يا سعادة الوزير الله ما يجيب يوم شكرك

السيد وزير داحلية بريطانيا
يا زول إنت ما عاقل في زول بيقدم إستقالته عشان حاول يستعجل طلب فيزا لي واحدة ولية مسكينة و إنت الوزير.......... لكن أقول ليك الغلطه غلطتك إنت الخللاك تبقى وزير لي ناس ما بعرفوا معنى الضكرنة و الرجاله شنو.....
يازول بعد دة كلوا ما حصل حاجه و تعال عيش باقي عمرك عندنا عشان تشوف التقدير الما خمج.
أولا نحن ما عندنا وزير بيستقيل الوزير يا يشيلوا الله أو الرئيس
وتانيا نحن ما عندنا حاجه إسمها إستغلال السلطه و هو السلطه ذاتها كان ما إستغلوها شن طعمها نحن كل واحد بيستغل في الباقين كان غفير باشكاتب دكتور أما لو عندك شريط تستغل زي ما عاوز و والراجل يفتح خشمو بالمناسبة عندنا العساكر ما بقيفوا في أي صف مع باقي البشر و خلق الله التعبانين طوالي توووش لأول الصف
وهو ذاتو كلمه إستغلال دي ما عندنا نحن عندنا إسمها المعرفة و كان ما عندك زولا معرفة و الله أمورك أقنع منها ساكت .
و في الأخر أديك نصيحة تخدرك أوعك تحاول تعمل راجل دغري وتعمل فيها ما بتؤمن بحكايه المعرفه لانو ضغطك حيرتفع ويجيك سكري و يرجعوك لأهلك في نقاله بس واصل في حكاية شغل العرفه تعيش ملك وكل الناس حيعرفوك إنك راجل خدوم أخو أخوان والله ما يجيب يوم شكرك لكن لو حاولت تعمل فيها بتاع قانون و نظام الله قال بي قولك يمرقوا فيك الفي و المافي و حتبقى راجل تغيان و ما منك فايده.
بالمناسبة لو كلامي ده وقع ليك ما بتحتاج تقدم لي فيزا أو تمشي للسفاره لانو عندناواحد صاحبنا عندهم جارهم ود خالتو عسكري في الجوازات يطلع ليك جواز عدييييل.
و دمتم.

وبالمناسبة مع الدقن بتاعتك أمورك حتكون أكتر من سالكة

كيفك يا مجدي إسحق وكيف أحوالك...

صحيح قد تبدو فعلة وزير الداخلية البريطاني بعيدة كل البعد عن ممارسات حكومة كحكوماتنا، ولكن ما رأيك في أن الوزير المستقيل كان عضواً في حكومة أنت تعلم وأنا أعلم وعشرات الآلاف غيرنا يعلمون ويعلمن أن رئيسها، أي رئيس الحكومة، زج ببلده كتابع ذليل أعمى لبوش في حرب أسبابها الرئيسية في إعتقادي "جيوبولتيكية" وفبرك معه سلسة أكاذيب وإدعاءات وإفتراءات عجز هو نفسه عن الدفاع عنها..

(كتبت قبل حوالي أسبوعين عن موضوع إستقالة الوزير بعنوان - هل يا ترى هي مقارنة جائزة،، ولم أتابع الموضوع وردوده.. ولكن الذي شدني لموضوعك الأسلوب الشيق الذي "ينقط" خفة دم)..

كل سنة وانت والأسرة طيبين..

سيف

العزيز عادل اسحاق

قراية ذكية للمفارقة بين ما يحدث عندنا و ما يحدث عندهم
خليك من جماعة الانقاذ الشغل كل واحد منهم كل الوزارات
و ما حلو عن سمانا من 89، الحساسية السياسية دي كافي
البلي حتي في احزابنا و انظمتنا الدموقراطية مفقودة
الصادق المهدي حصل حل الحكومة الهو رئسها و استثني
نغسه من الحل و في مؤتمر صحفي لمان سألوه ليه ما
استغال مع حكومته، قال انه هو اول زول بجي لمجلس
الوزراء و اخر واحد بنصرف منه ليه يستغيل؟؟!!!
اتخيل حتي ما قادر يبعد من السلطة لم يوم لمان يتخلص
من معكر الصفو ابو حريرة و يعيد تشكيل نفس الحكومة
ناقص ابو حريرة!!!!!! دي تخانة جلد عجيبة
و المشكلة انها ورثت علي اساس انها نجاضة سياسية و اصلا
السياسة ما فيها تنازلات ذاتية يا الموت و لا الانقلاب
الاحزاب في كل الدنيا بتنتخب زعامة ليها ببرنامج محدد
اذا فشلت في اقناع الشعب به ينتفي مبرر وجودها علي
رأس الحزب الا عندنا البقول بسم الله و يركب فوق راس
حزب ولا حكومة فقد خلد فيها حتي يأتيه اليغين

كدي النشوف عكة الطروحات الجديدة و اذا بتقدر تتخلص من المصيبة دي

العزيز نصار
المعذرة مجدي إسحق مش عادل إسحق و اللبس هنا مسموح فعادل رجل خلوق و ذو فكر مستنير.
هاجسي عمق الازمة في وعينا الجمعي كشعب و طبعا سياسينا إفراز لهذا الوعي المتخلف و حتى مفكرينا نجدهم فاشلين في تجاوز هذا الإسار لك الود.

