Post: #1
Title: دريـــدا...... سجيمـــان...اســامة الخــواض
Author: سجيمان
Date: 11-08-2004, 03:36 PM
من يومي القلت سلام يا المنبر.... في ناس هنا قاعد اقرا لهم...بانتظام.... صديقي بي مزاجو اسامة الخواض من ضمنهم....در ما ينزل بوست.... ادخل فيهو واقعد اقرا..... نضم شي اقبضو.... وشي يهفا عليّ.....لكن برضو قايل نفسي بعرف لو... واقبض لي كم كلمة وامشي..... بيت العزابة واخلف كراعي....واقعد اتبوبر بالكلمات الحفضتها....وواحد مرة من العزابة متكاتلين هو وكفيلو وزهجاااان ويسلم علي ابليس في الدقيقة اربعين مرة...ومشيت انا وقعدت اسوي في جنس نضمي الململمو من المنبر....قام علي وحلف عليهو بالطلاق تاني افتح خشمي علا يلحقني الرقدو....اها اليوم داك لقيت اسامة كاتب انو في زول اسمو دريدا مات.... والله وماكم طالبني حليفة.... وقت قريت البوست وعرفت دريدا دا.... في اللوال قايلو قاعد يبقى لي اسامة.....وقلت العزا واجب.... وا اسامة دا في امريكا وماهو فايق من الحوامة عشان يفرش ويقعدلو لي بكا........ انا امشي افرش في بيت العزابة....وقد كان....وجبت كراسة الكشف...وختيتها تحت اباطي... وبقيت أي زول يجي اشيل الفاتحة...واوريهو الكشف.....وكل زول بعد مايشرب الشاي ويقعد ويقول لي البركة فيكم يا سجيمان.... المرحوم دا كا ن عيان ولاّ شي؟... بعد ما اقشق دميعاتي بي طرف جلابتي...اقول لو ابدا....فجعة مات فجعة..والله قالو اتعشا في امان الله وشاف المسلسل..ورقد نام..... الصباح المرا جات تصحيهو لقتو لا ايد لا كراع......قاطع النفس.........ومرة دريدا حسي هي في حق الله......وبعد تمرق من حق الله مسفرنها اهلها....دريدا دا الله يرحمو حسي اكان مات موت سريري زي ياسر عرفات.....وخلى الناس اتجهزو للبكا مالو؟......غايتو انا انشاء الله ما اموت فجعة كدي...موتا سريرية باللوال لحدي ما اهلي يلقو لهم زول يديّنهم حق الفراش وبنياتي يمشن يجهزن ويتمشطّن للبكا عشان يبكن علي ابوهن سمح... واعرف انهم تب اجهزو حتين اموت......
دريدا موتو يعلم الله وجعني ودخل علي...وموتو تدخل علي العدو......اكراما لي دريدا.... قررت اعمل تقويم سنوي.... السنة الدريدية...يعني يكون عندي تلاتة تقاويم... السنة الميلادية...والسنة الهجرية....والسنة الدريدية...مثلا عام ا999 م...وعام 1420هجري.... وعام 120 م.د.....والميم دال دي معناها موت دريدا.....السنة الدريدية زي الميلادية 365 يوم..... اتناشر شهر..عشان حاج دريدا راجل بتاع تفكيك... كل شهر يكون اسمو يدل على هذا التفكيك.....وكالاتي:-
الشهر الاول يكون اسمو...... شهر صاملوة
الشهر التاني............... شهر وردة
الشهر التالت ........شهر مسمار اول
الشهر الرابع.....شهر مسمار تاني
الشهر الخامس........ شهر مفِكفِك
الشهر السادس... شهرمفك الاولاني
الشهر السابع.. شهر مفك الوسطاني
الشهر التامن ... شهر مفك الآخر
الشهر التاسع......شهر نجمنجم" بتعطيش الجيم.....ونطقها زي لما تقول بعاتي اكل زول نجمنجم والنجمنجم نوع من المفاتيح"
الشهر العاشر .....شهر مفتاح عشرة
الشهر الحداشر.... شهر مفتاح حداشر
الشهر الاتناشر......شهر شحم
وبي كدا يكون عشان تأرخ أي حدث مهم تقول مثلا حدث في غُرة صامولة من السنة الاولي لموت دريدا
يعني القذافي ممكن يغير تاريخ ثورتو من الفاتخ من سبتمبر الي الفاتح من نجمنجم
اختيار الشهور دا تمّ بعد دراسة وعناية فايقة....عشان الشفع يحفظوهن بسرعة...... يعني ممكن يقولوهن كدا:-
الصامولة ..و....وردتا....
