صوره من السودان هسع دي

بت اخت زوجتي علقت تعليق جميل حا ابدى ليكم بهو
بت اخت زوجتي دي شهادة عربية مربية في السعوديه ما جابتا الا الجامعة السنة دي
قالت بتحب السودان شديد
سالناها ليه
ثالت عشان الحاجات في السعودية زي الفي فلم كرتون
قلنا ليها كيف

قالت البيوت مرصوصة عديل
وشارع الظلط اسود ونظيف
ولمن تجي العربية ماشة فيهو ولا بتتهزا
والالوان في الحاجات واضحة
لاكن هنا في السودان
اللون مكتح
والبيوت ما عديلة
وشارع الظلت مغبش ولكو حفر
ولو راكب عربية حا تتنشن من النقيذ

عشان كده انا حا اوريكم الصورة من الشباك بتاع المقى الانا قاعد فيهو
كيه ليكم يا مغتربين ومهاجرين
عشان نشوف منو الفي نعمة
اولا انا في الثورة شارع النص تقاطع شارع المدارس بين الحاة الاولى والتانية
المنظر قدامي هسع مرة علبيتين اللبلمهم مع بعض شنو انا ما بعرف
الاولى عربية كامري موديل 2004
والتانية هلمن غايتو بتكون قبلي سنة 1960 م
تصور الاتنين ماشين في نفس الظلط وورا بعض
هاهاهاهاهاهاهاهاهاهاهاهاهاها
بتاع الهلمن بضرب بوري لي بتاع الكامري
يعني الود مستعجل وداك معطلو

والله لاكن

مجموع من الشباب الجاكين
جكت المساء
عمر 15 وكده
مكتحين لحدي الركب
وواحد فيهم لابس سفنجة
لاكن مبسوطين التقول جارين في الهايدبارك

وديك بتين مخمخمات
ما عارفات يقطعن الظلط
واحده تتقدم والتانيه تتاخر
امك اوع العربية
قربت تتقشها
صاحب العربيه شاكلههم
قال ليههها
ياب ما تقطعي
يقطع ...............

هاهاهاهاهاهاههاها
عيب يا عمنا

وديك شباب من اخوانا الجنوبين
بكونو هسع جو من القالة
رطانة جد
والله شالو ليهم كبرة صحن
واظن طاولة كاملة بتاعت عيش

وكم واحد كده بترنمو ليهم ترنيمة جميلة
يعني تناسق فطري غريب في الاصوات

مع اني ما فاهم حاجة لاكن غنيتهم عجبتني

وديك بت الحلبة الشحادة
دي اظرف شحادة قابلتني
والله بتشيل منك قروشك بتشيلها منك
ولو ما عندك بتخليك تشحد ليها من الجمبك
ربنا يعينها على دنيتها

امك شكلة
دقيقة اشوف الحاجل شنو
.......................................

ديل اولاد من الحلة
متشاكلين شكله تافهة خلاص
مرقو من نص الحفلة الفي شارع خمسة
وقال ليهو طالعني الخلا
لي
عشان وقف قدامو في الحفلة وغتاهو
لاكن عليك الله عاين ليهم راجيعن مع بعض للحفة
زي الما كانو متشاكلين

ياخي انا يدي وجعتني
كفاكم كده الليلة

الآخ وليد تحياتى ،
وهنا يكمن جمال السودان
ست البنات .

حبابك يا ست البنات
وزيادة مني كده
البنين كمان

انت جوه السودان ومتمتع معنا بالصورة دي
ولا بره منو
عشان اقول ليك كييييييييييييييييييييييييييييييييييه

أنا يا وليد جوه وبره !
زى تقول قاعدة ومافى !
لكن السودان طوالى معاى وأنا جواهو وهو جواى .
وروح واحدة فى جسدين .
----
حقيقة السرد جميل ، والخاطرة عفوية وصادقةوترسم صورة جميلة لبلدنا النقى .

ست البنات .

خلاص البلد قربت تقفل
وصوت العربات بقى بعيد
ودي نعمة ما نقمة
عشان بعد شوية ببقى مافي صوت خالص
ولو عندك مشاكل الدنيا كلها تقدر نفكر فيها

انتو هناك يادابو مشاكلكم بتبدا

داك صوت ركشة جاي من بعيييييييييييييييييييييييييد
قربت ووصلت
ركشه حمرا التقول فيها ظار
وعندها لستك فيهو كركاسة ولا مفتول ما عارف
المهم انها بتعرج

ياسلام
عمك بتاع الكارو ده بجي زي الوكت ده كلو يوم
سايق حصانو وخاتي فيهو حبه قصب برسيم
ما عارفو بتاخر لي
لاكن يبدو لي عن قصد عشان يختى العربات

وديك عربية اتوس
يالما بيعرفو الاتوس
الاتوس دي عربية صغيرونه وجراية جنس جري
بقت اكتر من الناس في السودان

هاهاهاهاهاهاهاهاهاهاها

تماسيح الليل ظهرو
صحابك كرعينو ما شايلنو
ماشي ويترنح
اقول ليكم حاجة
الا امشي اقدم صاحبنا السكران ده لي قدام
يلا مع السلامة