جون قرنق ...بالغتا !!!!!!!!!!!!!!!

يحلنا الحلة بلة من نيفاشا وبرتكولات السلام الستة ولا السبعة ما عارف ! مرة يقولو الحركة الشعبية لتحرير السودان محتجة على العملة ... مالو نغيرا ... وبعدين جات (بدعة ) جديدة قالو الحركة عبر عدد من انصارها (الاخ رمضان والاستاذ غازى سليمان ) محتجين وعاملين جوطة (قال شنو رافضين انو الخرطوم تكون عاصمة للثقافة العربية ) ودا زى ما بيقولو ضد برتكولات نيفاشا وصاحبة السمو (مشاكوس ) وطبعا اخوكم شليق وبتاع محن قمت طوالى نبشت الورق المعاى وقريت البرتكولات دى حتة حتة وسطر سطر لمن قربت اغنى (نجمة نجمة الليل نعدو ) - بالمناسبة وين الفنان الحو الصوت الاسمو ابراهيم حسين دا - ويا شباب صدقووووووووونى ما لقيت (شولة ) بتقول انو ممنوع من على الخرطوم تبقى عاصمة للثقافة العربية والا الماوية زاتو !
يا جماعة لو فى زول عندو علاقة مع (حبايبنا ) فى الحركة الشعبية كلموهم يفكوها شوية وما (يقدونا ) بنظرياتهم الغريبة دى .........هسة دا كلام حركة كبيرة زى بتاعة جون قرنق دى تورم عيونا بمانشتيات الجرايد البتقول انو الحركة شايفة انو الموضوع دا غلط وما عارف شنو .
بعدين بالطريقة يعنى نعمل شنو نغير اسماءنا دى يعنى جدى (جمعه ) جمعه الخاطر بحر الدين دا نقوم نسميهو (FRIDAY)!!!!!!!!!!!! ولا يمكن يجى يوم نلقى ناس الحركة ديل محتجين وعاوزين يغيرو شعار (صقر الجديان ) لان طائر صحراوى ويرمز (للشمال ) بحاجة عندها رمزية استوائية (فيل ) او (حلوف ) .....غايتو يحلنا الحلة بلة من (عقد ) بعض المتحدثين باسم الحركة الشعبية فى الخرطوم ...... بيبالغو عديل .

وبعد أن هدات ثائرة تطبيق أحكام الشريعة الإسلامية بالعاصمة القومية يبدو انه في الأفق القريب تلوح مشاجرة وأزمة وتهارش جديد بشان مدى مشروعية استضافة ذات العاصمة لأنشطة ثقافية عربية (عابرة ) في حدث متنقل يجوب كافة العواصم العربية دون تمييز .
• واعتقد ان ذلك مسلك لا يمكن ألا وصفه بأنه محض استهلاك سياسي و(قشرة ) وسعى لاصطناع جدل في مسالة لا تستحق المغالطات التي تتجاهل حقائق التنوع الثقافي الإثني فى السوداني وأنها عاشت فى وئام وتمازج لا تمايز بينها بقدر ما يجعل وجه هذه البلاد العربي أكثر (ملاحة ) وشقها الافريقى أكثر فصاحة.
• فقد تلزم الجنوبيين ضرورات التساكن القومي – كما يقول الدكتور عبد الله على إبراهيم - إلى اكتساب اللغة العربية أو عادات عربية إسلامية . وشواهد ذلك عديدة وفى خطاب وأنشطة الحركة الشعبية نفسها قبل الآخرين من مناصريها عن بعد او الناطقين باسمها بالداخل .
• لغة (عربي جوبا) المشتقة معظم مفرداتها من اللغة العربية مخلوطة باللغات المحلية في المحافظات الاستوائية مع بعض المفردات الإنجليزية، وهي أشبه باللغة السواحيلية بشرق أفريقيا، وقد ذكر الدكتور منصور خالد أن الدكتور جون قرنق عندما يخاطب قواته في تنويراته ولقاءاته يحدثهم بعربي جوبا .
• كما تستخدم أيضاً في تأليف الترانيم الكنسية في كل كنائس الجنوب تقريباً. وقامت على خطابها إذاعة (صوت الحق) في مرحلة الديمقراطية الثالثة التي كانت تبث من مدينة ملكال بالجنوب وأخيرا إذاعة جوبا .
• والطريف أن من هاجموا استضافة الخرطوم للثقافة العربية تحدثوا بلسان (عربي ) ولم يتحدثوا بلغة أجنبية أو لهجة محلية و(رطانة ) من الشمال أو الجنوب .
• ولينتهي البعض عن ترويج مزاعم (افريقية ) السودان باعتبارها أساس الهوية الوطنية ، وتقليل شأن القومية العربية الشمالية باعتبارها (أقلية مسيطرة) وفي بعض الأحيان مجرد (جالية أجنبية) يجب طردها من البلاد من خلال نظرة (عرقية) بخلق تعارض موهوم بين الانتماء العربي الإسلامي في الهوية السودانية وانتمائها السوداني و الإفريقي.

يحلنا الحلة بلة





هو الحلة بله شنو

قالو بلة مااااااااااااااات وانحل من الموت والذلة ......والرواية تحتمل المذيد يا عمدة .

حماده ازيك00
انت عارف برضو انت بالغته اسه نكته ليهم كلام بكره يشيلوه يعملو منو مقرارت وهلمجراه00
وود العمده اتخيل زاتو بقول (يحلنا الحله بله) معقول يا الحبيب..ولا تعليق...


طبعا فى شى من زمان عاجبنى وجد مابرضى فيهو
(وعاوزين يغيرو شعار (صقر الجديان ) لان طائر صحراوى ويرمز (للشمال )) 0
ياعزيزى وحاتك لابعرفو تابع لى شرق ولا غرب لكن بس كان عاجبنى 00يقومو يغيرو انا بعمل ثوره وبتمرد شفته الساقيه لسه مدوره كيف000
قايتو الحال كل زول يشل كومو ويسوى فيها الدايرو 00

تحياتى كتير ليك 00
وماشين فى السكه نمد00

معتز تروتسكى كيفك يا رائع ......اول شى قول لى كفارة (غلبووووووووونا ) ناس الهلال ودا كوم وجارنا (ابراهيم بشارة كوم ) الا انوم بره البيت بلقاه منتظر هسة وعامل (طابور شرف ) وزفة خصوصى لشخصى المنهزم بفضل سوء حظ ابو حشيش ونكد حال الكرة السودانية
بخصوص موضوع البوست ... ياخ بالجد انا شخصيا عندى روح لتقبل الحركة الشعبية معاى فى اى حتة وهم فى النهاية سودانيين اولاد بلد نختلف او نتفق حولهم لكن عندهم حقوق لكن ما لدرجة انو يمسكو فى اى حاجة كدا ... ياخ بيقولو فى حاجات كدا مرات تحير ومنها موضوع الخرطوم عاصمة الثقافة العربية دا !

الثقافة العربية
الثقافة الافريقية
حركة كوش
حركة البجة
حركة تحرير السودان
مندكورو
جلابة
عبيد
أولاد البحر
أولاد الغرب
رطانة
أسياد البلد
أضان حمراء
جنجويد
غرابة
عملاء
طابور خامس
شريعة
علمانية

كلها أعراض جانبية لمرض أسموا الناس دايرة تأكل عيش

الناس دي كلها دايرة تاكل عيش

هذا هو الموضوع ببساطة شديدة

الأخ محمد حامد فرايداى والأخوة المتداخلون..
انا لا ادرى اين القضية فى ان تكون اليوم الخرطوم عاصمة للثقافة العربية وتكون غدا عاصمة للثقافة الأفريقية وتكون بعد غد عاصمة للثقافة الآفروعربية ؟ اليس المواطن السودانى اليوم هو خليط من كل هؤلاء ؟ انا لا ادرى لماذا نحن دائما ما نخلق لأنفسنا معارك فى غير ما معترك ودائما وابدا شغالين بالفارغة بس .

up

وانا فى رحاب عينيك زول مر عدى عليك00
جمعة سلام ياصاحبى 00
اخبارك وصحتك ياعزيزنا00
وكما طلعته بتاع كوره وماخليناك كويس مالك مع الشغلانه دى انا بكجنها موت شوف لى اى رياضه تانيه وبالاخص كورتنا 00 اسه ناس الكوره هنا بسو فى جني عبط وزعلانين ليك منى كيف قايتو ياهو ماشين فى السكه نمد 00
*بخصوص الموضوع بتاعك بالجد موضوع بتاع نقاش وعندى الرغبه فيهو بس ما الان لانو شويه مشغول اسبوع اسبوعين كدى وبركز ليك اسه نجيك مساوره وكده 000
الى ذك الوقت اسمع رسل ايميلك بتاع الهوت ميل لانو غيرنا كل البضاعه 00

العزيز معتز
جدا يا ابو السعادة ........نصلك قريب

محمد حامد جمعه

Quote: غايتو يحلنا الحلة بلة من (عقد ) بعض المتحدثين باسم الحركة الشعبية فى الخرطوم ...... بيبالغو عديل .

ليس هنالك حل ولكن لا بد من دفع ضريبة السلام حتى يتعايش الجميع فى امان وما يخرج من افواه بعض قيادات الحركة والجبهه ينصب فى خانة الهجوم دفاعا او املا فى تعطيل الاتفاقية التى اصبحت غاب قةسين أو أدنى.
تحياتى

يا (بلدى ) صباح الخير
طيب ما اختلفنا لكن بس ما (قدر دا ) خاصة من جانب اخوانا فى الحركة .. يعنى حقو يفكوها شوية ..

بصراحة الضمير يقتضى ان يعتذر السودان هذا العام بالتحديد

عن مسالة عاصمة الثقافة العربية دى لان هناك اولويات والمعروف ان هذا البرنامج سوف يكلف البلاد الملايين من الجنيهات ان لم تكن المليارات فنحن فى حاجة ماسة لهذه المقدرات ان تنفق على الدواء والكساء والماكل للمشردين واللاجئين فى وقت نمد فيها ايادينا الى كل المنظمات الدولية والدول ، عندنا ناس فى اطراف المدن

وفى معسكرات مكدسة ماساوية فى انتظار الدواء والكساء والماكل ان تاتيهم من وراء البحار من بلاد العم سام او من اى بقعة فى الارض المهم ان تصل شئ ما ، فان تتصدى الخرطوم لاقامة هذا الذى يسمى عاصمة الثقافة العربية هو ضرب من ضروب الانصراف فى هذا الوقت وفى ظل هذه الظروف التى تغلى فيها البلاد على كافة جهاتها على الاقل ،

فى الجنوب الحركة الشعبية

فى الشمال حركة وليدة على حسب البيانات
وفى الغرب حركة تحرير السودان والعدل والمساواة والحركة الوطنية
وفى الشرق الاسود الحرة ومؤتمر البجا
وفى الوسط والعاصمة التجمع الوطنى الديمقراطى والشعبى

هل يعقل فى ظل هذه الظروف ان تهتم الحكومة بشان اخر

هذا دليل قاطع ان مكونات هذا الجسم غير منسجمة ويحمل عوامل الفناء بداخلها

ولاينطبق عليه قول الرسول (ص) ( مثل المؤمنين فى توادهم وتراحمهم كمثل الجسد الواحد
اذا اشتكى منه عضو تداعى سائر له الجسد بالسهر والحمى )

الأخ شدو..
الا توافقنى بأن هذه الأموال اصلو حينهبوها حينهبوها وعشان كدة احسن بصرفوها على اعمال ثقافية قد تفيد..
وهم عندما يصرفون هذه الأموال على الثقافة ليس حبا فى الفن او الثقافةانما يريدون ان يجملوا وجههم القبيح..ورب ضارة نافعة ياخى.
مع تحياتى.

يا شباب مشكلة الصرف والتمويل واوليات الصرف دى مسالة ومسالة انك تنفى عن السودان عروبته دى مسالة تانية

الاخ محمد والجميع هنا سلام

Quote: يا شباب مشكلة الصرف والتمويل واوليات الصرف دى مسالة ومسالة انك تنفى عن السودان عروبته دى مسالة تانية

ملحوظة: الثقافة العربية جزء من السودان لا أحد ينكر ذلك ولكن ليس السودان (بأكمله جزء من الثقافة العربية)

محمد حامد

المشكلة ليست فى الصرف كما قال بعد المتداخلين لانو موضوع الصرف تموله جامعة الدول العربية وهو نظام متبع فى حالة تحديد الاحتفال بأى عاصمة عربية وعليه تكون المشكلة اين موضع التماسيح من الشيكات المستلمة من الجامعة العربية
اما عن موضع العروبة فلا تستطيع الحركة او غيرها الان عمل شىء طالما ان السودان مازال مسجلا فى قائمة دول الجامعة العربية الى ان يستجد جديد

Quote: طيب ما اختلفنا لكن بس ما (قدر دا ) خاصة من جانب اخوانا فى الحركة .. يعنى حقو يفكوها شوية

وبرضو كمان ما بنختلف وهذا كان حديثى

Quote: وما يخرج من افواه بعض قيادات الحركة والجبهه ينصب فى خانة الهجوم دفاعا او املا فى تعطيل الاتفاقية

تحياتى

كلام جميل ......

اها صباح الخير .......طبعا فى صحف اليوم الخميس طلع علينا الناطق الرسمى باسم الحركة الشعبية بالخرطوم بحوار فى صحيفة اخبار اليوم ....ختاهو قرض وحلف بالتقطع انو الحركة ما عاوزة الخرطوم تكون عاصمة للثقافة العربية وانو - يعنى المتحدث - يفضل الموووووووووووووووت عديل كدا على انو يحضر البرنامج دا فى الخرطوم وشبكنا ليك دى عنصرية واحياز عرقى للثقافات !
يا اخوانا ممكن سؤال ... ناس جون قرنق ديل بصحهم ... يعنى شنو بالله الزول دا ماسك فى الموضوع دا بدون ما يكون هناك توضيح من الحركة يعنى جون قرنق او اى (اخ ) اخر ...
بعدين رمضان دا لو عاوز يمووووووووت ما يشوف ليهو اى طريقة تانية عشان ينتحر وما يشيل الحروف والقوافى والثقافة العربية دمو ..... قايل نفسو ابن رشد

طلعتا مريخابي !

_____

يا حليل المريخ البيبقى ليهو ناس تكا وضرا .......نجم الدين واخوانو لحقوه امات طه

يا جماعة البوست دا مالو دقايق بس يغطس فى لجة المنبر ويمشى عربية الكماسرة ويمكن الفرملة .......ما تخلو روحكم رياضية .. دا المنبر مش الغابة يا ناس رمضان