د. سلافا... شكراً على هذا الإمتاع ... تعرفي انا درست في الخرطوم غرب بنات، الأميرية و الخرطوم القديمة ... دي صروح شامخة ما بتتلحق ... قبل شهر مريت بجنب الخرطوم القديمة يوم سبت و الدنيا خلا ما قدرت أقاوم إحساسي دخلت و إجتاحتني الذكريات ... و لك أن تتخيلي ... لك أن تتخيلي ...
Quote: ولد حضرت الناظر احمد شرف الدين صباح الخير اهو جيتك من بدرى قبل جرس الصباح الدكتورة المقصودة هى د/ منال عبدالعظيم ولد الزهوة بت العمدة ووالدتها هى بلقيس بت حامد ود العمدة وحبوبتها حجة السرة وساكنين آب روف .... يكون فاتك نص عمرك لو ما قريت الروايه دى خالص الود لك ولكاتبتها ....
وبص شوف القديمة بتعمل آيه " حوش بنات ود العمدة " رواية عن الحب والكراهية ..الخوف ... وبعض المسكوت عنه ..
عبد الدايم الله يجازي محنك تخيل انا زاتي في الاول قعدت افكر منال دي منو ؟؟!! ...
ويا سلافة يا شيخة روحي ربنا يفتح عليك زي ما فتحتي طاقات الذكريات الحلوة دي ...
يا نبيلة ... شكلنا كدة اتزاملنا في نفس الفترة ...
سنة اولى في القديمة .. واذا ما خانتني الذاكرة الفصل اسمو ( بنت وهب ) .. واقع في نص الممر الطويل .. وفاتح على الفسحة الصغيرة ..
قعدت في الكنبة الاولى .. وجات قعدت جنبي بت طويلة سمرا وعيونها كبيرة .. قالت لي اسمها نادية بشير اسماعيل ...
ومن اول حصة بقينا صحبات ولغاية الان هي اعز صديقة ... كل ما ارجع اجازة السودان بيكون اول تلفون ليها ...
كنا بنات سنة اولى بنتلهف على الفسحة عشان نطلع ونقعد جنب النافورة ونتفرج على بنات سنة تالتة .. كبار وسمحات .. مفلهمات وبعيانوا لينا بطرف عينهم ...
فصول تالتة كانت حلمنا .. لانها في الطرف التاني من المدرسة .. وجنبها مكتب المدير والمكتبة في الطابق التاني ... والاذاعة ...
فسحة الفطور والطيران على الكافتريا .. التزاحم حول سندويتشات سلطة الاسود والطعمية والفول والبيض ..
نظام بنات كبار وما بنجيب سندويتشات من البيت زي العيال ... نقعد متلاصقين في كنبات الخشب الطويلة .. ونتقاسم كل شئ ...
وما زالت الذكريات تتدفق ... ولي عودة انشاء الله ...
خيط رائع عن مدرسة بنات حلتنا في العمارات, مدرسه قدمت الكثير للسودان,
درست فيها خالاتي , ثم بنات خالاتي في السبعينات, والثمانينات, وقامت بتدريس
مادة الرياضيات فيها بين 85- 87 اختي الوحيده منار الجمري ابونوره. ومن مداخلات العدبد من الاخوة والاخوات يبدو ان هناك صداقات مشتركه تجمعني مع العديد من المتداخلين خاصة مها بشير, وهدي المرضي وسارجع للتعليق في اجازة Thanksgiving مع ودي وتقديري
مساء الخير علي الجميع آسفة يا جماعة علي الغياب لكن الشديد القوي تحية لكل من إنضم إالينا في رحاب الخرطوم القديمة بنات
بالمناسبة يا سلافة إنتي كتبتي عن الاستاذه الكريمة سعاد علام سعاد علام و ثريا علام أخوات و كانو الاثنين في نفس الفترة في الخرطوم الثانوية و أدعو بالرحمةو المغفرة لثريا علام و طول العمر لسعاد علام ....سعاد علام المدرسة إنسانة لن تتكر فهي كانت مدرستي في الانجلبزي في سنة ثانية إنسانة صح في كل شئ والدعاء بالرحمة و المغفرة لأستاذ مضوي و لست ماتلدا
بعد الخرطوم الابتدائية غرب للبنات تم إنتداب والدي للعمل خارج السودان رجعت مدني و قريت الثانوي العام في مدرسة "ب" الثانوية العامة للبنات الناظرة أستاذتي نفيسة البطري الست الرائعة و برضو ما بتتكرر تاني,ومدراساتي مريم نمر وأسياء بليل وفي مدرسة "ب" لقيت معاي ماجدة محمود محمد علي, تماضر أحمد خالد, أميرة حسن موسي هناء ابو الريش,مني عبد العظيم ابو قصيصة, مني علي الفحل, نزيهة علي رجب و غزلان بدوي حليمة محمود حشاش في نفس الوقت في مدرسة "أ" صاحباتنا إلهام سوارابي , خلود محمود حشاش و أخريات
قضيت ثلاثة سنوات العام في مدني ورجعنا تاني الخرطوم و أنا كنت دخلت الخرطوم القديمة للبنات الناظر العلامة الاستاذ الكبير محمد سعيد معرف علية رحمة الله و النائبة خديجة مصطفي لم يكن هناك تغيير كبير بالنسبة لي خصوصا إني زاملت معظم البنات في الخرطوم غرب الابتدائية كانت أكبر شلة في المدرسة و أكثر جنا و تهريجا هي شلتنا... أنا, هدي سامية محمد عمر" كبس" , أمونة أبراهيم صباحي, عزة حسن التاج, عاتكة صالح محمد نور جميلة محي الدين, سلوي حسين, هند بشير,وصال دهب, نوال محمد خير,تينة صلاح حسون, نازك محجوب عليها رحمة الله, ماجدة محمد طاهر,منجدة المغربي,
اذكر في مرة تم فصلي أنا و عاتكة صالح من المدرسة لسبب ما والمهم في الاخر وصلنا بالتفاوض مع أستاذ محمد سعيد معروف أن نحضر ولي أمرناو نتفاهم بعد داك وفي اليوم المقرر ذهب مع والدي للمدرسة و حضرة والدة عاتكة معاهاحيث والدها متوفي و طبعا نحنا الخوف كان كاتلناو حضر والدي للمدرسة وذهب لمكتب الناظر والدي وأستاذ محمد سعيد يعرفوا بعضهم المهم في الاخر الجماعة و الحمد لله بالونسة مع بعض نسواشوية موضوعنا إتفقوا علينا أنا و عاتكة و طلب مننا أني نبظل الجن و ننتبه ونكون غدوة والكلام الذي منه ودا نحنا لسة في سنة أولي من ضمن الحاجات الكتيرة البنعملها هي دك الحصص و نكون حامين بعيد من المكتب دنب الفصول البعيدة المهم في مرة نحنا حوالي ال15 داكين و الناظر إكتشف نحنا بر الفصول وكنا من فصول مختلفة و الغريبة طوالي بندك لكن اليوم داك وقعنا في يد الناظر المهم سكانا المدرسة كلهافي الاخر زنقنا كلنا في حتة صغيرة و ما كان عندنا حل غير المزيرة وإتحشرنا كلنا تحت الازيار و كانت بهدلة ما حصلت وبرضوا كان فيها تهديدي بالفصل و غايتو إنتهت ودي كان قدامنا في المدرسة في سنة ثالثة الصديقات سلمي التجاني علي و ثريا فتح الرحمن و زينب أبراهيم الياس ز و في سنة تانية ناس سعاد محمد توم التجاتي , هندية الطيب السيدو هند فريجون لما نحنا مشينا سنة تانية جونا في سنة أولي رقية ابو شرف, وصال السلمابي, إيمان بخاري و الغريبة أنا كنت مصاحبة ناس تالتة و ناس تانية وناس أولي و صداقتنا أنا و رقية إمتدت الي الان و بما إنو أمهاتنا صديقات منذ طفولتهن
تحياتي معز ابو نورة ولأسرتك و علي فكرة شفت مداخلتك هناك راسلني علي إيميلي عشان إرسل ليك إيميل تماضر أحمد خالد maha.bashir(AT)gmail.com
الاخت راعية البوست السلام عليكم ورحمة الله وبركاته شنو يا بنات القديمة منتظر واحدة منكم ولو بالغلط تتذكر المرحوم الاستاذ / عبدالقادر محمد سالح - رياضبات اعتقد كان بدرس في التمانينات وبعدها اصبح مديراً لمدرسة طحنون . وكل اخواتي وبنات عمي درسوا بالقديمة واخرهم بنات عمي عبدالقادر نهلة وفاطمة .