المسامير الاتنين....و.مفكفِكين
المفكات التلات
و
نجمنجم
و
المفاتيح الاتنين
و
شحم
|
Post: #2
Title: Re: دريـــدا...... سجيمـــان...اســامة الخــواض
Author: bayan
Date: 11-08-2004, 08:02 PM
Parent: #1
سجيمان عندى رغبة كبيرة
انى امسكك من رويسك
واقوليك قول كه كه كه
واشخط ليك شخيط امشيك فيهو.. وكان زليت كدى الاربعين جلدة محمداك*
كل سنة وانت بخير مع ام الخير وعروستنا المجترة فوفو
|
Post: #4
Title: Re: دريـــدا...... سجيمـــان...اســامة الخــواض
Author: سجيمان
Date: 11-09-2004, 08:47 AM
Parent: #2
بيان
بجيكي صادي
اصلي قلت ادي البوستي دا رفيعة
بيني وبينك ماني قاعد ادور بوستاتي تبقى في القاع...."من الثوابت القُرادية"
|
Post: #10
Title: Re: دريـــدا...... سجيمـــان...اســامة الخــواض
Author: Abdel Aati
Date: 11-09-2004, 11:21 PM
Parent: #2
بيان
سجيمان دا ما قاعد يطشم ..
دا بيعمل حاجات تانية ..
عادل
|
Post: #14
Title: Re: دريـــدا...... سجيمـــان...اســامة الخــواض
Author: سجيمان
Date: 11-10-2004, 11:31 AM
Parent: #10
عادل عبد العاطي
Quote: دا بيعمل حاجات تانية ..
|
انا والحاجات اتفرقنا زمان...فراق الطريفي لي جملو.....
|
Post: #19
Title: Re: دريـــدا...... سجيمـــان...اســامة الخــواض
Author: bayan
Date: 11-10-2004, 06:36 PM
Parent: #10
عادل
قلت كدا؟
باالله رسل لى التفاصيل المملة
عشان عايزين ننعمل ليه ببلوغرافيا وسيرة ذاتية واحد من منظرى التفكيك..
اوعى اوعى اوعى يا سجيمان بتكون بتعمل الفى بالى لانه دا بيوديك
التيجانى الماحى.. ولو انى بفتكر انه كان اسع تكون قاعد فيها من بدرى ترعى فى غنم ابليس...
|
Post: #32
Title: Re: دريـــدا...... سجيمـــان...اســامة الخــواض
Author: سجيمان
Date: 11-12-2004, 01:07 PM
Parent: #19
| Quote: ولو انى بفتكر انه كان اسع تكون قاعد فيها من بدرى ترعى فى غنم ابليس... |
الخواض بي يخلي لو غنماية حايمة من غنم ابليس لي زول يرعاها؟..... لملمن كلهن وقعد يرعى فيهن......وطالت رعيتو مسيكين
|
Post: #12
Title: Re: دريـــدا...... سجيمـــان...اســامة الخــواض
Author: سجيمان
Date: 11-10-2004, 05:03 AM
Parent: #2
| Quote: وكان زليت كدى الاربعين جلدة محمداك* |
بيان دي عقوبة حدية....خليها 39 جلدة
|
Post: #3
Title: Re: دريـــدا...... سجيمـــان...اســامة الخــواض
Author: tmbis
Date: 11-09-2004, 00:07 AM
Parent: #1
يا دكتور ..
بتاعت الميكانيكية دي شديدة .. بتودرك
اسمع نصيحتي
|
Post: #5
Title: Re: دريـــدا...... سجيمـــان...اســامة الخــواض
Author: newbie
Date: 11-09-2004, 03:14 PM
Parent: #3
الداهي دا ما قالو فكفكوهو
|
Post: #16
Title: Re: دريـــدا...... سجيمـــان...اســامة الخــواض
Author: سجيمان
Date: 11-10-2004, 02:08 PM
Parent: #5
newbie
| Quote: الداهي دا ما قالو فكفكوهو |
حليل الكان بفكفك الغير صبح محتار يكوس فكاي
|
Post: #13
Title: Re: دريـــدا...... سجيمـــان...اســامة الخــواض
Author: سجيمان
Date: 11-10-2004, 09:32 AM
Parent: #3
تمبس
Quote: بتاعت الميكانيكية دي شديدة .. بتودرك
|
قصدك تكون ودرت دريدا؟
|
Post: #6
Title: "البكا" السايبيري
Author: osama elkhawad
Date: 11-09-2004, 05:54 PM
Parent: #1
سلام يا سجيمان
اكيد رمضان دخل في العضام
تعرف يا سجيمان دريدا يعتبر من ممثلي ما بعد الحداثة,
كما يرى بعض الدراسين.
ولذلك سيكون بيت البكا لدريدا ذا طابع سايبيري.
يمكنك مثلا ان تدفع في كشف البكا أونلاين,
بواسطة الكريديت كارد"بطاقة الائتمان".
