت بلاستيك ومبسوط أدوني عشرين في الانجليزي..
ماشي اتقدل في الفسحة ألت مربع 12 في الامتداد..
شويتين يا الحبان جن بنيات الفريق اللااااافوق مننا ماشات وينضاحكن..
طالعات من معهد «الأمل» بعد ما كمَلِن حصَصِن.. ماشات يتهامسِن ويتبسمن..
جن مارات من فوقي..
الساعة الشفتة في عيونها وشافت فيني ودنقرت..
ووكتين اتبسمت وقامن كدي الوجنات غتسن..
والضفيري تتلولح من تحت الطرحة وفيها خرابات علي الجُلَلْ ويحيدي حمرا والتاني صفرا..
وعيني دقشت الخرابة المن لاااااقدام وهاجرنو بالكراريس وهو يتمايل من هني لاااا هني
علي المنقايات الصغار وشايلاهن زيفي..
وكلما الكراريس يهجروهن زيادي أشيل وأبلع في ريقي وأتشهد...
والعجب وكتين وقع منها قلم الرصاص ودنقرت شالتو..
واااااضيقي أنا من الرجلين وكتين يكونن ممسحات بالكركار ويلمعن..
وحات ود الكرسني تحلف تقول أبنوس وضاربنو بولش
وحاتكم يا الحبيبين النار انطلقت فوقي..
ورجليني و«التموت تخلى» بقن يغتسن في التراب ويقومن
زي الباخرة في نص البحر وقامت عاصفة وتشوف فيها تغتس وتقوم..
وبقيت كلي انكرش زي الصايدني البُرجُم..
وركبيني يرجفن علي المكنة البيكسروبا شارع الظلط ديك..
ووكتين وصلن جنب الشارع الساكنة فيهو وبقت تودع في صحباتها..
انا اصلي وِدِر ضومة ضومة.. دخلت الجلدايي بي الكراريس بين محسني والبنطلون..
وختيت ايدي في نصي ووقفت أشوف فيهن..
وأصلي بقيت أرجف كلي زي الصايداني الوٍردي..
وأعاين فيها لامن جرَتْ السلك أليل الباب..
ووكتين جات تقفل الباب رفعت راسها وشافت فيني ودنقرت وسدت الباب..
مع سدة الباب ديك القالت (كَرَب) ديك وأنا قلبي دة بقى يناتل...
والكراريس وقعن في عِبِي وبقيت ماني قادر علي المشي..
وأتاريهو قلم الرصاص يا دابي بريتو قبل أمرق وبقى يطاعن فيني من تحت..
والشارع مليان ناس وماني قادر أدخل إيدي أمرقو..
وعلي العلي لابسلي لباس زي البيسووهن النسوان ديلك من باقي دمورية المرتبة..
والخرابة هاجرني في نصي... وأمي رحمها الله سوتلو لستكين من أبو قرش داك..
والعٍُقدة ألت اللستك كبيري وهاجراني في محسني ...
وأصلو إن كان لي محل اللستك بقى زي الجدول أليل المويي..
وواحد من الكراريس الدبوس أليلو مرق ومع طعين قلم الرصاص
أصلي بقيت ماشي علي الولد الطهروهوا كبيييييييييير وتلقاهو ماسك العراقي لاااقدام منو..
انتو قالولكم كان هاميني.. وحاتكم اشيل واتذكر في الوجنات وأبلع في ريقي..
وصلت البيت... وجري علي الحمام..
أتقولعت ومرقت الكراريس وقلم الرصاص.. إن كان ألقالكم الجسم كله مطعن وكله حبوب..
لا عرفتها ريدي ولا فحص أليل ملاريا..
بالله التقول نمت في الحوش في بورتسودان وكبسني الباعوض..
جيت مارق مفَشِق ولبست العراقي والسروال وقعدت في الطربيزي الكبيري..
وكان عندي امتحان أليل دين..
نان أنا حفظت شي..
وحاتكم بس افتح كتاب الدين كدي أشوف الضفيري ألتا بين السطور..
جبتلي ورقة ألت فلسكاب وبقيت أكتبلها في جواب..
وكانت عاجــــباني كلمة ((الشامخة)) وبقيت افكر أدخلها في الجواب أليل الريدي دة..
وطوالي كتبت: حبيبتي.. (أصلي ما شهدتها)..
إن مشاعري الشامخة.. و....
وبقيت أهضرب وأفسي في جواب الجن دة..
وأصابعيني ديل وهن يكتبن بالله علي إبرة مكنة الخياطة.. ينزلن ويطلعن..
ربكم رب الخير أصبحت الدنيي وأدونا الامتحان وما أظن جبت فيهو أكتر من 2 من عشرين..
وأستاذ الدين يمَحِط فيني بالبسطونة وأنا بالي هِنووووووووووك..
ووكتين جاء العصر دة لامن روحي مرقت..
بس شفتهن جن طالعات وهي معاهن.. مشيت قدامن ورميت الجواب
وفِرِد جرية للبيت..
ولي يوم الليلي ماني عارف قرت الجواب ولا لا
|
|
 
|
|
|
|
|
| العنوان |
الكاتب |
Date |
| الريدي اللولا... | طارق جبريل | 06-30-11, 05:15 PM |
| Re: الريدي اللولا... | جعفر محي الدين | 06-30-11, 05:58 PM |
| Re: الريدي اللولا... | طارق جبريل | 06-30-11, 10:13 PM |
| Re: الريدي اللولا... | haroon diyab | 06-30-11, 10:19 PM |
| Re: الريدي اللولا... | طارق جبريل | 07-01-11, 09:15 AM |
| Re: الريدي اللولا... | طارق جبريل | 07-04-11, 10:03 AM |
| Re: الريدي اللولا... | ابراهيم الرشيد وراق | 07-04-11, 12:10 PM |
| Re: الريدي اللولا... | طارق جبريل | 07-05-11, 10:11 AM |
| Re: الريدي اللولا... | عوض عبدالله طه | 07-04-11, 12:41 PM |
| Re: الريدي اللولا... | Fadl Karrar | 07-04-11, 01:28 PM |
| Re: الريدي اللولا... | طارق جبريل | 07-05-11, 10:18 AM |
| Re: الريدي اللولا... | طارق جبريل | 07-05-11, 10:16 AM |
| Re: الريدي اللولا... | ناصر احمد الامين | 07-05-11, 11:40 AM |
| Re: الريدي اللولا... | طارق جبريل | 07-06-11, 10:44 AM |
| Re: الريدي اللولا... | طارق جبريل | 09-29-11, 11:19 AM |
| Re: الريدي اللولا... | صلاح أبودية | 09-29-11, 12:02 PM |
| Re: الريدي اللولا... | عادل الباهي عبدالرازق | 09-29-11, 12:59 PM |
|
| |
طارق جبريل
فيس بوك
تويتر
انستقرام
يوتيوب
بنتيريست