Post: #1
Title: عشة كع
Author: alfatih
Date: 12-15-2004, 08:34 AM
شوفى عليك الله الراجل الما بخجل دة ؟ ... من الله ما خلقك يا حليمة لقيتى ليكى زول شعارو الانتخابى مروحة ؟ ردت حليمة مكنات ... اجى يا بنات امى ؟ ... مروحة شنو فى السخانة دى ؟ ! .. ما قصدى سخانة الكتاحة ... لا السخانة الحايمة فى الجيوب دى ... لكن اقول ليكى شئ ... امبارح دى انا قريت فى الجريدة الجبتا فيها الكمونية انو الزول دة وكت سألوهوا ليه اخترت المروحة ... حلف بى دينو انو المروحة دى جات صدفة ساكت .. وانو الناس القالوا الكلام دة ناس مغرضين وعايزين المشروع بتاعو يفشل ... تفشل كلاويهو الراجل السجم دة .. قال شنو ... المروحة دى للضمان الاجتماعى ... فى ذمتى دى زمااان فى زول قال المروحة دى شعار اللف والدوران ... سجمى يا حليمة بقيتى تلفى كمان ؟! ... يا عشة لف شنو ... كدى هسع خلينا من كلامك الما جايب سعروا دة .. نحنا زاتنا كما شغلا مننا ... مالنا ومال انتخابات وبلاوى ... وبن لابد وابو مركب السمكاوى ... شايفاك عندك ضيوف ... صحى نسيت الضيوف اجرى اشوفم دايرين شنو ... يا عشة ام فتفت دى الاتّى بتاعا وينو ؟ ... ياخ تجيبيها لينا كلها زفارة ... وشطتك الليمونا ناقص حموضة دى ... ياخ على الاقل كتّرى الدكوة وسوطيها ... بلا السواطة عندك شنو .... شمارات الدولة كلها معاك ... كاب داخل وكاب مارق التقول اشتغلتى فى امن الدولة ... وبعدين تعالى هنا ... العساكر ديل جبتيهم من وين ؟ .. الله لا كسبهم ... محل ما نمشى هم ورانا ورانا ... عشة كع ازيك .... تكوّع فيك الزردية ... انت سميتنى عشة كع وضبحتا لى ؟ ... وبعدين يا عبد الجبار الولد دة جبتوهو معاكم ليه ... فى زول قدرو هنا ... اطلع برة تطلع فوقك كراكة شندى ... انا اطلع يا كع !! كويس بعرف اعمل ليكى شنو ... اعمل ... اعمل وامشى اشتكينى فى نيفاشا ... وعليك الله ما تخلى كاب حايم يا سجم ... الليلة وافليلى ... يا شباب اطلعوا بسرعة شايفا الكومر دة كبس علينا ... نطوا بفوق الحيطة انا هينة .. وانتى بتطلعى كيفن عاد ؟! ... اطلع لشنو ... ما خايفة من زول ...
يا عسكرى دخل الجماعة ديل جوة واقفل معاك الدرابزين بالكوريق ... الولية دى وديها زنزانة براها ما تعمل لينا فضايح ... اصلو لسانا متبرّى منها ... شباب نربّها رايكم شنو ؟ ... اها واحد يمسك لينا الباقة والتانيين يصفقوا بس ...
اها ... ابدأ ...
الاسم الكامل شيطان
المهنة بتاجر بنقوية
تلميذ فى مدرسة الكمبو
الكمبو فاتح فى الشارع
والشارع كلو سكرجية
قفّل يا .... ولا اقوم اصرف ليكم من بتاع النهار ؟ ... خليكم حلوين معانا وما تجيبوا لينا الهوا ...
حكمت المحكمة بأربعين جلدة لكل واحد وغرامة 300 الف ... ليه نحنا سارقين ولا شاربين ؟ ... عليك الله تعال اقطع ايدينا من خلاف برضو ... اسكت ... جيبوا الولية دى ... العرقى دة حقك ؟ ... وينو ؟ ... اهو دة ما شايفاهو
... دة ما عرقى ... دى موية ... موية كيف ؟ .. الموية الواحدة دى ... وهسع شموا ... جيب الجركانة دى يا عسكرى ... الظاهر الولية دى عاوزة تفطرنا ... كلامك صاح يا ولية ... وطيب ليه جابوكى هنا ؟ .. انا ممكن اعترف ... الجركانة دى كان فيها عرقى آآآآى .. لكن عشان صحبانى العساكر ديل خانونى الليلة ممكن برضو اخونهم ... تعرف يا حضرة القاضى ... الجماعة ديل شربوا الجركانة كلها وجابوا بدلها موية ... واذا عاوزة افتّها كمان فى قضاة برضو بسنسنوا عندى ... اسكتى يا ولية ... المهم حكمت عليك المحكمة بستين سوط وغرامة مالية 700 الف ... كر على ... ستين لشنو ؟ ... الشريعة قالت اربعين ... العشرين ديل لدعم الولاية ولا شنو ؟ !
|
Post: #2
Title: Re: عشة كع
Author: سجيمان
Date: 12-15-2004, 08:47 AM
Parent: #1
Quote: ... العشرين ديل لدعم الولاية ولا شنو ؟ !
|
والله ان جيت لي النصيحة.... الدق اخير من دفع القروش......
|
Post: #3
Title: Re: عشة كع
Author: alfatih
Date: 12-16-2004, 07:36 AM
Parent: #1
سجيمان
تسلم يا مبدع
انت عارف ... امبارح مشينا محكمة بتاعة تأمين السيارات لواحد صاحبنا ... فقام قال لى الخواجات اولاد الكلب ديل ما بدفع ليهم اى حاجة ... صاحبنا بالحجة كدة طلع من المحكمة بى مائة دولار غرامة ... وقعد يلاجج ليك
فى القاضى ... من اربعمائة يورو لمائة ... حتى وافق ... قال للقاضى على الطلاق كنت ما بدفع اى حاجة وحقكم
دة شيلوهو منى جلد ... قام القاضى قال ليهو الجلد هنا مافى ... تدفع بس .. الخواجات ديل نجيضين نجاضة
بعرفوا يطلعوا حقهم ..
|
Post: #4
Title: Re: عشة كع
Author: lana mahdi
Date: 12-16-2004, 07:40 AM
Parent: #1
امانـــــــــــــتــــــــــــــن فى ذمتــــــــــــك يا الفاتح انتا الشخصيات دى بتجيبا من وين؟؟؟؟
وفعلا المروحة للضمان الاجتماعى لانو بقى"هوااااااا"
|
Post: #5
Title: Re: عشة كع
Author: benyya
Date: 12-16-2004, 08:01 AM
Parent: #4
ما قصدى سخانة الكتاحة ... لا السخانة الحايمة فى الجيوب دى
عشه بالغت في دي
لك التحيه
و
لى قدام
|
Post: #6
Title: Re: عشة كع
Author: alfatih
Date: 12-17-2004, 03:07 AM
Parent: #1
امانتن فى ذمتى يا لنا
الشخصيات دى قاعدة بس بتكون مجهولة داخل المجتمع
قفزة ...
الذمة دى بى وين للجبهة يا لنا
|
Post: #7
Title: Re: عشة كع
Author: alfatih
Date: 12-17-2004, 03:09 AM
Parent: #1
العزيزة بنية
عشة دى الظاهر عليها متمردة
تسلمى
|
|