Post: #1
Title: خواطر عائد من الغربة
Author: طه حسن عبدالله
Date: 12-06-2004, 11:51 AM
بفتش ليك
يا فرحة زمانى الفات
ويا أمل الزمان الجاى
بفتش ليك
فى هجعةطيوراً شاردة
لى موسم خريف رجـّاى
بفتش ليك
فى مغناى
وفى الخاطر السرح
فى الدنيا من تالاى
وفى الوجع
البحـّسو براى
لقيت أثرك
ملامحك بصمة فى جّواى
ملونة بى ضياها رجاى
مراكب شوقى
فى شيمة زمان لاواى
ضفافك غايرة
فى هـّدام خصام كاواى
وطبعك يمه
ما الطبع القبيل هـّداى
لا الطبع البنالى صباى
ولا الوصيت
عليهو جناى
بحس بالغربة
وإنتى حداى
وسط ناساً
يسرقوا اللقمة
من فم الرضيع تاتاى
و ناس تحلف
بإسم المولى
متناسية الغموس الجاى
و ناس تخدع
وناس تقلع
وناس بالفرحةكاحلة رمش
وناس الفاقة ليها فرش
وناس آمالا فى كوم قش
وناس تقلع هدوما تطش
وناس بالغش
يسرقو الدار
تكوس بالأجرة للضـّراى
وما بتشفعلك الوقفات
مهما كنت يوم سـّواى
قدر جيبك
مكانتك تبقى
عند الناس
قليل الباقى
عندو إحساس
قليل الفرهدن شتلاتو
روحو تشابى للأنفاس
يشيل اللقمة
لو هى شحيحة
للبايت القوى المحتاس
ويقش الدمعة
يمحى الوجعة
للهايم فى ليل بكـّاى
منو البيسمع
كلام الراوى
ديمة يباعد الوسواس
منوالقادر
يشيل هم عزة
سايقة الليل
مع السـّراى
منو البتذكـّر إسماعيل
وقت قاليّنا
وااااأسفاااااى
|
Post: #2
Title: Re: خواطر عائد من الغربة
Author: سجيمان
Date: 12-06-2004, 12:08 PM
Parent: #1
طه يا رائع
Quote: وناس آمالا فى كوم قش
وناس تقلع هدوما تطش
|
ديل الاتنين باقيات علي
|
Post: #4
Title: Re: خواطر عائد من الغربة
Author: طه حسن عبدالله
Date: 12-07-2004, 11:29 AM
Parent: #2
أخى المبدع الرائع سجيمان
الله ليك من الأتنين ديل لأنهم السواد الأعظم
بس فى ناس قلـّعت هدوما بعد ما طشـّت
مع خالص ودى
|
Post: #3
Title: Re: خواطر عائد من الغربة
Author: alfatih
Date: 12-06-2004, 03:37 PM
Parent: #1
استاذ طه
ليك الحب
حاجة تانية ...
كمل الكلام بالجد
مزيدا من ضوء الشموع فى زمن الغبار العار
|
Post: #5
Title: Re: خواطر عائد من الغربة
Author: طه حسن عبدالله
Date: 12-07-2004, 11:35 AM
Parent: #3
العزيز أستاذ الفاتح
تحية لك ولكل من عرفت مقلتيه الإبصار
و أتمنى أن أكون دائماً عند حسن ظنك
مع خالص إحترامى و ودى
|
Post: #6
Title: Re: خواطر عائد من الغربة
Author: جمال السنوسي
Date: 12-07-2004, 11:43 AM
Parent: #5
طـه حبيبنا
وينك يا زول
امانة ما فقدناك
يا ريت نتلم تاني
في بلدنا
عندي احساس
اكيد بنتلما
انشاء الله في جواب ايناس
ونحن في انتظار ابداعك من الداخل
سلام
|
Post: #7
Title: Re: خواطر عائد من الغربة
Author: طه حسن عبدالله
Date: 12-07-2004, 12:27 PM
Parent: #6
العزيز جمال
كيف حالك وحال جميع الإخوه الهناك
اللمة هنا بتعتريها بعض الصعوبات لكن رغم قلتها
تظل معطـّرة بعبق الإخاء و الشلة هنا ناقصة لمساتك
الظريفة وإنشاءالله تجينا قريب و نعيد الماضى
والشوق بحر
تحياتى للطيب برير و أشرف الفيل والإخيدر و ود الكعيك و علاء
ولكم جميعاً خالص ودى
|
Post: #8
Title: Re: خواطر عائد من الغربة
Author: جمال السنوسي
Date: 12-09-2004, 02:17 AM
Parent: #7
طـــــه العزيــــز
لك التحية
وتقبل سلام الجيمع
والتهاني لي كل الناس وخاصة
العم شمس الدين وفاروق الشيخ وكــــمــــال ابـــو شـــــعــــر
جمال
|
Post: #9
Title: Re: خواطر عائد من الغربة
Author: طه حسن عبدالله
Date: 12-11-2004, 03:32 AM
Parent: #8
العزيز جمال
عمك بخير بس عندو وفاة والفراش عند ناس أب شعر
أسأل منو أبو الزهور
عشان شال معاهو الفاتحة و كتب المرثية
مع خالص الود
|
Post: #10
Title: Re: خواطر عائد من الغربة
Author: طه حسن عبدالله
Date: 12-22-2004, 02:01 AM
Parent: #9
الأ العزيز جمال
سوف أكتب عن بعض خولطر العودة
مع خالص الشكر
|
|