ودا ممكن يتم عن طريق احد المواقع التالية:
بكا دوت كوم
عزاء أون لاين دوت كوم
فراش دوت كوم
مناحة دوت أورغ
دموع دوت كوم
فاتحة دوت كوم
صيوان بكا دوت كوم
بيت بكا دوت كوم
مواساة دوت اورغ
رثاء دوت أورغ
قدح دوت كوم
مراثي دوت أورغ
بشر الصابرين دوت أورغ
تعازي دوت كوم
عويل دوت أورغ
اهات دوت كوم
نواح دوت كوم
نحيب دوت كوم
نشيج دوت أورغ
ردحي دوت كوم
زفرة السوداني الوحيدة دوت أورغ
ويمكن للنساء توافقا مع ثقافتنا ان يدفعن "الختة",
بزيارة المواقع السابقة مع أضافة اسلاش دوت نساء,
أو اسلاش دوت حريم ,
وذلك بحسب درجة "جندرة" المعزيات.
ويمكن الدفع قبل او بعد دخول بيت البكا السايبيري
ونسبة لان دريدا كاتب عالمي,
فان بيوت البكاء السايبيرية مصممة بحسب كل ثقافة.
فمثلا في المدن السودانية فان بكا الرجال,
سيكون مصمما على شكل صيوان فيهو كراسي,
وفي كل كرسي مكتوب اسم الزول المعزي.
و بعد ما تختار كرسيك ,
ستجد ان اسمك اضيف الى قائمة الماسنجر الخاصة ببيت البكا.
ويمكن تسلم على أي واحد موجود اسمه في قائمة "المتواجدون الان".
كما يمكنك بالضغط على ازرار في الماسنجر ان تطلع على سيرة ذاتية للمرحوم.
واذا اردت ان تعرف كيف مات المرحوم ومتى بالضبط,
فيمكنك الضغط على ازرار مكتوب فيه "كيف ومتى مات المرحوم".
كما يمكن للمعزي ان يرى اين دفن المرحوم.
فما عليه الا ان ينقر على ايقونة في شكل مقبرة,
فتظهر له على الشاشة مناظر متعددة للمقبرة ,
وسهما يشير الى قبر المرحوم.
ويمكن للمعزي ان ينقر على القبر ,
فيظهر له الشكل الاصلي للمقبرة,
وما كتب على المقبرة.
واذا اراد مزيدا من المعلومات عن صنع المقبرة,
ومعلومات عن الشركة التي صنعتها,
والمهندس الذي قام بتصميمها,
فما عليه الا ان يذهب الى اللائحة الموجود تحت المقبرة.
واذا اراد المعزي ان يضع باقة من الزهور على القبر,
فعليه ان ينقر على ايقونة الزهرة,
ويملا الاستمارة المرفقة ,
ويقوم باختيار نوع الزهور وعددها والوانها,
ويدفع اونلاين .
وسيتلقى ايميلا حالما يتم وضع الزهور مع شريط فيديو قصير,
يصور مراسم وضع الزهور بحسب الطريقة التي يطلبها.
وهذه الخدمة تتطلب دفع رسوم اضافية يجب تسديدها اونلاين.
وهنالك اوبشن "اخيتارات " للطريقة التي يفضلها المعزي.
فللرجال هنالك يدان ممدودتان كايقونة للفاتحة.
وهنانك ايقونة على شكل يد لمن يفضلون ان يقولو "البركة فيكم".
وأما بالنسبة للمشروبات ,
فهناك أنواع كثيرة من المشروبات بحسب شركة الدليفري,
التي تخدم المعزي.
فما على المعزي الا ان يدخل عنوانه ورقمه البريدي.
فيظهر له اسم شركة الدليفيري,
وقائمة بالمشروبات الساخنة والباردة التي تقدمها.
ثم بعد ان يختار المشروب ,
يضغط على ازرار الارسال.
فتظهر له المدة التقريبية التي سيصله فيها المشروب.
أما بالنسبة للنساء,
فهنالك ايضا قائمة بطرق البكاء.
فهنالك اصوات بكاء متنوعة.
كما توجد ايقونة على شكل يد موضوعة على راس المعزية.
وأيقونة للفاتحة كما عند الرجال.
واذا اراد المعزي او المعزية ان يساهم بصينية لاية وجبة,
فعليها ان تذهب الى صينية عزاء دوت كوم ,
وهنالك لنك موجود في الموقع.
ولها ان تحدد عدد الاصناف وطريقة الطبخ,
وستقوم الشركة المعينة بعمل دلفري في الحال,
مع اخذ اجرتها من الكريديت كارت ,
وتقوم بارسال الفاتورة على ايميل الزبونة.
وعندما يريد المعزي الانصراف,
فما عليه الا ان يضغط على "لوق اوت",
وتتم في الحال ازالة اسمه من الكرسي الذي كان جالسا عليه.
