شعراء وادباء وكتاب البورد ما قصرنا معاكم

بمناسبة الاحتفال بسيد الحوش الكبير بكرى كلفنى بورداب اللامارات بالقاء كلمة ترحيب واقترح بكرى ان اكتبها فى البورد

باسم رابطة سودانيز اونلاين بالامارات ارحب بكم ونحن نلتقى فى هذا المساء الشتائى الجميل للاحتفال بالضيف القدير بكرى سيد الحوش الكبير (الذى قرب المسافات كثيرا)
واستعير عبارة كانت شائعة فى زمن الانتفاضة الجميل واظنها لمجوب شريف(شكرا للشعب الذى جعل هذا ممكنا) فشكرا لبكرى ابوبكر الذى اطلق اجنحتنا اسراءا ومعراج فى براحه الاسفيرى سودانيز اونلاين
ازدان حوش بكرى باسماء لامعه فى مجال الفكر والادب والثقافة كنا نلهث خلف كتاباتهم بلاد بلاد وصحف صحف فاذا هم بيننا عيانا بيانا فبكبسة زر خاطفة وسريعة نقرا نرد نشيد نوافق نثنى نرفض بل فى بعض الاحيان يغلظ السفهاء منا لهم القول

بشرى الفاضل حطت عصافيره فوق النيمة الفى باب الحوش0000بولا اعاد زمن انسانه الممتاز بسرده الساحر0000الصادق الرضى فك اسار عزلته0000الخواض سبق مقدمه عطر ابتهاج0000النورحمد انتحى ركنا قصيا يناجى طيف حامد جو وبشير حريشة0000الكتيابى رئتاه صفقتا وصفقتا وصفقتا فى همبريب الحوش حتى دخل من باب الخروج0000القدال خفف الوطء وهو ينم مسداره
الشم خوخت بردن ليالى الحرة
والبراق برق من منا جاب القرة
شوف عينى الصقير بجناحو كفت الفرة
تلقاها ام خدود الليلة مرقت بره
مرقت بره تسمن ردفها السمن المبستر يانكى
تماضر وعشة المبارك تشابه عليهن بيت بت المنا وبيت بكرى مرة يمثلوا ومرة يكتبوا وكتير يضحكواا0000ابننفقا تو عثمان محمد صالح نصب راكوبتة ارو نونق0000شوقى بدرى لامى الناس وقاعد تحت القمرا يحكى عن محبوبتة امدرمان0000فردة يسبر غور مؤلفه الاسفيرى0000ميرفت ترتشف ليمون كوستى0000عجب الفيا يلقى بالاحجار فى المياه الساكنه0000حمزة سليمان يتكىء على باب السنط فى انتظار انور وعمر بانقا0000الموصلى فى خلوتة يهرمن االنغمات0000عصام عبد الحفيظ يبحث فى كيمياء اللون0000ابكر ادمعاده طيف المدن المستحيلة0000امير تاج السر يتامل فى مرايا ساحلية وهو يستمع لعواء المهاجر0000سيد احمد بلال تقول موسيقاه كلاما ويقول كلامه موسيقى ليلبسها قيسان الوانا زاهيه0000يحيى فضل الله يتداعى وينادى من يجمعنى بمحمد محى الدين0000الخاتم عدلان كلمتة حق وفكرتة صواب0000
قرانا لكل هولاء واذاباسماء اخرى جميلةوعلى سبيل المثال لا الحصر
عطبراوى0000عبدالله عثمان0000كمال عباس0000تماضر0000الجندرية0000اشراقة0000ندى0000فردة0000تراث0000سنارى0000بشار 0000نصار0000عادل عبد العاطى0000ياسر الشريف0000بت الحسين

حوش بكرى الالكترونى مثل صنعاء الجميلة حوى كل فن نجد فيه الفن 000والثقافة0000والفكر 0000التراث0000الرياضة0000السياسة
هو حوش ديمقراطى حر عبرنا فيه عن ارتباطنا بهموم الوطن
رحبنا بجهود السلام0000نددنا بالدكتاتورية0000تضامنا مع اهلنا فى الجنوب ودارفور وشرق السودان0000
نحن بورداب الامارات لم يبخل علينا بكرى فاهدانا صالون بارد وكبير فالتقينا وتعارفنا واحتفلنا بذكرى مصطفى سيد احمد وقرا لنا القدال اجمل الشعر فى عدد من الامسيات0000واقمنا الحفلات والرحلات وفى المناسبات الاجتماعية واليوم نستمع للشعر والطرب والغناء والموسيقى فرحا بمقدم بكرى الميمون ونقول له شكرا
اولا لنجاحه فى خلق موسسة المجتمع المدنى الفاعلة سودانيز اونلاين
ثانيا لقدرتة على ادارتها بالرغم من كل الصعوبات
فى الختام لابد لى ان ارحب بالضيف الكريم الدكتور عمر عبد العزيز مثقف يمنى محب للسودان رئيس النادى العربى ورئيس شعبة البحوث والدراسات بدائرة الاعلام والثقافة بالشارقة
وقد منحه بكرى العضوية الفخرية بالكتابة
التحية لكل من ساهم فى انجاح هذا الحفل الشعراء القدال والكتيابى ود معز الذى تكبد مشاق السفر من البحرين الى ابوظبى ومن ابوظبى للشارقة
وللفنان المبدع بهاء سليمان والعازف المبدع عمر عزيز
ولكتيبة العمل خلف الكواليس زولا على اسماعيل جريفاوى الزنجى مهدى
والسلام عليكم