المدارس الثانوية العتيقة والمعتقة قليل ومنهم الخرطوم الثانوية بنات
مدرسة خلية نحل ، حين زرتها في العام 1994 ووقتها كانت بنت خالتي / الأستاذة صفية مصطفى معلمة بها ، وكذلك بنات خالتي / نازك ونون نورالدين الشيخ المبارك طالبات بالمدرسة
مدرسة منظمة وقوية ، وروح اسرية متجانسة( أساتذة / طلاب/عمال)
لكل طالبات مدرسة الخرطوم القديمة بنات وجميع منسوبيهاالود
التحية ليكم يا بنات الخرطوم القديمة مجددا وكما قالت الاخت سلافة من درسن في الخرطوم القديمة يحملون ذلك الرابط فيما بينهم حتى وان اختلفت الدفعات الخرطوم القديمة ... اسم بمجرد ان اذكره ( اجر نفس طويل من الحنين) وتتجمع الدموع في عيوني شوقا الى عودة لحظة من تلك اللحظات الرائعة داخل حوش القديمة
Quote: Hey 'Adil Tawfiq Salmat Wa kaif al-Hal I just wanted to say hello, I know it's weird and strange!!! I was reading Sudaneseonline.com. on the article that about The old Khartoum girls school I was trying to reply to the writer Dr. Sulafa al-'Aqib, unfortunately, her e-mail is not on her profileso I'm writing to you. Would you please pass this message to all MAN!!! This is great memories, I was student in that time in al-Khartoum al-Jadida in late 80sI'm in 40's now, however, I was resident in al-'Amarat close enough to the al-Qadimah BanatI have a lot of good and true memories from the school, also al-Umm-School That time was great, people were great even the life was great. Most of student were A student My greetings to all of you Have a good day Ahamed
صباح الخير بعد كباية القهوة اللذيذة الساعة 7:30 صباحا و الدنيا لسة ظلام و درجة الحرارة 5 تحت الصفر و برضو باردة شديد أستاذ عبد الدائم تحياتي الصديقة إيمان أبوبكر عثمان درست الجامعة في الكويت و هي إبنة وزير الحارجية السابق العم العزيز أبوبكر عثمان ربنا يدية طول العمر و الصحة يا رب
من صديقاتي العزيزات وبرضو من الخرطوم غرب الابتدائيةمديحة السنوسي عالية حسن عبد الله كرار أماني هارون العوض نادية عبد الله الحسن رباب وقيع الله
دخلت سنة أولي و كانت الامور في الدراسة ماشة تمام إلا حصةالرياضيات مع أستاذ عبد الرحيم وهو عقد لينا الدنيا و مافيها في نهاية السنة النتيجة جات و كل المواد 90 و مافوق إلا الرياضيات كعكة حمراء كبيرة معلماها أها قام أستاذ عبد الرحيم ناداني في المكتب وقال يعني إنتي دخلت الخرطوم الثانوية بأكبر نمرة في الرياضيات هسه مالك ساقطة فيها وإتحداني و قال لي خلاص موضوعك باظ وما حتقدري تخشي الهندسة الانتي عاوزاها.... المهم أنا برضو إتحديته و كان التقسيم للعلمي و الآدبي بتم بعد السنة الثانية المهم رجعت البيت و إتكلمت مع أمي و أبوي قلت ليهم أنا عاوزة أستاذ يدرسني رياضيات في البيت ووافقوا وإتكلمت مع أستاذ سمير الاستاذ المصري وطبعا بدأ معاي اسبوعين وبعدين مشيتوا لآني عرفت مشكلتي كانت وين وكنا أنا وهو بص بنتغالط في المسائل .... وبدأنا أنا و أستاذ عبد الرحيم الشغل الجد في الصف التاني و الغريبة هو درسني التلاته سنين و الحمد لله علي كدي لأني إتعلمت منه الكتير جدا بعد سنين طويلة قابلت أستاذ عبد الرحيم وعرفني طوالي و عرفته منه إنو بدرس في الجامعة وإن بيقوم بدور مهم في المناهج الرجل عبقرية وأكتر من متمكن من علمة له مني التبجيل و المحبة و أتمني أن يكون في أحسن الاحوال
مها
11-30-2008, 06:45 AM
osman righeem
osman righeem
تاريخ التسجيل: 06-21-2007
مجموع المشاركات: 10872
لدى ملاحظتان اود انقلهما لكم لاثراء البوست وزياده الفائده للمتداخلين ان رغبتم:
الاولى :تعريف الدفعه بتاريخ الالتحاق بالمدرسه والتخرج منها.
الثانيه: لم الاحظ من جيلنا اى من الاخوات 79_82 (هل اصبحن حبوبات وكبرن على الكتابه والاطلاع على البوست والا الحاصل شنو) ارجو حبه العمر تخليهم يكتبوا لنسمع اخبارهم.
أخي الكريم عثمان رغيم تحياتي وشكري علي توصيل الآمانة
Quote: اختنا مها بشير تحياتي
ليك تحايا من مديحة السنوسي فتحية شامي نجوي شامي
و السلام امانه
ولي مديحة وفتحية و نجوي تحية وسلام أجمل و أعمق و ياريت يعني لو يشاركو معانا بذكرياتهم عن المدرسة وممكن يراسلوني علي الايميل وبرضوا لكل من تود مشاركتنا maha.bashir(AT)gmail.com
تحياتي ومودتي
مها
11-30-2008, 01:57 PM
عابدون محمد عابدون
عابدون محمد عابدون
تاريخ التسجيل: 07-30-2008
مجموع المشاركات: 2607
اجمل مافي الموضوع هو استمرارية العلاقات لتصبح مصاهرة ونسب ...