والباقي يتموهو القراء
وارقدوا عافية
المشاء
|
Post: #7
Title: Re: "البكا" السايبيري
Author: bayan
Date: 11-09-2004, 06:06 PM
Parent: #6
مش قلت ليكم الخواض دا عسل.. بس لبس القمصان المنشية الكثير خلا رقبتو تتعسم..
شكرا لسجيمان الذى اخرج هذا الوجه المتميه فى التجهم المسقفاتى..
|
Post: #9
Title: Re: "البكا" السايبيري
Author: abuguta
Date: 11-09-2004, 11:16 PM
Parent: #7
جيد لى يا خالة انا والله كبرت خلاص
اول مرة افهم عربى من الخواض لغته جميلة وحلوة..بالوان زاهية قد صمم موقع لعزاء
الراحل المقيم دريدا...يماثل تماما موقع اتحاد اتصالات الذى دخلته امس وسجلته فيه سيرتى الذاتيه..عسى ان افوز بوظيفة فى هذه الشركة المغامرةالتى دفعت 10 مليارات من الريالات
فى عالم الاتصالات...فى المملكة..فهلا كتب لى النجاح..كنجاح الخواض
شكرا سى جى....ما تنسى بوست العيد..عشان انا اقدر اضرع فيه
وبعدين البنية الايام دى متابعة البورد..اكتب كلام سمح...
عن مساخة العيد
ولك ودى ِ
|
Post: #23
Title: Re: "البكا" السايبيري
Author: سجيمان
Date: 11-11-2004, 07:11 AM
Parent: #9
ابقوتة
| Quote: ما تنسى بوست العيد |
جاهز تب
بس انت جيب عكازك واحرسو...لانو نضمو حاااااار و في العضم
|
Post: #27
Title: Re: "البكا" السايبيري
Author: سجيمان
Date: 11-11-2004, 10:26 AM
Parent: #7
| Quote: شكرا لسجيمان الذى اخرج هذا الوجه المتميه فى التجهم المسقفاتى |
اها يا بيان
سحرتيهو
لمو فيهو بهناك.... وزنقوهو
جانا حانف وجيهو
|
Post: #21
Title: Re: "البكا" السايبيري
Author: سجيمان
Date: 11-11-2004, 05:03 AM
Parent: #6
اسامة الخواض
رمضان دخل النخاع
تعرف فكرة دي فكرة مجنونة جن.....و اتخيل بحلول الالفية الرابعة حتطبق وخاصة البشر حيهاجر جزء كبير منهم للفضاء....وحيكون التواصل بالصورة القلتها انت دي......
|
Post: #8
Title: Re: دريـــدا...... سجيمـــان...اســامة الخــواض
Author: ود الشيخ
Date: 11-09-2004, 11:07 PM
Parent: #1
سي جي واسامة شكرا ؤبث
|
Post: #24
Title: Re: دريـــدا...... سجيمـــان...اســامة الخــواض
Author: سجيمان
Date: 11-11-2004, 07:54 AM
Parent: #8
ود الشيخ
| Quote: سي جي واسامة شكرا ؤبث |
الحق يا ود الشيخ.....اسامة الليلة جانا مقلبّن...وقال لمو فيهو جماعة في زقيّق زنقوهو....وغيرو ليهو رايو
|
Post: #11
Title: Re: دريـــدا...... سجيمـــان...اســامة الخــواض
Author: osama elkhawad
Date: 11-10-2004, 03:42 AM
Parent: #1
عوافي اخي محمد الشيخ
فكرتي عن البكا السايبيري جاءت من قراءتي لخبر عن أن مقبرة شانغهاي الكبرى في الصين تعاني من ازدحام الزائرين.
ففكر احدهم في ان ينشئ على الانترنت موقعا خاصا بالمقبرة.
ويحتوى الموقع على مجسم للمقبرة يحوي كل القبور الموجودة واسماء الموتى.
وبدلا من ازدحام الزائرين في مكان جغرافي ضيق,
يمكن لأقرباء الميت وأحبابه ان يزوروا الموقع الالكتروني,
ثم يمكنهم العثور على مقبرة فقيدهم,
وبعد ذلك يمكنهم اقامة الطقوس المناسبة.
ولكن هذه المسالة اصطدمت بأن المكان الجعرافي ,
هو أصدق من المكان السايبيري المتخيل.
