بحري طراوة... ويا ناس بحري .. قالوا بتحبوا يلا حبونا..

Quote: الحبيب طارق.. كل عام وانت بخير.. ياخي معقول ما نسمع صوتك ولا نشوفك منذ نصف قرن من الزمان؟ من زمن عرس صاحبك ؟ والله كانت أيام طيبة... بس في فيلم انت ما عارفو.. المكان: نادي ضباط القوات المسلحة الزمان: أمسية بهية في واحد من العقود التلاتة الأخيرة من القرن الماضي!! الحدث: زواج واحد من أعز أصدقائك الحضور: حشد كبير من الأقارب والأصدقاء ووجهاء المجتمع البحراوي بكل طوائفه..عباس تلودي يصدح ب "حبيبي جفا وجفا فؤادي.. وقلبي ليهو ينادي ينآآآآدي) فتميد معه القلوب وتميل. فلاش باك بطل الفيلم دا انت عارفو.. مهووس بالعرس من الوسطى.. ومشى جدة واشتغل حمال في الميناء (هو قال اشتغلت مترجم) لمدة سنة وشال القروش صرة في خيط ويا فلانة جاك زول.. المهم طبعا في الحنة بتاعتو اليوم الأول كانت دكاكينية ساكت وكان الفنان انت والشيالين أنا وجعفر الخليفة الله يطراهو بالخير (الحمد لله لسه ما وصلنا مرحلة فلان الله يرحمو ويحسن إليه).. وأول مرة أشوف لي حنة بغنوا فيها (بدري سامي علاهو ما بطولو سماهو.. حبي شاغل فكري..).. أول مرة أنتبه لعذوبة اللحن ورقة الكلمات.. في يوم العزومة صاحبنا عمر الفحيل غنى للصباح ملح طبعا.. في نادي الضباط انت جبت ليهو تلودي.. وحبيبي طبعا القريشات الجابها وزعها من بدري .. حتى حق الفندق دفعو مقدم لأنو ما عايز مفاجآت!! أها يوم حفلة نادي الضبط صاحبك متسنتر ومبسوووط.. أها بعد تلودي ما عمل الفاصل الأول وأمتعنا بالكاشف.. جا في الوصلة التانية وبدا ب "ذكرتني" وعينك تاني وحاتك ما شافت نور.. الكهربا قطعت.. اللحظة ديك أنا كنت جنبو في الكوشة .. وجنبنا طبعا العروس وخالها الضابط (الحجز لينا النادي).. فجأة اشوف ليك زولي اتنتر (نتيرتو البتعرفها ديك) ووجه كلامو للخال : Iam ready for any generator ما عارف يا طارق أنا ليه في اللحظة ديك اتذكرت قصة الفار الوقع في زق النبيذ ولما فرفر طلع .. اتنفض وقال (أين القطط؟)ولما جاهو الكديس أخو البنات أخذ يتمتم في صوت خفيض (لا تآخذوا السكارى بما يقولون).. المهم يا سيدي الأمانتي ليك الموضوع عدى وما عارف جنابو نقش الفيلم ولا الموضوع مشا عليهو وصاحبك مرق منها .. يعني يا طارق اللحظة ديك لو جنابو قال ليهو الجنريتر قاعد بس دايرين لينا عشرة جنيه نجيب بيها بنزين صاحبك كان اتورط!! حبيت أسلم عليك وأبارك ليك العيد وأذكرك ببعض الايام الطيبة التي قضيناها بصحبتكم.. أرجو أن تكون بخير وعافية.. أنا في أبوظبي (الهجرة الثانية) والتالتة واقعة.. طبعا قعدت في السعودية 24 سنة .. لكن برضو ما قدر بطلنا الهمام.. كمال بي عضمة لسانو لما طلع من بحري الوكت داك أنا لسه في الجامعة !! طبعا هو معذور هو عاوز يضرب الرقم القياسي بتاع نسيبو الله يرحمو.. بمناسبة (الإبطاء) بلغة السعوديين.. قبل فترة مشينا مسقط لزيارة بعض أصحابنا وزملانا الكانوا شغالين معانا في سونا.. قضينا ويك اند خطير جدا ولما جينا مسافرين .. صاحبنا بشير عبد الدايم قال ( يا خوانا المرة الجاية نتلاقى في الموقف العظيم) قلنا ليهو ليه؟.. قال: هسه اتلاقينا بعد 30 سنة.. يعني تفتكرو لو اتلاقينا بعد نفس المدة حنتلاقى وين غير يوم القيامة؟ عزيزي طارق.. أتمني نتلاقى قبل يوم القيامة.. مع أطيب تحياتي وأرجو أن نتواصل أخوك عادل صديق