صديقتنا هنادي .. اتزوجت كمال تاج الدين اخو صديقتنا حنان تاج الدين ... صديقتي الحبيبة نادية بشير اسماعيل تزوجت المهندس هشام عثمان اسماعيل شقيق سهام وليد اسد شيبون شقيق هالة تزوج فريدة عثمان اسماعيل شقيقة سهام وهشام .. شفتوا الغلوتية دي كيف ؟؟!! ..
القديمة دي مدرسة ولا كل المدارس .. علم وفن وادب وذوق وحضارة وادب واخلاق ...
بنات زي الدهب .. بقن نجمات في السما .. بفخر بيهن .. وبكل نجاح بسمعو عنهن ...
بنات دفعتي السمحات
ربة المنزل المكرسة نادية بشير اسماعيل ... الدكتورة هالة اسد شيبون ( شغالة مع الامم المتحدة في السودان ) الدكتورة ازاهر عبد الرحمن ( في كندا ) الدكتورة اتقياء داؤود ( تويتا ) الاستاذة حنان تاج الدين ( لغاية آخر ما سمعت عنها استاذة في الاحفاد ) البت الشاطرة سهام عثمان اسماعيل ( اتخرجت من الاسكول وعملت شركة كمبيوتر ) الظريفة روضة مامون ... البت العسل اميمة سيد احمد ... الوردة الخجولة امل الحكيم ..
وغيرهن ...
لكن تحياتي .. وحبي ...
ـــــــــــــــــــــــ عبد الدايم اخو البنات ... اظن بعد كلامي دة مامحتاج ارد على سؤالك ليه اخترت القديمة برغم بعدها الجغرافي عن مكان سكني
11-30-2008, 03:53 PM
عابدون محمد عابدون
عابدون محمد عابدون
تاريخ التسجيل: 07-30-2008
مجموع المشاركات: 2607
سلام و تحايا و شكرا لفتح طاقة الذكريات العطرة عن الخرطوم القديمة التى درست فيها و درست (بفتح الراء و السين) فيها اثنتين من اخواتى. واحدة منهن، نجوى رحمها الله، سكنت فى داخلية الخرطوم القديمة ايضا لاننا كنا خارج السودان حين كانت هى فى الثانوى (فى نهاية السبعينيات).
انضممت لسنة اولى بمدرسة الخرطوم القديمة بعد بدء العام الدراسى بفترة قصيرة، و ذلك لاننى كنت قد اقنعت اسرتى بان ادرس السنة الاولى و الثانية ثانوي بعطبرة، لاكون قريبة من جدتى رحمها الله، و ان ادرس السنة الثالثة و امتحن للشهادة من الخرطوم القديمة. و لكن بعد اسابيع قليلة اخبرونى بانه سيكون من الصعب تغيير المدرسة فى سنة ثالثة، و هكذا عدت للخرطوم و تم تسجيلى فى الخرطوم القديمة- اولى سمية.
كانت ادارة المدرسة قد ابتدعت فكرة (الفصل المتجول) للتغلب على مشكلة ازدحام الفصول. فكان فصلنا ينتقل من فصل لاخر حين تكون بنات ذلك الفصل فى حصص الرياضة او التدبير المنزلى او الفنون اوفى معامل العلوم او المكتبة، و كانت تجربة جميلة حيث اتيح لنا الدراسة فى فصول كثيرة، منها فصول سنة ثالثة. كذلك اتيح لبنات الفصل التعرف على بعضهن بصورة اقرب مما لو درسنا فى فصل (كل حصة مع جارة مختلفة). و طبعا كان هناك عذر جاهز لمن تريد"دكّ" الحصص، لانه لو تم ضبطها، فان الاجابة عادة ما تكون "انافى الفصل المتجول و نسيت الجدول فى البيت او ما عارفة الحصة فى ياتو فصل."
من الصديقات العزيزات فى الخرطوم القديمة د. امل عبدالرحمن البشير (اخت احمد و نجاة اعضاء البورد) و ثريا جمال و اميرة ابو راس. أيضا كانت معنا سناء نديم (بنت الوكيلة)، و نازك يحى و فاطمة جابر و سارة الترابى و مها مبارك، واخوات عزيزات اخريات.
اذكر من اساتذتناالمتميزين استاذ محمد عطية (استاذ الرياضيات العبقرى)، و استاذ عبد الغفور و عبد الرحمن الرضى (اللغة العربية)، و الروائية استاذة بثينة خضر مكى (درستنا الادب الانجليزى، و حتى الان اذكر طريقة ترديدها لبعض العبارات من رواية "ابكى بلدى المحبوب") و اقبال عرديب وسلمى عابدون (اللغة الانجليزية) و ست حفيظة (استاذة اللغة الفرنسية). و كان مدراء المدرسة فى زمننا الاساتذة محمد سعيد معروف و عبد الجبار عبد الهادى رحمهما الله.
دائما اعتقد اننى كنت محظوظة لاننى درست فى هذا الصرح العظيم. لكننى ايضا افكر فى كل البنات فى جميع انحاء السودان (غربه و شرقه و شماله و جنوبه -- بل فى الخرطوم ايضا) اللائى لم تتح لهن فرصة الدراسة على الاطلاق! و افكر ايضا انه فى يومناهذا (اعنى فى نوفمبر 2008) حين تولد بنت فى جنوب السودان، فان احتمال وفاتها اثناء الوضوع(حسب احصائيات الامم المتحدة العام الماضى) (1 من كل 9 نساء يمتن اثناء الولادة فى الجنوب)، اكبر من فرصة اكمالهاللدراسة الابتدائية (و احدة فقط من كل 100 بنت فى الجنوب يكملن الابتدائية). و افكر ان هذا يدخل فى صميم ما تعنيه عبارة مثل انعدام "عدالة توزيع السلطة و الثروة" فى السودان.
ندى مصطفى دفعة 85 (دفعة الانتفاضة التى بدأت يوم امتحان الشهادة لمادّة التاريخ)
أنا الشقيق الأصغر للطالبة العبقرية أناهيد جعفر محمد علي بخيت وهي حاضراً د. أناهيد أستاذة جامعية وأم ذات بنين وبنات وقربت تبقى حبوبة. وكنت مكلفاً بتوصيلهاذاك المشوار العجيب البيت-المدرسة-البيت وأديت هذه المهمة من الإبتدائي حتى مرحلة بص الجامعة والجامعة حيث تفرقنا.
