وداعا، والي لقاء.

جرت عادتنا الاعلان عن ابتعادنا، كالتزام اخلاقي، تجاه الحوارات المفتوحة، وحتي نوفر المشاق علي من يودون، فتح بوستات موجهة لنا.

*عجب الفيا، حاتابع من البعد، حوارك مع استاذنا بولا.

*عادل عبد العاطي، معليش، ان في عمر او رجعت قريب، حاواصل موضوع العميد عبدالعزيز، فك الله اسره.

في الختام، وفي نهاية دوام الدواس، الحالي، التحية للجميع، وبالذات خصومي فكريا، والي لقاء، والعفو والعافية.

اتهزمتا؟؟؟؟؟
ما كان شكلك بتتهزم يا بشاشا
اختلف معك فى بعض كتاباتك
واختلف معك الان فى قرارك بترك المنبر
من تغضب منه واجهه و عنفه و لمه لكن لا تشح بوجهك عنه
فلربما الغضب و المواجهة و العتب يفتحان بصيرتكما على نقاط تلاق لم تكن فى الحسبان
اها
حتشيل معاك بوست الصورة حقتك برضو؟؟
و ح تزوغ من الجائزة؟؟

يابشاشا

بهار البورد عميق الفكرة والمحتوى
امثالك ينبغى ان يبقوا
اصحاب الرؤية الواضحة والمبدأ الراسخ

لا ادرى ماهى الاسباب ولكن اتمنى ان لاتطول غيبتك
فغيابك سيكون خصما على الجاد والنافع


كل المودة

اشراقه

الأخ العزيز/ بشاشا.

قد أتفهم بأنك تريد أن تأخذ إجازة قصيرة من البورد, ولكن أي استقالة من البورد تعتبر مرفوضة جملة وتفصيلاً , لأنه مازال الطريق طويل. نحن نحتاج لقلمك وفكرك لكشف هولا البلطجية
الذين يريدون أن يورثوا الدنيا والآخرة.

دينق.

Stay around unless you feel you don't have to
when you feel you need to (or have to), don't think twice.
.stay well

قشة ماتعتر ليك

Quote: قشة ماتعتر ليك

والله ياد الشيخ سبقتنى عليها...طبعا بشاشة زول كويس وود ناس وحبوب ..بس مشكلتو انو ما عارف مشكلتو..اى زول اختلف معاه دنيا هومصنف عنده كوز حتى لو مسيحى بكون كوز مسيحى....وبعدين بحشر نفسه فى كل شى..ما بعرف لكل مقام مقال...امس شفته داخل مع عجب الفيا وعبد الله بولا...ديل ياخوى الشعراء الزينا كدا ما بمدو رقابن خلك انت الراكب على الخازوق عرى....والله كنت عاوز ارد عليك فى بوستهم لكن بركة..المارديت ....اسى كنت اتحسست وظنيت فى نفسى انا سبب حردك...لووووووووووول
معليش يابشاشة
من الكتابة الخرباشة
الكوز دقنو زى المكشاشة
ودائما بحب الحراشة
خليك زى الفراشة
تطير فى المطرة الراشة
بدون مناشة
ياولد ياباشا
انت فيك طباع اساسى الكوز...ها ها ها ها...هو الله مو كوز...لكن انت شيوعى.ها ها ها ها
ومالون الشيوعية اجدع ناس
بس هناية دى بتكون فقتدك يارايع....امشى اجازة وتعال تلقانا بنفس الصورة نضحك معاك فى كل شىء لكن
ما بنسوام
ما بنجامل
ما بنحامل
ولك ودى
احمد صديق

الاخ بشاشا
ممكن تاخد الاجازه المحتاج ليها,,مافى مشكله ,,بس يوم الجمعه 24 ديسمبر 2004 عندك معانا مواعيد .. و اوع من الزوغه

الساعه 10 صباحا بتوقيت كاليفورنيا ذلك اليوم خليك جاهز و جنب كمبيوتر و عندك مايك جديد من راديو شاك

تمام؟

كمال بشاشا والهويه السودانيه فى البالتوك

تحياتى

النصرى امين

الاخ الكريم بشاشا،
سرن اقمى

لم تخبرنا بسبب مغادرتك البورد
ارجو ان تبقى و تواصل الحوار فكم من نقاشات هامة ابتدرتها. ابق من اجل ان يستمر خطاب السودان الجديد عاليا فى البورد.

لك التحية و التقدير

ِشيْْه مُنوّر امبرو

وين ماشين يا بشا وبشا

حتكون لك وحشة و بيت مال وعيال

وكل سنة وانت بالف خير

مودتى رغم العفار وادواس واطى الكهربة

الاخ الكريم بشاشا،
سرن اقمى...
ان شاء الله غيبتك ما تطول...والله ما لاقي لي زولن عندو مبادئ وبدافع عنها زييك...على بالحرام.

وكمان ِشيْْه مُنوّر امبرو

أنور

وينك يابشاشا ليك وحشة

اكيد اجازة وتعود

ما خالص امنياتنا لك يوقت رائع

فتشت لغة تانية غير العربي العندك معاهو عقدة
دا عشان اكتب ليك بيهامالقيت لغة قريبة

ولكن على العموم اذا فهمتا اللغة دي معناها انك فيك شوية بهار عربي
زي دينق العماملين توم عربي

تجينا بالسلامة بشبوش

عميد الظلاميين

تمشى و تجى بالسلامة يا بشاشا .