مع تقديري
المشاء
|
Post: #20
Title: Re: دريـــدا...... سجيمـــان...اســامة الخــواض
Author: bayan
Date: 11-10-2004, 09:12 PM
Parent: #11
I rest my case
   
|
Post: #15
Title: Re: دريـــدا...... سجيمـــان...اســامة الخــواض
Author: alfatih
Date: 11-10-2004, 11:36 AM
Parent: #1
سجيمان
شهر صامولة محلوجة ولا فاكة وبتنقط ؟
كل سنة وانت طيب
|
Post: #31
Title: Re: دريـــدا...... سجيمـــان...اســامة الخــواض
Author: سجيمان
Date: 11-12-2004, 12:21 PM
Parent: #15
Quote: شهر صامولة محلوجة ولا فاكة وبتنقط ؟
|
صامولة جديدة من الورقة.....وبقينا في حاو...و..وتًر
|
Post: #17
Title: Re: دريـــدا...... سجيمـــان...اســامة الخــواض
Author: محمد الامين احمد
Date: 11-10-2004, 02:22 PM
Parent: #1
لكن يا سجيمان التفكيك عندك
|
Post: #18
Title: Re: دريـــدا...... سجيمـــان...اســامة الخــواض
Author: bayan
Date: 11-10-2004, 06:32 PM
Parent: #17
سيجمان
نحن قررنا نستخدم البوست دا نشرح التفكيكية للناس بابسط الادوات..
حدسنى الناقد ابو الدرج الذى كان يدرس النقد الحديث فىبداية الثمانينات.. ان دريدا(دغيداغ بالفرنسى) وصل الى هذه النظرية
عندما كان خارجا من بار ذات (ساتردى)يخيط فى الشارع اها .. اها..
خطوة وراء وعشرة قدام لما قام تمارى له عامود متميه فى الظلام فأسرع الخطا اليه.. وحضنه(قرب يحضن الهواء) قولى كدى يا القزازة
طيرى و تش اتكسرى.. وقول كدى يا دريدار(دغيداغ بالفرنسى) اتهجم
وعاين ليها قوىىىىىىىىى.. اها قام قال الحاجة دى كانت بنية واحدة
ومليانة ست.. الجوهر المقسم للشكل و للمحتوى ..بيوريك انها قزازة
جن وفيها جن..وما ممكن تكون مفتوحة لاى تأويل سوى انها قزازة خمرة..
لكن اسعتية بعد اتكسرت كدى واتفككت وكل ساسوية جرت على حتة* بقت فاتحة للتأويل.. ممكن تجى ربة منزل تقول كان فيها زيت ويجى شافع ماشى المدرسة يقول كان فيها لبن وهكذا دواليك..
حريقة تحرق ناس الجشطالت من قالوا انه يدرسو اللغات بالطريقة الكلية
تانى مافى زول اتعلم...
*فجأة عرفتا ليه الخرطوم ما مبلطة وخالين الرملة فى الشارع
خاصة جنب عواميد النور..واى حكومة تجى بتحرص على كدا...
|
Post: #35
Title: Re: دريـــدا...... سجيمـــان...اســامة الخــواض
Author: سجيمان
Date: 11-13-2004, 08:12 AM
Parent: #17
محمد الامين احمد
| Quote: لكن يا سجيمان التفكيك عندك |
شكرا
اي حاجة معصلجة معاك وداير تفكفكها....تعالى انا افكفك لك حنانها زاتو
|
Post: #22
Title: Re: دريـــدا...... سجيمـــان...اســامة الخــواض
Author: osama elkhawad
Date: 11-11-2004, 05:35 AM
Parent: #1
القارئات والقراء
اسمحوا لي أن أعبر عن شديد أسفي لاشتراكي في بوست سجيمان عن دريدا.
وعندما راجعت ما قاله بولا لي,
وما أكده عبداللطيف قبل قليل,
تأكدت من أنني اشتركت بحسن نية في بوست يهزأ من دريدا.
وهي زلة لن أنساها في ما تبقى لي من عمر.
وللمرة الأولى تخونني حاسة شمي القوية ,
التي تكتشف شراك الغفلة وان أخفيت بمكر ناعم لطيف.
وكم من أفخاخ نصبت بمهارة الصياد المحنك الماكر,
لكن حاستي تلك كانت خير الماكرات.
ان أمثال بوست سجيمان بعد أن اعدت قراءته,
اثر تقريع بولا السديد لي,
وما أكده بعده صديقي عبداللطيف الذي لم أفهم جيدا مقالته لي عن البوست المذكور,
ذلك البوست وأشباهه لا يستهزأ من دريدا فحسب,
ولكنه يمسني في أعز ما حاولت ان انجزه ,
بصبر وجسارة وأعتزاز,
من قيم تعتمد النقد والتساؤل والمراجعة والتدقيق .
وقد كنت طوال سيرتي القصيرة في هذا المنبر,
أقف ضد أمثال ذلك البوست الذي يسخر من الحداثة وما بعدها ,
ومن كل قيم المعرفة المتسائلة والاكتشاف والنحت الخلاق.
اعتذاري يشمل فكرة القبول بالكتابة في البوست,
وحتى لو قمت فقط برفعه .
ولكنه لا يشمل فكرة الكتابة عن "بيت البكا" السايبيري.
أكرر اعتذاري عما بدر من غفلة ليس بالامكان أبدا تبريرها.
المشاء.
*صورة لبوست سجيمان "دريدا ..سجيمان ...أسامة الخواض".
*صورة لبوست "وداعا دريدا"..
|
Post: #25
Title: Re: دريـــدا...... سجيمـــان...اســامة الخــواض
Author: سجيمان
Date: 11-11-2004, 08:25 AM
Parent: #22
خسارة الزول الكنا قايلنو بوليص حركة
طلع داير لزة
|
Post: #26
Title: Re: دريـــدا...... سجيمـــان...اســامة الخــواض
Author: محمد هواري
Date: 11-11-2004, 10:13 AM
Parent: #1
سجيمان
إنت بتهابش مالك؟ إنت مالك ومال الناس المثقفين؟
زمان ما قالوا ليك ألزم علبك!
كل ما تجي تكلحها.. تقد عينها! إنت ما بتوب؟ أسأت أدبك مع بولا مسكوك جضموك لمن آمنت واعتذرت برضك ما اتعظت؟
زمان قالوا ليك الفكاهة الفطيرة الممزوجة بالبهارات الجنسية والكلام الـ "خارم بارم" (ودي تحتها خطين!) براهاما كفاية! عاوز تكتب، حتى الفكاهة، لازم يكون عندك موضوع وهدف أو على الأقل تناولك لازم يكون راقي. ما سمعت الكلام. قلنا ليك طيب: إنت أقعد اكتب كتابات مسطحة وفطيرة وعنصرية وبتضطهد المرأة وكدة زي ما عايز لكين دي أكتبها لي جمهورها البتلاقى معاك في حاجاتك ويصفق ليك كمان ويقول كتابتك زي كتابة الطيب صالح كمان..دا كله ممكن.. لكين أوعك والحذار الحذار تمشي تهابش الناس البحرهم غريق ديل بتغرق!
برضك ما سمعت الكلام
وآدي النتيجة!
|
Post: #28
Title: Re: دريـــدا...... سجيمـــان...اســامة الخــواض
Author: abuguta
Date: 11-11-2004, 11:36 PM
Parent: #26
انا اشهد بان سجيمان انقد المنابرة
استطاع سجى بدهاء النقاد..وفكره الثاقب ان يدحض عمل الرجل الذى سهر عليه ردحا من الزمن
استطاع ان يجر الخواض..الى الوحل الطينى..الى ان نجده شيخه واخرجة بكرامة الصوفى الواصل بربه
اتضح جليا بان الناس دول مش مسقفاتيه احرار انما مسقفاتية مقيدين ومقلدين...دريدا الشيخ الكبير وعلى يمبنه بولا وعلى شماله الخواض...بس انا عاوز اشوف لى كرسى عشان اجلس عليه الخالة نجاة المترجمة مش الخالة نجاة الخنفشارية...انا بديت افهم المرة دى كويس لكن عندها حب الوله البسيط للغرب وشلة الخواض ما علينا هى اضافة حقيقة اللبورد...
آآآن الان للعجب ان يستعيد الصدارة ويتربع على عرش النقد مرة اخرى بعد هذه الهبوب التى لم تحت انا قاصد تحت..ورقه واحدة من اوراق شجرته الظليلة..وثماره اليانعة....استطاع احد تلاميذ عجب الفيا
ان ينسف ببوست واحد منهجا كاملا لرجل يزعم انه ملك الادب والنقد والشعر....ياسجيمان كلنا تجار سوق ..وانت طبيب وانا مهندس والخواض صيدلانى...معنى كدا ساتوقع لك مستقبل زاهر فى النقد التفكيكى والجامد...بس اعمل حاسبك من الجامد اوى ممكن يكون مثلج جامد..حاول فك الكوبس لو كنت خاتيو فى الفريزر....وبعدين ضعه فى اناء ملىء بالماء الساخن...قبل الطبخ العين التانية حمر البصلة...اسرع شوية الشمس قربت تغيب...
اعتذر الرجل لو مررها كان فاتت على الصغار الزينا ديل .. الانزلاقة دى...لكن سجيمان عارف هو بعمل فى شنو...ياسجيمان نحن فى الوطن السيبيرى هولاء رجال ونحن رجال....استمر استمر استمر...
فلك معجبين مثل معجبين عجب الفيا....وخلى الناس تتفكفك وتلحق شيهخا المفكفك الاول..
فكفك ياسجيمان فكفك
هكهك يابقوتة هكهك
وخلو الدنيا تعكعك
اخونا العامل مك مك
دخل للبوست معكعك
قايل سيعجب السكسك
قام فى بسيطة اتلكلك
وجمد وما قدر يتفكفك
نادى شيخه الجك جك
ونجده بكلمة رك رك
فكفك
فكفك
سجيمان
فكفك
ودمت
المفكفك النطاااااااااط
ابقوتة
|
Post: #30
Title: Re: دريـــدا...... سجيمـــان...اســامة الخــواض
Author: bayan
Date: 11-12-2004, 00:44 AM
Parent: #28
| Quote: والخواض صيدلانى... |
الكلام دا ما صاح
لم ينل الخواض اى شهادة جامعية فى الصيدلة..
|
Post: #36
Title: Re: دريـــدا...... سجيمـــان...اســامة الخــواض
Author: سجيمان
Date: 11-13-2004, 12:48 PM
Parent: #26
محمد هواري
| Quote: زمان ما قالوا ليك ألزم علبك! |
والله لازم علبي علا هم قاعدين يهبشوني ...حقاااااارة ساكت الله يكفيك شرهم
|
Post: #29
Title: Re: دريـــدا...... سجيمـــان...اســامة الخــواض
Author: aosman
Date: 11-11-2004, 11:58 PM
Parent: #1
يا سجيمان بالله لو لاقيت رمضان قول ليهو شعبان قال ليك ترسل ليهو القروش مع رجب في شوال قبل ربيع ما يجي
|
Post: #38
Title: Re: دريـــدا...... سجيمـــان...اســامة الخــواض
Author: سجيمان
Date: 11-14-2004, 05:25 AM
Parent: #29
: aosman
Quote: يا سجيمان بالله لو لاقيت رمضان قول ليهو شعبان قال ليك ترسل ليهو القروش مع رجب في شوال قبل ربيع ما يجي
|
يا اخوي انا شغال يالتقويم الدريدي
|
Post: #39
Title: Re: دريـــدا...... سجيمـــان...اســامة الخــواض
Author: تولوس
Date: 11-14-2004, 05:30 AM
Parent: #38
ياخي اول حاجة كل عام وانت والعيال بخير
وشهر شوال ده سميتو شنو؟
شوال مفاتيح
ولا شنطة عدة احسن
|
Post: #40
Title: Re: دريـــدا...... سجيمـــان...اســامة الخــواض
Author: سجيمان
Date: 11-14-2004, 01:17 PM
Parent: #39
تولوس
كل سنة وانت طيب
Quote:
شوال مفاتيح
ولا شنطة عدة احسن |
نحن شغالين مع التقويم الشمسي...لكن انت لو داير تقويم قمري مت عندي مانع...اعملو لك...واصلي انا السنة دي ما عندي شغلة غير دريدا دا
|
Post: #33
Title: Re: دريـــدا...... سجيمـــان...اســامة الخــواض
Author: معتز تروتسكى
Date: 11-13-2004, 00:34 AM
Parent: #1
صرخه00
جميعنا نقف على حنين وذكرى00
و
عندما نقف على الاطلال يشتعل فينا الحنين بلهب الذكرى 00
*المشوار والاختيار كثيرا مايبدو صدفه وحقيقه عندما يتسع الافق تضيق العبارة فالموقف اكبر من ان تحصره كلمات00
كل عام وانتم بخير والسنه دى قبل الجايه تتحق امانيكم00 سجيمـــان 00
|
Post: #34
Title: Re: دريـــدا...... سجيمـــان...اســامة الخــواض
Author: معتز تروتسكى
Date: 11-13-2004, 00:36 AM
Parent: #1
صرخه00
جميعنا نقف على حنين وذكرى00
و
عندما نقف على الاطلال يشتعل فينا الحنين بلهب الذكرى 00
*المشوار والاختيار كثيرا مايبدو صدفه وحقيقه عندما يتسع الافق تضيق العبارة فالموقف اكبر من ان تحصره كلمات00
كل عام وانتم بخير والسنه دى قبل الجايه تتحق امانيكم00 سجيمـــان 00
|
Post: #41
Title: Re: دريـــدا...... سجيمـــان...اســامة الخــواض
Author: سجيمان
Date: 11-15-2004, 03:04 AM
Parent: #34
معتز تروتسكي
كل سنة وانت طيب
|
Post: #37
Title: Re: دريـــدا...... سجيمـــان...اســامة الخــواض
Author: MASSOUB
Date: 11-13-2004, 08:52 PM
Parent: #1
سي ....
عيد سعيد
كدة عليك الله وريني
مواقف باصات الكلاكلة بوين ?