كانت "الخرطوم القديمة" مدرسة الصفوة الطبقية والثقافية بالشراكة مع مدرسة الراهبات والإتحاد ذات الوشائج البريطانية وإن إمتازت الخرطوم القديمة على المدرستين بسودانيتها ولكنها كانت حسب تقديري تعكس -في جانب الزيادة- التفاوت والظلم بين المدارس وبين أقاليم السودان من حيث العدد والإمكانات والتجهيز وتوفير الكتب والأساتذة .
أكرم الله جهد الأستاذات آنجيل إسحاق وخديجة عبدالله محمد صالح والأستاذات علام وغيرهن فقد أنتجن مع الظروف جيلاً له هم موضوعي بقضايا المرأة والوطن والثقافة والطب والقانون والهندسة والتعليم ..إلخ .
أسعد الله أوقاتكم وأبهج ذكرياتكم وجعل الخير في عوائلكم وأسركم
بالله ممكن اسال سؤال ما محرج شوية .. انت دفعة كم ؟؟ صراحة انا لى ذكريات كدا حابب اعرفها ياما انتظرت تحت النيمة وانا ابحلق فى التخرج .. ( نهاية اليوم ) واشوفها واتبعها وهى تختفى فى احد ازقة شوارع ناس ناذر .. دايما لمن اتذكر القصة دى بحكى لاصحابي قصة واحد معجب ليهو بواحدة كل يوم ينتظرها فى راس الشارع .. تجى ماره يتابعها بعينو لمن تاخد اللفه استمر اسابيع لمن اتشجع من نظرة وابتسامة .. قام متابعها بنفسو لمن وصلت اللفه كل ما جادت به قريحته قال ليها : على العموم فرصة سعيدة
معليش بايخة تقولى شنو اها دالحصل لى مع بت الخرطوم 3 .. والاغرب انها برضو قالو وكثير ما يقولون انها درست مديسن .. اها قلت يمكن العشم تعرفيها لى
___________
انا دستور _ كان _ نازل هناك فى الخرطوم 3 .. خريجة الخرطوم القديمة دى ..
.. . ناس لا ترحم لا تخلى رحمه ربنا تنزل بالله شوف الحقد دا يا عادل .. يعنى عبدالدائم النضيف دا .. عمل نفسو وطيل بالانابة ومصر مافى واحدة قرت مديسن .. يمين كضاب ياخى بنات الخرطوم القديمة دى كلهن كان بدخلن اما مديسن او هندسة .. خصوصا بنات 3 و2 قال ادبي اكيد قصدك ناس السجانة والحلة الجديدة ( مع الاعتذار يا ناس هوووى ) ما تفهمونى غلط كما قالت ندى القلعة ..
يا سلافا دستور حسي نازل فى الصافية .. فلقد مر عقد من الزمان وعشرات الاعوام .. فلابد ان يتغير الجن والجان
_____________
اها يا نضيف بت ادبي دى كانت صفراء ؟؟
12-01-2008, 12:32 PM
محمد عبدالمنعم التلب
محمد عبدالمنعم التلب
تاريخ التسجيل: 09-13-2008
مجموع المشاركات: 155
يا عادل سمير انت مش قلت انك شخصية ليها وزنها وثقلها بالله اقيف لي فى الباب ده والبجى خاشى اعصرو لي واوعك تحن عليهو .. كمان جابت ليها صفراء وخدراء وملاح خدره فى شارع 15 ديل بنات مدرسة العروبة الكانو بياكلو ام فت فت وشطه وعجور فى سوق العشرة ، مش ايسكريم 41 .
12-02-2008, 06:06 AM
Adel Sameer Tawfiq
Adel Sameer Tawfiq
تاريخ التسجيل: 10-05-2006
مجموع المشاركات: 1074
وعلى فكرة .. في القديمة كانو معانا بنات من السجانة والحلة الجديدة ... علمي وادبي .. بنات شاطرات وفي قمة الذوق واللطافة ..
ـــــــــــــــــــ ست اقبال عرديب ... اظرف مدرسة ادب انجليزي ممكن تقابلها ... لمن كنت اقيف جنبها بحس بضخامة حجمي .. كانت نحيلة جدا .. وطيبة جدا .. ومتفانية جدا ... كان بيتها قريب للمدرسة .. وما كان عندها مانع تستضيفنا المسا عشان تزيد تحصيلنا من كتب الادب الانجليزي .. لمن ظهرت النتيجة كانت اول مدرسة لقيتها في وشي ... شفت الفخر في عيونها وهي بتقول لي مبروك جبتي اكبر نمرة في الادب الانجليزي على مستوى العاصمة .. دة كان مجهودها هي .. وتفانيها في تدريسنا ... الزمن الاتبرعت بيهو من وقت بيتها وحياتها ... شكرا يا ست اقبال .. لغاية الان ما فارقني حب قراية الادب الانجليزي ...
ــــــــــــــــــــ ست حفيظة مدرسة اللغة الفرنسية ..عملت المستحيل عشان تخلينا نشيل المادة معانا في امتحان الشهادة ... نطقها للكلمات حببنا فيها وبدينا معاها .. ( جو سوي او سي ) ... ( كومن تابل تو ) ... (ايه لي مالاد ) ... ( بونجور مسيو ) ... ( بونسوار مادموزيل )... على ما اذكر اخترنا ناخد المادة انا وزميلة من جنوب السودان اسمها سوزي .. كانت بت شاطرة شديد ... في النهاية وللاسف الشديد كلنا اتخلينا عن حصص اللغة الفرنسية في مقابل التركيز على المواد التانية الاكتر اهمية .. تحياتي لست حفيظة اينما كانت ...
لكي تحياتي سلافة وللعزيزة سناء وشكري لسؤالكم سعيدة جدا بكوني معاكم في حوش واحد ممتد من جذور تلك المدرسة الحبيبة الى قلوبنا متابعة معاكم وشايفة في البوست كل حنية شجر القديمة وحوشها وفصولها واساتذتها القديمة التي كما قالت سلافة اشبه بمدارس الرهبات وكلية فكتورياالتي تعلمك معنى الانضباط والنظام
ما زلت اذكر صف المدرسات الصباح في مواجهة باب المدرسة ومراقبة المظهر العام للطالبات
وتلك الجمل التي تعودنا سماعها ( يا بت الماشة هناك ولابسة حلق ديك .. تعالي بهنا ) وتلقوا البنات بيحاول يغطوا عليها لكن وين ... وهنا يا ويلها من سماع كلمتين عن معنى احترام الزي المدرسي ومهما حاولت البنات اخفاء معالم الحلق الممكن يكون اصغر من الدبوس تجدي الامر وقد انكشف وممكن جدا حملات التفتيش والمداهمة تحصل فجأة في الفصول وجاكي الويل يا اللابسة الحلق او السلسل
تعلمنا منهم الدقة واحترام المواعيد ..معنى احترام الفستان اللبني الذي نلبسه متذكرين باب المدرسة لما يقفل 7 ونص بالظبط وما بعفيكي مهما قدمتي من اعذار لو جيتي 7 ونص ودقيقة لانه اصلا بيفترضوا انه الطالبة مفروض 7 ونص تكون جوه فصلهاانشالله لو الدنيا اتقلبت ست فاطمة شوقي كانت ممكن تزعل جدا وتخلي الحصة لو جات ولقت طالبة واحدة بره الفصل بعد الجرس يضرب يا حليلها القديمة وحليل ايامها
لي عودة
12-01-2008, 01:35 PM
عابدون محمد عابدون
عابدون محمد عابدون
تاريخ التسجيل: 07-30-2008
مجموع المشاركات: 2607
العزيزة سلافة.. نهارك سعيد وجدت هذه الصورة من بين صورة نادرة للخرطوم القديمة وتضم أستاذات جليلات ..
