حزن تماضر النبيل ..

"انا قاااعدة" فعلا

هذه المرة عاصرة "فراش البكا"

بكا يا تراث ما خلونى ابكيه براى...

اجمل ما تكون الاحزان عندما يتشايلها معك الحبان مثل توب القبايل...

كل زول ماسك طرف ومغطين ليك شرك وحرك ...وبالينو ندى وراشينو حنين


ما حسيت بانى براى ولايوم...ولا لحظة...

ماحسيت بانو ابوى الفات فات...ولا مات

حسيت برحمة دعوات الناس تتنزل على قبرو مطر..مطر برااااحة رطبانة ونسيمها عليل...رحمة رحمة رحمة

بركة البعرفكم

بركة البعرف كل الناس المنتشرين فى سطح الارض

زول زول...

بركة الما مت زمان وما جيت لى عند الباب ده ودقيتو

بركة الهكر الشاف بى عينو محبتكم واخلاصكم وتواددكم وتعاطفكم

يازول مافى دنس
مافى حزن غير حزن طبيعى ...ومكتوب ..

على زول مات بستاهل نحزن فى موته...لكن ما قدرنا نقاوم فقدو

اهو بدا يتقمصنا ...روحو بدت تظهر تانى وتتقمصنا...

حنمشى على منواله وايقاعه

ونرش الدنيا ..زى ما بعمل كان ...فرحة وبعد الفرحة فرح
متجدد كان
رااااسخ ومتجدد...

زى ما بتطلع كل يوم شمس جديدة على الدنيا ...وكانها تطلع للمرة الاولى...

ده بس كان هو...

اتقمصنى...واتقمصتو

وبحاول اشع زى ما بتشع اوكاتو

واحاول اضوى ...على بركات وهجو

واحاول اتمدد بره مساحات "المفروض" "والعادى" ...على قدر ما اقدر اهزم محدودية امكاناتى واطوع فيها

"قصورى الذاتى"...واتمدد..واوصل...

بتمدد واوصل

وما ندمانة على حاجة...

وما زعلانة ولا غضبانة...

بس فاقداه

تماضر شيخ الدين - نقلاً عن بوست (الهكرز والحب) لتراث

حزن ناعم وعميق ..
ومحنه وافيه ..

تراث:
ترى هل يمكن أن يكون الموت واحده من انجازات الانسان ؟

فعمنا شيخ الدين كان موته كبيرا..


...
طلال

شكراً ياطلال
شفت كيف تماضر جميلة ، حتى في الحزن وقد وصل مداه ؟

تراث....

طلال..

شوفو حزن محجوب شريف على المرحوم عبد الكريم ميرغنى:


يابا مع السلامة
ولى سكة سلامة وللحزن المطير
يا كالنخله هامة
قامة واستقامة
وهيبة مع البساطة واصدق مايكون
راحة ايديك متل الضفتين
ضلك كم ترامى
حضنا لليتامى

خبزا للذينا ..هم لا يملكون
وبنفس البساطة
والهمس الحنون
ترحل يا حبيبى
من باب الحياة
لى باب المنون

ياتلك الترامس
وينو الصوتو هامس
كالمترار يساسق
ويمشى كما الهفيف

ينده للبنية ويديها الحلاوة
يمرق جنو منو محبوب الشقاوة
يستنى النصيب الدفو والنداوة
والشذى والعبير

حيث الموية عذبة فى الوادى الخصيب

الشمس البتطلع
بلت منو ريقا
والنجمة البتسطع فيهو تشوف بريقا



شكرا لك يا تراث

دائما تجملنى ...

وهذا فقط نابع من جمال روحك الفياض

وانت يا طلال

يا ربيع هذا المكان وياسمينه..

صدقونى ازداد باطرائكما قامة

أرفع عزائي الحار اليك ايتها الاخت الكريمة تماضر
والى هشام والى بقية اسرة شيخ الدين الكرام
آلمنا الخبر والله
وقد كنت على سفر لذا تأخرت التعزية
فارجو قبولها عبر هذا البوست الرقيق يا تماضر ويا هشام
وشكرا لك عثمان مسرح والى اماني والوليدات

شكراً تماضر على طلتك الجميلة ، على النص الجميل لشاعرنا الجميل .
شكراً محمد سبيل .. ليك وحشه .
رحم الله فقيدينا الكبيرين : شيخ الدين وعبد الكريم ميرغني ، يرحم الله جميع امواتنا ببركة أواخر هذا الشهر الكريم .