أغرب عملية تصويت لأغرب عملية إنتخابات أقوم بها في حياتي ..!!

Quote: ونسبة للسمعة الطيبة التي كنت أحظي بها وسط الطلاب والاساتذة

Quote: حبيب نورة .. مشتاقون والله .. أها بما إنك سألت النحكي القصة .. أنا أساسا مشيت شمار ساكت والله .. أصلي من زمان قنعان من خيراُ فيها .. جيت المركز زي الساعة خمسة عصر .. لقيت المركز شبه فاضي إلا من العساكر والمراقبين والذي منو .. قبل ما أجي داخل لقيت واحد عمنا كبير في السن عامل جوطة ..! مشكلتو هو مُرشح وإسمو نازل غلط في الأرانيك من أمبارح مسيكين يتجارى من مفوضية لي محكمة عليا لي محكمة سُفلى وما لاقي حقو .. كل القالوهو ليهو يقدم طعن بعد نهاية الانتخابات ..!! عمنا جا المركز لكن الجماعة أبو يدخلوهو ونكروهو حطب رغم إنو وراهم إنو مُرشح !!! حاولت إتدخل في الموضوع (واسطة خير وكدة) بتاع المفوضية شداها لي قال لي إنت جاي تبع منو ؟! قلت ليهو أنا صحفي لكن جاي أصوت .. قال لي خلينا من صحفي هسي وصوت تصويتك وإتخارج .. المهم سمعت كلامو دخلت الكشوفات الزول قال لي إسمك منو ؟ قلت ليهو ناذر محمد الخليفة .. فتش فتيش هبش هبيش وقع في عينو إسم نادر محمد الخليفة (دا اخوي بالمناسبة) .. قلت ليهو دا ما انا انا ناذر بالذا غزال ..!! صاحبنا قال لي أديني إشعار تسجيلك .. قلت ليهو ما شايلو معاي قال لي امشي جيبو وتعال .. النقة حصلت وجا واحد من الناس البعرفم (مراقب ولا وكيل مرشح ما عارف) قال لي أمشي جيبو وتعال .. قلت ليهو ممكن اضرب للبيت يدوني رقم الإشعار .. عنقد ورفض (التقول هو معاهم).. طلعت برة مغيوظ من الزول دا لانو مفروض يقنع بتاع الإنتخابات ويحل لي مشكلتي .. الغريبة لمن أنا طالع جا لا حقني قال لي إنت داير تصوت لي منو ؟ عاينت ليو من تحت لي فوق كايس أي حاجة تدل على جهة هو شايت ... لقيتو خاتي ليهو صورة شجرة صغيرة في جيب قميصو .. قلت ليهو والله لسع ما قررت .. قال لي خلاص صوت لي عمر البشير ..!! قلت ليهو الزول دا قال ما داير أصواتنا .. نديها ليهو بالرجالة ولا شنو ؟!! المهم مشيت البيت جبت الإشعار وجيت الجماعة غمسوا ليك صباعي في حبر جبيل كان لونو اخضر (هسي بقى لونو تركوازي) !! أدوني اوراق دخلت بيها جوة الكرتونة ما عرفت ولا إسم من الجماعة الموجودين في اللستة .. رجعت لي بتاع الدفاتر قلت ليهو لو سمحت وريني الإنسحبو منو من الما إنسحبو عشان ما أشخت لي زول مُنسحب وتعبي يروح ساي .. قال لي إنت جاي وفي راسك ما في زول ؟! قلت ليهو أيوة والله .. جاي إختار هنا ..!! الزول إستغرب وقال لي ما بقدر أفيدك .. عاينت للمراقبين والوكلاء عشان يفيدوني لقيتم كلهم بيعاينوا لي وسامعيني لكن خايفين يقوموا من مكانم (أي والله التقول الفصل القاعدين فيهو دا فيهو ألفة) ..!! قلت للمراقب يا خي والله أنا داير أعرف معلومة صفيرة كيف ما ألقاها ؟! قال لي ما في زول مخول هنا يوريك أي حاجة .. أشخت في الحتة الإنت عاوزا وإتخارج ؟؟!! قلت ليهو طيب لو شخت في زول وطلع ما نازل أعمل شنو ؟؟!! صاحبنا وشو حمر قرب يقول لي : يااااا خلف الله .. عزببببببتنا ..!!!! غايتو إتوكلت علي الله في القوائم القدامي ونزلت فيها شخيت .. والله ما متذكر صوت لي منو لكن غايتو أهم حاجة إني صوتت جوة الدورانية صاح ..!!