من اليمين : استاذة ليلى مولود لغة إنجليزية ،الراحلة استاذة سهير بخاري مادة التأريخ ،،استاذة ثريا هاشم ،،استاذة محاسن جيلاني المديرة ،، الأخيرة خانتني الذاكرة تماما لم أستطع أن أتذكر إسمها ولكن أذكر أنها تدرس التدبير المنزلي ..
Quote: طبعا يا نبيلة ابدعتى ابدعتى ابدعتى وصحى صحفية ... بالجد نزلتى دموعنا زى ماقالت مايا,,,,, وطبعا دا مكتب ثريا هاشم الوكيلة عشان وضع التربيزة اول ماتجى داخلة يمين الباب مازى مكتب محاسن جيلاني(الناظرة) في الوش عشان ما تزوغى كدا ولاكدا.
12-02-2008, 11:56 AM
nada ali
nada ali
تاريخ التسجيل: 10-01-2003
مجموع المشاركات: 5258
Quote: اخر نقطة ذكرتيها تحديدا عن وفيات الامهات اثناء الولادة هى من صميم عملى كمدير
لقسم الصحة الانجابية في منظمة امريكية تعمل بدارفور...وما اخرنى اليوم عن التداخل هو الاعداد لورشة تثقيفية
للدايات عن رعاية الحالات الطارئة بعد الولادة
هذا عمل عظيم، حقيقي! ارجو ان تكتبى لنا اكثر (ربما فى بوست اخر) عن عملك.
الاخ المنصور، سلامات.
نجوى اختى، رحمها الله، كانت معجبة جدا باناهيد (الشاطرة و الشاعرة ايضا).
لا اتفق بان طالبات الخرطوم القديمة كلهن كن من "بنات الذوات" (فقد درست هناك و لست من بنات الذوات) لكن اكثرهن كن من البنات المجتهدات و الرائعات من انحاء المدينة المختلفة.
لم اكن اعرف ان الدكتورة سوزانا دوناتو درست فى الخرطوم القديمة! تعرفت عليها فى وقت لاحق و اعتقد انها من اميز السودانيات.
12-02-2008, 12:08 PM
sanaa gaffer
sanaa gaffer
تاريخ التسجيل: 11-16-2006
مجموع المشاركات: 1238
مايا شايفك كل يوم بتجى متأخرة ما تقولي لي جايه من امتداد ناصر كدارى ومافى مواصلات اقفلى ماسورة الاعذار دى وغسلى وشك من غبار شارع المطار وفتحى كويس الحصة فيــزياء . عارف فى ناس حتذوق من الحصة وتقعد تحت الازيار ..
مها بشير شايفها داكة كالعادة ليها كم يوم وبالتالى اثرت على مستوى هدى المرضى .
ننمنح الطالبة نبيلة 10 درجات عبارة عن اعمال سنة وبالتوفيق .
12-03-2008, 11:31 AM
ممدوح عثمان
ممدوح عثمان
تاريخ التسجيل: 04-21-2008
مجموع المشاركات: 594
.. . اها يا جماعة الدكتورة الكنت بستناها تحت النيمة دى ولمن اعطش بمشى للمزيرة فى الكورنرة لقيتوها لى ولا اتكل على الله ..
Quote: تعرف يا تبلدينا كنا بنخش طب بالفصل ,, يعني يقولو ليك بنات تالتة كدا كلهم دخلو طب الخرطوم, تخيل تمشي تلقي شلتك كلها في نفس الجامعة ونفس الكلية ودا اللي بيفسر العلاقة الازلية المستمرة لبنات القديمة ....بعدين انتا يقولو ليك الناس ماعايزة تقول دفعة كم تقول نزلو صور ,,,النبي مابتبالغ.
لا انا بنات القديمة ديل ما عندى فيهم كلام نهائى سماحة وشطارة وذوق وأدب .. يا الله ما تذكرونا سااى عشان كدا بالله شوفى صور البرالمة انسى صورة الدفعة انا متأكد انها بتكون محشورة فى النص ..
___________
ياخى الزولة دى عزيزة معزة النيم فى الصيف والله داير اشترى هدية لبتها زى دى بكون خمشوها من رابعة طب .. اها منو الاتزوجت فى رابعة؟؟
12-03-2008, 11:59 AM
ممدوح عثمان
ممدوح عثمان
تاريخ التسجيل: 04-21-2008
مجموع المشاركات: 594
سلام مربع لأحلى بوست وأجدع ناس وأحلى بنات وأروع ذكريات ................. الله يديك العافيه يا سلافا بقدر ما أثرت من شجون وأسلت من دموع إزيكم يا بنات القديمه ويا ضيوف حوشها الفسيح الوريف تحيه بقامة أشجارها الباسقه وفصولها العتيقه وممراتها المعبقه عطرا وشوقا وحنين ............................... في الحقيقه متابعه البوست من كم يوم ومن ساعتها وراسي مدور..... شريط ذكريات منطلق بسرعة إعصار بصراحه إحترت أبد مداخلتي كيف ولا من وين ولا وين؟ ........................ غايتو هسه قررت أخش رغم النعاس.... لأنه بعد صورة نبيله النزلتها دي مااا أظن في زول بيقعد بس يعاين بعيونه
.................................................. أولا : تحيه وإنحناءة تبجيل وتكريم لكل الأيادي البيضاء التي خطت بالطباشير على صفحات تاريخ التعليم نحتت في قلوبنا وشم الخرطوم القديمه بنات ,,,,, رسمت مستقبل مشرق لأجيال سابقه وقادمه لكل من علم حرفا في ذلك الصرح العظيم .....جميع أسلاتذتنا الأجلاء ومعلماتنا الفاضلات كل الود والإمتنان .......................... وللحديث بقيه صفيه صالح البدوي دفعة 92
