رثاء .. الراحل المقيم .. مصطفى سيد أحمد ....

علمتنا العشق الاصيل
هذة المرثية التي من المفترض ان يتغني بها الفنان يوسف الموصلي
والفنان خالد الصحافة
في رثاء الراحل المقيم
الفنان.مصطفي سيد احمد

من كلمات الشاعر
مدني النحلي

..................................


سلمتنا الرايا ومشيت
يالراقي فنك ومعتبر
يالفينا باقي غنا وشروق
يافقدنا وفقد الوتر
يا الفت شتلات الغناء
الحزنانة تحلم بالمطر
اديتنا احساس الامل
وسلمت عمرك للقدر
ياالفينا باقي سنا وغنا
يافقدنا وفقد الوتر
*************


تبكيك قوافي الاغنيات
الكنت خيلا وفارسا
تبكيك مقامات الحروف
الانت سيد ودارسا
تبكيك شواطي النيل ولد
ماالنيل وراك جفة وحسا
تبكيك مداين العزة ديك
العشت عمرك كايسا
ابكيك انا وناس البلد
ياالراقي فنك ومعتبر
ياالفينا باقي سنا وغنا
يافقدنا وفقد الوتر
****************************

علمتنا العشق الاصيل
عشق الكلام فوق البلد
حب العباد ومشي الهجير
وغناء البشاير والجلد
يامادي ايدك لي غريق
بي قلبك الطيب مدد
لي بنية خايفة لهب حروف
اهديتنا من روحك وعد
ياالراقي فنك ومعتبر
يافقدنا وفقد البلد
***************************


حنت مدامعي عليك بكيت
ضاريتنا من طفلين حنان
كان المطر ومع الغمام
وكان الامل ضيق المكان
مديت ظلالك لي بشيش
ونزلت من نغمات كمان
ناديت علي الشايل مولود
وجريت علي الكايس ملاذ
زي التقول مافتنا
ورحلت بالفرح الرذاذ
يالراقي فنك ومعتبر
يافقدنا وفقد الوتر
****************************


وعدك صدي الوتر السكت
لكنو مصلوب في رجاك
قلبك بلا قلب الصغار
خليتو مشدوة بي وراك
لون المشاتل والخريف
ضل الغنيوات الوريف
فلب الكليمات الرهيف
ومع الثكالي الفي وراك
اتغطوا بي ليل الرصيف
يالراقي فنك ومعتبر
يافقدنا وفقد الوتر
************************


كان الوقت ليل الغياب
والغربة والجرح النزيف
اختارك السفر الاليم
للرحلة والترحال قدر
لاقمت ستفت الشنط
لاكنت موعود بالسفر
يافقدنا وفقد البلد
يالراقي فنك ومعتبر

كان الوقت زمن الالم
والدمعة في خد الوتر
من بين شبابيك العيون
اسودا وانكسر القمر
واحسرة القاعدين وراك
غدار دموعك يازمن
مفتوح نزيفك ياشجن

حزنان خريفك ياوطن
يابت حديقة من الالم
لافينا احساس بالامل
لاتاني مشوارنا القلم
لاعودك المتكي وحزين
ضرعا بدر صافي النغم
الدنيا لاحب لاعشم
الدنيا مشوار الالم
الدنيا مشوار الندم
يالراقي فنك ومعتبر
يافقدنا وفقد الوتر
يالفت شتلات الغناء
الحزنانة تحلم بالمطر
حزنانة تحلم بالمطر
***************************

السماااااااااعااااااااات يا حبااااااااان ..

جرح الاغلبية

محمد حبيب الله كدكي
******************


يلا ياعيني ابكي في
مكالمة هاتفية

ابكي مصطفي ود سيد احمد
قمة الفن ياشقية
ابكي طول الليل
ونهارك من صباحك للعشية


ابكي سوي بكاء
اليتامي مال اليتيم مابدور وصية
ابكي قطري كل دمعة ليها فضل الاسبقية
وتاني من الليلة حتما مابتشرفك البقية
وانتي ماك
مشحودة تبكي
حتي ان كان عنصرية