عليك الله ما تطول ..
فى باقى دواس واقف لى فى حلقى .
و بعدين موضوع ديوب و كدة ..
ياللا يا حبة .. بالسلامة .

لانا مهدي،
اشراقة صطفي،
دينق،
كوستاوي،
ود الشيخ،
ابقوتة،
النصري امين،
ندي علي،
بيان،
بشار صغر،
شمهروش،

اولا معزتي، ليكن، ليكم "عشان الجندريات"،
ثانيا اخوكم، فقط ماخد اجازة، او تب مافايت البكان ده، حتي لو طردوني، بهكرو!

فعادة بعلن عن غيابي من باب "الذوق"، ثم بيني او بينكم، انا لقيت دي اسهل طريقة للاقلاع!

في الختام سمحو لي بي بعض الردود الخاصة.

*اشراقة مصطفي، عاجز عن الشكر لي كلماتك، بحق شخصي الضعيف.

* لانا مهدي، دايما "مخوذقة" الناس معاي!!!

* دكتورة ندي مشروع حوارنا حول مفاهيم تحرر المرأة قائم علي قدم وساق، المرة الجاية وهو موضوع في غاية الاهمية يادكتورة.

فلحدي المرة الجاية ففي "ارتن حسبن".
خالتي معاي هنا، فتضحك شديد علي فكرة بشاشا يتكلم "انداندي"، او هي ماعارفة انا طالع بيكم العالي بي جاي كيف!!!
الطشاش في بلد العمايا، شوف يادكتورة!

*دكتورة بيان، اجمل مافي صحوبيتنا دي، اننا واضحين مع بعض من غير زعل!

*النصري امين بخصوص ندوتكم العامرة، غايتو انسب يوم لي الاحد. يوم الجمعة والسبت كمان شغال! خلي المواعيد بي مواعيد اريزونا مش كالفورنيا!

بعدين لومعاكم صحبي الظلامي جمال هوبلس، هو بيعرف دربي كويس، او بعدين اخوك محتاج لي تمارين اذا لابد من معدات خاصة او كده!


مرة اخري خالص مودتي، وفي نهاية اليوم كلنا اخوان واخوات سودانيات وسودانيين، كيزانا كنا، ام سودان جديد!

صدقوني برة المنبر لااستعمل هذه المصطلحات خالص، الا من باب الملاطفة.

في غربتنا دي، راسمالنا، علاقتنا بي بعض كسودانيين اولا، ثم اي حاجة تانية، ثانيا.

فالوداع، ومعليش مقدما، ماحاقدر ادخل للبوست ده للرد مرة تانية، فالعفو والعافية.

اخوكم المتوحش بشاشا!!!!!!!!!!!!!

ما شي وين يابشاشة؟؟

اتمني الرجوع السريع ..

عادل

انا من سافوز بهذا العطاء بشاشه.؟ لا بل كلنا!!!....]

الصديق بشاشة

رمضان كريم

اتمنى ان تعود قريباًَ

وربنا يهون القواسي

اذا ذهب الحمار بام عمرو فلا رجعت و لا رجع الحمار

بشاشا الغلباوي
في إنتظار عودتك الوشيكة، حتى ذلك الحين كن بخير.

سافهم هذه الغيبة في اطار انو الواحد بحتاج احيانا ان يروق اعصابه شوية ويجدد نشاطه وحيويته ودا طبعا ما بطول كثير عشان كده اقول ليك
اجازة سعيدة وعودة حميدة ونحرس الدار لما تجي بالسلامة.

اشكر الاعزاء بشا وبشا انهم عادينى اصحابهم..
يا بشاوبشا انا انتمى الى اسرة من سبعة ابناء وبنات
كل شخص لديه توجهه الفكرى الخاص.. وتعلمت ان احبهم ويحبوننى
ومن هذه التجربة تعلمت ان احب كل من يختلف عنى ما بقى الاحترام..

وتمشوا وتجو بالسلامة

Quote: والعفو والعافية

Quote: صدقوني برة المنبر لااستعمل هذه المصطلحات خالص، الا من باب الملاطفة، في غربتنا دي، راسمالنا، علاقتنا بي بعض كسودانيين اولا، ثم اي حاجة تانية، ثانيا.

أمنياتي الطيّبة بالتوفيق للزميل بشاشا (رغم قسوته الفائقة معي بالذات)، لاقت كلماته التي نقلتها هنا استحساني وأكّدت لي على أنّ تقييم الشخصية عبر قلمها قد يظلمها أحياناً، كما ذكرتني هذه الكلمات قولي لصديقي قبل أيّام قلائل أنّ أوّل مقابلة (على الطبيعة) بين المتخاصمين في المنبر الحر تعني صلحاً غير مشروط!
وبرضو العفو والعافية... مافي أيّ مشكلة.
أحمد الريّح

بشاشا البشوش
رمضان كريم ..ولو انه خلاص ودع
اجازه سعيده ..وتمشى وتجى بالسلامه
وكل سنه وانت بالف خير