عارفين يابنات؟ أستاذه محاسن جيلاني دي عندها كاريزما ما عاديه الزول لو شافها مره واحده ما بيقدر ينساها أبدا ......وهي واحده من معالم القديمه أول مره أشوفها ....كنت في أولى متوسطه ومشيت حضرت معرض في القديمه مع بت خالتي سندس الكانت بمثابة أختي الكبيره... كان يوم مشهود.... إستمتعت بالإنبهار وقطعت على نفسي عهد اني لازم أدرس هناك وظلت صورة ست محاسن وذكرى اليوم داك في ذهني لحدي ما دخلت القديمه. بالمناسبه سندس عبدالله امتحنت أدبي 87 وأصبحت أستاذة فرنسي في آداب الخرطوم والمركز الثقافي الفرنسي ...من دفعتها ريم علي أبوسن.... وندى على محمود حسنين في زول من دفعتها حايم بي هنا؟ .......................... فترة دراستي في الخرطوم القديمه منذ بداية العام الدراسي 89 - 90 وحتى إمتحاني الشهاده السودانيه 1992 كانت فتره خصبه جدا تزامنت مع أحداث وتغييرات كتيره سياسيه واجتاعيه وغيرها في البلد وده كله كان بينعكس على جو المدرسه. منها أذكر: سياسة التعليم العالي والغاء مجانية التعليم وده كان سبب في إدارة مايشبه أركان النقاش في المدرسه.....كنا نتجمع في قروبات دردشه في بنشات ونجايل المدرسه بتجي سيرة مواضيع الساعه وطبعا كل واحده عايزه تستعرض ثقافتها ووعيها السياسي تقوم تقشر وتستلف التعابير من أخوانها الكبار البيقرو في الجامعه ............. وكنا نتناقر حتى يبح صوتنا........أو يدق الجرس وندخل الفصول............................. أيضا فتره اجتاحت المدرسه جيوش من بنات سستر اسكول وسانت فرانسيس حولوا مدارس حكوميه لأنهم قرروا يمتحنو شهاده سودانيه بدل لندن بنات حنكوشاااات ولسانهم معووج اندمجوا في مجتمع المدرسه بطريقه smooth وحصل mixure جميل في الجو العام...........(على رأي سناء جعفر). وتمت اضافة جورج مايكل وUB40 لقائمة الفنانين المفضلين( طبعا رأس القائمه عقد الجلاد وعمرو دياب)....ما قلت ليكم خليط ثقافات؟ و الكنا بنشخبط أساميهم وبنلصق صورهم على الشنط وبناطلين الجينز البنلبسها مع الزي المدرسي................ .................................. وما أدراك ما الزي المدرسي على أيامنا ما كام لازم تختي الطرحه في راسك ولا كانت قصة الفستان محدده كانو البنات بعملو تساريح وقصات شعر وبيطقمو ألوان ساعات اليد والشنط مع الأحذيه الرياضيه والشرابات..... أناقة بنت القديمه مميزه ولمن تمشي في الشارع بتكون ظااااهره
بمناسبة أناقة طالبات القديمه مابنسى أبدا قصة فستان جوليا (إبنه الفنان محمد وردي) وضفيرتها الطويله وطلتها المميزه............. عارفين؟ من أهم اسباب تميز القديمه برغم المستوى الأكاديمي العالي للطالبات انه الجو ما كان أكاديمي ضاغط كنت بتلقى كل حاجه في مجتمع المدرسه (ثقافه- رياضه - فن - أدب- موضه - سياسه) من نجمات الكره الطائره : • البطله منى حمدان • عزه النضيف و أخواتها • ريم احمد عبدالمجيد • ساره عمر • صديقتي :مها عبدالله البشير وغير الطايره كنا بنلعب مختلف انواع الرياضات حتى رمي الرمح ( " والله جد "..... دي زي زهور اللوتس الذكرتها إشراقه حيموره). ومن هنا بحيي اشراقه وسناء حقيقه أعطوا البوست نكهه خاصه..... لكن اشراقه مشت وين؟ * طبعا أحلى أيام كانت الدوره المدرسيه وبمناسبتها بتذكر قصه لذيذه: مباره حاسمه في الكره الطائره بين فريقنا و منتخب شمال كردفان -الأبيض المكان: صالة الألعاب....ونحن جاهزين بأدوات التشجيع ومعتمدين في الجانب الرجالي من المشجعين على أولاد القديمه (بمناسبة التوأمه الحاصله بين المدرستين وكده) لأنهم صوتهم جهوري وطبعا بناتنا رقيقات و مابيقدروا يكوركوا شديد في التشجيع... بعد 5 دقايق من بداية اللعبه ..إتفاجانا بأن حضرة سعادتهم خسونا وبقوا يشجعوا في الفريق الخصم لأنهم فتنوا ببنات الأبيض الشديدات.... بصراحه المنافسه كانت على المستويين اللعب والمنظر ومافي داعي أقول نتيجة المباراه المهم بعداك حصلت حملة مقاطعه لأولاد القديمه فتره طويله من الزمن لمن دخلت واسطات . ..................... بنات القديمه * قارئات نهمات : بيقروا أي حاجه من غارسيا ماركيزوتولستوي لحدي مرورا بيوسف السباعي وإحسان روايات عبير ورجل المستحيل وكمان كانت في موضه اسمها الAmerican Novels روايات ضخمه وشيقه بالإنجليزيه( كتاب زي Sidney Sheldon &Daneil Steel) تعلمناها في الأيام ديك وكنا في الأول بنفطفط نص الروايه عشان نصل للنهايه غايتو حبه حبه كده الأمور سلكت.......
* وكمان سمحات.............. مستوي الوجاهه طبعا لا يعلى عليه ولو كانت تقام مسابقات جمال ......طبعا القديمه تكسب وكانت حتكون المصدر الأساسي لملكات الجمال زي ما كانت دايما ممول للجامعات بأشطر وأرقى بنات. و من جميلات دفعاتنا أذكر: هبه حمدي بدر الدين - سماح أمين مكي مدني - سهى شمس الدين - وفاء عزالعرب - لميس الفاتح حمدتو ............... ربنا يطراهن بالخير كلهن أينما كانن ............... بعد حرب الخليج حصل غزو كاسح للمدرسه من بنات السودانيين القادمين من الكويت كنا بنسميهم إفراج مؤقت ديل كمان جو بي حقهم البيعرفوه برااااهم ثقافة ولهجه المسلسلات الكويتيه الكانت طالعه موضه الأيام ديك ....لوك ودلع خليجي مايتنازلن أبدا عن قصه الشعر المايله مع لفة الطرحه المميزه ورسم العيون بالكحل العربي داير ما يدور والله المدرسات الأيام ديك عينهم طلعت يابت بكره لو جيتي بشكلك ده حأفصلك ولا حياة لمن تنادي ................ مزيد من التلون في أطياف الجمال وخارج أسوار المدرسه شباب من مختلف الأعمار : منهم أولاد ثانوي (القديمه والجديده بنين وحسونه الثانويه بنين) ومنهم رجال ناضجين الجاي يسوق أخته ولا بت خالته ولا خطيبته ...............وواحدين كده ضهب سااااكت زي ناس تبلدينا ديل ...................