العزيز مجدي اسحاق

عذرا لهذا الخطأ في كتابة الاسم و ذلك لا ينقص من الود و التحايا شئ و عذا ايضا لعدم قيامي بواجب الترحب

و تسلم

Quote: و في الأخر أديك نصيحة تخدرك أوعك تحاول تعمل راجل دغري وتعمل فيها ما بتؤمن بحكايه المعرفه لانو ضغطك حيرتفع ويجيك سكري و يرجعوك لأهلك في نقاله بس واصل في حكاية شغل العرفه تعيش ملك وكل الناس حيعرفوك إنك راجل خدوم أخو أخوان والله ما يجيب يوم شكرك لكن لو حاولت تعمل فيها بتاع قانون و نظام الله قال بي قولك يمرقوا فيك الفي و المافي و حتبقى راجل تغيان و ما منك فايده.

الغالي مجدي ود إسحق
الشوق والشوق ليك يا زول يا جميل
سعيد بأن اري احرفك هنا ، والاجمل أن نلتقي في هذا الفضاء السايبري لأن الاوطان لم تعد تطيقنا

والله يا مجدي كلامك دا مشي فيني بالحرف ،،، اخوك عمل فيها الولد فقري وقلت ارخص العربية بالدرب العديل كدا ، حدث ولا حرج قضيت إجازتي كلها في صف الترخيص، ولولا لطف الله ووجود عمك حسن معي في يوم ما لكن لا ازال هناك في ذلك الصف العجيب!!! الغريبة إنو في المرة البعدا تبت وعملت بالنصيحة وقلت اباري السوق ،العسكري بتاع الجوازات حلف ما يديني جوازي قبال ما ادفع،، ولا (نفع التوسل ليو) ولا يحزنون دفعت عشان اشيل جوازي والبركة إنها وقفت هناك

لك الود والحب والشوق الكتير
الحبوب ملاح الروب 8)

الاخ/ مجدي اسحق

سلامات يا زول

طبعا مقارنتك ما بين وزراء حكومة صاحبة الجلالة و حكومة بتاعة كلو او بتاعة اي حاجة في السودان, مقارنة ذكية, و لكن اسمح لي ان اقول لك , بانك قد قفذت بالزان عندما بدأت القضية من الوزراء, من قولة تيت علي حد تعبير عزيزنا بولا, فمن اين اتي هؤلاء الوزراء, سوي ان كانوا وزراء بالصح او بالكذب؟

و لماذا نذهب بعيد الي الوزراء الذين لا يستقيلون لانهم ثقيليين, فهم لا يشيلهم الا الله, بعد عمر طويل, لانهم يأكلون اكثر من خريفين و حكومتين...الخ, و ننسي او نتناسي(احزابنا السياسية) التي تفرخ لنا هؤلاء الورزاء, فرئيس الحزب عندنا ينبطق عليه ما ينطبق علي ورزاءنا و يزيد, و لا فرق في ذلك بين احزاب (اليمين) و احزاب (اليسار) , فكلهم خالدين في الزعامة ابدا, لا يلقون عنها حولا!! اذن يا حبيب الحال من بعضه و كما كانت احزابكم و منظمات مجتمعكم المدني, كان وزراءكم في عهودكم المختلفة العسكرية و المدنية, مع ان الفرق بين الاثنين اقل من شعره, لان الحكومة العكسرية اقرب الي الحكومة المدنية من حبل الوريد و العكس هو الصحيح.


فما يحدث في بلاد مثل السودان, ما هو الا انعكاس اكثر من طبيعي للعلاقلات التي يتكون منها المجتمع فهي علاقات لا تنتج غير هذا الوضع, سوي ان عهد اصحاب الدقون الكبيرة و الصغيرة او الوزراء الخالين من الدقون. و ربك يولي من يصلح!!!

...

...

ألاخ برير
ما كان في قفز بالزانه و لو رجعت و قرأت النص ومداخلاتي مره ثانية لوجدت هذ الفقره

(هاجسي عمق الازمة في وعينا الجمعي كشعب و طبعا سياسينا إفراز لهذا الوعي المتخلف و حتى مفكرينا نجدهم فاشلين في تجاوز هذا الإسار ) ................ولك العتبى

الاخ/ مجدي اسحق

سلامات يا زول

لم اجد في النص الاصلي شئيا من هذا القيبل و لكنني وجدت بانك قد قلت بعض الشيء لبعض المتداخلين, و لم تفصل ذلك الشيء مقارنة بنصك الاصلي الذي تهكمت فيه من الورزاء الذين لا يستقيلون و الذين دون استقالتهم خرط القتاد, و كانت ملاحظتي ان نقرأ موقف هؤلاء من خلال قراءة احزابنا و منظمات مجتمعنا المدني و ...الخ, فانت لم تتحدث عن هذا بنفس النفس الذي تناولت فيه الورزاء, فقياداتنا خالدة و مخلدة, فلماذا هذا الخلود السرمدي لهذه القيادات؟ هل لديك ما تريد ان تقوله و بشكل صريح وواضح ام لا؟ و لك الود يا زول.

...