حاشاك ما قصرت
وزدت يزيد مقدارك
تتبارك ما تشارك
وأياها المحرية فيك
مليت مكانك
يوم شكرك ما يجي

بكري عريسنا
وفرحنا بيه
وناسنا تلمو
وغنو ليه

والقدال
عرفنا ليه العربان سمت الأسد بالقدال
ودهشتنا يكفيها زغرودة المدام
ولقياكم منى على الدوام

وتعود الأيام

كلمتى




المست غرورك

عشت يا ابو سارة
ما انت الكبير فينا ( طبعا مقامك )

لقد كانت بالجد كلمة ضافية شاملة

نالت استحسان الحضور

وخيرا فعلت للارشفة


ومنتظرين المزيد

ياها المحرية فيكم كلكم هناك في امارات الخير ..

وتسلم ياأبو سارة يا أصيل .

سلامي لكل بوردابي وبوردابية عندكم من دون فرز.

بالفعل ليلة عمر .. وكم تمنيت أن اكون بينكم.

لك ودي .

خضرعطا المنان

محمد سيد احمد وكوكبة المحتفين بسيد الحوش الاليكترونى ..بكرى ابوبكر

لقد طالت قامتى وانا اقرا اسمى بينكم..حتى كاد جبينى ان يلامس سقف السماء..

هذا كثير منكم كثير

واذا صح وكنت ضمنهم..

فلا املك الا ان اقول..تعالوا نعيد الى الوطن بعض العشق ..

الذى ندين له به..
نصنع معجزة مثل محجوب شريف..
تعالوا نحول الاغنيات الى اشجار تحف بالشوارع النظيفة المضاءة

ونحول الحروف الى اطفال بخدود ريانة بالعافية

والقصائد الى امهات لا يكحلهن الحزن ولا ترتسم على ملامحهن اثاؤ الشقاء

والجوانح الى انهار

والقرائح الى سلام..

سلام..حتى يصير الوادى المقدس "هو" طروبا..ومترعا بالخصب

عشان كلامك السمح دا
كتبنا عنك
امنيات غالية
بوطن سلام
شوارع مضاءة ونظيفة
نساء غاب الحزن عن ملامحهم وارتسم الفرح
مسرح تملاء تماضر خشبته بابداع
اتيلية يعرض فيه عصام عبد الحفيظ وبولا وحسن موسى
اتحاد كتاب يلتئم فبه ابكر وامير والخواض وبشرى
مدرسة لاطفال الشوارع
مستشفى لمرضى الملاريا
بنك لاصحاب المعاشات
صحيفة لاقلام حرة
بيت للنازح
كنيسة ومسجد وخلوة
قناة فضائية لثقافة السحنات المختلفة

وانت بس تعالى الامارات شوفى بنحتفل بيك كيف
لامن بكرى ذاتو يغير

Quote: وانت بس تعالى الامارات شوفى بنحتفل بيك كيف لامن بكرى ذاتو يغير

انتو طلبتو؟

ههههه

الله يعزك يا عزيز

صديقي محمد سيد احمد
والله ما قصرت تب الله يديك العافية
ويدي بكري كل الفي مراده

الاستاذ صديقى / محمد سيد احمد - تحية واحتراما

الاحتفال كان فى قمة الروعة بقامة سيد الحوش - بارك الله فى بورداب الامارات بيضتم الوجوه ولكن كان بكرى اروع ما كنا نتصور فى اخلاقه وسعة صدره وتواضعه - وكنت انت قائد السفينة عميدنا فى الامارات فكلمتك كانت فى الصميم - فها نحن وضعنا حجر الاساس لهكذا نوع من الفعاليات ، نتمنى من كل البورداب الاحتزاء به وانشاء الكريم نتلمى فى السودان - الله يديك العافية ويخلي لك سارة وسماح والمدام -
شكرا جزيلا