ان الكريم لكالربيع تحبه....والطمبور..اهداء الى عزابة كوريا...

Post: #1
Title: ان الكريم لكالربيع تحبه....والطمبور..اهداء الى عزابة كوريا...
Author: AnwarKing
Date: 10-20-2004, 03:29 PM

سلامات ورمضان كريم...
تصوموا وتفطروا على خير...

ان الكريم لكلربيع تحبه للحسن فيه....وتهش عند لقائه...الخ...

المهم...تنهمر عليك الالاف التهانئ بالعمل المبدع و العمل الممتع وسيل دافق من الصفات التى أشتكى منها يا ناس المنتدى ..كفاية مجاملات ..مسختوها ..معتصم الطاهر فى سودانيات... ( يا مبدع, يا رائع)

والعجب لو كانت (مبدعة أو رائعة) أييييييييك كلام تاني...

دا رأى احد متابعي المنبر (الحر) هنا فى كوريا...الصديق هيثم عبد الودود...

وحيث انني أفطر معهم فى كل نهاية أسبوع فى العاصمة سول... قلنا نبلغكم بعض انطباعات متابعي ما تكتبون من كوريا...

الشقة تحوى العديد من الشباب 4 فى عين العدو بقيادة الدكتور عبد العال,و العريس (العازب حالياً) ياسر سحنون والصغير الكبير مصعب...

والماهر هيثم....

لا يفوتكم الكلام الكوري بالطريقة السودانية هنا... زى ايام مصر والبلنتيات الكان الشباب بيعملوها ( ناس عندك فأءة بدلا‘ عن عندك فكّة لصاحب السوبر ماركت) وانا عندى وحده مشهورة هناك فى إيجار شقة ...

هيثم زول ظريف ومتابع جيد لما يكتب هنا...ولديه ردود كثيرة فى مواضيع كثيرة أهمها العنصرية والتعايش السلمي فى السودان من وجهة نظر جلابية صرفة.

يحكي ليك عن حبوبتهم , كل ما تشوف ليها زول بيكتب فى جواب تسألو: يا ولدي الجواب لى منو؟
يقول ليها لى محمد أخوى فى السعودية.
الحبوبة: طيب عليك الله وقّف سلامي ليهو... انا وقّف سلامي جى أصلو ما كان واقعة لى فى البداية..بعدين عرفتا معناها سلّم لى عليهو...

واصبحت مصطلح بين الشباب هنا: توقيف السلامة بمعنى الظهور فى مكان ما...

يحب أغاني الطمبور وكل يوم زارينى ليك... يا أنور أغاني الطمبور دى ما شوية... وبالله الفنان الفلان الفلاني دا ما خاتي ليهو حاجة مالك؟

والنعام آدم ما عارف ايه...وعبد القيوم...

لحدى ما أنقذني ليك الحبيب ياسر سحنون فى مرة...قبضهم ليك بالثابتة كلهم:

فنان الطمبور ما عارفينو بيغني ولا قاعد يتونس؟!؟_________________

يا محمد يا جناي... جيب لي معاك رطلين سكّر وتمنة شاى...
واحد لى حبيبة قساي... والتانية للجنيات المعاي...

بالله يا أخوانا...ما تستاهل يقولوا لى هيثم: يا رائع ويا مبدع... قاعد تسمع لى فى جنس الونسة دا؟؟؟

الله غالب. يا جنجويد.

أنور

Post: #2
Title: Re: ان الكريم لكالربيع تحبه....والطمبور..اهداء الى عزابة كوريا...
Author: AnwarKing
Date: 10-22-2004, 02:32 AM
Parent: #1

الجالية السودانية فى كوريا ليست كبيرة...فالمقيمين باستمرار حوالي ال 50 شخص...
والحميمية تجمعهم وكل المناسبات الوطنية والقومية والاجتماعية يحضر فيها الجميع...

يوجد مكتب لرابطة السودانيين هنا يقوده الأخ الصادق الأرباب (الهميم النشيط الكريم)...

ودائماً ما نستقبل الزوار السودانيين عبر مناشط الرابطة التى تقيمها من استقبال, وداع ومناسبات فى كوريا أو السودان.

من اليمين الى اليسار مصعب( الصغير الكبير), خالد العريس (شهر عسل 4 شهور),هيثم (الخطيب)و ياسر العريس (العازب).

كانت هذه بداية رحلة كاربة فيها الكثير من الطرائف والنكات.

أنور