الزميلة الشاعرة المخضرمة اسماء الطيب الجنيد دائما تتحفنا بالجديد المفيد وبعد اجتياح الغونو السلطنة ها هى تجتاحنا هنا
**بدون قرار*** فى لحظة من عمر الودار شديتو سرج الليل هديل .. لميت فرح كل الصغار سرجت غنواتى القبيل .. الوان قزح من كل زار .. نسجت نجم الكون دليل شتلات حنين لى كل جار.. اشيل واضم وجعى البسيل ممدود هناك من غير ستار واتلفحك جرتق عريس فوقو العديل.. واتوسدك ضل المسافات النهار طلت شموس وطنك اصيل شديتو وتر الشوق فنار غيمات تناغم للنخيل فرشت عمق الود نضار امواج تغازل قيف ونيل ضميت شرف ريدنا الوقار أمسح تعب يومى الطويل .. من كل جدار بدون قرار .... اتوهط براك كل المدار ودس مسامك فينى .. بىعمق البحار أرسم ملامحك جواى.. صور من غير اطار
وبدون قرار سوما
06-16-2007, 08:09 PM
سلمى الشيخ سلامة سلمى الشيخ سلامة
تاريخ التسجيل: 12-14-2003
مجموع المشاركات: 10754
سلام يا اهلنا الحنان وليد الحنين .. الشوق نيلين والود ممتد قدر المسافات البينا يا ود بطن الاهل تسلم يا اصيل من الناس القبيل شكرا اخى وليد للاهتمام دائما مجرتقنى بحرير كلامك ورقيق معانيك وموشحنى المحنة ضريرة شكرا لا تكفى شكرا فرحة اهل فى سيرة
***** الحبيبه الاديبه الاريبه سلمى ....سلام يغشاك بسماحة طلتك المشرقة التحية ليك قدر الريدة الجوة وتحية مكنونه للغالية سوميتا شكرا قطرات الندى *** استاذنا الجليل ود ملوك النيل شاعرنا الفذ فضيلى جماع سعيدة بطلتك يا شامخ بتواضعك وادبك الجم وجودك فى اى مكان دائما بفرح دواخلى بكلامك الحنين وتعابيرك الصادقة زيك لوقفتك معاى اثر عميق ومعنى راسخ له الفضل فى استمراريتى فى هذا المكان تحية لك بحجم الوطن وشكرا قدر فرحى بطلتك السمحة ونحن فى انتظار طلتك بالباب يا لمة الاهل وفرحة والاحباب شكرا شاعرنا العميق تعانق السحاب .. *** فيصل نوبى الشوق جارى عليك براه طلتك اشرقت شمس صباحنا باكرية وفرشت كل المساحات غيمة ضهرية شكرا لمة اهل وقعدة عصرية شكرا يا نوبى جبنة متكية *** الاحبة جميعا لكم الشكر والتقدير قدر مكانتكم فى القليب شكرا دعوات قبيلة
06-18-2007, 03:34 PM
waleed500 waleed500
تاريخ التسجيل: 02-13-2002
مجموع المشاركات: 6653
اخي المرهف وليد 500 لك جزيل الشكر علي هذا البوست الرائع وبهديكم قصيدة للشاعرة سوما حفظتها لمن كنت مجرد قاري لسودانيز اون لاين والحمدلله انا الأن عضو وبشارك معاكم .
****** انا يا بلد .. ليك بكون .. ضهر البنيات والعرض ... سلوكه تحفر فى الارض ... نيلك بيسقى كل نبض ... زولا تقى صلى الفرض ... شدر اللبان شدر القرض .. لى كل مريض سدً الغرض... عالج شفا من كل مرض ... *****
انا يا بلد انا فيك بشوف ابواتنا فى الحاره بتسد ... كيفن تصد .. كيفن ترد .. اماتنا زى مطر الدغش .. نازل غزير مليان برد ... جنياتنا فى الحوبه الرعد... بنوتنا لى ضيف الخلا ... تعزم تشد عز البرد ... شفعنا تيراب اب كرد... ترفع تشيل تسمع ترد .... اعلامنا راياتاً ترفرف من بعد... ******* انا يا بلد داير اكون .. ود البلد .. بت البلد ام البلد .. اهل البلد .. نهتف نقول... نحن البلد .. نحن البلد ... وانا يا بلد .......
اسماء صديق الطيب الجنيد
06-24-2007, 04:00 PM
waleed500 waleed500
تاريخ التسجيل: 02-13-2002
مجموع المشاركات: 6653
اخى الكريم هاشم سلام يا ود البلد الاصيل سلام موشح بطيبة اهلنا الكبار وسماحة خصالهم الموشحه بيها كلك كتر الف خيرك على الكلام الجاى منك وكتر الف خيرك على التعبير الندى الذى فجر بدواخلى الوديان فرح وسرور شكرا تقف عاجزه عن التعبير شكرا مطمورة فرح
**** سلام وليد سمح الطلة دائما يديك يا وليد قدر الفى دواخلك النقية من محنة وطيبه ربى يسعدك ويهنيك ويعليك فوق المابيك يخدر دربك ويسهل امرك ويسعدك قدر ما بتسعدنى بحروفك المعتقه اصالة شكرا وليد فرحة قبيلة
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
waleed500
سلمى الشيخ سلامة
فضيلي جماع
فيصل نوبي
هاشم أحمد خلف الله
فيس بوك
تويتر
انستقرام
يوتيوب
بنتيريست