أنا غايتو ما عرست في رابعه طب وبراك قلت يا تبلدينا ...........السمحات وقروا طب كتااار يعني النيمه حقتك دي صعب نلقاها ليك .................... ويمتد حبل الذكريات .... وأكيد حنواصل.... صفيه صالح
12-05-2008, 08:54 AM
Adel Sameer Tawfiq
Adel Sameer Tawfiq
تاريخ التسجيل: 10-05-2006
مجموع المشاركات: 1074
إستلمت الإميل المؤثر التالي من الأخت العزيزة هدى مرضي عن الوالدة المرحومة ست ماتيلدا.. Salaam Mawlana Adil,
Apologies for the delayed reply, I have been struggling to find a quiet time to sit and write to you, as you were expecting, about our school days experience with Ms. Matilda. Rahma Allah. I was certain of her cancer illness and was trying to approach the subject with a query without causing ill at ease feeling. However, I believe highlights of her life should be mentioned to reflect on how outstanding woman she had been.
Please find attached a document that contains a short summary about Ms. Matilda. The content of this attachment is for you to see how your late mother was viewed by her students. The facts and memories on this document belong to you and I very much respect her/your past personal circumstances i.e. her suffering with illness and will not breach any personal memories by bypassing you and write it for the post. However, please feel free to keep it for yourself or to post it to Alghadima Banat school post. It is your choice.
Thanks for shedding some light on the late Ms. Matilda's illness during our association with her. In fact I was certain about her condition but was unsure on how would you feel about me bringing back memories of your beloved mother’s illness and at the same time was cautious that this could make you feel ill at ease with this subject.
You wanted to know more in depth about our time at (Alkhartoum Althanawia Banat) with late Ms. Matilda. This is very important because it had been a life long learning experience to our group at that time. Our group grew up and shared these experiences and we are still in touch with each other and we have maintained a close friendship.
In 1977 we knew about Ms. Matilda's illness when she came to teach us in (Talta Mahdi). During her time with us she never mentioned to us that she was suffering from cancer or had a major operation, but we were fully aware of that. During our final year at the school (Alshihada Alsudania) she was never absent from lessons or off sick. She was a strong and cheerful woman who treated us with a great deal of respect and even when late arrivals came to the class she used to welcome them with a smile and ask them to join the class and find a place to sit down. Your mother never scolded, punished or humiliated anyone, which was totally in sharp contrast to other members of the teaching staff. Her attitude taught us to motivate ourselves and learn with respect. In return we found ourselves chasing her history lessons and make all efforts not to miss them. Because we spontaneously and deeply recognised the value of what we were learning from her, further more we became aware of our worth and first of all because we highly valued her. She used to be very sympathetic with our friend and classmate Salwa Hussein Habib, a talented basket ball player and an intelligent girl who used to be constantly stretched by training and matches demands from her sport club (Nadi Al Osra then) against their rival Al Hilal basketball team (girls) and she had always kindly advised Salwa to pay more attention to her studies, bear with her and show patience and understanding to Salwas's complex role and the demands made upon her. Allah yar hamma, she was a distingished woman well advanced of her time and ahead of her peers on her own ways. I believe that if Salwa Hussein were here, she herself would say a lot more about your mother.
Due to many of her intervention, this is why many of my classroom mates and I of that time now remember everything about Ms. Matilda; in details. Including that she had a son called Adil who she often used to mention with pride to us in the classroom and refer to him as a high achiever and a good example, and if I recall would I be correct in thinking that Adil was the only child, older son or only son for her????????
Here, we are talking 30 years back when cancer was relatively rare and people used to be healthier and not often one would hear of people who were very ill. Ms. Matilda was terminally ill and was medically certified then; that she only had few years to live, yet, Ms. Matilda was standing out there teaching and giving us inspiration and motivation. In our class Talta Mahdi we often used to discuss Ms. Matilda, we saw her as The First and Only woman/person who was ill with cancer and not lying in a sick bed waiting for her day, as this was the attitude and perception in the society 30 years ago. Instead, she was a real icon and a brave woman of her time. The whole atmosphere around her is strong and positive and what she had brought to us then was positivity and real life experience. For us History lessons became not just education but a learning experiences most of all. None of us would miss a lesson because ultimately it would be one's own loss of quality learning time. During History lessons we would sit breathless connected with all our senses, and listen to her while she demonstrated a strong charismatic presence, knowledgeable and made our lessons fun. I remember Khala Haja Kashif Badri (a leading woman activist), Allah yah-faza said to me at that time: “Now you have got Matilda coming to teach you history of the Sudan, so you have no excuse not to score high marks and get into University of Khartoum”. This said it all.
For our group at that young, tender and relatively naïve age, this was our first encounter in life to meet and see a role model living with cancer who was fully active living her life normally with great courage, high spirits, very optimistic and most importantly with immense dignity which was spent dedicating her time and unlimited efforts to her pupils. Ms. Matilda was the woman who planted the seeds of knowledge and helped us achieve the philosophy that she herself believed in that, “If life takes a bad turn or the going gets tough then one must take a positive attitude with full faith”. By living and setting the example, she taught us this lesson first and brought to us lessons that we could apply to our own real life experiences.
Alf rahma wa gufran alyeek ya sit Matilda.
12-05-2008, 07:59 PM
Adel Sameer Tawfiq
Adel Sameer Tawfiq
تاريخ التسجيل: 10-05-2006
مجموع المشاركات: 1074
إستلمت الإميل التالي من الأخ الصديق الدكتور مهندس جلال الدين علي من كندا !
Quote: Mawalana Adil, This is a very well done summary on the late mother Sit Matilda. Her reputation as a great professional educator was known among all teachers and students, who have the chance to work with her or to be educated by her, Yes people come and go, but what they leave behind is what making the difference, and Late Istaza Matilda left many generations, who have her finger prints in their profile, ethics and values, that is why we all know that she left with her body, but her soul reside in everyone had the chance and luck to be associated with her.
12-07-2008, 09:22 AM
Adel Sameer Tawfiq
Adel Sameer Tawfiq
تاريخ التسجيل: 10-05-2006
مجموع المشاركات: 1074
كما إستلمت الإميلين التاليين من الأخ الصديق الأستاذ محمد سعيد علي !
