Post: #1
Title: ترويسة بماء الورد
Author: محمد بهنس
Date: 12-24-2004, 07:04 AM
Parent: #0
صباح الخير يا وحشتي....
أهه يا أخوانا وأخواتنا كل عام وأنتم بخير.
أتمنى لكل الأعضاء...سنه جميله...متوجه بتحقيق الأمنيات ....
لقد انتميت لهذا المنبر قبل قليل...لكنني أحسست بأني في حوشي
مع أهلي دون استثناء...تماضر والفاضلابي ووليد وشخصي الضعيف
ابتدرنا بوست مسدار الخرطوم.
كنت اتمم حوائجي اليوميه وفي خاطري كتابات جميله أقرأها في البورد.
أصدقاء وصديقات..أخوة صغار وأعمام....
نعم..لا زال كل شيئ جميلا.....
غير أن البورد بدا مثل النفس الانسانيه متقلبا مثل حال البلد منذ الاستقلال.
لا بأس..فقط تمنيات يتيمه بتفشي روح المحبه..والماعندو محبه ما عندو الحبه...
لمده أيام أصبحت نفسي منغلقه...أحزنني ما في البورد من مواضيع لا طائل من ورائها..
وأنا متأكد أن الجميع بتلك الروح السودانيه العاطفه أيضا أنسدت أنفسهم..بعد الشر..
لكن الآن في هذا المساء السوداني الشتوي الحبيب..مع اطلالة الكريسماس..
وتمطي السنه على حائط الوقت حتي تكاد تشوف رأسها..في ضيافة أخي البوردابي الحبيب
مأمون التلب وعلى كمبيوتره اللأنيق..أعلن أنني قررت الكتابه لآخر مرة في هذه السنه..
لأعلن أمنياتي العميقه ببورد يضاف لزاكرة الأدب الانساني في السنه القادمه...
لتشحذوا قرائحكم بما ينفس علينا..بما يجعلنا نقدم على الكتابة محاورة مفيدة معكم..
لنسأل أنفسنا قبل لمس الكيبوردات ماذا نود ولماذا وكيف.........
أنت تظن وأنت تكتب أن من يقرؤك لا يتعدى من تريد أن تشاكش أو أعضاء البورد على أحسن حال..لا ياسيدي يقرؤك ملا تتخيل في البقاع...
الكتابه فعل خطير...تضع على عاتقك تعرفة الآخرين بك والانسان هو ما يكتب...
لن أسقط في شرك التقريريه فأنا لست مقررا حتي لنفسي لحد ما.........
حسنا..السودان بلد جميل..أين يقع؟؟...حتما في القلب وجغرافياالحنين....
أنت تقابل نفسك وجها لوجه.....
أنت تثير أحزانك...أنت تثير شفقتك...
أحببت ملاقاة بورداب الأمارات على شرف حبيبنا بكري...
ياترى ماذا يحدث لو التقى كل أعضاء البورد من بلاد الله في جلسه واحده؟
......
......
......
الشمس ما تزال تحب شعاعها على الأرض......
الركشات ملآنه بأشخاص محترمين كما أتوسم في طريقهم...
مازال السوداني حين يفتح الباب بشوشا.....
أنا طارق بالمحبة أبوابكم...
والتسقط الحكومة...
ملحوظه:
قرأت في علبة صلصة قديمة وجدتني هي ساقطا:
"اذا ابتسمت في هذه اللحظه..فان السنه الجديده سوف تخجل(بخفر) وتبتسم لك
حتى يبين يانايرها من ديسمبرها"...والعهده على علبة الصلصة.
كل سنة وأنتم مبتسمين .
|
Post: #2
Title: Re: ترويسة بماء الورد
Author: وانجا
Date: 12-24-2004, 07:14 AM
Parent: #1
Quote: قرأت في علبة صلصة قديمة وجدتني هي ساقطا:
"اذا ابتسمت في هذه اللحظه..فان السنه الجديده سوف تخجل(بخفر) وتبتسم لك
حتى يبين يانايرها من ديسمبرها"...والعهده على علبة الصلصة.
كل سنة وأنتم مبتسمين . |
بهنس
كل سنه وانت جميل
|
Post: #3
Title: Re: ترويسة بماء الورد
Author: محمد بهنس
Date: 12-24-2004, 07:24 AM
Parent: #2
.... .....
....... .....
...... ......
....... ......
وأنوانجا ت جميلة يا
|
Post: #4
Title: Re: ترويسة بماء الورد
Author: وانجا
Date: 12-24-2004, 07:27 AM
Parent: #1
| Quote: وأنوانجا ت جميلة يا |
بهنس
ده منك والا من الكيبورد؟
|
Post: #5
Title: Re: ترويسة بماء الورد
Author: وليد محمد المبارك
Date: 12-24-2004, 07:39 AM
Parent: #4
شبعان
ورويان
.
.
.
.
.
فهم وزوق
|
Post: #7
Title: Re: ترويسة بماء الورد
Author: محمد بهنس
Date: 12-24-2004, 08:09 AM
Parent: #4
لا حوله..أنحنا مش منعنا الشكل...
أقسم بالله وما طالباني حليفة..من الكيبورد
|
Post: #6
Title: Re: ترويسة بماء الورد
Author: omar ali
Date: 12-24-2004, 08:08 AM
Parent: #1
مازال العالم بخير ما دام هناك رومانسيون
يحلمون بعالم جميل..