***************************

مابشبهك الا الصهيل
مدنى النخلى
...............
نفس التصوّر والفهم
فسّرت حلمك في البيوت الراقدة
بين سندس صباح الموية
والقش النِعِس..
متكي الخريف حازم مطر شوقو
البحّلق في سحابو البيك وجد
في الأرض مرتع وإتكى
الطير يردد مقطعين
من غنوة للحب والسلام
أدمنت كيف عشق الأرض؟
ألّفت ما بين التوافق والخصام
دابا البيوت الأدركت واستدركت
غنّايا ما جابو الفضول
ما فسّرت سرّ العلاقة
حكمة الخالق تجلّت في الفصول
في زحمة الموج البجيب نفس الخصوبة
التملا أحضان الحقول..
ما بشبهك إلاّ الصهيل البشبهك
ما اندرك.. يا طير نبت ريشو المشتت
في الشَرَك
ضرب الجهات الأربعة.. فجّ الوهج
وإتبدى من ليلو الحلك..
ما أجملك..
يا ماشي تحت الغيمة ضُل
كيف يستقيم الضل إذا العود إنعوج
كيفن ثبات الضو
إذا مات الوهج
مسكونة هذى الأمسيات
بي غنوة النغم الظريف
نفس البيوت الراكزة
وسط العتمة والريح المخيف
خبّا الشدر أحزانو
في الضل الوريق..
عبّا التعب سفر القصايد بالنزيف
الغنوة أدمنت الصهيل
إتوسدت حلم الرصيف
أديني قدرة على الصراخ
أمرق من أحزانك
وأقيف


***************************

مصطفى

الدكتورة .. عفاف الصادق


يالكحلت عيون الدنيا بلون الغنوه
يالضفرت ضفاير احساس الكلمه الحلوه
يالشتت نجوم الليل في وش النيل
عقدا فوق القمره بيقدح فينا الضو
يالطقطقت اصابع السحب الشالن جو
دفق عسل المطره و نقط ..كبت شو
نضمت..غنت ..سكتت ..صنت
مرقت ..دخلت ..قامت ..قعدت
شن بتسو ؟



تقشقش فوق رقراق الدمع الكاسي العين بهدمة دم
كل ما اتعرى يجدد توبو يضاري الريحه الكست الجو
تساسك بين تيار الموج الكسر الجدول ودفق شو
تسارق فوق نجماتا برقن هجن لجن ..باتن قو
تضاير فوق وديانا شبعن ..رضعن ضرع السحب الشالن برا ..جو
تصنت غنوة سيره عريسه مهقد ..مكسي ..مجرتك
يفوح الصندل ..وعطر المحلب منو مدفق
امو تعدل ..واختو الرقصت ..وخالو يبشر ...
وعمو بيعرض وسط السهله ..وخيرو مدفق
غنوه بتعزف نغم اتشتت ..رعدا صفق
بردا هز اتباطن صوتو
اتطانن حر لوح و هوا
وظهرا فارسا تب ما اتلوى
وزغرد ليك ايقاع المطر اتلبب
حضن الارض ونام


ود سيد احمد دق المحلب جوه الفكره
وخت الذكرى
ذكرى الليله وذكرة بكره
ابيه و حره
مبدأ و عزه
سيما وعبره
درايا و خبره
شموخ بيت عازه الما بتهزه
برغم الضيم



وليد ضكران
هز و رز , تب ما فز
اتقطر نز
ادفق ضي
ود سيد احمد شال الريشه
ورسم اللوحه
وشتت لونها
وتيرب بيهو سما السودان



وكانت النبته عصارة الغنوه الفيها
ثقافه .. وحب .. وسياسه
مزيجها بلدنا وفيها ولدنا اتعطن الريد
والبت الحلوه ..الوطن الغالي
وسرج بيهو و شد ضهر سودانا القام




وكيف بتفوت
وكيف بتفوت ..
يالولد الغنى وشنا ورنا
وخالدا حي
ما بتتضارى بشوفك قاعد بين الرمش الفوق عيني
يالدفيت اعضاء الكلمه في ليل
البرد ..الريح ..الصي
يالنديت اغصان الحرف بصيفا
حرا و شد الكي
وكيف بتفوت يالولد الضوا وشيشو قليب الوتر
الغنا وطربا غطى فجاج الحي


تمرق بين ورتاب الزرع الفرهد
تمرق بين حبات المطر الطقطق نقط
يحضن ليلا سود ..هج ..وهود
تمرق بين النيل الكتر ادفق و نمرق
تمرق بين الوترالصفق غنا و زغرد
تمرق بين صفقات الشجر اخضر و ورق
قام اتشابى و عانق كتف الليل
اتطاول باس القمره و قبل عين الشمس



كيف نبكيك يا راجل الليله و بكره و امس
كيف نبكيك ونحنا بنسمع صوتك
سرا.. وجهرا ..وهمس
كيف نبكيك و انت معانا تشيل و تخت
ترص و تقص
تفج السهله وتحكي الغنوه اللبست صوتك
وشالت حسك ..ونفسك ..وروحك
وسمحت زي