مسؤب
|
Post: #42
Title: Re: دريـــدا...... سجيمـــان...اســامة الخــواض
Author: سجيمان
Date: 11-15-2004, 06:59 AM
Parent: #37
MASSOUB
كل سنة وانت طيب
| Quote: مواقف باصات الكلاكلة بوين ? |
الكلالكة صنقعت؟....ولاّ الكلالكة فكفكت؟
|
Post: #43
Title: Re: دريـــدا...... سجيمـــان...اســامة الخــواض
Author: بلدى يا حبوب
Date: 11-15-2004, 07:35 AM
Parent: #1
سيجمان
يعنى على كده اكون من مواليد مفك الاولانى
كل سنة وانت طيب
|
Post: #44
Title: Re: دريـــدا...... سجيمـــان...اســامة الخــواض
Author: سجيمان
Date: 11-15-2004, 10:49 AM
Parent: #43
بلدي يا حبوب
| Quote: يعنى على كده اكون من مواليد مفك الاولانى |
يعني انتي من مواليد برج ايفل..... والله بختك
|
Post: #45
Title: Re: دريـــدا...... سجيمـــان...اســامة الخــواض
Author: سجيمان
Date: 11-16-2004, 04:22 AM
Parent: #44
فووووووووق
عشان الفائدة تعم..
|
Post: #46
Title: Re: دريـــدا...... سجيمـــان...اســامة الخــواض
Author: nazar hussien
Date: 11-16-2004, 06:20 AM
Parent: #45
يا سجيمان انت لا هسي قاعد تفك براك؟ كل سنة وانت طيّب...
|
Post: #47
Title: Re: دريـــدا...... سجيمـــان...اســامة الخــواض
Author: سجيمان
Date: 11-17-2004, 02:59 AM
Parent: #46
| Quote: يا سجيمان انت لا هسي قاعد تفك براك؟ كل سنة وانت طيّب... |
مش بيقولو لك الزول دا فكت منو؟..............
كل سنة وانت طيب
|
Post: #48
Title: Re: دريـــدا...... سجيمـــان...اســامة الخــواض
Author: سجيمان
Date: 11-18-2004, 05:57 AM
Parent: #47
شهر فووووق الاخراني
|
Post: #49
Title: Re: دريـــدا...... سجيمـــان...اســامة الخــواض
Author: ayooby
Date: 11-18-2004, 12:26 PM
Parent: #48
والله يا سجيمان حيرتنى !!!! جنك كلكى غايتو وفاطى سطر كمان عشان كدة تقعد تفطفط لينا فى الحروف ...... ولا يكون بتفكفك فيها... كدى ياخوى بالمناسبة دى فك لينا حاجة.. !!
|
Post: #50
Title: Re: دريـــدا...... سجيمـــان...اســامة الخــواض
Author: أبوالريش
Date: 11-18-2004, 12:50 PM
Parent: #49
سجيمــان..
عيـد مبارك وكل سنـة وانت بخيـر.
يا زول أخيــر ليك أبعــد روحـك من تفكيك دريــدا دا.. شــوف ليك أى ورشـــة تانيـة..
دا عشـان تلقى المفك البتفك بيـه زاتـو، تحتـاج تطبق نظريـة البنيـويـة أو ما قبل الحـداســة، (على قول بيـان)، عشـان تجمـع المفك..
بعـدين لازم تفكفك المفك قبل الصـامـولـة!
التلويحـو عكـس...... حجــروا يقلـع وريشتـو بتغطس
|
Post: #52
Title: Re: دريـــدا...... سجيمـــان...اســامة الخــواض
Author: سجيمان
Date: 11-19-2004, 03:52 AM
Parent: #50
ابو الريش
كل سنة وانت طيب
| Quote: يا زول أخيــر ليك أبعــد روحـك من تفكيك دريــدا دا.. |
اها يا ابو الريش ما دام قلت كدي....هادي بعدة
لكن ات با اخوي ماك خايف من التقريع؟
|
Post: #51
Title: Re: دريـــدا...... سجيمـــان...اســامة الخــواض
Author: سجيمان
Date: 11-18-2004, 02:10 PM
Parent: #49
ايوبي
كل سنة وانت طيب
| Quote: ... كدى ياخوى بالمناسبة دى فك لينا حاجة.. !! |
افك ليك ونص
انت رجرجة زيّ
|
Post: #53
Title: Re: دريـــدا...... سجيمـــان...اســامة الخــواض
Author: أبوالريش
Date: 11-19-2004, 06:20 AM
Parent: #51
دى نصيحــة يا سجيمـان، مـو تقـريـع..
ونا النصيحـة بضبـح ليهـا خـروف من كترة الفـرح بيهـا-
|
Post: #54
Title: Re: دريـــدا...... سجيمـــان...اســامة الخــواض
Author: سجيمان
Date: 11-19-2004, 09:36 AM
Parent: #53
ابو الريش
| Quote: دى نصيحــة يا سجيمـان، |
النصيحة اريدو البي يريد الشيخ...انا يا ناس بريدو
|
|