Quote: Dear Adil!After sending you my first e-mail, I went back to your message and found attached to mit the two page note written by Huda Mardi Mamoun Elmardi on your beloved mother Sit Matilda. The words are very honest and touched my heart. It is comforting that you are getting correct and honest information about your beloved mother. It is gratifying that all her students loved her and she loved them,she definetly loved you too much,because she always talked to her students about you. Moreover,as my wife told you and me ,she used to bring you with her to the shool ,even to the class.I think you were rather very young when she passed away,she did not stay long enough with you to enjoy the achievements of her "baby" Adil.Rest assured that every one ,who knew her,has good memories of her.Stay well and best regards and wishes to you, your wife and kids.Yours,Mohamed Said Ali
Quote: Dear Walad SIT MATILDA!Thank you for the message. I was very eager to read about Sit Matilda.You know she was my wifes teacher,whom she loved very much. She always kept telling me about her:being an able English teacher,very organized,energetic ,though very serious yet very lovely.Due to my very limited technical caabilities with the computer I could not find informatio on Sit Matelda conveyed to you by Huda Mardi Maoun Elmardi.I need to read about Sit Matilda,and surely my wife.. Now EID saied ,good health and best of luck.Yours,Mohamed Said Ali
12-07-2008, 09:52 AM
عبد الدائم سيد أحمد
عبد الدائم سيد أحمد
تاريخ التسجيل: 10-28-2006
مجموع المشاركات: 4220
الأخوات الطالبات سابقاًأوحاضراً في مدرسة الخرطوم القديمة الثانوية للبنات
كل عام وإنتم بخير
مولانا عادل سمير: الرحمة والسلام لوالدتك الأستاذة ماتيلداً لكل حرف أو عدد علمته لأمهات هذا الجيل هو اليوم معاملات طيبة مانعة لكثير من الشرور في الطب والقانون والهندسةوالعلوم والزراعة والأدب والصحافة وفي الصناعةوالتجارة وفي التعليم. فلها مجدداً مع الحب والتقدير الرحمة والسلام. لكن علي اليمين الرسالة الكتبتها بت المرضي تدل فعلاً إلى ملكة أدبية وإلى حسن التعليم والأدب الذي قدمته هذه الملائكية والشهادة القدسيةالست ماتيلدا (أم عادل)
نجي للفولكس:
أحب أقرأ في تاريخ المدارس عن إعتباركم للغفير ومساعديه وعن العمال والعاملات؟، وعن تفوق الأساتذة؟، وعن مقالب الحياة الطلابية؟، وعن قصص الحب وفهمكم له وللفرق بين الحنان والحب وعن قصص الحب التي كللت بالزواج؟، وعن تصوراتكن للزواج ما هو؟ وكيفية إعتباركم لعنصري الجنس والمال معاً فيه؟ ونظرتكن السالبة ونظرتكن الموجبة عن الطالبات الأكثر تفوقا؟، ًوعن الأساتذة الوسيمين وهل تم نفيهم؟، ترتيبكم المهني للرجال؟ نظرتكم للمغترب؟ وعن الحصص الهلاك المملة؟، وعن أكبر تمرد حصل في المدرسة؟ كان في شنو؟ كان عندكم جرايدحائطية؟ ندوات؟ تظاهرات؟ حصص معلومات عامة أو لنقاش مواضيع؟ ولا ياها كلهاحصص عربي وحساب ودين والعلوم3 وجغرافيا وتاريخ وإقتصاد منزلي؟ ما عندكن حصص فنون؟ طيب الأستاذ<ة الأرسم منه؟ مسرحيات؟ رقص؟ إذاعة المدرسة فيها شنو؟
الأجمل غناءاً، جمعية التاريخ، وجمعيةالرياضيات، وجمعية الموسيقى، والجمعية الأدبية، قصص التربية الفنية؟ والتربية الأدبية؟، التربية الموسيقية؟، والتربية الدينية؟ تأثير الوكمانةوالموبايل والأي بود وبقية الأجهزة (الحديثة) على علاقاتكن ببعض؟ تنس الطاولة؟
التماهي مع بنات المسلسلات شيرهان وليلي علوي وصابرين وأنشوكاثم مسلسلات المكسيك والإحساس الدوني أو الإستعلائي جهة هذه الثقافة الجمالية؟ وكتير وكتير؟
الموضوع شيق وطويل وكثير العناصر وهو كحرملك يثير أسئلة وأشجان. يعني بإختصار المسألة ما تبقى يا حليل مدرستنا وتتذكري ناس فلانة وياا حليلهافلانةوفلانة!!!صحي المدرسة ناسات وعلاقة صداقة بين البنات تدوم لغاية أول مشكلة كبيرة لكن برضه المدرسة فيها من المواقف والأشخاص والأحداث الكثير المثير الخطر، فلا تجعلن الأيات تسرق منكن الذاكرة.
وليكن الود والسلام
وكل عام وإنتوا ملايكة
12-10-2008, 10:55 AM
Adel Sameer Tawfiq
Adel Sameer Tawfiq
تاريخ التسجيل: 10-05-2006
مجموع المشاركات: 1074
Quote: مولانا عادل سمير: الرحمة والسلام لوالدتك الأستاذة ماتيلداً لكل حرف أو عدد علمته لأمهات هذا الجيل هو اليوم معاملات طيبة مانعة لكثير من الشرور في الطب والقانون والهندسةوالعلوم والزراعة والأدب والصحافة وفي الصناعةوالتجارة وفي التعليم. فلها مجدداً مع الحب والتقدير الرحمة والسلام. لكن علي اليمين الرسالة الكتبتها بت المرضي تدل فعلاً إلى ملكة أدبية وإلى حسن التعليم والأدب الذي قدمته هذه الملائكية والشهادة القدسيةالست ماتيلدا (أم عادل)
الأخ العزيز Al-Mansour Jaafar
لك التقدير الشديد..
أتفق معاك في ان الرسالة الكتبتها بت المرضي تدل فعلاً إلى ملكة أدبية وإلى حسن التعليم والأدب..
12-10-2008, 11:04 AM
Adel Sameer Tawfiq
Adel Sameer Tawfiq
تاريخ التسجيل: 10-05-2006
مجموع المشاركات: 1074
إحدى ذكرياتنا مع الخرطوم الثانوية بنات (ما كان إسمها القديمة)
أيام المنافسات الرياضية، ويوم لقاء الخرطوم الثانوية بنات مع أم درمان الثانوية بنات في مباراة (الباسكيت)، كان جميع طلبة القديمة بيستعدّوا لحضور المباراة في (مجمع الرياضة) في الخرطوم2، وهناك بتكون الإثارة والحماس والعجب العُجاب. أجمل شئ تشجيع البنات في الكورة. توحّد طالبات الخرطوم الثانوية أصواتهن ويقلن: ((يا بنات أمدرمان .. يا بنات أمدرمان؟ إنتو قايلينو فريق "باسكيت" والاّ نقابة مطاااااااااااافي)) فترد بنات أمدرمان بنفس الموسيقى: (( يابنات الخرطوم .. يا بنات الخرطوم؟ إنتو قايلينو فريق باسكيت والا نقابة تااااااااااكسي))، طبعاً في الملعب فريق بيلبس أحمر والتاني أصفر.
أيام لها طعم خاص
التعديل لتغيير اللون الأصفر - (ابا يظهر مع الخلفية)
دفعتنا يامحمد كان فيها ابو الريش وهو يشهد ليهو بأنه أول واحد يهرش ليك استاذ جرجس محارب وطبعا استاذ جرجس الزمن داك كان بيخوف الناس لكن كأستاذ فى مادة الفيزياء لايعلى عليه ...
مامتذكر اسم ابو الريش بالكامل الزمن طول ...
12-11-2008, 11:54 AM
محمد أبوالعزائم أبوالريش
محمد أبوالعزائم أبوالريش
تاريخ التسجيل: 08-30-2006
مجموع المشاركات: 14617
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة