الإمالة برواية راغب عن عجرم.. غايتو جنس رقة في الدنيا دي!!!

بعد الترحيب الحار جداً بالأعضاء الجدد... قلنا نكتب حاجة صغيرونة كدي عربون مشاركة بدل ما الواحد يقعد يمحق في الباندوث في المطايبةبلا شغلة... وكتر خير كل الناس الفرحو بيناوراحوا ... وشالوا من بوردينا طبلتو ومفتاحو...

يا جماعة نحن الغنا بتاعنا فيهو حاجات رقيقة جدا... وبالمقابل فيهو حاجات منتهى الغلظة... تماماً كما هو الحال في حياتنا العادية...
أمثلة للأغاني الرقيقة....(الفيها شوية انهزامية):
قبل ميعادنا بي ساعتين .. خليل إسماعيل
يخلق من الشبه أربعين... الطيب عبد الله
أريتك تبقى طيب إنت أنا البي كله هين... النعام آدم
ضربت أقول صباح الخير وأشوفك كيفن أصبحت...صلاح مصطفى ..

وأغنيات العتاب الرقيق برضو...
أعيش في ظلمة وأنت صباحي...رائعة محمد يوسف موسى وصلاح بن البادية...
وأنا في انتظارك ترجع بطرا الزمان الأول... إبراهيم حسين
خلاص يا قلبي كان خاصم... رائعة كجراي وإبراهيم حسين برضو...
والقائمة تطول..

يعني الرقة بتاعة غنانا... ما محتاجة ليها لكثير كلام.. ولا محتاجة ليها لإمالة حروف مد على الطريقة اللبنانية... برواية راغب عن عجرم...

ونواصل كان الحديس دا عجبكم.. وأهو في النهاية عربون والقحة ولا صمة الخشم..

أها نقوم نواصل العربون.. رغم كثرة الردود...

لاحظت برضو إنه عندنا غنا فيهو رجالة شديدة خلاس...أمثلة؟؟ طيب:
جايي تفتش الماضي.... رائعة الشاعر الرهيف التيجاني حاج موسى وترباس
صدقني ما بقدر أعيد.... ترباس

وفي عدم الوفاء...
قسى قلبك عليا ليه... وردي
يا خائن..... إبراهيم عوض..
الحنين البيا ليه ما قدروا... العمر من وين من بيشتروا... الأغنية بالمناسبة كلمات سمرقندية حسن...وغناء عبد الله محمد...

والله إذا لقيت فرصة تاني حا أواصل في الموضوع دا....
آسف للذين لم أتمكن من الرد على مداخلاتهم

ولكم الحب الشديد جداً

الاستاذ محمد صباح الخير

بالرغم من إنك قاعد تتأخر فى الرد على المتداخلين كتير
برضو حاسال عن الاغانى زى حبيبى تحت الزنكى والقمرية فوق الزنكى
وقالوا قطعة سكر * قلنا احلى وأنضر

بالمناسبة البيت الاخير ده شاعرها ابو قرون قال من قصايده الجادة
فيا ترى قصايده الغير كده تكون كيف - وما زلت فى إنتظار تصنيف
القصيدتين دييل

مع ودى

ها جنا ها

اسمك الزي قلم الرصاص المبري بالجيهتين ده

انت اغاني الشفيع دي ما كلها رقه

القطار المره فيه مره حبيبي

بي علي ما مره اليه طال شوقي

في الرصيف مستني وللثواني احاسب امتي

يظهر نورو الليه ديمه براقب

شفت ليك صبر قدر ده

والله اكان انا امشي طوالي

تحياتي محمود

والدار ترحب بيك

عبس

أخونا ترهاقا...
والله يا أخوي أول حاجة كتر خيرك على المرور الجميل... وأكان قايلني بدخل معاك في كلام جنس دا تكون بالغت عديل... غايتو أنا عارف إنه أبو قرون عنده قصيدة واحدة لو لم يقل غيرها لكفته...يا راية في جيش الفتى المهدى الإمام...حاميها ود تور شين أغر...

أما قطعة سكر الكان قاعد يغنيهانجم الدين الفاضل في شبابه فهي نص غنائي مجاز ومسجل في مكتبة الإذاعة السودانية زمن كان في لجان نصوص عارفة تماماً شنو يعني نص غنائي ونص جرائد...
تقديري الكتير

عبس يا راقي... والله ذوقك شرط عدييييل...
شكراً على المرور والحضور الأنيق...
فعلاً الشفيع كل أغانيهو رائعة ورقيقة...
والقطار أظنها واحدة من ثنائياته مع الرائع ود القرشي...
سلمت يا ذوق

قام اتعزز الليمون عشان بالغنا في ريدو



ساكت بث

زولي يا ساااااكت.... والله سعدت جداً بالحفرة...
محمد سلام كان على تلك الأيام... لحناً لذيذاً وحفلات وشارلستونات وخنافس ...إيييييييييييييه.... كان زماناً جميلاً فعلاً...

هيجت عليك ذكريات الصبا مووووش؟؟؟

ساكت بث لذيذة
ولك حبي الشديد

كدي باري لي حكايةالاحداق دي

نظره ياالسمحه ام عجن

عيونك علمن عيني بكا الخنساء

جننني ياخي العيون ياحلاتن

انا ما معيون ازاي ودواي خدود وعيون

عيونك فيها علم الطب

ياعيون المها ياعيون

امسكي عليك عيونك ديل

ديل عيونك ولا واحه

بي عيونك تقول لي تعال وتعال

هذا اولاً اما ثانياً نحن لسه شباب ياحاج

قد يشيب الفتى وليس غريباً ان يرى النور في القضيب الرطيب

وايضاً كذلك ثم لو

صورتك الخايف عليها

عذراً مكرر

زول ساااكت... والله ختري لكن..
طبعاً نحن مهما نعمل برضو عندنا شوية عدم الحيادية... دا لو ما قلنا عنصرية راسها عدييييييييل... أها عاد من غنا العيون دا كله أنا شايف نظرة يا السمحة ام عجن... وعيونك علمن عيني بكا الخنسا (كدي بدون همزة)... عشان نحن أهل بادي..
يقول أبو صلاح من ألحان كرومة.... في نظرة يا السمحة ام عجن:
"ليك السلام ما ولَّعنْ..
خديكِ بالنور يلمعن..
عدد النجوم ما يطلعن...
يرضيك ولي بيك يجمعن..
أعرف صفا الأيام...

ياخ والله الكلام دا بتاباهو...
لكن غايتو أحبك كدا تحت الحساب..

أخونا محمد مصطفي محمود يبدو جلياً من مساهمته هذه أنه رجل مشبع بالفن حد الثمالة وقد طرق موضوعاً يصعب على أمثالي الخوض فيه ومع ذلك كان لابد مما ليس منه بد ومن لم يمت بالعشق مات فطيس.
فليسمح لي عمالقة الفن والموسيقي في هذا المقام وعلى رأسهم أبا يعقوب الموسيقار يوسف الموصلي والأستاذ المبدع حمزه سليمان وبقية العقد الفريد بأن أتحدث في شأن الفن والموسيقي ولو من وراء حجاب.
تصنيف أخونا محمد للأغاني يفوق عمنا أبي الفرج الأصفهاني فأنت لم تترك موضع للتعقيب في هذا الموضوع وما دخولي هنا إلا تعبيراً عن إعجابي الشديد بهذا المقال. أخي محمد ماذا عن الجرسة والبكاء على الأطلال في الفن السوداني ، وأين تضع الأغاني الخاصة برقصة العروس من الفن السوداني. ولي عودة إن عاد في العمر بقية.

الملا عمر.. ياخوي ما خلعتنا...أنا قلت الليلة الزول دا حا يشبكني ليك ياخي الغنا حرام ويعلن الجهاد على هذا البوست ومن ثم على الكاتب والمتداخلين والمنبر والموقع والإنترنت والأقمار الصناعية.. أتاريك طلعت زول ذواق وجميل وحضورك أنيق... ومداخلتك وسيمة...شكراً على الإطراء.... والقصة يا دوبك كدا سلمتها لأهلها مما جبت سيرة العمدة أبو هديل والرائع حمزة سليمان...
عليك الله هسي في أروع من وداعاً روضتي الغناء ... وداعاً معبدي القدسي...يغنيها بمنتهى الفصاحة إبراهيم الكاشف وهو أمي (عليه رحمة الله)..

تاني شكراً ليك على المرور... وفي انتظار عودتك...ربنا يديك العافية ويطول عمرك..

أخي الكريم
بعد أن أطمأن قلبك أقول مستعينا بالله ماذا عن
قلنا نشرب مر يبقي مر في مر الله يا سلام فهل هذه المرارة ناتجه عن إنعدام السكر أم لأمر آخر خفي. وفي المعبد القدسي مقطع جميل ألا وهو "كسرت إبريقي والدنا وسكبت على الثري كأسي ، ماذا تحتوي كأسي المسكوبة على الثري وهل هي كأس الدوري أم كأس ديفيز أم كأس سيكافا وهل وصل بنا الأمر أن نكون ديوك عده نكسر ذات اليمين وذات البتاع أم أن الكأس لعبت بالرأس فكسرنا الإبريق والدنا وسكبنا ما تبقي في الكأس بتهاجاً برأس السنة ، وهناك رائعة زيدان إبراهيم لو الأماني بإيدي كنت أهديك عيوني وأسقيك من وريدي صحيح أن المشروب هنا غالي وأن الأمر لا يعدو كونه صيغة مبالغة غير أنه لو ثبت ذلك لنفر الشارب من المشروب خاصة وأن دماء الكثيرين منا تحمل طفيل الملاريا القاتل ، أما ناس المشاكل فتأتي عادة على شاكلة دابي الروم شرابو سموم وعطفاً على هذا الشراب فهناك الكثيرين من أبناء الوطن الذي يشربون تلك السموم كل ويك إند فهل معني هذا أنهم من فصيلة دابي الروم ، وهناك رائعة الكابلي نشرب شرباتك يا زينه فهل الأمر لأنها بتعمل شربات جميل زيها وزي عمنا الشهير في المحطة الوسطي بحري أم المقصود بذلك شربات فرحها خاصة إذا عرف أننا قوم لا نعترف كثيراً بشربات الفرح وأن المشروب المصاحب لصحن الكوكتيل في الأعراس قزازة بيبسي أو كوكا كولا أو ميرندا وربما ستيم تفاح.
وإن عدتم عدنا

العزيز الملا عمر...ياخى لا فض فوك...والله كلامك عسل وخواطرك خواطر فنانا متمكن من الفكرة والحرف معاً...يعني شاربها عديل ما شاء الله عليك...

أخشى أن يكون بعض البرالمة قايلين دابي الروم هو ذلك الدابي الموجود في الروم بتاعة الشات...هعععهععععهعع... عاد ما بكونوا بالغوا عديل موش؟؟ ولمعلومية الكبار برضو.. فليس المقصود به دابي امبراطورية الروم ....فالروم هي تلك المباني المهجورة في الخلاء.. يعنى الآسارات (بالسين) على قول المصريين.. فإذا كان دابي روم المصارية بيكون متغذي بفتات أكل الخواجات وما تجود به حركة السياحة المزدهرة،،، فدابي رومنا نحنا والله الجوع كاتلو عديل والعطش والجفاف هو المخليهو يشرب سموم... والسموم على ما أعتقد هي الهواء الحار الجاف وهو أحد العوامل التي تؤدي في تقديري لإحجام السياح السحاسيح من الوقوف على آساراتنا التي أصبح حالها يؤسر (برضو بالسين)....

الملا... ياخي ممكن تعتبر دي عودة عشان تعود...ولك الحب

آخر مرة فوق.. وخلوا المضرة والغتاتة الكتيرة دي

يامحمود ياراجل يافنان وبصفتي ليس من المنتمين لهذه القبيله
اسأل عن سر ذكر الفواكه والخضروات في اغنياتنا
والله بعضها يجوع عديل

البرتكان

صدرو جوز رمان

اسال العنبه الراميه فوق بيتنا

غصن الرياض المايل

فريع البان

زهرة الروض

وهكذا

ود حفرتي الحبيب زول ساكت..
والله كلامك لذيذ.... وعايزك تتذكر معاي رائعة محمد بشير عتيق "أذكري أيام صفانا":
كنا داخل روضة مافيش حد سوانا
غير أن القمري يصدح بي هوانا
من أغاريد فنه يسمعنا اسطوانة


إلى أن يقول : أهدي لي (تفاحة) بس أو (برتكانة)..

يا سلام على عتيق: النهر لينا اقترب.. والطيور تسجع طرب...عاملة مزيكة قرب
بعدين عندك... النجيلة..
وعندك برضو رائعة الكاشف: شوف توتي يا المحبوب بدت كالطفلة باكية تنهدت... حفاها دا النيل الشفوق

شاكر ذوقك يا زول وحابيك أكتر من زمان

اهم حاجه مايكون فاتك قريبك حاج طه ام بارح على النيل الازرق


ابداع

الله كييييييييييييف.. كمان حاج طه بيتفوت؟؟ لكن عماد ما بالغ شوية في القميص دا؟؟ولا يكون تلفزيوني الإل جي كعب؟؟

تخريمة : إل جي دا حين مو قريب سي جي؟؟