وانت معانا بقيت جوانا و ماك بتفوت
حتلت حنينا جوه القلب
بصمت عليهو وجود موجود ..برغم الموج
وسفر الجسد الما محدود
غلبت تفوت
كسرت الحاجز الراكز جسرو على المسدود
رقعت الهدم الراسي خيوطو على المقدود
مسحت ..مسحت البعد الارضي المامحدود
نسفت مسافة الزمن الروح و مامعدود
سكنت مسامة النغم المن ايقاع النبض
بقيت الدم ..و الروح ..و القلب
هزمت الموج ..غلبت تفوت


تفوت لي وين ؟؟
وانت الزول الباقي وحي
انت النور الوج الضي
وانت البحر الدفق ري
تفوت على وين ؟؟..ونحنا زرعنا لسع ني



النيل الابيض لاقى و عانق حضن الازرق
باس الابيض خد الزنجي
اتقلدوا.. اتقادوا
اتوحدوا ..فاتوا
مات العنصر و داب الفارق
من بيناتن


صدر العين اتملى بالعبره
اتنهد نفس الكلمه الحلوه ..اتأوه
آهة طفت القمره و نفخت قلب الجمره
وكبت فينا ضلام
يا انسان .. يا فنان يالقاومت الذاكره و النسيان
دخلت بوين ؟
سكنت الدم الجاري على الشريان
لوليت جوانا عصاية الكلمه ..الشرف ..العزه
العايش فينا في كل زمان
جرجرت علينا حروف النغم الطربا
يهز يفرح كل مكان
ختيت الرأي صريح قولا و فعلا و فكرا
سجل اكتب يا تاريخ


يا استاذ .. يا ممتاز
ختيت الدرس مفيد و صحيح
درسا ما دايرلو وسايلا للتوضيح
ونحنا فهمنا كتبنا درسنا على الكراس
انتهت الحصه و ناحن سكلبن الاجراس
مرقت صحيح ؟؟؟
مشيت بي وين ؟؟
وكيف خليتنا بدون تصحيح ؟!؟
نصحح وين !!؟
شلنا الهم
نصحح وين
جينا الكم
نصحح وين
وكل اقلامنا تقطر دم
كمل احمر دفق لونها فحم
ونحنا كبرنا وعينا و زدنا فهم
عرفنا اهداف الدرس تمام
ختينا النقطه ,الهمزه ,الشوله ,الاستفهام
خلصنا خلاص
جمعنا قلمنا حبرنا كتابنا مع الكراس
يالوحدت بسفرك كل الناس
يامقياس
يا ميراث
واساس المعنى
الحب ..المبدأ ..و الاحساس
نعم الارث الباقي و اعظم ساس



وكيف بتفوت
و افتش ليك انا جاي بي جاي
و أهلك و ناسك مرقوا يكوسو عليك معاي
وانادي عليك ارتى عليا
فوت بي وشك ارجع جاي
وفجأه ...و فجأه بتطلع من جواي
متل النور الضوا حداي
وموج النيل الرايح جاي
وهج العين الفكر الراي
ومن الشمس بريق ضواي
وصدر الام الليك غطاي
حديثها يناغم فيك لولاي
وصوتها يهدهد فيك هداي

هوها..يا هوها
واحد ..اتنين ..تلاته
ابرة الخياطه
فيها م وفيها ص وفيها ط
و ف
وفيها جميع المصطفى


***************************

يا خال فاطمه

تحياتي لك وأنت تنشر لمحبي الراحل المقيم : مصطفى سيد أحمد
هذه المرثيات الرائعه والكلمات الجميله

مع محبتي
مهدي الأمين

شكرااااا أخي مهدي .. المسكون بحب الراحل المقيم مصطفى ..

دمت ..

العزيز : خال فاطمة

مليون قبلة اعزاز في جبينك وأنت تفتح جبهة حب ندية لرجل كان زمانا لوحده

وكان عقدا فريدا في سلسلة ماسية نسجها كل مبدعي بلادي .. ولكن كان للراحل

الصديق فوق سمائها مقعدا وثيرا تحت أشعة كماأضاءت أركان الغناء في وطني

المختطف منذ سنين .

ولا زلت افخر بأنني كنت ذلك الصحفي الذي نال شرف اجراء آخر حوار معه قبيل
رحيله.

عليه الرحمة بقدر ما أمتعنا واطربنا وأشجانا .

لك يا خال كل المحبة.

خضر عطا المنان

Quote: ولا زلت افخر بأنني كنت ذلك الصحفي الذي نال شرف اجراء آخر حوار معه قبيل رحيله.

الحبيب خضر .. أكتب .. وأكتب .. وأكتب .. مصطفى يستحق أكثر مما كتبنا فيه .. عليه رحمة الله وجعل الجنة مثواه ..

عاطر ودي أيها الراااااائع ود عطا ..

فــــــــــــوق ...

فـــــــــــوق ...