الخرطوم القديمة بنات....علي مر الدهور والازمنة

Quote: اخترنا ركناً بعيدا هادئا وجلسنا نحتسي الشاي ونجتّر الذكريات " ما شاء الله عليك يا صفاء من يومك شاطرة شديد وكنتي مصرة على كلية الطب .. عارفة كل ما اشوفك في الجريدة او التلفزيون اقول لراجلي دي كانت زميلتي في الثانوي واقعد احكي ليه عنك وعن شقاوتك انتي وشلتك الكنتوا بتعملوها ايام المدرسة .. وبصوت ضاحك اخذنا نسترجع تلك الايام ... " تتذكري يا صفاء لمن انتي وصحباتك تتلموا جنب النافورة في الفسحة وتقعدوا تغنوا وترقصوا ويجي المدير طاير من مكتبه وشايل عصايته وبيكورك ( يا بنات يا قليلات الادب يا عديمات التربية ) وانتو تجروا تتدسوا منو ورا الشجر ؟؟ .. اجبتها بضحكة جعلت العديد من الاعين المستهجنة تلتفت الينا فنهرتها بلطف " هي يا بدور انا نسيت اننا في بيت البكا .. اسكتي الناس ديل بعد شوية بيجوا يطردونا " فواصلت بصوت هامس " ولا تتذكري لمن انتي وصحباتك قررتوا تمشوا اسبوع العلوم في جامعة الخرطوم وقمتوا دخلتوا بالنفاج البين بيت المدير والمدرسة ونطيتوا حيطة الشارع ؟؟ اظن المرة ديك طلبوا ليكم اولياء امركم .. كتمت ضحكتي وانا اشعر بالبهجة تغمرني لهذه الذكريات الرائعة .. كان صوت بدور الهامس يعيد عقارب الساعة الى الوراء بنعومة جعلتني اتذكر كيف كنت انا وصديقاتي نتفق على الهرب من الحصص ومغادرة المدرسة بسرية تامة .. الذهاب الى شارع (15) والوقوف امام واجهة كوافير كيلوباترا والاستوديو المواجه له .. نتفرج على فساتين الزفاف وصور العرائس .. نتسكع امام البقالات بعد ان نشتري الفول السوداني والتسالي من البائعات المصطفات على طول الشارع .. ثم فجاة نقرر الذهاب الى شارع (41) لاكل الايسكريم .. حيرتنا في كيفية الوصول ثم الاتفاق على ركوب ( يا عم ) .. فرحة اصحاب العربات بركوبنا معهم .. غمزاتنا البرئية عندما نعطي اسماء مزورة لمن يحاول معرفة اسماءنا .. يا لها من ايام .. لم تنتبه بدور لشرود ذهني وعندما عدت اليها كانت ما زالت تضحك وهي تقول " الشئ الوحيد الكان بيشفع ليكم برغم شيطنتكم انكم كلكم كنتوا شاطرات شديد ومن اوائل الفصول .. وكل الناس كانت مستغربة كيف تكونوا شقيات كدة وشاطرات في نفس الوقت ؟؟.. الا باقي شلتك وين لسة متواصلين ولا الحياة فرقتكم ؟؟ ..

الاقتباس اعلاه .. جزء من قصاصة سرية من دفتر يوميات امراة خائنة ...

دة دليل على مدى تاثري بذكريات المرحلة ديك ...ومدى سطوتها على خيالي برغم السنوات الطويلة المرت ...

لمن جيت اكتب الحوار .. لاشعوريا لقيت نفسي برجع سنوات لورا واستحضر ذكريات الزمن الجميل ...

تعرفي .. كنت من شلة ( مشاغبة ) بالجد .. بناتها كلهم راس هوس في فصولهم .. برغم الشطارة والتفوق الاكاديمي ..

كان مديرنا الاستاذ / محمد سعيد معروف رحمه الله وغفر له بقدر ما علم وربى اجيال من بنات السودان .. تعبان معانا ..

كانت الشلة خليط من علمي وادبي .. مرات بدخلوا معاي حصص التاريخ والجغرافيا مرات بدخل معاهم حصص الكيميا والاحياء ( من يومي بكره الفيزياء والرياضيات )

لغاية الان بتربطني علاقة حميمة ببعض من صديقات الدراسة .. لا الزمن .. ولا بعد المسافات .. ولا اختلاف الظروف قدرت تغيرها ..

هو دة سر القديمة .. بتنشئ رابط لامرئي .. لكن متين .. وعميق .. وطويل المدى ...

غالبا انا وسهير اختك نكون في دفعات قريبة لبعض .. اساليها من الاسماء الكتبتها .. احتمال تعرف اسم او اكتر ..

تحياتي ...




ـــــــــــــــــ
جاك طلب الاضافة في الماسنجر ؟؟!! ....