وبهنس يحلم بذلك العالم
شكرا يا بهنس
ولكن هكذا العالم خلق هلوها
وذاك لا يمنع ان نحلم معك
|
Post: #9
Title: Re: ترويسة بماء الورد
Author: محمد بهنس
Date: 12-24-2004, 08:18 AM
Parent: #6
كا سنة وانت طيب ياوليد وأولادك كمان.نشوفك
|
Post: #8
Title: Re: ترويسة بماء الورد
Author: وانجا
Date: 12-24-2004, 08:17 AM
Parent: #1
| Quote: نعم..لا زال كل شيئ جميلا..... |
الكلام اعلاه
للاسم ادناه
بهنس
والله لا جاب الشكل
|
Post: #10
Title: Re: ترويسة بماء الورد
Author: محمد بهنس
Date: 12-24-2004, 08:28 AM
Parent: #8
تسلمي يا وانجا....
وشكرا ليك ياعمر,لكن أنا لو ما مانع الشكل كان شاكلتك..أنا رومانسي؟؟!!
أنا عندي باسبورت سوداني تقول لي رومانسي آآآ؟!!!
أنا ود الثوره وعندي شنطة ودولاب ووجع راس تقول لي رومانسي آآ؟!!!
أنا في امتحان الشهادة جبت في الرياضيات أربعه من مية تقول لي رومانسي؟؟!!!
أنا ما رومانسي أناماشي الصحافه مجامل لي أصدقاءوالله يسامحك وكل سنه وانت طيب..
لكن....يا أبو عمر انت الظاهر...
راجل رومانسي
|
Post: #11
Title: Re: ترويسة بماء الورد
Author: وليد محمد المبارك
Date: 12-24-2004, 08:36 AM
Parent: #8
قريب منك لو اتلفت وفتشتا بتشوفني
ادينا شعر ياخ
جانا وجع راس
لينا مده ما سمعنا شعر سمح وجديد .. وركز على جديد
|
Post: #12
Title: Re: ترويسة بماء الورد
Author: محمد بهنس
Date: 12-24-2004, 12:26 PM
Parent: #11
بدري كنا بنقوم
كانت تقوم العناصر معانا
ننتقي الحب علي نفوسنا لي
نفوس سوانا
كنا بنعالج الأسى بالرياح البريئه
ونقاوم الكوابيس بروح الطفوله الجريئه
كنا أسرع من النسمه في توب حمامه
كنا أنجض من التجربه..الكون رؤانا
كنا نهدي الشمس
اذا ضل بالحيل غروبا
وندفي القمر بي هواجسنا عند الرطوبه
ونخيط قميص المحنه
ونطش في سؤال الأجنه
ونكورك علي الورد يا طل رحيق
عليك المواجع تفوح في الطريق
عليك الغنا الما سمعناهو.. فوح
عليك الكتب.. طل..عليك الجروح
نحنا حراس حدايقك..ملابس القميص البضايقك
نحن جن الخريف الذكي
نحن تمر الفكي..
نحن..كنا بنكون
هسي نحن الحكي..
يازبالة تواريخ مجيده
نحن سنة الصغار الجديده
كوني انت المياه
كوني ضد العطش
كوني جدول وزماره في الحقل
عنب الوجود الشهي
كوني..ماتنتهي
كوني..ماتنتهي
|
Post: #13
Title: Re: ترويسة بماء الورد
Author: وليد محمد المبارك
Date: 12-24-2004, 11:56 PM
Parent: #12
انت .... انت قرد
انت بتجيب الكلام السمح ده من وين
انا ما قلت ليك انت
يامسكون شِعِر يا ساكن بيت شِعِر
اها وجع الراس فكه
لكن كعب الادمان على الحبوب
معناتا دايرين لينا قصيده جديده
انشاء الله حبه كلو شهر
وكم واحده كده دسهم عشان عند اللزوم
مبدع وفنان
|
Post: #14
Title: Re: ترويسة بماء الورد
Author: محمد بهنس
Date: 12-25-2004, 03:19 AM
Parent: #13
شكرا ياوليد...انت برضو فنان صاحب حس مرهف.نقطه.
أها ياخوي والشكروه قالو ليو قرد ..ده مثل أنا نجرتو ليك..
أما عن الكتابه فسوف أكتب وانت برضو...انت الفاضلابي ده وين؟؟
....... .....
........ ......
سؤال.
|
Post: #15
Title: Re: ترويسة بماء الورد
Author: وليد محمد المبارك
Date: 12-25-2004, 03:37 AM
Parent: #14
الفاضلابي ما زول راقي
من زمان ما بتاع مشاكل
هسع بكون خاشي وبتفرج وبهز في راسو
بعدين اكتب شنو
انا زول متشوعر ساكت
الشعر حقكم انتو
انحنا بنقرا ونستمتع
ونصفق بي يدينا وكرعينا
|
Post: #16
Title: Re: ترويسة بماء الورد
Author: طلال عفيفي
Date: 12-25-2004, 05:07 AM
كل سنه وانت طيب يا بهنس ..
وكل البورداب والسودانيين والبشر بخير وسلام ..
...
طلال
|
Post: #17
Title: Re: ترويسة بماء الورد
Author: محمد بهنس
Date: 12-27-2004, 06:14 AM
Parent: #16
وأنت كمان طيب ياطلال..السنه دي ياخ أمسحه قي وشي
|
Post: #18
Title: Re: ترويسة بماء الورد
Author: omar ali
Date: 12-27-2004, 08:18 AM
Parent: #1
يومك ورد ياصاحب
ترويسة الورد
قلت المرة دي اتوقف عند اسمك
ايوه..عند بهنس
لو ما غلطان "بهنس" دي قرية
من القري المصرية
واذكر في الصحف المصرية كان
بقابلني اسم كاتب او صحفي
مصري اسمه يا سيدي
محمد البهنساوي
نسبة الي بهنس
وانت يا سيدي محمد بهنس
يعني بهنس بذاتها
وشكرا لصبرك
|
|