|
|
 Re: السودانيون في عُمان.. منهم.. وإليهم (صور) (Re: soma)
|
عدناااااااا
وتريات المهجر
****
الجزء الثانى والاخير من حكاية من الواقع
اولا اقدم العذر كل العذر لكل القراء والمتابعين
لعدم تمكنى من المشاركة امس الخميس حسب جدول عمنا ود الخضر
اكرر اعتذارى ولكم العتبى جميعا
ونواصل الحكاية .........
المرة دي وقبل ألا جازه بي أسبوع بس, يا خوانا بعد ما اشتريت كل الحاجات وعملت كل التجهيزات الحكيتا ليكم.. من الصباح التلفون صاح.. اللهم اجعلوا خير في شنو؟ جاني الخبر. خبر السواد... خبر الرماد... أبوك مات... آه أنا . ابوى مات ؟؟؟ وووووب انا ..... ابوى مات ؟؟ ابوى مات ؟؟ حليلو يابا حليلى انا .. ووووب انا ابوى مات ؟؟
أنا الولهانة لي شوفتك ,أنا المشتاقة لي ضمك...آه أنا... بعد غياب سنه ونص آه أنا.. الكنت بتكلم معاك قبال يوم بس ... آه أنا... الماشة ألا جازه أعيد احلي سيناريو بتكرر علي كل مره . لما نصل بتجي جاري قبال ما تقيف العربية ,ووووب انا لمن تسلم بتلمنا, وبتخمنا كلنا, آه أنا... وو ووب أنا... اتجر ست, واتبهدلت, والخبر يا أخواني في الغربة حار..
و موت الابو يا خواني نار.. صعب الفراق , صعب البصدق الخبر . والأصحاب ما بقصرو بس الصعب انو الخبر كيف تتقبلو.. خليت, الشنط ,خليت العفش, وشالوني شيل لي المطار, الكنت بمشيه براي بي شوق وفرحه.. كرهت المطار, وكرهت السفر في اليوم داك, وما شفت الفرح فى عيون المسافرين ولا ضحكة صغار ..ولا المودعين .. ولمن وصلت لا شفت بلدي, ولا غبار بلدي , ولا العمارات, ولا الشديرات , ما العيون بالدموع كانن مليانات , آه أنا.. من اللقاء جوه المطار, من الأهل الواقفين بره المطار , الكل جاي يعزيني , يواسيني , الموظفين, الموظفات , الطلبة , الطالبات, أولاد أهلي الفي البندر, والبنات الفى الجامعات, واه أنا من شوفة الأهل, كمان معاهم محمد اخوي الصغير البعد موت ابوي بقي كبير وجاي يصبرني ومستقبلني في المطار. آه أنا... يا محمد وين ابوك ؟ وووب انا يا محمد خلاكم لى منو .. خلانا لى منو ؟ قطعت قلبو..و الدموع غلبتو عصرتو على جووووووة ..حسيت بى دقات قلبو طايره من بين ضلوعنا جروا من جر وهو برجف زى القصبة ..وووب يا خوانى خلونا النبكى .. البكى ما بجيبو .. عارفة البكا ما بجيبو لكن خلونا النفش وجع الفراق والغربة الشينه ..وجونى الاهل يا أخوانا السلام كان بالفاتحة, والقبلات كانت بالدموع , والجاني كلو شايل السلام بعد الفاتحة.. أتغير ا لكلام, العبارات اتبدلت من المصيبة الهلت علينا, الله يصبرك, والله يصبرك, وآه أنا من المشوار لي الحلة. وشالوني شيل وختوني في البوكسي , وماسكني من الحالة العلي أهلي الكبار, ومحمد اخوى يزازى بعيد بى دميعات حارات . ويبلع فى العبرات ...داير يصلنى وخايف يصلنى .. فرقونا فى العربات .. ومشينا بى دمع اليتم نتصايح ماشين الحلة والبيت الطابق الفراق المر ..واه أنا من الوصول , قبال اصل شلت الهم كيف اصل, وين أبوي الكان بجينا قدام الباب؟ وين أبوي الكان بسلم بي ترحاب؟ وين أبوي ؟ وين أبوي؟ نزلت زي المجنونة ما شايفه الناس, ولا شايفه اللمه, حتي الملامح اتغيرت, من ناس بيتنا لي الجيران, والأهل كلهم, لانهم بكوه شديد, واتبهدلو, وجيت أنا بصوت مبحوح, ما بطلع حتى لو طلعت الروح.. دايره اكورك, دايره ابكي, ما قادرة أنا. اه أنا... أخواتي الصغار ,أخواني الصغار, أهلي الكتار, ابكي مع منو؟ اعزي منو؟ أمي الحنينه المتوجعة, ومتصبرة, وبي التوب الأبيض متلفلفة؟ آه أنا... ووووب أنا... يمه صحي أبوي مات ؟ قولي الحمد لله يا بتي استغفري الله... احي أنا ..وو ووب أنا.. ما شفتو.. أسبوع واحد بس. واجيكم. يمه هيــــي يا يمه صحي أبوي مات؟؟ يا أخواني هيــــي. صحي أبوي مات ؟ حتى أخواني الأولاد الكانو بالعين عبرتم ومتصبرين شافوني زي المجنونة ما مصدقة قالوا ووووووب. ونسوا الصبر. ونسو الناس المعانا , قالو ووووووب, آي أبوك مات, أبونا مات....
قالوووو وووووب, زي النسوان الواقفات , قالوا وووووب , و جاني عمي, وجاني خالي, والناس الكبار , ما فيهم من قال اتصبري, اتصايحو معاي وردحوا ردح وصرخوا زي شفع صغار , والدموع ماشا جاريه زي بحر حزين, وأنا أقلد في الكبير والصغير, أمي, أخواني, أهلي وحباني, جاتني الخالة, جاتني العمة, يا عمتي هووووي صحي أخوك مات؟؟ احي أنا يا بت أمي أبوك مات.. . مات الاخو, مات الابو, مات الخال مستور الحال , طويل البال. خال الوليدات. مات الحنين, مات الخزين, أحي أنا... مات الوسادة, مات الركازه, مات المهل عشا الأهل, مات المربى , مات المدرس, مات الكلس, مات ألما بعرف لم القرش , احي أنا وو ووب أنا... يايمه كيف السلام؟؟ كيف الحضن والضمه؟؟ كيف مع الأهل اتلمه؟؟.يا يمه يا حبيبة الضلمه... يوم طويل يوم ما بتمناه لي عدو, ولا حبيب , وكل ما أقول أتصبر, أشوف أمي متلفلفة بالتوب الأبيض واتذكر, والعيون ترقرق, والدموع تنهمر, وحا تظل تنهمر, وتنهمر, لمن أموت واحصلك, يا يابا .ما بقدر اعمل شي دا القدر, وكل البقدر عليه ا رفع الأيدي أتتضرع, لي ربي الكريم يرحمك, وفي جنان الخلد يكون مسكنك, ويا الله الكريم تصبرني, و يا أخواني الكرام أتدعو لي , الله الكريم يرحم أبوي, ويصبرني..
اسماء الجنيد مسقط
اكتوبر 2001
ارجو من الجميع السماح والعفو ان قلبت عليكم المواجع
كما ارجو الدعوات بالرحمه والمغفرة لوالدى الغالى
فى هذة الجمعة المباركة وهى تتزامن مع الذكرى السنوية لرحيله
|
|
 
|
|
|
|
فيس بوك
تويتر
انستقرام
يوتيوب
بنتيريست